حرب إمبابة
فخر الصناعة المصرية بعالم ألعاب الفيديو جيم عبارة عن لعبة عالمية شهيرة تم استبدال ملفاتها الصوتية المفتوحة بكلمات مصرية سخيفة كما تم استبدال واجهة اللعبة بأخرى مكتوبة باللغة العربية ثم اجتاحت أسواق رصيف الاسطوانات المنسوخة ومنتديات الانترنت باعتبارها أول إنجاز مصري عبقري بعالم تصميم الألعاب.
بلا وكسة .. بلا قلة أدب .
والمستفز أنهم يزعمون حقوق الملكية ! حقوق ملكية عمل مسروق أساسا ! أي بجاحة تلك ؟
بلا شك أنه لا يوجد سوق ألعاب عربية نظرا لعدة عوامل قد تحتاج مني إلى مدونات كاملة ولكن يمكن اختصارها في التالي :
أولا لا يوجد عمل منظم في مصر وهو شرط أساسي لبرمجة الألعاب .
ثانيا لا توجد خبرة لدينا في هذا المجال شديد التعقيد مما يجعل الوصول الي مستوى عالمي يتطلب بالضرورة البدء من الصفر حيث ألعاب باك مان وغيرها ثم نتطور شيئا فشيئا لنصل الي مستوى جيد أي بعد خمسين سنة علي الأقل من الآن .. مشكلتنا اننا نريد القفز بسرعة في مجال لا خبرة لنا به لنقلد الأعمال الموجودة الآن وبالتالي إما نسرق انتاج الغير وننسبه لأنفسنا أو نصنع شيئا كارثيا مثيرا للسخرية .
ثالثا تفنن الشعوب العربية في القرصنة والحصول علي كل شيء مجانا وبالتالي ستكون الخسارة فادحة لو تم انتاج لعبة فيديو عربية لأنها ببساطة سوف تصبح علي كل جهاز كمبيوتر فيكي يا بلادنا العربية مثل ألبوم عمرو دياب الجديد
رابعا الناس عاوزة تاكل عيش ... العاب ايه وهباب ايه انت كمان يا أخي ؟
انتظروا مني بعض النماذج والصور حول مشروعات كنت قد بدأتها ولم أكملها نتيجة الإحباط الأزلي الذي أعاني منه . في التدوينة القادمة أحدثكم عن لعبة رفعت اسماعيل التي لم تكتمل , ولعبة مصرية حاولت أن أقدم بها أسلوبا جديدا للدعاية والإعلان , و ...
ولكنها تدوينة أخرى !
تحديث هام
قمت بإضافة بوستر اللعبة الأصلي
وهذه وصلة لتحميل النسخة التجريبية منها
Heavy Weabon
20 comments:
بس انا اعرف ان كان فيه كام حاجه اتعملت بمستوي محترم جدا
انا شفت صور منها
يمكن ما تابعتش الموضوع عشان انا مش ده تخصصي اصلا بس علي الاقل كان فيه شركه او شركتين عملوهم شباب وكانوا ماشيين في الاتجاه ده
بس المشكله الحقيقيه هي البيع فعلا في المنطقه العربيه اللي مش بتشتري الكلام ده
وبتفضل تكركه
حلوه اللعبة دى قوى بس الكلام آللى فيها بيئه شويه و أحنا عاوزين الأطفال يطلعوا بيتكلموا أسلوب أفضل من الجيل الحالى
و شكرآ يا أشرف على اللعبه
يا نهار ايبض يا اشرف
ده أنا تليفونى نور لما طلع عليه رقمك و مش حصلت من زمااااااااااااااااان
:D
1-فى لعبه قريت عنها فى الدستور من فتره فى صفحة الألعاب حسب كلام المحرر اللعبه مصيه مائه بالمائه وستجتاح الأسواق قليلاً وهى فى مرحلة النهايه
اللى يغيظ إن اللعبه اسمها إيه
بوحه هلاوس مفتوحه
أه والله يعنى يوم مايعملوا لعبه يعملوا بوحه وحسب وصف اللعبه بوحه يتجول فى الشارع ومعاه أسلحه سنج وسكاكين
يعنى نقل مسطره من
vice city
يعنى من الآخر عمرنا ماهننفع فى حاجه
2-صحيح انت بتقول لعبة رفعت إسماعيل
ده انت لازم تكملها وتلايمنى عليها
