Total Pageviews

Monday, August 03, 2009

مصر تحت المجهر

وضعت نظرية خاصة بي حتى يمكنني فهم كل ما يدور حولي ويعجز عقلي المحدود عن استيعابه بشكل كامل ، دائما أرى أنه حينما تتعقد الأمور علي العقل وتتخبط الأحداث من حولنا بحيث يصبح من العسير جدا أن تؤخذ كدلائل تشير إلى حقيقة ما يمكن من خلالها فهم الأوضاع الحالية ، فعليك بدراسة العينة داخل مختبرك الخاص .
وحدة مصغيرة ومتكاملة يمكن مراقبتها بسهولة .
أنت لست بحاجة إلى دراسة حركة الأجرام السماوية بالكون كله ــ والذي من المفترض أنه لا نهائي ــ كي تضع قواعد علم الفلك ، انت فقط تحتاج إلى مجموعة شمسية واحدة ، إلي شمس واحدة وكوكب واحد وقمر واحد ، والكون كله يمكنك أن تكتشف بسهولة أنه يسير وفقا لنفس المنظومة إذا ما قمت بتطبيق استنتاجك على أية وحدة أخرى . وهذا ما اتبعته لفهم هذا اللغز المحير المسمى بمصر .
ربما كان كلامي مجرد تأملات غير صحيحة ولكنني مندهش من نتائجها المقنعة على الأقل بالنسبة لي والحكم لكم أولا وأخيرا .
ايها السادة ، أشعلوا ــ سجائركم إن كنتم مدخنين ولا أنصح بلفافات الحشيش ــ وأعدوا أقداح القهوة والشاي وأي شيء يساعدكم على التركيز .
مقدمة لابد منها ولكن يمكن تجاوزها منعا للملل .
برج ناصر والذي أطلقت عليه مسبقا اسم عمارة أشروفيان هو ما أتخذته كنموذج لدراسة مصر وفهم ما يدور بها من أمور خارج نطاق العقل والمنطق .
وأشرفستان هي برج بنهاية شارع الملك فيصل بمنطقة تطل على الشارع الرئيسي.
هي أشبه بمول تجاري ، يمكن أن نقول أنها مول سكني تتوسطه حديقة ونافورة معطلة دائما ، أربعة أدوار فقط هي دولة أشرفستان بالإضافة إلى الدور الأرضي ، ولكن عدد الشقق بها اثنان وسبعون شقة وبعض الفلل بالدور العلوي ، في أشرفستان تجد كل أنماط الشعب المصري بل والعربي أيضا ، الأرستقراطية والبلوريتاريا ومحدثو النعمة والأخوة العرب ، كل الأخلاقيات من الواعظ إلى المنحل ، كل اللهجات من بحري لأسوان لشبه الجزيرة العربية ، تصتف أمامها كل أنواع المركبات من المرسيدس إلى الفيسبا ، وبالمصعد يمكنك أن تشم كل أنواع العطور من النوع الذي لا أعرف اسمه والذي يصيبني بالدوار إلى كولونيا خمس خمسات إلى رائحة مرات عم جمعة البواب .
مستشارون وتجار وأطباء وشخصيات ذات مراكز حساسة جدا ــ يصعب على كتابتها هنا ــ وأصحاب معارض وأصحاب عمارات وأصحاب أمراض ورسام كاريكاتير وزوجته أهلهم باعوا اللي وراهم واللي قدامهم عشان يجيبوا الشقة ويفرشوا أوضتين ــ انا وزوجتي طبعا أقصد ــ و... عمال أيضا ، كيف لفني صيانة أن يحصل على شقة في دولة أشرفستان هذه نقطة تستحق تدوينة أخرى .
حكيت لكم من قبل عن حريق الشقة المجاورة ، وعن القيء اللوني الذي ضرب بالذوق العام عرض حوائط الشقق من الخارج في دلالة لإنحطاط ذوقي وبصري عام مشيرا إلى استحالة التعايش مع شعب فقد الاحساس بالفن نهائيا .
اليوم أحكي لكم قصة مهمة لنتأملها ونطبقها على مصر كلها .

