Total Pageviews

Wednesday, May 21, 2008

لصوص الأفكار

بالأمس شاهدة حلقة دكتور
Phill
بالرغم من "استغلاسي" له، إلا أن الموضوع كان لا بأس به ، شخص مولع بالسرقات يحاول أن يجد لنفسه علاجا بعد أن تم القبض عليه وفي حوزته مسروقات بقيمة مائة ألف دولار ، من بطاريات الريموت إلى الملعبات والأطعمة وزجاجات النبيذ الفاخر وحتى اسطوانات الأفلام وجهاز تليفزيون و و و ، ما لفت انتباهي أنه يقول عن نفسه : لا أشعر مطلقا بالذنب مما أفعل ، وأعتبر أن ما افعله هو حق لي، ولا أفكر مطلقا في دفع ثمن ما أحصل عليه بل أفكر في الحصول عليه فقط .
هذا بالضبط هو ما أجده في عالمنا العربي كله فيما يتعلق بحقوق الملكية الفكرية .


حدث وأن وجدت أعمال منشورة لي بجريدة الراية القطرية باستراحة الجمعة ، سعدت كثيرا بالنشر خاصة وأنني لم أرسل لهم أية أعمال ولكن تبخرت سعادتي فور أن شاهدت الجريدة بنفسي ووجدت أن ما نشر لي كان من موقع ماشي دوت كوم مع محو الإمضاء وحقوق الملكية الفكرية ، في البداية كان التصرف المنطقي والطبيعي بالنسبة لي أن أرسل لهم خطابا مهذبا أعلن فيه عن اعتراضي على ما حدث ، كما أعرض فيه خدماتي لرسم كاريكاتير حصري للجريدة العريقة ، وفي الواقع كنت على استعداد للنشر دون مقابل أيضا ، وبعد أن تم تجاهل رسالتي واستمرار سرقة أعمالي ونشرها قمت بابلاغ الموقع ، والذي تفضل مشكورا على الفور بإرسال فاكس للجريد ، وبعد أن توقف نشر الأعمال المنشورة لفترة ، عادت الجريدة وواصلت النشر لي مع الحفاظ على الإمضاء ، وفي بعض أحيان قليلة يتركون اسم الموقع ، حسنا ، إذا كانت أعمالي تعجبهم بهذه الدرجة ، فلماذا لا يتصلوا بي ؟ خاصة وأنها جريدة قطرية عريقة وليست مجلة تصدر من تحت بير السلم ، لقد أعتبروا رسومي المنشورة على موقع ماشي حقا مشاعا يمكنهم استخدامه ببساطة متناهية ودون أن يشعروا لوهلة أن ذلك يدخل في نطاق السطو على حقوق الملكية الفكرية ، سرقة علنية بمعنى أكثر وضوحا ودقة .

قبل ذلك كان هناك من تخصص في سرقة أعمالي ووضع إمضاءه عليها ، بل قام بمحو التعليق ووضع تعليقات من عنده لا تليق بي في الواقع .
كما أن أحد المدونين المغمورين قام بسرقة نص البروفايل الخاص بي " بنى آدم يعيش ويتعايش إلخ " وحينما أرسلت له لأخبره أن هذا نوع من السطو رد علي بكل ما يملك من برود ــ وهو يملك الكثير بالمناسبة ــ بأن هذا حقه ، قرأ البروفايل وأعجبه وقام باستخدامه ! فيها ايه دي يعني ؟

اليوم أقدم لكم الفنان الرائع مؤمن جويلي تصفيق حار من فضلكم الذي عكف خلال الفترة الماضية على سرقة كاريكاتير مصراوي ونشره باسمه بعد حذف إمضائي وحقوق الملكية الفكرية للموقع ، وقد وجدته عضوا في منتدى سخيف يشجعه على الاستمرار في سرقاته بل فوجئت بوصول الكاريكاتر المسروق مني على بريدي الإلكتروني أكثر من عشر مرات ، يبدو أن الأعمال المسروقة تنشر بشكل أسرع كثيرا من خلال رسائل البريد ، ومؤمن جويلي يهوي الرسم بالمناسبة ، ولكن لماذا لا يحاول أن يرسم كاريكاتير بنفسه ؟ هذا لأنه ببساطة رسام فاشل ، وقد رأيت بعض رسومه التي تنتمي إلى فئة رسامو الرصيف ممن يهوون تسييح الفحم والرصاص بأصابعهم .

