Total Pageviews

Tuesday, May 06, 2008

العلاوة الطحينية

أعلنت الحكومة عن صرف علاوة تلاتين في المية
كالعادة توقعنا زيادة الأسعار من قبل التجار الجشعين الوحشين الشرريرين ، ولكن المبادرة جاءت هذه المرة من الحكومة نفسها وأصبحت زيادة الأسعار رسمية وبالتالي أصبحت الدوبل ، زيادة من الحكومة وزيادة من التجار. وقالت الحكومة أنها تريد تعويض العلاوة من جيوب الأغنياء والقادرين . والله ؟
في يوم وليلة ارتفعت أسعار السجائر المستوردة جنيه ونصف ، رغم أنني معترض على وصفها بالمستوردة لأنها تصنع محليا بترخيص أجنبي وتعتبر هي السجائر الوحيدة القابلة للتدخين ، في حين ارتفعت أسعار السجائر المحلية ماركة كوكو الضعيف بأنواعها ربع جنيه . هذا على اعتبار أن المدخنين ولاد كلب ومعاهم فلوس يبقى لازم يدفعوا ، وبنفس المنطق زادت تراخيص السيارات بشكل جنوني كما ارتفعت أسعار البنزين والسولار والغاز الطبيعي للمصانع الكبيرة على اعتبار أن من يستخدمون هذه السلع ولاد كلب وأغنياء ومعاهم فلوس كتير يبقى لازم يتحملوا، طب اللي فاهم حاجة يفهمني .
ارتفاع أسعار السولار والبنزين يعني ارتفاع سعر تذاكر جميع وسائل النقل وخاصة الميكروباص الذي يعتبر وسيلة النقل الأولى والأهم والأكثر انتشارا في مصر ، وهي وسيلة المواصلات الخاصة بالطبقة الفقيرة والوسطى .
ارتفاع أسعار السولار وبالبنزين تعني ارتفاع جميع أسعار السلع بسبب ارتفاع سعر النقل ، يبقى مين المتضرر ؟
يبقى الموضوع مش موضوع ناخد من الغني وندي الفقير بقى .
طب سؤال كمان ، ارتفعت أسعار السجائر ، ولكن هل ارتفع سعر الحشيش ؟ والبانجو ؟ والسيجار الكوبي الفاخر ؟
طب سؤال تاني ، سؤال كمان والنبي ، هو كل الناس شغالة في القطاع الحكومة عشان توصل لها العلاوة دي اللي جابت الخراب للبلد ؟ يعني انا أهوه بشتغل في القطاع الخاص وماخدتش علاوات ، ذنب أهلي إيه أنا أتحمل زيادة الأسعار دي ؟ يمكن تكون التدوينة المرادي دمها تقيل ، بس بجد أنا قرفت واتخنقت .

22 comments:

أنا من كنت محتاجاً said...

مش دمها تقيل ولا حاجة

عيب أصلاً إن في حد يجي ويقول على الحكومة إنها بتعمل من اجل الصالح العام

وبعدين مش بيقولوا إن البنزين 80 زي ماهو ... سهل كل واحد ينام ويحلم غن عربليته هتمشي على بنزين 80
ولو مش عاجبنا نخليها تمشي على عصير جرجير

بطوط حبوب said...

رغم انشغالى فى الانتحارات
بس قلت اكيد انت منزل حاجه جامده بمناسبه السولار ابو علاوه
هههههههههههههههه
مبروك يا مان
على النعمه الحكومه دى فنانه
ولسه هنشوف منها
انا فطسان من الضحك مش ساعه مشفت الراجل الطويل وهو بيقول ان كله غلى يا برنس
مش عارف ليه الظاهر اننى هتجنن
ههههههههههههه

لورنس العرب said...

أظرف شيء اللي صرح به يوسف بطرس لما سألوه عن ارتفاع الاسعار، قال لهم طيب واحنا كنا هاندبر فلوس العلاوة منين؟ الراجل بيستعبط، حد أصلا قاله ان الناس عاوزه علاوه؟ حسبنا الله ونعم الوكيل

Magued said...

بجد يا أ.أشرف احنا محتاجين إنتفاضه شعبية

لما الحكومة المصرية تبيع الغاز الطبيعى لإسرائيل بأقل من سعره العالمى , وتدعم المواطن الإسرائيلى فى الوقود , وفى نفس الوقت تلغى دعم الوقود تدريجيا عن المواطن المصرى...يبقى بجد احنا محتاجين إنتفاضة شعبية