3-صحيح يا دوكتور انت زعلان منى ولا إيه
ليا ملحوظة يا أشرف على النقطة الثالثة ، وهى إن البرامج و الألعاب المضروبة اللى إحنا بنستعملها فيه ناس برة الوطن العربى هى اللى بتعمللها "الكراك" و "الكى جينيريتور" لكن ما أعتقدتش إن فيه ناس من عندنا هى اللى بتعمل الموضوع دا (لإن المبرمجين المحترفين عندنا قليلين جدا على ما أعتقد) ، عشان كدة لو (و خد بالك من كلمة لو) اتعملت لعبة مصرية أو عربية صعب يتعمللها كراك ، إلا إدا وصلت لأسواق بلاد برة طبعا !-
على فكرة موضوع اننا نبدأ من الصفر و باك مان غير صحيح لأن أدوات تطوير الألعاب متوفرة و الكثير منها مجاني و توجد بعض الألعاب العربية الرائدة و التي تتأخر خلف مثيلاتها من الألعاب الغربية بخطوات بسيطة مثل لعبة قريش
http://www.quraishgame.com/quraish_download.htm
و التي تقع في مرحلة متوسطة من ناحية المستوي بين لعبة age of empires 2 و age of empires 3
و هناك لعبة تحت الرماد http://www.underash.net/ua_index.html
و التي تندرج تحت تصنيف الألعاب القتالية و مستواها جيد جدا
و يجب أن نتذكر أن هذه الألعاب تم تطويرها من قبل شباب هواة يحبون عملهم و ليس لديهم الإمكانيات الجبارة لأستوديوهات التصميم الأجنبية
العرب يمكنهم أن يتميزوا و يتفوقوا على الأجانب .فقط اذا أتيحت لهم الفرصة و الإمكانيات
و أعتذر على الإطالة
يا عمي الليلة مش كده .. ما جيم فاللي عملت الدوري المصري جيمات .. و الشباب الجديد الطالع بتاع السري دي عملوا برضو جيم لشخصية من شخصيات محمد سعد .. و عاملين سوفتوير كمان بياخد من البدلة بتاعة السينسورز.. و عندك ناس مصممين العاب تانيين في مصر بيشتغلوا و بيعملوا العاب برا و لو تحب اسم او اسمين نجيبلك يا باشا ، ولا هو لازم توري ان الشعب مفهوش حد بيفهم يعني و تعمل نفسك الشاب الاشرف حمدي ..
و بيني و بينك يا ابو الدكاترة لو عايز الحق و المستحق فالمفروض البشرية اللي في البلد دي ملهاش دعوى بالجيمز من اصله .. الشعوب اللي بتلعب جيمز دي شعوب كلت و شبعت و دلدلت رجليها على الكنبة و قالت يا عالم احنا اهوه .. محدش يقدر يقولهم تلت التلاتة كام .. و لو اني عرفت ان الشباب الياباني مش بتاع جيمات مع انهم بيصنعوا جيمات بالعبيط .. يعني من الاخر كده جود لك
على فكرة في لعبة أتعملت ثري دي أسمها بوحة
الشخصية اللي لعبها محمد سعد وبصوته
والمهمة بتاعته الصراع مع ولاد ابو اسماعيل
لو عملت بحث ع اليو تيوب
عن لعبة بوحة هتلاقي ديمو ليها واتعمل عنها برنامج في قناة دريم موجود أيضاً ع اليو تيوب
حكاية استبدال ملفات الصوت دي كنت بأعملها أنا وأصحابي زمان بشكل خاص وليس للبيع والترويج .. حاجة بيتي يعني
بس مع الأسف في ناس بتبدل الأصوات بألفاظ خارجة قال يعني نوع من الاستظراف
مع الأسف سوق الحاجات دي في مصر مش زي بره
وبيحتاج انتاج ومصاريف ورواتب محترمة للمبتكرين اللي بيعملوا الالعاب دي
وده غير متاح عندنا
أتمنى أن يتاح في المستقبل القريب
خالص تحياتي الفنية
طب فين اللينك بتاع اللعبة العالمية المشهورة اللي سرقوها و عملوها حرب امبابة ؟
..
انت كده قدمت اتهام بدون دليل يا كابتن !