الوقت صيف والمياه مقطوعة ، تنقطع بصفة دورية مستفزة سرعان ما تحولت إلى حالة شبه دائمة بحيث أصبح نزول المياه من الصنبور حدثا خارقا يستحق أن تأخد صورة بجانبه للذكرى ، ببساطة يجب استبدال الموتور ، ليس الموتور بالضبط ولكن يكفي استبدال قلب الموتور بمبلغ تسعمائة جنيه ، يبدو الأمر بسيطا ، لا مشكلة بالطبع خاصة إذا علمنا أن كل شقة مطالبة بدفع خمسين جنيه شهري وإذا ضربنا المبلغ في عدد الشقق نحصل على مبلغ محترم جدا كافي لمرتب البواب وفاتورة كهرباء العمارة وبعض أعمال الصيانة فضلا عن المبلغ الذي يتم جمعه من حين لآخر في حالة الكوارث ، وهو ما حدث بالفعل حينما تم اخباري بأن مواتير العمارة تحتاج إلى استبدال فوري ودفعت المبلغ المطلوب مائة جنيه وحصلت على وصل بالمبلغ ، كلام جميل ، المشكلة أنه المشكلة لم تنتهى والمياه مقطوعة إذن أين ذهبت النقود ؟
في المرة الأولى رحت أسأل سكان الشقق المجاورة وهالني رد فعلهم .
توك توك توك ، مين ؟ أنا الدكتور أشرف حمدي اللي ساكن في شقة واحد ، من وراء الباب : عاوز ايه ؟ المية مقطوعة عندكم يا فندم ؟ معرفش ، إحم طيب حضرتك تعرفي شقة رئيس اتحاد الملاك نمرة كام ؟ معرفش ، طب حضرتك دفعتي الميت جنيه بتاعة الموتور ؟ معرفش
ابتلعت الإهانة القذرة وذهبت للشقة المقاورة أضرب الجرس
ترررررن ، مين ؟ أنا الدكتور اشرف حمدي الخ الخ ، فتحت لي الباب سيدة ، عندكم ميّة ، المية مقطوعة يعني ؟ معرفش استني لما اشوف كده ، تشوف ايه بنت اللذينا مش فاهم ، يعني ما غسلتش وشها ؟ ما بتستحماش ؟ مافيش طبق مواعين غسلته النهاردة ؟ رجعت لي وقالت : ايوة فيه مية بس ضعيفة قوي وساعات بتقطع ، طيب يا فندم مش نشوف حل للمشكلة دي ؟ مش احنا دفعنا الفلوس المطلوبة ؟ آه يا دكتور بس حنعمل ايه ؟ آدينا مستنيين المية تيجي .
هممممممم
الشقة الثالثة ، صوصوصوصووووووو ، خرجت لي سيدة وانا مش عارف ايه حكاية السيدات في العمارة دي ، ترتدي من غير هدوم ، ملابس داخلية بترتر ، احمممم ، انا أشرف اووووف حمدي اللي ساكن في الـ .. يعني الشقة الـ ... اوووف ، عندكم ميييييية ؟؟
قالت وهي تعدل من وضع قطعة الملابس الداخلية العلوية ، آه عندنا ، هي بتيجي وتقطع بس من شوية كانت موجودة ، اتفضل طيب
شكرررررااااا يا فندم
ما تتفضل بقولك
ربنا يخليكي متشكر قوي ميرسي خالص ثانكس باااي
في النهاية وبعد المرور على عدد كبير من الشقق وجدت انني أنا الوحيد الذي يشكو انقطاع المياه ، وعلمت أن السبب هو أن مياه شقتي تأتي من الخزان الثالث والذي يبدأ ملأه بعد الخزانين الأول والثاني وبالتالي أكون أنا وعدد محدود من الشقق من أكثر المتضررين في حالة انقطاع المياه ، أول من تقطع عنهم وآخر من تصلهم ، ولكن هذا لا ينفى أن المياه تنقطع وتستمر منقطعة لساعات طويلة جدا لجميع السكان والآن انقطعت تماما وتأتي ساعتين في اليوم ، طبعا تحدثت مع البواب وتشاجرت معه فجاء بأولاده ليضربونني ، لا معنى لأن يخرج لي أولاده بالفلنات الداخلية فاردين أجسامهم ملوحين بأيديهم فاشخين أفواههم عن حركات صوتية مضجنة إلا أنهم يريدون ضربي .
كان لابد من مواجهة رئيس اتحاد الملاك
دززززززززززززز
مين ؟ أنا الدكتور زفت اللي ساكن في المخروبة دي شقة واحد
فتح لي رجل محترم من بتوع زمان ، هاديء ومبتسم وبشوش وابن ناس جدا ، بدأت في الصراخ
انا قرفت بقى ، دي مش عيشة ، قلتوا ادفعوا دفعنا ، فين المية بقى ؟ انا حجيب سباك وأعمل ماتور لوحدي وحهد المدخل وأكسر رخام العمارة وأحط مواسيري براحتي وعلى مزاجي ، دي مية يا عالم حرام يعني ، انا مضطر وبالتالي مش عاوز حد يعترض ولا يفتح بقه بكلمة لما أجيب السباك وماحدش يقوللي بتكسر ايه وبتعمل ايه ؟ اييييه ؟ بركب ميّة مقطوعة .
تكلم بهدوء وشرح لي التالي
أولا : سكان العمارة في قمة السلبية ، يمكنهم تحمل انقطاع المياه ولا يمكنهم المساهمة بمبلغ للوصول إلى حل دائم بالرغم من أن اكثرهم مليونيرات أو على أقل تقدير ناس معاها فلوس ومستريحة وواخدة شقة لا يقل ثمنها عن ربع مليون جنيه بالإضافة الي الفلل والتي يبلغ ثمن الواحدة منها أكثر من مليون جنيه .
ثانيا : لم يتم دفع فاتورة كهرباء العمارة والتي تغذي المواتير والأسانسيرات منذ ثلاثة أشهر وأيضا السكان اغلبهم ممتنعون عن الدفع ولن يدفعوا مليم ألا لو انقطعت الكهرباء بالفعل ، لابد وأن تحدث المصيبة أولا .
ثالثا : كثير من سكان العمارة لهم علاقة ما بالشرطة ، مباحث ، وكلاء نيابة ، ضباط ، لواءات ، وجميعهم يمتنعون عن الدفع حتى دفع الاشتراك الشهري الخمسين جنيه كنوع من البلطجة ، فهم اعتداوا أن يحصلون على الخدمات مجانا وبالتالي يجب أن يدفع الشعب وينعمون هم بالنتيجة ، حتى لو انقطعت المياه والكهرباء لن يدفعوا وسيضغطون على رئيس اتحاد الملاك ليحل المشكلة بمعرفته وسيتركوا باقي السكان يدفعون وحدهم وإلا .... هي سايبة ؟ هي فاوضة ؟ طبعا فاوضة ! ورئيس اتحاد الملاك خايف ويدعونني للخوف أيضا كنصيحة أبوية .
رابعا : اكتشفت أنني الوحيد الملتزم ، الوحيد الذي يشكو ، الوحيد الذي لا يقبل بأوضاع خاطئية ، إذن فأنا مجنون أو مختل عقليا أو أهذى بكلمات لا معنى لها . واخدين بالكو من الاتهامات دي ؟
صمت تماما ، وجلست أكتب هذه التدوينة غارقا في عرقي ولزوجتي ، تكونشي دي مصر يا عبلة ؟
سلبية شعب ؟ وفرعنة حكومة ؟ وثورية مجنون ؟ وملابس داخلية بترتر ؟ ومسئول مش مسئول ؟ وبواب بلطجي ؟ وبرج ناصر في عهد غير ناصري ؟

