Total Pageviews

Sunday, June 15, 2008

بغددة

البغددة هو أن تشعر بأنك مرفّه ، وتبغدد أي تظبّط وتمنجه بقشطاط الحياة .
ومن حين لآخر أشعر برغبتي في البغددة في ظل ما يتيحه لي راتبي المصاب بالسل ، فما أجمل الشعور بأنك سلطان زمانك ــ والأزمنة القادمة أيضا ــ وأنت تستلقي في كسل أمام التليفزيون والريموت في يدك وهواء المروحة يتسلل من الشورت ليدغدغ رجولتك ( ماحدش يفهمني غلط ) ، المهم ، أقول للمدام وأنا مجعوص كامل الانجعاص : أطلبيلنا ديلفري
في الماضي السحيق (يعني من كام شهر فاتوا) كنت أطلب كباب وكفتة مرة واحدة اسبوعيا وأحيانا كل اسبوعين ، ونظرا للظروف الاقتصادية قررت الامتناع عن الكباب نظرا لأنه ضار جدا بالصحة وأكتفيت بالكفتة ، ثم قررت العزوف عن هذه العادات السيئة والاكتفاء بالبيتزا الشرقي من لابوم (على فكرة ده مش إعلان مدفوع الأجر).
يا سلام عليها كده بالسجق أو باللحمة المفرومة ، وترش عليها كده فلفل وشطة ، وتبكي ، آه والله تبكي ، وأنت تقرمش حوافها المحروقة وتلتقط بها فتافيت السجق أو اللحم المفروم المتبل بالخلطة الشرقية وتقسم أمام نفسك وأمام البشر وأمام الله أنك أسعد إنسان في الكون ، وإمعانا في البغددة ، يمكنك أن تمز بمخلل خيار على جزر على بصل متحبشين ومتعصفرين ، يا جماله ، إما إذا كنت تريد أن تتخطى حدود اللامعقول فيمكنك أن تطلب فطيرة حلوة محشية بتشكيلة فريدة من نوعها ، عسل على بسبوسة على كنافة على كريمة على مربى غارقة بالسمن البلد ومرشوش عليها سكر سنترافيش ، يا وعدي .
وبعد ساعة ونصف من الغرق في اللعاب انتظارا لهذه الوجبة الأسطورية ، تسمع جرس الباب فترتدي الروب الفاخر ــ هدية زواجك ــ وتفتح الباب لترى وجه عامل الديلفري فتكاد تنهال عليه تقبيلا ، ولكنك تحاول أن تلعب دور الاستقراطي المتبغدد الذي على وشك التهام البيتزا والفطيرة المحشية .
ــ كام الحساب ؟
ــ تمانية وتلاتين جنيه
ــ احم ؟ كام ؟
ــ تمانية وتلتين جنيه ! ، بيتزا صغيرة باللحمة وبتزا صغيرة بالسجق وفطيرة صغيرة محشية .
ــ هي مش البيتزا كانت بتسعة ؟
ــ لأ ماهي بقت بأربعتاشر
ــ والفطيرة المحشية بعشرة ؟؟؟؟
ــ أيوة يا بيه ، كل حاجة غليت ، بس إحنا خفضنا خدمة التوصيل من تلاتة لإتنين جنيه

شوية فطير بتمانية وتلاتين جنيه لزوم البغددة .
لا أنكر أبدا مدى اللذة التي أحصل عليها من هذه الوجبة ، ولكن هذه المرة كانت الفاتورة ظاهرة أمامي لتنغص علي متعتي . بينما كان أملي في أي نوع من البغددة المستقبلية يتبدد بلا رجعة .

يقولون أن بغددة تعني شعورك بالرفاهية .
كان هذا قديما قبل أن تسقط بغداد مع الغزو الأمريكي للعراق .

19 comments:

نعكشة said...

