Total Pageviews

Friday, February 27, 2009

الدين الجديد


أتتبع دينا جديدا ؟
لا يا خفّة ، أنا اللي مش فاهم إنتوا تبع أنهي دين أساسا
يالك من مارق زنديق ، إنت ماجسوي على فكرة .
ماجوسك ؟ هع هع هع
أرجمووووه

حوار عادي تماما يمكن أن يدور بيني وبين زملائي في العمل ، أي عمل ، وكل عمل ، وكل مجلس وعلى المقهى وعلى المدونة وعلى الفيس بوك ، الموضوع ببساطة أنني لم أعد أفهم كيف يفكر السواد الأعظم من المسلمين في بلدي ، إما أنهم أتبعوا دينا جديدا أو أنا الذي فعلت ، إليكم بعض الأمثلة التي يهمني معرفة رأيكم حولها .
القرآن
ما أعرفه على حد علمي المحدود أن القرآن هو كتاب مقدس ، يحوي نصوصا مقدسة لها قدسيتها التي تستوجب في حالة قراءتها أن نستمع لها بخشوع ، لا أفهم كيف تحول القرآن إلى تمائم وتعاويذ وأسلوب فريد من إزعاج الآخرين ، في وسائل المواصلات لاحظت موضة جديدة وهي تشغيل القرآن بصوت عالي على الموبايل ، يفعل ذلك أحد الركاب دائما ، وهو التطور الطبيعي لظاهرة تلاوة القرآن بصوت عالي بالمواصلات فيما قبل ربما بسبب ظهر جيلا بأكمله لا يعرف قراءة اللغة العربية بشكل سليم ، هناك من ينام خمس ساعات يوميا أو أقل ويريد استكمال نومه بالأوتوبيس المكيف مثلي ، وهناك من يتحدث بالموبايل ، وهناك من هو غير مسلم ، وهناك من يراجع دروسه قبل الامتحان ، هؤلاء من حقهم بعض الهدوء ولا أعتقد أن هناك من يختلف معي في ذلك ، أما الباقيين فمنهم من يقرأ الجريدة أو يتشاجر مع السائق أو يتأمل في أجساد طالبات جامعة عين شمس أو يمسك بيد خطيبته \ صاحبته \ رفيقته وربما يختلس بعض القبلات ، إذن ما هو السر في تشغيل القرآن بصوت عالي ؟ ولمن يتم ذلك ؟ وهل يعتقد فاعل ذلك أنه يكسب ثوابا ؟ هذا السؤال تحديدا ليس من صلاحياتي الإجابة عليه ولكن في اعتقادي الشخصي أنها إهانة للقرآن والله أعلم .
أصل إلى العمل فأجد زميل لي يشغل القرآن بصوت عالي على الكمبيوتر المحمول ، وحينما أطلب منه خفض الصوت ينظر لي بإعتباري زنديقا أو على أقل تقدير يسألني : إنت مسيحي ؟ ، يا سيدي هو عشان بقولك عاوز أشتغل أبقى مسيحي ؟ ده على اعتبار إن المسيحيين بس اللي بيشتغلوا والمسلمين لأ ؟ يقول لي ما تشتغل ! أقول له ما هو يا أشتغل يا أسمع قرآن ، يقول لي دي بركة للمكان عشان ربنا يفتحها علينا .
هذه هي ، هذا ما كنت أقصده ، تحويل القرآن إلى تعاويذ ، شيء ما يجب أن يتلى بالمكان كي تحل عليه البركة ، سواء استمعت له أو لم تستمع ، سواء فهمته أو لم تفهمه . لسبب ما اعتبر هذا وثنية .
الكارثة الحقيقة هو أنني حينما أصمت على مضض وأحاول التركيز في العمل أجده يتحدث معي بعد دقائق عن بت مزة جامدة آخر حاجة شافها إمبارح في حفلة ويستطرد في وصف جسدها ورغبته في النوم معها ، كل هذا والقرآن يتلى على جهاز الكمبيوتر المحمول الخاص به ! هذا يثير جنوني صراحة

الحجاب
البادي الكارينا أتاح للجميع ارتداء كل شيء ، يمكن للفتاة أن تمشي بالشارع بقميص النوم طالما أنها ترتدي بادي كارينا تحته باعتباره يغطي كل جسدها ، بادي كارينا من وجهة نظري هو طلاء للجسد ، جسد عاري تماما مصبوع بالبمبي أو الأبيض أو الفوشيا ، ولكن الأخطر من ذلك هي موضة الحجاب على الجيبة فوق الركبة ، ربما ترتدي الفتاة حذاء البوت أو شراب فيليه أو لا شيء أساسا ، حجاب من فوق وجيبة قصيرة من تحت وعلى رأي المثل : يقطع من هنا ويوصل من هنا ، بغض النظر عن موضوع الحجاب في حد ذاته فأنا لا أطيق التناقض فهو يسبب لي صداعا ، ولا أطيق شيئ لا أفهمه ، كذلك الحال مع المنتقبات ، رأيت أكثر من منتقبة ترتدي عباية ضيقة للغاية ، عباية تحشر جسدها بداخلها ومرصعة بالترتر ، لا يظهر منها سوى العينين وبالرغم من ذلك تصبغهما بكل الأصباغ والألوان الممكنة ، هذا أيضا لا أفهمه ، ما هو دافعها في الانتقاب إذن ؟

