Total Pageviews

Saturday, September 06, 2008

عمارة أشروفيان - الحلقة الاولى


أقطن في عمارة جديدة منذ عام تقريبا ، عمارة أنيقة للغاية ، تتوسطها حديقة كبيرة ونافورة أرستقراطية فاخرة وإن لم أرها تعمل حتى هذه اللحظة ، أكثر سكان العمارة من الأثرياء العرب ، وبعض محدثي النعمة ممن تمثل النقود في أيديهم تباينا شديدا مع هيئتهم التي لا توحى بأي ثراء مادي أو فكري ، يصطف امام العمارة موديلات فريدة من السيارات لا أراها إلا في السينما ــ أفلام الأكشن تحديدا ــ هذا بالإضافة إلى شركة إنتاج فني ومعرض أنتيكات ومؤسسة ديموقراطية مرموقة و ... لحظة واحدة ، قبل أن تبدأوا في طقوس الحسد دعوني أكمل تدوينتي بالله عليكم من خلال سرد بعض المواقف العجيبة بالنسبة لي ، الطريفة ــ ربما ــ بالنسبة لكم .
الشيطان الصغير الذي يقطن بالشقة المجاورة وقد جرت العادة على تسميته بطفل وهذا خطأ لغوي شائع ، كان يلعب بالكبريت في يوم غابت فيه الام عن المنزل ، وفي خلال ثوان امتد الحريق من الملاءة إلى الستائر إلى كل شيء قابل للاشتعال وتحولت الشقة إلى الجحيم ذاته ، هذا شيء لا يهمني بالمرة ، المهم بالنسبة لي هو طبق الاستقبال في شرفتي والذي انصهر تماما هو والسلك وأصبح مجرد قطعة خردة لو قمت ببيعها روبابيكيا لحصلت على جنيهين على الأكثر ، وفي الغالب سأتصدق بهما لبائع الروبابيكيا المسكين ، العجيب أن الطفل لم يعاقب أبدا على ما فعل ولو بتكشيرة وكلمة : إخص عليك يا سوسو ، ولم يقل له أحد ان هذه جريمة ، ولو كنت وافقت بعض المنصحين في تحرير محضر إهمال لهم لكانوا الآن خلف القضبان ، وانتظرت أن يعرض علي أي شخص ولو مجرد عزومة مركبية أن يتحملوا الخسائر المادية التي بلغت مائة وخمسين جنيه ثمن طبق الاستقبال والسلك وتكلفة التركيب ولكن هذا لم يحدث ، وحينما لمّحت في إشارة واضحة بأنه من المفترض أن يتم تعويضي قوبلت بتجاهل تام ولا مبالاة جديرة بموسوعة أم فتحي للتناحة الشعبية ، طبعا انتم تلومونني الآن بمنطق : هما الناس في ايه ولا ايه حرام عليك ، مش كفاية الشقة بتاعتهم اللي ولعت ؟ أقول لكم بأنه تم إصلاح تلفيات الشقة بالكامل والتي يبدو أن تجاوزت مئات الآلاف من الجنيهات في أقل من ثلاثة أيام ، ثلاثة أيام يا بشر وعادت الشقة أفضل مما كانت بعد شراء أثاث جديد وستائر وسجاد وأبواب ومقابض نحاسية وتحف بالإضافة إلى إعادة الطلاء بالكامل طبعا ، هم أثرياء حقا ، أثرياء جدا ، وبالرغم من ذلك لم يفكر احد منهم في كيفية الحصول على مبلغ مائة وخمسين جنيه بالنسبة لي ، هذا مبلغ فادح ، يكفي أسرتي طعاما لمدة أسبوع على الأقل . ربما لو كان احدهم قد عرض علي التعويض لرفضته في أدب ، ولكن ما يثير حنقي هو التجاهل التام ، عموما أنا مسامح .
في التدوينة القادمة أحكي لكم عن البمبى المسخسخ وكيف أنه يثير بداخلي مشاعر عنيفة من الـ ....
ولكن هذه تدوينة أخرى

15 comments:

لماضة said...

ههههههههههههههه
فكرتني بحادثه مشابههه لعمارتنا العزيزه برضه
السنه اللى فاتت ايام امتحاناتي حصلت عندنا حريقه في الدور اللى تحت اللى تحتنا
في البلكونه بس
والنار وصلت لعندنا وكان يوم يعني
المهم
لاقيت بابا طالع جري
بقوله ايه هتاخدنا وننزل قالي لا انا جي اشيل الكيس المتنشر عشان النار متمكسش فيه
قلتله انت خايف على الكيس مش خايف على ولادك
طيب ايه رايك بقى الحريق ده بسببك
قالي ليه انا مالي انا كنت تحت
قلتله لا ده بسبب انك كنت بتلعب في الكبريت وبدخن وعقب السيجاره وقع في البلكونه دي
ههههههههه
وامي دخلت تاخد كل الدهب والفلوس قال يعني عندنا فلوس بقى الست خايفه على املاكها
انا الصراحه سبت الكتب قلت يمكن تولع ومدخلش الامتحان وينجحوني رأفه
تحياتي ليك يا فنان

على فكره كاركاتيرك عامل معانا شغل جامد قوي في يوميات صائم

TAFATEFO said...