14 comments:

أسماء علي said...

حضرتك الوحدة المُصغرة لمصر كلها ياأشرف
الملتزم اللي بيدفع اللي عليه هو اللي اللي مش بتوصله الخدمات العامة القائمة على الدفع بالتساوي بين أفراد الشعب
و عشان شعبنا مليان بلطجية كتير
و مليان انت مش عارف انا مين و ابن مين
بكل بساطة دول بيوصلهم الخدمات على قفا الملتزمين
و لا عزاء للمحترمين و لا الملنزمين في زمننا الرائع جدا لدرجة اللزوجة الناتجة من عدم وصول الخدمات بالطبع

و سلملي على الالتزام اللي موديكم ف داهية

Unknown said...

احجز اول تعليق

ولاء النعماني said...

كنت من فتره قريت مقال للأستاذ بلال فضل شديد الشبه من هذه التدوينه
كان بيحكي عن أن حد سأله ليه مصر بقت كده
فرد عليه بلال وقاله روح عماره كذا ف الشارع الفلاني ف المنطقه الفلانيه وانت تعرف
ولما لقى الراجل مش مصدق
خده بنفسه وراح بيه
برج من أبراج المعادي
ثمن الشقه فيه يتجاوز الاتنين مليون
ومتعلق على بابا الاسنسير ورقه بتطالب السكان بدفع فلوس النور

ف نفس المقال استاذ بلال بيعد أمثله كتير لعمارت مشابه - وبيحكي عن انزارات متعلقه على مداخل وبوابات العمارات بأسماء السكان " المتخلفين " عن الدفع

وف حالات تانيه كانت الافتات بتحوي عبارات قريبه ف المعنى من " خلوا عنكوا دم - حسوا شويه - طلعوا من تحت البلاطه يا منايفه " وهكذا

د - أشرف

هي دي مصر يا عبله

هرطقة said...