انا مش عارف الحكومة دى غبية ولا بتستغبى , ولا خلاص استقوت ومعادش هاممها جعان ولا فقير , لما تغلى السولار اللى بيشتغل بيه عربيات الأجرة والمشروع والميكروباصات , اللى هى وسائل مواصلات الفقرا والمعدومين , بالطبع أسعار خدمات النقل كلها هترتفع , وهيبتدى التجار وأصحاب السلع انهم يرفعوا الأسعار عشان يغطوا الخساير الجديدة اللى حلت عليهم فجأة , يعنى هنخش فى حلقة مفرغة من إرتفاع الأسعار .
ويطلع وزير التجارة والصناعة ووزير المالية ورئيس الوزرا , ويشكوا ويبكوا فى وسائل الإعلام , هنجيبلكم منين , دى أزمة عالمية , ومعدلات التضخم زادت .
طيب يا سيدى ما تجبلناش...لكن ما تاخدش اللى معانا
وبعدين المناطق الحرة , والكيانات الإستثمارية , والكائنات الإحتكارية أمثال أحمد عز , لما ماكنتش بتاخد منهم ضرايب , وتغرق التلفزيون بإعلانات الإقرار الضريبى عشان تمص دم الغلابه...وتيجى تقولى أجيبلكم منين ؟!!!

وبعدين الله , كان لازمته إيه الريس يطلع يضحك علينا وع العمال الغلابه , ويعلن علاوه ؟؟!! عشان يهدى موجة الإضرابات والإعتصامات يقوم يعشم الغلابه والفقرا والجعانين بعلاوة , وبعديها بكام يوم حزبه الرشيد وحكومته الإلكترونية يمرروا قرارات إرتفاع الأسعار فى 3 ساعات فى برلماننا الأونطة !!!
وبالنسبة للحشيش والسجاير , أحب أبشرك ان فى المستقبل القريب أسعار الحشيش هتبقى أقل من أسعار السجاير , وهو ده اللى عاوزه النظام , شعب فى الطراوه .

ده فى 1977 لما السادات غلى أسعار السلع قرش صاغ , الدنيا قامت مقعدتش غير لما تراجع عن القرارات دى

أ. أشرف احنا فعلا محتاجين إنتفاضة شعبية , بجد البلد لو متحركتش يبقى حقيقى احنا نستاهل اللى احنا فيه , مش ممكن الخنوع اللى وصلناله ده , وبجد يا خوفى على البلد والناس , لأن العروبيين والإسلامجيه وأصحاب النوايا الخبيثة والمصالح الخفية , هيزايدوا على الناس والغلب اللى بقوا فيه , عشان يحققوا مصالحهم المشبوهة , ويبقى المصرى الحمار اللى مربوط فى الساقية .

تقبل فائق إحترامى ,

اهو ده عيبه said...

والله انا قرفت واتخنقت اكتر منك
عمال يتلعب بينا من كل الجهات الحكومية والغير حكومية وفى الاخر كله بيصب فى مصلحه جيوبهم وبس
واحنا اللى بنشيل الطين على دماغنا

ياريت تغير عنوان البوست لحسن من بكرة يغلوا الطحينه والحلاوة والعسل الاسود

أشرف حمدي said...

أنا من كنت محتاجا
تمانين ايه ؟ هو عاد فيه بنزين تمانين ولا عربيات بتمشي بيه ؟ أعتقد أن النوع ده اتلغي من أيام الثورة العرابية ، وقال ايه بيقولك رخص :) هع هع هع
إلا صحيح هو لتر البيبسي بكام ؟ أعتقد أرخص من البنزين دلوقتي
-----------------

بطوط حبوب
عندك حق واتفق معاك بشدة ، رغم فداحة الموضوع لقيت نفسي في كريزة ضحك مش بتنتهي ، خاصة لما شفت صورة يوسف بطرس غالي وهو بيضحك ومنشكح قوي في المجلس ، ماتعرفش كان بيضحك على ايه ؟
شكله بيضحك علينا
-----------------

لورنس العرب
أنا كمان مش عاوز علاوة ، خاصة إني أصلا ماخدتهاش عشان بشتغل في القطاع الخاص
ياخي ( ..... )
-----------------

magued
أشكرك بشدة على رأيك العميق ، قلت حاجات كتيرة كانت محشورة في زوري
تحياتي
-----------------

أهو ده عيبه
أهو ده بقى عيب الحكومة

لورنس العرب said...

بس تعرف
أحلى حاجه عجبتني في الرسمه ان الناس متخزوقه
الحقيقه رسمه معبره اوي
هههههههههههههه

أشرف حمدي said...

لورنس العرب
هههههههههه لأ وإيه ، خوازيق ميري مش أي كلام

tamer.sala7 said...

والله يا دكتور انا شايف ان كل اللي في ادينا اننا نكشف راسنا وندعي ونقول منه لله ابن بهانة ( امه اسمها بهانة بجد )وياريت الدعوة تكون بين الصلاة والاقامة علشان تستجاب علي طول

علم الهسس said...

