Total Pageviews

Saturday, January 27, 2007

عيد الشرطة المجيد


متأخرا بعض الشيء , ولكن لا بأس , لا تزال أمامي فرصة لنشر هذه التدوينة , فهي تصلح لكل الأوقات وكل المناسبات السعيدة , سواء أكانت عيد الشرطة أو حتى عيد البطيخ .

24\1\2007
كنت عائدا إلى منزلي بعد يوم عمل مرهق , إنه الأوتوبيس المكيف الذي ما إن أراه قادما من بعيد حتى يخفق قلبي بشدة كمن رأى معشوقته , فقط أخشى أن تجرفني المشاعر يوما فأحتضن الأوتوبيس , ربما يتم تخليد ذكراي بإطلاق اسمي علي محطة سفير باعتباره المكان الذي ضحى فيه الشهيد أشرف حمدي بحياته في سبيل عشقه للمكيف .
بعيدا عن هذه الفانتازيا التي يسببها إرهاق العمل غالبا , دفنت نفسي في مقعد بجانب النافذة كالعادة ونمت كالقتيل , فجأة فوجئت بمن يوقظني , شاب في مثل سني تقريبا يبدو عليه العته
ــ لو سمحت حضرتك ممكن أسألك سؤال.
كدت أقول له : لأ مش ممكن , وأواصل نومي . الا أن قوانين اللياقة تحتم أن أجيب :
ــ اتفضل
ــ هو النهاردة كام في الشهر ؟
ــ 24
وقبل أن يسمح لي باستكمال نومي , ألقى بقنبلته :
ــ يعني بكره يبقى كام في الشهر ؟
ــ 18
واصلت نومي وأنا ألعن أبو الهطل الا أنه ايقظني بعد قليل :
ــ طب معلش حضرتك عندي سؤال تاني
ــ اسأل يا حبيبي
ــ هو الواحد لو حب يبعت تلغراف يبعته منين
ــ من مكتب البريد اللي جنب بيتهم
ــ لازم المكتب اللي جنب بيتي ولا أي مكتب
ــ أي مكتب
ــ طب ينفع أبعته من سنترال ؟
ــ روح السنترال وأسأل
ــ السنترال اللي جنب بيتي ؟
هل أقتله يا ربي أم أكتفي بالقفز من الأوتوبيس ؟
بعد محاولات مضنية للنوم مرة أخرى نجحت في إغلاق عيناي للحظات قبل أن :
ــ هو الواحد لو بعت تلغراف تهنئة بعد المناسبة بكام يوم كده ينفع ؟
ــ آه ينفع
ــ يعني مش لو بعته في يوم المناسبة نفسه يكون أحسن
ــ آه يكون أحسن
ــ ولو اليوم اللي قبله
ــ يكون أحسن
ــ طب بص حقولك , اليوم اللي قبله ولا اليوم نفسه ولا اليوم الي بعده , انهي أحسن ؟
ــ اليوم اللي قبله
المصيبه أنه مسكين مصاب بالبله , لا يمكنني زجره فهو ليس مسئولا عن مرضه , ولكني أيضا من حقي النوم بعد ارهاق العمل الذي لا يرحم .
ــ بقول لحضرتك ايه , لو عاوز أبعت تهنئة بعيد الشرطة أقول ايه
ــ قول اللي انت عاوزه
ــ يعني ممكن أقول : السيد اللواء فلان الفلاني نهنئكم بعيد الشرطة المجيد ؟
ــ مجيد ؟ لأ هو مش مجيد ولا حاجة .
ــ يعني أقول ايه ؟
ــ قول كل عام وانتم بخير
لم أستطع مواصلة الطريق بجانبه فقررت تغيير مقعدي قبل أن أصاب بالبله أنا أيضا , الا أن هذا الشاب المسكين لم يدرك تماما قوة الدعابة التي نطق بها , عيد الشرطة المجيد , طب بذمتكم مش حلوة ؟!

