Total Pageviews

Wednesday, June 25, 2008

كفااااية بقى

كفاية بقى
مش كفاية بقى ؟
يعني هو مش كفاية بقى بجد ؟
ايييييه ؟ عاوزين مني ايه ؟ أسرق ؟ ما بعرفش ، أنصب ، ياريت كنت أقدر
طب مطلوب مني ايه طيب ؟ ماهو حد يقوللي ويرد عليا




يعني مش كفاية أم العيشة كلها اللي بقت نار كمان التليفون الأرضي ؟
طب فاضل ايه تاني ؟ ايه تاني نسيوا يغلوه علينا ؟
آه صحيح ، ماحنا مابندفعش تمن الهوا اللي بنتنفسه
طبعا ده عشان احنا شعب سلبي وراضي وساكت وبيقول الحمد لله
ماهو المهم تقول الحمد لله ، صح ؟ وإلا تبقى كافر لا سمح الله
خد على قفاك وقول الحمد لله ، كفاية بنشم هوا ببلاش



10 comments:

واحد من البلد دى said...

السلام عليكم

والنبى يا ابو عمرو يا اخويا
الحكاية بقت بجد حاجة تخلى الأقرع -اللى هو انا-يشد فى شعر إيده
يمكن الناس دول ما عنهمش فى قاموس لغتهم ثلاث كلمات(رحمة-حرام-كفاية)
أو يمكن لغتهم كلها كلمة واحدة زى عفريت الخالة نوسة كده(أدينابابا)
كده يبقى غصب عنهم
وبعدين مستعجل ليه ع الهوا بكره يلوثوه و يستوردوا هوا من بره و يبيعوه و اللى مش عاجبه
(يشم ملوث بقى)
ربنا يرحمنا
أو ياخدهم
أو ياخدنا
؟؟؟؟؟؟؟؟؟؟؟؟؟؟؟
؟.؟؟؟؟؟؟؟؟؟؟؟؟؟؟؟؟
أو نروح له


أستغفر الله العظيم

سلامى لعمرو
ودعواتى لك و له بهجرة قريبة إن شاء الله

ketchup said...

الله اكبر

كدا ضمنا ان تليفون البيت هيتقفل بالقفل و مش بعيد يتشمع بالشمع الاحمر

و ربنا يبارك لفودافوون و موبينيل و اتصالات الرزق اللي هيجيلها من ورا الموضوع ده

و بهذه المناسبة احب اهدي اغنية تليفوني بيرن ترررن تررررن
للبشمهندس احمد نظيف راعي الرياضة و الرياضيين و ربنا يوريني فيه يوم

Oss said...

هنسمع قريباً عن زيادة اسعار ...
والله ما انا عارف حاجه تضحك اكتبها
كل لما افكر فى حاجه الاقيها اصلاً غاليه

حسبى الله ونعم الوكيل

هو صحيح سيادة رئيس الوزراء(خلينا فيه) لما بينزل السوق علشان يشترى كيلو بطاطس مثلاً بيزعل لما يلاقى البطاطس غليت ولا بيفاصل ولا بيدعى على وزير التموين ولا هو اصلاً مابينزلش السوق ولا هو اصلاً مابياكلش بطاطس من مصر ولا هو اصلاً عايش فى الوليات "عذراً الولايات"المتحده الأمريكانيه
وقس على ذلك باقى..
باقى إيه
كل حاجه عايشين فيها

تحياتى

بطوط حبوب said...

طب الحمد لله

وانت عامل ايه دلوقتى؟؟

نعكشة said...

يا سيدي اتكلم من الموبايل حد جبرك تتكلم من التليفون الارضي
ناس غريبة والله


هوه انا لية حاسة ان المشاكل كلها تفاقمت مرة واحدة
يعني في غضون سنة او هيا السنة دي مش فاكرة
بدأ كل حاجة تغلا بالاضعاف
ماهي دايما بتغلي انا عارفة
بس الوض باظ قوي الفترة دية

هوه إية المشكلة؟؟؟

دمت سالم

وربنا يستر علينا

ولا اتفق معك في الكاريكاتير


سلامون عليك

أشرف حمدي said...

واحد من البلد دي
دول ماعندهومش غير كلمة واحدة في قاموسهم وهي

"قولوا الحمد لله"
أو
" أحمدوا ربنا ان ماحصلش كذا وكذا "

يعني انا أكتر حاجة تغيظني لما الحرامي يتكلم في الدين ويقوولي : قول الحمد لله اني سرقتك بس ماقتلتكش

شكرا على التعليق
-----------------
Ketchup
أضيف على كلامك اني بجد نفسي أعرف شعور سيادة الوزير طارق كامل وهو بيقرا التعليقات على الخبر في موقع مصراوي
والله العظيم تلاتة أنا لو مكانة وقريت بعنيا الشتيمة دي من الناس لأنتحر فورا

يا خوفي لتكون شركات المحمول هي اللي ضغطت على المصلحة تعمل كده عشان يكسبوا هما أكتر
-----------------
OSS
بطاطس ايه ؟ هما دول بتوع بطاطس ؟
البطاطس دي اتخلقت عشان ناكلها احنا في زيت العربيات ده اللي بيغلا بمعدل مرتين في اليوم
حسبي الله ونعم الوكيل
-----------------
بطوط حبوب
أنا والحمد لله اتخرب بيتي وبشحت دلوقتي
الحمد لله
-----------------
نعكشة
ماهي سنة سودا والحمد لله
واللي جاي أسود من السواد على رأي محمد صبحي في مسرحية ماما أمريكا
شكرا على التعليق

ناجي العلي 2000 said...

والله يا باني مش عارف اية ممكن يحصل تاني

وانت بتقول فيها !!!!!!!؟
والله مش بعيد يعبو الهوا في قزايز ويبعوه زي المية المعدنية

انا شكلي الشتاء الجاي هاعمل بيات شتوي واريح دماغي
:(

Anonymous said...

يخرب بيت سنينك يا أشرووف
الكاريكاتير موتني من الضحك و علي فكرة فيديو التدخين رغم أني مش متفق معاه طبعا ..بس بجد فكرته تحليليا رائعة ..كل اصحابي اللي حكيتلهم عليه عجبهم جدا

كويس ايديك مشيت أهي زي زمان و رجعت تمتعنا:)

د.حسام

اهو ده عيبه said...

والله يا استاذ اشرف انا سامعه ان الكهربا كمان هتزيد
ومش بعيد ياخدوا مننا ضريبة للمشى فى الشوارع واستعمال الارصفه
والكح والهرش والعطس وكل الافعال اللاارادية والارادية
وخلى الحكومة تعيش

Amr Fekry said...

انا داخل المدونة دلوقتى مخصوص عشان اعلق ع الكاريكاتير ده اللى وقع قدامى بالصدفة ع الفيس بوك

مسسسسخرة
ياريت تعمل سلسلة وقفة مصرية :D

Counter