المسواك
وبصفتي طبيب أسنان أقول أن المسواك لا يمكن وضعه مع فرشة الأسنان والمعجون تحت تصنيف واحد فالفرق شاسع ولا مجال للمقارنة ، فرشاة الأسنان هي الأداة العصرية المستخدمة لتنظيف الأسنان ، فلماذا المسواك ؟ هل المسواك مقدس ؟ هو هو عبادة ؟ هل ينتمي إلى الدين من قريب أو بعيد ؟ هل أسناني سنظف ببركة المسواك أكثر من استخدامي للفرشاة ؟ هل ثواب الصلاة بفم نظيف بفعل الفرشاة والمعجون أقل من حالة تنظيفه بالموساك ؟

ما قصدت أن أقوله من خلال الأمثلة السابقة هو التالي
ما الهدف من القرآن ؟ الاستماع إليه وفهمه ؟ أم تشغيله بصوت عالي لإزعاج الآخرين ولتحل البركة بالمكان ولا يهم ما يمكن فعله أو قوله على خلفية تلاوة القرآن كصوت ، هل القرآن صوت أم كلمات ؟ هل هذا دين جديد لا أعرفه ؟
ما الهدف من الحجاب إن كان فرضا كما يقولون ؟ هل هو تغطية الشعر أم الإحتشام وعدم الابتذال ؟
قل لي أرجوك ، هل المسواك سنّة ؟ أم تنظيف الأسنان هو السنّة ؟ هذه نقطة مهمة جدا ؟
هل الخمر حرام ؟ أم غياب العقل هو المحرّم ؟
هل التلفاز حرام ؟ أم العري الذي يعرض عليه هو المحرّم ؟
هل السكين حرام ؟ أم القثتل به هو المحرّم ؟

من وجهة نظري كشخص مسلم ، وأنا لست فقيها ولا داعيا ولا شيخا ، أن الخمر ليس حراما في حد ذاته ، الموضوع أعمق من ذلك ، الحرام هو تناول أي شيء من شأنه أن يغيب عقلك فيتسبب في إقدامك على أفعال مدمرة لمن حولك ، كما يتسبب في عجزك التام أو الجزئي عن أداء العبادات ، والقاعدة تقول أن القليل منه أيضا حرام ، وربما كانت الحكمة في ذلك سد الطريق تماما لأنك لو بدأت للقيلي فستصل للكثير فيما بعد .
إذن الخمر حرام والحشيش حرام والبانجو حرام والهيروين والمورفين والماريجوانا وشم الكلّة وشم أصابع قدميك إن كان ذلك من شانه أن يغيب عقلك . أنا اعرف من يحشش ولا يقرب الخمر لأن الحشيش لم يرد ذكره بالقرآن !
هل المسواك سنّة ؟ إطلاقا ، المسواك شيء غير مقدس ومن حقي أن أتهكم عليه كيفما أشاء دون أن أخشى لومة لائم ، السنة هي نظافة الفم ، تنظفها بمسواك بفرشاة بجن أزرق المهم أن تنظف فمك .
الحجاب فرض ؟ حتى وإن كان فرضا ، الحجاب ليس فرض ولكنه الإحتشام ، أن تصل الفتاة إلى مبدأ الاحتشام في حد ذاته ، بحجاب ، بجلابية ، بطاقية ، ببرنيطة ، بملابس فضفاضة ، بملابس بسيطة ، بملابس غير لافتة وفقا لمجتمعها وبيئتها هذا هو المطلوب كما اعتقد والله أعلم ، أما التمسك بالحجاب من فوق وميني جيب من تحت فهذه إزدواجية
أعتقد أنها لو خلعت الحجاب وغطت به أفخاذها سيكون هذا ألطف وأصح وأجمل أيضا .
إذن من منا ينتمي إلى الدين الجديد ؟ أنا أم هم ؟
أنا أفكر وأحاول معرفة الهدف وراء تعاليم الدين ، وهم يطبقون المراسم ويعاملون القرآن باعتباره تمائم والمصحف باعتباره طوطم والمسواك باعتباره صنم ، أما الصلاة فلا يهم ان تنهى عن فحشاء أو منكر بل ربما تؤدي صلاتك وتسب الدين لزميلك في العمل عادي جدا خالص وفقا لدينهم الجديد .

30 comments:

AAAA said...

عارف يااشرف موضوع القرأن او اي حاجة عامة بصوت عالي بتعصبني انما تفهم مين وممكن تبقى راكب الاتوبيس وفي واحد في اولة مشغل قران وواحد في اخرة مشغل اغاني ومفيش اي احترام لخصوصيتك ورغبتك في الهدوءوالمشكلة انك لما تكلمة يبصلك كدة بصة كانة شافك بتسجد لصنم ولا حاجةوبعدين هي بتبقي حبكت يعني يسمع قرأن دلوقتي وبعدين موضوع التدين الظاهري دة كتر اوي لدرجة انك تستغرب لما كلنا متدينين كدة مي الي بيسرق وبيتحرش وبالنسبة لموضوع الحجاب فانت لخصتة جدا هو الشعر حرام والباقي حلال والسواك معظم اللي بيستخدموة يقولك سنة مع ان سنانة مش نضيفة بس مش مهم المهم السنة.وبعدين زعلان لية يا اشرف هو دة المصري النيل جواه والبفرة معاة

أحمــــــــدبــــــــــلال said...

