Total Pageviews

Wednesday, August 12, 2009

سياسة الاستهبال الكامل



لقد فاض الكيل ، وطفح ، وطرطش ، وأغرق ما كنت أملكه من بقايا إتزان وموضوعية في طرح هذا الموضوع .
إليكم الخبر من موقع جريدة المصري اليوم
أو يمكنكم مباشرة قراءة هذه الفقرة العبقرية
من جانبه قال الدكتور عمر بدوى، الرئيس التنفيذى للجهاز القومى لتنظيم الاتصالات، إن الحكومة لن تدعم خدمات ترفيهية وهواة تحميل الأفلام، وبالتالى فإن من يرغب فى التوسع فى تحميل ملفات الفيديو من على الشبكة الدولية عليه أن يسدد قيمة ذلك.
هل هذا كلام يخرج عن شخص يحتل منصب يحمل الاسم التالي : الرئيس التنفيذي للجهاز القومي لتنظيم الاتصالات ؟ أية اتصالات ؟ وأي رئيس ؟ وأي جهاز قومي هذا ؟
سيادة فخامة عظمة معالي الرئيس التنفيذي للجهاز القومي لتنظيم الاتصالات يعتبر الفيديو خدمة ترفيهية خاصة بهواة تحميل الفيديو ، هواة التحميل لا هواة المشاهدة حتى ، المحملاتية ، الداونلودرز ع الفاضي والميان ، أنا يعني من الآخر بالنسبة للريّس هاوي تحميل ، لما بلاقي عندي وقت فراغ كده وفاضي ومش ورايا شغلة ولا مشغلة أقوم ايه ؟؟؟ ، داخل كده ع النت وقاعد محمل عشرة جيجا كده أسللي وقتي وانا بتفرج على التحميل وهو بيتحمّل .
قمة في الاستهانة والاستهتار بشباب مصر ، بل أن هذا التصريح ينم عن جهل مرعب يستحق وقفة بل وقفات ، ليست وقفات مجازية وإنما احتجاجية .
وأتكلم عن نفسي لأنني لست موكلا من أحد ، بالنسبة لي فأنا أعمل بمجال الرسوم المتحركة ، عملي هو أفلام الكارتون ، الفيديو هو عملي وليس هوايتي ، حينما أشاهد فيلما فهو بالنسبة لي تدريب وليس ترفيه ، حينما اعود منهكا بعد ثماني عشرة ساعة من العمل يوميا بشركة الإنتاج أحاول ان أشاهد فيلما أو دروسا تعلمية على اليوتيوب أو مرفوعة على مواقع استضافة ملفات مثل الرابدشير أو اقرأ كتابا الكترونيا أو أقوم بتحميل تحديثات عملاقة لبرامج الجرافيك التي أعمل بها ، أنمى من مهاراتي بشكل منتظم ومستمر ووفقا لخطة لست على استعداد أن اغيرها وفقا لأية سياسة مهما كانت عادلة أم ظالمة أم جائرة ، لست على استعداد أن أتخلى عن ثقافتي بمجال عملي ، اعلم نفسي بنفسي من خلال شبكة الإنترنت ، اتابع آخر تقنيات صناعة الأفلام والمؤثرات الخاصة والمونتاج والأنيميشن ، اتواصل مع فنانين عالميين وأستفيد من خبراتهم بمجال الرسوم المتحركة الذي أصبح على حافة الإنهيار بمصر إن لم يكن قد انهار بعد ، وبالتالي اتعامل مع كمية ضخمة من البيانات ، انا وحدي وبطولي ، بدون شبكات وبدون وصلات وبدون سكس وبدون لعب ، بتعلم يا ناس ، بشتغل يا جدعان ، هو فيه ايه ؟؟؟ العلم حرام دلوقتي ؟ كخة ؟ قلة أدب ؟
بعد كل ما قلته وشرحته وفضفضت به لكم ، يتهمني معالي فخامة عظمة السيد المحترم جدا الرئيس التنفيذي للجهاز القومي لتنظيم الاتصالات بأنني من هواة تحميل الأفلام وهواة الترفيه واللعب والمياصة لأنني استهلك حجما أكبر من المنصوص عليه بسياسة الاستخدام العادل ، فهذا كلام لا أقبله ويستوجب الرد عليه


