Total Pageviews

Thursday, June 07, 2007

الحجاب والذئاب والذباب

مش حتقدري تمنعيهم .. لكن تقدري تحمي نفسك
اللي صنعك أدرى بمصلحتك
لا يا شيخ ؟
مع احترامي للمصمم الرائع الذي ابتدع هذا التصميم بالرغم من تحفظي علي بعض النواحي الفنية مثل النقاط البيضاء التي وضعها بالصورة اليمنى لتبدو المصاصة أكثر لزوجة في حين انها خطأ من ناحية الاضاءة وتبدو ملفقة للغاية .
بالرغم من ذلك لأنه ليس موضوعنا .
أقول بأننا يجب أن نكون محددين وموضوعيين فيما يخص أمور ديننا .
يمكنك أن تقول الحجاب فرض .. ربما أختلف معك .. ربما اوافقك .. ولكن أن تأتي بافتراضات من وحي خيالك لتقول انها حكمة الله في الحجاب فهذا هو المرفوض .
قالوا أن الحجاب يحمي الشعر من أشعة الشمس ليؤكدوا معجزة الدين وحكمة الله وهذا كلام فارغ طبعا .. ولو أردت أن تتحدث من الناحية الطبية فأقول لك أن الحجاب يتسبب في تساقط الشعر .
قالوا ان الحجاب يحميكي من الذئاب وهذا أيضا كلام فارغ .. لأن الذئاب تلتهم اللحم سواء أكان محجبا أم لا وتذكروا ما حدث من حوادث التحرش بوسط البلد للمنتقبات انفسهن.. من المفترض أن الشرطة هي التي تحميكي من الذئاب وقد كان دورها غائبا كالعادة .
الآن يقول المصمم أن الحجاب يحميكي من الذباب اللي هو احنا يعني .. الرجالة أم عنين زايغة ويندب فيها رصاصة .
من السخف أن نتعامل باعتبار أننا غابة مليئة بالذئاب والذباب والحشرات الزاحفة
من السخف أن نؤمن باننا نعيش في بالوعة مجاري نتنة
الفتاة الغير محجبة ليست مصاصة قذرة
والشباب لا هو ذئاب ولا هو ذباب .
ده يلعن أبوها عيشة لو كانت بالقرف ده
عزيزتي المحجبة
الحجاب لن يحميكي من شيء .. لا الذئاب ولا حتى الذباب
اذا كنت مقتنعة بالحجاب كفرض فارتديه فورا لأن الله أمر بذلك
لا لأنه يحميكي من شيء .
أخلاقك هي من تحميكي
الشرطة كان من المفترض أن تحميكي ولكنها لا تفعل غالبا
.......
لك الله

46 comments:

Ahmed Shokeir said...

بغض النظر عن الأراء المتلفة حول الحجاب وملاحظاتك القيمة

إلا أنني لا أستطيع أن أخفي إعجابي بفكرة البانر
أعتقد انها مؤثرة وتوصل مايريد ان يقوله صاحبها بفاعلية عالية

moneer said...

كلامك صح فعلا عمرها ما كانت بتتحسب و ريت نبغعد الدين عن الحسابات الدنيويه
صلى علشان ربنا يكرمك و تنجح عمرها مبتتحسب كده
انا بنقوم بالفروض الدينيه علشان مجرد احنا مؤمنين بربنا و لازم نفذ اوامره من غير منتعرف على فوائد الاوامر دى
غير انهم بيركزوا على الحجاب و بينسوا حاجات تانيه وده بيغلى الحاجاب من غير فليده اساسا

Lasto-adri *Blue* said...

انا فعلا زهقت من حوارات الحجاب المفتكسة دى
:S

لم ارى فى حياتى قضية جدلية زيها.. مع ان الموضوع ابسط من كدة حقيقى... زى ما انت قلت.. اللى مؤمنه انه فرض تلبسه.. واللى مؤمنة ومش عايزة... ح تبقى مذنبة وخلاص.. مش قصة هى
واللى مش مؤمنة اصلا... براحتها يعنى طالما هى ما بتضرنيش
وانتهينا
:S

تليفزيون ملون said...

اسمحلى يا استاذ اشرف ان اتفق معك في نقطة و اختلف معك فى اخرى..

اولا : اتفق معك فى ان الفرد المؤمن حينما يفعل امرا من اوامر الله يكون امرا تعبديا .. لا نقاش فيه و يفعله طاعة لله فقط.. و ليس لغرض دنيوي من وراء العبادة زى ما حضرتك ذكرت .. اتفق معك فى هذا المعنى و احييك عليه ..


ثانيا : هذا لا يمنع يا استاذي اني اصدق الصورة اللى فى اول الموضوع و اقتنع بفكرتها مش عارف حضرتك ربط بين الاتنين ليه اصلا... فمن المنطقي جدا _على الاقل بالنسبة لعقلي المتواضع_ ان الحاجة المتغطية عموما بتبقى انضف و اضمن و الواحد لما بيشتريها من محل بيبقى متطمن و هو بياكلها .. و بيبقى مطمن كمان ان مافيهاش حاجه لوثتها قبل كده ..مش عارف حضرتك متضايق من النقطة دي ليه..

فالبنت المحجبة _حجاب بجد .. و اأكد على كلمة حجاب بجد دى_ هتفرض الشاب الطبيعي _و اكد برده على كلمه طبيعي دى_انه يحترمها و لا يؤذيها حتى و لو كان اخلاقه مش اد كده ..

لكن لو هتتكلم عن الشباب الهمج فدول مش هتفرق معاهم فعلا بنت عادية لمحجبة او حتى منقبة ...زى المثال اللى حضرتك اوردته .... بتاع الذئاب و اللحمة .. بس ده بافتراض ان كل اللى ماشيين فى الشارع ذئاب ..مش كده ؟؟ ...

اعتقد حضرتك تكلمت على حالة استثنائية و عممتها ..

فالامر بيقاس على الوضع العام ... هل حضرتك شايف انهى اللى ممكن يندرج تحت الوضع العام للشباب اليومين دول .. هل هو النوع الاول _الذباب_ او النوع الثاني_الذئاب_

لو النوع لاول يبقى الصورة اللى فى اول الموضوع كانت معبرة جدا ..
لو التانى يبقى كانت الصورة المفروض تبقى ذئب و لحمة محطوطة جوه قفص من حديد مغلق من كل الجهات كمان .. مش مصاصة متغطية و صورة تانية و هى قدامه و بيلتهمها ..

لان كل حالة لها ظروفها فالذباب يكفيه الغطاء و الذئاب لا يمنعه غير هذا الصندوق الحديدي المغلق...

اتمنى ان تكون فكرتى وصلت ..

تحياتي استاذى الفنان

اجندا حمرا said...

دكتور اشرف موضوع جرئ و متميز كعادتك دائما و فعلا عزيزي زي ماقلت لو الفتاه مقتنعه بالحجاب و مش واخداه كموضوع او لأي سبب تاني بعيد عن المعني الروحي له
يبقي مش من المفروض ان كل شويه حد يطلع و يقول الحجاب له فوايد كذا و كذا او له اضرار كذا و كذا
انا شايفه ان الحجاب شئ بين الفتاه و ربها و هو اعلم بها و مفيش داعي ان كل واحد يحمل المواضيع اكثر من طاقتها لأن بكده بتحس ان المعني الروحي له بيتلاشي
تحياتي لموضوعك المتميز
:)))))

bazeed said...

