Total Pageviews

Sunday, March 11, 2007

خط الفقر الأمريكي

قدمت أوبرا حلقة عن المواطنين الأمريكيين الذين يعانون الفقر المدقع كما يقولون , حيث تم وصفهم بأنهم تحت خط الفقر بما يعادل تسعة آلاف دولا سنويا من دخل الفرد الذي يصفونة بالفقير .
حلقة مليئة بالبكاء والدموع حتى أوبرا نفسها لم تتمالك نفسها وبكت تعاطفا مع إحدى الحالات .
ولكنني كنت أضحك بوحشية ان كان للضحك أن يوصف بذلك , أضحك حتى تؤلمني عضلات بطني , أضحك حتى يحمر وجهي ويكاد تنفجر عروقه .
يا ولاد ستين مش عارف ايه .
من يصفونه بأنه تحت خط الفقر شاب نظيف منمق الشارب واللحية علي هيئة دوجلاس , أحمر الوجه وشعره أحمر ناعم يبدو أنه معتنى به ويتقاضى خمسة دولارات في الساعة عن عمله بوقت كامل أي حوالي ثمانية ساعات علي الأقل يوميا .
تعالوا نحسبها عشان نشوف الغلبان ده بياخد كام في الشهر .
ثمانية ساعات مقابل خمسة دولارات عن كل ساعة يساوي اربعين دولارا في اليوم أي ألف ومائتي دولار شهريا وهو ما يعادل بالمصري ستة آلاف وستمائة جنيه .
الرحمة يا رب .
هذا هو من يعتبرونه تحت خط الفقر الأمريكي .
أمال إحنا نبقى تحت خط إيه ؟
أكيد أحنا مش بنى آدمين أساسا .

10 comments:

عباس العبد said...

احنا مش تحت الخط يا استاذ
و بعدين الفقر مش عيب
و لا حرام
احنا فوق الخط
قاعدين على الخط و مربعين و مفيش خط احسن من خط
طبعا احنا قاعدين على الخط
بس الخط بالطول
يا لئيم

Mohamed Hashem said...

الفقر مش عيب..

بس مهواش شرف برضه...

تحياتى للجميع

أشرف حمدي said...

فعلا الفقر مش عيب
الفقر حرام
:)

IRC President said...

لو كان الفقر رجلا لقتلته

أشرف حمدي said...

هذا صحيح
ولكن في بعض الأحيان يجعلك الفقر تقول :

لو كان الفقر رجلا
لأكلته !

ميشيل حنا said...

ما تنساش ان الحياة في أمريكا غالية جدا. الفلوس دي يعيش بيها ملك في مصر لكن في أمريكا الوضع مختلف عن كده جدا.

Yasser Hussein said...

طول ما أحنا بنحسبها بالجنية المصري هنفضل حاسيين اننا فقرا
لي صديق عايش في امريكا بيقول لى ان سندويتش الطعمية في أمريكا ب 3 دولار

معنى كده ان 3 دولار فى امريكا يعني نص جنية عندنا ده لو لسه في مطاعم في مصر بتقدم سندويتشات طعمية بنص جنية

تحياتي

ana ga3an said...

يا فندم انا اعرف واحد حط خط الفقر دة في ساندوتش واكلة لعيالة
ودولتي هما قاعدين تحت حبل غسيل

أسامه يوسف said...

بعد زيادة عدد المواطنين تحت خط الفقر
قررت حكومتنا المبجله فرض ضريبه على الخط وصرح مصدر حكومى أن حكومتنا المبجله قررت خصخصة الخط
وفقهم الله

وينكى said...

ماتنساش ان مستوى المعيشه هناك مرتفع جدا يا فندم
واللى ماعندوش تأمين صحى ولا اشتراك فى التموين او فى المواصلات بيتسوح
دا اللى بيروح للدكتور هناك بيبقى غنييييييييييييييي
ومش اى حد بيقدر على تكاليف التعليم
موضوع اننا مش بنى ادمين دا مفروغ منه ماقلناش حاجه
بس بطل قر على الناس لحسن الحاجات دى بتلف تلف وترجع على دماغ صاحبها
معلش على الغيبه لكن انا كنت مسافره
سلاموز

Counter