أكاد أقسم أن مؤمن جويلي هذا فخور بنفسه ، وينام ليلا مرتاح البال ، ويعتبر ما يفعله هو قمة الإخلاص للمنتدى الذي ينتمي إليه ، كما سيعتبر كلامي هذا تعديا على حقوقه وعلى شخصه دون وجه حق .
عموما أترك الحكم لكم



14 comments:

اهو ده عيبه said...

مش عيب تبقى جريدة كبيرة وحرامية

مش عارفه ازاى انسان يقدر يستبيح لنفسه مجهود غيره كده عادى من غير وجه حق لا وكمان يبقى بجح

الحكاية دى اتكررت مع حضرتك وناس كتير جدا وخصوصا فى بعض المنتديات اللى بقى اختصاصها السرقه من المدونات

اتمنى يكون فى مراعاه ولو بسيطة للحقوق واللى يحب ينشر حاجه يتاذن اولا او على الاقل يكتب المصدر اللى ناقل عنه

تحياتى ليك

ناجي العلي 2000 said...

الحل الوحيد لمواجهة سرقة حقوق الملكية الفكرية هي الالتجاء للقضاء

حكمنا احنا مش هيفيد شئ في الموضوع ... صدقني لازم نضرب بيد من حديد علي كل سارقي المجهودات الزهنية

ما تقوليش سكك المحاكم طويلة ... لان ده مش مبرر اننا نطنش حقوقنا

اتكل علي الله وارفع قضية علي الي مايعجبكش :)

tamer.sala7 said...

بص يا دكتور لو كل كلب عوا اصقلته حجرا لكان مثقال كل حجر دينار
وديما النجاح ليه اعداء
ربنا معاك وينصرك علي مين يعاديك هاي هئ

Anonymous said...

مأمون الجويلى
انا استقبلت ايميل امبارح مليان رسومات كاريكاتير كتير جدااااااا وممضيه باسمه
حسيت ان الرسوم دى مألوفه عندى بس قلت يمكن اكون شفتها فى حته تانيه
انا مش عارفه انت من حقك كرسام تعمل ايه عشان تحافظ على ملكيتك الفكريه
كان ليا واحد زميلى فى الجامعه ملحن
كل لحن يعمله يدفع فيه دم قلبه عشان يوديه لحد يكتبلها نوته وبعد كده يسجلها فى الشهر العقارى
بس لو كان ده هو الأسلوب الامثل لحفظ الحقوق.. فاتبقى طريقه متعبه ومعقده وماتشجعش على الابداع
وانا ايه يضمنى ان موظف الشهر العقارى نفسه مايكونش حرامى؟؟
دى مشكله ضمير يا ساده

khobayb said...

بغض النظر عن تأنيب الضمير حتى ..

ايه وجه الاستفادة من كده ؟

ايه السخافة دي ؟

أي متعة بيحصل عليها السارق ؟

---

رأيي ..

إن أي حد يسرق حاجة من أعمالك - والكلام عام - تشهر بيه تشهير فظيع وعلى أكبر مستوى

عشان تبقى فضيحته فضيحة

ولو فيه إجراء قانوني .. اوع تتردد

Anonymous said...

بص يا دكتور انا جي اهدي النفوس بحد , ما تسيبش حقك و ارسلهم مره اخيره و قولهم ما ينفعش تنشروا رسوماتي حتي لو سيبتوا اسمي عليها و حاول تسخن موقع ماشي عليهم و خليه ياخد خطوه قضائيه و بتاع :)
و زي ما قولتلك انا جي اهدي النفوس

و نفس الكلام للي اسمه مؤمن ده راسل المنتدي اللي هو عضو فيه و فهمهم الحكايه و لو هما خايفين علي سمعتهم هيملصوا ودان مؤمن ده و يوقفوه

و موضوع حقوق الملكيه الفكريه في الدول العربيه عايزله وقت طويل لحد ما يبقي حقيقه فعلا

اخوك ايمن

abderrahman said...

الموضوع ده مؤلم جدا
حصل معايا ومع زمايلي قبل كده
وعلى فكرة بيبقى في الموضوعات أكتر م الكاريكاتيرات
انما الجرأة تبقى كمان في الكاريكاتير اللي المفروض انه السرقة حتنكشف اسرع؟؟؟ دي حاجة تقرف
أنا الحاجة اللي كانت بتخليتي مهتمش اني كنت باخد مرتبي ومش مهتم، خليهم يسرقوا
:))
بس أكيد دي سلبية، أنما التجربة اثبتت أنه الحرامي بيلاقي اللي بيدافعو عنه

علم الهسس said...

