Total Pageviews

Thursday, August 21, 2008

أنا الفقري


فرصة العمر .. هكذا يسمونها .
أضعتها بغبائي .. هكذا يتهمونني .
الحسرة والمرارة .. هكذا أشعر .
لا .. ليس لأنني أضعت فرصة العمر بغبائي .. فهذا أبعد ما يكون عن الحقيقة .. وهي أنني .......
.................
* * *

السيد المحترم أستاذ ( .... )
أعتذر عن عدم حضوري المقابلة الشخصية اليوم كما اتفقنا بالمكالمة الهاتفية لظروف خاصة تمنعني من السفر ، أرجو قبول إعتذاري خاصة وأننا أكدنا الميعاد منذ يومين ، لك مني كل إحترام وتقدير .
د. أشرف حمدي

* * *

إتصل بي بعد بضعة ساعات من إرسالي الايميل ، لم أرد .
فقط هذا الشعور المقيت بالمرارة والسخط والغضب ، هذا لأنني ..........
..................
* * *

كان من المفترض أن أقابله بفندق عريق ذو خمسة نجوم ، كان حديثه معي بالهاتف مهذبا للغاية ، كان حرصه على تأكيد المقابلة أمرا مشجعا جدا ، ولكن ، كنت قد حسمت قراري بالفعل تجاه هذا الموضوع ، لن أسافر إلى السعودية ، لن اترك هذه البلد لأنني ............
..................
* * *

فقري ؟؟؟
أيوة فقري ... أنا فقري على رأي الأستاذ رشاد كامل رئيس تحرير صباح الخير ، قالها لي منذ سنوات ولا يزال يذكرني بها .. أعترف بذلك ولا أنكره أبدا .
أنا الفقري .. أنا المصري الذي قرر أن يعيش في مصر .
سبحان الله ، مصري وعايش في مصر .. تخيلوا المفارقة ؟!

* * *
راجع نتيجة الاستفتاء الموجود على يمين هذا المقال

* * *

لم يسافر أحد إلا وقرر البقاء بعيدا عن مصر .
يحكون لي عن شعورهم المفاجيء بأنهم لم يكونوا بنى آدمين وقد شعروا للمرة الأولى في حياتهم بالآدمية ، تماما كما تخرج الروح من الجسد وتقرر ألا تعود إليه مرة أخرى .
يحكون عن الحياة الكريمة ، ليس ماديا ، ولكن إنسانيا .
يحكون عن بلاد تحترم مواطنيها وتقدرهم أو على الأقل تكترث لهم .
يضحكون على كل الكلام الفارغ وكل الأغاني التي تسأل عما إذا كنت قد شربت من مياه النيل التي لابد وأن تجبرك على العودة مرة أخرى إلى أرضها الطاهرة ، ولا تتسائل عما أعطته لك مصر ولكن تسائل عما ستعطيه لها ، ومصر التي هي أم الدنيا وأغلى الأوطان ، ومصر التي هي أمي .
* * *

وإياك تقوللي مصر هي أمي .. أمك راقدة جوّه أهيه ( من فيلم آسف على الإزعاج )

* * *

لم يسافر أحد إلا وشعر بفداحة الكارثة التي كان يعيش فيها.
إلا وإزداد سخطا وكراهية وحنق وإشمئزاز .
إلا ونصحني بالهجرة ، وليس مجرد السفر .

أنا الفقري الذي قرر البقاء في مصر .
عندا ، وعنادا

كيف أسافر لبلاد لا تحترمني وتعتبرني درجة أقل من البشر حتى وإن كانت القوانين تضمن لي معاملة كريمة ؟
هل هذا ذنبي أم ذنب حكومتي التي لم تضمن لي كرامة لآدميتي أو لمصريتي في أي دولة مهما كانت ؟
من قبل أن أسافر أو أفكر في السفر وأنا اسمع شتيمتي وشتيمة كل مصري باللهجات السعودية والكويتية وحتى الليبية ، على المنتديات وعلى اليوتيوب ، على البال توك ، على الشات .
كيف أسافر وأخسر المعركة بهذه البساطة ؟
وهل لسفري دلالة أخرى غير الهزيمة ؟
وكيف سيكون لي الحق في إنتقاد الأوضاع في بلدي من خلال الكاريكاتير الذي وهبت له حياتي ؟ كيف انتقد أوضاع بلدي وظروفها وأنا بعيدا عنها هاربا من هذه الظروف ؟ أي وغد سأكونه وقتها ؟ أي سافل هذا الذي يصرخ من بعيد؟

* * *

يا مصر ليه قاسية على ولادك ؟ قربك مرار .. والذل في بعادك ( من قصيدة لم تكتمل )

* * *

أليس من حقي أن أعيش بالمكان الذي ولدت فيه ؟ حقي ولا مش حقي ؟ .. حقي
أليس من حقي أن أعيش في بلدي حياة كريمة ؟ حقي ولا مش حقي ؟ .. حقي
أليس من حقي أن أحصل على راتب يضمن لي البقاء على قيد الحياة أنا وأسرتي ... في بلدي ؟ حقي ولا مش حقي ؟ .. حقي
أليس من حقي أن أعيش مرتاح البال هانيء وسعيد قدر الامكان في بلدي ؟ حقي ولا مش حقي ؟ .. حقي
أليس لي في بلدي تماما مثل ما لهم فيها ؟ حقي ده ولا مش حقي ؟ .. حقي
إذن انا لن أتنازل عن حقي .
ولن أسافر إلى أي مكان قبل ان أنال حقي .
وحينما انال حقي ، وحينما أقرر السفر بعدها ، سأسافر ورأسي مرفوعة وليست منكسة في الأرض .
سأسافر بإرادتي وليس رغما عني .
سأسافر لتحقيق المزيد من النجاح أو المزيد من المال أو المزيد من كليهما ، ليس هربا من فشلي .
أما أن أسافر الآن ؟ في ظل هذه الظروف وهذه الأوضاع ؟

فده بعدكم
أنا قاعد على قلبكم
أناكف فيكم وتناكفوا فيا
قاعد أشد في ديولكم كلكم
قاعد على نفسكم ومش ماشي
قاعد أرسمكم كلهم كاريكاتير وأضحك عليكم وأغيظكم وأطلع لكم لساني .
وأدق بإيدي إيد الهون .
ويانا انتم في البلد دي

أنا الفقري ... أيوة ... أنا .......

أنا القانط .. أنا الصامت .. أنا الصابر على الأيام
أنا الراضخ .. أنا الصارخ .. أنا العايش على الأوهام
أنا الشاكر .. أنا الثائر .. أنا الراضي بأي كلام
أنا المطحون .. أنا المنسي .. ومش قادر على النسيان
أنا الخالد .. أنا الفاني .. أنا الفرحة .. أنا الأحزان
أنا الرسمة .. أنا البسمة .. أنا الكلمة .. أنا الانسان

52 comments:

أفندينا said...

