Total Pageviews

Thursday, June 17, 2010

قانون أم محمد

الكوميديا الحكومية لا تتوقف أبدا من خلال التصريحات الرسمية ، خاصة تلك التي يدلي بها السيد الوزير يوسف بطرس غالي وسيادة النائب الأستاذ أحمد عز ، بل تتطور إلى كوميديا سوداء من نوع خاص جدا جدير بأن ننظر له بعين الإعجاب .

كوميديا لا تكف لحظة عن مفاجأتك بالجديد ، ولا تكف عن إثارة دهشتك ، تماما كما ينصحني فنان الكاريكاتير الأستاذ عمرو سليم دائما بقوله : لا تكف عن إثارة دهشة القاريء بكاريكاتير يحمل أفكارا جديدة ومبتكرة .

والإبتكار في الكوميديا هذه المرة كان هائلا ، قفزة عملاقة تنطلق بها الحكومة نحو آفاق أوسع لم نكن نتخيل أنها موجودة أصلا فضلا عن رؤيتها بأعيننا التي أصابها قصر النظر وإدراكنا الذي تبلّد .

والموضوع ــ كما أختصره على طريقتي ــ هو قصة شاب سكندري عادي جدا ، لا ينتمي إلى أي تيار ديني أو سياسي . شاب يهوى التلحين والتوزيع الموسيقى ويستخدم لوحة مفاتيح موسيقية (أورج) موصلة بجهاز الكمبيوتر الذي لا يكاد يبتعد عنه لحظة إلا للضرورة ، يهوي أيضا تربية القطط السيامي ، ويهوي صيد الأسماك ، ويهوي الإنترنت بالطبع إن كان من الممكن ان نعتبر الإنترنت هواية ، عاش في أمريكا لفترة ، وأخوه يحمل الجنسية الأمريكية ووالدته لديها جرين كارد وخاله طبيب أسنان ، يعني قطط وسمك ومزيكا وأمريكا ونت ، مش بقولكم شاب عادي تماما ؟ ما المثير هنا ؟

المثير أنه قتل على ايدي أثنين من المخبرين على مرأى ومسمع أكثر من 60 شخص في وضح النهار ، هكذا تقول القصة

والسبب ؟

هممممممم ، السبب ، هذه نقطة مهمة وتحتاج إلى تأمل.

هذا هو أول شيء فكرت فيه حينما علمت بالخبر وقتما كان مجرد صورة بدون قصة .. السبب .. ما السبب \ الدافع الذي يجعل مخبر لا سلطة له تقريبا ــ أو قل : أقل من أقل سلطة في البلد ــ يقتل شابا كهذا "قطط وسمك ومزيكا وأمريكا ونت" ، سؤال محير أليس كذلك ؟

طب ونحتار ليه ؟

بسيطة .. إسألوا فضيلة المخبر

ولكن ما وصلنا لم يكن كلام فضيلة المخبر فحسب ، بل كان بيانا رسميا من وزارة الداخلية نفسها يوضح ملابسات الحادث .

خالد محمد سعيد "قطط وسمك ومزيكا وأمريكا ونت" هو في واقع الأمر تاجر مخدرات (واحد) ومتحرش جنسيا بالبنات (اتنين) ومتهرب من الخدمة العسكرية (تلاتة) وفي حوزته أسلحة بيضاء (أربعة) ومطلوب في 4 قضايا سرقة (آدي خمسة) ويارب ماكونش نسيت حاجة تاني ، لالالالا مش هو اللي قتل كينيدي الصراحة البيان لم يقل ذلك أبدا . ولكنه اكتفى بهذه التهم الخمس

وحينما حاول المخبر تفتيشه قام خالد ببلع كيس بلاستيكي يحوى مخدر البانجو فمات الولد من اسفكسيا الاختناق دون أن يلمسه المخبر .