سيبك انت بغض النظر عن فرضيه الحجاب(الى انا مقتنع بيها الصراحه) ممكن تلاقى المرة الى جايه صورة مصاصه ومتغطيه بجلابيه كبيرة وباين من تحتيها بطلون قصير وكتوب فوق المصاصه بخط صغير :(بطل لبس جينز واحمى نفسك من التسلخات...!!)

bluestone said...

بوست جيد جدا احييك عليه وعلى وجهة النظر المعروضة بشكل رائع
والخلاصة البسيطة الصحيحة .. ان آمنتي ان الحجاب أمر من الله فارتديه فورا لكن ليس لانه يحمي من اي شيء.

يمكن اختلف مع أحمد شقير .. لان البانر أثار في نفسي تقزز وقرف شديدين جدا .. حيث شعرت كيف تحولت المرأة الكيان الانسان إلي مجرد قطعة حلوة رخيصة الثمن لا هم لها ولمن حولها سوى تعريتها وتغطيتها او التهامها

بينما تحول الرجل الكائن الانسان إلى مجرد حشرة ثم حيوان ..
ياسلااااااااام

يعني منتهى التدني في التعبير
اختصار البشر وتحويلهم لاشياء ثم حشرات وحيوانات ... ارى ان مثل هذه الشعارات حقيرة .. وتروج لاكاذيب ..

فالرجل المجرم الذي تلاعب الشيطان بعقله وأوعز له بخطف او الاعتداء على أنثى .. لا اعتقد انه سيسير يبحث عن واحدة لا ترتدي حجابا مثلا .. فأول امرأة وان كانت ترتدي خيمة ستكون ضحيته .. فلا اعتقد ان من يرتكب جرما كهذا او لا يرى غضاضة من انتهاك امرأة او الاساءة إليها قد تردعه قطعة متر×متر من القماش .. او سيحدث هذا الحجاب اي فرقه لديه

من ترتدي الحجاب حقها الكامل احترمها عليه لانها ترى انه أمر به دينها وليس
سيلف ديفنس
ومن لا ترتدي الحجاب هذا حقها ايضا ولا يعني رخصة او إذنا بانتهاكها او الاعتداء عليها

تحياتي البوست عجبني فعلا

ياسر حسين said...

الله ينور عليك يا فنان
الحجاب مش هو اللي بيحمي
ربنا سبحانه وتعالى هو اللي بيحمي
اللي بتبع فرائضه عن يقين وصدق وحب
البوستر ده مقزز
لأن لا الفتاة الغير محجبة مصاصة بتتمص
ولا الشباب اللي بيبصوا عليها ذباب
على فكرة الذباب بيتلم على حاجتين
الحاجة الأولى هى الحاجة الحلوة
والحاجة التانية لا داعي لذكرها
:)

خالص تحياتي الفنية

KOKKO said...

الحجاب فرض...الحجاب تخلف
الحجاب بيصون الفتاه...الحجاب ولا النقاب حتى بيصون
ده بيعكس اد ايه احنا عايشين فى مجتمع سطحى ويرفض الاخر ومتناقض مع نفسه
ثم ايه التشبيه المهين للجنس البشرى ده سواء شبه نفسه بالذباب او شبهها بالمصاصه
المفروض ان اى مسلم او مسلمه عارف ان الحجاب حجاب النفس والاخلاق هى الحاميه
بعد الله
تحياتى

أشرف حمدي said...

تليفزيون ملون
آثرت أن أبدأ بالتعليق علي ما ذكرته أولا قبل كل التعليقات الهامة هنا

فما ذكرته خطير للغاية
وهو أمرأرفضه بشدة واسمح لي أن أختلف معك تماما في منهج تفكيرك

الحاجة المتغطية أنضف
هذا بالنسبة لقطعة بونبون يا سيدي وليس البشر .. الانسان أرقى بكثير من مجرد تشبيهه بالمصاصة اللزجة التي تسيل لعاب الذباب
أنت بهذا تهين الرجل والمرأة معا أبشع اهانة
من المفترض أن نتعامل بتحضر وليس كأننا نعيش بغابة أو صندوق قمامة
كلامك سليم تماما لو كنا نتحدث عن صندوق قمامة وليس عن مجتمع له مبادئه وأخلاقه أو علي الأقل الحد الأدنى منها والذي يجعله يبدو آدميا


نظرة الشاب الي المرأة الغير محجبة سببها المحجبات أساسا .. حيث أصبح الحجاب هو رمز العفة والشرف والأخلاق وهو بعيد كل البعد عن ذلك ولا علاقه له بما داخل هذه الرأس
وبالتالي أصبحت كل غير محجبة أشبه بالعاهرة
وهو قياس لا منطق له

حديثك عن الذئاب والقفص الحديدي مشكلة أخرى
نحن بهذا نعود الي عصر الأندر الحديدي الذي ترتديه المرأة ويقفل بقفل كبير حتى يعود رجلها من الحرب

مشكلتنا اننا نفكر بسطحية شديدة للغاية ونهين المرأة بشكل غير مسبوق ولا حتى في عصر الجواري حين نشبهها بقطعة الحلوى اللزجة العارية امام الذباب

بالطبع هي صورة مرفوضة تماما
ولكنني أشكرك علي تعليقك الدسم
تحياتي

البتاع said...

صح جدا جدا جدا
الحجاب لا بيحمى شعر ولا جسم ولا بنى ادم
ولا بيطرد ذباب ولا ذئاب
من الاخر الحجاب ده افتكاسة مالهاش اى لازمة فى نظرى

انا اؤيدك لاخر نقطة فى دمى فى كل حرف


امضاء
فتاة محجبة للاسف

تحياتى

غمض عينيك said...

احييك وبشدة علي رأيك
الحجاب فرض ومش لازم نوجدله سبب وفوايد عشان نلتزم بيه

تحياتي ليك
محمد سمير

تليفزيون ملون said...

استاذي الفنان .. من الواضح انك لم تفهمني
لما نقف عند التفسير الحرفي الضيق للأشياء .. لما لا نفهم المعنى بعيدا عن كلاكيع التفسيرات ..

المقصود هنا هو ذاك الجزء من المرأة و ليس المرأة ككل .ذاك الجزء الذى جبلت النفس على التأثر به و الميل له ذاك الجزء الفطري.. فنحن ابناء الانسانيةمن الرجال لنا ضوابط طيبة و قيود حميدة نضعها لأنفسنا لتستقيم الحيا .. و نستمر على نهج انسانيتنا الراقية .. من عدم التعرض لأى امرأة بما يتسبب فى مضايقات و يتسبب فى الوقوع فى مخالفات
و لأن ربنا يعلم ان هذا علينا ليس باليسير فخفف عنا هذا الامر قليلا و جعلها مهمة مشتركة بين الطرفين فكما امر الرجل بتلك الضوابط امر النساء ايضا بضوابط اخرى مثل ان يتخففن من الزينة و لا يتعمد الاثارة بشكل او باخر و ان يغمرهن الوقار الجميل و ان يتوسطن فى كل الامور فيتسمن بالعفة اين حللن فسهل بذلك الامر لكلا الطرفين
فتتوازن الحياة و يسير المسير ..
و نحيا جميعا فى ظل انسانيتنا الراقية

و لكن مع كل هذا هناك فئة خرجت عن هذا الاطار الراقي .. فتعمدت انثى بان تكشف ما تعلم انه يثير و تتزود من اظهار الزينة و هى تعلم ايضا ان هذا سيتسبب فى الكثير ... و من الجانب الاخر .. هناك رجل لم يلزم نفسه بضوابط الأدب و مراعاة اللاخلاق .. بل ترك نفسهه على هواها يفعل ما يفعل دون حساب و لا حد ... فحينما التقا الطرفان اختل الامر اسوأ اختلال ....