تحدث معى كثيراً أن أجد من يشغل القرآن بصوت عالى من على هاتفه المحمول
لما؟
أهى محاولة لهداية الاخرين أم ماذا؟
أهى هداية بالغصب ربما أكون غير أمين على ما تشغله من قرآن و أقوم بفعل قبيح محرم أذا من منا يأخذ الذنب
ربما أكون على غير دينك
أذا لماذا تزعجنى أم لأن الاسلام هو الدين الشائع فى البلد أذا على تحمله حتى لو لم اكن من نفس الدين
فى أحدى المرات حاولت تهدئة أحدالقارئين فى المواصلات العامة لانى كنت مصلب بالصداع و أرغب فى النوم حقاً
ليفحمنى بقوله أنننى على غير الاسلام و أنى لو كنت أستمع للأغانى لما طلبت منه تخفيض صوته و لأجد كل من الميكروباص يكادوا أن يقذفونى بالحجارة
أذا هل قراءة الاهتزاز و تعلية الصوت هى الخشوع لما يتلى

أما موضة غطاء الشعر المسمى بالحجاب فهى موضة العام
تغطى شعرها و تترك ساقيها للنظرات بالرغم من أن ساقيها ربما تكون أكثر أغراءاً من مجرد شعر مغطى
بالعكس أظنها فقط تكسل عن تسريح و العناية بشعرها يومياً كلما خرجت
أرتدى كارينا برقبة عالية و حجاب أسبانش لأننى محجبة
بالرغم من ان المقصود من الحجاب الأسبانش هى ربطة شعر الغجر الاسبان و ليس عن أسلام و لكنها عادتهم فقط
كثيرون لا يقربون الخمر و لكنهم يشربون جميع انواع مغيبات العقل الاخرى
على أساس ماتم ذكره فى القرآن و ما لم يتم
مافائدة التحايل طالما تعرف انه محرم فى جميع الاحوال
فأذا كانوا من أتباع الدين الجديد
إذاً أنا مازلت على دين الاباء

mohamed hassan said...

انا زهقت و الله الناس كلها اتجننت

عقل مهوي said...

معقوله فيه حد مضايق من الناس دي زيي .. طب يا سيدنا انت هتلاقي زيك كتير في اصحابك او علي الاقل هاتلاقي في العاصمه حد زيك .. انا من ابناء الاقاليم .. سكنت اربع سنين في المنيا تقريبا كنت الزنديق الوحيد .. ودلوقتي رجعت للفيوم بلدي .. بتعامل علي اني عبييييييييييييييييييييييط .. لامؤخه ما فيش حد يقولعي نفسه كده .. بس انا عملت فغي نفسي كده عشان اعترض زي والخبط واضرب واشتم في كل الي مش عاجبني .. اتجننت من العالم دي .. فعلا
منك لله ياعم انت .. كنت ادخلاقرا وامشي

Hala Adel said...

الموضوع ده فعلا يا أشرف كا بيأرقني و للأسف لو اتكلمت فيه مع حد يفتكروني كافره..
خلينا نمسك موضوع القرآن: أنا مثلا مش بركب من المواصلات العامه غير مترو الأنفاق في عربية السيدات تيجي واحده منقبه أو لابسه إسدال و قولو ورايا و تقعد تدعي و اللي في المترو يقولو وراها ولا كأننا في كتاب افرض زي ما انت بتقول أنا معايا تليفون مهم أظن من حقي ان اللي بيكلمني يسمعني و طبعا مقدرش أعترض.. حاجه تانيه بتنرفزني جدا نفسي أعرف ليه الناس بتوع قال الله و قال الرسول حافظين مش فاهمين بيرددوا القرآن زي البغبغانات و عمرهم ما وقفوا عند أي أمر ربنا أمر بيه و أبسطها إن يتعاملو كويس مع الناس .. عندنا زميله في الشغل طول الوقت بتحفظ قرآن و تتمتم بيه و تمتمه بطريقه تصدع لا منك انت سامعه ولا منك انت قاعد في هدوء و تدخل علينا أو وشها في وشي مافيش حتى السلام عليكم نفسي أسألها هو مش الدين المعامله بردوا و لا الدين هو الحجاب و بس
أما بالنسبه للحجاب للأسف الحجاب بقى إشاره أو علامه مغطيه شعري أبقى مسلمه مش مغطيه أبقى مش مسلمه سواء بقى شعري نصه طالع من تحت الحجاب أو لابسه من غير هدوم المهم اني مغطيه شعري..
السواك بقى ده عاملي صداع أكتر ناس بتجيلي العياده عندهم التهابات حاده في اللثه و جير و أكتر من كده علشان محدش يقرف هم اللي بيستعملو السواك و لما أقوله يا ريت تستعمل فرشاة أسنان و معجون يبصلي و كأني أجرمت أو كفرت و يقولي بس ده سنه عن الرسول عليه الصلاة و السلام .. يا جماعه لو كان فيه فرشاه و معجون أيام الرسول كان استعملهم و لو كان فيه موبايل كان استعمله و لو كان فيه تليفزيون كان شافه أكيد مش هيشوف العري بس عقلنا في راسنا نعرف نختار نشوف ايه و مانشوفش إيه
أنا طولت عليكو بس أصل الموضوع حارق دمي
تحياتي

EmY said...

يبدو انك كفرت بآلهتنا و اتبعت الدين الجديد

والله انت معاك حق في كل حرف قلته

مش عارفه ايه متعتهم ان القران يكون عالي زياده عن اللزوم لدرجة انه يتحول مصدر ازعاج

عايز تسمع قران اسمع لوحدك و خد ثواب سماعك ده بس ليه تفرض علي الي حواليك حاجه

الحجاب دلوقتي بقي موضه و منظر مش اكتر الجينز الضيق و الكارينا و القصير و الميك اب بس الشعر الحمد لله متغطي
تقريبا مافيش وقت للكوافير

المسواك اعتقد ان السنه النظافه و المسواك كان الوسيله وقتها مكنش لسه في سيجنال تو بس تعمل ايه في الناس الي غاويه مظاهر و تقولك سنه

بوست بجد جميل

adel said...