يا أشرف للأسف يؤسفني أن أقول لك .... آسف أنت مخطيء جداٌ ليس في حق نفسك فلنذهب نحن في نفس المكان الذي ذهب به حافظ إبراهيم ... ولكن في حق أسرتك ، يا عزيزي ورغم عشقي لتراب هذا الوطن وعدم قدرتي على البعد عن الإسكندرية تحديداٌ ، ولكن مصر أصبحت قاسية جداٌ على أبنائها وكل يوم يمر تقسو أكثر وأكثر ... وبعد طول الكلام ومحاربة طواحين الهواء تبين لي أن الشعب المصري ( في الأغلب الأعم ) قد مات ودفن من زمااان والعزاء كان بالحامدية الشاذلية
ليس من أجلي أو أجلك ولكن من أجل أولادنا الذين لا نعلم ماذا تخبيء الأيام لهم ، من أجل أن نضمن لهم حياه كريمة في زمن وعهد أصبح لا يعترف إلا بسلطة المال ، في زمن أصبح فيه أولاد العائلات التي كانت في الماضي السحيق والقريب من الأغنياء وأصبحوا الآن في أواخر العهد المبارك أقرب للفقراء ....
سافر يا أشرف وستظل أنت البسمه والانسان

أفندينا said...

يا أشرف للأسف يؤسفني أن أقول لك .... آسف أنت مخطيء جداٌ ليس في حق نفسك فلنذهب نحن في نفس المكان الذي ذهب به حافظ إبراهيم ... ولكن في حق أسرتك ، يا عزيزي ورغم عشقي لتراب هذا الوطن وعدم قدرتي على البعد عن الإسكندرية تحديداٌ ، ولكن مصر أصبحت قاسية جداٌ على أبنائها وكل يوم يمر تقسو أكثر وأكثر ... وبعد طول الكلام ومحاربة طواحين الهواء تبين لي أن الشعب المصري ( في الأغلب الأعم ) قد مات ودفن من زمااان والعزاء كان بالحامدية الشاذلية
ليس من أجلي أو أجلك ولكن من أجل أولادنا الذين لا نعلم ماذا تخبيء الأيام لهم ، من أجل أن نضمن لهم حياه كريمة في زمن وعهد أصبح لا يعترف إلا بسلطة المال ، في زمن أصبح فيه أولاد العائلات التي كانت في الماضي السحيق والقريب من الأغنياء وأصبحوا الآن في أواخر العهد المبارك أقرب للفقراء ....
سافر يا أشرف وستظل أنت البسمه والانسان

Anonymous said...

لو هى دى كل أسبابك
يبقى انت فعلا فقرى و اسمحلى و ابن فقرى
لأن أكيد أبوك هو اللى دهل فى دماغك الكلام الفارغ ده من زمان
الله يسامحه

Mahmoud البطراوى said...

د اشرف
يشرفنى ان اقولك ان اى حد عايز يرفع عليك قضيه حجر

القاضى هيحكمله من اول جلسه لما يشوف البوست ده

أشرف حمدي said...

اللي عاوز يسافر عشان الفلوس وياخد على قفاه من واحد جزمة قديمة ويتقال له يا مصري يا معفن ياللي بتاكل الفول اللي بنأكّله للبهايم عندنا ويلحس التراب ويبقى له كفيل يطلع عين اللي جابوه بنظام أشبه بالعبودية يتفضل يسافر :) وما ينساش يجيب لي معاه مروحة وهو جاي
ده إذا رجع اساسا :)

bluestone said...

غم الاعتراضات المتوالية بس انا مش شايفة انك فقري ابدا
انت بس حسبتها حسبة مختلفة
انت حسبتها حسبة كرامة
واغلب الناس بتحسبها في الاول حسبة فلوس

هتاخد فلوس كتير صحيح
وراحة وضمان مستقبل
لكن هتخسر كرامتك
لما تروح بلد لا تحترمك ولا تحترم الانسان اصلا
وترى انك كمصري مخلوق درجة تانية خلق لخدمته

انت مش فقري
انت عندك كرامة خايف عليها

وبلدنا هي كده وظروفها كده للاسف

أشرف حمدي said...

حسنا
شخص يقول انني أخطأت في حق نفسي وأسرتي
وآخر يريد الحجر على
وثالث يتهمني بالهطل أنا ووالدي رغم أن والدي ربنا يسامحه أول المشجعين لي على السفر

طواحين الهواء هي الأسطورة السخيفة التي صدعوا بها رؤوسنا لنسكت وننكتم وإما أن نرضى بما هو متاح أو نهرب لنترك بلدنا للنهب والسلب والفساد .
أنا رسام كاريكاتير ، وكل رسام كاريكاتير وكل كاتب وكل فنان ترك بلده هو ببساطة قد باع نفسه كالعاهرة .
حتى وإن لم اعمل بالكاريكاتير وعملت كمصمم جرافيك كما كان متاحا لي بالسعودية ، ما الذي أنتظره هناك ؟
المال ؟ أجمع أكبر قدر ممكن منه لأعود لبلدي وأنفقه خلال عدة سنوات ؟ ثم أعيد الكرّة مرات ومرات ؟
الحياة الكريمة ؟ وأظل هناك إلى أن أموت ؟
لو وجدت ان حياتي هناك جحيما فلن أحتمل البقاء ليوم واحد مغتربا .
ولو وجت حياتي نعيما فلسوف أبصق على مصر وعلى كل من فيها ، ولو عدت لزيارة الاهرامات كأي سائح فلسوف أعامل أهل بلدي وكأنهم رعاع ، تماما مثل أي سائح عربي يدور بسيارته الهامر في شارع جامعة الدول حاملا علم بلده باصقا على الجميع .
وأنا لا أريد لنفسي هذا التحول .
أترك إبني لينشأ في مجتمع أتفق على أن الرسم حرام ويجب قطع الرقاب في الصور ؟ وأن الموسيقى عمل شيطاني ؟
أترك الكاريكاتير ؟ أم أظل أرسم من هناك معارضا سياسة حكومتي وأنا خارج الوطن كأي جبان ؟
كيف أرسم عن آلام المواطن الغلبان تاركا له مسئولية التغيير في حين أترك لنفسي أنا حق السخرية من أوضاعه بعيدا عنه وعن مشاكله ؟
أم أبدأ في تأليف النكت عن المصريين باعتباري لست مصريا .
لماذا أسافر مجبرا على ذلك ؟ لماذا الخيار بين الرضا بالأوضاع الحالية في مصر أو الفرار ؟
يا نهار ... بلدي يا جدعان ... من حقي اعيش فيها كويس ... أسيبها لمين طيب ؟؟؟ لولاد الكلب ؟؟؟ للحرامية ؟؟؟
أسيب بلدي وانا مختوم على قفايا ختم مصري الذي أصبح مشينا ؟
أن يرجع الفضل في نجاحي إلى بلد يكرهني ؟
طب ما أسافر إسرائيل بقى على طول كما فعل كثيرون .
واحد أبوه بيموت يسيبه ويجري يشوف له أب تاني يصرف عليه عشان خلاص السيد الوالد مابقاش ينفع ولا منه فايدة؟
فيه فرق كبيييير بين مصر واللي سارقين مصر .
أنا لما يدخل بيتي حرامية مش حسيب بيتي وأروح أدور على بيت جديد
والله العظيم أحبطّوني أكتر مانا محبط اساسا
ربنا يسامحكم

Unknown said...

اشرف
احييك بشده
واسمحلي اكون عضوة ضمن نادي الفقريين من محدودي الدخل
نعمل ايه بقى
النيل رواني والخير جواني
بس بجد لو مكانك معتقدش هيكون ليا قرار تاني خصوصا لو كان قراري لوحدي قرار فردي يعني

Anonymous said...