مثل هذه الصورة التي فى اول الموضوع

فهذه الصورة لا تحقر من شأن الرجل عاما لتصفه كالذبابة .. لكن تصف هذه الفئة التى ارتضت لنفسها بان تصير ادنى من هذه الذبابة ...

ارجو ان تكون الرؤية الأن واضحة .. مع ان هناك اجزاء اخرى اود ان اعلق عليها ايضا..

اخيرا أأسف جدا جدا جدا على الاطالة

تحياتي

Dalia said...

مش عاجبنى جدا البانر ده

انا معاك يا اشرف ان اللى بيتم التحرش بيهم مش شرط اللى مش محجبه او اللى لابسه ضيق.. فيه ناس مش بتفرق معاهم اهى واحده و السلام

حاجه تغيظ :@

R.R said...

طيب حلو كلامك
الحجاب مش هو الى هيحمى البنت
وربنا فرضه علينا
وربنا له حكمه فيما يفرضه
تفتكر انت ايه الحكمه من الحجاب
طالما انه مش للحمايه؟
يعنى اعتقد اننا لو عاوزين نرد على الناس اللى بتهاجم الحجاب
او الناس اللى بتهاجم المش محجبات بكلام منطقى

تحياتى

فبركة said...

دكتور أشرف حمدى
صديقى المفضل الذى لم أقابله منذ شهور طويلة
الحجاب هدفه يا دكتور حماية المرأة وإذا كنت تقول أنه لن يحمكيكى فدعنى أختلف معك بالحجة والمنطق والعقل
فعندما يفرض الله فرض على البرش فبالتأكيد لصالحهم والصالح المقصود هنا هو الحماية ولكن بشرط أن يكون الحجاب حجابا بمعنى الكلمة
فالحجاب يا سيدى ليس مجرد إيشارب يستر الشعر فحسب
بل هو منهج وفلسفة متكاملة من المفترض عندما تقتنع بها الأنثى تكون قد اقتنعت قبلها بأمور أخرى مهمة مثل قول الرسول لسيدتنا أسماء بنت أبى بكر يا اسماء عندما تبلغ المرأة المحيض لا يظهر منها سوى الوجه والكفين
كما يجب أن ترتدى المرأة لباسا لا يشف ولا يصف
كما يجب ألا تضع المكياج الملفت او المثير ولا تضع العطر الملفت وإلا أعتبرت زانية
كل ذلك يا عزيزى إذا ما تم تطبيقه مع راتداء الإيشارب فإنها محجبة بحق
وهنا فإن الحجاب يصبح عفة وطهارة وحماية لها من الأوغاد
أما عن حديثك بخصوص تحرش البعض بالمنتقبات فهذؤلاء هم شواذ القاعدة يا صديقى بفعل حالة السعار الجنسى
أما الطبيعى والمنطقى أن الحجاب وأكرر الحجاب الحقيقى حماية وعفة للمرأة وأغض للبصر
شكرا
تحياتى

مشربية said...

كل حاجة اصبحت تحت رحمة التجارة و الاعلان حتي الدين للدرجة دي خلط الاوراق كل دة ع شان مصاصة و الله حاجة عظيمة
الف شكر يا اشرف علي الموضوع جميل جدا

بحب السيما said...

والله ياعمونا مابتفرق
الحجاب ده شكل مش اكتر
فيه بنات محترمين جدا ومش محجبين
وفيه بنات محجبين كتير جدا حاسين بالشباب وبيساعدوهم على قد مايقدروا
اما بخصوص التصميم فهو فكرته حلو
بس برضه احنا مش واقعين كده

أحمد مختار عاشور said...

أهلا بقارىء أفكاري
بوست جامد جداً يا فنان
..........
أطرف ما فى المتطرفين انهم يغتاظون بشدة عند ذكر عبارة "تشغيل العقل فى الامور الدينية" فى الوقت الذى يحاولوا هم فيه ان يستخدموا عقولهم فى مسلمات - لا ضرر منها - بكل غباء مطلق
..........
الموضوع ببساطة
انا لو نزلت من بيتى فى عز التلج فجراً لكى أصلى فى المسجد
وارد جدا انى اصاب بنزلة برد أكثر من اصابتى بانتعاش فى الدورة الدموية
فهل معنى ذلك ان صلاة الفجر فى الشتاء حرام لو طالبنا بتفسيرها عقلياً؟
طبعا سؤالى هذا لزغلول النجار
.........
أعتقد انى لم ابتعد عن الموضوع
فمن شدة جمال البوست ارى انه يحمل اكثر من تأويل
منها الرهاب الجنسى \الدينى \السياسى
الواقع على المرأة و هذا يحتاج لإستفاضة أكثر
..........
نرفع القبعة يا فندم

أشرف حمدي said...

Ahmed Shokeir
ربما أختلف معك عزيزي .. لأن الفكرة بالنسبة لي مقززة للغاية ومستفزة
---------------------------------
Moneer
فعلا فيه ازدواجية عجيبة . نحن نتعامل مع الدين باعتباره تمائم وتعاويز منذ عصر الفراعنة وحتى الآن
يعني لما واحد يتصل بالمفتي علي الهواء في برنامج فضائي ويسأله أنا دعائي مش مستجاب وياريت تقول لي علي دعاء يكون قوي وفعال
كأنه بيسأله عن دواء أقوى مثلا لأن الدواء الأولاني مش جايب نتيجة
أو كأنه بيسأله عن تعويذة سحرية ذات فاعلية أقوى وأنا شايف ان الدعاء بيكون من القلب وربنا أعلم باللي يمكن مش قادر أعبر عنه في جمل بلاغية مؤثرة .
---------------------------------
Lasto
الموضوع مش موضوع حجاب .. الموضوع أكبر من كده بكتير وبشمل قضايا كتير منها الاجتماعي والسياسي والديني والأخلاقي
لكن ده موضوع تاني كبير محتاج بوست كامل
---------------------------------
أجندا حمرا
أشكرك علي التعليق والتواصل المستمر ..اتفق معك في الرأي ..
تحياتي
---------------------------------
bazeed
ههههه .. ممكن فعلا .. ليه لأ ؟
---------------------------------
bluestone
اتفق معك تماما .. لا داعي لتأويل الدين أكثر مما جاء به
ولا داعي لمنطقته من وجهة نظر شخصية هي غالبا خاطئة
تحياتي
---------------------------------
الفنان ياسر حسين
فعلا .. بس المشكلة بقى اننا نلاقي الحاجة التانية دي مصممة في بوستر آخر .. مش بعيد يعملوها ماهي خلاص خربت :)
---------------------------------
kokko
بغض النظر عن كون الحجاب فرض أم لا .. المشكلة فعلا هي التناقض والازدواجية والسطحية في تناولنا لهذا الأمر

أشرف حمدي said...