انت قولت رفعت اسماعيل و لا ودني بتفوت ؟؟؟؟؟؟؟
ده انا مش هسيبك
رفعت اسماعيل بتاع ما وراء الطبيعة ده افضل شخصية روائية شفتها في حياتي
ده كارثة
كم اتمنى وجوده
معندكش بوسترات له ؟
انت بتتكلم جد؟
فعلا لعبة اسمها حرب امبابة؟
والله يا مصر ام العجايب
بس يا اشرف احنا لازم نفتخر برضه بصناعة حاجة زي كدا
يعني لعبة
وفي نفس الوقت
بنخوف الاعداء
لانها اكيد لعبة استراتيجية
بأقولك
اخبار الملوخية ايه؟
أولا اسمحول لي أن أبدأ بالرد علي
Ghost
الذي يشكك في مصداقية التدوينة
وأعتذر عن غياب النقطة الهامة التي أثارها
اللعبة اسمها
heavy weapon deluxe
وهي موجودة علي الوصلة التالية لتجربتها
http://www.popcap.com/games/heavyweapon
كما قمت بتحديث التدوينة لتأكيد المصدر
تحياتي
kalam
أنا نفسي انخدعت في المستوى الجيد والمحترم من خلال الصور الملتقطة لهذه الألعاب حتى انني كتبت موضوعا دسما في مجلة أون لاين قديما عنها فوصلتني إحدى الألعاب هدية من شركة لبنانية وبعد تجربتها تبين لي انها لعبة فاشلة بكل المقاييس
Sara Daw
أشكر تشريفك المدونة .. ومبروك علي دخولك عالم التدوين
أسامة يوسف
بوحة ليست لعبة جيدة .. وأكرر أن البداية يجب أن تكون من الألعاب البسيطة ثنائية الأبعاد حتى يفهم المبرمجون أسلوب برمجة الألعاب الصحيح ثم نتطور الي الألعاب ثلاثية الأبعاد البسيطة أيضا وشيئا فشيئا ربما نصل إلى مستوى مقبول
بالنسبة لرفعت اسماعيل فأدعوك لمتابعة تدوينتي القادمة لأنني سأتكلم عنها بالتفصيل
وأنا مش زعلان منك ولا حاجة .. الشغل مجنني اليومين دول .. فكرني اعمل تدوينة عن القطاع الخاص واللي بيعمله فينا
تحياتي
محمد ذكي عبد الرحمن
ملاحظتك مهمة فعلا وأحييك عليها بشدة .. لقد أضافت الكثير للموضوع
anonymous
دعني اختلف معك .. لعبة قريش هي لعبة فاشلة ولم يتم بناءها بشكل صحيح وبها مئات الأخطاء التي تحتاج الي تدوينة منفصلة لعرضها باختصار كما لا يجوز مقارنتها ابدا بـ
Age of empires
بأي حال من الأحوال لأنها حتى لا تصل الي مستوى التجارب المبدئية للعبة متوسطة فضلا عن طرحها بشكل تجاري
لعبة تحت الرماد كتبت عنها ولقد بذل فيها مجهودا كبيرا نظرا لأنهم حاولوا تصميم محرك رسوم خاص بها أي انهم بدءوا بالفعل من الصفر وكنت اتمنى أن تظل التجارب فترة أطول قبل البدء في عمل لعبة وطرحها تجاريا لأنها بالطبع لن تقوى علي المنافسة بهذا المستوى
سعيد انحراف
لعبة بوحة أيضا ينطبق عليها نفس الكلام السابق وان كانت تبدو الي حد ما افضل من غيرها .. يا جماعة لازم نطلع السلم واحدة واحدة .. انها نفس مشكلة أفلام الأكشن المصرية .. نحن نحاول تقليد أفلام هوليوود والوصول الي مستوى مقارب فجأة فتخرج النتيجة مشوهة ومبتذلة كما نرى
الفنان ياسر حسين
أتفق معاك .. موضوع استبدال الملفات الصوتية موضوع محبب جدا وظريف جدا ولكن ما حدث في لعبة حرب امبابة هو سرقة علنية وغبية لأن اللعبة المسروق منها هي لعبة مشهورة جدا في الأساس
كما انهم نسبوا التصميم والبرمجة لأنفسهم علي نحو مستفز
كما اتفق معك بخصوص أن السوق المصري والعربي بشكل عام من الصعب ان يرحب بألعاب فيديو مالم يكن هناك فشلا أكيدا سواء من ناحية الانتاج أو التسويق
طهقان
أشكرك علي التعليق
بس تفتكر حتى لو اللعبة ماكنتش مسروقة كنا برضه حنقدر نخوف الأعداء ؟ هههههههه
