فضائحي الخاصة

مرر لي واحد من الناس تاجين ,
لا أقصد أنه مجرد واحد من الناس بل أقصد أنه " واحد من الناس " وليس أي واحد من الناس وخلاص , أقصد أنه " واحد من الناس " . ما علينا !
ولكنني سأرد علي تاج واحد منهم حتى لا يمل الناس من طول التدوينة هذه المرة .
سأختار التاج الثاني حاليا :

خمس حاجات ماحدش يعرفهم عني خاالص !

لقد اخترت الأصعب . ولكن لا بأس سأحاول

أولا : أنا الذي تسببت في جرح مستر سركاريا ! ما حدث باختصار أنه كان لدينا مدرس أحياء في أولى ثانوي اطلقنا عليه اسم سركاريا حتى أنني لم أحاول أبدا معرفة اسمه الحقيقي , وبصراحة كان راجل غلبان جدا ومش عارف احنا ليه كنا شياطين كده , وبالرغم من كوني طالبا وديعا إلا أنني لم استطع مقاومة رغبتي الخبيثة في العبث فوضعت إطار حديدي مخلوع لنافذة الفصل خلف الباب مباشرة بطريقة معينة حتى يسقط علي الأستاذ سركاريا حين يدخل الفصل ويغلق الباب خلفة , بالفعل وقع الاطار علي قدمه وتسبب في جرح بسيط نسبيا , صعب عليا وأخرجت منديلي القماشي ليربط به قدمه الدامية , وشكرني جدا ! لكنه لم يرجع لي المنديل ابن اللذينا لحد دلوقتي .

ثانيا : أحيانا كثيرة أقوم بتشغيل أغنية علي الكمبيوتر وأقف في وسط غرفتي متخيلا مسرحا وهميا أمامي وكأني أنا اللي بغني , ويا سلام بقى لو كنت لابس بدلة الخطوبة التي تجعلني فاتنا .

ثالثا : أحدث نفسي كثيرا بصوت عالي , ماحدش كان يعرف الجنان ده بس أديكم عرفتوا .

رابعا : نومي متقطع دائما , لا أنم أكثر من ساعتين لأستيقظ دقيقة ثم أعاود النوم .

خامسا : أتشاجر أثناء النوم , ممكن جدا ألاقيني صحيت علي صوت شتيمة وخناق وأكتشف ان أنا اللي كنت بشتم واتخانق , بس ساعات كمان بضحك وأنا نايم لما أهلك من الضحك وأصحي علي صوت هاهاهاهاهاهاهاها

بس خلاص .
دلوقتي جه دور الناس دي عشان أمرر لها التاج الفضيحة ده

عاوزة أتجوز

وينكي

عقرووب

مكسوفة

د.ميشيل حنا