البتاع
رأيك مهم للغاية خاصة آخر جملة :
فتاة محجبة للأسف
هذه واحدة من المشاكل التي تسبب فيها مشايخ الحجاب .. فحينما انتشر الحجاب بهذه الصورة التي أعتبرها مرضية خاصة مع عدم تحقيق ما يعادل الحجاب من ارتقاء أخلاقي يبدأ من الداخل أولا , وحينما أصبحت معظم الفتيات محجبات حتى العاهرات منهن , نتج عن ذلك أن أصبح الغير محجبات فاجرات ماجنات من وجهة نظر المجتمع نفسه وليس المشايخ فقط مما اضطر الكثير من الفتيات لإرتداء الحجاب بدون اقتناع ولمجرد أن يبعدن عن انفسهن الشبهات . وماذا كانت النتيجة ؟
البنات كلها محجبة والمجتمع هو هو ان لم يكن أسوأ .
الحجاب لو كان فرضا فلابد أولا من الارتقاء بفكر المجتمع والتخلص من مبدأ الوثنية والتعاويز والطقوس الذي يسيطر علي أسلوب تناولنا للدين ولابد من أن يكون تدريجيا ويسبقه التزام بآلاف الأمور الدينية الأخرى وبعدها اذا أتى الحجاب أو حتى لم يأتي فسيكون المجتمع قد تخلص من الكثير من بلاويه أولا
تحياتي

أشرف حمدي said...

غمض عينيك
أعتقد ذلك فعلا .. ولكن لابد وأن يكون عن اقتناع .. ولا عيب في شخص لم يقتنع بفرض الحجاب مثلا .. الموضوع احساس أولا وليس بالضرورة أن يكون الاقتناع ناتج عن ابحاث علمية تثبت أن الحجاب مفيد للشعر

اذا شعرتي بأنك ترتاحين الي ارتداء الحجاب وأنه سيغير من نفسك الي الأفضل وأنه سيجعلك في صورة أفضل أو أكثر احتشاما انت ترتاحين اليها وانت تواجهين المجتمع فارتديه فورا
اذا لم تقتنعي وحتى لو كان عدم اقتناعك هذا مخالفا للدين لأن الحجاب فرض فعلا فلا ترتديه ايضا حتى لا تناقضي نفسك
لأن ساعتها البنت ممكن تلبس بادي واستريتش وهي محجبة وتروح تشيش ع القهوة وهي محجبة وتطلع شقة واحد بالليل وهي محجبة وهو ما اصبح منتشرا جدا هذه الأيام

هذا رأيي

أشرف حمدي said...

تليفزيون ملون
الاختلاف في الرأي لا يفسد للود قضية كما يقولون
تحياتي
--------------------------------
وللكرة المليون أكرر بعد اسمك
أكتر صحفي محترم فيكي يا مصر
المشكلة يا شريف ان المنطق ده بالرغم من أني بحب افكر فيه الا انه ممكن ينتج عنه العكس أيضا
انت تتحدث منطق : ربنا مش حيؤمر بحاجة فيها ضرر للناس
طب ما الحجاب بيضر الشعر يا مان ؟
طب ما الحجاب ماعدش بيحمي حد يا مان عشان دلوقتي خلاص ماعدش فيه فرق بين محجبة ومش محجبة والسبب في اخلاق بعض المحجبات انفسهن وده اللي خللى الناس خلاص ماعدش بيفرق معاها محجبة أو غير محجبة في المعاكسات والتحرش
طب ماهي البنات لو لبست مالا يشف ومالا يصف مش بعيد نبقى زي ما احنا وربما اسوأ زي السعودية اللي كل البنات هناك ماشية بالنقاب والمجتمع هو هو فيه بلاوي
--------------------------------
تعرف بقى الفرق بيكون فين ؟
في الدماغ .. في فهم فلسفة الدين نفسه .. ولو مش في الدين يبقى في الضمير اللي ربنا خلقه عشان يكون رادار للانسان يعرف بيه الصح من الغلط
انا بصراحة نتيجة للت والعجن في الدين بقيت أحكم ضميري وريحت دماغي من موضوع الفتاوى والمشايخ .. لو ضميري مريحني ان افعل كذا يبقى خلاص .. حسيت اني مش مستريح وأني بأذيي نفسي أو بأذي غيرها يبقى خلاص مش حعمل كده
لكن ده موضوع تاني كبير ممكن ابقى اتكلم عنه لاحقا
واحشني جدا يا مان
تحياتي
--------------------------------
مشربية
أنا اللي بشكر تشريفك مدونتي .. تحياتي ليك يا فنان
--------------------------------
بحب السيما
عندك حق طبعا .. ده اللي انا بقوله

أشرف حمدي said...

الرائع أحمد مختار عاشور
انت تتحدث بصوت عقلي .. فلا داعي للتعليق .. هذا هو بالحرف نفس رأيي تجاه الموضوع

فقط أحب أعقب بحكاية ربما تبدو بعيدة عن الموضوع الي حد ما
لما الفرنسيين راحوا احتلوا افريقيا ولما المسيحية دخلت .. الناس في القبائل بقت متلخبطة ومش فاهمة حاجة
يعني ايه لا تسرق
ويعني ايه سرقة اساسا ؟ ده لأن القبائل البدائية لا تعرف الملكية الفردية .. الناس بتروح تصطاد وتاكل .. تطلع ع الشجر وتاكل .. طب أسرق ليه ؟ أو آخد حاجة غيري ليه ؟

قالوا للناس عيب تمشوا عريانين ملط كده
الناس برده مافهمتش
طب ليه نلبس والجو حر موت ؟
قالوا عشان الفتنة
قالوا يعني ايه فتنة ؟ ما الناس كلها ملط وماحدش بيبص علي حد طبعا مش أدبا أو أخلاقا ولكن عشان مافيش دافع أساسا اني ابص .. ابص علي ايه بس ما انا اتولدت وكبرت وعشت عريان وسط عريانين وماعدش المنظر ده مثير ولا جميل أساسا

اللي عاوز أقوله
سؤال واحد
هل الحجاب بيحمي أكتر من الحماية اللي موجودة وسط القبائل البدائية العريانة اللي مافيهاش حد بيبص ومش حقولك بيتحرش بحد ؟
يبقى خلاص مانقعدش بقى نتفنن في استنباط حكمة ربنا في كل حاجة
أو نستنبط براحتنا
ويمكن انا كمان ساعات بحب الاستنباط ده
ولكن ساعتها الحجاب مش حيكون فرض اساسا ولا له اي لازمة
أنا مش مع دول ولا مع دول
انا مع :
شوفولكم طريقة بقى لتناول أمور الدين ونمشي عليها
نحكم العقل ؟
طب تمام .. عقلي بيقول الحجاب مش فرض
طب نحكم الكلمات الحرفية للدين
يبقى خلاص
ماحدش قال ان الحجاب بيحمي الشعر من التساقط

أحييك بشدة علي تعليقك

sabsoob said...

تقريباً نفس اللي حصل علي لسان صحفية ...في جامعة القاهرة..صورة
للبنت المجبة ملاك..
و البنت اللي مش محجبة شيطان..
الفكرة هي رفض تنفيذ حرفي ساذج لتعاليم الدين..
ايه الهدف من الحجاب و طبقيه..لابساه أو مش لابساه
و يا سلام علي الأغنية الجبارة اللي كلماتها"اتحجبتي برافو عليكي..أيوة كده ربنا يحميكي"..
و بالمرة يا أشرف ابقي حط صورة للإيميل
بتاع قول و الله العظيم هبعتة و انت حلفت و ارسلها ل 15 شخص و انت تسمع الرعد في ودانك و الحاجات دي....
تحباتي

al-ma7rb said...

السلام عليكم
الأستاذ أشرف حمدي ,,صراحة المدونة بتاعة حضرتك هايلة جدا ,, ويمكن حفزتني كتير اني ادخل عالم المدونات ده صراحة,,,,

بالنسبة لموضوع الححجاب ,,بس حابة اتكلم في عدة نقط .