شوف يا اشرف قرارك دة صح وانا قررت اكتب تعليقي بعد ما شوفت كمية الاحباط اللي انتا فيها..هقولك علي حاجة طول ما اناتا عايش حياة معقولة في مصر بقي ملهاش اي لازمة انك تسيبها وخصوصا بلاد الخليج ممكن تكون كويسة للعامل للنقاش للبنا للدكتور للمهندس لكن للمبدع ابدا كمية التخلف والجهل اللي في البلاد دي بتقتل اي حد عندة ابداع خليك في مصر احسن مع اني بكتبلك من براها بس قلبي بيتقطع وانا براها عشان بس اعرف اكمل الشقة واتنيل اتجوز

Anonymous said...

بص يا اشرف انا جايز اكون لسة داخل جامعة بس انا زيك كدة بالظبط شايف ان
السفر لبلد عربية ملوش لازمة لانك ببساطة بتيقى بتضيع عمرك وبتعيش اسوء عيشة ممكن تعمل فلوس بالهبل بس كرامتك هتداس بالجذمة في كل مكان غير كده هتلاقي انك معشتش السنين اللي انت قضيتها هناك وهتحسبها على انها ضاعت من عمرك بس في ناس شايفة ان البني ادم جة الدنيا عشان يعيش عمرة وفي ناس شايفة ان اهم من انة يعيش انة يجمع فلوس حتى لو ضيع عمرة كلة وممكن ميصرفهاش حتى .بس يقولك مستقبل الاولاد مع ان المفروض المستقبل ده يبقى هنا ويبقى انهم يقدروا يعيشوا عيشة كويسة من كل النواحي مش فلوس بس.احسبها لو عايز فلوس يبقى سافر وخد معاك شوال تحط فية فلوس وكيس اسمر تحط فية كرامتك لو عايز عيشة معقولة افضل هنا وقضيها كفاح وهتتعب بس على الاقل هتحتفظ بجزء من كرامتك وبعدين يمكن الوضع يتغير ده الراجل داخل على الـ90 سنة اما مكنتش متوقع انه يفعد لغاية مخلص ثانوي بس اهوة يلا يمكن ربنايكرمة ويتخرج قبلى
وبالنسبة للسعودية زى ما انت قولت كل حاجة حرام ورجس من عمل الشيطان انا مش عارف السعوديين نفسهم طايقينها ازاى دي الواحد ميروحهاش الا عشان يحج او يعمل عمرة وطيران على هنا ويمكن عشان كده تلاقي السعوديين هنا وعلى العموم انا في رايي انت صح وعلى راي جحا بلدي اللي فيها مراتي وكرامتي

Anonymous said...

أنت محبط ومعندكش الشجاعة على الغربة وخايف من الفشل لو سافرت وخايف لتنضرب بالجزمة أو تاكل على قفاك وخايف على كرامتك لتنداس وفاكر أنك لو قعدت فى مصر هيتعمل لك تمثال ويعتبرك الناس بطل لأنك قعدت فيها
كل الكلام ده حلو وجميل جدا
وأنت حر
لكن عيب أوى أنك تعمم الفكرة اللى فى دماغك على الناس اللى متغربين بره
وأنك تقول كل رسام كاريكاتير وكل كاتب وكل فنان ترك بلده هو ببساطة قد باع نفسه كالعاهرة فى حين إن أنت نفسك كنت بتدور على فرصة بره وكتبت موضوع عن كده لما الجريدة الخليجية أخدت رسوماتك ونشرتها دون الرجوع إليك
أنت ترضى انه يتقال عليك أنك كالعاهرة لأنك بتبيع شغلك لجريدة خليجية أو بتشتغل فى الخليج
مع احترامى الكامل لك إن كان فى رسام كاريكاتير سافر بره مصر وبيعمل كاريكاتير عن احوال مصر فده لأن أهله فى مصر وعايش فى مصر ومشاكله بكل كيانه حتى ولو كان مش عايش فيها بجسده
ومحدش هيصفق له ولا يعمل له تمثال لو مات شحات أو عيل من عياله مرض ومالقاش ثمن الدوا
نكتفى بهذا القدر
وربنا يخليك لمصر وللفن ولأبنك
تحياتى

Mohamed Emad Hegab said...

عزيزي اشرف انا معاك قلبا و قالبا في ما تقول
رغم اني بكتب كلامي من جدة السعودية إلا ان ظروفي تختلف عن ظروفك
فانا أعمل بمجال البرمجة و مجال تكنولوجيا المعلومات
و هو مجال للأسف لا يحترمه أحد في مصر كلها حاليا و كل ما يدور حوله يدور بتمثيليات
قرية ذكية و قرية غبية و خلافه و هي اشياء هدفها الاساسي هو أن تظل مصر في دورة لا نهائية من التخلف لأنه بعد حرب أكتوبر أكتشف العالم أن المصري لو منح التكنولوجيا البسيطة أو الوقت للتفكير لأنتج ردارات تحصد الطائرات مكونة من شباك الناموس و هو ما حدث في الحرب فعلا!!لكن دول الخليج على النقيض تماما في هذا تحاول أن تتطور في مجال المعلومات حتى أن الحكومة الأليكترونيةا لسعودية تعتبر من أفضل الحكومات الالكترونية في الخليج بعد الإمارات
كان معنى هذا و بعد ان واجهت شركتي عوائق وصلت لحد التهديد بالقتل في مصر أن ننظر للخارج لمحاولة إنجاح مشروعنا و ها نحن على وشك الإنتهاء منه بإذن الله .
أما بالنسبة لك فأنت مبدع و رسام أو كاتب لو اعتبرت نفسك كاتبا فيجب ان تظل في مكانك طالما يمكنك العيش و طالما حققت الحد المتوسط من الحياة الكريمة في بلدك فهنيئاً لك بها تماما فهو أقصى ما أطمح إليه شخصياً أو كنت أطمح إليه في وقت منذ عامين كنت أقول انني مستعد أن ابقى في بلدي لو وجدت عملاً مفيداً اقوم به (ليس مجرد تمثيليات) يفيد الناس و البلاد و يضمن لي مبلغ 2000 جنيه فقط
كان هذا كل املي لكي اكون نفسي و مستقبلي
فلهذا أقول لك طالما ضمنت هذا و الحمدلله ابقى مكانك .
لأنك لو جئت إلى هنا فلن تجد سوى قتل لموهبتك بأشياء جامدة ثابته لا تتحرك و لا تتزحزح بالإضافة إلى أنني أضطررت إلى أن أترك هوايتي المفضلة في الكتابة لمجلة بص و طل في باب مشاكسات الذي كنت أنتقد فيه أحوال المصريين بعد أن سافرت فقد ربيت ألا اسب بلدي و انا خارجها ..عيب
و لكنها في النهاية كانت هواية و ليست مهنة متأصلة مثلك لهذا فقط أقول لك استمر لست فقرياً ابدا بالعكس انت وغد ذكي .
بالنسبة للخليجيين الذين يكرهون مصر فأنا متأكد من شيء الآن حاليا من معاشرتي لهم خلال فترة طويلة
اللذين يفعلون هذا هم المراهقين و الأطفال.
و هم كثير فعلا لكن الكبار عقلاء يعاملونك بود إلى حد كبير لقد كنت هنا في السعودية منذ خمسة عشر عاماً مضت قبل أن اتركها كارهاً لها لكن حين عدت وجدت أن سعودي الطفرة قد أقترب على الإنقراض الجيل الجديد من الشباب فعلا متفتح و ذكي و متحمس للغاية نعم هناك سلبيات كثيرة فيهم هناك ادعاء كثير لا أستطيع ان أذكره ولا أحب لأنني لست إلاهاً ولا ملاكاً..لكن كما اقول الحياة اصبحت محتملة معهم الآن و لم أفقد كرامتي إلى الآن و الحمدلله و سلامي لك

أشرف حمدي said...

