Total Pageviews

Sunday, September 13, 2009

شيوخ الرصيف

تابع التحديثات أسفل الموضوع
تحديث جديد حول قضية الخطاب الديني في مصر
....

هذه التدوينة غير مقصودة ، وغير مدبرة ، ولكنها الصدفة البحتة التي كانت سببا في تناول هذا الموضوع بعد أن وصلت دهشتي إلى الحد الذي وجدت نفسي عنده مجبرا على طرح موضوع من المفترض أنه لا يحتاج إلى طرح أساسا ، تعرفون هذا الشعور الذي ربما يراودكم فجأة فتبدأون في سؤال انفسكم أسئلة من المفترض أن إجاباتها بديهية والسؤال عنها مجرد سفسطة ، هل الأرض كروية حقا !
الموضوع بدأ بنشر كليب للداعية مصطفى حسني على صفحتي بالفيس بوك ، من حين لآخر تقع يداي على مادة لمصطفى حسني فأزداد به إعجابا ، وهذه المرة كان يعارض سخرية المشايخ من أهل الفن ومن غير المحجبات وحتى ممن جرت العادة على تسميتهم بالعصاة، أحد المعلقين على الكليب قال : السم في العسل ، فقلت له بالنص :
بس انا مبسوط إن داعية بيقول كده ، حتى لو سم في عسل الله أعلم بنيته ، بس كلامه صح ، أصلي كنت بسمع محمد حسين يعقوب عشان اشوف الناس دي بتفكر إزاي ، محمد حسين يعقوب بصراحة وبصدق وبدون ما أكون بتريق يخللي الواحد يطلع من دينه بجد من كتر السخرية والاستهزاءمش قادر أنسي قوله المسخرة : أياكم ومحادثة النساء ، حتى لو رايح تدعوها للحجاب ، تووولع ، إياكشي تووولع مالكش دعوة بيها سيبها توووولعإلا إنت ما بتصليش ليييييه ؟ :)))
ولم أكن اتوقع أن تتحول ساحة التعليقات على الفيديو إلى مشتمة ، ربما نسوا أو تناسوا أنني ساهمت في نشر كلام داعية أعتبره من المعتدلين وتعاملوا مع تعليقي باعتباره التوبيك الأصلي وهاتك يا ردح .
هل نشرت رسوم مسيئة عن رسول الله مثلا دون ان أدري ؟ ولأنني مقتنع تماما أن أي شيخ في الدنيا سواء محمد حسين يعقوب أو محمد حسان أو الحويني أو الجن الأزرق ماهو إلا بشر عادي ، ليس معصوما وليس من المبشرين بالجنة وليس من الصحابة ، فإنه ومن حقي الكامل أن أبدي رأيي ، من حقي أن أنتقدهم ، ومن حقي أيضا أن أتناولهم بالسخرية سواء بالكلام أو بالكاريكاتير وحسابي عند الله لا عند بشر إن كنت أقترف ذنبا أو كبيرة ، وإن كان هناك تناقضا بين سخريتي أو نقدي وبين كلام مصطفى حسني في الكليب الذي يدعو إلى عدم السخرية فهذا أيضا وارد ، أنا أيضا لست مطالبا بتطبيق كلام أي شخص ، وطالما معي أدلة وأسباب مقنعة لا جدال عليها على ما أقوله فليأتني أحدهم بما يفحمني كما يقولون ، الأرض كروية وهذا دليلي ، ان كنت تعارضني اثبت لي العكس ببساطة ، لذا فقد أقدمت على هذه التجربة كنوع من التحدي وكتبت في الاستيتس هذه الجملة :
انا بكره محمد حسين يعقوب وبعتبره إرهابي وذو عقلية متخلفة ، الكازيون أهوه ، اللي ليه شوق في حاجة يقولها :)
مع الإعتذار محمود عبد العزيز في فيلم إبراهيم الأبيض ! وكانت النتيجة كارثية ، بالرغم من أنه من حقي ان أكره أي إنسان على وجه الأرض ، وبالرغم من أن محمد حسين يعقوب إرهابي بالفعل وبالرغم من أنه ذو عقلية متخلفة حقا .
ودعوني أقولها على طريقة محمد حسين يعقوب المحببة : نحن في زماااااان أصبح فيه النت في كل مكان ، ولم يعد الإفتراء على أي شخص بالكذب سهلا كما كان في الماضي ، وشرائط محمد حسين يعقوب انتقلت من الأرصفة ــ مكانها الأصلي والجديرة به ــ إلى الإنترنت بحيث أصبح من السهل جدا مراجعة كل كلمة يقولها ويبثها في عقول البسطاء والمتحولين تدريجيا ــ ولكن سريعا جدا ــ إلى عناصر إرهابية متشددة ومتطرفة أقصى أنواع التشدد والتطرف ، ويبدو هذا واضحا جدا من ردود تلاميذ الشيخ والتي ورد بها الجزء التالي :
ملحوظة: لو ماقلتش انا اسف ومن قلبك للكلام اللى بتقصد تقوله وتروجه عليهم فى اسرع وقت ومن قلبك كمان.. صدقنى والله حييجى يوم لازم تدفع فيه الثمن
تهديد بالقتل ده ولا ايه حد يفهمني ؟!
، الجزء التالي مخصص للمراجعة لمن يريد حقا التأكد مما أقول ، ولا يكتفي بقراءة كلمتين لإعلان الحرب على شخصي أو إهدار دمي ، الأمر تحت أيديكم بالكامل ومن شاء الإختلاف معي ومن شاء الإعتراض على لفظة إرهابي وعقلية متخلفة فيأتني بدليل مثل ما أتيت.
أولا : مقال محمد الدسوقي رشدي بعنوان : هل إسلام محمد حسان وأبوإسحاق الحوينى ويعقوب ومسعد أنور هو إسلام مكة والمدينة؟
منشور بجريدة اليوم السابع
وبعد نشر المقال تتابعت التعليقات بالسباب والشتيمة والألفاظ النابية على الكاتب وعلى الجريدة مع تهديدات بدفع الثمن ، فكان المقال الثاني لنفس الكاتب ونفس الجريدة بعنوان : هل محمد حسان وأبوإسحاق الحوينى ويعقوب ومسعد أنور أنبياء لا يجوز نقدهم؟ وتتابعت تعليقات السباب البذيء أيضا .
الغريب في الأمر أن المقالين هادئين وعقلانيين إلى أقصى درجة ، وأحكموا بأنفسكم
ثانيا :
مجموعة من دروس الشيخ محمد حسين يعقوب
درس فتنة النساء إضغط هنا للمشاهدة
مما ذكر في الدرس : النساء فتنة \ النساء قنبلة موقوتة من اقترب منها انفجرت في وجهه \ كنت واقف في اوتوبيس لقيت ست قدامي وست ورائي وست على يميني وست على شمالي الأعداء من كل جانب \ ماتتكلمش معاها \ إبببببببعددددد \ تقوللي يا عم الشيخ دي زميلتي في الشغل وبدعوها للحجاب ، مالكش دعوة ، إنشالله ما اتحجبت ، سبها تولع ، إنشالله ما اتحجبت !
في الدرس الكامل تسمع : بيوت متسيبة ونساء لا رادع لها \ في عصر بقى الكلام مع البنت والضحك معاها ولمسها أمور عادية جدا في المصالح الحكومية وفي المدارس \ يا راجل خليك بني آدم وحس ما تبقاش حنزير ، خليك راجل ما تبقاش ديّوس ، ترضي بالفاحشة في بيتك في مراتك وفي بنتك وفي أختك \ السكوت على خروج البنت إلى التعليم وإلى العمل وتأخرها في الشوارع \ أي آباء هوؤلاء ؟ إنها الدياسة الحمقاء .
حتى لا يتهمني أحد بانني اقتطع مقتطفات أرجو سماع الدرس كاملا وسماع الجمل في سياقها الكامل ربما أسات انا فهم معنى الديوس أو تعبير تولع أو ماتبقاش حنزير أو السكوت على خروج البنت إلى الجامعة وإلى العمل .
واستكمالا لثانيا يمكن تخصيص تدوينات كاملة ولكن هذا مجرد مثال بسيط جدا
ثالثا : هذا أمر يخصني أنا الآن ، ربما عارضني أحدكم وقال : وانت مالك يا جدع ؟ ماتسيب اللي يتكلم يتكلم ، حاضر ، ولكن إليكم هذه الوصلة بصفتي فنان

هذه تجارة رخيصة من وجهة نظري ، بدأ بكلام معسول مع لمسة من الإعتراف بقيمة الفن رغما من تحريمه للرسم والغناء كمرحلة أولى ، المرحلة الثانية التحقير من شأن الفن الغير متعلق بالدين ، أي أنه يرى أن كل فن لابد وأن يكون دينيا ، ثم يطلب تصميمات للموقع مجانا ، طبعا لأنه لو أقر بحرمانية الفن فكيف سيأتي بتصميمات ؟!

--------------------------


حكم شراء عرائس الأطفال

تقرأ في الفتوى : وإذا أراد الإنسان الاحتياط فليقلع الرأس أو يحيمه على النار حتى يلين ثم يضغطه حتى تزول معالمه

اضغط على الوصلة لقراءة الفتوى كاملة

----------------------
ما حكم دخول المسلم الكنيسة لحضور فرح أو عزاء
تقرأ في الفتوى : لا يجوز للمسلم الدخول على الكفار في معابدهم
هذا للرد على من يتهمني بالتجني على سيدنا الشيخ حينما أقول إرهابي : فتنة طائفية وإزدراء للدين المسيحي والمسيحيين في دولة مدنية
وسأخصص بوست كامل قريبا عن فضح هؤلاء الشيوخ فيما يتعلق بإثارة الفتن والبغض والكراهية بين طوائف الشعب
----------------------
وأليكم باقة من أمتع الفتاوى وأكثرها طرافة للرد على اتهامي للشيخ ــ وأمثاله من المشايخ ــ أنه ذو عقلية متخلفة أنه إتهام باطل ، فهناك فرق كبير بين السباب والشتيمة وهو دون وجه حق وبين إتهام له أدلة من أفواه الشيوخ أنفسهم
تقرأ في الفتوى : التصفيق في الحفلات من أعمال الجاهلية وتشبه بالكفار
بالمناسبة ، علميا فإن الكمامات لا تحميك من مرض انفلونزا الخنازير ولكنها تحمي من حولك منك لو كنت مصاب بالمرض ، وهكذا نجد أن الشيخ محمد حسين يعقوب يدعو لإنتشار مرض أنفلونزا الخنازير وتناسى تعاليم الدين الإسلامي التي تحث على إماطة الأذى
تعليق : وإن صح ذلك فبالضرورة أن يكون لعب الشرنج حرام هو أيضا وهو ما وجدته على موقع آخر
وبالطبع فهناك تحريم الرسم والنحت وكل أنواع الفنون التشكيلية
وبصفتي مشتغل بمجال الرسوم المتحركة فأعتقد أنه وبالفتوى النارية التالية فإنني أعد من المارقين والمشركين
أما عن أكثر الفتاوى طرافة ، وأشدها إثارة فهو تحريم الكرسي أو المقعد ، أينعم ، بصراحة شديدة أنا لا أصدق أن يكون ذلك موقع جاد واعترف انني لم أبحث جيدا في مدى مصداقيته ربما كان من فعل اللادينيين للسخرية من الاسلام ، عموما إليكم الوصلة لتتأكدوا بانفسكم ولكن أرجو وبشدة في حالة أن كانت الوصلة خادعة أن تصححوا الخطأ لأنني لا أريد ان اتحدث بالباطل
تحريم الكرسي \ المقعد
شكرا على التوضيح ، تم إكتشاف أنها صفحة ملفقة

بالطبح شيوخنا الأفاضل كفوا عن تكرار فتواهم بتحريم التلفاز لانهم أصبحوا يظهرون به الآن وأصبح مصدرا للدخل
مما سبق ، أشير إلى أن هذا هو قمة الجهل والتخلف لأمتنا ، هذا تدمير للشعوب باسم الدين ولا اعتقد أن هناك من يجرأ على معارضتي في ذلك إلا لو كان بالفعل قد تم غسل عقله تماما بدروس المشايخ من أمثال ما ذكرت
------------------------
هل هذا أسلوب خطاب ديني ؟
لا خلاف على قضية السيد الخطيب ، لقد حاورت لارس فيلكس ــ صاحب الرسوم المسيئة ــ من قبل ونشرت حواري معه على مدونتي ، وأثبت لقراء المدونة أنه ببساطة شديدة لا يعي ما يقوله ، وأنه بالفعل يريد إثارة بالونة ضجة للشهرة ، وأنه لا توجد لديه أي نوع من المقدسات حتى التطاول على الرب ذاته في رسومه ، وأن التعامل معه يكون بالتجاهل التام والمقاطعة ، وأنه سيجن جنونه لو تم تجاهله تماما
قارنوا ذلك بما يقوله الخطيب في هذا الفيديو

90 comments:

Ahmed said...