ااقولك ايه انت جبت من الاخر
ولو الواحد اتكلم عن قران شغال علي موبايل يقولولوا انت هتكفر ياعم

بجد ده الواحد بقي بيشوف بلاوي
يا اما متدين و متعصبين يا اما منحلين

Sosso said...

« بوست تحفة، دايما اقول يا جماعة« اذا قرئ القرآن فاستمعوا له و انصتوا
طب حتنصت ازاي ونت سايق، وليه كده كله ما شكيت في حد انو غير مسلم تقوم تعلي الصوت، فكرك كده هتهديه و لا هتخوفو؟ انا على طول دا حاصل معايا كده شيفني خواجه احيانا اضحك و مرات اطنش بس اكيد اقرف، يعني هي الهداية بالعافية عني ما اتهديت انت ايه دخلك

أشرف حمدي said...

أشكركم كثيرا على التعليق
لم أتوقع أن يتفق معي أحد حيث انني أصبحت مصابا بالبارانويا متوقعا أن الجميع ينتمون إلى الدين الجديد :)
سعيد جدا بأن الرسالة وصلت كما قصدت دون أن يفهم أحد أنني أهاجم الدين بشكل أو بآخر
مرحبا بكم :)

فنان مسلم said...

ازيك يا أشرف

اسمحلي أرد على اسألتك الخاصة بالجزء الأخير (السواك) عشان تعم الفائدة

هل المسواك مقدس ؟ هو هو عبادة ؟ هل ينتمي إلى الدين من قريب أو بعيد ؟ هل أسناني سنظف ببركة المسواك أكثر من استخدامي للفرشاة ؟ هل ثواب الصلاة بفم نظيف بفعل الفرشاة والمعجون أقل من حالة تنظيفه بالموساك ؟

الاجابة لكل هذه الأسئلة هو : نعم

السواك ورد فيه أحاديث كثيرة جداً لا يتسع المقام لحصرها , ترغب فيه ـ تحديداً ـ باعتباره أكثر من مجرد أداة نظافة , بل هو طهارة وعبادة , ومنها قوله صلى الله عليه وسلم :
"السواك مطهرة للفم ومرضاة للرب
وقوله
"لولا ان أشق على أمتي لأمرتهم بالسواك عند كل صلاة "
" أمرت بالسواك حتى خشيت أن يكتب علي "
" إن العبد إذا تسوك ثم قام يصلي قام الملك خلفه فيستمع لقراءته فيدنو منه –أو كلمة نحوها – حتى يضع فاه على فيه فما يخرج شيء من القرآن إلا صار في جوف الملك فطهروا أفواهكم للقرآن "

وبالنسبة للحقائق العلمية (اللي بالمناسبة غير مهمة بالمرة لنلتزم بعبادة ما ) ـ:
فإن منظمة الصحة العالمية في عام 2000 أقرت بالسواك وأوصت باستخدامه لفوائده الصحية في مجال صحة الفم والاسنان

واللينكات التالية وصلات لدراسات علمية أجنبية بتثبت بالتجربة الاثر الطبي للسواك وتأثيرة (ليس فقط عالاسنان) وانما على مناعة الجسم كله وفوائده التي لاتقارن بأي حال من الأحوال بمعجون الاسنان والفرشاة

http://myais.fsktm.um.edu.my/2008/

http://journals.tubitak.gov.tr/biology/issues/biy-08-32-1/biy-32-1-9-0709-1.pdf

http://www.thejcdp.com/issue011/almas/almas.pdf

دي مجرد نماذج سريعة , هناك المزيد على الانترنت
دور عالسواك في المجلات العلمية , أو الاسمي العلمي لنبتة السواك
salvadora persica


وزي ماذكرت في الاعلى , فان السواك ليس مجرد أداة أو عادة , بل هو عبادة وشعيرة من شعائر الاسلام , ولهذا فاسمحلي , لن يكون من حقك أن( تتهكم أو تسخر) عليه كما شئت , حاله كحال أي شعيرة أخرى

Anonymous said...

أنا قارئ للمدونة من فترة قليلة، بس عجبتني جداً جداً، آراء حرة وفن جميل للدكتور أشرف
أنا طبيب بشري مسيحي، والحقيقة عانيت كتير جداً في الصعيد أثناء الدراسة والعمل من الناس اللي بيتكلم عنهم دول "أصحاب الدين الجديد"
كان نفسي أقابل ولو واحد في تفتح كاتب وقراء المدونة، يمكن صنفكم نادر في الصعيد
مش عارف ليه الناس مش عايزة تفهم ان الدين علاقة خاصة وشخصية بين الانسان وربه، مش لازم يفرضها على حد، بالعكس يخلي أعماله وسلوكه هما اللي يشهدوا عنه
أنا الحقيقة بخطط للخروج نهائياً من مصر لأني لا أحتمل هذا الكم الرهيب من التناقض في الشخصية المصرية، المسلم والمسيحي على حد سواء
لا أطيق ذوو الرأيين أو الممثلين او المتمسحين في الدين من أي فئة كانت
يا أبيض يا أسود
مبحبش الرمادي
وشكراً للدكتور أشرف على مدونته الرائعة

D00D said...

بوست رائع رائع رائع رائع من هنا للسنة الجاية:D

بجد اشكرك على تلخيصك الجميل المنظم للموقف بالشكل ده، لكن انا معلش مستعجل فهعلق بس على ظاهرة الحجاب من خلال مواقف حصلت قدامى وخبرات استخلصتها.

