Total Pageviews

Saturday, June 28, 2008

بطيخة صيفي

ملحوظة : قبل أن تقرأ ، هذه التدوينة كلفتني تلاتاشر جنيه خمسة وسبعين قرش وثلاثة جنيه خدمة توصيل ، أتبرع ولو بقرش صاغ

وتنطق بٍطيخ بكسر الباء ، ويقال حط في بطنك بطيخة صيفي بمعنى إطمئن وإن كنت لا أفهم مغزى العبارة ، فلا علاقة للبطيخ بالاطمئنان خاصة بعد أن أصبح ساما في فترة من الفترات وأصبح تناوله بمثابة مجازفة غير محمودة العواقب .
المهم أنني لازلت أبحث عن وسائل عصرية للبغددة التي حدثتكم عنها في تدوينة سابقة بما يتناسب و الوضع المشين الذي أصبحنا عليه بعد الغلاء الفاحش ــ إن صح التعبير ــ الذي طال كل شيء مؤخرا . ووجدت غايتي في البطيخ ، وبما أنني لا أمتلك طرف جهاز التكييف فيمكنني أن أستغل الثلاجة في تسقيع البطيخ من أجل التطرية على القلب في حر الصيف ، هذا بالإضافة إلى المروحة التوشيبا والاستلقاء بالملابس الداخلية أمام التليفزيون كما تعلمون .

وحيث أنني ومنذ آخر بطيخة أشتريتها أعاني من آلام في العضلات نتيجة لثقل البطيخة السابق ذكرها ، وعدم ممارستي لأي نوع من الرياضة ، فقد قررت أن أطلب بطيخة من إحدى السوبرماركتات الشهيرة .

ــ ألوه
ــ كنت عاوز أطلب أوردار .. عندكم بطيخ ؟
ــ فيه طبعا يا فندم ، فيه بطيخ عادي باتنين جنيه الكيلو ، وبطيخ أحمر بدون بذر عليه عرض باتنين جنيه ونص الكيلو
ــ همممم طب ابعتلي واحدة من غير بذر في حدود عشرة جنيه
ــ لأ يا فندم ، هي ممكن تكون في حدود تلاتاشر إلى خمستاشر جنيه
ــ طيب يا سيدي ابعتلي واحدة في حدود تلتاشر

بطيخ من غير بذر
يذكرني هذا بمشهد شهير بمسرحية الزعيم لعادل إمام حينما قال : بطيخ الزعيم بدون بذر، هو لسة الزعيم حيتفتف ، الزعيم يلهط على طووووول .
فقررت أن ألهط على طول كنوع من البغددة المتقدمة ( أدفانسيت يعني )
هو الواحد تجيله فرصة يبقى زعيم ولو لأكلة بطيخة ويسيبها ؟

وإليكم النتيجة
ولا نتيجة الثانوية العامة السنادي




بصراحة أنا مابفهمش في أنواع البطيخ
عشان كده شكيت إن العيب فيا انا ، وإن ده أكيد نوع جديد انا معرفوش
عموما هو طعمها بالظبط بالظبط عامل زي القلقاس قبل ما يستوي

26 comments:

MonTexo said...

شوفت اخرة البغدده يا دكتور

بس البطيخه مالها مصفره كدا ؟ انا اعرف انها لو بايظه تبقي بنت حلال و قلبها ابيض

صح ؟؟

علي فكره انا عرفت السوبر ماركت :)

بطوط حبوب said...

انا اخرتى انى هموت من الضحك على اعتاب المدونه دى بجد
انت لازم تكتب تحذير
هههههههههههههههههههه

تعيش وتاخد غيرها يا مان رغم
بس بجد انت جامد مووووووووووووت والمواقف وبتنزل عليك تووووووووووووووور

جبهة التهييس الشعبية said...
This comment has been removed by the author.
ketchup said...

هي هي هي

ضحكتني على الصبح

هي صفرا ليه انا مشفتش بطيخ اصفر
بس هو احتمال يكون حصل لها تهجين
او ممكن ام البطيخه دي كانت بتلعب بديلها مع قرع عسل و كانت النتيجة كدا


عموما هات حته

عبد الرحمن said...