يا اشرف اتق الله
انا احمد عفت على فكرة

كتبت بس اللى انت عاوز تكتبه من كلامى (انا مش حاتكلم غير عن نفسى)
وماكملتش اعتذارى وتوضيحى لكلامى اللى انت فهمته بالطريقة اللى انت دايما بتحب تفهمه بيها بس

غير انك اصريت بردو تهاجم المشايخ الافاضل

غير انك بتنشر مقالات اليوم السابع اللى كلها قبح

طب لف شوية كده جوه اليوم السابع واقرأ
ولو الكلام اللى مكتوب فيها يرضيك كمسلم ابقى عرفنى



ربنا يسامحك والله ويهديك

أشرف حمدي said...

تمام يا احمد
أديك اهو رديت وقلت إنك ما تقصدش ووضحت تعليقك بخصوص موضوع حتدفع الثمن
ردي على هذه النقطة محدد جدا ، انا متفق معاك تماما ، حسابي بقى عند ربنا صح ؟ وسأعتبر تعليقك مجرد نصح وانا شاكر ليه ، ربنا بقى يحاسبني مش انت ولا الشيخ ولا أي مخلوق على وجه الأرض
---------
أهاجم المشايخ الأفاضل
طيب واحدة واحدة
من حقي اهاجم حاجة انا شايف فيها سلبيات
الرد عليا مايكونش كده يا احمد
اكتب في مدونتك أو في تعليق هنا رد قدام كلامي زي ما انا قلت
انا اتبلّيت على الشيخ ؟
انا جايب ليه تسجيل بيقول فيه كلام مايصحش الصراحة يطلع عن واحد مسلم اساسا مش شيخ جليل ذو فضيلة زي ما بتقول
غلطان في كده قول
انا مش بتبلى على حد
انا جايب اللي يؤيد كلامي وهجومي
هات إنت ما يؤيد كلامك ودفاعك

الردود على موقع اليوم السابع قدامك ، ده كلام مسلمسن انت شايف ؟ يرضيك إنت كمسلم طيب ؟

ثم انا عندي ميزة مش عندك :) انا لا أدعي إني متدين أو ملتزم انا مسلم عادي بصوم رمضان أهوه وبعمل اللي أقدر عليه من عبادات والحمد لله

انت أو أي حد تاني بدقن ويدعي الإلتزام لازم يخللي باله من كل كلمة بيقولها عشان ماتتخدش عليه ، وبدل ما ندخل في مهارتات يرد عليا طيب ، انتوا خايفين من الرد ليه ؟
واحد ضد تعليم المرأة وخروجها للعمل والإختلاط ، واحد ضد إني اكلم واحدة ست اساسا ويقول على أبوها ديوس ، يا ترد انت على كلامي يمكن انا مش فاهم اللغة دي في الدعوة إلى دين السماحة ، يا يرد هو طيب لو انت مش عايز

إنما نقعد نتهم بعض ، وانت جاهل ، وانت متخلف ، لأ انت اللي مابنفهمش

انا ممكن أكون غلطت وحقك على راسي يا سيدي وبعتذرلك أهوه

اثبت عكس كلامي بقى

hesho said...

تدوينة جامدة جدا و فى الصميم

هؤلاء الناس (مع الأسف) نجحوا فى إقناع البعض أنهم هم فقط من يمثلون الإسلام الصحيح و بالتالى فإن من ينتقدهم إنما
يهاجم الإسلام نفسه

لم أقراء صفحتك على الفايس بوك و لكن لن أندهش لو أن بعضهم أتهمك بالإلحاد أو العمالة أو ما شابه

تسلم إيدك يا فنان

enjy said...

بص يا اشرف انا مبقتش بعلق من كتر منا كل مرة اقعد اقول ايوووووووة هو دة اللى انا عايزة اقوله بالظبط فبجد انا مبقتش لاقية كلام اقوله عن دماغك

عن محمد حسين يعقوب فهو عنده وسواس قهرى اسمه النساء..معرفش البنى ادم دة موصلوش ان الستات ايام الرسول كانوا بيقعدوا مع الرجال فى دار الارقم يحضروا دروس العلم؟؟؟

موصلوش ان الستات اللى هو عايز يمننعهم من التعليم والشغل كانوا ولا اجدعها راجل فى التجارة والطب ايام الرسول برضو؟؟؟

موصلوش ان الستات كانوا بيشاركوا الرجال فى الفرجة على الاحتفالات فى مجتمع طبيعى مفيهوش حرملك وبرضو يا سبحان الله ايام الرسول؟؟؟

الشخص دة بغيض فعلا وبيروج افكار عجيبة مش ممكن السخرية منك وانت بتسمعه مش معقول دة يكون طبييعى وهو نافش ريشه على الخلق كدة ومبيقولش للمشاهدين الافاضل بتوعه غير يا مذذذذذذذذنب يا عااااااااااصى ناقص يقول يا معفن..

اتباعه وحوارييه بقى حاجة وسخة فعلا..كنت موجودة مرة بالصدفة البحتة فى قعدة فيها ستات كلهم من التابعين المخلصين لشلة الشيوخ الفالصو..وقلت حديث والله عرضا مش فاكرة هو ايه بس كلهم بصوا لى واستغربوا فقلتلهم انى سمعته من الدكتور احمد عمر هاشم..وهو من هو فى علم الحديث..كلهم ضحكوا ودة مش من الدين فى شىء وقالولى شلة الازهر هتوديكوا فى داهية ابقى اسمعى الحوينى محدث الامة..محدث الامة؟؟؟؟ حمراااااااا امتى بقى الحوينى محدث الامة؟؟؟؟ وايه اللى خلاه محدث الامة اللى بيقول انه بيكره الدروس فى التليفزيون لان فى احتمال ان الستات يشوفوه..

يعقوب برضو لما اخت فاضلة من تابعيه تتصل تساله يروح قايل لها انا مبحبش الستات يتصلوا ولا يتفرجوا عليا فى التليفزيون التليفزيون ممنوووووووووع للستات انا عامل كدة مع زوجاتى..

مش ممكن كمية التخلف والعته اللى الراجل دة بيتكلم بيهم مش ممكن ..معرفش يعنى ربنا اعلم بيه بس انا شايفة ان كرهه الشنيع للستات دة لو راجع لضعف منه تجاههم بلاش يفرض الفكرة على العالم كله عشان مش لازم كل الناس تكون زيه يعنى..

كلام كتير سمعته من الراجل دة وغاظنى وحسسنى اننا فى عصر الجاهلية وشوية شوية هيدفنوا الستات وهما احياء وكلام كتير سمعته من الحوينى عن الجواز وسنينه..الله يخربيت الجهل..

الله يحرق الفقر والقمع اللى خلى الناس تتشبث بمعلومات مشوهة طمعا فى انهم يكونوا افضل ويدخلوا الجحنة وهما مش فاهمين حاجة ومتساقين زى البهايم..

الله يحرق الفقر اللى خلى انصاف البشر يتنططوا على العلماء اللى بجد ويشتموهم عينى عينك على الشاشات الحقيرة بتاعتهم..وهو دة من الدين فى شىء ان يعقوب دة يشتم اى حد فى الدنيا سواء عمرو خالد او شيوخ الازهر؟؟

ايه اللى يبيحه الدين ويدعمه فى السخرية من الناس والتركيز على نقاط ضعفهم وابتزاز مشاعرهم عشان يتساقوا ورا شوية الجهلة دول؟؟

خد الكبيرة بقى..واحد من الشيوخ الافاضل الحلوين بتوع الرصيف دول قال لواحدة ست اتصلت بيه عالهوا كدة انها تتطلق من جوزها عشان لا يقيم الليل..وهسيبلك حرية التعليق

طولت فى التعليق بس دة اصلا مش كل اللى انا عايزة اقوله ربنا يرحمنا بقى عشان انا زهقت من الرخامة دى

لماضة said...

متابعه

المعلم برعى صاحب القهوة said...

المدعو يعقوب بيفكرنى بالممثل عباس فارس ، عارفه ؟ فيه منه كده ، اما ممحمد حسان فانا احترمه كثيرا واحترم عمرو خالد لان هؤلاء مصلحون فى الارض وليسوا مفسدين ، واحتمال قريب انزل ببوست عنهم جميعا ، الموضوع جيد الا انه سريع الطلقات

مسدس صغير said...

اتق الله
فإن لحوم العلماء مسمومة

FemTo said...

شاغل دماغك بحاجات مفيش منها نتيجة ..حتاخد وقتها وتمشى صدقنى

سقراط said...

السلام عليكم
شوف يا سيدي
انا متفق معاك تماما وبجد حاسس بنفس احساسك
بس خايف جدا
خايف م الفكرة اللى انت قلتها
الارهابيين
خايف انها تكون عبرت عن احساسي فعلا
لان ببساطة مجرد فتح الموضوع مع واحد صاحبي جدا جدا ومجرد ما شم بس انى واخد الموقف ده اتقلب عليا بشكل انا بجد خفت منه
اذا كان ده حال صاحبي وصديق عشر سنين
اومال الناس اللي انا ماعرفهمش ممكن يعملوا فيا ايه
بجد الموضوع يدعو للخوف
لانه ممكن يتحول لفتنة طائفية جديدة تماما من نوعها
لانها حصلت ما بين اصحاب الديانة الواحدة والمذهب الواحد
ربنا يتولانا جميعا
وبشكرك ع التدوينة الجامدة جدا دى

adel said...

انا مش عارف ردي هيبقي عامل ازاي
ممكن محدش يتقابله
لان الناس اصلا رافضة النقاش في الموضوع ده

انا ليا رد علي شئ بسيط

الست

دي خلقة مين ؟
ربنا زيها زيك

امك و اختك
نجسين ازاي ؟؟
و ازاي ابعد عن امي ؟؟؟
دي خلقة ربنا

ازاي كان الناس بتقولنا اعطفوا علي الحيوانات
هاعمل امي علي انها نجسة و ابعد عنها ؟؟؟
علي انهي اساس ؟؟

وعلي فكرة غي ستات كتير قوي قوي قوي
في التاريخ
عملوا اللي رجالة بشنبات معرفوش يعملوه

وبعدين اعتقد ان الاسلام مليان امثلة لنساء و علامات في التاريخ
حتي مع اختلاف دينتي بس ده ميمنعش اني احترمهم و ااقدرهم ....
يبقي ااقول عليهم ازاي كده ؟؟؟

Ms3a_miso said...

على فكره المشايخ زي المطربين بالظبط
منهم اللي يحببك في الدين اوي تبقا روحك فيه
وفي اللي من كتر ماهو بيألف وحاطط في دماغه انهو صح ولا ينطق عن الهوى ودول بيكرهوني اوي في الحياه
وبعدين هو الرسول زات نفسه لو كان عايش وسمع كل من هب ودب بيتكلم على الدين على كيف كيفه
كان زمانه ندم على انه اتبعث لامتنا اساسا
لان بجد الموضوع زاد اوي اوي لان حتى المشايخ دول بيكون مستواهم العلمي متدني اساسا واللي مستواه العلمي متدني اكيد مستواه الديني متدني
لان ربنا كان بيقول ان اكتر ناس بتخاف منه هم عباده العلماء

Tamir Fat-hee said...