15 comments:

raghda safwat said...

حلوة يا اشرف و الناس العبيطة كتير متحطش فى بالك ... لو بقت هيصة كده هيبقى كمان اعياد الميلاد بتاعتنا مجيدة
سيب لى اميلك عشان عاوزة اسالك على حاجة

رغدة

هيثم ابوعقرب said...

كل سنه وانت طيب
بما انك
نقيب اشرف حمدي
زي م كتبت قبل كده

daktara said...

اه
طب بالمناسبة دي كل سنة وانت طيب بالعيد المجيد
معلش اصل الهطل موضة اليومين دول في البلد

ahmEd_H said...

عيد الشرطة المجيد

انت اتاكدت انه مصرى !!

عامة مش مشكلة

عجبنى جدا انك صبرت عليه

و كويس انى ماكنتش مكانك

MAKSOFA said...

معلش بقي
راحت عليك نومه بسبب واحد أهطل

وكل سنه وانت طيب
وعيد شرطه مجيد

عروسة النيل said...

نهنئ مصر و نهنئ أنفسنا بعيد الشرطة المجيد
.
ههههه

أشرف حمدي said...

رغدة صفوت
أصغر وألمع صحفية فيكي يا مصر
انتي فين يا رغدة ؟
ميلي هو
ashraf_hamdi@hotmail.com
وعيد شرطة مجيد :)

مكسوفة
بتغيبي عننا ليه ؟ أشكر تشريفك ليا النهاردة في المدونة
تحياتي

أحمد
واضح أنه مصري فعلا , هو اتهطل من شوية ؟

ME said...

آه صحيح .. هو انت ايه اللى صبرك عليه؟؟ مش كفاية انه صحاك من النوم فى المكيف.. اصل انا كمان كل ما كنت اركبه أنام فوراً .. يلا معلش .. ربنا يشفيه :) بوست جميل

أشرف حمدي said...

Me
أشكرك علي رأيك في البوست
بصراحة الراجل صعب عليا , مش ذنبه انه كده
ده ذنب البلد اللي جننته :)
امبارح بقى والله العظيم تلاتة لقيت واحد تاني
راجل كبّارة وبدقن بيضا طويلة ووشه سمح جدا
ماشي في المكيف يقول لكل واحد :
التعليم مش بالضرب
التعليم مش بالضرب
قولها 20 مرة .. قولها لكل واحد شوفه
التعليم مش بالضرب
معاقبة المجرمين مش بالضرب
الدين مش بالتعذيب
الأخلاق مش بالضرب

لولا أني كنت تعبان ساعتها كنت قعدت اتكلمت معاه , واضح أنه اتعرض لتجربة مؤلمة جدا

تحياتي

FemTo said...

هههههههه
الراجل ده تمام والله فهمها صح وعرف يعيش من غير عصيان فى اى حتة ازاى

أشرف حمدي said...

هههههههههههه
مش كده برده ؟

ياسر حسين said...

شر البلية ما يضحك
كاريكاتير المواطن المنفوخ شديد
خلاني أفكر وبعدين ضحكت والكاريكاتير الناجح هو اللي يخليك تفكر
تحياتي

Anonymous said...

i don't believe this happend! fi 7ad lesa 3abit keda??/ 3id elshorta elmagid!!!!

وينكى said...

والله الجدع ده صعبان عليا
واكتر حاجه مضايقانى فكرة عيد الشرطه المجيد المزروعه فى مخه
حتى الناس دى ياربى مضحوك عليها
مش فاهمه انا والله
المهم..حد ينام برضه فى المواصلات؟؟
ماتروح تنام فى بيتكو يا أخى
انا اعرف واحد نام فى المترو صحى ولقى نفسه مسروق
خلى بالك بقى

أسامه يوسف said...

جااااااااااااااااامد
معلش هاضطر أمشى عشان أشترى هديه لوالدتى عيد الأم المجيد قرب

Counter