Total Pageviews

Saturday, June 13, 2009

عدو الله


وكما قال الشيخ الجليل ابن أبي الأهطل فإن الزبيبة خيرٌ من الزبيب ، وسحب نفسا من لفافة الحشيش الأفغاني وأكمل : لعنة الله على كل فاحش وفاسق وعربيد ، وكل من يلعن ويسب ويشتم ، وكل ابن ستين تييييييييت ، تييييييت ، يلعن تييييت أبوهم كلهم ولاد تيييييييييت ، هذا وبالله التوفيق .

حان الوقت كي استعرض بعض مما مررت به من مواقف مع ذوي اللحى وزبيب الصلاة والمسواك والبنطال القصير ، بعدها يمكن أن نصل الي استنتاج منطقي عادل ، ولكن وقبل كل شيء فأنا أعلن وبشكل واضح عن النقاط التالية :

أولا : أنا أتعمد السخرية اللازعة الصادمة والفجة دون أي ضوابط أو محاذير ، من يجد في ذلك جرح لشعوره أنصجه ألا يكمل قراءة التدوينة .

ثانيا : هذه كتابة عنصرية متعمدة ، ايييييييون ، أنا عنصري مع العنصريين ، والمعاملة بالمثل ، من يرفضني فانا أرفضه ، ومن ينصحني فأنا أنصحه ، ومن يقوّمني فإنه بهذا يعطيني الحق المطلق في تقويمه أنا ، وكل وفقا لما يراه صحيح من وجهة نظره ، سأقول ما يعجبني وسأنشر التعليقات التي تعجبني وأحذف ما لا يعجبني في هذه التدوينة تحديدا . هذه ليست مساحة للنقاش أبدا .

ثالثا : لو كان لهويتي الدينية أهمية ما هنا فأنا أعلن أنني مسلم من أب وأم مسلمين ، ولو كانت هناك نية مسبقة لأية اتهامات قذرة فأنا أعلن وبشكل واضح عدم سخريتي من الاسلام الذي أتشرف بكوني منتميا له ، كلامي موجه لفئة بعينها معروفة تماما وهي من وجهة نظري أنا لا تمثل الاسلام في شيء ، وقد أطلقت علي كل فرد منها اسم : عدو الله ، وليسامحني الله إن كان ذلك إثما .

المواقف
عدو الله رقم واحد
الموقف الأول
كان مكتبه يجاور مكتبي حينما كنت أعمل بوقت كامل في إحدى المجلات المتخصصة ، وكان يحتل منصبا مرموقا وهو منصب رئيس التحرير بالرغم من كونه مجرد مصحح لغوي غير متخصص ولا يعرف معنى كلمة هاكر بالرغم من أنها كانت مجلة كمبيوتر اساسا ، كانت البداية حينما استدعاني إلى مكتبه ــ حينما كان له مكتب مستقل ــ وسألني : ايه الصورة اللي انت حاطتها مع موضوعك ؟
ــ موضوع ايه وصورة ايه ؟
ــ الصورة يا أخ أشرف ، صورة السيدة مريم
ــ مريم ؟؟؟ موضوع ايه ده ؟
ــ الصورة يا أخ أشرف ، استني ، هات كرسي عقبال ما أطلعهالك ، اتفضل ، الصورة دي

ظننت أنه يداعبني فرحت أضحك في هيستيريا ثم وجدته ينظر لي في جدية وصرامة فتمالكت نفسي وسألت وأنا على يقين أنه لا يزال مستمرا في دعابته مشيرا إلى الصورة :
ــ آه صورة الموناليزا ؟
ــ موناليزا ايه ؟
لا ده الموضوع بجد بقى يا جدعان ، ده بيسألني موناليزا ايه
ــ إحم ، الموناليزا ، الجيوكندا ، أشهر وأهم لوحة في تاريخ الفن ، ليوناردو دافنشي
ــ همممم ، انا شكيت فيك بصراحة وافتكرتك مسيحي والعياذو بالله ، بص يا أخ أشرف كل ده حرام أساسا
ــ وهو مش حرام يا ريّس صور البنات في اعلانات المجلة يعني ؟
ــ حرام طبعا وانا رافض الحكاية دي بس مافيش بإيدي حاجة أعملها ، ده شغل رئيس مجلس الادارة .
ــ هممممم قلت لي ، طب اسأل رئيس مجلس الادارة لو مش عاجباه الصورة يشيلها .