Anonympus الأخير !

فقط أردت الرد سريعا ، الموضوع لا علاقة له بالشجاعة ، أين شجاعتك انت طيّب وانت تكتب باسم مستعار

انت تعرف تماما ما أقصده ، ولكن لا بأس من إعادة شرحه
الذي يترك بلده ليرسم ويسافر لدولة خليجية ويرسم من هناك أو يكتب ساخرا من أوضاع مصر فهو الذي أقصده بالعاهرة
إذا أردت ان تنقد أوضاع بلدك فإفعلها بشجاعة
أفعلها وانت هنا وليس وانت هاربنا
موضوع الراية القطرية أو موقع نسيج أو أي مكان عملت به كان من هنا ، من مصر ، وكانت كل القضايا التي تناولتها قضايا عربية لا علاقة لها بمصر من قريب أو بعيد
يمكنك مراجعة أرشيف موقع نسيج بنفسك
تحياتي

Oss said...

بص يا دكتور
أنا والدى سافر أماكن كتير جداً
سافر هولندا وهو فى ثانوى
وسافر بعد كده
الإمارات والكويت وليبيا والسعوديه مرتين وقطر
وهو حالياً فى السعوديه

وحتة العمل دى مش شغال فى مجاله
مره او اتنين اشتغل معلم
والباقى كان فى الطباعه
تعب؟؟
أكيد
تعب فى هولندا وهو صغير
وتعب بعد كده فتره
بس لما كان فى الإمارات سنة 1998 وقرر يرجع
مع العلم بالإمتيازات الماديه العاليه
وانه كان مدير مطبعه
ومع ذلك قرر يرجع لنا علشان هو اصلاً بيكره حاجه اسمها الغربه
واهله كلهم هنا
فصمم انه يرجع مع ان الإمارتيين كانوا بيبوسوا جزمته علشان ما ينزلش مصر
ورفعوله المرتب
وخليك معانا
بس هو اللى رجع
واتكرر الموقف مره تانيه بعد لما سافر قطر 2002
سافر ليه؟
اكيد علشان حال بلدنا الزباله
وهو مجاله التعليمى منيل بنيله
ومن صغره رافض فكرة انه يدى دروس
فاضطر يسافر قطر
ورجع بعديها بسنه وبردو كانوا بيبوسوا جزمته علشان يرجعوه
اسألك بأه
حد كان يقدر يشتم على المصريين قدامه؟؟
حد كان يقدر يهين كرامة بلده قدامه؟؟
أكيد لأ
مش كل العرب ولاد ستين فى سبعين
مع انى باكره الخلايجه بس الحق يتقال
ومش كل اللى بيسافر بيفضل بره
انت اكيد مراتك وابنك وباباك ومامتك واخواتك وقريبك هيوحشوك
ومش هتقدر تستغنى عنهم

معلش انا رغيت كتير وفى الفاضى
بس ربنا يوفقك فى اى مكان انت فيه

بذرة امل said...

والله يادكتور اشرف مش عندى رد اقوله غير
انى شخصيا بحترم اوى الناس اللى نجحت هنا فى بلدنا وكان عندها رسالة وقدرت توصل لها
لكنى عارف برضه ان ده نادر اوى انه يحصل
لكنى بؤيدك فى الرأى جدا
الانسان مش بس عايش عشان يجيب فلوس
ربنا يوفقك هنا فى مصر
وانا بتمنالك مستقبل كبير ان شاء الله

فاروق عادل said...

انا معاك فى كل حاجة يا اشرف بس فى ناس بتفكر انها عايشة من غير كرامة ومن غيرفلوس فى مصرلكن برة هتعيش من غير كرامة زى مصر بس هتعيش بفلوس

Mahmoud البطراوى said...

انت قفشت ليه يا عم اشرف

يا عمنا

انت عاجبك وضعك فى البلد
هتتهان فى الغربه ... اهى اهانه بفلوس مش هنا مجانا
ولو هتسافر السعوديه انصحك بلاش لانهم ناس عايزه الحرق انما لو هتسافر دبى مثلا او الامارات عموما او عمان او قطر هقولك سافر

ثم انت هترجع معاك فلوس تدوس ع التخين هنا بالجزمه
اصل البلد دى بتاخد الجنسيه فيها لما يبقى معاك فلوس
ملهاش دعوه بانك مصرى وابن مصرى
انشاله تكون ابن ستين تيييييييييت وماعك فلوس كده تتعامل كأنك من البلد وليك حقوق

سافر يا عم اشرف لو عايز تاخد جنسيه مصريه
وخليك قاعد لو عايز تقعد من غير جنسيه

وحياتك ابوك بلاش بس تقفش يا شيخ
صحتك يا فنان
اوعى تضيع صحتك فى الناس الى بتعلق عليك
خليها لحاجه اهم

هتيجى يوم توقيع مدونات مصريه للجيب
عايز اشوفك يابوب

ana ga3an said...

معاك قلبا وقالبا يا فنان
اذا سمحتلي اشاركك في خبرة 3 او 4 سنوات كعب داير من اليمين للشمال في ارجاء المعمورة
ثم استقرار حاليا في السعودية
لا تذهب الي دولة لكي تبدأ من الصفر اذا كنت قادر علي الحياة في مصر يعني لسة فيك الرمق
سافر لما يكون عايزينك فعلا وفي حاجة لعملك
وليس لكي تبحث عن فرصة وتنضم لطابور المنتظرين
ولا تذهب بشروط مجحفة تبخس حقك وحق اسرتك
انا لم اذهب للسعودية الا بعد ان تم طلبي بالاسم
وبالشروط التي رايتها مناسبة لي
وكفالة ليست علي فرد ودي اهم شيء
واسرتي علي اقامتي
فالحمدلله 11 سنة في مصر بنحت حتي استطعت ان اضع ركائز حياة فوق المتوسطة لي ولاسرتي
مع رفاهيات
فا ليس من المنطقي التنازل عن دة لكي اذهب للخليج الا لاضافة مزيد من الرفاهية لحياة اسرتي
ليس الخليج بالسوء المتصور من قبل الناس وخصوصا السعودية
فاذا كنت تعمل في شركة محترمة متعددة الجنسيات او من الشركات الصناعية الضخمة
يكون عملك مع اجانب اكثر من اهل البلد وقد يكون سكنك في كومباوند
غير مسموح للسعودين بالسكن فية
ولا احد يتعرض لك بكلمة ولا نظرة في الشارع او العمل
فالاحترام في الغالب هو سيد الموقف وغير ما يتداول ليس حقيقي
ربما يكون في تجاوزات لكن بتكون في فئة العمالة البسيطة المصرية
يعني بنايين فواعيلة معمار
بائعي في متاجر
وللعلم بصراحة المصري اللي من النوعية دي
انت شخصيا لو اتعاملت معاة تبقي عايز تديلة باللي في رجلك
مقرفين وحلنجية وحلاف علي غير حق
حاجة تعر يعني
3 سنوات وانا ارفض تماما السفر للخارج لاني كنت اعلم انة ليس اوانة
لسة شوية مصر مجابتش اخرها معايا
ليس ماديا ولكن صداعيا
انا هجيت من وجع الدماغ وضغط الشغل
ومتابعة العمل وارضاء جميع الاطراف من الاهل
ياسلام علي الخليج هو في اهدي ولا اروق من العيشة في الخليج
والفرص بتيجي تاني وتالت المهم تيجي الفرصة اللي علي مقاسك متسيبهاش

http://anaga3an.blogspot.com/2007/12/blog-post_05.html
ابقي شوف دة

أُكتب بالرصاص said...

