Total Pageviews

Monday, June 11, 2007

بقى هم دول العرب ؟


احنا مش كده يا ولاد الكلب
هذه هي الجملة الوحيدة التي استطعت نطقها بعد مشاهدة هذا الفيديو العقيم الذي قام أحد العباقرة بتصميمه وعرضه الي العالم كله ليعرفوا كم نحن مودرن وكوول
ماذا في الفيديو ؟
يمكنكم مشاهدته .. أو ان تتركوا لي المجال للتعليق علي هذا السخف الذي أخرجني عن شعوري
تشاهدون أعزائي صور لهيفاء وهبي ونانسي عجرم ومؤخرة روبي ومطربين أقل ما يقال عنهم هو : أتفو .. وماذا كان تعليق معظم المشاهدين الغربيين للكليب
قالوا بأن هذا ليس مقياس التحضر .. وأن أي قرد يمكنه أن يرتدي الملابس المودرن ويضع ميكياجا .. قالوا ان التحضر يكون علي المستوى العلمي والثقافي والفني .. سألوا ماذا قدمتم للعالم وللبشرية .. قالوا أن علينا أن نشعر بالعار مما نحن فيه
والكثير من التعليقات التي تم محوها لسبب معروف
لقد قدمنا الكثير والكثير للبشرية في عصور سابقة .. العلوم العربية هي أساس كل العلوم .. ولقد تركنا هذا الدور واصبحنا أذل خلق الأرض
وبدلا من تصميم فيديو يضم صور أحمد زويل ونجيب محفوظ .. نعرض علي العالم زبالتنا ونقول
أحنا مودرن والله وروشين
تاني مرة : آه يا بلد ناقصة محن

23 comments:

AHMED SAMIR said...

في ناس كتير بتحاول تثبت كل يوم للغرب ان احنا مش بن لادن وان احنا متحررين وعندنا ناس عريانة
تخيل لما ييجي وقت تحاول بشتى الطرق انك تثبت ان احنا عندنا مسخرة ومطربات عارية
حاجة تكسف
تحياتي

m.bazeed said...

كنت زمان اعرف دكتور محترم من الناس القليلة الى بقيت فى البلد قالى :
البلد ديه مافيش حد بيعترف بالمواهب فيها غير لما تكون ياما فى الرجل ياما فى الوسط عمرنا مافكرنا نطلع لفوق اكتر من كدة

Michel Hanna said...

بلاش موضوع الإقامة الدائمة على موقع يوتوبي ده
أحسن تتجنن بعد كده.

عباس العبد said...

ايوة هم دول العرب
و انت بأحساسك بالمفاجأة
اثبت انك عربى صميم
ما انت عارف و انا عارف
و العارف لا يعرف
بلاش تقلب علينا المواجع
اكفى على الخبر ماجور

bastokka طهقانة said...

بداية الكليب بصورة الشيخ اسامة اصلا بتبين غباء جامع الصور و مزجه للنفيس و الحقير في موضع واحد


و كمان صدام
اية ده اهبل و لا عبيط و لا بيستهبل
احنا مش روشين و لا كول احنا بنعرف نفرح و نقرا و ندرس و نتفوق و مش لاغيين عقلنا
كليب مستفز


ازيك يا اشغف؟
اوروفوار

rashida said...

اشرف انا اتفرجت ع الفديو و مالقتش فيه اى شئ مستفز
انت زعلان ليه
طب ما فعلا دول العرب
و صورتهم حلوة اهى
و مفيش اى تلميحات على فكرة لانهم روشين او حاجة على الشاكلة دى
فيديو عادى و تلميحه مفقود و تجميعه ردئ
انت شفته ازاى طيب ؟
يمكن انت شايفه من واجهة انا مفهمتهاش
يعنى وضح اكتر لو فعلا انت شايف ان فيه تلميح مهين للعرب

Anonymous said...

عزيزي اشرف
مش عيب اننا نسمع اغاني لروبي و نانسي عجرم و هيفاء وهبي انا شخصيا بحب ليهم اغاني
و ماحدش قال ان حضارتنا بتقاس بوجودهم او عدمه
فيه حاجات كتيره في الحياه حلوه و اللي بيسمع الناس دي مش شرط يكون هايف و مافيش في مخه حاجه بالعكس فيه ناس مثقفين بس في نفس الوقت بيحاولوا يوازنوا بين الجد و الهزل
الحياه مش كلها جد عزيزي و برضه مش حتمشي لو كلها هزل حبه من ده علي حبه من ده يكون فيه توازن و الحياه تمشي
تحياتي ليك
:)))

أشرف حمدي said...