لقيت واحد كاتب تعليق شدنى بس مش عارف اذا كان تهريج ولا بجد
المهم التعليق هايشدكم

تلقت جريدة المصرى اليوم منذ دقائق نسخة من قرار جمهورى صادر عن رئيس الجمهورية هذا نصه

شعب مصر
لقد قررت ان اتنحى نهائيا عن منصب رئيس الجمهورية واى منصب رسمى أخر وساعود مواطناً مصرياً كأى مواطن عادى اعمل بين صفوف المواطنين واجتهد لرفعة هذا البلد العظيم
ويرجع قرارى هذا لعدم نجاح خطة الإصلاح التى اردتها لهذا الشعب العظيم وعليه ومن تاريخ إعلان هذا القرار سيتولى مباشرة اعمال رئاسة الجمهورية رئيس مجلس الشعب كما ينص الدستور وذلك لفترة انتقالية مدتها ستة أشهر بعدها يفتح باب الترشيح امام الأحزاب والمستقلين لترشيح أنفسهم لمنصب رئيس الجمهورية
وسيتم تحييد الشرطة والجيش وعدم تدخلهما فى اى عمل سياسى بعد الأن أو خدمة أى توجهات سياسية
فعلى شعب مصر أن يحسن اختيار رئيسه القادم من بين هؤلاء المرشحين
وقل اعملوا فسيرى الله عملكم ورسوله والمؤمنين

رئيس الجمهورية
محمد حسنى مبارك

هذا نص القرار
وتعليقى عليه
والله الراجل دا جدع اخيرا عرف ان الله حق

دا التعليق
بس لو بجد دى تبقى....

أشرف حمدي said...

تامر
آآآآآآمين
----------------

علم الهسس
يا راجل اتقي الله :) دي نكتة قديمة جدا
اسكت احسن يقولك بتروج أشاعات ودي فيها سنتين سجن

وجهة نظري said...

المصيبه إن مش إنت لوحدك إلي مش لاقي تفسير للي حصل دا خالص، لغز حقير من غير تفسير... الواحد بيضرب كف بكف ومش فاهم هما إدونا العلاوه وبعدين بيدبروا موارد والا كانوا عايزين يزودوا الأسعار وناقصهم الحجه؟؟

طيب حسني مبارك موافق علي كده والا هوا مسلوب الإراده ومضغوط عليه من إبنه ومن العصابه إلي معاه؟؟

محدش فاهم حاجه خاااااااالص

Anonymous said...

الناس فى الشارع والإنترنت
على الفيس بوك وخارج الفيس
اتفقوا على يوم الجمعة
http://www.facebook.com/topic.php?
uid=9973986703&topic=9931

ta5areef said...

انتو ليه كده ظالمين الناس

انت يا عم مش شغال ف قطاع خاص
يعنى بتقبض شئ وشويات سيب بقى الناس يقصوا ريشكم شوية وبعدين ماله كوكو الضعيف حلو والله جميل جدا هات انت قاروصة منه والله مش هاقول لأ


الغنى لازم يصب ع الفقير يا عم الحاج يعنى انا وانت لازم نصب ع الفقرا

هههههههههههههههههه

أشرف حمدي said...

وجهة نظري
جبتك يا عبد المعين تعني ، طب نروح لمين يفهمنا طيب ؟
شكرا على التعليق وماتقطعش الزيارات بقى
-------------------
تخاريف
أصبلك شوية في كوباية ؟

واحد من البلد دى said...

????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????كل دى أسئلة...حد عنده إجابة؟؟

enjy said...

مواضيعك كلها حلوة والله يا اشروف بس حاسب على نفسك على اساس يعنى ان احنا فى عصر الديموقراطية وكدة ماشى؟ اشوفك فى مدونتى يمكن تعجبك سااااااااام

Human said...

ده بيدل على عدم تخطيط وغباء حكومي عميق جداً ....بيخترعوا ويفتكسوا اي حاجه عشان يمصوا دم الشعب...؟
بجد انا كل ماأركب مواصله بقيت بحس ان انا مزلول ..وفي الأخر اللي الحكومه بنفذه واحنا ساكتين

عاليا حليم said...

انا كل الى فهماه انى نهاردة ادبست مع تاكسى تدبيسة سودة عشان البنزين غلى

الله يسامحه البنزين ده

ناجي العلي 2000 said...

يا عم طنش ..... (البحر يحب الزيادة) .. يعني هي اول مرة تزيد فيها الاسعار؟

مالسكر زاد من كام سنة وكلنا حطينا جزمة في بقنا وسكتنا

ثم بالنسبة لاسعار السجاير الي رفعت ... فانا سعيد به جدا .. لان خمسة من اصحابي قررو الاقلاع عن التدخين

بزمتك مش كدة احسن
وعقبالك انت والمدخنين امثالك ماتبطلو سجاير خالص ... ان ماكنش عشان صحتكم ... يبقي عشان فلوسكم
:)

محمد إبراهيم محروس said...

ماله المشي عربيات ايه اللي عايزين تركبوها
المشي رياضة يا عمونا ههههههه
الحكومة شوية شوية هتسحب العربيات من الشعب وتديهم جزم ميري بيادات معتبرة كدة
وبعدين السجاير عادي جدا ايه يعيني برضه عشان صحتك
الرسم هايل يا جميل
بجد 30%
اها يا بلد
هههههههههه

Anonymous said...

طول ما لا انا ولا انت بنتحرك ونعمل حاجة
طول ما هما هيعملوا فينا حاجات

Counter