مثال آخر على ما أخرجني من صمتى قريبـًا بالتعليق على أمر مشابه هنـا:

http://aiikalaam.blogspot.com/2009/09/blog-post_08.html

وبنشر مقال الدسوقي رشدي على الفيس بوك الذي لا أستطيع تصديق كم الرجعية في التعليقات عليه أتتني بعض الآراء التي تميل إلى اعتبار الدسوقي هو المتعصب وليس العكس!

وأهدي هذه الفتوى إلى مشجعي نادي يعقوب وشركاه، عن حكم اللعب بالعرائس لدى الأطفال:

http://www.yaqob.com/site/docs/fataya_view.php?id=31

"وإذا أراد الإنسان الاحتياط في مثل هذا فليقلع الرأس أو يحميه على النار حتى يلين ثم يضغطه حتى تزول معالمه ."

البلد ذهبت إلى الكلاب خلاص!

Amr Hassan said...

انا مش من النوع اللي يعرف الناس دي او يعرف حتى حد يعرفها، لكني سمعت كلام من اللي كاتبه ده مرة او مرتين في مواصلات عامة، كان سواق الاتوبيس مشغله على كاسيت وانا فاكر جداً اني اتنرفزت اوي من طريقة كلام الراجل ده بتاع الستات قنبلة موجودة. ماكنتش متخيل ان فيه كمية التخلف دي لسه وإن حد لسه بيسمع لناس بتتكلم بالطريقة دي.
سواق الاتوبيس البسيط اللي بيتغسل له مخه وهو قاعد مشغل الصوت عالي جداً في الاتوبيس على اعتقاد ان احنا في رمضان وانه بياخد ثواب على كل حرف بيسمعه للداعية الرائع ده وبيهز رأسه لفوق وتحت كل فترة والاخرى في اقتناع تام واتنرفز اوي لما حد من الركاب حاول يقوله يوطي الصوت شوية لأنه بيحاول يتكلم في التليفون.

ربنا يخلصنا من البلد دي

بدراوى said...

أحييك على التدوينة ديه
بشده
ممكن طلب
هو ايه موضوع لحوم العلماء مسمومة
اللى كذا تعليق اتكتب عليه عند اليوم السابع
ياريت حد يفهمهولى

Anonymous said...

كنت ممكن اتفق معاك فى بعض الحاجات لكن اسلوب التدوينة بيخلنى مش هناقش لان مفيش فايدة انت عملت نفس الخطأ اللى وقعوا فيه اذا كان انت بتنتقد حكاية اسلوبهم والسخرية من طريقة كلامهم تروح انت تستخدم اسلوب السخرية بردو
كان كلامك هيكون مقتنع لو كنت وضحته صح وكنت حيادى فى عرض فكرتك مش بالهجوم الشنيع ده وعلى فكرة انا مش بسمع المشايخ دول يمكن مفيش غير محمد حسان اللى بتابعه من فترة للتانية بس عمرى ما هوجه ليهم نقد بالاسلوب ده

الشعب لابد له من حكومه تشكمه said...

مممممم شوف اولا لازم نتفق ان طريقه الحوار والتعبير فى مصر هى طريقه فاشله جدااا وبكل المقاييس بمعنى اننا فى مصر نتناقش بالايد او بطولة اللسان ,مش حكر على فئه معينه ولا انت تقول إلحق دا واحد متدين اهو بيعمل مش عارف ايه الحق دول اتباع(مش فاهمه ايه الكلمه دى)الشيخ فلان, دى ثقافه مجتمع لا يجيد الحوار من اكبر راس فيه لاصغر فرد فيه.فشئ طبيعى انك تلاقى ناس متعصبه لناس بتحبهم وبتحاول تدافع عنهم .

ثانيا:كل شخص ياخذ منه ويرد الا رسول الله تمام؟ بس فى كمان واسالوا اهل العلم ان كنتم لا تعلمون...
فين علماء الامه؟اذا كانوا دول اللى تتلمذوا على ادين افقه المشايخ وتقدر تدخل على النت وهتعرف كل واحد تتلمذ على ايد مين....

ثالثا:لما واحد يشتم فى فيلم لفنان ولا ينتقده يطلع الفنان يعمل هليله ازاى تنتقدنى وانت مش ناقد فاهم ودارس....
يباه ازاى ننتقد عالم نحسبه على خير لا وكمان احنا مش متخصصين..والله لو بيقول حاجه غلط ومفهمنا الدين غلط فين علماء الازهر فين العلماء باه يفهمونا الغلط..دا فيفى عبده دلوقتى بتفتى فى الدين كمان هنفتح الباب على البحرى كل واحد يشتم فى شيخ مش عاجبه اصله مش بيستلطفه....

رابعا:مفيش شيخ من دول بيحرم تعليم البنات وانا عارفه بقول ايه..الشيخ محمد حسان دائما يدعو المراه المسلمه ان تذهب لطبيبة امراض نسا..هى الدكتوره دى مش متعلمه ولا هى طلعت دكتوره عفاريتى؟؟
http://www.yaqob.com/site/docs/articles_view.php?a_id=59&cat_id=7

وادخل على اللينك ده وشوف الشيخ يعقوب قايل ايه على تعليم البنات,اسمع وشوف بنفسك
قال ـ تعالى ـ: {وَقُل رَّبِّ زِدْنِي عِلْماً} [طه: 114] فهذا ديننا دين يدعو إلى العلم، فلماذا نحمّل الإسلام قصور تفكيرنا وتخلفنا عن التعلم، ليقال: إن الإسلام لا يريد تعليم المرأة... وإن
الإسلام يكرس جهل المرأة؟!

دا كلامه وياريت تكمل باقى كلامه.
بالنسبه للى انت مستشهد بيه اسمع كويس وشوف هو بيتكلم عن اييييه بالظبط بيتكلم فى المطلق ولا تصرفات معينه.....
خامسا اسمع اى حوار او درس للشيخ حسان واتحداك انك تلاقيه يكون بيتكلم من غير دليل, دايما يذكر من القران والسنه ما يثبت به كلامه..اسمع للشيخ حسان وبعد اى كلمه هتلاقى استشهاد.

اخيرا انتو بتقولوا انهم متطرفين وارهابيين ياريت تجيب دليل على كده من كلامهم يعنى هم مثلا حرضوا على قتل حد او مثلا عملوا دعوه ان اى واحده متبرجه اللى يشوفها يضربها فى الشارع..
وبعدين كله يقولك اصل شكلهم مش عاطفى مثلا سؤال: ورد فى صحيح السنه ان الرسول كان مطلق لحيته ولا لا؟ ورد فى صحيح السنه حديث اطلقوا اللحى وحفوا الشارب ولا لا؟؟
خلاص هم ماشيين على السنه وعاوزين يتشبهوا بالرسول,ليه الانزعاج الغير مبرر ده؟

اخيرا انا كمان زيك لا انا منتقبه ولا حتى لابسه اسدال بالعكس (ربنا يهدينى لما يحبه ويرضاه)انا مسمله بأدى فروضى وبحاول اقرا وافهم دينى.

مينفعش كل واحد ينتقد بغير علم لمجرد انى مش عاجبنى فلان ,ومش معنى كده انى اهين من يطلق عليهم علماء الامه ولو هتقولى لا مش دول هقولك طيب ببساطه كده ممكن تقولى مين هم علماؤنا الحاليين اللى ناخد منهم دينا؟دول افقه الناس بالسنه والتفسير.ومش بالكلام لا دول اتعلموا ودرسوا وحصلوا على اجازات من اكبر علماء الامه...يباه مش كل واحد يطلع يتطاول وياريته بينقد ولا يقول رأيه بحريه انا لسه امبارح شايفه الفاظ والله مينفع تتقال لانسان عادى مش عالم...

اخيرا واسفه بجد على الاطاله انت ايه رأيك فى القرضاوى ؟ على فكره لو بتسمع القرضاوى كلامه هو نفس كلامهم بالملى بل انه اشد منهم كمان...
والشيخ القرضاوى هو اللى ماسك هيئه علماء المسليمن اسمع كلامه وقارنه بيهم واااااااااااااحد.

وتقبل مرورى

بدراوى said...

أستاذ اشرف
بخصوص حسين يعقوب و غيره من شيوخ قناة الناس
انا مختلف مع خطابهم الدينى او بمعنى اصح طريقة طرحهم و تناولهم

و انا على فكرة كنت تابعت مقال الدسوقى رشدى و شوفت التعليقات فى المرتين و حتى حد اعرفه كتب بوست يهاجم الدسوقى نفسه
و دافعت عن الدسوقى لأن الصراحة التعليقات ديه لا تصدر من عاقل

و انا مش من مريدى الشيخ يعقوب او غيره
بس عاوز اقول حاجة انا سمعت درس فتنة النساء كاملاً

و الصراحة مع تحفظى على تلك الطريقة الا ان الراجل مقالش كلام يزعل
سوى فى بعض الألفاظ اللى انت استشهدت بيها
و موضوع تعليم المرأة

و بخصوص ان النساء فتنة
اعتقد ان فيه حديث للرسول بيقول كدة

بس برده مهما كان انا ضد تقديسهم
------
يتبع

بدراوى said...

شوف التعليق الهام ده
و اللى جه على مقال الدسوقى الأول
و اللى كل ما اتناقش مع حد لازم انقل ليه التعليق ده اللى جه فى وسط مئات التعليقات الغريبة
-----------------
لو كنتُ واعظاً من نجوم الفضائيات، وكان هؤلاء المعلقون هنا من أتباعي والمعجبين بي لخجلت من نفسي، لأنه وبعد سنوات من البث في نفوسهم، كان يجب أن تكون الرقة والتسامح واللطف وأدب الرد من صفات من أعظهم، وها نحن نرى النتيجة هنا، من محبي ومريدي وعاظ الفضائيات والمصاطب، ألسنة طويلة وردود قاسية، يعني ببساطة مزيج من الغضب والغل والتوتر، أهذا إذن ما بثه فيكم شيوخكم.

حقاً كيفما تكونوا يكون وعاظكم، أو كيفا يكون وعاظكم تكونوا، فالنتيجة واحدة.. لا يحسن معظكم كتابة سطرين بلغة بسليمة، وأكثركم لا يلمس دماغه ويتأنى إن كان الكاتب على حق أو على بعض الحق، ويناقش بهدوء، ويضع مسافة بينه وبين وعاظه ربما كانوا فعلاً مخطئين، أو حتى مدمرين ومنتجي نفوساً عصابية مأزومة.

أحمد مختار عاشور said...

لحوم العلماء مسمومة
لحوم العلماء مسمومة
لحوم العلماء مسمومة

ديه اكتر جملة سمعتها الفترة اللي فاتت

بس اعتقد ان الجملة حقيقية

لأن فيه واحد صاحبي توفي مؤخراً بعد تناوله وجبة علماء مسمومة من "مؤمن" وكان تقرير الطب الشرعي أنه مات نتيجة إهماله إرسال ايميل إلى 800 مليون شخص .. يقر على أن الشيخ فلان قد شاهد الكعبة في منامه

الله يرحمه بقى

اتقوا الله يا أخواننا
لحوم العلماء مسمومة
وسيرة شيوخ السلفية بتجيب حموضة
..
وكل فوار وانتم طيبين

صفا سارة said...

معاك فى كل كلمة كتبتها يا دكتور بخصوص المرأة قنبله ده كنت فى المواصلات وبنام وكل شويه اقوم مفزوعة على صوته اللى كان السواق اللى طول الطريق بيشتم مشغله
الناس دول بسمعهم لما اكون عايزة اضايق نفسى ربنا يريحنا منهم

Anonymous said...

واضح ان اي حد عاوز يخلي نفسه محل اهتمام يهاجم الشيوخ والعلماء ... بص يا استاذ اشرف واسمعني علشان انا بجد ابتديت ازهق منك من غير لف ولا دوران ... انا بحب الداعيه مصطفي حسني وبحب معز مسعود وبحب الحويني ويعقوب ومحمد حسان ومسعد انور والمصري .. لكل واحد فيهم طريقه يدعوا بها الي الله وكل واحد ليه ناس بتسمعه وبتتاثر بيه دون غيره .. مش هنعمل زي الجهله المتخلفين اللي هاجموا ابن حزم وتعصبوا للمذاهب الاخري .. ليك الحق انك ترفض تسمعه لكن من فضلك متقولش عليه ارهابي ... عرفلي الاول معني كلمه ارهابي بمفهوم دينك الصحيح وانا اوافقك علي نعتك القبيح الكريه للشيخ يعقوب بانه ارهابي ...انا حقيقي مش فاهم ايه حاله السعار اللي بتنتاب المجتمع ضد ما هو اسلامي ...هجوم هجوم هجوم هجوم هجوم بدون اي مبرر ..مشفتهمش يعني افتوا فتاوي تخليك تقول في حقهم كده .. انا بكره الشخص ده براحتي ومحدش ليه حاجه عندي لكن ده ميدنيش الحق اني اهاجمه بالاسلوب الغير حضاري ده وكاني بتكلم عن واحد بياذيني او بيدمرني ... اتق ربنا

adel said...