هانيء وسعيد .؟

للأسف يا أشرف\
البلد د بقت بتاعت هاني سعيد ورفاقه
سيد معوض وياسر محمدي

انما احنا

ندور علىحتة تانية


واحد مش فقري
:)

فنان مسلم said...

مع احترامي لكل الاخوة اللي بيقولوا ان اللي بيسافر بره بتضيع كرامته ومش عارف ايه
ابقوا سافروا الاول واعرفوا بره فيه ايه وبعدين تعالوا اتكلموا

مع الاعتذار للجميع , انا شايف ان اللي تتوفرله فرصة العيش بكرامة واحترام لأدميته , ويصر انه يعيش تحت القهر ده , يبقى هو الانسان اللي معندوش كرامة ولا ذرة تقدير واحترام لنفسه
اللي يرضى ان أمين شرطة ملوش تلاتة لازمة يتنطط عليه , ولا أي حد ياخد مكانه بالواسطة , ولا يرضى على نفسه وعياله ياكلوا ويشربوا ويتنفسوا تلوث , ويرضى على نفسه يشوف عهر وخمور ومخدرات في الشارع عيني عينك دون ماحد يعترض
ويعيش خايف طول الوقت لمجرد انه (ملتحي) وبيحاول يمشي صح
اللي يرضى ويرضى ويرضى .. على الرغم من ان عنده فرصة يعيش كبني أدم أولاً وقبل كل شيء .. ده هو اللي معندوش كرامة

فنان مسلم said...

لما تسافر وتدخل جامع وتصلي -في صف واحد - جنب السوري والسعودي والفلسطيني واللبناني و الباكستاني والاندونيسي والهندي و المغربي هتعرف ان الأدمية ملهاش علاقة الحدود الجغرافية
ولما تعاشر الاشكال واللوان ده هتعرف كمية التمركز الذاتي الرهيبة اللي فينا كمصريين - واننا مش شايفين حد في الدنيا غير نفسنا , وأي حد غيرنا غلط
ولما تمشي في الشارع وانت أمن على نفسك وعرضك ودينك
وتدخل محل وتشتري أي حاجة وانت مغمض , لانك عارف ان مصطلح الغش التجاري ده مش موجود في القاموس أصلاً
لما تحس بإنك عايش في هدوء نفسي
هي دي الكرامة

Anonymous said...

انا معاك وبشدة رغم ان الحياة في اي مكان اخر هتبقى اكثر انسانية واحتراما ...بس هنعد نقول كده لحد امتى لازم في الاول تحصل المعادلة لازم يحصل ...التغيير..

وانا مش هخبي عليك كان حلم من احلامي المستحيلة ان اسمع حد يقول الرأي ده..في ظل الظروف اللي موجودة دي ...وانا بتكلم من وجهة نظر خاصة يمكن كتير يختلفو معايا ..لاني عشت هناك وانا صغيرة بس احساس قاتل انك تلاقي احداث كتير بتحصل في بلدك وانت مش اعد فيها مش لازم تكون احداث حلوة بي سيان ..والى الان اتمنى الفترة التي عشتها في خارج بلدي ان تعود مرة اخرى وانا فيها .......وانا بقرأ المقال ده الح عليا سؤال ....ياترى لو البلد اتحسنت ..وانا مش موجودة فيها ..هيبقى احساسي ايه لما ارجعلها وانا معرفش عنها اي حاجة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ana ga3an said...

فنان مسلم
احمد الفنان
للعلم احمد معايا في نفس البلد صدفة غريبة لاني اعرفة من قبل ما اشوفة عن طريق اعمالة
واساندة في كل كلمة قالها
ليس من باب التفاخر والله
ولكن نظرا لتعدد القطاعات العسكرية و السياسية التي يراسها عدة افراد من اسرتي منهم الوالد طبعا
لم يكن في مصر من هو قادر
علي ان يثني لي طرف
وبالرغم من ذلك سافرت بحثا عن راحة البال وحياة سوية لا احتاج فيها الي رفع سماعة الهاتف كلما صادفني احمق متعجرف من كلاب الدولة
ففي الخارج لك حقوق وعليك واجبات وكل يأخذ حقة
لم اري مصري يهان حيثما سافرت
وان كان طبعا يوجد ولكنها حالات نادرة جدا لا تقارن باهانة شعب باكملة
في وطنة الا فئة قليلة
فا الكلام الفاضي بتاع عدم وجود كرامة للمصري واهانة
والكلام دة لا صحة لة
فالكريم في وطنة كريم في غربتة
ام المصري الجربوع اللي بيعمل اي حاجة اي حاجة علشان لقمة العيش
حتي وان اصبح قواد رجالي
هو دة اللي بينضرب بالجزم هناك
غير ذلك فكل حسب قدرتة علي اجبار الاخر علي احترامة

Leonardo said...

امممم
بيتهيألى إنك حسبتها بعاطفيه شديده قوى يا أشرف
الموضوع أبسط من كده بمراحل فى رأيى
المسأله مسألة شغل وفلوس
لو شغلك فى مصر قادر يفتح بيتك ولو ع القد وإنت مش عايز أكتر من كده يبقى خلاص مافيش داعى للسفر والبهدلة طالما إنت راضى بحياتك هنا
لو محتاج ومش لاقى فرصة تزود بيها مواردك هنا أو تأمن عيشة أسرتك يبقى تسافر تشتغل وبكرامتك اللى تقدر تفرضها على أى بنى آدم وتجبره إنه يعاملك باحترام طالما إنت محترم نفسك

لكن لو كنت هتبص لها بقى من ناحية أنا هنا عايش بكرامتى وللا لأ ؟ طب هناك هيدوسونى بالجزمة وللا لأ ؟ يبقى الموضوع مختلف تماما ومالوش دعوه لا بالشغل ولا بإنك فقرى وللا لأ
أنا باتفق مع أنا جعان ومع فنان مسلم فى حكاية إن الوضع مش بالسوء ده
طبعا ماأقصدش أقولك تعمل إيه فى حياتك .. أنا مش عبيط للدرجة دى
لكن فى رأيى إنك حملت الموضوع أكتر من حقه بكتير
ولو عايز تحمل الموضوع حاجات تانيه غير الشغل ماتعتبر إنه رحلة عمل .. فسحه وشغل وبعدين ترجع بعد ماتكون حجيت إنت والمدام واتفرجتوا على بلاد الله وكمان رجعت بقرشين يساعدوك هنا مثلا
ليه مصور الموضوع على إنه لازم يبقى كارثة ومعاناة نفسيه وغربة وانكسار ؟
هو إنت هتطلع منفى أو هربان ؟
وياسيدى الوطنيه ومش هنسيبهالكوا والكلام ده ينفع برضه لما ترجع تانى ..
وللا المسأله ياترى إنك خايف ماتعوزش ترجع تانى ؟
ماهو لو إنت مش واثق من نفسك دلوقتى يبقى القعاد برضه مالوش لازمه لأن أخلاقك لو كانت هتتغير لما تسافر وتشوف العيشه الآدميه ممكن تتغير هنا برضه بشوية اغراءات تخلى عيشتك هنا آدميه !!

