Total Pageviews

Monday, November 12, 2007

قمة الاستفزاز


قمة الاستفزاز
لما واحد يدخن قدامي في الأوتوبيس المكيف
لما واحدة تلبس حجاب من فوق وبادي من تحت
لما الفتاوي يبقى فيه منها جاهز ومنها تفصيل وبكل المقاسات
لما كل يوم نسمع عن انتهاك لآدمية انسان في قسم شرطة وبرضه مافيش فايدة
لما كل يوم نسمع عن شباب بيهج م البلد ويموت في عرض البحر
لما آجي أكلم واحد أجنبي في موضوع ويقول لي " روح شوف اللي بيحصل في بلادكم الأول
لما أشوف إعلانات ميلودي
لما أشوف إعلان " انت مين فيهم ، اللي راح اشتغل وبقى كسيب ولا اللي فاته القطر ؟
لما أشوف إعلانات الضرائب مصلحتك أولا
لما اسمع الشيخ محمد حسنين يعقوب
لما أشوف كليب مبروك اتحجبتي
لما اسمع أغنية يبقى انت أكيد في مصر
لما أشوف جاد شويري أو أسمع اسمه
لما اعرف ان هيفاء وهبي مأمنه على جمسها بمليار دولار
لما أشوف عيل بيشحت من سائح
لما أروّح بيتي كل يوم في آخر فيصل في ساعتين ونص
لما ملاقيش وقت ألعب جيمز
!
وانتوا إيه قمة الاستفزاز بالنسبالكم ؟

19 comments:

اسكندراني اوي said...

لما انزل المطار الاقي امناء الشرطه ولبسهم كله مبهدل واسود

لما سواق مشروع يلف من الدوران الغلط ويدي العسكري نص جنيه

لما الاشاره تكون حمرا والعسكري يقولك امشي يا استاذ

لما سواق عربيه الاسعاف يكون مموت نفسه صفافير وسراين وسواق تاكسي بايخ ماسك الشمال وماشي على مهله


بس كده هي مش ناقصه حرق دم

Tarek said...

لما تكون مستعجل و توقف تاكسي لكن مايرضاش يروح المكان إل إنت عايزه عشان مش على مزاجه
لما كل حد يطلب منك حاجة يفهمك إنه مستعجل و لازم تخلصهاله على طول و هو مش مستعجل ولا حاجة
لما الناس إل بترسم كاريكاتور في الجرنال يكون مستوى رسمهم زي طفل في الثالثة من العمر
لما كل الأفلام المصرية تبقي كوميدية و القصة عبارة عن واحد فقير بيحب بواحدة غنية و أبوها مش موافق و لازم يكون أهلاوي عشان الجمهور يتبسط

Anonymous said...

ازيك يا استاذ اشرف

موضوع جميل بس مشعارف ايه اللى بيستفزك فى الشيخ محمد حسين يعقوب هو اذاك فى حاجه . اكل حقك لسمح الله ولا نصب عليك.........لو مشعجبك متسمعوش

يا اخى دا كل من هب و دب بقى بيتكلم و ليهم برامج دا فيفى عبده لها برنامج

انا متأكد انك متعرفش الراجل ده كويس دانت حتى كاتب اسمه غلط .......

نصيحه اخيره متحكمش على حد الا لما تعرفه كويس (خلى بالك من كويس دى) و بعدين قول رأيك فيه بموضوعيه مش تقول بيستفزك و خلاص ده مشنقد

و يا ريت ما لكش دعوه بالحجاب الله يخليك

اسف لو كنت طولت عليك و متزعلش من كلامى

ســــــــــــلام

أشرف حمدي said...

anonymous
أنا فعلا كاتب اسمه غلط
لإن اسمه الشيخ يعقوبيان :)
والله ده رأيي وانا مغلطتش في البخاري
ياريت نفهم الفرق بين الشيوخ والأنبياء ونبطل نمجدهم عمال علي بطال

لي بوست مطول قريبا بخصوص هذا الموضوع ان كنت تحب متابعته
تحياتي

Darsh said...