تحياتي
مش بحب اللعبه اصلا
>< لغاية دلوقتى مسمعتش حد بيتكلم عن لعبة بركان الغضب ., http://octwar.com ... اللعبة دى أنا شغال عليها من سنه أنا و اصحابى .. اللعبة بتحكى عن المجموعة 39 قتال ... ابحثوا عنها فى جوجل وانتوا تعرف اللعبة بتتكلم عن إيه ... المهم .. بخصوص بوحة فأنا و على الرغم من ان القصة زفت ... غلا ان اللعبة ذات نفسها كويسه من الجانب التقنى ...وده الجزء الإيجابى فى الحكاية ... و بصراحة اللى عاجبنى أكتر وأكتر إصرار الفريق ... تصدقوا انه خد مساعده من الحكومة واتقبل فعلا فى الحضانات الإلكترونية ؟؟؟؟... أخد مساعدات من الحكومة مبتجيش بالساهل برضة >< ... على العموم أنا كنت من متابعين كاريكتوراتك من أيام ماكنت بتشتغل مع ميشيل حنا فى مجلة أونلاين >< ... بصراحة كنت متخيلك حاجة تانية خالص بما ان اسمك ملحوق بكلمة دكتور
أحمد صقر
لم أعثر علي لعبة بركان الغضب .. كانت كل النتائج عبارة عن بوسترات وخلفيات ولم أجد حتى لقطات من اللعبة
أحييك علي مجهوداتك ولكن اتمنى ألا تكون مثل ألعاب حرب أكتوبر التي انتشرت منذ فترة وكانت ضعيفة للغاية
يهمني جدا أن تتواصل معي وان احتجت لأي مساعدة فأنا في الخدمة
عموما ارسل لي نماذج وسوف أقدم لك تقريرا مفصلا عن اللعبة وان كانت تستحق فسوف انشر التقرير بمجلة عالم الكمبيوتر
تحياتي
لأنها لا تزال فى طور التصميم Design
وليس طور التنفيذ .. على العموم الفريق يخطو خطوات واسعه الآن
... ان شاء الله لعبة بركان الغضب هتكون مختلفه كليا أولا اللعبة ثلاثية الأبعاد من المنظور الأول .. بالإضافة إلى ان إمكانيات الفريق فى الجرافيك جيدة جدا..
ان شاء الله فى ظرف يوم سأقوم بتجميع كل المواد التى قد تفيدك فى كتابه التقرير بالإضافة إلى بعض الصور الحصرية إن أردت ^^&
السلام عليكم
اولاً اعرف حضرتك بنفسى
انا مخرج لعبه بركان الغضب والتى هة فى رأئيى اول لعبه عربيه حقيقيه فى هذا المجال
بالنسبه لأن حضرتك لم تجد اى بينات عن اللعبه فدا لان اللعبه تحت التصميم الأن
وانا اعدك انه لو صارت الأمور بإذن الله كما هو مخطط لها ستكون لعبه شيقه جيده وراقيه المستوى ولن تكون مثل باقى الألعاب
اما بالنسبه للعبه بوحه و حرب امبابه
فأنا انظر نظره من جهه مختلفه إليها وادرسها على انها ظاهره اولاً بالنسبه لبوحه
فأنظر اليها من منظور الجاح فى البرمجه والجرفكس واعطاء مثالاً ليحتذى به على الرغم من فشل القصه
اما بالنسبه لحرب امبابا فأنا انظر لها بمنظور المبرمج الذى يستطيع التطوير وما الى ذلك
اما غير ذلك من الشواهد والأقوال التى قمت سيادتك بطرحها انا متفق معك مليون المئه ولكن لدى شيئ ما يدفعنى الى ان ابحث عن نقط القوه لأستغلها إن وصلتك فكرتى
اسف للأطاله وارجو ان استفيد من خبره سيادتك العاليه
عزيزى كاتب المقال احب اوضحلك
اولا : انا احمد على اللى قومت بالتعديل على اللعبه
ثانيا : احب اعد عن نفسى كل شبها من الشبهات اللى سيتك وصفتنى بيها
ثالثا : انا لا حرامى ولا ارهابى ولا قتال قتله زى ما انت مصورنى انا حسيت انى اسرئيلى