ولكنني متضايق من المخبر وألومه وأعتب عليه ، يعني مخبر وزميله المخبر التاني مش عارفين يطلعوا الكيس من زور الواد ؟ في الحقيقة لا أريد ان أزيد من لومي عليه لأنه ربما كانت أصابع المخبر غليظة جدا فلم تستطع الوصول إلى زور القتيل ، كما انني ألوم خالد أيضا وأعتب عليه جدا ، كيف يبلع كيس بلاستيكي ؟؟؟ أنا اعرف اللي بيتمسك بحتة حشيش قد عقلة الصوباع بيبلعها وبيعمل دماغ حلوة قوي قوي ، انما يبلع كيس بلاستيك باللي فيه ؟؟؟ ده أصغر كيس فيكي يا مصر بيشيل لتر لبن أو كوبايتين عصير قصب أو طبق كشري من أبو خمسة وسبعين .. تبلع كيس يا خالد ؟ كيس بانجو يا خالد ؟

طيب خالد بلع الكيس ومات ، ما الذي جرى لوجه خالد ؟ الصورة لا تحتاج إلى طبيب أسنان مثلي ليشرح ما بها :

كسر في الفك السفلي

كسر في الفك العلوي وفي الأسنان العلوية

كسر في قاع الجمجمة

كسر في عظام العين

بشكل عام الوجه متهتك بشكل بشع .

ده ماكنش كيس مخدرات ده يا خالد ، ده كيس متفجرات ، كيس ديناميت أكيد

لكن كانت هناك روايتين مختلفتين تماما :-

الراوية الأولى تقول أن ما نراه في الصورة هو عبارة عن جثة خالد بعد التشريح ، وبعد التشريح الجثث بيكون شكلها كده هوه يا عالم يا جهلة ياللي ما بتفهموش في الطب .

لهذا فانا اسحب لومي وعتابي السابق وأوجهه ــ وبكل قسوة ــ إلى قسم التشريح بكلية طب قصر العيني عشان ضحكوا عليا وعلموني غلط لما كنت في سنة أولى أسنان ، ماحدش قاللي ليه اننا في التشريح نكسر الفكين والأسنان وقاع الجمجمة وعظام العين ؟ ماحدش قاللي ليه اننا بنقطّع الخد بالشكل ده ؟ عموما شكرا للطبيب الشرعي الذي نبهني إلى هذه المعلومات الهامة التي غاب عن أساتذتي في الكلية شرحها لي .

الرواية الثانية تقول ان خالد وهو طالع من القسم (إلا هو راح القسم ؟؟؟ مش الواد مات يا جدعان وهو بيبلع الكيس في الإنترنت كافيه ؟ ولا انا نسيت ، ولو ماكنش مات هو طلع من القسم ليه ؟ مش ده متهرب من الخدمة العسكرية ؟ وهربان من قضايا وعليه أحكام وبيتحرش بالبنات وتاخر مخضروات ؟ ) ما علينا .. المهم .. وهو طالع من القسم جت عربية خبطته فعملت فيه كده

عربية خبطتته في وشه !

همممممم ، العربية سابت جسمه كله وطارت تخبطه في وشه ؟ ، دي أكيد الحوامة بتاعة مازنجر أم مروحتين ع الجناب دي ، اللي بتطير ، مش عربية ماشية على عجل، كان راكبها "ماهر" وهو جاي يقول : أفتح يا مازنجاااااار ، قام خابط في وش خالد عمل فيه كده .

دي قصة جميلة برضه .

القصة الأجمل بقى هي الصحافة القومية .

الصحافة القومية تصف خالد بـ "شهيد البانجو" ، وتتسائل في استنكار : هو ايه اللي جرى لمصر وشباب مصر ؟ كل الضجة دي عشان واحد حشاش ؟

طيب أنا حجيب من الآخر يا صحافة يا قومية :-

خالد محمد سعيد "قطط وسمك ومزيكا وأمريكا ونت" هو قاتل وسفاح ، مطلوب في 348758234750839475 قضية قتل واغتصاب وسرقة بالإكراه ، السؤال هنا : هي البلد دي فيها قانون ؟ ولا مافيهاش ؟