1- الموضوع موضوع انوا فرض,, ام انا المش لاقي ليه أهمية بأنوا فرض

كونه فرض فا ده شيء متفق فيه جميع علماء الدين دون اختلاف علي جميع مذاهبهم ,,
انوا فرض لأن ده ما أمرنا به في السنه النبوية ,,, ودي حاجة متفق فيها علماء دين...

نيجي بقي للنقطة التانية :
ان المجتمع أو المثال الحضرتك ذكرته
اوك انا معاك تماما ,, ان في ظ البيحصل في المجتمع وتناول بعض الناس سواء للحجاب او غيره ,,بقي شيء يتعب والناس دي قد تكون محجبة او غير محجبة ,,,
ماشي وصل بينا ان الموضوع بقي مجرد شكل ,,ونواتج ده البيحصل دلوقتي وزي ما حضرتك بتتكلم ان الموضوع بقي مجرد شكل ,,,
ماشي ده جميل جدا ومنطقي جدا لأنوا رد فعل لطريقة تناول بعض الناس..

لكن ده ما يعنيش انوا ندخل النتيجة دي في اصل الحاجة ,, يعني بقي البيحصل ده عاقب لسوء تناول الأمر ,,,هل ده يعني بالأخص ان يكون الأمر في حد نفسه سيء او غير مقنع ,,,

انا شايفة ان الموضوع مش حجاب بس ,,, كون ان في البعض اخد الموضع شكل خلاص دي دماغهم لكن الموضوع اكتر من كده ,,,ربنا لما فرض لينا الدين كان ليه عشان حياة الأنسان تستقيم ,ونتجة لمكانته الربنا سبحانة وتعال يوهبها ليه,,, فا لو باصينا مش بس للحجاب بل حتي الصلاة لو ما كنش الواحد بيصي بخشوع وبتدبر يبقي ايه فايدتها ,,في هنا جانب روحاني ,,جانب الغرض منه تهذيب الروح والنفس
كذلك الحجاب ,,اذا الواحد ما اتحجب بالمعني الحقيقي للحجاب ,,اني البس الحجاب الصح ,,مش الحجاب القد بينشوفوا عدمه احسن ,,انا بتكلم عن الأصل الحجاب الصحيح ,, سواء من ناحية المظهر او من ناحية الجوهر ,,وملاحظة المظهر هنا مش فكرة شكل وخلاص ,,

لما البنت تغطي مفانتها حتي وان كان شعرها الموع مش فكرة شعر وبتغطي ,,الموضوع ان هي بتغطي ده ليه ,,, ده شيء خاص بيها امفروض ما حد انوا يشوفه وان هي تتزين بيه غير لزوجها ,,, وان كان غير كده,,, يبقي هو يحس انوا هو زي غيره ,,مع التأكيد ان الحياة مش موضوع استمتاع وخلاص ,, لكن دي اساس الزواج العفة ,,بجانب حاجات كتيير تانية ,,,

وعلي فكرة دي اساس مشاكلنا ,,ان الأمور أو العبادات بتتاخد كا شكل ,, وبنسيب اجانب الأهم تأثير العبادة علي البني ادم ,, وده لتقصير في وجهة نظري ان الواحد مش بيحاول ان يرجع للدين ويعرف الغاية من كده,, الموضوع ولا هو ان ده امر فامنع التفكير بتاتا ,,ولا اني اسيب الحبل علي الغارب وادخل في تفاصيل عقل الأنسان مايستوعبهاش لأن في النهاية هو مخلوق وعقله اكيد مش بالقدر اليخليه يتفهم امور خاصة بالخالق هو يفكر الأمور الأساسية والمتعلقة بعبادته ,, مادام امن بالشيء الأساسي وهو عقيدته,,, وده مش معناه ان يحجب التفكير والأجتهاد لكن البيحصل ان بيتساب الأمور كلها ويتمسك في مسائل نقعد نتعب نفسنا فيها وهي مش تفيد الأنسان لأن بالأحري كان ربنا وضحاها من الأول احنا بنسيب الأولي لينا ونمسك في أمور مش بالقدر الكافي للأهمية غير انها تتدخل الإنسان في متاهات مالهاش لزمة.....

اسفه جداااااا للتطويل ,,بس بجد موضوع حضرتك رااااااائع وشدني جدا واكرر اعجابي الشديد بمدونة حضرتك

raghda safwat said...

قشطة عليك يا اشرف
انت فين يا عم مختفي من فترة و مبتعبرنيش ولا تطل على بلوجي
انشالله تكون بخير و شغال تمام
انا معاك فى كل حاجة قولتها
و برغم ميولي العلمانية جدا الا ان فعلا كلامك مقنع
فيه بلاد كتير الناس ماشية بشعرها و مفيش تحرش ولا بص ولا اى قلة ادب
المشكلة مش فى البنت و لا حتى فى الرجل
و المشكلة مش فى الفرض ولا فى فى الدين
المشكلة فى البلد بنت الكلب اللى احنا اتولدنا لقينا نفسنا جزء منها غصبا عننا
المشكلة فى مجتمع غبي و عبثي لا له راس من ديل ولا له حاجة تحكمه
اللى عاوز يعمل الغلط يعمل
مفيش حاجة بقت بتمنع يا اشرف
المشكلة ان هنا بندافع عن الصح و بنعمل الغلط فى الضلمة
بينما فى اى حتة تانية بيدافعوا عن الصح و بيعملوا الغلط فى النور
المشكلة فى مصر و بس يا اشرف
لنا الله
هههههههه
على فكرة احلى ما فى البوست بتاعك اخر كلمة فيه
:)

نهى منير said...

أنا شايفه إن كتر الكلام فى موضوع الحجاب ده مضيعة للوقت
الأمر الآلهى صريح فى القرآن
والكل عارف الآية اللى فى سورة النور
اللى هتتحجب اتباعا لأوامر الله
إن شاء الله ربنا هيحفظها
واللى هتتحج اتباعا لضغوط المجتمع وارضاء للبشر
حضرتك عارف ايه اللى ممكن يحصلها
أنا شخصيا مش محجبة ويوم ما اتحجب لازم ابقى قد الحجاب والالتزام
ميرسى كتير يا استاذ اشرف
على البوست الهايل ده
وعلى اسلوبك البسيط
بــــــــاى

SaSo said...

عندك حق
ايه علاقه اللبس بالدين؟
ولو سلمنا بانه فرض فهو اكيد اكيد موش فرض اوى يعنى
اقصد موش من اركان الاسلام
موش زى مابيحصل دلوقتى اتحجب -عشان ده اللى باين- مع انى اصلا مبصليش
الحجاب بدعه وهابيه لاقت قبول ف مجتمع سافل زى مجتمعنا اكتر من فرض
بوست رائع هيفتح عليك ابوبا جهنم,طبعا فانت تتكلم ف اكــــــــــــــــــــــــــــــبر تابو حاليا
ربنا يوفقك

الريس said...

مبقتش فارقة حجاب او مقشرة كله واحد

Anonymous said...

لا أتفق معك..عائد للمناقشة بعد قليل (إن كنت مستعدا لقبول الرأي الآخر)

أشرف حمدي said...