رابعا : ستك بتتكلم تقريبا ما شوفتش اللعبه عزيزى كاتب الموضوع انا اولا حاطط ملف داخل اللعبه بيحتوى على كافه حقوق اللعبه للشركه المصممه طبعا ستك ما شفتوش لانك كاتب الموضوع تقريبا من مجرد كلام او نقل وما فىخلافه سيبك خلينا فى المهم الملف دة بيحتوى على كافع بيانات اللعيه ومين مصصمها طبعا شركه بوب جميز وانى احتفظ بس بحق التعديل و تظبيط الداتا بيز وبس
بعد كدا احب اشرحلك الفكرة من البدايه انا قولنا خطرت فى بالى الفكرة دى قولت اعدل على اللعبه وادخل فيها بعض الؤثرات واصوات واعدل فى الداتا بيز بتعتها بعيد كل البعد على انى اسرق او انهب زى ما سيتك وصفنى او انى اكسب ارباح من وراها سيبك خليك معايا بعد كدا يا عزيزى المحترم روحت بدات العمل عليها ولما خلصتها اللعبه كانت موجودة على الهرد عادى طبعا اللعبه اتنقالت من هرد لهرد لحد ما لقتها فى الخليج العربى كله وفى نواحى مصر كولها وانتشرت اسرع من اى حاجه وطبعا اسحاب اللنت كافييه كسبوا منها جدا للان الناس كانت بتلعبها ومنها كلوا منها عيش وسمعت كمان ان فى ناس بتبعها اسطوانات الاسطوانه ب2.50 زى اللى بيحصل فى الجيزة الوكلام دة
وانا طبعا بعيد كل البعد عن اى حاجه واحب اقولك ان انا لا دخل فى جيبى نص جنيه لالالاء ولا بريزة لالالاء علشان اكدلك كمان ولا شلن
وبعدين يا ريت الاخوة اللى بتتكلم تتكلم عن نفسها تقدر تقولى يعنى ايه خلينا بعيد عن مجال الجرافكس واللاعاب والشغل دة وخلينا نتفرج عزيزى اذا كان مواصفات مخك ضعيفه ياريت ما توصفش بيها بقيت الناس
انا معايا فريق كامل نقدر نعمل بيه شركه انتاج العاب لكن طبعا عيزين تمويل كبير جداا
بعد كدا يا عزيزى احب اوضح حاجه كمان ليه ما تكلمتش عن الفكرة اكنها حاجه ممكن نتقال بيها اللى افكر اكبر واحسن تقدر تقولى كون الواحد يقدر يعدل على الحاجه + ليه بكره ما يقدرش هوة اللى يبنيها انت بتتكلم على بلد لسه مش بتعرف تصنع عربيه لسه مش بنعرف غير نقفلها بس
وبعدين هوة انت يا عزيزى سايب كل الموضيع اللى فى البلد المدمرة اللى احنا فيها وجاى تتكلم على الموضوع دة تصدق ان واحد من جنوب افرقيا هوة اللى قالى ان فى ناس هنا بتتكلم عن اللعبه
عزيزي أحمد استوديو
دعني أبدأ أولا باقتباس من المنتدى الذي نشرت عليه اللعبة
اتفضل معاليك اقراه
حرب أمبابه v1.8 تم التصميم بواسطه أحمد استديو 2005 . جميع الحقوق محفوظه لمجموعت احمد استديو
وا فريق التصميم .
يا جماعه اللعبه دى من تصميمى وانا جبتهلكم علشان خاطر عينكم
اللعبه جامدة وتستحق وانا والله تعبت فيها جدا
عايز اعرف رائيكم فيهاا
وانا جبتلكم الوصله علشان خاطر عينكم
اتفضل كمان شوف الجملة دي
حرب أمبابه
v1.8
تم التصميم بواسطه أحمد استديو 2005
. جميع الحقوق محفوظه لمجموعت احمد استديو
وا فريق العمل
انا مش حعلق :) كفاية الاقتباس ده
ثانيا : انا جبت اللعبة فعلا ولم أجد بها اي ذكر لحقوق الملكية للشركة الأصلية ، حقوق الملكية عزيزي تظهر في
splash screen
وليس مجرد ملف داخل مجلد اللعبة
ثالثا : انت تحدث صحفي متخصص بمجال تكنولوجيا المعلومات ومصمم ألعاب فيديو ورسام كاريكاتير ومصمم ثري دي ، وأنا أدرك تماما ما اتحدث عنه
رابعا : من قال انني " ساي كل حاجة في البلد وقاعد ماسك في حضرتك " ممكن تتابع مدونتي ، واضح انك ما قرأتهاش
قبل ان تحاسبني ، حاول أن تخفي هذه الوصلة لأنها مسيئة جدا لك
http://www.bramjnet.com/vb3/showthread.php?t=35577
تحياتي
Post a Comment