يعني واحد زي ده يتقبض عليه بهدوء ويتقدم للمحاكة بشياكة ويتعدم بعدالة ، إنما اللي حصل ده تبع قانون ايه ؟ قانون ايه ده اللي يدي حق لحتة مخبر إنه يتهم ويدعي ويحاكم وينفذ الحكم في 20 دقيقة (هي مدة تعذيب خالد بالضبط) ، في 20 دقيقة اتهمت وأصدرت حكمك وقمت بتنفيذه علنا في الشارع قدام 60 شاهد وفي وضح النهار ، 20 دقيقة سلبت فيها روح شاب في مقتبل حياته ، شاب بتاع مزيكا وقطط سيامي وصيد سمك وأنترنت . شاب في مثل عمري مواليد 82 ، شاب ماحدش من جيرانه أو معارفه أو أصحابه قال عليه كلمة وحشة ، شاب عاش حياته كلها في أمريكا وجه مصر عشان يموت ، شاب اسمه خالد محمد سعيد ، أبوه مش لواء ولا أخوه أمين شرطة ولا جوز عمته مأمور قسم الضرب الأحمر .

، آه نسيت ، صح ، ده بقى اللي اسمه قانون "أم محمد" ، الشهير بقانون الطواريء ، مش كده ؟

أنا دلوقتي بس عرفت السبب


14 comments:

Empress appy said...

ام محمد برئية من القانون دا مفيش على وجهه الارض قانون كدا غير قانون الغل والجبروت والنقص فى نفس الوقت
الناس دى بتوع الداخليه عايشين قهر منظم والله فعلا
بمعنى الكبير بيقهر اللى اقل منه واللى اقل بيقهر اللى ااقل وهكذا بيصب فى النهايه على الشارع والناس
ونسيت اقولك ومن الاساسا فى البيت القهر اللى متربين عليه

نسيت نقطه البانجو هو اللى طلع وضربه وخرشمه علشان مش تعاطاه بشياكه

Unknown said...

very good ya dr.ashraf
thanx

AHMED SAMIR said...

القصة و ما صاحبها من بيان الداخلية لا يمكن ان تطلق عليها الا انها الكوميديا السوداء

Mahmoud البطراوى said...

انا بس عندى تعديل للعنوان
بدل ام محمد
يبقى ابو علاء اظن هيبقى اكثر مصداقيه :D

ياسر الزهار said...

من كتر مانا موجوع
مش هرد

العلم نور said...

حسبي الله ونعم الوكيل .. الله يصبر أمه والديان لا يموت.


اصحى يا نايم ووحد الدايم ..

(حملة الجسد الواحد)

أرجوا من المدونين الموقرين أن يضعوا شعار الحملة واسمها في الشريط الجانبي لمدوناتهم كدلالة على وحدة صف أمة محمد

لمزيد من المعلومات

http://dndanh111.blogspot.com

جعله الله في ميزان حسناتكم .. آمين

Anonymous said...

لما ثارت قضية خالد علي الإنترنت و بعد ان نشر موقع اليوم السابع فيديو لخالد و هو يعزف علي لوحة المفاتيح , خرج بعض الفرسان علينا و هم يقولون , كيف تساندونه و هو يستمع للموسيقي ألا تبا لكم , ثم أن المظاهرات حرام هذا رأي واحد آخر و اسمه أبو عبيدة السلفي و يؤيدة في ذلك شخص آخر و يقول اي نعم هي حرام و هذا هو قول الشيخ محمد حسان و الحويني

ألا فتبا لتلك العقول
يستنكرون علينا أننا نساند مواطن من بلدنا مسلم بحجة أنه يستمع للموسيقي بل و يعزفها !
تلك هي المصيبة

بنوتة توتة said...

بشع
الله يرحمه
و حسبي الله و نعم الوكيل
يمهل و لا يهمل

Asmaa mahaba said...

دا قانون الغابه اللى عايشين فيه واللى بيحمى الحكومه ومصايبهم وبيستر عليهم

فكرة من الزمن ده said...

مدونتك حلوة
حطيتها في دماغي

بكرةالصبح اقرا براحتي

تحياتي

shorouk said شروق سعيد said...

مش عارفة الواحد ممكن يعلق يقول إيه
في مرارة في حلقي من كتر البكا مخلياني مش قادرة أتكلم
البكا من كتر الألم و الحزن و الخوف من اللى جي

Anonymous said...

كل ظالم وله يوم

Anonymous said...

اجمل حاجة قريتها عن خالد سعيد انا مى عبد الرحمن من الفيس بوك

fatima suliman said...

فعلا هيا كوميديا سوداء .. حسبنا الله ونعم الوكيل فى كل ظالم

Counter