الحجاب دلوقتى مبقاش لأجل العفة، لكن مجرد وسيلة ضغط اجتماعية شنيعة، ازاى؟

يعنى تيجى البنت المحجبة بالفعل ، تروح لواحدة صاحبتها مش محجبة، طبعاً احنا عندنا الشباب معظمة تافة قمة التفاهة ومخه فاضى، تفضل اختنا المحجبة دى تلعب فى دماغ زميلتها لمجرد انها عايزة تخليها زيها وخلاص، بسبب ان عقل المحجبة الباطن بيحسسها ان التانية اكثر انوثة منها وهى بشعرها، طب تقنعها ازاى؟

تبدأ فى سياسة الترغيب، ودى مرحلة مش بتستمر كتير، مجرد كلام عن الثواب وهكذا، كلمتين فى السريع مش بيقنعوا اى واحدة، بعدها ندخل مرحلة الترهيب الدينى، انتى بتاخدى ذنوب كل ما حد يبصلك وكلام من دة، وبرضة المرحلة دى قصيرة جداً ومش بتاخد وقت.

بعدها بقى الجولة الأخيرة، الكارت الوحيد اللى بيكسب، تخيلوا الكارت ده ايه؟؟!

الضغط الاجتماعى، ترهيب البنت بإنها مش هتتجوز ولا عمر عريس محترم هيبصلها وهى سايبة شعرها كأن سيبانها لشعرها دة بيخليها عاهرة!

ساعتها طبعاً البنت بتكشّ، التهديد مخيف جداً المرة دى لأن نتيجته-فى نظرها- هتمسّها على المدى القريب جداً، وفى أعز ما تملك، وكمان فى أجمل شىء بتحلم بيه اى بنت وهو انسان محترم يحافظ عليها، بعدها البنت تفكر بطريقة"وفيها ايه لو اتحجبت، لو كان الحجاب مش ضرورى وانا اتحجبت مش هيخسّر، لكن لو كان ضرورى وانا مش محجبة واضح انى هخسر كتير، وفى الآخر تقرر الفتاة انها ترتدى الحجاب عن غير رضا نهائياً، ثم تتعود عليه، وتحاول اقناع أخريات، وتستمر الدائرة إلى مالانهاية...

والأمر وصل إلى درجات أشد من ذلك، إحدى زميلات والدتى فى العمل سيدة كبيرة فى السن و شيك ومحترمة جداً جداً جداً مش محجبة، اقنعها زمايلها فى الشغل انها لو متحجبتش محدش هيبص لبنتها اللى على وش جواز لأنهم هيقولوا على أمها انها مش محجبة ومنحلّة من وجهة نظرهم، وبالتالى بنتها منحلّة زيها.

الست طبعاً غصب عنها قررت تضحى بحريتها الشخصية عشان خاطر بنتها، واتحجبت، وكل شوية تقعد تفضفض مع والدتى تقولها انا حاسه انى بقيت شبه الشحاتين.

برضة انا زيك يا د. أشرف مش ضد الحجاب فى حد ذاتة وإلا ابقى انسان متعصب. إذا كان الحجاب بيجيب العفة ياريت الدنيا كلها تبقى محجببات، لكن بما ان الحجاب دلوقتى مجرد غطاء خارجى تم ارتداؤه بسبب الضغط الاجتماعى بأساليب قذرة وملتوية، وكمان ساعات كتير بيغطى بلاوى تحتة، يبقى بلاش منه أحسن.

أشرف حمدي said...

فنان مسلم
أوتبعت الدين الجديد ؟ :)
طب والله ، لو كان الرسول يعيش بهذا العصر لأمرنا بسجنال تو عند كل صلاة
برضه نرجع لإشكالية العصر ، المسواك ده زمان كان زي سينسوداين كده ، قمة التطور العلمي
يبقى وأسمح لي من التخلف أن نصر على استخدام أداة ترجع إلى
1400
سنة مضت وأكثر
ما نسافر بالناقة بقى كمان ؟

Anonymous said...

كلامك كويس بس عيبه السخريه وبمناسبه السواك هو فعلا انا شايف ان المقصود طهاره الفم بس ده برضه يمنعك من التهكم عليه انا عن نفسى شايفه افضل من الفرشاه والمعجون ودى حاجه ترجعلى ومينفعش حد يتهكم عليا فيها

فنان مسلم said...

لا اسمحلي
التخلف مش هو اننا نصر على استخدام وسيلة مضى عليها 1400 سنة
التخلف هو اننا نرفض الوسيلة اللي الغرب اكتشف حديثاً انها أحسن من أي معجون , لمجرد انها (مظهر) من مظاهر محاولة التشبه بالرسول صلى الله عليه وسلم والاقتداء به

وده كله عشان (جسمنا بيقشعر) من أي حد بيحاول يظهر مظهر من مظاهر الدين على الملأ ,, بغض النظر هو انسان متدين أو لأ

أعتقد احنا لازم نقف مع نفسنا ونسأل احنا ليه بنكش ونشمئز كده من أي حد بيحاول يقول (انا باتبع شعائر ديني ) وبنكيل له الاتهامات الجاهزة مسبقاً بالازدواجية والنفاق .. الخ