الموقف الثاني
صوت تلاوة قرآنية ترج المجلة كلها ، معي بالمكتب بعض الأخوة الأقباط ، كما أنني لا استطيع التركيز فعملي كتابي هنا ويحتاج إلى صمت تام ، سألت عمن قام بذلك فأخبرتني السيكرتيره أنه رئيس التحرير وقد أمر بتشغيل المصحف المرتل عبر شبكة من السماعات تنتشر في كل غرف المجلة ، بكل بساطة قمت بقطع سلك السماعة وواصلت عملي في صمت

الموقف الثالث
كنت على وشك الانفجار وأنا أرى صورة لاراكرافت المصاحبة لتقرير من اعدادي عن لعبة تومب رايدر \ مغيرة القبور وهي مقطعة الأطراف ، لاراكرافت أصبحت من ذوي الاحتياجات الخاصة كما أن الصورة أصبحت بشعة من الناحية الفنية ، ميييييييين عمل كداااااااااه ؟ قالوا لي رئيس التحرير ، قمت بالاتصال فورا بالمشرف العلمي للمجلة فأخبرني بأنه لا علاقة له بالموضوع وإن كان يرى أن ذلك في صالح المجلة حتى نتمكن من نشرها بالسعودية ، همممممم سعودية ، قلت لي

الموقف الرابع
أكتب عن قلادة مزودة بكاميرا رقمية ، أرى زميلتي بقسم الجرافيك وهي تقوم بتلوين رقبة السيدة التي ترتدي القلادة لتبدو وكأنها ترتدي كول أوفر ، ليه كده ؟؟؟؟ دي رقبة والله يا جدعان ، مش صدر يعني ، رقبة ورقبة وحشة كمان ، إنها أوامر رئيس التحرير
، هممممم قولتي لي

الموقف الخامس
انتقل مكتبي ليصبح بجوار مكتب رئيس التحرير ولا تسألوني كيف ، هذا ما حدث ، وجدني أضع السماعات على أذني وأنا أتابع بعض الأخبار على شبكة الانترنت، سألني
ــ بتسمع ايه يا أخ أشرف ، قرآن ؟
ــ لا ، بسمع أصالة
ــ استغفر الله ، لا ما تسمعش أصالة
ــ حاضر
وشغلت أغنية لشيرين وتجاهلت نظراته النارية المغتاظة .

الموقف السادس
أحداث الفتنة الطائفية في عين شمس ، مجموعة من المخابيل قاموا بالاعتداء على كنيسة هناك في محاولة لهدمها وحدثت اشتباكات بين المواطنين ، كان الصراف يحكي لرئيس التحرير عما شاهده
ــ وبعدين قام الواد المسلم مسك قزازة وهدفها جت في دماغ الواد المسيحي
ــ الله أكبر ، أحسسسسسن ، تعرف بقى ؟ لو كان المسيحي مات كان مات على ضلالة وراح جهنم حدف .
وضعت السماعات على أذني وقررت سماع ألبوم أصالة
عدو الله الثاني
رجل وقور بلحية تصل إلى صدره ويسمع شريط الشيخ محمد حسين يعقوب ، اشتريت منه أداة غريبة الشكل يمكن من خلالها وصل الهارد ديسك العادي بالكمبيوتر من خلال منفذ يو اس بي ، ثمنها خمسة وأربعين جنيه ، ومضروبة تماما ، بالطبع تأكدت من أنني أستخدمها بشكل صحيح وحاولت عشرات المرات ، ولم استطع العودة إلى المحل نظرا لظروف عملي ، هذه هي أول بضاعة مضروبة أشتريها في حياتي من مول الكمبيوتر بشارع جامعة الدول بالرغم من اعتيادي على شراء ما احتاجه من هناك
.
عدو الله الثالث
الموقف الأول
وجدته يقول لزميل لي بالمكتب : تعرف يا أخي ؟ انا عندي ليك شريط أغاني انما ايه ، بيتكلم عن الحور العين والجنة ، حاجة كده تخليك ، تخليك عاوز تمسك سيف كده وتنزل تجاهد
وراح يلوح بيديه وكأنه يقطع الرقاب ، يجاهد مين ويقطع رقاب مين الله أعلم
.
الموقف الثاني
زميلة لنا قررت خلع الحجاب ، هذا شأنها بالطبع ، ولكن هذا لن يمر على الشيخ ، فجأة وجدناها تصرخ فيه أن يكف عن الكلام معها ، وعلمنا بعد ذلك أنه كان يحاول هدايتها على حد قوله
.
الموقف الثالث
وهو الأخير ، حيث أنني فوجئت به يشتمني بلفظ بذيء للغاية حينما كنت أداعبه باقتراع أن نأتي الشركة غدا بلا ملابس نيوديتي داي ، الغريب انه تلفظ بهذا اللفظ شديد البذاءة بالرغم من لحيته وزبيبته ، وحينما سألته مش عيب على دقنك وعلى زبيبتك الكلام ده قال لأ مش عيب وانا بقولها عادي ولو مش عاجبك اتفلق .
بالطبع لم أرد عليه ، وأكتفيت بتذكيره أنه بإمكاني الرد عليه وبشكل أكثر بذاءة إن أردت ولكن أخلاقي تمنعني من ذلك
.
عدو الله الرابع
جلس بجانب سائق الميكروباس وقال :
ــ نسوان مصر دول كلهم شـ ..... ولا شـ .... ، وإجوازهم معـ ..... كلهم ، حاجة بنت ميتين ........
ــ ايه يا عم الشيخ عيب الكلام ده العربية فيها حريم ما يصحش الكلام ده ، والكلام للسائق الذي من المفترض أنه معتاد بذاءة أصلا
ــ أنا بشتم يا سيدي ، ولو حد ابن ستين ..... مش عجبه كلامي ويقوللي عيب على دقنك أقوله روح يا خـ ..... شوف مراتك بتعمل ايه .