النقطة الثانية والمهمة والمستفزة والتي ربما تصل إلى حد الوقاحة إن لم تكن تتخطاها بالفعل هي مسألة الدعم
دعم ؟؟؟ دعم الانترنت ؟ انت تدعم الإنترنت ؟ يا راااااجل ؟ بجد ؟ معقول ؟ النت بتاعنا ده مدعوم ؟ يعني زي رغيف العيش كده أبو خمسة صاغ واللي عمري ما شفته بيتباع في حتة ؟
خط انترنت خمسومية واتناشر يا عالم ، خط معفن تبع سنترال المريوطية الزبالة ، خط حقير وضيع منحط بأبطأ سرعة انترنت في مصر ، السرعة التي ألغيت من كل مكان في العالم إلا مصر وبعض الدول الفقيرة ، أدفع في مقابله خمسة وتسعين جنيه في الشهر وتقوللي مدعوم ؟
طب مش حرد عليك
حسيب الناس ترد ، والله ما حقول كلمة تانية في النقطة دي
في التدوينة الجاية حقولكم بقى ليه القرار ده ، ليه اتحط وعشان ايه اتقرر واشمعنى اتعمل . واللي يعرف ممكن يسبقني ويقول في التعليقات .
سلامو عليكوا

24 comments:

TAFATEFO said...

اللي قريته انه علشان يحد من كام تشاتنج اللي لغت الاتصال الدولي تقريباً .. حتى اللي بيتصل دولي دلوقتي بيتصل بـ في أو آي بي تيليفون أو بـ سكاي بي

اللي اتقاللي انهم بيشتروا باندويدث .. ولقوا ان أكتر من 70% منه بيستهلكها أقل من 5% من المشتركين .. فقالك وليه .. نخلي المستخدمين العاليين سبارك ونشوف الـ مين بتاع الأغلبية .. ونزود عليه شويه ونخليه إجباري .. وكده نوفر 50% من الباندويدث للمشتركين اللي هيسيبوا الوصلات اللي هتتلغي ويجولنا .. ونجيبها من فوق علشان متبقاش في منافسة ومحدش يقدر ستغنى عننا

فودافون واتصالات بيقولوا انهم بيتفاوضوا لإلغاء القرار أو زيادة السعات .. وفودافون خفضت الـليميتس اللي كانت حاطاها وخلتها زي الباقيين لكن خدمة العملا بتقول ان الليميتس دي على الـ بي تو بي فقط

في جديد؟

mido said...

لا ايه التشويق ده

هههههههه

امتى التدوينة التانية ؟

adel said...

انا مبطل شتيمة
انا مبطل شتيمة
انا مبطل شتيمة
انا مبطل شتيمة

هواة تحميل ايه ياراجل يا .....ولا بلاش

انا بنزل افلام بالهبل فعلا انا بتفرج علي افلام اكتر ما باكل او اشرب

بس لبيه عشان بتعلم سيناريو و اخراج و ده شغلي

هو مش عاوز يدعم الانترنت و مسمعش ان معهد السينما بيرفض اللي زي و كمان المنتجين ولازم اتعلم عشان اخد مكاني

هواة مين بس
انت شكلك متعرفش حاجة عن مصر او شبابها
متوقع اننا بنزل افلام اباحية مع ان الدش مليان و ببلاش و متعبش نفسي في تنزيل

الراجل ده شارب حاجة ولا بيحكم منصبة من برة بالماسنجر

أشرف حمدي said...

تفاتيفو
عليك نوووووووووور
وكمان حاجة نسيتها
دلوقتي بيفكروا إن الجيجا الزيادة تكون بفلوس ، يعني حيلموا فلوس بالهبللللللللل

ميدو
إقرأ تعليق تفاتيفو

عادل
الله ينور عليييييك
انت حاسس بيا وعارف ، انا برضه بدرس اخراج
ونفسي اخرج رسوم متحركة بنفس مستوى اخراج الأفلام اللايف عشان كده بدرس اخراج ومونتاج وسيناريو وضيف عليهم بقى التحريك والأنيميشن والمؤثرات الخاصة
انا بستهلك بالعبيييييييط جيجابايتس وكله في شغلي

amksep said...