بصراحة يا أشرف إنت اللى غلطان
أصل مادامت البطيخة من غير بذر، يبقى طبعًا ملعوب فيها (ما تفهمنيش غلط لو سمحت) ملعوب فيها هندسة وراثية وكدة، ومادام الموضوع فيه هندسة وراثية يبقى طعم البطيخة أكيد ح يكون بالظبط زى طعم قشرتها
عموما إنت فطستنى على روحى م الضحك
الله يكون فى عونك

أراك لاحقاً said...

موضوع مش ممكن :) !
انا حصل معايا موقف اسوأ من كده مع البطيخ :) . .

عبد الرحمن أبو بكر said...

اشروف الجميل

ههههههههههههههههههههههه والله موتني من الضحك يا مان

دي مش بطيخة دي ممكن تقول عليه شمام متنكر في زي بطيخة والله انا لأول مرة اشوف بطيخة صفرة خالص من جوة كدة انا اسمع انهم يقولوا ان في بطيخ احمر وبطيخة قرعة بس اول مرة اشوف بطيخة شبه الطريق الصحراوي كلها صفره من جوه

عموما يا مان خيرها في خيرها بس ما تبقاش تشتري من السوبر ماركت بقي تاني

Oss said...

ده شمام يا دوك
وأهو نوع من القرعيات زى البطيخ يعنى ماروحناش بعيد
على العموم روح للسوبر ماركت واقعد جنبهم وأى حد يدخل عايز بطيخ خليه يشوفها
وأهو تكون كسبت ثواب
بس فى النهايه الذنب ذنبك
"الزعيم يلهط على طووووووووول"
انت زعيم دوله
لأ
خلاص ده بطيخ زعماء مالناش فيه

تحياتى

Ahmed zakzouk said...

بص يا معلم
البطيخ ده فعلا لونه اصفر و بنستورده من الخارج.
و طعمه حلو زي البطيخ العادي و أهم ميزه فيه بالنسبه لي أنه من غير بذر.
صحة و عافية:)
و ده لينك للمزيد من المعلومات
http://en.wikipedia.org/wiki/Watermelon#Varieties

مواطن مصرى نايم said...

هههههههههههههه

خلاص بعد كده و انت بتشترى بطيخ

حط فى بطنك قلقاسه صيفى
ايه دا يا اشروووف
دا بطيخ
دا ممكن يكون
ييخ
من غير بط خالص
هههههه
14
جنية
يا اشروف فى قلقاسة
يا راجل
و دليفيرى
لا كده البغدده حتجيبك لورا
ممكن اتصور مع البطيخة
و الا اتاكلت كلها
هههه
من غير بذر
دا البذر حتى احسن منها
تحياتى يا اشروووف
eslam

Amy said...

كلها كدا هجين بين البطيخ و الشمام و القرع العسلي
البطيخ اللي من غير بذر لونه من بره زي اللي معاك بالظبط بس من جوه لونه احمر و طعمه ما يختلفش كتير عن البطيخ العادي

أشرف حمدي said...

والله يا جماعة أنا اللي حفطس من التعليقات المرادي :)
ههههههههههه مش عارف أرد أقول ايه

بس سعيد إني عرفت أضحكم حتى ولو كان على حسابي
هههههههههههههههه

شكرا لأحمد زقزوق على المعلومة من موقع ويكيبيديا
قريت هناك ان البطيخ الأصفر ده موجود فعلا ويتميز انه أحلى بكتير من البطيخ العادي وانه من غير بذر
أحب أقول ان البطيخة المعجزة اللي في الصورة دي طعمها قلقاس ومافيهاش ذرة سكر واحدة وفيها بذر أبيض صغير وأكلها نوع من التعذيب بجد
الظاهر ان نوعها أصفر فعلا بس قرعة
يعني يا ربي يوم ما اشتري بطيخة تطلع نوع غريب وكمان أقرع

أعتقد أن المستوى بتاعها حلو بس خلاص توبة
حشتري بطيخ ع السكين بعد كده
تحياتي

ناجي العلي 2000 said...