واضح من التعليقات ان فيه خلاف بين رأيين
رأي بيقول ان الكليب ده عادي وربما كان مفيدا في توضيه للغرب باننا متحضرين
والآخر وانا منهم يراه مهين ومستفز

طيب سؤال يا جماعة
الموضوع مش موضوع الكليب .. ولكن أنا بتكلم عن مفهوم التحضر نفسه

لو سألتكم تعملوا ايه لو ان فيه واحد أمريكي مايعرفش حاجة عن مصر خالص أو يعرف اننا مجرد ناس عايشين في صحراء وحبيت انك تعمل له كليب صغير كده تقول فيه المفيد كله وفي حدود ثلاث دقائق مثلا .. حتعمل ايه في الكليب ده ؟

حسيب لكم الاجابة بس اسمحولي اقول انا الأول :
أنا عن نفسي ححاول أجيب صور لشوارع مصر بشكل عام .. لا الجميلة قوي ولا مقالب الزبالة .. صورة لمواطن مصري شقيان وراجع من شغله .. صورة لأحمد زويل وهو بياخد النوبل وصورة كمان لنجيب محفوظ .. صورة لطلبة في الجامعات المختلفة .. صورة لطفل بيلعب في النادي وآخر قدام الكمبيوتر .. صورة لعمرو دياب .. صورة لشيرين .. ومش حقول عبد الوهاب وأم كلثوم عشان احنا بنتكلم عن العصر الحديث
والله انا شايف كده

تفتكروا الصور اللي كانت في الكليب اللي شفتوه ده بتعبر عن العرب أو عن مصر فعلا ؟

مش قضيتي هيفاء هايفة ولا مش هايفة .. لكن القضية الحقيقية هنا : هل هي تمثل العرب ؟

تحياتي لكل التعليقات

أسامه يوسف said...

أنا عن نفسى لو هاعمل كليب لمصر
هاوضح كل حاجه حقيقيه
بمقالب الزباله
بالمدارس الخربنه
بالبيوت الآيله للسقوط
بالأحياء الشعبيه
بالمطبات الغير صالحه للإستخدام الآدمى
وطبعاً لازم الجانب الإيجابى زى
صور زويل ومحفوظ والبرادعى
وصور الحقول الخضراء
وبالنسبه للفن كفايه عمرو بس
وممكن صور رياضيه زى الأهلى فى كأس العالم والمنتخب 2006
وممكن صوره لأيمن نور فى سجنه و
ولا بلاش

ياسر خاطر said...

معلش انا ليا وجهة نظر مخالفة
انا شايف ان دة واحد ايا ما كان بيحاول انه يحسن صورة العرب
لكن المشكلة ان حسب ثقافته واعتقاداته ان هي دي الصورة الحسنة وان هي دة قدوة الشباب
بمعنى تاني خالص ان دة مش بيحاول يطلع اننا مسخرة ولا رقاصين ولا كدة
ويسوء من صورتنا
لا هو معتقد ان هي دي صورتنا اصلا
دة واحد متضايق ان الغرب انهم شايفين ان العرب ارهابيين وعاوز يوريهم العرب من وجهة نظرة
ودة بيوضحلنا مصيبة اكبر
الا وهي ان شبابن الجميل هي دي فكرته عن التحضر والثقافة
وعلى رأي بزيد
احنا من كتر مابنوطي راسنا وناخد على قفانا مابقيناش نعرف نبص لفوق ولا نقدر اللي فوق
بقينا محترفين في تقدير كل موهبة في الوسط او الرجل

شيماء الجيزى said...

بجد
فعلا حاجه تكسف
وحاجه تخلينا نقول والله ده حرام
بنحاول نثبت اننا احرار بالشكل ده؟
هل هى دى حريتنا؟
هل ده مفهومنا للحريه والتحضر؟

بجد
مش هقدر اقول اى كلام
لا تعليق

..............
دعوة للقاء المدونين فى بورسعيد
لقاء للتواصل بين المدونين ...صيفى جدا
ولمزيد من المعلومات ارجو زيارة مدونتى

تحياتى

Unknown said...