انا كان قصدي بس أرد عالجزء الخاص بكلامك :
"وبصفتي طبيب أسنان أقول أن المسواك لا يمكن وضعه مع فرشة الأسنان والمعجون تحت تصنيف واحد فالفرق شاسع ولا مجال للمقارنة"
بالمناسبة , (ومتزعلش مني) أنا واثق ان معلوماتك في طب الاسنان متزيدش كتير عن معلوماتي أو معلومات أي حد هنا :)
وكذلك معلوماتي في الهندسة , مع اني مهندس .. وده بفضل تعليمنا العظيم الرائد وجامعاتنا العريقة
لو كنت بصيت عالدراسات اللي بعتهالك كنت هتعرف ان تركيز مادة الفلورايد و الكالسيوم الموجود في السواك , مش موجود في أي معجون اسنان حتى الان
ومعتقدش فيه معجون اسنان تقدر تشيله في جيبك , وتستخدمه في أي وقت , وانت في الشارع .. بعد الاكل .. بعد الكلام .. بعد تناول شيء نفاذ الرائحة ..أو حتى بعد سيجارة شربتها ربنا بلاك بيها

ثانياً , أنا معرفش انت ايه تعريفك أو مفهومك عن "العبادات في الاسلام" , لكن في علم الشريعة تعريف العبادة هو :"كل ما يحبه الله ويرضاه من الأفعال والأقوال الظاهرة والباطنة،"
والرسول ذكر صراحة أن السواك مرضاة للرب , يعني السواك عبادة
وكل ماتؤدي العبادة دي لك أجر

SostyPasha said...

موضوع حقيقي محتاج وقفة أستاذ أشرف
ومن المحزن جدا ان الواحد يشوف حال المسلمين بقى بالطريقة دي واخدينها مجرد طقوس وخلاص
بس
"بدأ الإسلام غريبا وسيعود غريبا ، فطوبى للغرباء"
ربنا يهدي يارب :(

أشرف حمدي said...

فنان مسلم
مش ملاحظ إنك الوحيد المعراض هنا ، وعيب لما تقول إني مابفهمش حاجة في أسنان ، أنا قاعد في الكلية خمس سنين أهبب ايه
عموما يا سيدي ما خدنهاش في الكلية
كمان انا شايف إن المسواك مقرف ، عشان تقعد تحط في بكتريا وبواقي أكل في المسواك وبعدين ترجع تحطه في بقك تاني
وبعدين لو المسواك ليه فوايد أحب أقولك إن مافيش مسواك في مصر أساسا
يمكن عندكم في السعودية ، إنما اللي على الرصيف ده مش مسواك
وكمان لو الواحد عنده التهاب في اللثة
gingivitis
بالإنجليزي أهوه
واستخم مسواك يبقى ده بيقطع في اللثة بتاعته وبيفرتكها فرتكة
وبعدين مش شايف إن عيب نقعد نتكلم عن المسواك والفرشاة كده ؟ دي مسألة جدلية ؟ ماهو ده اللي جا يبنا ورا والله العظيم
طب يا سيدي إفرض واحد إخترع حاجة أحسن من المسواك لو سيجنال تو مش عاجبك

وخلاص بقى لو كده ما تستخدمش الكابانيه عشان الرسول على أيامه ماكنش فيه كابانيهات
نعمل كلنا في الخلا بقى عشان القعدة الأفرنجي أكيد بمنطقك إختراع غربي ومن الأولى إتباع السنّة

أياك أشوفك راكب عربية بقى ، لما تيجي مصر المرة الجاية تعالى على جمل

ياريت كلامي ما يزعلكش ، أنا بتكلم بمنطق مش من مبدأ الرد وخلاص
تحياتي يا صديقي

فنان مسلم said...

ياريت نرتقي باسلوب الحوار لما نتكلم عن رسول الله صلى الله عليه وسلم يا أشرف
يا اما ماتجيبش سيرته من الأساس
حتى لو كان المقام مقام سخرية

وبعدين انت برضو بتكرر نفسك , هجوم غير موضوعي تماما
قلت ان السواك مش صحي
أثبتلك بالدليل انه صحي وبكلام منظمة الصحة العالمية ودراسات علمية في الصحة ,, ومعتقدش انك بمعلوماتك المتواضعة أعلم منهم
وقلت انه مش عبادة
وأثبتلك بالدليل انه عبادة
ومع ذلك لسه فيه هجوم غير موضوعي

وواضح جداً انك متعبتش نفسك أصلاً لدقيقتين تبص عاللينكات اللي بعتها
لأنك لو كنت قريتها كنت هتعرف ان من أهم خصائص السواك هو انه خواصه المضادة للبكتيريا
يعني مثالي تماما للاستخدام بعد الأكل للحفاظ على تعقيم الفم

انا مش رافض الاختراعات الجديدة , انا شخصيا باستخدم السواك والمعجون , لكن عمري ما أقدر ألغي السواك أو اقول انه حاجة غير حضارية وهو أساساً حاجة دلنا عليها الرسول صلى الله عليه وسلم بالاسم والتحديد ,مش زي حاجات تانية كتير سابها مفتوحة , زي الامثلة الساخرة اللي انت ذكرتها

حاجة أخيرة,
"مش ملاحظ إنك الوحيد المعراض هنا "
اذا كنت عايزني أهلل و أكبر زي باقي اللي علقوا قبل كده , فانا اسف اذا كنت بخيب ظنك
أنا بس كان عندي معلومة حبيت أوصلها للجميع عشان الفائدة تعم

تحياتي

وينكى said...