ههههههههههههههههههههه
دي بط منغير تيخ

المهم ... عملت اية في القشر ... اوعي تكون رميته ... ده بيرجع للسوبر مركت تاني زي الفارغ بتاع الكوكاكولا

سالي محمد سالم said...

اشرف؟ايه اللى ف ايدك ده؟أرميه بسرعه
هههههههه
مش قلنا بلاش بغدده..تستاهل بأه
ماله عصير القصب

enjy said...

بالذمة بالذمة حد يطلب بطيخ دليفرى ومن مترو كمان يا عم عيش عيشة اهلك..... وبعدين هو قالك من غير بذر يبقى اكيد هتبقى بطيخة ملعوب فى جيناتها الوراثية هى سبه البطيخ وصفراء زى المانجة ومافيهاش بذر زى الموز وطعمها زى القلقاس يبقى اكييييييييييييييييييييييد ملعوب فى جيناتها ... بعد كدة ياعم ابقى انزل استرى من السوق وبلاش الاطة

مواطن مصرى نايم said...

اه صحيح يا اشروووف
ايه اخبار مجلة القرطاس
مفيش جديد
هما بتوع موقع ماشى مش كان فى كلام معاهم
اشروف ما تنتجها لحسابك
حتلاقى اللى يمول كتييييييييير
دى جامدة
و الله
يا رب الموضوع دا يتم

Che The Hermit said...

هههههههههههههه

يا دكتور دي برتقالة يا دكتور بس حجم عائلي شوية

تحياتي
تشي

وينكى said...

انا عرفت حل المعضلة
دى مانجايه خافت من الحسد فاتنكرت فى زى بطيخه
وامعانا فى التنكر عملت نفسها بطعم القلقاس
مش عارفه اقولك ايه بصراحه
قصدى مش عارفه انطق اصلا من كتر الضحك
الكيان ده لازم يتحط فى متحف

ابتسم من فضلك said...

يا نهار ازرق انت مشكلة بجد اية دة دة انا قربت اموت من الضحك ارحمنى شوية
هههههههههههههههههه
روعة فعلا

اهو ده عيبه said...

والله العظيم موتنى من الضحك
دى يافندم ممكن تعملها صينية قرع عسلى بلونها المشمشى الجميل ده
انما دى لا يمك تكون بطيخه ابدا
دى حتى مطلعتش قرعه
دى طلعت صفرا

عليه العوض ومنه العوض

Anonymous said...

أنا شايف إنك مدلع شوية يا أستاذ
وبعدين انت اتلسعت من البغددة كام مرة
فيها إيه يعني لما تنزل لعم ضاحي الخضرجي والفكهاني وتجيب منه واحدة عالسكين بسبعة جنية وتشيلها على إيدك الكريمة ......ليه بس الفزلكة

ملحوظة: "عم ضاحي بتاع البطيخ عالسكين" ده أكبر واحد بتاع بطيخ عندنا في البحيرة

Al Zaeem said...

يعني سبحان الله
انت اتلسعت كام مرة من حوار البغددة ده
وفيها إيه يعني لما تنزل لعمنا الفكهاني وتشتريلك واحدة عالسكين وتشيلها بإيدك الكريمة دي ده مش بعيد يدوقهالك كمان وانت بتاخدها ومش هتدفع أكتر من سبعة جنية

ياريت كلكوا تدعو لعم ضاحي بتاع البطيخ اللي عندنا أصله مظبطنا

ياعم بلا سوبر ماكو بلا بتاع

Amr Fekry said...

ههههههههههه

بطيخ اصفر !

fr3oon said...

جميله اوى الصورة دى يا فنان
بس البطيخة دى انا شاكك فى امرها
هى منجاية وبتستعبط او بطيخة وعامله منجاية
فيه احتمال علمى بحت تالت
انها تكون بطيخة مزروعة فى ارض مانجا
انا متبرع بربع جنيه معدن بس ادوق طعمها ايه :)

Amr Fekry said...

عرفت مصفر ده موجود عادى فى اسبانيا ومنتشر زى البطيخ الاحمر
البطيخ الاحمر اسمه : Sandia
والاصفر : Melon

د حاتم البيطار said...

ههههههههههههههه
البطيخ زي الجواز يا قارعة يا شعرها اصفر

Counter