حسنا ، تعليقي سيكون في التدوينة القادمة ، وسيكون هادئا وموضوعيا .
في انتظار تعليقاتكم أولا .
تحياتي






32 comments:

فنان مسلم said...

في انتظار البوست الهادئ والموضوعي :)

mUsLiM said...

فى الحقيقه انا شايف الموضوع مش بيناقش قضية حقيقية ولا شايفه نقاش موضوعى بالصورة اللى نقدر نستفيد منها

انا ملتحى وانت أوردت أمثله سيئة للغاية لاشك عندى لا تعبر عن كل الملتحين ان كنت تتعمد الكلام عنهم

وعلى كل حال ، لاشك الاسلام ليس مظهر خارجى ولكن المظهر هذا من الإسلام

فليس الاسلام فى اللحية ولكن اللحية فى الاسلام

السلام عليكم

adel said...

اشروف :
انا عاجبني ان حد مسلم يتناول موضوع زي ده
و مش انت بس انا مسيحي و بيحصل معايا مواقف تضايق بس طبعا اغلبها بسكت

1-الاشخاص اللي مصممين انهم يشغلوا قرأن في الموضضلات .... طبعا هما حريين و يهدي من يشاء
بس مش كمان يوم الامتحان الصبح و طبعا لو اتكلمت هيقولك انت مسيحي و ....الخ

2-انا بحب البس حظظات و كده ... واحد شيخ قبلني في المترو و قعد يقول لي ده عيب و حرام و كده و كان معايا اصحابي كلهم مسلمين ...اخر ما زهقوا قلولوا ده مسيحي
قالهم يبقي مسكتش و اهديه طبعا انا اضايقت و سكت بس للامانة طلع واحد مسلم معرفوش مسك الرجل غسله

3-حكاية المسيحية و الاسلام و التعصب دي مش موضوعنا بس ... بقيت زيادة قوي و خطر

انا بجد عاجبني الكلام و مستني البوست اللي جاي

Magi Mostafa said...

جميل عجبنى الموضوع والتعريف الاول رغم انى مش بؤمن بالعنصريه حتى مع العنصريين لكن فين المواقف دى بس دانا عدى عليا اكتر من كده ويامى الواحد شاف بلاوى بس ساكت
المشكله ان الناس دى مش قادره تفرق بين الاسلام كدين وبين عادات اوائل من اسلموا واختصروا الدين فى جلابيه قصيره ونقاب اسود وخليننى ساكته احسن

mohamed hassan said...