اشرف
لة تسمحلي يعني
عاوز ااقول حاجتين

فتوي دخول الكنائس
وانا عارف ان معظم المعلقين مش بيقتنعوا بالكلام ده
احنا اه في اختلافات عقيدية بينا و بينكم
بس احنا مش كفرة ...لان القرأن برضه هو اللي قال كده
واظن لو المسيح ده مش رسول برضه و مريم دي امه مكنش اتعمل باسمها سورة في القرأن
ولا ايه ياسيدنا الشيخ ؟؟؟؟

تاني حاجة غفي تدويناتك اللي عاوز تعملها عن الفتن الطائفية
معاك كل حق و حط اسماء الناس دي مضافا اليهم زكريا بطرس
لاني مش ضد اي حد يبشر بدينه بس ضد الاستهزاء بالاخرين زي زكريا بطرس او تكفيرهم زي الشيخ يعقوب

ولا ايه ؟؟؟

أشرف حمدي said...

أولا أود أن انوه على انني لا اتعمد عدم الرد ، انا أنشر جميع التعليقات وأكتفي بالحوار الدائر بينكم وأرد بإضافة تحديثات على التدوينة لإثبات بعض النقاط
-----------
عادل
لم أفهم النقطة الأولى تماما ، ماذا تريد ان تقول ؟ فقط أذكر أنني حضرت عزاء المرحوم الفنان رؤوف عياد رسام الكاريكاتير في كنيسة ابو سيفين ، الفنان رؤوف أكثر من وقفوا بجانبي وعلموني وشجعوني بغض النظر عن اختلاف الديانة ، وعدم حضوري العزاء هو قمة قلة الأصل ونكران الجميل ولا اعتقد أن الدين الاسلامي يحث على نكران الجميل

أما بالنسبة للفتنة الطائفية فانا من أشد المعارضين لذكريا بطرس وهو أكثر تطرفا من مشايح المسلمين الذين أنتقدهم ، تحدثت عن ذلك في تدوينة سابقة ولكن في التدوينة التي سأطرح فيها موضوع الفتنة الطائفية ستقرأ عن ذكريا بطرس ، وباختصار هناك عدة أمور هامة أذكر لك العناوين فقط

أولا : الاستشهاد بكتب ودراسات وأبحاث لا قيمة لها ولا مصداقية لها وأغلبها افتراء وكذب
ثانيا : الاستهزاء والضحك والسخرية في غير موضعها ، من المفترض انه رجل دين لا رسام كاريكاتير او كاتب ساخر أو ممثل كوميدي ، وبصفته باحث كما يقول فليكتفي بذكر ما توصل إليه بحيادية
ثالثا : اللاموضوعية ، هو يكره الاسلام ببساطة شديدة ، وإن افترضنا أن الاسلام ليس بدين صحيح فعلي الأقل يا أخي الاسلام يحرم السرقة والقتل والزنا وغيرها مما جاء في الإنجيل ومن قبله التوراة ، لا أحد ينكر تعاليم الدين الاسلامي الرائعة مهما اختلف في مسألة كونه دين من عند الله أم لا

شكرا على تعليقك

بدراوى said...

أستاذ اشرف

انا قريت مقالة او درس الكمامة
و الحقيقة مفهمتش اى شىء
هو الراجل عايزنا عشان نشعر بالوباء
فمنلبسش كمامات
و عشان نحب الموت اول ما يجينا الوباء
منتعالجش و لا ايه
!!!!

أشرف حمدي said...

بدراوي
انا لسة كنت بفكر في الموضوع ده وقريت صفحة الكمامات دي من على موقع محمد حسين يعقوب كتير وبجد مش فاهم أي حاجة
عاوز ايه ؟ يقصد ايه ؟ دليله ايه ؟ بيقول ايه اساسا مش فاهم
لو كان قال الكمامات تشبه بالكفار كنت فهمته
إنما بيلف ويدور ويطلع وينزل ع الفاضي بجد والنتيجة : بلاش تلبسوا الكمامات
طب ليه ؟ عشان انت لو مؤمن مش حتخاف
ده اللي وصلني لحد دلوقتي

بدراوى said...

هو من اللى فهمته
انه شايف ان الكمامة لا تتيح لك معرفة العظة من الوباء
اللى هو عايزك تصاب به و متخافش
و تصبر
و انك لو خدت الكمامة و العلاج يبقى بتكره الموت و خايف

و يمكن الدليل الأوضح موضوع سيدنا معاذ بن جبل اللى قال اللهم ما بارك فى القليل لما جاله طاعون

اراهن ان اول واحد حيلبس كمامة هو يعقوب نفسه

و بعدين فيه فرق بين انى لما يجى وباء احاول اخذ وقاية منه
و بإنى بحب الموت
او بكرهه

و ربنا قال منلقكيش بأيدينا الى التهلكة

و الأظرف بقى انه بيقول الكمامة بتخفى الوباء و الموضوع يتحل

واضح انه عايز الوباء ينتشر عشان نشعر بغضب ربنا علينا و نتعظ

و موضوع افر من قدر الله الى قدر الله
حسب علمى و فهمى انهم مسابوش نفسهم
و قاله خلاص جالنا طاعون خلينا قاعدين
فى انتظار الموت
زى الشيخ يعقوب عايزنا نعمل
!!!!

الشعب لابد له من حكومه تشكمه said...

مممممممممم طااايب..
سؤال لو تسمح؟
هو التحديث اللى حضرتك نزلته واخترت الفتاوى دى وبتنتقدها,دا بناء على ان حضرتك دارس فقه وشريعه ولا اصلها مش عجباك؟ اصلها تفرق كتير اوى...

نتكلم باه بالنسبه للفتاوى اللى انت اخترتها على انها جريمه لا تغتفر..بس كان لازم فى العنوان كمان تذكر انك معترض على ابن الباز واابن العثيمين وابن الباز ده اسأل عليه,ا ولو بصيت كويس فى الفتاوى هى منقوله عنهم.

بالنسبه لفتوى العرائس حضرتك لو دارس شريعه هتعرف ان فى تحريم اتفق عليه علماء الامه بالاجماع ومنهم مشايخ الازهر ان التماثيل حرام التماثيل الكامله اللى ليها رجل وايد وهكذا وبالقياس ده ينطبق على العرائس...
وبالنسبه للرسم والنحت مش دول بس اللى حرموه ياريت تعمل ريسيرش وتذكر العلماء كاملين اللى حرموه وانت هتعرف هم اد ايه,,بس دا ميمنعش ان الموضوع ده فى اختلاف واقاويل والله انت حابب تاخد باللى اجازه والله انت حر انت استفتيت قلبك ولقيت نفسك مع العلماء اللى اجازوه خلاص بس مش معنى كده انك تهين الباقيين ولا ايه؟

بالنسبه للكنيسه واللى انت بتقول انهم بيسبوا المسيحيه روح نزل درس محمد حسان عن السيده مريم وسيدنا عيسى وبرضه الفتوى دى اللى فى موقع الشيخ يعقوب هى مسنده لشيخ من علماء الامه مش الشيخ يعقوبهو اللى مخترعها وفيها اسناد لمقوله لسيدنا عمر بن الخطاب والله مش عاجب المقوله دى بعض الناس يبأه انتقدوا عمر بن الخطاب من باب اولى ولا ايييييييه؟

بالنسبه للتصفيق زيه زى الزغاريط زى الصفير ادرس شريعه وشوف حكمهم,,بس للامانه فى بعض المشايخ بيجيزوا التصفيق ويحرموا الزغاريط والصفير..

بالنسبه لموضوع التليفزيون يعنى لو شغلنا المنطق هنفهم ليه اتحرم زمان وليه حللوه دلوقتى مش لانه مصدر دخل يا استاذى الفاضل بس لو تفتكر مكنش فى امكانيه ان اصلا تشوف قناة دينيه ملتزمه مكنش فى ستالايت كانت الاولى والتانيه ودمتم لكن دلوقتى يقدروا يستغلوا الجهاز ده فى نشر توعيه وتعليم الناس وطالما باه فى امكانيه فتح قناه يبأه ليه لأ؟ ليه ميستغلوهاش فى الدعوه...اعتقد ان دا شئ بديهى ومنطقى جداااااااا.


اخيرا وبجد اللى صدمنى هو موضوع الكمامه لان للاسف بتقرا الكلام على طريقه لا تقربوا الصلاه ونسيت تكملها بـ وانتم سكارى....
مكتوب بالنص:
إنّ الكمامة ليست حرامًا، ولبسها وقايةً ليس ممنوعًا في الشّرع، ولكن الخطر هو ذلك الهلع الذي أصاب القلوب.. الخطر هو انصراف القلوب عن الفاعل الحقيقي: جلّ جلاله..

اعتقد مفيش اوضح من كده ومن هدفه من كلامه ياسيدى الفاضل..
اوقات ربنا ينزل عليك ابتلاء مش كده؟وممكن يكون اختبار من ربنا لو شفت كلامه هتلاقيه بيقول احنا مسكنا فى الكمامات ومفهمناش الهدف , فى ايه فى القران الكريم بتقول:ظهر الفساد فى البر والبحر بما كسبت ايديكم...
ميبقاش كل همنا على كمامه ودى قمة رعبنا وننهار نفسيا وننسى لن يصيبنا الا ما كتب الله لنا ونعتقد
ان الكمامه دى هى السبب الاوحد فى الحفاظ علينا وننسى ربنا...
الكمامه دى رمز وكنايه مش اكتر ..ياريت انت وبدراوىتقروا الكلام كويس جدااااااا
هتلاقوه مجرد طبطبه على الناس اللى جالها رعب وبانيك من الوباء وبيقولهم خدوا احتيطاتكم ولكن لا تنسوا ان كل شئ بايد ربنا متخافوش مش هيحصلكوا غير اللى ربنا كاتبه علشان كده مارسوا حياتكو طبيعى..
مش دا كلامه ولا ايييه؟

للاسف انا مشوفتش كلمه واحده تدين بيها المشايخ دول بالعكس ...لكن للاسف نحن نعشق تحوير معنى الكلام ونعشق السفسطه ونجحنا ان نكون سوفسطائيين بنجاح باهر..
تحياتى ليك يا استاذ اشرف وتقبل مرورى.

أشرف حمدي said...