توقعت إن الاستشهاد هيتضمن نجيب محفوظ وأحمد زويل .. والباقي تحابيش
المثاليين دول بالذات يبينوا إن إحنا ولاد كلب جدًا . نجيب محفوظ العظيم اتكفر - من العرب لا مؤاخذة - واتضرب بسكينة واتبهدل في موته - مش من حد غريب يعني - وكمان هو دلوقتي ميت يعني بقي من زمن الفن الجميل ومش هنقعد نتغني بأمه ونجيبه كل ما نحب نداري عيوبنا ومخاصينا ، وأحمد زويل مش مصر اللي ساقته العلم بالشاليموه - الرجل من بدايته وقاعد بره ولو قعد هنا كان انتحر
ماهو بقي لو هنضرب أمثلة من النوعية دي خلينا نذكر رامي شعبان ومحمد محمد و البرادعي وعصام حجي
مصر إيه وعرب إيه اللي بقي ليهم لازمة ؟!
داحنا عملنا صدام شهيد لما مات مع إنه كان بيغتصب شعبه قبل شعب الكويت . وعاملين بن لادن حامي حمي الإسلام بتفجيراته الجميلة في المدنيين .
ولا عندنا دين ولا أخلاق وجهل مغيم علي العقول وفساد مش للركب .. ده للرقب
الناس اللي ظهروا في الكليب ده هما اللي بنحتفل بيهم وبنتبع أخبارهم وبنلهث زي الكلاب ورا نظرة لمؤخراتهم
تعالي نشوف العالم اللي فاتت في الحديد دلوقتي ونشوف وضعها مع بلادها العربية
عندنا دكتور يوسف القرضاوي اللي مطرود في قطر وشبيهه عمرو خالد ونهي الزيني وهشام البسطاويسي ومحمود مكي اللي شوف اتعمل فيهم إيه
مُدرك إن العرب مش حكام وبس ، لكن إحنا أصلاً مش قادرين نعيش زي البني آدمين وعايشين ميتين عبيد تحت الحكام دول
تحياتي لكل المؤخرات العربية

Anonymous said...

اولا لازم اقول انى مفتقده مدونتك الجميله دى جدا جدا جدا
نعمل ايه بقى فى الامتحانات والهم والذى منه
تانيا
انا مش عارفه اشغل الفيديو
الصفحه فاضيه بالنسبالى ..بس كفايه عليا اللى انت قلته
تالتا
تفتكر ايه السبب اللى يخلى الغرب واخد عننا الفكره السيئه دى
احنا بنقول كنا وكعملنا
طب فين الحاضر
ممكن نكون عملنا حاجات عظيمه زمان لكن الحاضر بيهدم كل حاجه
انت عارف ان الأجانب فكرتهم عن العرب لحد دلوقتى انهم المتخلفين اللى بيركبوا جمال وعايشين فى الصحرا وبيعوموا فى البترول
مجرد زكايب فلوس من غير عقول
الى حد ما انا ممكن اعذرهم فى الفكره دى
لأن احنا ما عملناش دعايه مضاده لينا
م الاخر بلاوينا بتشهد علينا وهما بيحكموا حسب اللى شايفينه مننا
طولت عليك وصدعتلك دماغك بس انا محروقه من الافكار دى بجد
تحياتى

مشربية said...

"وش واحد مكتاب"
اولا : انا متفق معاك في الفيديو اللي هاتعملة يا اشرف
ثانيا: اظاهر السازج اللي عمل الفيديو دة كان عايز يقول اننا عرب متحدين "لبنان- سوريا - السعودية" من كل بلد وجة
احنا ممكن نعمل حاجة لذيذة نتكلم عن كل الحضارات اللي عندنا و هما اخذوها بس تم تغير اسمها عندهم زي الاتيكيت هو اصل من اصول الدين و غيرا الاسم الي اصول الاتيكيت
اسف لو كلامي ملغبط
الف شكر علي الموضوع يا اشرف

فبركة said...