تحياتي دكتور اشرف
لماذا اللحية في الاسلام و ما هي فائدة اللحية و الجلباب؟
و هل الرسول خرج عن عصره و هل لابد تتشابه كل العصور؟
اذا كان الرسول ولد في ايام كان الرجال يلتحون و يلبسون جلبابا
فهو ابن زمنه و لم يغير في مظهره عن زمنه و ايامه٠
ألم يتميز الفراعنة بلبس معين و لم يأتي ذكر ملبسهم في القرآن
و الرومان الم يكن لهم ملبس ذو شكل معين
أنا ابن لزمني ألبس ما يوجد في عصري و بدون مزايدة على احد
كذلك انا لا اربي لحيتي فهذا هو عصري الذي ولدت فيه
و لكنني مسلم و اصلي و اتبع ما اراه صحيحا
هل لديكم دليل اني لا ادخل الجنة
يا اشرف احنا مصايبنا كتير بلاش تتكلم على العالم دي هتجيب لنفسك وجع الدماغ
تحياتي

.:: Code Guru™ ::. said...

Hi There, I like your courage and honesty to put such flaming subject into public domain and let people know that Religion is about Looks or Traditions, its about faith and Love and patients and God be with you.

عمرو فكرى said...

:D

hartaka said...

المواقف دي بيحصل معايا كتير شبهها
انا اؤيدك في موضوع المعاملة بالمثل
انا عن نفسي مقدرش اشتغل في وسط بالشكل دا خالص
وجربت مرة ومستحملتش 6 شهور علي بعض

مشكلة المسلم السلفي انة احادي التفكير جدا وصعب تطبق معاة معايير العقل والمناقشة
بموضوعية لانة مبيعترفش بيها

تحياتي

TAFATEFO said...

مع اعتراضي على الأحكام العامة بس تجربتي الأخيرة في معاشرة الأخوة السلفيين كانت سيئة للغاية وأسوأ مما تتخيل .. أكثر من شهر قضيته برفقة أحدهم كان بمثابة كابوس مرعب

لكن الشخص ده له مجموعة من الأصدقاء الذين أنعم (بكل ما تحمل الكلمة من معنى) برفقتهم الآن .. المجموعة دي كانت كلها معتقلة جماعات إسلامية وطيبين وبشوشين ومسليين وعلى خلق وحياء فوق ما تتصور

على فكره الأخ الأولاني لبسته أكبر خابور في التاريخ .. وإن كان لفظ خابور مش دقيق لأنه لا يعبر عن حجم الخابور اللي لبسه(ملحوظه لم أطلق عليه خازوق لأن الخازوق مش مقلوظ .. و"الخابور العظيم" اللي لبستهوله كان مقلوظ

TAFATEFO said...

بالنسبة ل:"الأداة العجيبة" اللي حضرتك اشتريتها .. هي بدون شك مش مغشوشة بس هي غالية أكتر من 20 جنيه .. تمنها الحقيقي 20-25

علشان تشتغل المهم الهارد تكون حضرتك مخليه ماستر.. بالجنابر .. ماستر مش سينجل

بيشتغل معايا كويس جداً مع الهاردات الساتا والباتا

ل تقوللي الهارد اللي عايز توصله ايه أقولك تحط الجنابر ازاي بالظبط

Anonymous said...

بص يا عم اشرف المساله وببساطه انك قابلت مواقف في الحياه مع اشخاص المفترض طبقا للبسهم وسيامهم انهم ملتومين لكن شم معني كده اني اهاجم كل الملتزمين ظاهريا بالبس لمجرد ان حد عمل كده معايا ...ابسطهالك شويه ..لو افترضنا ان حد بيصلي -وده وارد - وكان حرامي بيسرق بيغش بيعمل اي حاجه تغضب ربنا ومش بتعكس الالتزام اللي المفترض انه يكون عليه ..معني كده اني ابطل اصلي علشان في ناس بتصلي وحشه ...لو واحده محجبه واخلاقها مش كويس ولابسه الحجاب علشان اهلها فارضين عليها ..شكلها وحش اي سبب ..معني كده اني اكره كل المحجبات اللي اختراوا الطريق ده ومقتنعين بيه ..؟ مع احترامي ليك المساله مش كده خالص

Anonymous said...