جميل
بص يا باشا وركز معايا
انا مش دارس فقه وشريعة ، انا دارس طب ، لو جه دين وقاللي إن القلب به خمس حجرات يبقى سوري ، مايمشيش معايا الكلام ده
الدين مش جاي يتكلم في الطب أصلا ،

فكرة لا تجادل ولا تناقش دي برضه ما تمشيش معايا لإنك لو قريت القرآن كويس حتلاقي دائما كلمات زي ألا يتفكرون ألا يعقلون وعلى رأي المثل الشعبي اللي بيقولك ربنا عرفوه بالعقل

فماتجيبليش حاجات لا ليها علاقة بعقل ولا بمنطق وتقوللي أصل ربنا بيقول كده
الموضوع بسيط جدا ، انا والله شايف إن كل الاديان مش الاسلام بس هدفها الخير ، لما تبقى قدامي حاجة فيها خير وحد يقوللي حرام وعامل فيها عالم ذرّة يبقى تأكد إنه مابيفهمش حاجة

الحلال بيّن والحرام بيّن
عشان كده انا مش محتاج شيوخ ، والله لو جالي مرض نادر ونفترض إن علاجه الوحيد مثلا الخمر أو لحم الخنزير وإلا حموت يبقى خلاص مش محتاجة فتوى
ولا تلقوا بأيديكم إلى التهلكة

ده أساس المشكلة
لما طلع مفتي يقولك رضاعة الكبير الناس اتبلبلت !!! وهي محتاجة بلبلة ؟؟؟
مالهو بالعقل كده ده كلام فارغ ، ترضاها لامك طيب ؟ أو أختك ؟
ماهو لازم تقول فيه حاجة غلط ، ولا على طول ما حتصدق وتقول دي فتوى ومن عالم جليل وهاتك يا رضاعة في صدور الستات

ماتخللي عندك عقل

الإرهاب حصل ليه في مصر ؟ عشان الناس اللي ماعندهاش عقل
قالولهم الإسلام بيقولك أقتل قاموا قتلين ، طب بالزمة ده اسمه كلام ؟
انزل على فوج سياحي تدبيح وأبقى كده بنفذ شريعة الله

ودول كانوا شباب وفي جامعة ومنهم في كلية طب كمان ، لحس عقول بأستيكة

وربنا إداني عقل ليه ؟ عشان أركنه على جنب وأمشي ورا الشيخ فلان والشيخ علان

لما أبقى أقع في مشكلة محتاجة رأي ديني حبدأ بالبحث ، أسمع لده وده وده وأختار اللي انا شايفه مناسب

الغناء حرام ؟ طب خالد الجندي بيقول حلال
الرسم حرام ؟ طب محمد عبده بيقولك حلال
على حسب اللي انا حاسس بيه بقى ، مش حكاية عاجبني ولا مش عاجبني
وربنا في الآخر يحاسبني وأكيد عارف إني سمعت وحاولت أعرف وسمعت من هنا ومن هناك

الدين ليس قاصرا على فرد ولا جماعة
،

adel said...

اشرف علي فكرة انا متفق معاك
مش متخلف
و بالذات في حكاية زكريا بطرس
لان ببساطة لو انا ديني اي دين
و واحد جاي بيقولي هبشرك بدين تاني
مينفعش اول كلمة يقولها انت دينك كذا و رسولك ده كذا و كذا و كذا
ساعاتها اسهل حاجة هاغير المحطة
لاي قناة اغاني اسهل و احسن

أشرف حمدي said...

اما بالنسبة لموضوع ولا تقربوا الصلاة
حاضر من عنيا

انت عملت العكس تماما
سبت الموضوع كله بطوله وعرضه وكلامه الفارغ ــ ودي مش شتيمة على فكرة دي حقيقة كلام فارغ ــ ومسكت في الجملة اللي عجبتك
إنّ الكمامة ليست حرامًا، ولبسها وقايةً ليس ممنوعًا في الشّرع، ولكن الخطر هو ذلك الهلع الذي أصاب القلوب.. الخطر هو انصراف القلوب عن الفاعل الحقيقي: جلّ جلاله..

تمام ؟
ماتشوف قايل ايه فوق الجملة دي
اقرا الموضوع كله ولا تبحث فيه عن عبارات معسولة لسهولة الهضم

كمان انت بتفسر كلام ربنا بطريقة غريبة بجد وممكن أثبتلك منطقيا إنها خاطئة

قل لن يصيبنا ألا ما كتب الله لنا
جمييييييل
بس دي زي الحرب ، انت ممكن تدخل حرب بدون سلاح وتقول الجملة دي ؟
طيب خد الآية

وأعدوا لهم ما استطعتم من قوة ومن رباط الخيل

يعني فيه استعداد أهوه ، ماحدش دخل حرب عريان وقاللك ماهو مقدر ومكتوب
ودي حرب مع فيروس
نستعد ليها يا سيدي ونلبس كمامات ونغسل ايدينا ونستعمل مطهرات ونتأكد من مخزون التاميفلو وبعدين ندخل المعمعة وساعتها يبقى يصيبنا ما كتبه الله لنا

إعقلها وتوكل يا أخي

وبتقوللي مش شايف ولا كلمة تدين بيها الشيخ
يا راجل فيه شيخ يقول على أبو البنت اللي مش محجبة واللي بتروح الجامعة دايوس وخنزير ومنعدم الرجولة
واحد يقول على امك وأختك قنبلة موقوتة من اقترب منهما انفجرتا فيه
واللي مش محجبة ماتكلمهاش وسيبها تولع وإنشالله ما اتحجبت
هي مامتك نازلة الشارع تعمل ايه لاموآخذه ؟ تعلّق الرجالة ؟
دي قلة أدب وسفالة وتطاول على المجتمع كله برجاله ونساءه

وبقولك ببساطة شديدة
شوف دراويش الشيخ حتعرف مين هو الشيخ
شوف التعصب والغضب والثورة واللي بتقلب بشتمية وقلة أدب وسفالة وزعيق وصوت عالي ، ماهو ده الإرهاب
وشيخي لا غبار عليه يا أحمق يا كافر يا يا يا ......

ماهم دول اللي حاولوا قتل نجيب محفوظ عشان قالوا عليه كافر
والله نجيب محفوظ خسارة في البلد دي
وغيره وغيره
مش قتلتوا السادات يابني ؟؟؟
مين قتل السادات مش دول ؟
طيب برافو ، يمكن حاكم مش كويس ، وبعدين حصل ايه ؟
مسكوا الحكم ؟ صلحوا حال البلد ؟ ولا خربوها أكتر ماهي خربانة

المعلم برعى صاحب القهوة said...

جميل جدا تعليقك الاخير يا دكترة عبر تقريبا عن اللى جوايا ، متسلمش دماغك لاى شيخ مهما كان دول ناقص يحرموا عيشتنا اساسا على الارض بعد ما حرموا علينا كل شئ . سالو

أشرف حمدي said...

بالظبط يا عادل
بص انا عندي وجهة نظر
لما المجتمع يصل إلى مرحلة من النضوج الفكري ــ انا لا أدعيها حاشا لله ــ ساعتها حيبقى من حق اي حد يدعو لأي حاجة هو حر
إنشالله يطلع واحد يدعو لعبادة الشيطان ذاته
الرك على حاجتين مهمين جدا
أولا : ايه هو رد فعل الناس من فكرة زي دي ؟ لو المجتمع مستقر وفاهم وواعي ومثقف حينفض من حول أي فكرة لا تتناسب معه وبتاع عبادة الشيطان ده حتلاقيه بيسرح بتمرس على كرنيش النيل تاني يوم ماهو مش لاقي اللي يقتنع بكلامه

ثانيا : أسلوب الدعوة ، والله لو فيه تبشير بالمسيحية أهلا وسهلا يا سيدي قول وسمعني وحقعد أسمعك وافهمك واتفرج عليك للصبح
إنما تبدأ بمهاجمة ديني وبالكذب وبالذور يبقى شكرا مع السلامة
وذكريا بطرس كان ممكن يساهم في تثقيف المسلمين والتعرف على مباديء ديانة أخرى نحن أساسا نعترف بها كالمسيحية
وكان من الممكن أن يكون وصلة خير بين الطائفتين في مصر مسلمين ومسيحيين
وكان ممكن يساهم في نشر مبدأ إن المسيحي برضه مؤمن بنفس الإله زي المسلم

إنما ده جه طينها اكتر ماهي متطينة لاموآخذه
ولع حريقة بين الديانتين بأسلوبه الذي يعتمد على محاولات فاشلة لهدم دين لنصرة دين آخر وصدقني دي عمرها ما تنجح أبدا

يا أخي ماتروحش الهند وتدبح بقرة كأول خطوة ليك للدعوة إلى الاسلام

مسدس صغير said...

اولا سلام عليكم وربنا يهدينا ويهديك
ثانيا انا هرد على ردك بس على الشعب لابد له من حكومه
انت بتقول انك دارس طب ينفع اجيلك اقولك تعالى اسسلى بيتى واعمل رسم هندسى ليه؟؟
طبعا مينفعش وانت اكيد قلت مينفعش لأنك غير متخصص وكلنا بنحترم التخصص والدليل على كده موضوع الخمس غرف بتوع القلب اللى انت قلته. وده مش لأن احنا بنقدس المتخصص لأ انما لأن احنا عارفين وواثقين ان المتخصص ده دارس وفاهم وعارف اكتر منى ومنك دى وحدة
الشاهد من كده ان انا وانت منقدرش نخلى من نفوسنا مقيّمين على علماء رؤوسهم توزن بالذهب بل اكثروالله لأن لا انا ولا انت وصلنا لمعشار معشار علمهم دى حاجة
الحاجة التانية برة الرد انك اما تيجى تتكلم عن اى شخص مهما كان لابد انك تتكلم عنه باسلوب احسن من كده يعنى كلمة متخلف وارهابى والكلام ده لو انت جيت مدونتى ولقيتنى كاتبه عن دينا الرقاصة انها متخلفة او كاتبه عن تامر حسنى انه ارهابى عشان مربى دقنه ممكن تشتمنى صح؟
خليك موضوعى واطرح الموضوع بمنتهى الموضوعية والحيادية حتى وان كنت بتكره الشخص ده فده حقك اكره من شئت واحبب من شئت دى التانية
موضوع انك تناقش وتجادل ده عادى فى الدين تسأل عن الحاجات اللى انت عايز تعرفها وتناقش وكل حاجة والدليل زى ما انت قلت " أفلا تتفكرون" "افلا تتدبرون"
كلام جميل بس انت نسيت حاجة مهمة وهيه " ولا تقف ما ليس لك به علم"
اى لا تجادل فى اشياء ليس لك بها علم ومن خلال كلامك انا شايف من وجهة نظرى المتواضعة مع احترامى ليك ولوجهة نظرك انك مش دارس لا فقه ولا سيرة ولا تفسير ولا حديث ولا غيره
وغير كده ربنا لم يعرفوه بالعقل لأن ربنا اللى خلق العقل والجملة دى خطأ عقائدى ربنا عرفوه لأنه هوه عرفنا بنفسه قبل ان يخلقنا بالفطرة يعنى ما علينا من النقطة دى
وموضوع العقل ده مش فى كل الاحيان لأن فى حاجات فى الدين ربنا قالنا عليها بنقول سمعا وطاعة وليس لنا الا ذلك زى فريضة الحج كلها ايه العقل فى انك تلف حولين الكعبة ثم ايه العقل فى رمى الجمرات ثم ايه العقل فى صعود جبل اصم جبل عرفات وخلافه دا حتى فيه مقولة لسيدنا على بن ابى طالب رضى الله عنه انه قال" لو كان الدين كله بالعقل لكان المسح على باطن الخف اولى من المسح على ظاهره"
اللى هوه المسح على الشراب فى الوضؤ يعنى
وطبعا زى ما انت قلت الحلال بين والحرام بس فيه علماء لتوضيح الحلال والحرام يعنى انا لو قلتلك (يَسْتَفْتُونَكَ قُلِ اللَّهُ يُفْتِيكُمْ فِي الْكَلالَةِ)
تقدر تقولى ايه هيه الكلالة ؟؟
معتقدش كان ممكن حد يعرفهالنا الا العلماء
ولو حد اصابه مرض وعلاجه من الخنزير او خلافه زى مبتقول العلماء قالولنا انه يجوز والدليل قوله تعالى "إلا مااضطررتم إليه"
بالنسبة لموضوع ارضاع الكبير انا مش مختلف معاك فيها
وبالنسبة لمسالة الارهاب انت عمرك شفت شيخ من دول قال روح فجر نفسك فى فوج سياحى؟؟
عمرك سمعت عن شيخ من دول فجر نفسه فى الحسين وللا فى الغردقة وللا فى شرم الشيخ؟؟
ومسألة الغناء علماء الامة معظمهم مجمع على حرمة الغناء القليل اللى قال انه حلال منهم خالد الجندى ومنهم كمان الدكتور يوسف القرضاوى علماء على العين والرأس وانت حر تاخد بده انت حر تاخد بالتانى بردة انت حر وربنا هيحاسبك انت على فعلك انت وهحاسبهم على فتواهم
وكذلك الرسم
اما بقى بالنسبة للتحديث بتاع البوست اعتقد الشعب لابد له من حكومه وضحت فتوى الكمامة وانك مقصر فى نقل الفتوى او فى فهم الفتوى بالنسبة لموضوع العرائس فده حديث صحيح عن النبى لو رديته يبقى انت بترد كلام النبى . ده مش رأى شيخ يعنى
بالنسبة بردة لموضوع التصفيق ده رأى فقهى بردة ولو انت عايز تصقف صقف.
وانا معاك ان الدين ليس قاصرا على جماعة او فرد معين بس بشرط يبقى بعلم وليس بدون علم
اشكرك على الطرح وأسف على الاطالة ومتأسف لو خرج منى اى لفظ ممكن يضايقك

أشرف حمدي said...