بص
انا هاعلق على نقطة نقطة
انا مش هافتى ومش هاقول انى فقيهه فى الدين
لكن ( استفت قلبك ) هى القاعدة اللى ماشية عليها
1. القرآن كلام ربنا وتعاليمة.. منزلة ولما المسلم بيقراها يعنى ربنا بيكلمه
اكيد لما واحد مديره فى الشغل بيكلمة لازم يحترمه ويسمع كل كلمة عشان ياخد العلاوة
وعشان كده ربنا قال( وانصتوا) الانصات يعنى الاستماع بفهم وتركيز كامل
واللى انت بتقول عليه ده بجد مشكلة.. لأنه لو كان على الاقل بيقرا فهو هياخد ثواب القراءة
لكن انه يزعج كل ذى عذر حتى لو كانت نيته سليمة فدا مايصحش
وكمان نيته هاتبقى ايه بالضبط؟؟
انا هاشغل القران بصوت عالى عشان انا متدين وعاوز اهدى الناس الضاله الوحشة؟؟
يعنى هو كده بيظهر نفسه ولا بيمن على ربنا بتدينه؟؟
انا ماعرفش ايه فى ضمير حد بس ياترى هما عارفين ان اى عمل يقصد بيه التقرب الى الله ويخالطه غير الله ربنا بيسيبهوله
2. الحجاب
شروط الحجاب الصحيح كلنا عارفينها
لايشف ولا يصف وفضفاض ومش ملفت ومش لبس شهرة
يعنى مش الحكمه انك تغيري لون جلدك وخلاص
انا اول واحده من الناس باعترف انى مش محجبة.. انا بالبس بنطلون وبلوزة او فيست وبالف شعري بطرحة سواء كامل او سبانش
انا باعتبر نفسي محتشمه فى لبسي وربنا يوفقنى فى يوم واتحجب بجد ان شاء الله
لكن لو كنت شايفه ان دا هو الحجاب يبقى انا عندى مشكلة حقيقية
ماينفعش حالة الاحتشام واللاحتشام دى فى نفس الوقت
3.بالنسبة للسواك بقى فانا ماقدرش اتكلم عنه لسبب.. انى مش عارفه تركيبته الطبية او فايدته
قريت دراسات بتتكلم عن ان شجر المسواك نفسه فيه زيوت طيارة وحاجات بتفيد اللثة ويختلف عن معجون الاسنان اللى فيه مواد كاشطة وتراكيبات كيماوية
انا هاستعمل بودرة العفريت لو ثبتلى انها هاتجمع الفايدة بتاعت الاتنين
4.موضوع الخمر وغياب العقل دا لا اختلاف عليه
اللى عاوز يعمل حاجه غلط وف نفس الوقت عاوز يجيب مبررات دا هاتسمع منه اعجب كلام مش منطقى
عارف
ربنا جميل قوى انه عرفنا الحاجات اللى هاتفيدنا واداهالنا بمنتهى المرونه وقالك شغل عقلك
احنا شعب بعد قوى عن سنة ربنا واكتفى بالشكليات
إلا من رحم ربى

وينكى said...

انا فى المواصلات العامه غالبا باشغل الراديو
باسمع نايل اف ام عشان احسن الانجليزيى بتاعى
حاطه المصحف المرتل كله عليه بس باسمعه وقت ماحس انى فعلا عاوزه اسمعه
وانا اتخذت مع نفسي سياسة انى مش هاسمع القرآن الا لما افهم معانيه بجد واقرا التفسير الاول
وفى كل الحالات.. باستعمل سماعاتى

wasseem basiely said...

dr ashraf,
just wanna tell you that i'm a big fan of your writing and your way of thinking,i'm a christian and i totally agree with what you wrote in your post cos that happen in every religion when you don't have a real connection with god...it's something personal after all...as for elmeswak i think fannan muslim missed the point you explained in your article,plus i think flossing is far more important than elmeswak:)) don't you agree???

i thank god that there is still people like you in our world.
keep the good work

ibrahim said...

اسمح لي يادكتور اشرف اعترض معاك في نقطة
انا موافقك تماما تماما تماما في كل النقاط اللي ذكرتها
ماعدا نقطة السواك
لأنه زي ما ذكر الاخ فنان مسلم مش مجرد حتة فرع شجرة بتنضف بيه سنانك

وعلشان نقول استخدموا السواك مش معناها نقول ماتستخدموش المعجون

بس لو راجعت الدراسات الغربية بتاعة غير المسلمين
للأسف هم انصفوه وانت واخد الموضوع شخصي ليه مش عارف
بكرر تاني انا موافقك في كل كلامك ما عدا موضوع السواك
بس شوية موضوعية وحوار هادئ علشان نفهم بعضنا وشكرا

Anonymous said...

متفق معاك في كل ما قلته باستثناء تهكمك علي السواك ..انا معرفش بالظبط ايه الحكم الشرعي لكن لما يكن في موضوع وفيه شبهه من الكلام فيه .فخلاص منتكلمش مدام علمك بيه لن ينفع وجهلك لن يضر ..ياريت تكون فاهمني

أشرف حمدي said...

انا برضه مش قادر أستوعب حكاية المسواك اللي البعض قفش فيها :)
أنا بتكلم كمثال على نقطة محددة ، المسواك سنّة ولا نظافة الأسنان سنّة ؟
أنا بتكلم في نقطة التعامل مع الدين حرفيا دون فهم أو أستيعاب

الخمر حرام شرعا وبنص قرآني
هب معني كده إن الحشيش حلال ؟

ربنا بيقول
وأعدوا لهم ما استطعتم من قوة ومن رباط الخيل

هل معنى كده إن خلاص الحروب التي يجب أن يخوضها المسلمون وجب أن تكون باستخدام الخيول ؟ نص قرآني صريح أهوه ولا جدال عليه

اللي حيرد حيقول : لأ طبعا مش لازم خيول ده مجرد مثال

يبقى كلامي انا سليم ساعتها ، لأ طبعا مش لازم مسواك ده مجرد مثال
لو فرضا إن المسواك جميل ، خلينا معاكم ، وظهرت حاجة أجمل وأفيد تبقى وحشة ؟ عشان النبي ما قالش عليها ؟