معلش يا عم اشرف هعلق تاني بعد اذنك علشان في تعليق استفزني وانا من حقي اني ارد ...الاخ اللي اسمه hartaka ده مش فاهم حاجه ..ولو كان اختلط بالسفليين الحقيقين مكنش قال الكلام ده ابدا عنهم ...الغباء اللي مجتمعنا فيه ان اول محد يشتم في السلفيين ويعتبرهم متخلفيين ويطله كام واحد يايده تلاقي ناس طالعه معاهم رغم انهم لا اتعاملوا معاهم فكريا او اجتماعيا ..واحد يسمع ان حد يشتم في الليبراليين ويلاقي اكتر من كاتب يهاجمهم ..يمشي هو كمان معاهم بغض النظر هو قرا مبادئهم وتعامل معهم ولا لا؟ حاجه ممله

Anonymous said...

يا دكتور اشرف خد من ده كتير
مثلا تشغيل القران في الاسنسيرات ليه؟
حتى لعبة يوجي كوتشينة الاطفال يقولوا عليها حرام و يقولوا للعيال عيني عينك دي لعبة للكفرة بس يلعبوها و يومها ابني اصحابة المسلمين كلهم اعطوه كروتهم و هم مش مقتنعيين .تصدق يا اشرف بلا مبالغة اللعبة دي علمت العيال القراءة بالعربي و الانجليزي يعني مش حرام و لا حاجة بس تقول ايه؟
فاكر فيلم ادم بتاع فيلم هندي؟ياريت مصر ترجع كده مسلم و مسيحي حبايب و بيخافوا على شعور بعض .ياريت شيوخ القنوات يبطلوا افتاء و تجريح و ياريت زكريا بطرس يذهب الى الجحيم و نرجع حبايب ياريييييييت

أشرف حمدي said...

بالمناسبة
لقد تعاملت مع السلفيين ، وإذا أردت رأيي فإنهم عالم زبالة
وهذه ليست سبة أبدا أو تجريح إنها حقيقة

أشرف حمدي said...

تفاتيفو
يا باشا أنا قايل في البوست إني جربت كل حاجة ، طبعا عارف إنه لازم يكون ماسر
وماكتفيتش بإنه يكون ماستر بس لأ ده أنا جربت كل الاحتمالات بالجنابر في كل الأماكن ومن غير جنبر كمان
وأديك قلت غالية الضعف وكمان بايظة
طب مربي دقنه لييييييييه ؟؟؟ نصب ؟؟؟؟

Anonymous said...

سيدي الفاضل

مشكلة اخواننا السلفيين دول ان كثير منهم مؤمن بالآتي .. رب لحيتك تربيك
يعني اول حاجة تعملها علشان تساعدك على الالتزام و التدين انك تربي لحيتك و بعدين أخلاقك بعون الله هاتنصلح
يعني بيربوا جيل من المنافقين و اصحاب المظاهر دون التربية الاخلاقية الحقيقية

بس انا من ملاحظتي أقدر أقول ان في شخصيات كثير جدا لا تتغير ..يعني الانسان السافل اللي عمال يشتم باقذع الالفاظ اوعى تتخيل انه قبل ما يلتحي كان لسانه عفيف!
أبدا .. أبدا .. في ناس من دول الحاجة الوحيدة اللي زادت هي اللحية و انه بيعتقد ان عنده مبرر اخلاقي انه يشتم .. يعني قل اللحية كان بيشتم بلطجة بس دلوقتي بيشتم في سبيل الله

في حديث بيقول .. خياركم في الجاهلية خياركم في الاسلام
فاهمني؟

*البت المشمشية *حلوة بس شقية * said...

انا كمان كلامى زى عادل
انا الحمد لله مسلمة بس بصراحة سعات بيبقا فيه استفزاز للمسحين او العكس

Anonymous said...

آآآآآآآه يا اشرف بجد جيت ع الوجيعه
انا كنت في مكـه في السعوديه وعايشه فيها سنين وقابلت سلفين كتير جداااااااا وناس هربانه من امن الدوله ومش متخيل كانت اخلاقهم ازاي يالهوي ع التناحه والبراده جيران معندهمش احساس وزبالتهم دايما في بلكوناتنا ونميمه وغيبه للصبح وهما نفسهم كانو بيتصرفو كدا قدامنا وبيوصلنا كلامهم من ورانا وكانت سنين سوده على دماغنا وبناتهم كانو معايا في المدرسه ومنافستهم كانت قذره جدا ويروحو يوقعو بيني وبين المدرسات والبنات واصلا الوضع مكنش مستحمل من اساسه لاني مصريه

طبعا لما جيت مصر واتعاملت مع مسيحيين كان تعاملهم اكتر من رائع معايا ومحدش استحملني غيرهم ولا حد استحمل غبائي غيرهم