يا عم ما قلنا من زمان هاجر

معلش لو فيها رخامة
ممكن عنوان الشقة الى بترتر

أم كوكي said...

:((((
NO COMMENT !!!

مولتو said...

صباح شريف
عمارة اشروفيان او اشرفستان دى كلها صور بسيطة جدا للى بيحصل على ارض الكنانة وبالرغم انى مش شايل مسئولية بيت واسرة زيك الا انى لامس الحال وعارف هزار البوابين ده بنفسى من تعاملاتى معاهم من خلال والدى ، المهم نقطة الشرطة اللى مبتدفعش دى فى وفى يعنى مش كلهم يعنى ، هى صحيح فوضى بس نصيحة خليك بعيد واعمل زى مقلك الراجل الكبارة بتاع العمارة
وبعدين فى النهاية انت نسيت شعارنا فى البلد ولا ايه
شد الحشيش على صدرك غيره مايفيدك
وادى دقنى يامصرى اهي لو عدلها سيدك
ههههههههههههه متنساش الشعار بتاعك

Anonymous said...

دكتور اشرف
انا بدراوى اللى علق عندك على النوت فى الفيس بوك
عشان كدة مسبتش تعليق هنا

تحياتى

Hamed said...

و الله يا اشروف بدال انتة الملتزم الوحيد يبقى ملكش حل غير انك تنفذ تهديدك و تجيب موتور و تقدم على عداد ماية لوحدك .. الموضوع ده هيكلف شوية .. شويتين تلاتة الحقيقة .. بس في الآخرر هتعيش عيشة محترمة ، و على فكرة ممكن تجيب سباك و تاخد الماية من الخزان الأولاني أو التاني بدل التالت ، مفيش حد هيقولك بتعمل ايه بدال انتة اللى هتدفع مصنعية السباك !
سؤال أخير .. باعتبار إن الحاج ناصر شخصية حقيقية ، و إن البواب اسمه فرايداي فعلاً ، و إن الفسقية عمرها مشتغلت ، يا ترى نفهم من كده إن موضوع الترتر ده بحق و حقيق ؟؟! مجرد فضول انساني برئ !

Unknown said...

صباح الخير يا دكتور اشرف
او نقول يا مهراجا اشرف هههه فاكر صورتك في اضحك للدنيا ؟

بص يا سيدي الموضوع بباسطة اللي ليه ضهر .... بس بقولك ايه انت متفضلتش ليه ;)

ما علينا نرجع تاني هههه حتي لو عملت اللالي و جبت سباك ممكن يطلبولك البوليس ! عشان بتشوه المظهر الجمالي للعمارة !!!! بيتهيالي لازم تعمل انقلاب انت و بقية سكان العمارة بتوع الخزان التالت ! هو ده الحل

Saker said...

:D , طب وليه ؟ مايمكن تكون انت الغلطان

بس غريبة , المدونة بقت مليانه شكاوى يادكتور أشرف , زهلل شويه وانسى الدنيا

البلاوى فى كل حته , مش فى مصر بس

احمد ربنا :]

ربنا يحرق فيصل said...

اقسم بالله انا اتخنقت زيك بالضبط
انا في الزفتفيصل دا من 3 سنين. بندفع كل شهر 70 جنيه للبواب و اكتشفنا ان في ناس بالهبل ما بتدفعشز و العمارة عليها ديون للمية عشر تلاف جنيه و بتقطع كل يوم و الاسانسير هالك و مكتوب عليه خطلا الموت لازم تدفعوا و مفيش. انت اتكلمت عن المية, مش عايز اقولك الكهربا.
موضوع غني او فقير مالوش دعوة, هو لو شخص معفن مش هيدفع حتي لو معاه فلوس قد كده

Spirit said...

أنا مش حتكلم كتير .. بس يا ريت تفكر فى الكلام ده حتى لو ما نشرتوش
أرجوك تدور على حاجة كويسة فى حياتك و تكتب عنها..

Mahmoud البطراوى said...

انا قريت التدوينه من كام يوم
بس حبيت اجى اقراها تانى بعد حوار تحديد سرعه الانترنت فى مصر دى

قلت اشوف تانى وحده اشروفستان المصغره عشان أتأكد ان مفيس امل
:D

سلام يا فنان

معاذ رياض said...

انت ليه مكبر الموضوع؟ دي اسمها سياسة الاستخدام العادل للميه. لما تتجاوز الحد المسموح لك و هو كوبايتين ميه في اليوم الحكومة تقطع عنك الميه كما هو متعارف عليه في كل دول العالم..

وسلم لي على البواب والحاجة أم ترتر

Counter