ماهو عشان تتبغدد لازم تتبهدل
اشتغل خمس شغلانات في اليوم
ونام نص ربع ساعة كدة
و هيبقي معاك فلوس كتير

أو

البس قناع و بتاع و روح اسرق بنك ولا حاجة

أو

زورلك شوية أملاك و خد قرض من البنك وس افر علي أي بلد فيه حق اللجوء و روح اتبغدد هناك
وبعد 25 سنة ارجع اتبغدد في مصر

أو

اطلب فول و طعمية ديلفري ومعاهم شوية المخلل اللي بتقول عليهم دول
و الحلو اطلب شوية لبان من البقال

و افتح التليفزين و اتبغدد يا عم

احمد ربنا انهم مغلوش الكهربا عشان تعرف تتفرج عالتليفزيون
سايبينكو تعيشو في رفاهية :D

سلامون عليك

أشرف حمدي said...

يا لهوي
كل ده عشان آكل فطيرة بالسجق أنا والمدام ؟

ماهو أنا سبقتك وجربت موضوع الفول
آه والله بجد مش بهزر ، رحت أنا والمدام ناكل فول في الدمياطي ، طبقين فول وطعميتين صغيرين كل واحد طعمياية واتنين حاجة ساقة دفعنا خمستاشر جنيه

جربت أجيب فول في البيت ، بجنيه فول وبجنيه طعمية وطرشي وعيش وجرجير وبطاطس شيبسي قطعوا خمسة جنيه ونص وجالي انتفاااااااخ

طبقين كشري ــ متّاكلين قبل كده ــ بستة جنيه

فيه حاجة تانية في البلد تتاكل وأنا ماكلتهاش ؟
نفسي اتبغدد يوم في الأسبوع يا عالم

مواطن مصرى نايم said...

ههههههههههههههه
بغدده
طيب اوك
البهظ بيه بيسلم عليك

انت كنت المفروض تقول لرجل الدليفيرى
اول ما تشوف الفاتورة

ادينى فى الهايف و انا احبك يا ننانس

و بعدينى تقول

و اتعلمت اللغة و اتعلمت اللغة
زى يحيى الفخرانى

و تنزل كلمة النهاية
و انت بتقتل الراجل

سلام يا اشروف

ketchup said...

فطير ودلفري

ايه يا فنان هو انت طلعت منهم
ولا ايه
ربنا يسامحك يارب

و قال ايه انا فاكر قمة البغددة انك تقوم تخبط لك شوية بطاطس في الزيت الساعة 3 بالليل و تصب عليهم كثيرا من الكاتشب و تربط بمج شاي

ياعم دانت مش متبغدد
دانت متهشك هشتكت الطفل الصغير في يوم ميلادة


ربنا يجعلنا من بركاتكم يا اخي

ربنا يكتر ديلفريكم

Oss said...

انت ممكن تبغدد بعد كده بكيس شبسى من أبو نص جنيه مع كوباية شاى
بس المشكله الكيس ابو نص جنيه ماعدش فيه غير شريحتين بطاطس
يعنى هتبغدد بمعده خاويه

أنا كانت بغددتى من سنه بخمسه جنيه
يكون فيلم حلو شغال أو ماتش أو روايه جديده جيبتها
أجيب شوكولاته سنيكرز وكنز بيبسى وكيس شبسى ويتبقى ربع جنيه
تدريجياً انسحب الشيبسى
وغليت شوكولاتة السنيكرز وفى نفس الوقت اتسخطت والكنز غليت
وماعدتش بغدده خالص
آخرها صومله (أى من الصومال)

هيييه دنيااااااااااا
تحياتى
وربنا يعوض عليك فى الفلوس اللى دفعتها

أسامه يوسف

واحد من الناس said...

انت رديت على نفسك فى اخر التدوينه..
لقد انتهى عصر البغدده ع سقوط بغداد
وبعدين الناس هيعملوا معاكوا ايه اكتر من كده مدينكوا علاوه 30% حته واحده خبط لزق..ايه الإفترى بتاع الخلق ده؟
وبعدين انت لازم تتبغدد بالأكل شوفلك اى وسيله تانيه للبغدده..

نعكشة said...