أتمنى إنك تفهم من كلامى أى حاجه لأنى حاسس إنه مشتت شوية
وأتمنى كمان إنك تكون مرتاح فى حياتك ولقراراتك أيا كانت

أحمد (زوج مخنوق ). said...

أشرف باشا الفقري
هاكلمك عن تجربة ثمان شهور سفر
و الله رغم اني كنت في مكة
و معايا مراتي و بنتي
و على كفالتي
و رغم ان كفيلي و الله و بدون مبالغة هو أكتر رجل محترم قابلته في حياتي
سواء في مصر أو في السعودية
و رغم اننا كنا 40 مهندس مصري شغالين مع بعضينا معظمنا مع مراته و عياله
رغم كل ده الا ان قعدتي على القهوة في الوايلي مع صحابي بكل ده مجتمعين
الا ان مشيي و أنا مش خايف لواحد مالوش لازمة يخبطلي عربيتي بعربيته و في الاخر يطلعوني انا اللى غلطان علشان هو سعودي مقدس و انا مصري درجة تانية أحسن من ده كله
الا ان لمة يوم الخميس مع أهلي في بيت العيلة احسن من ده كله
الا ان تمشية في رمضان في الجمالية و نطلع منها على الحسين أحسن من كل ده
الا ان بق مية من النيلأحسن من تمن شهور مرار الغربة
من الاخر يا أشرف
ربنا هو اللي بيرزق هنا و هو اللي بيرزق هناك
و رزقك هيجيلك هيجيلك
تصدق بالله
انا لسه راجع من السعودية شهر اتنين اللى فات
و الحمد لله و ربنا اللى شاهد على اللي انا باقوله
ان الحمد لله مرتبي اللي باخده دلوقتي أكبر بمرة و نص من مرتبي اللى كنت باخده هناك و حتى بعد تحويله لمصري
رزقك هيجيلك هيجيلك

Anonymous said...

bgd 7`altni a3ayt..bgd elsera3 fel7kaya de qayi gdn..rbna ywafa2ak ya rb w kol eli zayak..w yrzokak in sha2 allah..ameen:)

Anonymous said...

ba3idan 3an elmakala..howa safar elso3odia 7`anee2 shwaya kteer bs howa akter 7aga betet3ered elfatra di..w fi masalan the U.A.E. momken tkon a7san bs bt7tag ya tkoon masalan e3lan taba3 wzaret else7a henak ka tabiib masalan aw sherka kbeera lw 7adretak momken ykon 3amalk fel ghraphics..bs a2al mn keda la2..3shan brdo elwa7ed ykon msh ray7 ybhdel nafso...ana bs 7abeet ashark b elma3loma..shokrn :)

Anonymous said...

w rbna ydeek w ydeena tolt el3omr en e7na nshof elyoom eli n3iish fi baladna bkarametna...m3lsh m7dsh yz32li lw shofoni mo7bata bs atmana

Anonymous said...

elsayed aw elsayeda mghool..howa bs 7adretak fiih shwayet kalam mawsellaksh sa7 belli y2sodo dr.ashraf ..da e7sasi y3ni...w lw el dr. 7ab ywsef 7aga b shakl enta trfodo fa howa by3abbar 3n fekro aw masha3ro w ma a3takedsh en eli 7adretak fehimto s7.howa yo2sod wad3o ka rassam carecator by3abar fi b3d rosomato 3n mashakel elbalad masaln,,fa sa3ban 3lih ykoon 3amel zy eli byshtem fiha w ysta7`abba masalan..ekmenno hykoon b3eed..r3`m en msh asdo yshtem ..akeed 7d zayo w zy nas kteer mahma 7asal fiha msh btshtem..bs hatetfehem keda..bs ana bkrar en da mn wghet nazari..w ashkorak 3ala se3at sadrak..:)

Anonymous said...

w kalam mr. ana ga3an fel a7 geddan w bgd kalam qauem bknesba le mwdoo3 emta elwa7ed ysafer..shokrn..ana br3`i keer m3lesh

Anonymous said...

أنا اتولدت في دولة عربية, قضيت فيها 18 سنة فترة تعليم ما قبل الجامعي, والدي بيشتغل فيها طبيب.. حاليا بكمل تعليمي الجامعي في مصر(ما يقارب التلات سنوات حتى الان في مصر), هل فيه احتمال اني ارجع لأي بلد عربي للعمل؟؟ مستحيل, مهما كانت ضخامة الراتب, مستحيل أرجع لبلاد شعوبها تفكيرهم متخلف ومنحط وبدائي, مستحيل أرجع لبلد شعبه شايف نفسه أرقى من غيره وان كل من خالفه من الجنسية هو عامل عبد باع نفسه عشان الفلوس..

لو سافرت يا د/أشرف, ممكن تكون كسبت من الناحيةالمادية, بس هتكون فقدت حجات كتير أغلى من دي هتخليك تتف على الفلوس..

يوم ما تقرر تسافر, سافر لبلد محترم, شعبه بني ادمين بمعنى الكلمة, شعبه متحضر, شعبه مش مريض, شعب مش بهايم..شعبه مش عرب
شعب ميفهمش غير الشغل, التعامل الحضاري, الحقوق والمساواة.


انا بحلفلك ان شهر واحد في اي بلد عربي ذو شعب منحط, هيعادل مرارة عيشتك في مصر من ساعة ما اتولدت..انا متابع قديم جدا لمدونتك وده خلاني على معرفة بيك لدرجة مش وحشة ابدا..واقدر اتصور حالك ببساطة بعد قضاء مدة قصيرة هناك..

انت مش فقري, انت بني ادم عنده كرامة ومش عايز توطي راسك حتى لو ظروفك صعبة..انت واحد عايز ابنك يكبر بين ولاد بلده, مش بين جيل مع الوقت بيحتقر غيره من البشر اكتر من الجيل اللي قبله..


YOU MADE THE RIGHT DECISION!

هرطقة said...

هو انا ياما جالى سفر للسعودية
ومكنتش بوافق
هى الصراحة بلد خنيقة
ولولا الحرم كنت أفضل يحرقوها باللى فيها
انما انا مش فقرى
انا دلوقتى بدور فى موضوع الهجرة
أشوفك فى استراليا يا نجم
وهناك مش هتتعامل درجة تانية خالص
سيبك من الهم ده
ومش هتبقى عاهرة ولا حاجة
عارف ليه
عشان انت المفروض تروح وتنسى
انسى خالص القرف اللى هنا ده
ارسم كاريكاتير لابداعك الشخصى الغير مرتبط بمآسى هنا
هناك فرصتك فى الابداع احسن كتيييييييييييييير
هتقولى بلدك وأهلك وجو رمضان والكلمتين دول
هقولك ولا حاجة تسوى انك تعيش عيشة آدمية
آدمية

هرطقة said...

وبالمناسبة
Film animation is in the long term shortage list in NZ
يعنى ركز فيه شوية
وهتسافر فى خلال شهرين
وانسى بقى
سيبك من الهم
أما عن الهزيمة
أقول لك
اختر معركتك أفضل
لأن المعركة الحالية
خسرانة خسرانة

seven said...