وطبعا في المؤسسات الحكوميه دايما الاقي المنقبه الانيقه الي تجيب لي كرسي وتنصحني اني اقعد في بيتي واستنى ابن الحلال والبس نقاب !! رغم اني والله العظيم لبسي معفن وواسع ودولابي ميعرفش يعني ايه مكياج

الجديد بقى موضوع الغلاسه على المسيحيين في المواصلات وفي كل مكان وبيقعدو يقولو كلام عبيط ايشي تجنبهم في الطريق اطردهم بره مصر مش عارف ايه وكلام فارغ واهبل

والاخوان المتأسلمين بقى دول حكايه وروايه لوحدهم يفتكروك ويفتكرو نصيحتك وهدايتك ايام الانتخابات بس

ياعم دول عالم زباله وزباله الزباله وكل واحد مفكر نفسه دخل الجنه وقاعد بيحاسب البشر ومش لاقي له شغلانه

وربنا بقيت بقرف من مناظرهم وبقرف من خلقهم الي عليها غضب ربنا

طائرٌ حر said...

بيني و بينك..لولا المقدمة اللي قلتها لكنت فهمت شئ آخر..لكن كلامك جيد و إيجابي.. و للأسف الشديد أن القاعدة الان أن (المتأسلمين) كترو في مصر..و العجيب أنك تجد من يكلمك عن تدين الشعب المصري..الذي أجده بكل أمانة نوع من النفاق على الإستهبال على التمسح بالدين لتبرير الأخطاء..

بالفعل يا أشرف أصبح الكثير من المصريين ملتحين(مربيين دقنهم) و ممكن يكون بيسمع شيوخ كتير من الذين لا يعرفون إلا أن الله حرم و لم يعرفو أنه حرم و أحل و أباح و أوجب و فرض..و لم يعرفو أنه غفور رحيم.. و لم يعرفو أن الناس درجات .. و أن الله يقبل من كل واحد.. و أنه لا يمكن أن نحمل كل الناس على عمل ما يقدر السادة الشيوخ السلفيين على عمله..

أنا أسميهم المتأسلمين , و هذا اللفظ ليس اقتباس من أحد و لا أقصد به أحد معين.. بل أقصد به الذين قصدتهم أنت.. الذين يرون المنكر في أفعال الناس و لا يرونه في أنفسهم..الذين يعملون في البنوك الربوية ثم يخرجون ليصرخو و يحذرو الناس من مشاهدة فيلم أو سماع أغنية..الذين لا يتقنون عملهم أو يقدمون لك منتجا مغشوشا بينما يشغل شريط قرآن في محله لزوم البركة ؟
الذي يصطدم بسيارتك ثم يجري هاربا حتى لا يدفع التعويض عن خطأه..


أصبح المظهر الخارجي أهم من الجوهر..و أنا لا أنفي أهمية المظهر و إظهار الشعائر الإسلامية و التمسك بالسنن.. و لكني أعتقد أن التمسك بالفرائض أحسن و أعتقد أن الأخلاق أحسن من المظاهر..و أن الدعوة إلى الله بالحكمة و الموعظة الحسنة و القدوة أفضل من كثير الكلام..و أن عمل رجل يؤثر في ألف رجل و لكن كلام ألف رجل لا يؤثر في رجل ..

أشكرك على التدوينة.. و أتمنى و أسأل الله أن يهدينا و يهدي المسلمين للإسلام الحقيقي.. و ليس للإسلام المظهري

Anonymous said...

لعلمك يا عم ارف ان اخطات في البوست ده باهانتك للسلفيين ..انا افتكر مقال ليك وكنت فيه بتدافع عن الشواذ _من فضلك اقرا مقال الدكتور احمد خالد في بص وطل حاليا- وقريت ليك مقال تاني بتدافع عن البهائين علي اساس ان كل واحد حر فيما يعتقده ..لكن اشمعني يعني الاهانه دائما تكون من نصيبهم ..انا لن اتبرا من كوني سلفيا او اعلن اني سلفي ..بس انا شايف ان هما اختراوا طريق ومن واجبنا اننا نترك علي طريقهم وربنا يفصل بين الجميع في النهايه ..حقك تنتقدهم وتهاجم افكارهم لكن مش من حقك ولا من حق اي حد ان يغلط فيهم لانهم قبل ميكونوا مسلمين ..هما بني ادمين وليهم عقل وعلينا اننا نحترم القرارات اللي بتصدر عن عقلهم ده

أشرف حمدي said...