Al-ma7rb
ربنا لما فرض الدين كان عشان حياة الناس تستقيم
طبعا .. لكن هل انتي شايفة ان حياة الناس استقامت لما بنات مصر كلهم لبسوا الحجاب ؟
مش شايفة انها اتعكت أكتر ؟
طب ليه ؟ مش عشان المشايخ اللي قعدوا يزنوا علي ودانهم بموضوع الحجاب مشايغ نص كم وبتوع فتة ومهلبية ومش فاهمين امتي وازاي يتم فتح موضوع الحجاب ده
الحجاب دلوقتي مرض وأخطر من عدمه لأنه شجع بنات كتير جدا انها تعمل كل اللي ماكنتش تقدر تعمله وهي بشعرها
بقت تخرج وتروح شقق وتمارس الدعارة لأن الحجاب بيحمي سمعتها وبيبعد عنها الشبهات من لو انها كانت متبرجة زي ما بيقولوا المشايخ
انا مش بغلط في الدين
أنا بوضح ان مفهوم الدين عندنا اساسا غلط عشان كده ما كانش المفروض موضوع الحجاب ده يتفتح الا لما المفاهيم دي تتصلح تماما
تحياتي

أشرف حمدي said...

رغدة صفوت
واحدة من الصحفيات المحترمات جدا في مصر وسيكون لها مستقبل عظيم
وهي بالمناسبة غير محجبة ولكنها من أكثر الشخصيات احتراما وتهذيبا وخلقا قابلتها في حياتي

تحياتي لك يا رغدة
وربنا يوفقك

al-ma7rb said...

اولا شكرا علي رد حضرتك
وانا شايفة كده ان احنا متفقين ,, في وجهات النظر ,, ان الموضوع سوء فهم للدين, وبالتالي طبيعي البيحصل دلوقتي
وانا معاك في كل البتقول,,بس هل يبقي الحل ان الناس ماتتحجبش,,, او خلينا نركز علي نقطة ,,طب السبب ؟
اوك زي ما حضرتك قولت ان في بعض
المشايخ بيوصلوا الدين عواقبها بتوبوظ اكتر ما بتصلح بس انا شايفة
ان قد يكون ده سبب ,,مش بالقدر الكافي
انا شايفة السبب الحقيقي ,,سوء التربية,لو كان في وعي من الأول في التربية وان الأباء يربوا عيالهم صح ماكنش ادينا الفرصة للبلبله البنسمعها كل شوية من البعض ,ووماكنش كل من هب ودب عملوه عالم ,,وكانت الأساسيات البتقول فيها اترسخت من زمان وبالتالي الدين هيتطبق بترتيبه الطبيعي كل حاجة ف يوقتها ,,لأن في الأخر الدين كيان مرتب من عند الله,اي ترتيب غلط فيه خلاص يا رحمن يا رحيم يبقي ناخد علي دمغنا واحنا ساكتين والدليل البيحصل ده والموضوع ينتهي يا يتساب الدين وهناخد فوق دمغنا بردوا ,يا نكون زي الريم ,او بمعني تاني لأسف اقوله ,,انوا كلمة انسان دي الربنا كرمه المفروض الواحد يعيد نظر فيها ....

نجي بقي لحاجة تانية ان ممكن تلاقي الأب والأم عاوزيين هما البتربوا اصلن ,,وده كتير الواحد بيشوفوه ,, يبقي اساس المشكلة ان فيه لا مبالاه ماشاء الله نتحسد عليها ,,

في تقصير مننا لو كل حد فكر انوا صح عاوز يصلح بس يبدأبنفسة ,وويتعلم ويعيش بدينه صح ,,,ماكناش بيقينا في الحال ده دلوقتي,, ولا كان كل من هب ودب سب فينا وفي دينا,,,

احنا بقينا ننتج كلام ,ده البقينا قادرين عليه ,ونجي نقول النصر من عندك يا كريم ,,نصر ايه وبتاع ايه ولمين احنا اسئنا لنفسنا,يبقي منتظرين ايه ؟

بس شكرا جدا ,,وشكرا كمان عشان فعلا المناقشة انا شايفة اني طلعت منها بحاجة فعلا ,ووده قلما يحصل في اي مناقشة صراحة ,,

yamen said...

العزيز الرائع اشرف حمدي

انا داخل مخصوص عشان البوست ده بالذات لان الكلام كتر عليه قوي وكل ما اقابل حد من المدونين يكلمني عليه

فقلت اسيبني من القيل والقال وادخل اشوف بنفسي

المهم

شوف يا سيدي

واحدة واحدة

انا معاك تماما في عدم احقية اي كائن حي ايا كان انه يدي لنفسه الحق في انه يتكلم باسم ربنا و يتداري هو و افكاره ورا ستارة "ده مش انا اللي باقول..ده ربنا"..يا حلاوة ام اسماعين .. وانت بقه الشاب الملهم اللي ربنا بعتله الوحي وقاله روح بلغ الناس اللي انا عايز اقوله عشان انا مش قادر ازعق

دي نقطة

تاني نقطة بقه حكاية الحجاب يحمي او مايحميش دي حاجة نسبية

يعني كلامك صح في حكاية ان السلوك هو اللي بيحمي
بس ده مايتعارضش مع فكرة ان الحجاب -بشكل عام علي الزي مش الطرحة وبس- بيغير نظرة المجتمع للبنت

يعني البنت اللي لابسه استريتش وبادي ستوماك وماشية -بكل احترام واحتشام- في شارع قصر النيل لما تتعاكس ماتقدرش تقول ان الشباب بقوا ولاد ستين في سبعين

لا..هيه اللي بتستهبل لان الزي برضه جزء من السلوك..ولا ايه؟

واخيرا ليه افترضنا ان اللي عمل الاعلان يقصد الطرحة وبس

ليه مانقولش انه يقصد الزي المحتشم ككل


و الاعلان علي فكرة حلو وفكرته حلوة فيما عدا حكاية"اللي خلقك ادري بيكي"..ه

اسف علي الاطالة

تحياتي

واشوفك علي خير ان شاءالله

أشرف حمدي said...

عزيزي يامن
بتقول الكلام كتر ع البوست .. هم ناويين يقيموا عليا الحد ولا ايه ؟

انا مش مع العري طبعا يا يامن بدليل البوست اللي بعد كده
أنا شايف ان الحكاية مش حكاية حجاب ولا سفور .. دي حاجة عبيطة بالنسبة للقرف اللي احنا فيه
الحجاب دلوقتي لا حيودي ولا حيجيب .. وده مش معناه أبدا أني ضد الحجاب .. ولكن أنا ضد الحجاب دلوقتي ودي تفرق كتير
احنا الاتنين ولاد كلية واحدة .. لما يجيلك عيان عنده ورم نافخ نص وشه وقافل له عينه حتعمل له ايه ؟
مش حتعمل له تبييض أسنان ؟ صح ؟ رغم ان سنانه ممكن تكون صفرا فعلا ومحتاجة تبييض
بس احنا في ايه ولا ايه ؟ مش نعالجه من الورم ده الأول وبعدين يبقة نحتف في سنانه براحتنا ؟
انا شايف ان الحجاب دلوقتي عامل زي تبييض الأسنان لواحد وشه وارم
والاختلاف في الرأي لا يفسد للود قضية
تحياتي يا جميل

أشرف حمدي said...

Al-me7rab
انا اللي شاكر ليكي مناقشتك العاقلة الهادئة
تحياتي لك

Dr. Tantawy said...

