Total Pageviews

Tuesday, April 01, 2008

فاتورة التليفون



إضغط على الصورة للتكبير
شكر بالغ ، وتقدير عميق ، واحترام واجب ، وحب عظيم ، ومحبة قوية ، وعشق شنيع ، وغرام كبير للشركة المصرية للاتصالات على إعفائي من استهلاك الانترنت لشهر يناير بقيمة
13.35
جنيه
حيث أنها قامت شاكرة بكتابة هذا التنويه باللون الأحمر أعلى الفاتورة كما ترون في الصورة ، حتى أقبل يداي وأرفعهما إلى السماء ابتهالا وتوسلا من الله تعالى أن يحميها ويكثر من خيرها علينا قادر يا كريم .
ولكن ما أريد ان أقوله هو أنني
لم أستهلك انترنت خلال شهر يناير أساسا للأسباب التالية :
أولا : أنا عندي انترنت في الشغل
ثانيا : أنا مابشتغلش على الانترنت في البيت
ثالثا : الانترنت كان مقطوع أساسا خلال شهر يناير وحاولت أدخل مرة واحدة وجالي شلل رباعي
.
يبقى التلاتاشر جنيه وخمسة وتلاتين قرش دول جم منييييييين ؟
قول انت باقااااااا

طيب ، يمكن بدخل ع الانترنت وأنا نايم ، مش فيه ناس بتمشي وهي نايمة ؟ وناس بتتكلم وهي نايمة ؟ يبقى مش بعيد أكون بدخل ع النت وأنا نايم ، ماشي
شكرا

14 comments:

قليل من التفكير said...

مش مفهومة ديه خالص

يعني قصدهم أنك أستهلكت ب 13 جنيه وهما بيبقششوا علي الناس ... ولا أن محدش أستهلك حاجة وأحمدوا ربنا أننا بنحاسبكوا علي أد أستهلكوا ؟؟؟

حاجة تعل

أسامه يوسف said...

عادى
أنا والله قبل ما يبقى عندى كمبيوتر جاتلى فاتورة التليفون فيها جنيه أو نص جنيه استهلاك نت

اشمعنى جنيه
وازاى وانا ماعنديش كمبيوتر أصلاً
!!!!!!!!!!

مواطن مصرى نايم said...

طب يا اشروف احمد ربنا
تعالى شوف الوكسة بقى
الفاتورة جايه 210
قول مش مشكلة احنا راغايين
تعالى شوف الانئح
التليفون بقى كان مقطوع خلال
شهر 2 و 1
يعنى الفترة اللى هما محاسبننا عليها فى الفاتورة
تعالى شوف الانئح من الانئح اللى الفوق
ليه التليفون كان مقطوع
مش عارفين
بس اتصلنا بالاعطال قالوا لنا جايين خلال 48 ساعة
فعلا بعد 48 ساعة بالظبط
محدش جه
طوال الشهريين نتصل بيهم
و هما هما ال 48 ساعة
صدفة كده ناس قالوا لنا ان بتوع الاعطال اللى ماسكين المنتطقه عندنا بيكونوا قاعدين على قهوة معينة
روحنا جبناهم
صلحوا التليفون
و قالوا لنا انهم والله ما جلهمش
اى بلاغ من السنترال
شهريين والبلاغ مجاش
و هما مكنش معاهم و لا بلاغ يعنى مش مشغولين

و الفاتورة 210
يا ترى مين اللى وراهم ؟

اهو ده عيبه said...

حضرتك خد الامور ببساطه
ممكن ميكونش عندك فى البيت كمبيوتر من اساسه وتجيلك الفاتورة فيها نت برضه
دى حصلت بجد قدام عنيا مع واحدة بتشتكى من النت فى الفتورة ومفيش كمبيوتر من اساسه

ابتسم عزيزى فانت عميل المصرية للاتصالات

بطوط حبوب said...

ههههههههههههههههه

والله الشركه دى لو عملت مدونه تقول فيها على الحركات بتاعتها هتبقى مدونه جاااااااامده مووووووووووت
اظن هنقعد نضحك لحد ما نفطس
كوميده الموقف مش افيهات وكلام فاااااااارغ
ويا عمنا احمد ربنا فى غيرك لقى بالخط الاحمر عليك 15 جنيه من الشهر الى فات هتدفع ولا نولع فيك وفى التليفون

أشرف حمدي said...