كلام جميل ودعيني أرد بمنطقية شديدة وبهدوء

أولا : لو دخلت على مدونتك ووجدتك تتهمي دينا الراقصة بالتخلف وتامر حسني بالإرهابي فهذا من حقك في حالة واحدة
ان تضعي تحت كلامك ما يثبت قولك ، الفرق كبير بين الشتيمة والحقيقة
هناك قواد ، هو يعمل قوّاد ، حينما اقول أنه قواد فهذه جملة خبرية
هناك رجل صالح ، أو على الأقل غير معروف عنه أنه ارتكب افعال مشينة ، حينما أقول عنه أنه قوّاد فهذه شتيمة

ثانيا :
ذكرتي التخصص
خذي هذا الحديث

مسلم عن أنس رضي الله عنه أن رسول الله صلى الله عليه وسلم مر بقوم يلقحون النخل فقال: لو لم تفعلوا لصلح، قال: فخرج شيصا " تمرا رديئا" فمر بهم فقال: ما لنخلكم؟ قالوا: قلت كذا وكذا.. قال: أنتم أعلم بأمور دنياكم. كما ذكره ابن خزيمة في صحيحه، وابن حبان في صحيحه وغيرهم بروايات مختلفة.

انتم أعلم بامور دنياكم ، إذن الدين دين والعلم علم والعقل عقل
ماحدش ييجي يقوللي شرب البول بقى ، ماتمشيش معايا دي
ماحدش ييجي يقوللي الأرض مش كروية ودي أكاذيب زي ما بيحصل ، ساعتها بجد مش حقدر امسك نفسي من الضحك
يا ستي هو انا جاي أعمل دين جديد ولا هما اللي جايين يعملوا دين جديد ؟
سيبك من الإسلام دلوقتي وتعالي شوفي المنهج ككل ، هو ربنا مش كيان واحد ولا أكتر من كيان ؟ مرة حلال ومرة حرام ؟
ماهو معروف في كل الأديان إن الزنا حرام ، ماتجيش تقوللي رضاعة الكبير بقى

بصي
حقولك حاجة وسوري بجد إني بقولها
انا لو بشتغل معاكي في مكان واحد ، وطبقت كلامك في تعليقك ده إن مادمت انا مش دارس فقه وسنة وشريعة يبقى اسمع وأطيع وبس كلام الناس الدارسة اللي علمهم بحر مش عارف ايه وعقولهم توزن بلد والكلام ده
طب يا أختي الفاضلة انا معايا فتوى بالرضاعة ، ومن شيخ دارس فقه وسنة وشريعة
خمس رضعات مشبعات
ها ؟ أطبق الفتوى واستهبل ؟ ماهو "ليس لي به من علم" بقى والشيخ الدارس قال كده وعليّ السمع والطاعة
ثم ده الشيخ الألباني مش أي كلام يعني
والشيخ الدكتور عزت عطية رئيس قسم الحديث بكلية أصول الدين بجامعة الأزهر
دارس ده ولا مش دارس ؟

ماهو خلاص لغيت عقلي بقى وماشي على الفتاوى
وانا الفتوى دي عاجباني الصراحة
غلطان انا ؟؟؟
انا لا أقصد إهانة بالمناسبة ولكن أوضح لك بشاعة الأمر بطريقة يمكنك ان تشعري بها

ولن اتنازل عن إجابة السؤال
انت بالطبع غير موافقة ، أي انك معترضة ، أي انك تعترضين على كلام المشايخ اللي عقلهم يوزن ذهب
ردي على نفسك

تسألين هل سمعت فلان أو علان يقول روح فجّر نفسك
وهو يقدر يقول كده في الفضائيات ؟ يقدر يقولها في جامع ؟ يقدر يقولها في شريط ويبيعه ؟
انا كان عندي شرايط زمان للجماعات الاسلامية فيها بقى الكلام ده ، شرايط مش للبيع ولكن تنسخ وتروج لتجنيد إرهابيين ، ده كان في التسعينات
المشايخ اللي انا بتكلم عنهم مش محتاجين يقولوا فجر نفسك
كفاية قوي يقول المسيحي كافر ، وبعدين يلزق معاها جملة إن الكافر يجب أن يقتل
وإربطي إنتي بقى واستنتجي
لما واحد من دول يقول عن المسيحي كافر ومشرك ، ولا تقرأه السلام ، ولو كلمك قول له يا خواجة ــ يعني بيسحب منه مصريته ــ وماتسلمش عليه أبدا ولا تقوله له حتى صباح الخير
مش ده بغض ؟؟؟ كراهية ؟؟؟ إشعال فتنة طائفية
ويطلع الممسوح عقله من دول قرفان من المسيحيين ، ومع أول شرارة يضربه برقبة قزازه في وشه
مش ده اللي بيحصل ؟

أنا ايضا أعتذر عن أي كلمة قد تكون ضايقتك فأنا لا أقصد غير شرح وجهة نظري
نحن متفقان على الأقل أنه حينما نحتاج لفتوى بخصوص أمر حياتي متعلق بنا نبحث ونسمع ونقرأ ونشاهد ثم نختار ما يرتاج إليه ضمائرنا كأشخاص تحب التقرب إلى الله
وهؤلاء المشايخ على العكس يكفرون ويسخرون من كل من يعترض على كلامهم ، وسخروا قبل ذلك من عمرو خالد والآن من مصطفى حسني وأستطيع أن أنشر هنا عشرات مقطاع الفيديو بها سخرية واستهزاء واتهام بالجهل من هولاء المشايخ للدعاة الجدد

تحياتي

الشعب لابد له من حكومه تشكمه said...

ومين قالك يا استاذ اشرف انك تلغى العقل والمنطق انا قلت كده؟؟؟؟؟؟؟؟؟
على فكره اللى انا بقوله ده بالعلم وبالمنطق لانى ببساطه مش من النوعيه اللى بسمع وتقول ااامين دى ابعد حاجه عنى بس كمان اتعلمت انى اقرى كتير وااتعلمت انى اقرا فى الدين كمان اكتر..

وزى ما انت بتقول انك دكتور وفى الطب على عينى وراسى والله انت اعظم دكتور فى الدنيا وجيت قلتلى القلب فى الشمال وانا مصممه (اخدت بالك من مصممه دى انا واحده مش واحد بالمناسبه)وانا مصممه ان القلب فى اليمين هتقولى ايه وانتى تعرفى منين انا درست وعرفت وشرحت
جثث كمان....
بس هنا احترام لمن درسوا واجتهدوا .

الفكره باه انك بتقول ان الحرام بين والحلال بين طب والمشتبهات اللى بينهم نعمل فيهم ايه ؟؟؟؟؟؟؟؟
نخلى كل واحد ماشى بدماغه كده ولا كان فى امام الناس كانت بترجعله وتساله وتستفسر منه من اول عهد الرسول والخلفاء الراشدين ومعنى كللامك انك ممكن تنكر اى كلام للائمه الاربعه لان لو عملت ريسيرش هتلاقى كلام الناس دى مستند على كلامهم..

زى لما بحس بمغص بجى لحضرتك واقولك الحقنى مش معقوله لما احس بمغص هروح لميكانيكى
لما تواجهنا حاجه نسأل مين نفسنا؟ ولا كل واحد ادرى باللى درسه وعاش حياته
كلها يدرسه..

وبعدين انت شايف ان المشايخ دول هم اللى دعوا للتطرف؟؟!!
مختلفه معاك جدااا مش دوووووول روح شوف فكر جماعة التكفير وانت هتلاقى انهم اصلا فسروا القران غلط مفيش داعى اننا نشيلها للمشايخ دول ازاى تاخد واحد بذمب واحد تانى؟

بالنسبه للمقاله او الدرس عن الكمامه ده باه خاضع لتفكير كل واحد واللى بيقراه انت بتقراه وشايفه من زاويه وانا شيفاه من زاويه تانيه..وهنا انت حر فى رأيك وانا حره واختلافنا لا يفسد للود قضيه مع انك لو قريته تانى هتلاقيه قايل مش معنى كلامى اننا منخدش اختياطات ولا ان واحد مريض يمشى يفشى المرض...

وعلى فكره مش دول اللى حاولوا اغتيال نجيب محفوظ ارجع شوف دول فكرهم ايه ودول ايييه؟؟؟
ولا هم اللى قتلوا السادات لان ببساطه الى قتل السادات اخوان مسلمين ودول مش اخوان خااااااالص ,الشيخ محمد حسان يطلق عليه من انصار السنه فى فرق يا دكتور صدقنى...

ثانيا انت زعلان من الفاظ الشيخ ياسيدى واحد شايف انه اللى يسيب بنته تمشى متبرجه جداا هو مش راجل ودا مش كلامه دا كلام دينا لان فى عندنا حاجه اسمها غيره وكلمة ديوس دى ذكرها الرسول على فكره.....

وبعدين حاجه اخيره يا استاذ اشرف بلاش كلمة خللى عندك عقل دى؟؟
انا بتناقش معاك مش معنى انى مختلفه معاك انى اباه مش بفهم ولا معنديش عقل ولا انك مثلا اذكى منى..انا مقلتش ليك كلمه واحده تهينك او تحسسك انك مش بتفكر ولا قلتلك خلى عندك عقل,

اهو انت دلوقتى عملت نفس الطريقه لمجرد انى مختلفه معاك شايف انى معنديش عقل وانى مش بعرف افكر وانى وانى وانى.....
مع انى الحمد لله شايفه ومتأكده وواثقه من عقلى اللى اعتقد انك مهما تختلف معاه من المفروض انك تحترمه زى ما هو بيحترم كلامك..

اه بالمناسبه صحيح بالنسبه لموضوع فتوى ارضاع الكبير اللى طلعها شيخ من الازهر,اعمل ريسيرش وهتلاقيه منور فيها وكمان شوف رد المشايخ دول على الفتوى دى ايه الشيخ حسان قال بالحرف انا عاوز افهم لزمتها ايه ؟ ليه نشغل الامه بكلام ملوش لازمه؟؟ليه نطلع نتكلم فى الكلام ده؟

سعيده بالمناقشه معاك يادكتور

أشرف حمدي said...

يا ستي حنقعد نلف وندور على بعض
ردي عليا طيب ، أمشي بكلام المشايخ ولا ما أمشيش ؟
حرجع أمسك تاني في موضوع فتوى رضاعة الكبير كمثال بسيط جدا من بين عشرات الآلاف من الامثلة على كلام المشايخ كل يوم
أمشي بيها ولا ما أمشيش ؟ رأيك ايه ؟
حتقولي ايه طيب ؟
ما الفتوى معايا ومن عالم جليل أهوه يا أختاه
أجيبلك فتاوي تانية ومن علماء اجلاء جدا يقولوا إن تعليقك عندي في المدونة حرام ، ماهي خلوة غير شرعية اهيه زي الشات ما حرموه وقالك خلوة غير شرعية ، قاعدة ليه وسط الرجالة ؟
ماهو النت حرام زي التليفزيون
ولا مابقاش حرام دلوقتي من بعد ما المشايخ طلعوا فيه يلقطوا رزقهم ؟

يا ستي الأطباء والعلماء عمرهم ما اختلفوا مع بعض في مسألة زي : ما هو المسبب لمرض الانفلونزا
ماطلعش دكتور وقالك السبب بكتريا والتاني قال فيروس والتالت قال طفيلي والرابع قال حشرة القمل والخامس قال السحلية
علماء الدين بقى بيختلفوا ليل نهار ، أديكي بتقولي إن اللي قتلوا السادات إخوان ، طب اللي انا بتكلم عنهم سلفيين يعني ألعن وأضل وتتلمذوا على ايدي سلفيين ، دول بيشتموا في الاخوان أساسا
يالهوي

( على فكرة كلمة "يالهوي" حرام شرعا وليها فتوى كمان )

هو حيبقى إخوان وسلفيين كمان ؟
هو فيه كام نبي حد يقوللي ؟ مش نبي واحد وقرآن واحد ورب واحد ؟ ويطلع عليهم خمسوميت دين ومئات الآلاف من الفتاوي اللي كلها ضد بعض

انا لا أقصد الإهانة بكلمة شغلي عقلك
هو تشغيل العقل بقى إهانة يا جدعان دلوقتي ولا ده وفقا لفكر المشايخ دول ؟
عموما انا آسف لو تم فهم الكلمة خطأ

انا بس عاوز أعرف
أمال لو طلعت وقلت إني ملحد حتعملوا فيا ايه ؟ واحد بيقول إنه مسلم واسمه أشرف حمدي وبيختلف مع مشايخ فلان وفلان ومقتنع بكلام فلان وفلان
مصطفى حسني كخة ؟ مارق ؟

أمال لو قلت إني ملحد مثلا ــ وده حقي طبعا كمواطن في دولة مدنية ــ تعلملوا ايه ؟

قوليلي اعمل ايه بالفتوى بتاعة رضاعة الكبير عشان انا غلس ولازم أسأل تاني وتالت نفس السؤال :) أشغل عقلي ولا حرام أشغل عقلي ؟
أسمع كلام الشيخ الألباني وغيرهم اللي اتكلموا في الموضوع ده ولا ما اسمعش ؟
أعترض ولا ما اعترضش ؟
أروح لدكتور تاني طيب ؟ ولا أكتفي برأي الدكتور الأولاني خاصة وإنه عالم جليل ؟

رأيك
................
................