ممكن أديكم أمثلة للصبح ، نصوص قرآنية وأحاديث لو طبقنانا هرفيا حتكون كارثة ، مش بقول عيب في الدين لا سمح الله ، الدين أرفع وأسمي من النقد ، انا بقول العيب في فهم أغلبية الناس
فكّر يا أخي في الهدف والمعنى

مثال كمان ع السريع

تكاثروا تناسلوا فإني مباه بكم الأمم يوم القيامة

تقدر تطبق الحديث ده في بلد تعدادها 80 مليون مش لاقيين ياكلوا ؟
تقدر تطبق المثال ده وقت الأزمات الإقتصادية والمجاعات مثلا ؟

ربنا إدانا قرآن وكمان عقل نفكّر بيه

SaSo said...

بوست عبقرى يكسر اكتر من تابوه فى وقت واحد

اتفق معاك
كليا

ماجد إبراهيم said...

مقال رائع يا دكتور اشرف
واسحى لى اقتبسه لمجلة نحلم
http://ne7lam2010.blogspot.com/
اللى بشرف عليها
مع عدد من رسوماتك المميزة بالمرة
وياريتك تشرفنا وتقولنا رأيك فيها
وعلشان ابقى معارض في الرأي معاك
انا مختلف معاك في وجهة نظرك للسواك
اللى مصر تقول عليه مسواك وانا اعرف انه اسمه السواك

وانا لا استعمله ولا احب استعماله
لأننى لست مطالب باتباع كل سنة الرسول وفي الوقت ذاته اثق في احاديث الرسول صلى الله عليه وسلم حوله لانه لا ينطق عن الهوى
وهذه ليست ازدواجية وانما محاولة لعدم الخوض بشكل كبير فيما لا اعلمه
اثق في صحة احاديث السواك
لكنى اثق ايضا انه لايوجد سواك حقيقي في زمننا هذا

وهذا بخلاف اننى فهمت جيدا مقصدك والفارق في التعامل مع النصوص الشرعية وتناولنا لها
واوافقك فيما ذهب اليه

وتحياتى لك

Miko said...

الأخ فنان مسلم
انا بصيت على اللينكات اللي باعتها و يبدو إنك مش عارف دي تبع إيه بما إنك عمال تقول منظمة صحة العالمية و منظمة صحة البطيخ...اللينكات دي مجرد ابحاث معمولة عن المسواك، و بصفتي طبيب اسنان و بقرأ ابحاث كتير احب اقولك إن مقايس قوة البحث كتيرة و مش أي بحث يتنشر يبقى جامد ...كمان البحث بيتكلم عن الفلوريد و الكلوريد إللي بيطلع في اللعاب نتيجة استخدام المسواك...بردو احب اقولك من وجهة نظر طب الاسنان ان الهدف الرئيسي لتفريش الاسنان هو غزالة بقايا الطعام و غزالة طبقة البلاك من على الاسنان لضمان صحة اللثة و لذلك اي طبيب اسنان بينصح المريض بتاعه انه يستخدم فرشاة اسنان ناعمة و يقوم بتدليك اللثة بالفرشاة...خشونة المسواك تدمر اللثة و تزيد من امراضها

Miko said...

Miswak (chewing sticks) were used by the Babylonians
some 7000 years ago; they were later used
throughout the Greek and Roman empires and
have been used by Jews, Egyptians, and in the
Islamic empires <<======= wade7 2eno kan mogarad forshet senan 2esto7'demet le nazafet el fam 3ala mar el 3osoor

Yasmine Madkour said...

زي اللي يقولك لازم تلبس جلابيه و البنطالون و القميص حرام ..
و ما تلبسش جاكت بقي عشان الرسول مكانش بيلبسه !!!
و حاجات تموت من الضحك أو الغيظ
انت قولت الكلام كله ..
السنه هي تنظيف الأسنان و عدم غياب العقل و قراءة القرآن كانت بتتم باستئذان أيام الرسول .. كان الرسول بيطلب من حد إنه يقرأ عليه و عمرنا ما سمعنا حد قال إن الرسول كان قاعد ف مره مع الصحابه وواحد منهم قام قاري قرآن !!! من دون مقدمات ..

winner said...

اتفق معك في كثير مما قلت
و هذا يسبب جدال بين من يعمل بعلم و من يعمل بجهل
لكن اسمح لي بالتعليق على بعض النقاط
اولا فكرة انك تقول رأيك في الدين .. فالدين ليس بالرأي .. الدين اتباع و هذه قاعدة .. و لكن من المهم فهم لماذا افعل كذا .. و الاصل ان تفعل حتى و ان لم تفهم .. لان عدم فهمك لشئ لا يعيب الشئ و انما قد يكون قصور في فهمك له

اتفق معك بشدة ان القران له حرمتنه و لا يجوز استخدامه كمجرد (بركة) او ان يسبب ازعاج بالصوت المرتفع

و اتفق معك ان الغرض الاساسي من الحجاب هو الاحتشام
و الحجاب فرض واجب على كل فتاة بالغة
و الحجاب ليس فقط غطاء الرأس و انما هو زي كامل و اسلوب حياة عفيف و محتشم و محترم

لأسف .. الجهل هو السبب في كل ما نحن فيه .. فلقد ورث الناس دينهم بجهل .. و لذلك هم يطبقونه بجهل
و الحل هو ان نبدأ بأنفسنا و بمن نعول و نتعلم الدين الصحيح البعيد عن المغالاة و المغالطة

Counter