انا متفق معاك فعلا
عشان فعلا فى دول الخليج بيعملو المصرى كانه درجة 3 او 4 كمان مش تانيه
وكانه جى يشحت مش يشتغل
وانا بصراحة مرضاش بكده
وبحييك ان مرضتش بكده
والحالة الواحيدة اللى ممكن الواحد ياخد احترامه فيها
يروح وهوه كبير ( فى مجاله يعنى) ساعتها
محدش يقدر يكلمه نص كلمة عشان هما اللى محتجينه
مش هوه اللى محتاجهم

seven said...

حاجة نسيت اقلها
لازم الواحد يعمل لنفسه كرامة فى بلده
عشان الناس تحترمه بره بلده

ياسمين نعمان said...

ياد.أشرف .. بصراحة كلام حضرتك في الردود وجعني أوي .. أنا مش عارفة فكرتك عن الحياه في الخليج سيئة كدة ليه؟؟ أنا كنت عايشة هناك و انا صغيرة و طبعا أهلي و بلدي و كل حاجة في مصر كانت بتوحشني .. بس كان في هناك ايجابيات كتير .. أولها ان والدي قادر دلوقتي الحمد لله يعيشنا عيشة كريمة .ز و ان انا و اخواتي اتعلمنا تعليم ديني كويس, و زي ما بتقول هم فعلا هناك متشددين شويتين بس البركة في بابا و ماما كانوا مركزين معانا الحمد لله, و طبعا اننا حجينا.. و السفر عامة بيعلم الواحد حاجات كتير.. ازاي يتعامل مع ناس فكرها مختلف و يتقبلهم و كمان بيعلم الانتماء و حب الوطن .. أه و الله .. يعني و انا هناك كانت مصر بتوحشني جدا و اتعلمت ازاي يكون عندي انتماء و حب جامد ليها و اني ما اقبلش حد يسيء ليها بكلمة ..
احساس اننا اقلية (مع ان المصريين هناك كتير اوي) مع الغربة والشوق للأهل مع قراية أدهم صبري (مصر يا أدهم) كل دي حاجات علت أوي الإحساس بالإنتماء جوايا و طبعا كلام ماما و بابا
يعني من الآخر ماتخفش على و لادك هناك ..
و بعدين السعوديين مش وحشين للدرجة الي ناس كتير متصوراها .. هم مجتمع عادي فيهم الكويس و فيهم الوحش .. و الحمد لله كانوا بيحترمونا و كانوا بيحترموا والدي ووالدتي جدا في شغلهم .. و محدش فيهم اتهانت كرامته اطلاقا زي ما انت بتقول ..
بص يا أشرف .. الواحد مفروض ميكونش عاطفي أوي ولا عملي أوي .. و لازم تكون عارف ان اي تجربة لازم يكون فيها سلبيات و ايجابيات و العاقل اللي يحسبها صح .. بعقله و قلبه ..
أنا شايفة ان لو انت محتاج السفر سافر .. و يا سيدي مصر مش هتطير و ممكن أوعدك اننا مش هنغير حاجة لحد ما ترجع بالسلامة .. هنخلي كل حاجة زي ما هي .. يعني متخافش مش هيفوتك حاجة
كلنا نفسنا نفضل في بلادنا و نعيش فيها عيشة كريمة .. و ربنا يعلم السفر كان صعب علي أد ايه عليه و اكيد صعب على كل اللي بيسافروا .. و انا نفسي ما اسافرش تاني و أفضل في مصر بس "ايه اللي رماك على المر ؟؟ اللي أمر منه"
معلش اني طولت .. أنا بس عايزة أقولك متحكمش على أي تجربة من كلام الناس لازم تجرب و تشوف و بعدين تكون رأي .. و برضه متحكمش على شعب بحاله و تكرهه من حكايات حد أو من كلام أفراد "سماويين" قريته
و ان شاء الله ربنا يوفقك للقرار الصح و تكون مبسوط بيه
سلام

أشرف حمدي said...

والله العظيم تلاتة ردودكم هوّنت عي الكثير بكل ما بها من آراء مختلفة ومتناقضة
أنا متفق معكم جميعا
مع من قال لي سافر ومع من شجعني على البقاء
كلها أراء تأملتها كثيرا جدا وقرأت التعليقات مرات ومرات
ووجدت أن كل شخص على جانب كبير من الصواب وفقا لظروفه وقناعاته الشخصية وأهدافه

بالنسبة لي انا رسام كاريكاتير مختوم على قفاي ختم مصر
made in Egypt
لا أصلح في أي مكان آخر كرسام كاريكاتير لأن أي فنان يعبّر عن بلده وواقعه وظروفه ، لو عملت في أي بلد أخرى كرسام فسوف يكون موضوع كاريكاتيراتي عن الغربة ليس أكثر
أريد تحقيق شيئا ما بمجال الكاريكاتير الذي إندثر كغيره من الفنون الجادة
أحلم بأن أساهم ولو بجزء بسيط في إحياء هذا الفن هنا ، في كل لقاء تليفزيوني أتحدث كثيرا عن الكاريكاتير ودوره وهدفه ومدى روعته كفن كنا نحن روّاده منذ سنوات قليلة
حاولت كثيرا عمل برنامج فضائي على إحدى القنوات ولكنهم رفضوا لأسباب مادية ولأنهم لا يؤمنون بدور الكاريكاتير في الإعلام
لازلت احاول
ولا زال بجعبتي الكثير

لن أهرب من الكاريكاتير كما فعل العديد من زملائي في المهنة ، أكافح من أجل أن أصنع من الكاريكاتير حرفة تدر مالا كما كان في عصر صلاح جاهين
أتمنى تحقيق ذلك بشدة
لكم مني كل احترام وحب وتقدير

TAFATEFO said...

تعرف يا أشرف بيه .. أنا جت لي فتره فكرت كده .. لو البلد التانيه فيها معامله آدميه .. وتقدير مادي وأدبي أكتر
بس
مفيهاش أصحابي .. وأنا مبقدرش أعيش من غيرهم .. ولما زهقت من التفكير في الموضوع .. بطلت أفكر فيه من غير ما آخد قرار

انت أخدت قرار انك متسافرش نهائياً؟ .. ولا في الوقت الحالي؟؟

Anonymous said...

بص يا د.أشرف , انا معاك ان مصر قاسيه علينا جداً , و ان مع ذلك مفروض نستحمل و نقعد فيها ! , بس لما تبقى الظروف بتجبرك على حاجه بيبقى قدامك حاجه من اتنين , يا تموت في بلدك , يا تسافر عشان تعيش , انا والدي شغال في السعوديه من حوالي 20 سنه , مسألة الكفيل وحش و جزمه قديمه دي مش عامه أوي بالطريقه اللي الناس بيقولو عليهادي , في ناس كويسه و في ناس كلاب , انت و حظك , صحيح في خليجيين كتير بيكروهنا و دي مفيهاش كلام و اي حد يقولك غير كده يبقى أهبل و ابن هبله كمان لكن في الكويس و في الوحش , انت مش مسافر عشان تشتغل رقاصه , انت مسافر عشان تشتغل دكتور محترم , لو حد كلمك يبقى حسابه عند ربنا و يولع بجاز , طبعاً لو انت عايش كويس في بلدك يبقى ملعون أبو السفر , بس لو في ايدك فرصه هتخليك تعيش أحسن و تضمن لولادك معيشه أحسن و تعليم أحسن يبقى سافر , السفر من البلد مش خيانه ولا عدم انتماء , لو كان الموضوع كده كان احمد زويل بقى على كده خاين لبلاده طبعاً مع الفارق , على فكرة المستوى الإجتماعي و نوع الوظيفة بيفرق بنسبة 80 % بالنسبة للمعاملة في الدول التانيه , يعني متسمعش كلمتين يقولهملك واحد كان مسافر يشتغل نقّاش ولا شيال زلط عن المعاملة السيئة , لإن الفئة دي الناس بتستخف بيها في الدول التانيه و بيعاملوهم فعلاً وحش لإنهم بيعتبروهم ملهومش صاحب .
و سلامي لك .