ماشي ، وتعالى نسفسط مع بعض تاني
انتي مصرة إن قلبك في اليمين مش في الشمال
جميل
معايا جثة أشرحها قدامك اهيه ونشوف مع بعض في اليمين ولا في الشمال

انا بقول إن دول إرهابيين ولحسوا عقول البسطاء ونشرا التطرف والبعض والتخلف برفض إعمال العقل وبرفض الفنون جميعا وبرفض كل مقومات الحضارة وآدي دليلي
لو اللي جبته مش كفاية حتعب نفسي شوية وأجيب تاني مش مشكلة

حاسبوا رجال الدين قبل أن تحاسبونيي

خالص حبي واحترامي وتقديري

لورنس العرب said...

قد قلت رأيك فيهم

ولكن يا ترى ما هو رأيهم فيك؟

يعني لو عرضناك عليهم يا ترى ماذا تتوقع ان يكون رأيهم في شخصيتك؟

وهل ستتقبل هذا الرأي أم لا؟

لا ارى أي مبرر لكلامك هذا عن هؤلاء الناس الأفاضل الذين حاولوا أن يفعلوا شيئا وسط الفساد الذي نعيش فيه داخل المجتمع
رجل يظهر عليك ويحاول ان يقنعك بدلائل من القرآن والسنه النبويه
فإن كنت انت لا تريد ان تقتنع انك وفريقا يؤيدك في رأيك فأنت حر
لم يجبرك أحدا على شيء
يعني لم يأتي احدهم ويقول لك تعالى يا اشرف اعمل كذا وكذا
فإن كانوا يضايقوك لهذه الدرجه فلا تستمع إليهم ولتمضي في حال سبيلك
انت يعجبك عيشتك على وضعك هذا- ومن يتبع كلامهم ويسمعهم يعجبهم ما يقولوه
انت تراه تخلفا- ونحن نراه الطريق الصحيح
وعندما نقف جميعا أمام الخالق سيحكم بيننا فيما نختلف فيه
لكن وقتها لن يكون هناك مجالا للجدال
وتذكر جيدا ان من اهم مباديء العلمانيه ان تكون هناك حريه
يعني اترك كل واحد يفعل ما يشاء
هناك حريه عقيده وحرية تعبير وحرية في كل شيء
فإن كنت من مؤيدي العلمانيه فتمسك بها للنهايه واترك الناس احرار في سماعهم كما يتركوك حرا
هناك صراع بين الحق والباطل والخطأ والصواب
الكل يحاول ان يظهر الطرف الاخر في مظهر السيء - لكن لم يحاول احدا ان يقنعنا بالنظام الذي يمشي عليه
انت الآن تقول ان هؤلاء اليوخ الأفاضل على باطل- لكنك لم تقول لنا ما هو الصح الذي تسير أنت عليه لكي نتبع نظامك في الحياه ونصل في النهاية إلى الجنه بعد أن نموت
أعلم جيدا انهم ليسوا بإرهابيين ولا معقدين ولا متخلفين
انهم أناس يريدون الصلاح للناس في هذه الدنيا التي اصبحت سلطه- اختلط بها الحابل بالنابل ولم نعد نعرف من هو الصواب وما هو الخطأ
الأمور كلها أصبحت عك- الكل يتحدث والكل يهاجم ويعتقد انه على صواب
ما أسهل ان انتقد الآخرين - ولكن ما أصعب أن أقنع الطرف الآخر بطريق الهدايه
...........................
على فكره
انا سايب لك فانوس في الميكروباص من أول رمضان على أمل انك تعدي وتاخده

وآي رمضان خلص ولم تأخذه

كل سنه وانت طيب

الشعب لابد له من حكومه تشكمه said...

استاذ اشرف هو الكومنت بتاعى فيييين اللى انت بترد عليه الكلام دا كله؟؟؟؟؟؟؟؟؟؟؟؟؟؟؟
لا بجد اكلته القطه مثلا؟
انا قلت يمكن ضاع ولا حاجه بس لقيت تعليق من مسدس صغير وانت تقريبا بتكلمه على انه انا وده مش انا على فكره,,

وبعدين لقيتك بترد على كلامى اللى حضرتك مش نشرته معنى كده ان الكومنت ده وصل طب هو فيييييييييين؟ مش باين يعنى مع العلم انى رده فيه على فتوى ارضاع الكبير دى..ومش هعيد كلامى تانى:))
بس السؤالى اللى محيرنى دلوقتى فين الكومنت؟
يعنى راح فييييييين؟الله يخليك تقولى بس.

بالمناسبه انت بتقول معاك فتوى ارضاع الكبير من شيخ كبير ,,الشيخ دا من علماء الازهر يادكتور وانا قلتلك كده فى الكومنت اللى طار وخرج ولم يعد ومعرفش راح
فين...
انت دلوقتى بتشكك فى مشايخ الازهر مش دول,وعلى فكره انا سمعت الشيخ حسان نفسه بيستنكر الفتوه دى وبيقول ايه لزمتها وايه فايده ظهورها وما الحكمه
من هذا ؟
الفكره انى قلت فى علماء ثقه ودول علماء ثقه مطلعش منهم زى الفتوه دى والله عاوز تنتقد مشايخ الازهر اللى طلعوا الفتوه دى اعمل ليهم بوست مخصوص لكن مش مكانه هنا وسط العلماء
دول...
بس برضه مش هتناقش تانى غير لما اعرف اين ذهب الكومنت بتاع القلب فى اليمين..اصلك رديت عليه طب هو فيييييييين؟
مش بحب الموديريشن انا على فكره..

اما اشوف ده هيروح,, فين هباه اجى بعد الفطار ان شاء الله اطمن على الكومنت ده :))

لورنس العرب said...

بالنسبة لموضوع تحريم الكراسي يا أخ أشرف
هذا الموضوع مأخوذ من موقع أم أنس
وأم أنس هذه لا وجود لها ولكن هناك قصه في هذا الأمر
موقع "أم أنس" قام بإنشائه أحد الليبراليين يقوم فيها صاحبه بصياغة فتاوى وبيانات تهكمية ساخرة يبدأ فيها بالسخرية بالآيات القرآنية والسنة النبوية مرورا بالأحكام الشرعية وانتهاء بشيوخنا الأفاضل , وقد أطلعت على هذا الموقع بنفسي قبل ثلاث سنوات حيث تم إنشاؤه بعد "الصدام الفكري بين الليبراليين والاسلاميين", فكان إنشاء موقع أم أنس نكاية بالاسلاميين وتم الترويج له
تماما كالصور التي يتم نشرها عبر الانترنت ويقولون لك ان لفظ الجلاله موجود على كذا في الفضاء وان كلمة محمد رسول الله وجدناها مش عارف على ايه وكل هذا من فعل الآخر- الذي يطالبنا الناس بأن نحترمه حتى يسخروا منا ومن ديننا
ولله المثل الأعلى - فلا يحتاج عز وجل إلى أشياء تثبت قدرته ويكفي وجودنا في الحياه ويكفي انه الرزاق
أما باق الفتاوى التي تسخر من وجودها فأقول لك انه بالنسبة لتحريم لعب الكوتشينه وغيرها فمن قال هذا الكلام درس الدين طيلة عمره
وهذا يكفي ان نثق برأيه
تماما مثلك كطبيب - انا لا استطيع ان اعالج اسنان احد لأنني لم ادرس الطب
وكذلك انت لا تستطيع ان تحكم على شيء في الدين بأنه صواب أم خطأ لأنك لست من خريجي كلية الدعوه كما انك لست اهلا للإفتاء مثلي
والعالم بشر يمكن ان يخطيء ويمكن ان يصيب
فلا ينبغي ان تأتي للأمور التي اخطأ فيها البعض -وهي نادره- وتنشرها لكي تدل على صحة رأيك بأن هؤلاء لا يصلحون
وإن كان هؤلاء لا يصلحون فمن هو الذي يصلح إذن؟

لورنس العرب said...

ملاحظه . . . انا عارف قرفتك اناهردا بس اعذرني الموضوع مش سهل

في ردك على أحمد قلت ان الراجل ابو دقن لازم يخلي باله من تصرفاته لكي لا تؤخذ عليه
يا عم أشرف احنا بشر
انا بدقن لكني انسان ولست نبي مرسل
انا بدقن لكني بني آدم أخطيء
لا تضعني وتضع كل من هو بدقن في مرتبة الانبياء حتى إذا صدر من احدنا خطأ قلتم يا ناس شوفوا ابو دقن بيعمل ايه
انا مش معاك في الموضوع ده اطلاقا
يعني انا ممكن آخد وأدى معاك في اي حاجه إلا الأمر ده بالذات فأنا ديكتاتوري تماما
يا اخوانا ابو دقن والمحجبه والمنقبه بني آدمين
لا تتصيدوا لهم الأخطاء ارجوكم لكي تثبتوا صحة وجهة نظركم

أشرف حمدي said...

الشعب لا يحتاج إلى حكومة كي تشكمه
عشان الإسم انا معترض عليه أساسا ههههههه
يا ستي ده ماكنش كومنيت ده اللي نسيت انشره
يالهوي ؟؟؟
عشان بس تعرفي إنك ثائرة وده من تأثير خطب ودروس هؤلاء الشيوخ
انا رديت على الكومينت ونسيت أنشره والدليل على كلامي إنه اتنشر أهوه بتاريخه وفي موضعه ولو كنت مسحته ماكنتش انا نفسي اعرف أنشره ولا كنت أكيد رديت عليه
حرد على كومينت ما نشرتوش أو حذفته مثلا ؟؟؟

وحدي الله كده
الله أكبر الله أكبر :))

أشرف حمدي said...

دلوقتي انتي بتقولي عملياء الأزهر مش اهل ثقة ؟؟؟
وعلى العكس علماء الوهابية السلفية السعودية هم اللي ثقة
تمام
بصي
يا تخدي بكلام السلفية كاملا يا ماتخديهوش بقى
عشان كلامك هو إن فيه علماء وأهل علم ما يصحش أبدا ننتقدهم
شوفي بقى دلوقتي بتقولي علماء الأزهر مش عارف ايه
بتردي على نفسك

يا أختاه الإنترنت حرام حرام حرااااام
ماينفعش تدخلي الإنترنت بدون محرم
أييييون لازم محرم وده كلام السلفية

برجع تاني وأسال تاني وماحدش بيجاوب
أرضع ولا ما أرضعش ؟؟؟
إنتي لو عندك شيخ بيقولك لأ حرام انا عندي شيخ بيقوللي حلال يا اختاه ومن حقي ان أرضع

ها ؟؟؟
رأيك ايه قوليلي ؟؟؟
أحكّم عقلي ولا ما أحكمّوش ؟؟؟
أسمع كلام العلماء والفقهاء والدارسين ولا ما اسمعش ؟؟؟

أشرف حمدي said...