كل سنه وحضرتك طيب يا دكتور

ومتقلقش .. هي بتبتدي بالشقه .. وبعجين الفلوس تعديك

اللي يسكن وسط الأغتياء يتعدي .. ويبقى غني

واللي يسكن وسط الفقراء .. يتعدي ويبقى فقير

بكره تقول اني قلت .. بس متنساناش بقى

Daian said...

يعوض عليك ربنل فى الدشو السلك
المشكلة زى م قلت هى ثقافة اللا مبالاه و تجاهل الاعتذار عن الخطأ و ده مش مستوطن غندكم فى العمارة بس ده تقريبا احتل مصر كلها
لو حابب نطلب من الاخوة المدونين ونعملك جمعية و اقبضها انا الاول و اهرب على لندن و ابقوا هاتونى بقا من هناك

أكون او لا أكون said...

ربنا يعوضك...
طبعا هم مش حيعوضوك... انت فاكر الفلوس ده جت منين.... هههههههههههه من التدكين...
يعني لو كل ماابنهم عمل مشكله وهم يعوضوا ... حيبقوا على الحديده...

HopiZ said...

ايه الى وداك تسكن مع الناس دى بس يا عم اشرف؟
بس على العموم الناس دى موجوده فى كل حته
العيب مش فى العمارة
و مبروك عليك الجنينة و النافورة

Andrew George said...

التناحة كنز لا يفنى

بس طالما كان ممكن تعمل محضر إهمال، ليه ملمحتش لكدة برضة؟

يمكن كانوا يخلوا عندهم دم ويعرضوا عليك ساعتها، وبعدين بصراحة فى الحالة دى مفيهاش حاجة عيب انك تقبل التعويض، دول 150 جنية مش 15 جنية!!

مواطن مصرى نايم said...

هههههههههههههههههههه
سيبك انت من الواد و من الخسائر
انا مستنى البمبى المسخسخ
ههههههههههههههه
لدرجة انى بفكر جدا اجى لك عشان تحكى لى
هههههه
و ممكن انا اتكفل بالمائة و خمسون جنية

بس عارف يا اشرووووف
انا متغاظ من الناس دى
و الله بجد
عيب يا سوسو
و الله دا استهبال فى حجم الجبال
ايه العالم دى
و الله العظيم انا كان حيبقى ليا تصرف
خطير
و انا مفترى فالمواقف اللى زى دى
يعنى صعيدى اووووى
و ممكن اخطف الواد و اطلب فديه مائة و خمسون جنية
حقى لا اكتر
ربنا عالظالم
مستنين المسخسخ

Dexter! said...

ممم
هم ناس تنحين

و في مثل بيقولك لا يفل الحديد إلا أحمد عز

كنت تسوق التناحه معاهم

انت اللي غلطان يا اشروف

و يعوض ربنا علي الدش ياعم

ألا قولي هوا الدش دا كان فيه أوروبي

لو فيه اوروبي يبقي يستاهل الحرق
هههههههههههههههههه

يعقووبوو said...

إشتكي
عندنا مثل بالكويت: إلي يستحي مايعيش

هما ما إستحوا خلك مثلهم

تحياتي. يعقووبوو من الكويت

Tar2a3a said...

أولا: فداك مليون طبق يا أبو الأشاريف

هو المجتمع اللي إحنا فيه مليان سلوكيات غبية تعمل ايه بقي؟


ثانيا : أنا شامم ريحة أحمد خالد توفيق

بجد الراجل ده كلنا متأثرين بيه

مستنى البمبي المسخسخ على ناااااااااااار

Anonymous said...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

ياسر حسين said...

الله يعوض عليك
كانوا زمان بيقولوا
اختار الجار قبل الدار
وكمان بيقولوا
النبي وصى على سابع جار
لكن مع الاسف اليومين دول بيقولوا
كن عدوانيا مع جارك تأمن مكره
:)

خالص تحياتي

مقاطعـــــــــــــون said...

يا خبر دا انت طلعت طبقه برجوازيه بقى هو يعنى ايه اصلا برجوازيه؟؟؟

http://mokat3een.blogspot.com/
شارك حمله مقاطعون نحن نرفض اى قرش يدفعه العرب للتتربح من ورائه اسرائيل وغيرها رافعه شعار ان العرب يستفيدون من وراء شركاتهم ولا تتسببوا فى قطع ارزاق الناس انهم يضغطون علينا بلقمه خبز
فسحقا لاى لقمه تاتينا منهم فى مقابلها الاف يموتون من اموالنا شارك ولا تتردد
وجزاكم الله كل خير

ketchup said...

كل سنة و انت طيب يا فنان
و على رأي المثل الطبق الاسود بينفع في اليوم الاغبر

و بعدين صحيح الناس شقتهم محروقة و انت كمان عاوز ثمن الطبق

اظن ان الطبق الوحيد اللي ممكن تاخده وقتها هو طبق فول بالزيت الحار و حزمة بصل اخضر

أشرف حمدي said...

انا حاسس إن عمارة أشروفيان دي عاوزة مدونة تانية لوحديها
عندي حلقتين كمان لحد دلوقتي ده غير اللي في دماغي
عموما شوفوا الحلقة الجاية عن البمبة المسخسخ
أهو بدل مسلسلات رمضان هههههههه
تحياتي

Counter