لحظة سيا جماعة عشان فيه واحد فتح النار على نفسه وأنا حذرت من البداية
الأخ الفاضل اللي بيقول إني بدافع عن الشواذ وعن البهائيين
قريت الكلام ده فين إن شاء الله
لأ وواثق قوي ، وبتقول بالحرف قريت لي
يارتك كنت قولت سمعت عني أو بيقولوا
لكن لأ ، قريتلي بعنيك

طيب يا سيدي ياللي قارت لي ات لي عدد واحد نص قريتهولي بقول فيه أي حاجة من اللي فضيلتك بتقولها

أنا لا أحترم من لا يحترمني ، ولكني أفضل منه لأننه لا أتلفظ ببذاءة ولا بكلام غير واقعي وغير ذي دليل

واجبنا أن نترك لهم ماذا ؟ واجبي أن أترك سلفي يسبني مثلا ؟ أو سلفي يشتم والدتك ويقول أنها ...... وأن زوجها الذي هو والدك مجرد ......

دي سفالة وقلة أدب لا علاقة لها بدين ولا بحاجة أساسا غير قلة الأدب والسفالة

واحد عاوزك ما تسمعش أغاني بالعافية رغم أنك لابس على دماغك سماعات وبتحترم حريته في الهدوء

واحد حرامي ونصاب ومربي دقنه مترين وبيسمع محمد حسين يعقوب عشان تلبس خمسة وأربعين جنيه يا معلم

عاوزني أعمل لهم ايه دول ؟ أكتب لهم رسالة شكر ؟؟؟؟
ماكل واحد يشوف نفسه بيعمل ايه ، متضايق قوي إني بقول للحرامي يا حرامي ؟؟؟

أما حاجة غريبة قوي صحيح

استني بس التدوينة الجاية يمكن تفهم

Knowledge Seeker said...

احييك على مدونتك وعلى ما تكتب
اول تعليق وان لم تكن اول زيارة
المشكل الرئيسي ليس فى السلفين او المتدينين او العلمانين ، المشكل فى ثقافة الرقيب والحكم الذي يمنحها البعض لانفسهم، فجزء كبير من مشاكل المجتمع سيختفى مع توقف البعض عن دس انفه فى شئون الغير
انت حر ما لم تضر

Anonymous said...

أنا أنونيماس غير الأنونيماس اللى فات. معاك حق فى كل ده والتدين الوهابى السطحى والعدوانية سيطرت على كل حاجة. أنا شفت في ميكروباص السواق مشغل أم كلثوم راح واحد ورا صرخ يطلب تشغيل قرآن .. السواق طنش راح التاني توحش وقعد يصرخ : شغل قرآن يا ابن الـ .... لما السواق خاف وشغل قرآن. بعدين الراجل الى ورا نام ولم يسمع حرفا . بصراحة مش بحملك مسئولية كلامى .. أنا مجنون .. لكن أنا مصر على ان دور الدين زاد عن حده فى مصر جدا جدا جدا . كل حاجة بقت دين حتى الاسانسير والموبايل ورأيى ان ده مش صحى. المجتمع كله اتدروش لكن كمان بقى عدوانى وخلقه ضيق وحرامى وشهوانى. لازم الدين يرجع لحجمه الطبيعى يعنى يبقى زى ما كان قبل انقلاب السادات.

أشرف حمدي said...

من يعترض على عدم نشر تعليقه
راجع تدوينتي جيدا فيبدو أنك لم تقرأها
أنا لم أفعل ذلك سوى هنا في هذه التدوينة حتى يجرب أعداء الله شعور القمع الذي يمارسونه على كل من حولهم

حينما تمنع شخصا ما من أن يسمع أغاني أو يضحك أو يكلم زميلته في العمل فهذا أقل واجب
أن امنع تعليقه
ولكن الحق معي أيضا لأنها مدونتي

Anonymous said...

وماذا عن المواقف الصعبه التي تعرضت لها ولكن كان ابطالها من غير السلفيين؟
لماذا لم تذكرها؟

مولتو said...