قليل من التفكير
طبعا بيبقششوا عليا وبيذلوني
------------
أسامة يوسف
تصدق انا سمعت الحكاية دي أكتر من مرة ؟ الراجل اللي ساكن جنبنا حصلتله وهو مايعرفش يعني ايه كمبيوتر أصلا عشان يفهم يعني ايه نت
------------
مواطن مصري نايم
هههههههه نفس القصة حصلت معايا لما كنت لسة ساكن مع أهلي ، كنت بروح أقعد ع القهوة اللي بيقعدوا عليها استناهم لأن الأعطال مالهاش لازمة ، واكتشفت في الآخر ان العمال نفسهم هما اللي كانوا بيقطعوا السلك عشان ياخدوا فلوس
------------
أهو ده عيبه
عندك حق فعلا والله ، شكرا تشريفك مدونتي المتواضعة وماتقطعش الزيارات بقى
------------
بطوط حبوب
هههههههههه عندك حق ، دي حتبقى مدونة منافسة قوية ، مدونة كاريكاتورية من الطراز الأول
ما تيجي نعملها طيب ؟ :)

مواطن مصرى نايم said...

هههههههههه
جامده قوى فكرة المدونة للشركة دى
ممكن يكون اسمها
الحرامية للاتصالات
-----------------
على فكرة يا اشروف انا عملت المدونة بتاعت خالى
و نزل اول بوست
والبوست الجاى ان شاء الله نام يا مصرى كاملة
men-misr.blogspot.com

اهو ده عيبه said...

ان شاء الله مش حقطع الزيارة

واتمنى انك تزورنى وتقرا نقش الفراخ اللى بكتبه

allah-slave said...

يا دوك وايه الجديد

مفيش اي جدي في اللى بتقوله ... بدلنا وعارفينها وعرافين الهوار اللى بتهزره معانا ...

المهم بقى انى عايزك تعمل موضوع كامل ومطول عن غلاسة وسماجة وهبالة رسام الكاريكاتير اللى اسمه (( تاج )) اللى بيرسم في الاهرام

انا مش متخصص في الكاريكاتير بس بتابعه وبحبه ويهمني اوي في الاكاريكاتير الفكرة مش مجرد ان الرسام موهوب ومتهيالى انت مرة برضه قلت كدة

انا اعترف ان (( تاج )) موهوب كرسام وله خط مميز ولكنه فاشل 100% من ناحية الافكار وياريت وكدة بس ده بقى يعمل كاريكاتير بغرض الخنقة

ارجوك وآمرك اختر ايهما شئت ... ولكن اعمل موضوع تحلل فيه الكاركاتيرست ده ولو تعرف تبعتله رسالة تقله يبطل كاريكاتير يبقى احسن

سلام

Anonymous said...

يا دكتور اشرق متزعلش كلة عشان الشعب السويسري الشقيق بنوكة تتملي
.....
بالنسبة لمجلة الثرطاس خلاص مش هتنزل تاني

أشرف حمدي said...

مواطن مصري نايم
أخيرااااا هييييييه
حدخلها حالا يا باشا
أشكرك بجد ، المدونة دي هدية لكل المدونين والله
--------------
اهوه ده عيبه
أكيد طبعا يا باشا ، وفرصة سعيدة جدا
--------------
allah-Slave
مش عارف أقولك ايه ، هو انت عندك حق ، بس الأستاذ تاج أستاذنا وعمنا كلنا وانا كنت تلميذه في يوم من الأيام
انا ماقدرش أنقد فنان أكبر مني سنا أو خبرة ، وتاج بصراحة يفصل مني 3 بنى رسامين بحكم الخبرة
--------------
anonymous
مش كده برضه ؟ :)
ههههههه
القرطاس طلبها مني موقع ماشي دوت كوم وبعت تصور كامل بيها ومنتظر الرد
بس هم مشغولين دلوقتي ، أتمنى ان المشروع يتحقق بجد خاصة وانهم متحمسين لتنفيذه
ربنا يسهل

somaa mahaba said...

لسه دابين خناقه لرب السما النهارده على الفاتوره المقندله
منه له
تحياتى ليك سومه_87

صحفية روشة said...

طب انا هقولك نكته
واحدة صاحبه ماما جالها950 جنيه نت فقط ده غير المكالمات
وهى مش عندها كمبيوتر اصلا
وخط التلفون مش مسروق
راحت تعمل تظلم
قالولها ادفعى الاول وبعد كدة نشوف موضوع التظلم دة
تقدر بقة تقولى استهلاك النت جالها منين؟؟؟؟؟؟؟؟؟؟؟

Hem said...

شكرا ياباشا على الاخبار الحصرية والخدمات الجمدة دى
ياريت تشرفنا على البلوج دا وتدينا تقييمك
بلوج اخبار مصر اليوم
اهم واخر الاخبار المصرية والعربية الى جانب عدد من الاذاعات العربية والقنوات الفضائية البث المباشر لها ..
ويمكنك الاستعلام عن فاتورة التليفون من خلال البلوج ايضا
http://egyptnewstoday.blogspot.com/2010/03/telephone-billphone-billfatora.html
شكرا لك مرة أخرى
تقبل ارق التحيات

Counter