خلاص خلاص

اقولك انا تتبغدد ازاي
بسيطة
مادام حضرتك متزوج يبقي قشطة

بص يا سيدي هات كيلو دقيق من البقال دة تلاقية ب 4 جنية
وهات سوسيس من الراجل ب 5 جنية
و بنص جنية خميرة
و شوية زيت صغنتتين
و بيضتين ولا اربعة معرفش كام بجنية
و هات شوية مكسرات و شوية سكر ب 3 جنية

طبعا مش هتستخدم كل الدقيق ولا كل السوسيس

وخلي زوجة حضرتك تعملكوا بيتزاية و فطيرة بالمكسرات

و تلفهم في علبة
وانت راجع هات كيلو اي فاكهة و هيا تعملوا عصير
واتبغدد يا عم

و بأقل التكاليف


ايوتها خدمة

سلامون عليك

abo salah said...

بعد السلام عليكم


أزيك يادكتور أشرف ؟
واحشنى والله ياراجل

بص ياعم
انت زي ما اقتنعت ان الكباب والكفتة مضرين بالصحة ومن العادات السيئة

أضف اليهم البغددة
عشان في العصر دا مابقتش البغددة لينا دا اصبح عصر بغددة الفواتير

وبلاش ياعم بغددة يوم في الاسبوع .. خليها يوم في العمر .. في ناس بتعيش وتموت من غير ماتتبغدد ربع بغددة
ههههههههههههههههههههه

وبعد كده يادكتور بلاش الوصف التفصيلي دا للماكولات في بوستاتك عشان جوعتني علي الصبح وشوقتني للبغددة

تحياتي

بطوط حبوب said...

وصلت انك تتبغدد يا عمنا
يعنى اخوك طالع عينه فى الباثولوجى - الى بعتبره قسم محظوظ لانه هيتسنى له ان يرانى للمره الثالثه فى العام القادم ان قدم ان شاء الله-
اونت قاعد تتبغدد
فلا نامت اعين الجبناء
ههههههههههههههههههههه
هروح اشوف بوستاتك القديمه لانك وحشتنى موووووووووووووووووت

enjy said...

يا عينى والله قطعت قلبى.خلاص مشيها بعد كدة سندوتشات شاورمة........ او اساسا ماله اكل البيت يعنى؟؟؟

أشرف حمدي said...

مواطن مصري نايم
ههههههههه ، كده كان حيديني البيتزا في حقنة
تحياتي يا باشا
-------------
Ketchup
امال تقول ايه على اللي بيتبغدد بجنبري من فرنسا بيجيله بطيارة خاصة
هييييييه ، مستخسر فيه شوية فطير أتبغدد بيهم ؟
هههههههههه
-------------
OSS
حلوة صوملة دي :) وعجبتني ملاحظتك بتاعة الشيبسي ، فعلا هو فيه شريحتين بالظبط وساعات تلاتة :) مش عارف ده بياكلوه ولا بيشمّوه
-------------
واحد من الناس
للأسف انا بتبغدد بالأكل رغم أني مش أكول خالص ولكني ذوّاقة :) فيا شبه من الفار بتاع فيلم راتاتيوي
بونا بيتيه يا مومبيه
-------------
نعكشة
يا روقااااانك
والله عملتها كتير وخاصة أيام الخطوبة ومطبخ حماتي شهد معارك ، مافيش فايدة ، مابعرفش أطّير الفطير في الهوا
وفي الآخر بضطر آكل العك اللي عملته غصب عني عشان حرام يترمي
شكرا على التعليق
-------------
أبو صلاح :)
ههههههههه أنا كنت قاصد ، ومادام طلعت منهم خلاص مش حرحمك
حبعتلك ايميلات وصف لأكلات ، تصدق ممكن يكون إتجاه أدبي جديد ؟
مادام الواحد مش عارف ياكل يكتب قصص أكل
زي اللي مش عارفين يتجوزا فبيكتبوا قصص .... ولا بلاش :)
تحياتي يا باشا
ولينا قعدة كبدة اسكندراني قريب من عند زيزو نتانة
----------------
Enjy
اسكتي أحسن هند تسمعك ، أكل البيت ماليش تقل عليه الصراحة
أنا شخص يتذوق الطعام ولا يأكله :)
تحياتي

اهو ده عيبه said...