بجد لازم نعمل حاجه

أنا متغاظ بجد ومش عارف أعمل إيه

أنا جاهز للإشتراك في أي إحتجاج من أي نوع يا جماعه

Anonymous said...

يا جماعة ممكن متتهمونيش بالغباء
وتشرحولي تعليق طفاطيفو شرح مبسط عن كدة شوية؟

سقراط said...

انا احب اضيف
الي جانب انها كانت رقاصة كانت بترقص الصراحة يعني
انا بجد عاوز اقول حاجة تانية
بالنسبة للهواة
هواة التحميل ومش هواة الفرجة
مع كامل احترامي لكل الناس
وهو مال اهله
حتى لو هاحمل سكس طول الخمسة وعشرين ساعة
هو الفكرة انهم يزنقوا ع الناس وخلاص
لازم نحس بيهم حوالينا فى كل حتة
مانتنفسش
ولا حتى فى الهوا
فى الفراخ
اللى هو الدشاش
هاياخدوا الفراخ كمان
الموضوع مش موضوع نت وسعة وكيلو لحمة ولا بايت
الموضوع ان دى حاجة تخصنا بالاساس
يعني رأينا اهم رأي ممكن يفصل فيها
ومن غير وساطة فودافون ولا غيرها
وما اخذ بالقوة لا يسترد الا بالنت كت

Mohamed Emad Hegab said...

الواقع ان الموضوع بقى سيء جدا و شايف النناس كلها ماعندهاش امل
و اللي طالع على شركات الخدمات ان ده قرار سيادي.. يعني خلاص ..انا مش عارف اجدد اشتراك الرابيد شير ولا لا.. انا مبرمج مش بس مبرمج لا وويب ديفيلوبر
يعني حياتي على النت بس ولاد الـ.... دول لو قلتلهم انا عاوزه لشغلي حايقولولك ااااه شغلك ... ماشي ادفع طالما بتكسب منه بقى يا خفيف
الحل ايه ؟؟ الحل هو فضحهم في كل مكان
الحل كما قال احد الاصدقاء الشكوى لمنظمة حقوقية و جمع توقيعات عن طريقها لإلغاء القرار و نشر الغسيل القذر امام العالم .. ولما نشوف اخرتها معاهم ايه

TAFATEFO said...

موضوع الجيجات الزيادة بفلوس ده .. أعرف ان اللي عمله اتشتم .. وان تي اي داتا ان مكانتش شالت التنويه ده فهي هتشيله

هما بيقولوا اللي الليميت بتاعه يخلص وعايز يبتدي الشهر الجديد يبتديه .. يدفع اشتراك الشهر ويبتدي الشهر بتاعه في أي وقت .. ودي سرقة .. هما ضاعفوا السرعة وكده هياخدوا على استخدامنا الطبيعي على الأقل خالص ضعف الإشتراك

MedZag said...

انا احب اضيف تجربتي الشخصية
اول ما وصلت انجلترا من يجي 10 شهور
اول حاجة عملتها هي خط النت لقيت الاسعار كالاتي ( حاحولها بالمصري عشان التسهيل )
الدونجل (عن طريق شبكة الموبيل) حوالي 90 جنيه لسعة 5 جيج داونلود
الارضي المنافسة عليه خلته باسعار عجية
البرودباند عن طريق حاجة زي المصرية للاتصالات ب 50 جنيه في الشهر و السرعة 8 ميجا وما فيش حد داونلود
طبعا في ارخص بس يحدد الدونلود
لو اشتركت في شبكة تلفزيون كابل يدخل البرودباند ببلاش
مع الوضع في الاعتبار
ان مرتب الموظف المتوسط بيبقي تقريبا 15000 الي 20000 جنيه تقريبا والاغلب الزوجين بيشتغلوا وده اللي بيخليهم يعرفو يعيشو
لان تقريبا القيمة السوقية للجنيه المصري يساوي الجنيه الاسترليني
يعني هنا الخمسة عيش بجنيه استرليني
يعني لو خدنا خط بي تي اللي هو زي المصرية للاتصالات المفروض يبقي ب 6 جنيه مصري او اقل بس طبعا كل الاسعار دي من غير رسوم التوصيل وايجار الخط التليفون الشهري

Unknown said...