Anonymous said...

انا كاتب باسم مستعار لاني نسيت النيك نيم والباسوررد
اسمي يوسف
المهم يا مستر اشرف انت خايف علي كرامتك تنجرح وانت برا مصر من شخص عربي مع العلم ان كرامتك بردو ممكن تنجرح وبردو من شخص عربي وانت جوا مصر والشرطة هتطلعك انت الغطان وتديك بالجزمة بص ياخ اشرف كل واحد وعلي حسب احترامة انت لو محترم غصب عن الطخين هيحترمك ولو مش محترم يبقي تستاهل تداس علي كرامتك لانك هتكون ساعتها اصلا معندكش كرامة
انا في دبي بقالي سنتين وشغال في مجال الصحافة ولاكني مخرج فني وكنت بتصل بأمي من فترة وكانت زعلانة اني بعيد عنها حلفتلها بالله انها لو قالت لي ارجع هحجز وارجع والحمدلله ظروفي فمصر كويسة قالتلي بلاش ترجع ظروف البلد وحشة ونفسيتك هتتعب تخيل امك زعلانة علشان بعيد عنها وبتقولك مترجعش انت فاهم يعني اي وضع مصر
انت في مصر بدون كرامة لما تروح تشتري حاجة بجنية وتاني يوم تلاقيها بتنين جنية يبقي معندكش كرامة حط دا مقياس علي كل حياتك
وربنا يوفقك بالاصلح ليك

Anonymous said...

هييييييييييييييييييييييييي هييييييييييييييييه هييييييييييييييه هيييييييييييييييييه هيييييييييييييه هييييييييييييييييييه



تحيااا الفنننننن تحيااا تحيايا

ربنا يقوييييييييييييييييك

مواطن مصرى نايم said...

لا يا اشروف
سافر
مش حقولك اكتر من كده
بجد
سافر
اولادك حيدعوا لك بعد كده
لما يكبروا و يلاقوا حياتهم ارتاحت
سافر بجد
بلاش تضيع الفرصة من ايدك
اه انا بحب مصر و كل حاجة
لكن دا مستقبل لو جت لى الفرصه حسافر

أكون أو لا أكون said...

اعجبتني مدونتك جداً...
اما بالنسبه للموضوع!!! لا أعرف ماذا اقول... غير ان شاء الله يكون قرارك صائب.
تمنياتي بالتوفيق...

أكون أو لا أكون said...

بعدين يادكتور اشرف... لا تستخدم الكومبيوتر والضوء طافي... عشان عيونك...
تحياتي...

Anonymous said...

HAH

ايه ياعم التعليقات الكتير دي انا بقر بس مش بحسد

المهم انا بره مصر تحديدا في الامارات اه الحياه هنا حلوه بس مفيش روح
هموت عشان رمضان جاي ومش حاسس خالص باي احساس كنت بحسه في مصر لما الشهر يهل
انا برضه فقري بحب مصر رغم اللي فيها لانه بسببنا لان البلد بتعلا بناسها بس لما لاقيت فرصه تذود دخلي اقولها لا ليه اه بحب مصر بس ايه المانع لما احبها وانا في بلد تانيه وعلي فكره عشان تعرف اني فعلا فقري انا متعاهد مع نفسي اني ما اعيشش عمري متغرب لا هرجع مهما كانت الحياه في مصر صعبه بس الروح اللي فيها مش هنا ولا في اي حته تانيه

علي اسم مصر التاريخ يقدر يقول ما شاء
انا عندي مصر احب واجمل الاشياء

TAFATEFO said...

كل عام وانت بخير يا أشرف بك

Unknown said...

مممممممممم

حقيقي الكلام مختلف و انا مع اللي بيقول لما تبقي فيه فرصه بره و تحترم كرامتي و آدميتي .. في حين انك هنا بتتبهدل و بتطلع عين أبوك علي ما تعيش العيشه اللي نفسك فيها .. يبقي غباء لو ماروحتش للي بره

بس اللي بره مش هيدوك الا اللي هما عاوزين يدوهولك .. لكن لو اللي جوه مش هيدوك من أصله و مش ناويين يسيبوك تاخد حاجه يبقي بره أحسن من بلاش .. و أهي كلها عيشه بس الفرق .. انك تحس بآدميتك و إحترام الجميع ليك

و تحس انك حققت طموحك

مع إحترامي للانتماء بالرغم انه مالوش علاقه أوي باللي بنتكلم فيه .. بس طظ في أي حاجه و خليك أناني

Anonymous said...

انت تبنيت وجهة نظرى
انا برضه شايفه ان ازاى الواحد يسيب بلده ويروح لبلد اهلها بيعايروه باصله
انا حاسه بالموضوع ده جدا لانى اتولدت بره مصر
وعشت كل ده من الطفوله وسابت بصاتها عليا لحد دلوقتى
اسمحلى انحنيلك اتراما واقولك قرار سليم
وافكرك بمقوله بحبها قوى
وعلمت ان رزقى لن يأخذه غيرى فاطمأن بالى
اللى ربنا كاتبهولك هتاخده هنا او فى مدغشقر
اصبر وربنا معاك
وكل سنه وانت طيب

منونة said...

أشرف باشا ...عايزة اقللك انت من الناس النادرة جدا اللى لسة عندهم دم فى البلد دى ..كلامك بقالى سنين بنادى بيه لكن محدش سمعنى وانا اكتشفت ان مش مهم يسمعوا خللى كل واحد يعمل اللى هو عايزه هم الخسرانين...وان كان لقبك فى الحالة دى هو فقرى زى ما بتقول يبقى يا ريت كل المصريين كانو فقريين ما كانش ده هيبقى حالنا..
go on ya ma3alem
انا ليا مدونة اتمنى سيادتك تطل عليها وتقوللى رايك انا معجبة جدا بدماغك
بييييييييس
منونة

منونة said...

اشرف باشا..انت جامد جدا
عايزة اقوللك انى عمالة انبح فى صوتى باللى انت بتقوله لكن لا حياة لمن تنادى..وسيبك من اللى معترض هو اكيد الخسران..وان كان لقبك لما تعمل كدة هو فقرى ,فياريت كل المصريين كانوا فقريين مكانش ده بقى حالنا...
go on man
انا ليا مدونة على قدى يا ريت سيادتك تطل عليها وتقوللى رايك انا معجبة جدا بدماغك
http://www.nabadat1810.blogspot.com/

Anonymous said...

انت اكيد بتحب مصر
بس هية بتحب واحد تانى يا فقرى

Anonymous said...

hi

i am new here

just wana say hi to all

DxSEO

Counter