كسر الحلقة

هممت بفتح الباب ولكنه استوقفني :
ــ كام دول يا كابتن ؟
ــ تلاتة جنيه .
ــ تلاته ايه ؟, هات اتنين جنيه كمان
ــ لأ تلاتة كويس .
فتحت الباب ولكنه جذبني من معصمي الأيسر .
ــ لأ ماهو انت مش طالع من هنا الا لما آخد فلوسي .
ــ طب اطلع بينا علي أي أمين شرطة .. واللي يقول عليه أدفعه .
أغلقت الباب , وتحمس هو للفكرة .
ــ قوي قوي ... كده انت تمام , مادام قلت كلمة "أمين" يبقى أنت بتفهم .. أيواااااه ... ماشي .
استرخيت في مقعدي وأنا انتظر اللحظات المشوقة التالية , دار بي الميدان ثم عاد الي نفس المكان تقريبا .
ــ لو تحب كمان نروح القسم قوي قوي ... نروح لو عاوز
ــ طيب ... أنسى موضوع الأمين وبينا ع القسم بقى ... فكرة كويسة
ــ أمال مربيلي دقنك وعامللي فيها شيخ يعني .
ــ لأ دي عياقة حضرتك .. اسمها دوجلاس .
ــ عياقة آه ... طيب ... هو انا طالع آكل عيش ولا أحرق دمي مع الناس .
ــ انا كمان طالع آكل عيش . ثم انت بتزعق ليه ؟ ما قولنا رايحين القسم واللي يقولوا عليه هناك أدفعه انشالله لو قالوا عشرين جنيه .. مش بتقول حقك ؟.
ــ طب أنا مش طالع ع القسم ... وأنا لو عاوز أضربك هنا وآخد حقي منك حضربك ... انت فاكر ايه ؟
ــ طب اضربني . انزل واضربني بقى . وحتروح القسم برده في الآخر .
فجأة ألقى بالنقود تجاهي وصرخ :
ــ أمشي ... خد فلوسك وامشي أنا مش عاوز أشوفك ولا عاوز أجرتي .
أعدت النقود الي جانب المصحف وأنا أبتسم ( لأ خد فلوسك .. التلاتة جنيه برده ) , فتحت الباب وهممت بالخروج فدفعني بعصبية , أمسكت بمعصمه:
ــ بص حتمد ايدك يبقى نطلع ع القسم أحسن .
هممت بالركوب مرة أخرى
دفعني مرة أخرى وهو يصرخ ( بقولك امشي ... مش عاوز أشوفك ولا عاوز فلوسك ) .
ــ طب مش ماشي وحتروح ع القسم .
جاء أولاد الحلال ليلطفوا الموقف . رجل عجوز بلحية بيضاء عملاقة . ( حصل خير )
ــ انا نفسي أعرف انت مش عاوز تروح القسم ليه ؟ خايف من ايه ؟ ها ؟
(حصل خير)
(معلش يا أستاذ)
أنطلق السائق فوجهت كلامي للرجل العجوز .
ــ عاوز ياخد خمسة جنيه من مستشفى أبو الريش بشارع قصر العيني لحد ميدان الجيزة .
( معلش حصل خير )

أكثر ما يثير حنقي هو الظلم , هو الشيء الوحيد القادر علي أن يخرجني من شخصية الخجول الهاديء لأفترس من أمامي مهما يكن ومهما كانت العواقب .
هذا السائق مظلوم من أمناء شرطة المرور مما يفرضونه عليه من (فردة) وإلا فهي المخالفة (التمام) وسحب الرخص , ويحاول تعويض ما يتم سرقته منه بسرقتي أنا .
لذا فأنا اتبع مبدأ (كسر الحلقة) , الكبير يسرق الصغير والصغير يسرق الأصغر حتى يصل الأمر في النهائي علي أنا المواطن , لا شأن بي لما تم سرقته منك أو وقع عليك من ظلم , لا شأن بي لأمين الشرطة وغلاء البنزين وازدحام الشوارع , كان بإمكانك أن تقول لهم (لا) وأنت لم تفعلها لأنك خائف من عصى المقشة التي زرعوها لك بمؤخرتك , أما أنا فسأقول (لا) وسأكسر الحلقة عندي . لن تسرقني لأن هناك من سرقك , فلتقف أمامهم كما وقفت أنا أمامك وقل (لا) ولا تخشى شيئا كما لم أخشى أنا شيئا . كان يمكنك ضربي بالفعل , ولا أنكر أنني كنت خائف من هذا وإن تظاهرت بالهدوء وأنا اعرف انك تقدر علي فعلها حتى بميدان عام . ولكن حتى لو فعلتها فلن أغير من موقفي .
هذه هي وجهة نظري في الإصلاح .
اذا كان الشالوط الكبير يأتي من الأكبر فالأصغر فالأصغر حتى يصل الشالوط في النهاية الي أنا المواطن الغلبان علي هيئة استغلال وسرقة ونصب وبلطجة من تجار وسائقين وموظفين حكوميين , فمن حقي أن أبدأ أنا شالوطا عكسيا صغيرا ربما يصل في النهاية إلي الأكبر فالأكبر .
أنا أقول لا لسائق التاكسي الذي يريد سرقتي
من واجب السائق عندئذ أن يقول لا لأمين الشرطة الذي يريد ابتزازه
ومن حق أمين الشرطة أن يقول لا لرؤسائه
ومن حق رؤسائه أن يقولوا لا لرؤسائهم .
ربما لا يفعلون .. ولكنني فعلت وكسرت الحلقة عندي

ما رأيكم في هذه الفلسفة ؟