Total Pageviews

Saturday, April 14, 2007

ماذا أقول لولدي ؟


إذا شاء القدر قريبا أن يكون لي ولدا فماذا أقول له ؟
سؤال يلح علي منذ أن فكرت في الزواج .
سؤال لا يحلو أن يعلن عن نفسه إلا في اشد لحظاتي احتياجا لقليل من الاسترخاء بعد نهاية معاركي اليومية في العمل .
حقا ماذا أقول له وأنا نفسي لم أعد أفهم , بل ربما فهمت إلى درجة يعصب عندها التصديق فضلا عن إيجاد وسيلة للتعايش مع الظروف المحيطة بي .


هل أنصحه بالاهتمام بدروسه مثلا ؟
(( خش ذاكر وبطل لعب يا ولد ))
بأمارة إيه ؟ أنا نفسي بعد ست عشرة سنة من الاجتهاد والمذاكرة وجدت نفسي طبيبا غير مرغوب فيه , واحدا ضمن مئات الآلف من الأطباء في كل مكان حتى أنهم أصبحوا مطمعا لأصحاب المراكز التي تخلع الضرس بخمسة جنيهات لتعطيك أجرا لا يتجاوز 200 جنيه شهريا . هل أخبره بالحقيقة المرة ؟ إذا أردت أن تفلح في هذه البلد فعليك أن تكون إما مطربا أو ممثلا ؟

هل أقول له بأن السرقة حرام ؟
((اللي يسرق يروح النار))
الكل يسرق , وإذا لم تسرق فكيف تعوض ما يتم سرقته منك طوال الوقت وتحت كل المسميات ؟ كيف أقول له بأن اللي يسرق يروح النار ومن يسرق في بلدنا بيروح مارينا ؟

هل أقول له بأن التدخين ضار جدا بالصحة ؟
ولماذا أحرج نفسي هكذا لأنه بكل بساطة سيخرج لي لسانه ويقول : وهو في حاجة في بلدنا مش ضارة بالصحة ؟
الناس تشرب سيراميك وتأكل حمير وخضار مسرطن ومهبب وتشم عوادم طوال النهار والليل أيضا , حتى النهار لم يعد نهارا بفعل السحابة السوداء , وماء الصنبور مسمم , ورغيف الخبز مطعم بالمسامير . هي جت علي السجاير , ده والله السجاير أنضف من أكلنا وشربنا وهوائنا .

وإذا وصل إلى قدر من الثقافة يوما ليسأل : هو نظام الحكم في مصر إيه ؟
هل أقول له : ديموقراطية , اشتراكية , رأس مالية , ملكية , مهلبية ؟

أتمنى أن يكتفي بالسؤال التقليدي : هو أنا جيت إزاي يا بابا ؟
سأقول له : جيت كده هو .
!!

10 comments:

SomeOne said...

ههههههههههههههههههه

متألق كالعادة يادوك


انا عن نفسي نفسي ادخل ابني التعليم المصري

كنوع من الاحتكاك بالواقع و اكتساب خبرات في الحياة

بس ميهمنيش يذاكر ولا يفلح

الاهم ان برا التعليم انمي هواهبة

واذرع فيه فكر وثقافة ودين

وبعد كده اسيبه يخبط في الدنيا و تخبط فيه

بس اهو كلام والله اعلم ساعة الجد الواحد ح يعمل ايه

ولو سألني سؤال صعب

حقوله معرفش
ومن قال لا اعرف
...

•«ρяoιd»•™ said...

اشرف حمدي

الساخر دائماًُ

المبدع في كاريكاتيراته

بجد بجد انا عن نفسي معرفش

و اساسا مش عايز اجيب اطفال يشوفوا اللي احنا بنشوفه ده

لأني اساسا لسه متجوزتش

بس و لو افترضنا اني هتجوز

و اجيب عيال

يبقي هيطلع عينهم ده اكيد و مش بمزاجي

ده سياسه عليا يا عمونا

تحياتي

فبركة said...

معنديش اى تعليق..كل كلامك واقعى

Anonymous said...

هههههههههههه

والله...و الله هم يضحك....كلامك بيوجع و يضحك و الله

nohamy said...

قوله اللى تقدر عليه
أضحك عليه زى ما ضحكوا علينا

Marwa Friday said...

دكتور أشرف أحييك ومتابعاك من أيام اضحك للدنيا ..أنا ياللى لسة يادوب متخطيه العشرين بتعقد كل ما افكر بعد ما اتجوز ..ويكون لى أطفال إن شاء الله..هربيهم ازاي"مع العلم بأني تربية "!..مش عارفة ..ربنا يسترها علينا جيل ..المشكلة على رأى عم محمد صبحي ..ان ماكان شريفا ..أصبح وجهة نظر قابلة للمناقشة ..!..أقولك رباعية افتكرتها لعم صلاح جاهين بمناسبة ذكراه بيقول فيها ..:
لو فى سلام فى الأرض وطمان وأمن
لو كان مافيش ولا فقر ولا خوف وجبن
لو يملك الانسان مصير كل شئ
ده انا كنت اجيب للدنيا ميت ألف ابن
عجبى! شفت يا عم أشرف هى دى الخلاصة ..!ا

أشرف حمدي said...

مروة جمعة
أشكرك جدا يا مرة علي تعليقك وتشريفك المدونة
انا قريت رباعيات صلاح جاهين كلها بس مش فاكر الرباعية دي
ميرسي جدا بجد عليها
تحفة

david santos said...

Hello, my friend!
Thanks for you work, is fantastic, and have a good weekend

أشرف حمدي said...

David Santos
Thankx alot for your comment.
really thankx

3lool said...

طبعا كل كلامك صحيح

وهو اساسا في البلد دي الافضل متخلفش

اصلك هتزود الهم همين

ولا عمره هيطلع بني ادم مسلم محترم مهما عاملت

اصل انت بتحارب لوحدك

قدام مين بقي

قدام الاذاعه والتلفزيون
قدام الدش والتليفون
قدام الحكومه
قدام الصياعه
قدام التخلف
قدام الفرص المعدومه

معتقدش هتقدر تكسب في الاخر قدام كل دول

ربنا يحفظنا ويحفظ اولادنا من بعدنا

بوست جميل تحياتي

Counter