عزيزي اشرف

اعتقد ان البانر فعلا فكرته مبتكره و جميلة .. و بغض النظر عن فكره الاضاءه و خلافه . فاعتقد انه وصل فكره او قناعه شخصيه لصاحبه .. و اكيد انه صاحبه مطلبش مننا كلنا اننا نستخدمه او ننشره .. زي بالضبط لما انت تعمل بانر مثلا عن كفايه مش معنى كده ان مصر كلها لازم تحطه او تنشره .. انما صاحب كل قناعه بشيء مماثل من حقه يستخدمه و ينشره

الفكره انه الحجاب فرض .. لكن في وسط اللي احنا فيه معدش حد مقتنع بحاجه و زادت السفسطائيه و المجادله على الفاضي و المليان .. ف ميمنعش اني احاول اوصل الامور بصوره ابسط

اخيرا .. موضوع الحجاب بيوقع الشعر .. اسف لأن المعلومه غير صحيحه .. الشعر طول النهار بيتعرض للشمس و الاتربه و ده بيساعد على تقصفه .. بينما باقي الوقت في البيت الست مش مطلوب منها انها تغطي شعرها جوه بيتها .. يعني هيتهوى براحته .. المعلومه دي طبيه مش همبكه يعني :)) ف قلت احاول اصححهالك

النقطه الوحيده اللي متفق فيها معاك هيه ان ده السبب الوحيد للحجاب .. لأن فروض كتير ربنا فرضها علينا ممكن ميكونش ليها مبررات قدامنا .. لكنها اوامر واجبه النتفيذ لاننا مضينا على عقد اسمه ( الاسلام ) يعني اسلام الوجه و القلب لله تعالى .. نعمل اللي يؤمرنا بيه و نبعد عن اللي نهانا عنه .. ف الحجاب ممكن ميكونش ليه اي مبرر بالنسبه لينا لكنه فرض وواجب التنفيذ .. لكن كونك تدور عن حكمه فيه ( زي فكره الستره ) مش عيب .. لأن ربنا قال عنه كده
موضوع وسط البلد بقه .. ف انا اسف .. لأنك لو اعتبرت ده مثال يبقى انت بتعمم الشذوذ .. يعني اللي حصل ده كان شذوذ عن القاعده .. و كان مثال لشباب اقل ما يوصف بانه ( سلوك حيواني ) .. متقدرش بقه تعتمد عليه عشان تقول ان الحجاب لا يحمي او يستر

اخيرا :) انا طولت عليك لكن الموضوع فعلا يستحق

تحياااااااااتي

أشرف حمدي said...

دكتور طنطاوي
أشكرك علي الزيارة الجميلة
لم أقل بأن البانر دعائي فلقد بحثت عنه علي موقع فني
الموضوع هو كيف يفكر بعض الناس
شكرا لك علي تصحيح المعلومة
أنا فقط أعطي مثالا حول خلط الدين بالعلم
المسواك مثلا يا عزيزي بالرغم من فوائده الكبيرة للأسنان الا أنه لا يصلح مثلا لمن يعانون من التهاب اللثة المزمن لأنه يزيد الطين بله
فلا يجوز هنا أن نقول بأن المسواك سنة ويجب اتباعها علاوة على أن المسواك الذي يباع في مصر كلها ليس مسواكا بل عيدان خشب
أعتقد أننا بحاجة الي اتباع أعمق للدين وليس مظهره فنحن شعب اعتاد على الطقوس والتمائم منذ عصر الفراعنة
تركنا كل ما دعانا الدين اليه ورحنا نتحدث عن ضرورة الحجاب والجلباب القصير ثم ظهرت افتكاسة البنطال القصير
المسواك ليس هو السنة
السنة هي تنظيف الأسنان ولقد أنعم الله علينا بسيجنال تو وأعتقد بحكم دراستي لطب الأسنان أنه أفضل بكثير
انها فقط مسألة : هل نتبع الدين كما هو أم نتبع فلسفته بالطريقة التي تناسب عصرنا ؟
تحياتي

Anonymous said...

كلامك صح !!!

تامر حسين said...

انا عجبني اوي فكره المصاصا والدبان دي
علي فكره موضوع جميل جدا جدا جدا

Amir said...

دردشة مطولة عن أزمة الحجاب!!!(كلام يودى فى داهية)ا
====================================
زى ما العنوان بيقول، كلامى اللى أنا بأقوله ده إستحالة يمر قدامك مرور الكرام من غير ما حد فيكم يجادلنى فيه بقسوة...شوفوا إنتم بنفسكم!!!ا

الأسباب المغلوطة للباس الحجاب كتير جداً منها:
- بناء على رغبة (أو بمعنى أدق أمر وتهديد وإجبار) الأب أو الأخ أو الزوج
- خوف من التهجم عليها وتعرضها للإغتصاب
- ضغط نفسى رهيب سواء من الصديقات المحجبات أو معارف الأم المحجبات أو برامج الدين وخطب المساجد و علماء الدين والمفتيين
- موضة (أى والله بجد موضة بتحصل ياما، وبص على الألوان الزاهية والأشكال المختلفة لدرجة إن الواحد بقى مش عارف دى متحجبة ولا لابسة عالموضة)
- الإعتقاد (ضمنياً) بأن لبس الحجاب يمحى الذنوب ويعبر عن توبة نصوحة عن الخطايا (وكأن من لبست الحجاب أصبحت مثل الملائكة طاهرة ومقدسة وطريقها إلى الجنة سالك دون أى صعوبة)
- ويستخدم الحجاب أيضاُ لإخفاء بعض العيوب فى الجسد وبالتحديد فى الوجه والرأس، مثل حب الشباب وتساقط الشعر...
- وأخيراً أغرب سبب هو إن من تتحجب تصبح أجمل مما كانت سابقاً سواء كانت هى أصلاً جملية أو غير جميلة، وهل ينطبق ذلك على كل النساء أم فقط على من هن بلا جمال يذكر؟؟؟؟

عايزكم كده فى مرة تبصوا لتسجيل حفلة من حفلات أم كلثوم وعبد الحليم حافظ وفريد الأطرش الغنائية....وأتحداكم تحدى جبار لو عرفتم تطلعولى واحدة محجبة قاعدة وسط الجماهير!!!!!!!!!

إشمعنى دلوقتى الحجاب منتشر بالصورة الفظيعة دى على عصرنا ده؟؟؟ ماحدش يقوللى إن ده نتيجة الإنفتاح الغربى والعالمى علينا...لأن مش معنى إن فيه إنفتاح زيادة عن اللزوم إنى أبقى أواجهه بإنغلاق وتطرف زيادة عن اللزوم!!! ما هو لو العالم كله يا إما يمين خالص يا إما شمال خالص...يبقى فين الإعتدال والتوسط فى الأمور اللى بتواجهنا فى حياتنا؟؟؟ يعنى يا نرفض أى حاجة جاية م الغرب، يا ناخده كله....ما فيش تشغيل دماغ والإختيار يبقى على حسب ما يتماشى معانا كمصريين وعرب؟؟؟

حكاية تغطية المرأة لرأسها عادة شرقية موجودة حتى من قبل ظهور الإسلام...الفرق إن اللى بيغطى راسها مش بيلف حوالين منطقة الرقبة والصدر ويتقفل على دماغها!
وقتها كان أكتر حاجة تجذب الراجل فى المرأة شعرها، عشان كده كانت بتغطيه، لكن مع مرور الزمن معايير الجمال بتختلف، وأكيد موضة الملابس بتختلف، يبقى منطقياً المفروض الزى الحجابى الشرقى يتغير...مع ذلك هو لسه موجود حتى اللحظة دى!!!!