اللي بيستفزني إنه معظم الإفلام و برامج التلفزيون و إعلانات الترويج الإنتخابات أو أي مشروع قومي الستات اللي بيطلعوا فيه كلهم مش لابسين إشاربات رغم إن 70% من الستات و البنات في مصر لابسينه. مين الستات دول اللي بيجبوهم في الإعلانات؟؟

حبة حاجات (ايمان) said...

قمة الاستفزاز اى كلمة تعبر عن الاستفزاز

وبس كفايه عشان انا استفزيت

تحياتى
وبالنسبه لمشروع الشاورمه انا معاك بس بشرط
استفزكو

تحياتى

Che The Sad said...

مستر اشرف
اهو كل اللى انت قولته دا بيضايقني ماعدا انى اروح فيصل فى ساعتين ونص لأنى مش من فيصل :D
وكل اللى قلته بعد كدا بيتفزنى تماما

ودول كمان لما اقف اربع ساعات ومفيش ميكروباص راضي يركب ويقولك مش مركب وكمان لما اكون من القاهرة وادرس فى الزقازيق وميكونش فى تحويل

بس كدا حلوين اوى

تحياتى
تشي

عاليا حليم said...

هو بعد كل الى رصيته ده فى قمة اعلى من كده ؟
و يبقى انت اكيد اكيد فى مصر :(

Mirage said...

لما بشوف لسه عربيات كارو وعربحية ماشيين فى شوارع القاهرة الرئيسية واحنا فى سنة 2007

لماضة said...

لما مريض يدخل مستشفى ويقولوله روح الحسابات الاول عشان ندخله
وطبعا كل اللى انت قلته بيستفذنى موت

Anonymous said...

والله أنا مش بحب اسمع محمد حسين يعقوب
لعدة أسباب
بس مش معنى كده إنى أحطه فى قائمة اللى بيستفزونى
بيستفزك ليه ؟؟!!
مش عاجبك ماتسمعوش يأخى
فى غيرك ربنا هداه على إيد الراجل ده
تقوم تسميه يعقوبيان
ده بأه الغلط نفسه
على فكره انا Anonymous تانى
مش اللى عمل الكومنت الأولانى

آخــر قــرصان said...

ياااااااااااه
اقولك ايه اكتر حاجة مستفزة
اننا عايشين فى مصر بلد العجائب
بلد المواقف والطرائف صدق او لا تصدق بس احسنلك لازم تصدق ان شاء الله بالعافية فى مصر
ياراجل دى كل حاجة بقت مستفزة
لو مش وراك حاجة ممكن اكتبلك ليستة بالحاجات المستفزة بس خايف لتنام منى
قصر الكلام لو الحاجات دى بس بتستفزك فانا بحسدك على روقان دماغك
يا اشروووف

Anonymous said...

أنا مبسوط قوى يا أشرووف إنك بتكره جاد شويرى .. زيى بالظبط!ـ
و الحاجات اللى بتستفزك دى بتستفزنى برضه .. يعنى بصرة يا معلم
بس هى الحياة كدة ح نعمل إيه .. من غير مانشوف الجهل مش حنعرف قيمة العلم ، و من غير مانشوف النفاق مش ح نعرف قيمة الصدق .. يعنى مثلا أما تشوف "محجبة" لابسة ضيق ، دا نفاق ، أو لوحة كاريكاتيرية للنفاق من غير و لا كلمة أو تعليق ، و لما البلياتشو بتاع "فتوى" إرضاع الكبير أما أصدر فتوى التخلف العقلى بتاعته دى ، خلانا نفهم إزاى نستعمل عقولنا فى الدين و نصوصه ، و لما رقاصة زى هيفاء وهبى (هى آخرها رقاصة) تأمن على جسمها بمليار دولار (أول مرة أسمع الحكاية دى) نتأكد فعلا إن فيه آخرة و ثواب و عقاب و إن ربنا ح يعاقب الأشكال دى لإنها بتصرف ملايينها فى كلام فارغ و فيه ناس بتموت م الجوع

آخــر قــرصان said...

بالحق
مستنى مرورك على مدونتى
فى حاجتين عاوز تعليقك عليهم
مستنى تعليقاتك
سلاموووووز

ftafeet said...