سلامو عليكم
دكتور اشرف اقولك علي سبب كمان ؟
السرعات الجديدة محتاجة تغغير الكابلات البحرية و مستخسرين

صعبان عليهم يغيروا الكابلات فبيقولك نخف الاستهلاك و نسيب الكابلات القديمة

انا اخر بوست عندي كاتب فيه كل حاجة و عامل بانر صغير عشان الموضوع ده و حاطط فيديو قناة المحور يا ريت متتفرجش عليه عشان دمك ميتحرقش

TAFATEFO said...

طارق كامل قال انه لغى القرار بس هو أجله شهرين

بس خلي بالكوا علشان بيلعبوا اللعبة الوسخة المعتادة .. علشان يمرروا النصب يقولك لا مساس بالمشتركين الحاليين .. علشان ميبقاش في اعتراضات

لازم الناس تقف ضد الحدود الجائرة حتى لو طبقت بعد شهرين على المستخدمين الجدد

Israa El-sakka said...

بجد أهنيك على المدونة أنا أول مرة أزورها و أهنيك على الكاريكتور و فعلا دي تتسمي سياسة الإستهبال على فكرة خدمة الإنترنت و المحمول في مصر من أغلى ما يمكن و من أعفن ما يمكن و أي حد راح بره بيحس بده يعني مفيش الراوتر اللي بيقع و تتصل بالشركة و تتحايل على اللي جبوهم الكلام ده مش موجود دقيقة الموبايل في مصر غالية جداً جداً
يعني من الآخر إحنا مهريين نصب في البلد دي

تحياتي و أتمنى أن تشرفني بزيارة المدونة

Asmaa mahaba said...

عبيد احسانهم تقول ايه بيتكلم وكانه بيدفع من جيبه مش كفايه الفلوس اللى بيسرقوها مننا كمان بيمنوا علينا انهم بيدونا من فلوسنا دا لو ادونا
ايوه يا دكتور اشرف متقولش كدا احنا ناس هجاصه فيديو ايه يا عمونا دا احنا عالم تافهه خلينالهم الحاجات المهمه يورونا حيعملوا ايه
عم المهم اللى عامل الزير ابو ليله

Anonymous said...

القرار اتلغى يارجاله قولوا هيييييه
http://forums.myegy.com/thread53131.html

ميجبها الا رجالتها والوزير اترعب ولغى القرار بطريقة دبلوماسية شيك متاثرش على منصبه ولا كان شئ حصل

Anonymous said...

خدعة القرار الإسترشادى
--------------------------------------
للقرار الإسترشادى هدفى حاجتين
1-جمع عملاء جدد يعتمد عليهم لو قلنا هانقاطع مرة تانى
2-بعد الشهرين يقولو التجربة نجحت و هاتطبق على الكل و أنتم زى غيركم
يعنى من الأخر بينيمونا و الحل أستمرار الحملة و محدش جديد يشترك و وقف الخدمة مؤقتا و عدم الدفع مقدم
عشان هما كده بينيمون
منقول

Anonymous said...

نص القرار من الجمهورية
http://www.algomhuria.net.eg/algomhuria/today/local/detail00.asp

اقروه وشوفوا الخديعة الكبرى من داهم صبرى الاتصالات

براعم said...

احد المشاركين فى حملة الفيس بوك قال تعليق مميز حبيت انقله لانه هو ده بالظبط اللى لازم نلتزم بيه الفترة الجاية: نص التعليق من الفيس بوك

الواضح من السياسه التي قالها وصرح بها وزير الأتصالات أن عندهم النيه الرغبه في تطبيق تلك السياسه ولن يتراجعوا عنها ونحن من سنعلمهم كيفية العدول عن أي قرارات تضر بمصالحنا ...