رغم اتفاقى معك يا صديقى العزيز
دعنى اختلف حول استخدامك لفظ
أحنا مش كده يا ولاد الكلب
لأن مش هو ده أشرف حمدى المحترم المهذب اللى أنا أعرفه
واللى مدونته بتدعو لحرية الرأى والتعبير وتندد بالتشدد والاختلاف المتعصب
دى غلطتنا يا عزيزى قبل ما تكون غلطتهم
وشكرا لسعة صدرك
بالمناسبة انا مستنى زيارتك لمدونتى المتواضعة

أشرف حمدي said...

فبركة
يا سيدي انت زعلان ليه ؟
طب خلاص نخليها أولاد الراجل اللي مش كويس
سلام يا حبي

Yasser Hussein said...

الفيديو المعروض محاولة ساذجة لشخص ساذج يريد أن يوصل لنا فكرة في رأسه
ولكن خانه التعبير
فلا يوجد علاقة بين المطربين والرقاصين
وبن لادن وصدام
ولا يوجد اصلا وجه مقارنه
وعندما عرض صور مطربين
هل يعتقد ذلك الساذج أن الغرب يعلم أن هؤلاء فنانين
ربما أعتقد الغرب أنها صور لمجموعة من الشباب والشابات المتزينين والمتأنقين ليس إلا
وهؤلاء من نعتقد انهم نجوم ومشاهير في بلادنا
هم مجاهيل عند الغرب

خالص تحياتي

نهى منير said...

هو اللى عمل الكليب ده عايز يقول ان مفيش فرق بين هز الوسط والسياسة ولا أيه؟
بوست لذيذ يا دكتور أشرف
بس بلاش الشتيمة
أنت أرقى من كده بكتيييييييير

بـاى

Anonymous said...

اقولك على حاجة
اى انسان غربى يصدق فعلا ان هم دول العرب و يكتفى فقط بهذا الكليب السخيف
و يتجاهل فى هذا البحث عن الكتب التى تحدثت عنا و الفحص و التمحيص و خلافه
فشخص زى ده مش هيفرق اصلا معانا اننا نوضحله فكرة ان دول مش العرب
لانه هيكون شخص جاهل
انا لو جيت قلت لحد مشافش افيال "ان الفيل بيطير" و هو صدقنى
و خد رأيى كحكم مطلق
يبقى يستاهل يصدق
انا دايما بقول من زمان
اللى يفهم غلط يستاهل انه يفهم غلط عشان غبى
و انا مش محتاج اوضحله رأى فى حاجة هو معندوش الدافع و لا الحماس انه يتأكد منها
....
و على فكرة
دول العرب فعلا
بس مش كل العرب
......
مع خالص تحياتى

أشرف حمدي said...

احمد مختار عاشور
رأي مهم فعلا ووجهة نظر سليمة
احييك بشدة

غمض عينيك said...

فعلا حاجة تكسف
ناس كتير فاكرة ان التحرر هو التحرر من اللبس والاخلاق
لكن هي دي الحاجات الوحيده اللي لو اتحررنا منها يبقى خلاص مبقاش لينا لازمة

تحياتي

محمد سمير

Anonymous said...

عزيزي اشرف
اي اغنيه بتشوفها متصوره عن مصر بيحاولوا يظهروا احلي مافيها و يبعدوا عن البلاوي المتلتله اللي موجوده
انا مش بقول ان مصر مفيهاش حاجات حلوه بس لازم في اي اغنيه وطنيه نكون واقعيين و نحاول اننا مانظهرش بعكس حقيقه المكان
المشكله ان فعلا فيه حاجات كتيره بتكسف لو اتحطت في اغنيه زي مقالب الزباله و الاطفال و الرجاله اللي بيتبولوا في الشوارع و زي ما انت عارف ده واقع بنعيشه و لو مش مصدق روح جنب ميدان عبد المنعم رياض و شوف المهازل
الأول قبل مانعمل اغاني عن مصر لازم نحاول اننا نتلافي السلبيات اللي موجوده الزباله اللي بنلاقيها في الشوارع و حاجات تانيه كتير
عشان لما نعمل اغنيه تكون لامسه الواقع بجد مش مجرد اغنيه بنحاول نجمل بيها شكل البلد عشان السياحه
تحياتي ليك عزيزي

نفسنا said...

ندعوكم لمشاهدة العدد الثانى من مجلة نفسنا

Counter