اول حاجه تسلم ايدك حلو اوى موضوعك
تانى حاجه انا بجد مش عارفه اعلق على الموضوع لان كميه الاستفزاز فيه كبريه اوى وكمان التعليقات فيها كميه حاجات بتستفزنى وانتو فكرتونى بيها
بس بجد تسلم ايدك
وربنا يوفقك

تائهة فى أرض الأحلام said...

امال ارتفاع ضغط الدم والسكر انتشروا فى مصر ليه من الصغير للكبير

بخصوص بيتك اللى فى آخر الفيصل
أحسن لك تعزل انا كنت امبارح فى شارع الهرم وصلت فى ساعتين ونصف وندمت انى نزلت من بيتنا من عند المطار لغاية الهرم علشان احضر فرح

وينكى said...

حد عبيط يسفسط معايا فى الكلام
تطبيق مثل خدوهم بالصوت قبل ما يغلبوكوا
أركب فى العيد الميكروباص ابو 30 قرش ويقولى السواق ادفعوا 50 قرش عشان العيديه اللى بعد كده بتيقى السعر الرسمى للمواصله
أقف قدام موظفة التأمينات الساعه 11 الصبح عشان تختملى ورقه واحده وورايا مليون بنى ادم وهى قاعده بتاكل ساندوتشات وبترغى مع زمايلها فى سعر الزيت اللى غلي
لما امشى على الرصيف وقدامى 3 بنات ماشيين على اقل من مهلهم وسادين عليا الطريق
لما اقعد سرحانه مع نفسي فى المواصلات وواحده تاكل ودانى وتحكى على ذكريات 60 سنه فاتوا
لما واحد معفن عدى الخمسين مايسواش نكله يعاكسنى
لما اعرف ان الاهلى اتظلم فى الماتش
وطبعا كل اللى البلوجرز قالوه قبلي

koukawy said...

كل الحاجات اللي انت قلتها
و عليهم.....
لما
اكتشف ان الشغاله الأثيوبيه اللي عند احد الأصدقاء بتقبض اكتر مني

لما اشوف من الشباك ان الجو برد و اخرج الاقيه حر او العكس

لما استعمل ماوس بكوره من تحت

لما استحمي و الميه تقعد تلعب شويه سخن و شويه بارد

ياهههههههههههههه
كتير مش هخلص

raghda said...

حينما يكون الدين هو القطن الذي يدخل ماكينة عقل المصري فيخرج بدل القماش تخلفا و يصبح مبرر لتصرفات و افكار غير منطقية
.
عندما يكون العقاب غير مجديا مع الاغبياء
.
حينما يكون الغضب بلا عقاب
.
حاجات كتير تعتبر قمة الاستفزاز بس انا مجاش على بالي الا اللي مأثر فيا من وقت قليل
.
لي تعليق لو سمحت يا اشرف على تعليق الاخ اللى اعترض على رايك في يعقوبيان ، يعقوبيان يعتبر شيخ مشهور ، و المشاهير النقد عليهم حق ، و مش مفروض اننا كلنا كمواطنين عاديين اننا نطاردهم و نحتك بيهم و نحقق في ماضيهم و حاضرهم عشان نعرفهم كويس و نقول تقييمنا ليهم بعد ما دققنا فيهم
المشاهير لا يخضعون للتقيم من العامة ، بل يخضعون للاعجاب او الانتقاد الغير مباشر
محدش قالهم يبقوا مشاهير ؟
ده لو الاخ شايف انه ظلم ليهم
من يختار شئ فعليه تحمل عواقبه مهما كانت جيدة او سيئة
انت دورت عن الشهرة و حصلت عليها ، استحمل كل ما له علاقة بيها
...
من حق من اعطاك وقتا ليسمع وعاظك ان يقول رايه فيك ، من حق من اعطاك قرشا يشتري به خطبة ليك انه برضه يقول رايه فيك
و القائمة طويلة
بس بلاش كلكعة و عنصرية
و على فكرة اللى ساب تعليق يعقوبيان قلبه مش صافي ، كان مركز على انتقاده ليك عشان كده نسي او خاف يسيب اسمه

Counter