Total Pageviews

Saturday, August 22, 2009

المساواة في الظلم

يقولون أن المساواة في الظلم عدل ، وأقول مندهشا أن المسواة في الظلم هي منتهى الانحطاط والاستبداد والدكتاتورية بل منتهى الفجور ، كيف يفكر الشعب المصري ؟؟؟
من واقع تجربتي مع مشكلة المياه في عمارتي بدأت فكرة هذه التدوينة ، الشعب المصري يفكر بمنطق غريب جدا ، وهذا المثل القائل بأن المساواة في الظلم عدل هو أحد أوجه هذا التفكير الغريب الذي يحاول تبرير المصائب والنكسات والتعايش معها بمبدأ إشتغل نفسك ساعتها مش حتحس إن حد بيشتغلك .
أتذكر الآن مسرحية تجريبية ــ بالرغم من أنني أمقط المسرح التجريبي ــ اسمها الدنس ، تحكي المسرحية عن جيش دخل إحدى القرى وأغتصب كل نسائها إلا فتاة واحدة ظلت عذراء ، وبعد أن رحل المغتصبون ماذا كان رد فعل نساء القرية تجاه هذه الفتاة ؟ أمسكوا بها وفضوا بكارتها بأيديهن حتى تصبح مثلهن ، لماذا ؟ لأن المساواة في الظلم عدل .
هل تلاحظون هذا السؤال ؟ حينما تتعرض لمشكلة ما في الكلية أو العمل مثلا ويسألك أحدهم : هو إنت لوحدك اللي كده ولا كلكم ؟ فتجيب : كلنا ، فيقال لك : طب خلاص إنت زعلان ليه ؟
يا سلام ؟؟؟
هل هذا مبرر كافي للصمت ؟ هل لأن الجميع يأخذون الضرب والإهانة على أقفيتهم يصبح من الطبيعي أن تأخذ أنت ايضا على قفاك سعيدا راضيا مرتاح البال ؟ ماهو مش انا لوحدي يا عم ، إنت فاكر أنا لوحدي ؟ لاااا دي كل الناس بتاخد على قفاها .
هذه العادة الغبية والمتخلفة والمتأصلة للأسف فينا جعلتنا نخسر الكثير والكثير جدا من حقوقنا المغتصبة منا جميعا بالعدل والقسطاس ، جعلتنا نهاجم ونحارب دون وعي كل من يقف في وجه الظلم حتى يصبح مثلنا جميعا ، وتخيلوا معي هذا المشهد العبثي
.
البلطجي يضرب أهل حارته كل يوم على أقفيتهم عدا واحد ، يجتمع أهل الحارة للتشاجر مع هذا الشخص الذي لم يضرب ويضربونه هم على قفاه و : ايه الظلم ده ؟ إشمعنى إنت اللي مش بتاخد على قفاك يا جدع زينا ؟ طب خد بقى
بالرغم من أنهم يستطيعون أن يضربوا هذا البلطجي على قفاه وفي مناطق أخرى حساسة إن أرادوا ولكنه التفكير المشقلب الذي أدمناه .
وهناك نكتة سياسية شهيرة تقول بأن إدارة المرور قررت ضرب المواطنين على أقفيتهم على مطلع الطريق الدائري ، الشرطي يأمر السائق بالتوقف ثم يضربه على قفاه ويسمح له بالسير وهكذا ، حينما أجرت إحدى البرامج الفضائية حوارا مع السائقين لتسألهم عن مشاكلهم قال أحدهم : والله يا باشا إحنا بنتعب قوي في البلد دي ، مش معقول اللي بيحصل ده ، لازم يكتروا عدد ظباط المرور اللي بيضربونا على قفانا عشان بصراحة بنتأخر قوي في طابور الضرب .
هذه الدعابة الذكية بل شديدة الذكاء ترمي إلى أننا بالفعل نترك الكارثة الأساسية ونتعايش معها بالفعل ثم نشكتي من أداء المتسبب الأساسي في الكارثة أثناء تأدية جريمته .
نشتكي من طوابير العيش ، من المرور ، من الغلاء ، من ضعف الأجور ، من البطالة ، من الفساد ، من المرافق كلها بلا استثناء ، من أزمة السكن ، من التعليم ، من الصحة ، من التلوث ، من كل شيء
إلا من المتسبب الأساسي في كل هذا !!! نطالب اللص أن يسرقنا بالعدل ، نطالب المغتصب أن يفعلها بشكل جيد وبزمة وبضمير .

8 comments:

عمرو فكرى said...

عندك حق والله
----

بس يه التخلف والرخامة دى
موضوع القرية والبلطجى ده
دى رخامة وعقدة نقص
طب البت والراجل دول ذنبهم ايه يعنى؟

soreal said...

و على نفس المنوال ... في مثل شعبي كل ما والدي الله يرحمه يستخدمه دمي كان يفور .. كان يقول : حط راسك بين الروس و قول يا قطاع الروس!!

في أشياء في موروثنا الشعبي و ضميرنا الاجتماعي بدها نسف

Cardiology Man said...

أوافقك في جل هذه التدوينة

رجب حوش صحبك عنى said...

المساواة فى الظلم عدل يابرنس فعلا لانها اضعف الايمان لما ميكونش فى ايديك حاجة ترفعه عنك وده احسن متولع باوسخ جاز فالظلم هنا لو اتطبق على الكل يبقى عدل وفى الجيش بيقولك الحسنة بتخص والسيئة بتعم ولا ايه ياغالى ؟ يلا سلام يانجم

Israa El-sakka said...

بجد هو ده اللي مودينا الوراء و أتفق معاك يعني يا ريت الظلم عندنا هو لفئة قليلة لكن ده لكل الفئات و كأنه سكوتك هو بسبب أنك مش الوحيد المقهور !!

رمضان كريم

Anonymous said...

نحن شعب أدمنا رثاء النفس والاستسلام للقدر و"المكتوب"، لدينا قناعة بأنه كل ما يحدث لنا هو شئ لابد منه، وتغيير الحال من المحال

قلم رصاص said...

اولا رمضان كريم وكل سنة وانت طيب يادكتور أشرف

بارك الله فيك وتقبل منا ومنكم الصيام اولقيام وصالح الاعمال في هذه الايام الكريمة

واما عن موضوع البوست ..فبصراحة انت عندك حق في كل كلمة قولتها

واحب اضيف هيها المعلومة البسيطة دي

انه دايما لما الانسان المصري يقع في مشكلة او تحصله مشكلة .. دايما يدور على شخص المتسبب فيها دون البحث عن سبب المشكلة ذاتها

ربنا يهدي كل المسلمين يارب في كل مكان

دمت على خير

tamer.sala7 said...

اشمعني انت اللي عملت تدوينة زي دي

ما كل سكان عمارتك ساكتين وبرضه مفيش حد فيهم اتكلم مع العلم ان كلهم برضه بيعانوا من مشكلة المياه

واشمعني انت اللي زعلان من المصرية للاتصلات مع ان كل اهل سنترال المريوطية عندهم نفس مشكلتك وبرضه محدش اتكلم

شكلك كدة غاوي مشاكل

خليك واقعي وبلاش خيلات


انا جاي اهدي النفوس
اي خدمة
:P :D

Counter