م الآخر بصراحة كده......واللى بقوله مش مجرد رأى منى، إنما ده فكر ومنطق بالعقل......الحجاب لا يعتبر فريضة لازمة على كل النساء...وناخدها بالعقل والمنطق بدل ما ناخد آراء متباينة من علماء الدين على حسب تفسيراتهم لكلام الله:

- هل كل نساء الدنيا جمال جداً ومنظرهم يشد العيون، ولا الجمال ده يعتبر حاجة نسبية تتغير معايرها من شخص لآخر ومن زمن لآخر؟ وبعدين أكيد كلنا هنتفق على إن واحدة فى جمال سلمى حايك يشتهيها معظم إن ماكانش كل الرجال، فى حين إن واحدة فى منظر الممثلة التخينة مها أحمد لا يشتهيها سوى رجل غير طبيعى وغير سوى يقود عقله تفكير حيوانى جنسى شاذ!!!! (خدوا بالكم المقارنة هنا فقط فى مستوى جمال المرأة بالنسبة للرجل، بالنسبة لحتة النساء البدينات فأنا لم أقصد إهانتهم أو معايرة زيادة وزنهم....فأنا كنت أركز على نقطة إن الرجالة تزيد شهوتهم الجنسية على أى واحدة جمالها خارق زى مثلاً سلمى حايك....وده الطبيعى المفروض يعنى، يبقى الغير طبيعى إن واحد يشتهى ستات تخينات....وساعتها يبقى العيب فى الراجل نفسه مش فى الستات دول.....وأنا طبعاً أتفق إنه من المشين إعتبار المرأة شريك جنسى محتمل فقط، وفى كلامى بأوضح إن الحجاب ليس مانع فعال ضد التحرشات الجنسية)

- طالما إن عامة وليس كل الرجالة اللى فى بلدنا يعتبروا أشخاص طبيعين وليس حيوانات هيجانة، يبقى إيه ذنب واحدة عارفة ربنا لبسها محتشم ومش معرية حاجة إن فيه شوية بهايم لا يمثلوا الأغلبية مش بيفكروا غير اللى فى بنطلونهم؟؟؟ وهل الحل فعلاً فى الحجاب ولا فى معالجة المرضى النفسيين وتطهير الشعب من العالم القذرة دى عشان يبقى المجتمع متحضر؟؟؟ وإن جيت للحق حتى لو واحدة إتحجبت خوفاً من التهجم عليها برضه كده ولا كده معرضة للإغتصاب إن شالله بقيت منقبة كمان...وأكبر دليل على كده حادثة وسط البلد فى تانى وتالت أيام عيد الفطر اللى فات!

- لو فرضنا إن واحدة عايشة بما يرضى الله وبتؤدى الفروض الخامسة (مش ستة عشان الحجاب مش داخل فيهم) على أكمل وجه، يعنى بتنفذ وصايا الله وبتعمل خير ومعروف كتير، ولبسها محتشم ومحترم....بس مش لابسة حجاب!!!! يبقى مصير آخرتها فين يا سيدى؟؟؟ تبقى إجابة غير منطقية خالص لو قولتلى إنها ع النار مرمية حدف...لأن إستحالة حتة قماشة على الراس هى دى اللى هتقف عائق بين الست وبين دخلولها الجنة، ومش بسببها ربنا لا مؤاخذة هيسيب حسناتها الكتيرة جداً ويتلكك لها على حتة حجاب لا هيزود ولا ينقص منها حاجة!!!!!!!!!!!

يبقى بالعقل والمنطق الحجاب لا يكون فرض بالجبر والقهر على كل ستات الدنيا لأنه لا يتماشى سواء مع مختلف معايير الجمال عند النساء أو الرجال ولا يساير تغير الأزمنة والعصور ولا هو العنصر الأساسى الأهم فى دخول المرأة المؤمنة الجنة.....!

==================================

ملحوظة:
ربما يكون أسلوبى فى كتابة الكلمات دى غريب ومتطرف عن الطبيعى بس إعذرونى...الواحد لما يكون فى دماغه كل الأفكار دى مابيبقاش عارف يطلع إيه ولا إيه، فخرج منى بالشكل ده!

وبالنسبة لكلامى عن الحجاب فأنا لا أعارض الحجاب فى ذاته بل أعارض جعله فرضاً - وهو ليس كذلك بالمنطق - وإستخدامه المتطرف فى أيامنا هذه....فهو حق يراد به كل باطل!

أشرف حمدي said...

amir
اتفق معك الي حد كبير وان كنت أنا أكثر هدوءا في حديثي بهذا الشأن نظرا لحساسيته
تحياتي

soko said...

تعقيبا علي كلام يودي في داهية ,انا شايف ان كل شخص له الحرية في ابداء رأيه وتبني نظريته الخاصة في هذاالموضوع ,ولكن الذي اتعجب له فعلا هو نطرتك العنصرية لموضوع الجمال وعدم تقديرك للاختلاف , الا تعلم ان الجمال شيء نسبي وما يعجبك قد لايعجب الاخرين فقد تكون سلمي حايك من الجميلات ولكن ايضا قد تكون مها احمد اجمل منها في نظر اخرين الذين تعتبرهم من الشواذ لمجرد انهم لايتفقوا معك في الرأي وانا أري فعلا انها من اجمل الجميلات وهذا رأيي الشخصي و انا حر فيه فاأنا لا اري ان النساء يجب ان تأخذ شهادة الايزو لكي تكون جميلة , فقد تكون الفولكس البيتل القديمه اجمل من الميتسوبيشي لانسر الجديدة كما ان النساء البدينات الذين تعتبر معجبيهم من الشواذ كانوا قديما نموذجا للجمال , واخيرا الا تري ان كلامك عن الحجاب هو اعلي درجات الشذوذ عن المألوف ؟ مع احترامي الشخصي الكامل لكلامك و شكرا.

ManSouR said...

فعــلا أن الانســان يحـب الجدال كما أخبرنا بذلك الله جل وعلا ..
يا جمـاعه ألا تؤمنون بأن الله عليـم خبير .. ألا تؤمنـون بأن الذي خـلق الخلـق يعلم مايصلحـه ويعلـم مايفسـده .. ألا تؤمنــون بأن الله حكيـم .. إذا كنتـم لاتؤمنـون بذلـك فانه ليس بعد الكفر ذنب .. إذا أمر رجـل حكيــم رجلا آخر أن يفعل أمرا مـا .. ألن تعتقدوا بأن هذا الرجل الحكيم لم يأمر بهذا الامـر الا لاسباب او حكمـه ؟؟؟ فمابالكم إذا أمرنا الخالق البارئ المصور العليم الحكيم الذي خلقنا من عدم خالق الكون وخالق كل شئ .. فما بالكم إذا امرنا بأمر .. ألن تعتقدوا بحكمة الله في هذا الامر .. سواء عرفنا هذه الحكمه أم جهلناها ؟؟ .. فكيف ونخن نرى هذه الحكمة بأعيننا .. فإننا والله نخجل لمجرد النظر للمرأه المتحجبه بالحجاب الشرعي الصحيح .. ونحترمها احتراما شديدا .. وانا بالطبع اقصد الحجاب الشرعي الصحيح وليس الحجاب المزيف المنتشر هذه الايام ..

أشرف حمدي said...

لآ تناقش ولا تجادل يا أخي على

هذا هو تفكير المتطرفين
لأ ربنا خلقنا عشان نناقش ونجادل ونتفكر مش عشان نعيش كالبهائم

انت بتتهمني بالتفكير ؟
انها حقا لتهمة عجيبة :)

Counter