الحقيقة الموضوع ده جدلى جدا ، ولايقبل التعميم على الاطلاق ، وان كنت ارى بالفعل نماذج غااااااااية فى السوء فبتاكيد هناك نماذج جيدة ومشرفة لدينها ، لكن ده هيدخلنى فى جدلية فلسفية اخرى عن علاقة الاخلاق بالدين ، او بمعنى اخر شكل تطبيق الاخلاق (اوعدمها)
على السلوك فى المجتمع وعلاقته بالدين ، بشكل اسهل فى كثييير جدا من الاحيان تجد قوما كفرة - الكافر هنا مش لفظ من افلام السينما - وانما كافر بمعنى جحوده ونكرانه لليد التى جعلت من انسانا من عدم المهم ، ما يهمنا ان كثير من حالات هؤلاء الكفرة تجد سلوكياتهم واخلاقهم عالية بدرجة رهيبة ولك فى شعب اليابان مثال
الامام محمد عبده - رحمه الله - عندما زار فرنسا قال جملة شهيرة جدا (رأيت هناك اسلام بلا مسلمين ، ورأيت هنا مسلمين بلا اسلام)
طبعا المعنى واضح وهو يرجعنا لفرضية ان الاخلاق حااااااااجة والدين حاجة تانية خااااااالص تتفق مع الاخلاق الموجودة وتدعو لها ، عشان كده انا بطالب بتدريس مواد للاخلاق والتربية فى المدارس يمكن الناس تتعلم حاجة والرسول - عليه الصلاة والسلام - نفسه فصل الاخلاق عن الدين بقوله خياركم فى الجاهلية، خياركم فى الاسلام
والحق اقول لك سيد اشرف ان سوء الطبع لاعــلاقة له علــــــى الاطـلاق بالدين وكل الاديان تعج بالنماذج المخجلة والمشينة لاناس يفترض انهم عرفوا ان لهم اله يراقبهم ، بل الادهى والامر ان كثير ممن لايؤمنون بدين هم اشد رافة ورحمة وبر بالاخرين !!!

أم كوكي said...

هاي اشرف
مواضيعك مميزة كالعاده

متهيألي يهمك تقرأ البوست ده

http://osamalife.blogspot.com/2009/06/blog-post_08.html

Anonymous said...

انا بس عاوز افهم ايه هو ذنب مذهب او فكر ناس مرتبطين بيه وبيطبقوه غلط ...المفروض اني اهاجم الشخص نفسه وليس المذهب بحد ذاته ...يعني لو شخص مثلا اشتراكي وكانت كل افكاره تعارض الاشتراكيه اكيد ههاجم الشخص نفسه لتناقضه وليست الاشتراكيه بحد ذاتها ...ثم ان الناس اللي عماله تقول وهابيه وتخلف وسطحيه دي ..قريتوا انتو ايه عن الوهابيه من مصادر صحيحه علشان نتكلم ونهاجم كده ؟ علي اي حال بانتظار التدوينه الهادئه والموضوعيه

أشرف حمدي said...

مولتو
تعليقك مهم جدا ، وهو ما كنت أنتظره لنشر التدوينة الجديدة
أشكرك بشدة وتحياتي لتعليقك المتميز

أشرف حمدي said...

الذي يسأل عن المواقف الصعبة التي تعرضت لها وأبطالها من غير السلفيين

لماذا لم أكتب عنهم ؟
الإجابة هي التدوينة القادمة بكاملها
هذه هي حلقة الوصل الحقيقية بين التدوينتين

الميكروباص said...

شيء غريب فعلا
أين هذا السلفي الذي قام بسبك وتطاول عليك؟
يا أخي من رأيتهم ليسوا بسلفيين ولكنهم مجانين
فلا تقول ان السلفيين كذا وكذا
نقطه اخرى
هناك شيء حلال وهناك آخر حرام
وليس معنى اني افعل شيء حرام اني موافق عليه
ولكن هذا ايضا ليس معناه ان اتمسك به عندا في السلفيين حتى وإن كان خطأ

Ahmed Fayez said...

انا اعترض على لفظ (عدو الله)
مش من حقنا نطلق اللقلب ده على شخص لمجرد اننا شايفين انه شخص سئ او مش متفقين معاه

فيه ملتحين غير محترمين .. لكن فيه ملتحين محترمين جدا
المشكلة مش في اللحية .. المشكلة في الشخص نفسه

اعتقد التعامل مع الشخص لشخصه افضل من التعامل معاه وفقا لمظهره
الشخص الجيد بيظهر عليه حتى جوهره الجيد

Counter