المفترض أن نفعله ؟؟؟

1- الأستمرار في الحمله ضد الحكومه وشركات الأنترنت حتي يلغي القرار نهائياً
2- أيقاف أي أشتراكات جديده
3- تحميل أكبر عدد يمكنك تحميله من الملفات ...حتي يعلموا ما مدي قدرتنا التحميليه من علي الأنترنت
4- التهديد بالفصل ، والفصل الفعلي للخدمه بداية من الشهر القادم حتي لا تتجرؤ تلك الشركات علي هذا مره أخري
وهذا رجائي من كل من يقرا تللك الرساله

r said...

الصراحه قرارات تنرفز وفيها استخفاف فعلا
انا ان كان عن نفسى لا احمل غير الكتب
وللاسف سرعه النت عندى شئ سئ جدا جدا
وبتقول انه نت مدعم الصراحه دى جديده
امال لو مش مدعم هيكون ازاى
الواحد صبره نفذ فعلا مع حكومتنا الذكيه دى

حتى النت الحاجه الوحيده والمتنفس لكثيرين
طبعا مش زهق من الجناين والفسح ولكن لعدم وجودها فى محيط المكان الى اسكنه
فالنت فعلا افضل شئ للتواصل مع عالم تانى وان كان ترفيه دا شئ بردوا فيه حريه كل واحد يعمل اللى يعجبه ما دام مش بيأذى حد تانى
بس واضح ان الحكومه عايزانا نعيش فى قمقم تانى
هى تموتنا بقنبله نوويه صنع فى الصين كلنا وتريحنا وتستريح احسن

Unknown said...

I guess you should read this

طارق كامل : سياسة الانترنت الجديدة "إسترشادية" وستطبق على المستخدمين الجدد كتجربة لمدة شهرين فقط http://tinyurl.com/qjee9b

Amira said...

الموضوع ده حارق دمي جدا و اللي حارق دمي أكتر انه مفيش فايدة
مهما اتضايقنا و عبرنا و زعقنا و قلنا مفيش فايده

مش ممكن كمية التهريج اللي بتحصل في البلد دي

ده مسلسل هزلي
خيبة و تخلف و استهبال و قلة ادب و زي ما تقول قول

تفتكر نعمل ايه علشان نوقف المهزلة دي؟؟

بحييك على الكاريكتير جميل و مبدع جدا
أستأذنك أن أضعه في مدونتي

soreal said...

it all about information free flow.

the internet is the biggest revolution humanity have ever experienced
whether be it P2P (legal or illegal), activism, entertainment, education; they only want to make it availabile to as fewer ppl as possible to retain the social and political status quo with as minimum interferance/backlash as possible..

i also would be highly surprised if anti piracy entities, backed by USA et. al. dont have a hand in it

7aga takhalof said...

we howa malo ana men howat el tanzeel wala la2, we howa malo mesh fahem? anazel aflam anazel al3ab ana 7orr be feloosy, mafesh balad feha el habal da walahy

Anonymous said...

السلام عليكم احييك علي مدونتك واحترم كل ارائك حتي لو اختلفت مع بعضها
المهم انا بس حبيت اقولك خبر قريتة من كام يوم علي المصري اليوم وهو ان وزارة الاتصالات تهدد شركات المحمول علشان يغلوايرفعوا سعر الدقيقة ويبطلوا الخدمات الهبلة اللي عملوها وخلوا الناس توفر فلوس في رمضان ويقللوا استخدام التليفون الثابت وطبعا مكاسب الشركة ودة مخالف للروح السائدة في مصر وهو ان الشعب لازم يدفع دم قلبة في كل حاجة ومياخدش اي حاجة
حاجة تحرق الدم
ودة اللينك علشان انت شكلك مش مصدقني ومستني تعليقكالجميل باسلوبك المميز

http://www.almasry-alyoum.com/article2.aspx?ArticleID=225832

تحياتي

Counter