عادى هتلاقى من دا كتير
من يسرق الفكرة
ومن يسرق الحركة
ومن يسرق العبرة
ومن يسرق السعادة
ومن يسرق الفلوس
ومن يسرق الشهرة
ومن يسرق....الخ

المهم حافظ على اعمالك يا جدع
واللى يسيب باب بيته مفتوح
ما يجيش يقول انا اتسرقت

خليك حذر

Shimaa Gamal said...

المشكلة فى إن ناس كثيرة لا تعتبر سرقة الأفكار سرقة ، زمان من أيام المدرسة ممكن يطلبوا منك بحث و محدش يدقق على المصادر ، ممكن طفل يسرق فكرة اللى جنبه و علشان هو حبوب و صاحب الفكرة إتم الميس مش هاتزعقله و هاتقول لصاحب الفكرة إنه غلطان و إنه أنانى .
مع إنتشار الإنترنت فكرة سرقة الأفكار بقت منتشرة . لإن فى مفهوم عام إن أى حاجة تتحط على النت دى مشاع . و إن من حق أى حد ينسب لنفسه الجهد الفكرى
اللى بيضايق فعلاً مش بس السرقة ، اللى بيضايق أكثر إن الحرامى يكون حمار . يشيل حرف و يغير المعنى أو زى ما فى حالتك يمسح التعليق و يحط تعليق تانى مالوش علاقة باللى إنت تقصده .
فى الأغلب الحرامى حمار ، لإنه لو مش حمار ماكنش سرق و لو سرق ماكنش غير .
بس أكيد فى قانون يحمى الفكر ، لو مافيش تبقى مصيبة بس السؤال هو فين القانون ده

Mohamed Anwar said...

may be this site will help http://creativecommons.org/
ومتهيئلي أن الرسم تقدر من هنا ورايح تحط امضائك جوه الرسمه اوي بحيث انه مينفعش يتشال واعتقد ان مستواك في البرمجه عالي يعني فكر مثلا كده زي ما في ملفات بي دي اف مينفعش ناخد منها كوبي ممكن تخلي الايمدج بتاعتك كده برضه تتشاف بس لا ينفع تحتفظ بيها ولا تنقلها وعموما انت فنان ليك بصمه واضحه في اعمالك من غير ما نقرا الاسم ولا حاجه بنبقي عارفينك بتفكرني بطوغان
خالص احترامي وتقديري

واحد من البلد دى said...

أنا طول عمرى باقول إن اللى بيسرق أفكار غيره ده بيبقى عامل زى (ثانى أكسيد المنجنيز) يعنى عامل مساعد على الإبداع و التميز لأنه بيخليك تحس قد إيه أفكارك مهمة و مبتكرة لدرجة أنها تستحق السرقة...
وبينى وبينك يا أشرووووف ثانى أكسيد المنجنيز بقوا كتييييير آوى ..
لدرجة إن الواحد بيستغرب على الناس دى..
هما يعنى خلاص مخهم فاضى ومش قادرين يعملوا حتى نص فكرة..
المهم يا معلم بقى ..
البوست اللى فات ده جامد مووووت..
إنت المفروةض تسمى نفسك أشرف مواهب...
تحياتى لك و لعمرو..
دمت بخير

واحد من البلد دى said...

تعالى شوف بوست العلاوة

الميكروباص said...

ده شيء عادي
ومع انتشار النت أصبح نقل الافكار وربما مقالات كامله شيء اقل من العادي
قول حاجه جديده يا دكتور
دي حاجه قديمة اوي
وبينام كمان مرتاح الضمير
وده لأنه اصلا معندوش دم
الله يمسيه بالخير الراجل صاحب مدونة كوارث بيقول اللي اختشوا ماتوا
انا قلت له ان اللي اختشوا انقرضوا واصبحوا مثل آثار الفراعنه
هذا لا يجعلك تحزن- بالعكس
فكرك وصل للناس- لكن عن طريق حرامي

kochia said...

حاجة غريبة اوي وجريئة
ازاي حد يتجرا انه يعمل كدة من غير اهتمام ولا مراعاة للشخص صاحب الحق
وده كمان بيدل علي فقرهم الفكري والثقافي انهم يقتبسوا .. او يسرقوا بمعني اصح بهذا السفور
وانا شخصيا مش عارفة الواحد ممكن ياخد حقه ازاي
بس داوم علي المحاولة بكل الطرق

Counter