يعنى ايه ديلفرى؟
يعنى ايه فطير؟
يعنى ايه مروحه؟
وتليفزيون وريموت؟
دى الاسئلة اللى ان شاء الله هيطرحها الاجيال القادمه لما يقروا مدونتك بعد 15 او 20 سنة من دلوقتى فى ظل الرخاء الذى نعيش فيه
واذا كانت الفطيرة زادت من 9 ل14 لو استرمت الزيادة بالمعدل ده هتبقى اقصى طموحاتك للبغدده 2 فول او طعمية ومن غير مخلل كمان
سلام

أشرف حمدي said...

أهوه ده عيبه
ههههههههههههه عجبني جدا التعليق ده بجد
بس والله انت بتتكلم صح ، احنا دخلين على أزمة غذاء عالمي فما بالك بحال مصر ساعتها
ممكن وقتها يكونوا بيعملوا وقود من البيتزا
تحياتي

نعكشة said...

خلاص انت مفيش منك أمل

بص

ارسم كاركاتير آل إية بقة انت بتاكل فطير و حمام محشي و كباب و كفتة و حاجات كتير

و الحلم ساعات بيشبع برضو

متقوليش الالوان غليت

و إلا هنتحر

سلامون عليك

سالي محمد سالم said...

بغدده؟ياللهول!!!!
ده الطمع الانسانى الغير مبرر...جشع الانسان وطمعه الدائم للبحث عن ملذات خياليه خرافيه مغوليه عنطزيه وايضا مهلبيه (من ام اتنين جنيه فى محل الكشرى)
انا مع طبق بطاطس الساعة تلاته وعليه شويه كاتشب ده اللى انا لسه عاملاه من شويه وحاسه برضا عن الكون والدنيا والبيجامه البنبى اللى انا لابساها مع انى بكرهها ومع ريحه سجاير ابويا اللى بتخنقنى
اللللللللللله الدنيا حلوه(على راى النانوس)
جرب طبق البطاطس وابعد الله عنك شرور الدليفرى انها قااااتله

واحد من البلد دى said...

يا سلام عليك و إنت بتجرى ريقى يا أشروف
فطير و بيتزا و أفلام يا عم
ربنا معاك ...
بس أنا ليا سؤال صغير جدا..


يعنى إيه دليفرى؟؟؟

بنوتة من وسط البلد said...

كل الاحساس بالانتخة ده وانت قاعد كمان قصاد المروحة .. امال لو قاعد فى تكييف كنت هتعمل ايه

ع فكرة انا مش صعبان عليا غير المدام .. قلها اختشك حاااسة بيكي .. المشهد ده عندى كل يوم فى البيت وفاقع مراراتى

انت تتبغدد يا اخويا انت وهو قصاد التليفزيون .. والمدام منفوخة فى المطبخ فى الحر

تستاهل ع فكرة

:)

من يومين كنت فى بيتزا كينج بتاع الهرم .. وافتكرتك :))))
وافتكرت الراجل بتاع التواليت .. تقريبا حد نفخة ,, ما شفتهوش يوميها


وما فيش فايدة معاملة زبالة وبرووح برضة .. واهو كله بتمنه يا معلم :)

تحياااتى

مواطن مصرى نايم said...

مش حينفع كده
انت اتأخرت اوى المرة دى
خير فى ايه
طمنا يا اشروووووف
و بلاش كسل بقى
تحياتى ليك
eslam

Amr Fekry said...

يا سلام عليها كده بالسجق أو باللحمة المفرومة ، وترش عليها كده فلفل وشطة ، وتبكي ، آه والله تبكي ، وأنت تقرمش حوافها المحروقة وتلتقط بها فتافيت السجق أو اللحم المفروم المتبل بالخلطة الشرقية وتقسم أمام نفسك وأمام البشر وأمام الله أنك أسعد إنسان في الكون ، وإمعانا في البغددة ، يمكنك أن تمز بمخلل خيار على جزر على بصل متحبشين ومتعصفرين ، يا جماله















lol

Counter