Total Pageviews

Tuesday, November 21, 2006

قرررب قرررب

تعالى عالج أسنانك هنا في
المركز التخصصي لعلاج وتجميل الأسنان
وخد ضمان سنة ع اللي عمله وكمان شوف
وسائل التعقيم بنفسك

ليست فقرة إعلانية سخيفة عن مسحوق غسيل .
ولا هو أسلوب جديد للدعاية عن منتجات الهلال والنجمة " الشيء لزوم الشيء "
إنه إعلان عن مركز جديد لطب الأسنان بشارع الملك فيصل محطة الطالبية , شاهدته وأنا في طريقي الى المقهى الذي أحرق به همومي علي أنغام كركرة الشيشة . ولأول مرة أتسطل بدون معسل !
طلبت من السائق أن " يركن علي جنب " لأتأكد من أنني لازلت في وعيي , وكانت هذه الصورة التي إحتاجت الي مجهود عظيم مني بالفوتوشوب كي تظهر بهذا الشكل , لأنني قمت بتصويرها ليلا بدون فلاش .
لن أعلق .
أترك التعليق لكم
وأتمنى أن يجيب أحد علي سؤالي :
هل وصل الأطباء في بلدنا الي هذا الحد ؟ هل وصلت البطالة الي هذه الدرجة التي تدفع الأطباء الي هذا الأسلوب الرخيص ؟
مجرد سؤال

12 comments:

أشرف حمدي said...

مش قادر أصبر
نفسي اعلق :)
اللي بيقولك ضمان سنة :
لازم المريض يعرف كويس قوي ان
ضمان حشوة البلاتين بيكون من 5 سنوات الي مدى الحياة
ضمان طقم الأسنان سنتين علي الأقل
ضمان السنة الأكريل وهي من أسوأ الخامات في طب الأسنان هو 10 سنوات
ضمان السنة البورسلين هو 20 سنة الي مدى الحياة
يعني كأني بالظبط بالظبط ببيع لك كمبيوتر وبقولك ان الضمان خمس ساعات !

ALiaa said...

ههههههههههه
مافيش زيارات مجانية بعد عدد معين من الزيارات؟
هما هيعلموا العيانين التعقيم و الانفكشين كونترول بالمرة؟؟؟ أرجو سرعة الرد

AHMAD said...

شوف يا ابني

اهم حاجه يبقي الشغل بضمير

واهم من ده توافر قطع الغيار

وسلملي علي الضمان

بس مقولتليش

البورسلين نوعه ايه ؟

!يكونش بتاع الست يسرا ؟؟؟

Mohamed Hashem said...

المشكلة لا تكمن فى الدكاترة فقط يا دكتورى العزيز.. نفس الشىء يحدث فى كافة المجالات الأخرى.. لقد سمعت عن مهندسين معماريين يبيعون التصميم المعمارى بمائة جنيه للمسقط الأفقى..و مئة و خمسون للمسقط و الواجهات (يا بلاش).. مع الأسف سنوات الدراسة الطويلة لم تفلح إلا فى تخريج أجيال تقوم بتبعئة الشمس فى زجاجات أو أى شىء من هذا القبيل...

نشاطركم الأحزان
محمد هاشم

أشرف حمدي said...

Aliaa
تصدقتي وتآمني بالله . مرة لقيت جهاز مايكرو وييف في عيادة طبيب أسنان بدلا من الأوتوكلاف . يعني ممكن قوي يكونوا جابيين صندوق صفيح طالع منه زراير ويقوللك شوف وسائل التعقيم بنفسك ! هو حد عارف حاجة في أي حاجة ؟!

Ahmed
يسرا مين ؟ ... ده بتاع عمرو الشريف يا راجل . بلاش تظلمهم .

Rasha said...

لأ لأ مش قادرة اصدق
ربنا يستر علينا
ربنا على الي وصلو الطب للدرجه دي

مش عارفه اضحك ولا ابكي

بس يلا حخدها من باب التقدم السريع والتطور

:)

makhlouf said...

أشرف
كنت مستنى اشوف رسم
مش صورة

أشرف حمدي said...

معلش يا مان
المرادي الصورة تكسب !

3ashor said...

قرب قرب قرب معانا دكتور نص عمر حافظ اربع روشتات بيتنقل بينهم على العيانين بتوعه ولو جالو مريض فى عيادته بمرض مستعصى هيقوله لا المرض ده مخدناهوش....استنى نص ساعة اشربلك سجارة (مش من علبتى طبعا) الحق اكون ذاكرته


من خيالات متوقعة لواحد فى بكالريوس طب...و ما خفى كان انيل

وينكى said...

قرب قررررررررب يابيه
كله عندنا ببلاش
خد فكره وركب ضرسين بكره
قرب يا بيه ... بدلة حماده بربع جنيه

وعجبى

eldoctor said...

انا دكتور عناية مركزة .. يعنى الضمان بتاعى ما ينفعش .. الضمان الوحيد .. هو الضمان الالهى...
فكرة حلوة الضمان ..
30000 كيلو .. والزيت و الفلتر و دوا الكحة مجانا

Anonymous said...

يا عم انت غيران منه بس عشان هوه مفتح ودماغه مش في المدونات والكلام اللي مايكلش عيش حاف ده على فكره انا برده دكتوره اسنان بس تخصصت في مجال تطلع فيه عين اهلك شغل ومصاريف وبعدين في الاخر متاخدش ثلاثه مليم حذر يبقى ايه ؟....ز
............
.............
صح جراحة وجه وفكين ارمي من دماغك يا دكتور ارمي كله عند العرب صابون

Counter