لورنس حبيبي
تعليقك عجبني جداااااااااا
برافو عليك بجد ومن قلبي

يبقى كلامك معناه ايه ؟؟؟
أبو دقن بشر زيي زيّه وخطّاء زيي زيه والمنقبة والمحجبة واللي لابسة ملحفة واللي لابسة أسدال واللي لابس جلبية و و و
يبقى ماحدش من دول ييجي يعمل عليا شيخ أبدا
لما واحد يوقفني في الشارع ويقوللي إنت مربي شعرك كده ليه يا أخي بقول له وانت مربي دقنك كده ليه يا أخي ، يقوللي دي سنة رسول الله أقول له والشعر الطويل برضه سنّة رسول الله ومن حقي كمان أضع كحل في عيني وأقول سنة رسول الله
وماحدش أحسن من حد بقى
ماهو يا تربي دقنك وتلتزم وتبقى قدوة وتخللي بالك من تصرفاتك
يا تربي دقنك وتسكت خالص ولو عندك كلمة عاوز تقولها اكتبها على مدونة زي ما أنا بعمل
عمرك شفتني في الشارع بخطب في الناس وأقول لهم النقاب ده مالهوش علاقة بالدين ؟
ده رأيي بكتبه عندي واللي عاوز يقرا يقرا واللي عاوز يناقش يناقش واللي عاوز يعترض يعترض
إنما إرهاب لأ
ورئيسي في العمل مالهوش غير العمل مايجيش يقوللي ما بتصليش ليه أو يخصم لي من مرتبي عشان ما بصليش مثلا
من أعطاه الحق وانت تقول أنه إنسان وخطّاء مثلي ؟؟؟

شكرا على تعليقك

أشرف حمدي said...

لورنس
شكرا على التوضيح وقد كنت أشك في ذلك كما ذكرت في قلب التدوينة وقلت أنني أعتقد بأنه موقع ملفق للسخرية

أشكرك كثيرا على إهتمامك وبحثك وراء هذا الأمر
تحياتي

أشرف حمدي said...

لورنس
فانوس ايه يا باشا وميكروباس ايه ؟؟؟ مش فاهم بجد ؟؟؟
---------------
طيب بص
انت مديني أكبر من حجمي ليه دلوقتي ؟ :) يعني هو انا بالكلمتين اللي قلتهم في المدونة عندي خلاص السيوخ دول قعدوا في بيوتهم وبطلوا كلام ؟
ماهم بيتكلموا ، ومش فاضيين أساسا يقروا أي كلام على مدونتي
انا اللي ضد حرية الرأي ولا دول ؟
لما الشيخ يقولك إلبسي النقاب دلوقتي بمزاجك بدل ما تلبسيه بعدين غصب عنك
ماذا تفهم من هذه الجملة ؟

من قتل فرج فودة ؟
من حاول قتل نجيب محفوظ ؟
من قتل السادات ؟
حتقوللي دول تيارات مختلفة ولكن المنهج واحد

سؤال آخر مهم جدااااااااااا
--------------------------
أجب على هذا السؤال
هو محمد حسين يعقوب ومحمد حسان والحويني بيقولوا كلام ربنا ورسلوه وعمرو خالد ومصطفى حسني بيقولوا كلام الشيطان ؟؟؟
انت تتحدث عن حرية الرأي وقبول الآخر في حين أن المشايخ الذين تدافع عنهم يهاجمون ويسخرون ويستهزأون ويتهكمون ويسبون ويشتمون ويتطاولون وربما يكفرون عمرو خالد ومصطفى حسني
ماذا تفهم من ذلك ؟؟؟

وتدعوني أنا إلى عدم معارضة الأولياء والمشايخ وأهل العلم ؟
من الأولى أن تكتب انت بوست على مدونتك تقول فيه : عيب يا شيخ لما تسخر من داعية وتتهمه بالجهل والغباء

واللي على راسه بطحة ايه ؟؟؟
عليك نور

أحمد مختار عاشور said...

أمثلة لأتباع شيوخ السلفية
....

الشيخ محمد حسين يعقوب مرة قال
إن لو هتبطل سجاير عشان أم أو زوجة أو صحة أو فلوس

.. يبقى كأنك مبطلتش .. لازم تبطل سجاير عشان خاطر ربنا وبس

ده بقى مش اسمه تنطع في الدين؟

فيها ايه لو بطلت سجاير عشان اي حاجة؟؟؟؟

افرض انا كنت هبطل عشان صحتي .. وبدام عشان صحتي يبقى اكيد عشان ربنا هيسألني عليها .. فلماذا المغالاة إذن؟؟

.....

الشيخ محمد حسان لما ييجي ويكتب في الموقع بتاعه إنه شال صورته درءاً للفتنة
(الجملة كانت موجودة واتشالت مؤخراً)

بذمتكم الكلام ده ميضحكش؟؟؟؟
ولا خلاص لغينا عقولنا !!
ولا يمكن يكون يضحك فعلاً بس عيب نقول !!

ثم تعال هنا منين شال صورته وبعدين نلاقيه شغال بيقدم برنامج صوت وصورة؟؟؟؟

هل ناقص ان يطلعوا ان النقاب فرض على الرجال كمان؟؟؟؟

.......

الشيخ محمود المصري لما ييجي يقول إن مكتشف البنج خفف الكثير من معاناة المسلمين لكن للأسف علمه ملوش لازمة .. ومات كافر .. وفي النار


ده مش شيئ يدعو للغثيان؟؟؟؟؟
وصلنا للدرجة ديه من الندالة؟؟؟؟
خدنا من الراجل البنج وفي الاخر خلاص روح النار بدام خدنا اللي عايزينه منك

(لاحظوا اني مقلتش ان العالم ده هيدخل الجنة)

أنا بس معترض على إنه بيرمي اللي عايزه في النار بمزاجه

.. ويقدر يبرر الكلام ده من القرآن زي ما هو عايز

ويقولك ده ربنا اللي قال مش انا

والله من أقوالهم وأفعالهم براء

رحم الله الإمام ابن حزم حين قال إن فيه ناس بتضل عن كتاب الله عن طريق كتاب الله نفسه


...
كلمة لأولي الألباب

محدش له حق إنه يتدخل في تخصص التاني
جميل
بس مشكلة الشيوخ هنا أو سوء حظهم إن مجال تخصصهم في حاجة بيتوقف عليها مصاير كل البشر بلا استثناء

ولا هم الشيوخ وحدهم اللي هيتحاسبوا؟؟؟

ربنا مش هيسأل الشيخ عن اللي عرفه في الطب أو الهندسة أو الزراعة


لكن الأكيد إنه هيحاسب كل البشر في الدين
.............
وشكراً

أشرف حمدي said...

تعرف يا عاشور ؟
انا كان نفسي يبقى الموضوع ده بقلمك إنت ، إنت مثقف أكتر مني ومطّلع أكتر مني وبشهدلك قدام كل الناس دي
تحياتي لتعليقك المفيد والأكثر من رائع

Anonymous said...

بجد البوست ده فى الجوااااااااااااان
والله ماقولت حاجة غلط بس فى حاجة عايزة اقولها هم فين العلماء دول مش واخده بالي هو اى واحد يروح يقرا كام كتاب ويطلع فى التليفزيون يبقى عالم ازاى؟
كلمة عالم دى كلمة كبيرة قاعدين تقولوا لحوم العلماء لحوم العلماء ياجماعه دول وعاظ يعنى ولا علماء ولا حاجة
وعاظ وعاظ وعاظ مش علماء والمفروض هم من نفسهم يدراسوا واقع الامة دلوقتى مش يتكلموا بطريقة والله العظيم بحس انهم مش عايشين معنا فى الدنيا فى سنة 2009 بحس انهم بيكلموا ناس تانى يعنى فى زمن تانى واولى بيهم انهم يكونوا اعلم بشئون الناس ده لو هم علماء فعلا
ربنا يهدى
شيماء

Anonymous said...

السلام عليكم

يا اخي اتقي الله

ايه الكلام الاهبل ده

هو حتى لو افترضان ان فيه احد المشايخ دعوته منفره بالنسبة لك او لغيرك

فلو هو بيحذرنا من بعض الثوابت في الاسلام .. هل عشان طريقته مش عجابه سيادتك .. تقوم تقوم عاوز تحول هذه الثوابت الى نقاش وهات وخد بقدرة قادر كده يعني

يعني مثلا لو الراجل ده قال لك : الحجاب فرض على كل مسلمة..فعشان طريقته مستفزة بالنسبة .. يبقى معنى كده ان الحجاب ليس بفرض

وعشان احنا متغاظين من طريقته نبقى ندعو للتبرج بقى وتتقلب الايه

اتقول الله وخليكوا موضوعيين
وبلاش التمسك بالشكليات والقشور وفروا الى جوهر الدين وصحيحه

تقبل مروري

Cypher said...

بصراحة يا اشروف انت شادد حيلك عليهم لكن انا فاهم ليه لأنك حاولت قبل كدة كتير من ايام بوست الفلانتين والايميل اللي جالك بس في حقيقة علمية لازم تفهمها محدش بيقول انا غلطان او انت صح لأ لازم المقاوحة...دلوقتي معظم القنوات الدينية (اللي انا مبتفرجش عليها اصلا ) بس بتعدي كدة على الريموت بتتكلم عن الحجاب والنقاب والختان لو ركزت شوية هتلاقي ان مشاكل الدنيا كلها في الحريم او امراض ذكورة يعني ... اعتقد ان لو كانوا هما سبب كل كوارثنا ومصايبنا مكنش ربنا خلقهم من اصلة وخلاص ... انما متلاقيش مرة حد فيهم بيتكلم عن توريث الحكم او اقسام الشرطة وحقوق الانسان والديمقراطية لأن الكلام ده مبيأكلش عيش مع ان دي مشاكلنا الاساسية .... كله معترف وبقول ان المشايخ دول مش فوق مستوى الانتقاد ولكنهم في الوقت ذاتة لا يسمحون لك بانتقادهم فعلا نحن نصنع اصنامنا بايدينا .... وبعدين كله بيقول ان احنا بشر وبنخطئ وده شئ طبيعي جدا وفي حديث انا مش فاكر نصة قالة الشيخ خالد الجندي فيما معناة ان احنا لو مبنرتكبش ذنوب عشان ربنا يغفرلنا لأتى الله بقوم غيرنا ليرتكبوا ذنوب ويغفر لهم انا هنا مش بدافع عن ارتكاب الذنب لكن كمان محبش حد يفرض عليا نفسة ويحاول يمنعني من ارتكاب الذنب على اساس انه ضامن مكانة في الجنة وبيحاول يخدني معاه .. ده غير شعار قناة تأخذك للجنة المستفذ جدا يعني اللي مبيتفرجش هيتشوي في جهنم الواحد بيفكر يدعي للناس اللي ماتت قبل القناة دول ان ربنا يغفرلهم ويدخلهم الجنة معانا برضة ... في مقالتين احب اسيب لنكاتهم واحدة للدكتور علاء الاسواني وواحدة للدكتور احمد خالد توفيق

http://www.dctcrs.org/s5078.htm

http://ahmed-khaled-tawfik.blogspot.com/2009/09/blog-post.html

وبالنسبة للناس اللي كانت بتتكلم عن موضوع التخصص وان كل واحد يخلية في تخصصه ممكن حد يجاوبني على السطرين دول اللي لقيتهم على النت

الشيخ محمد حسان خريج الإعلام، والشيخ محمد حسين يعقوب خريج مدرسة المعلمين، والشيخ أبو إسحاق الحويني خريج الألسن، والشيخ محمود المصري خريج الخدمة الاجتماعية

اللي اعرفة ان الدين بيدرس في الازهر بس ولا اتخصخص هو راخر
بس بينها سبوبة حلوة يا اشروف لو الواحد اتخرج وملاقاش شغل يتوكل ويبقى داعية وخلاص ولا انت رأيك ايه

Cypher said...

وبمناسبة الرأي يا أشروف النهاردة كان فية المقالة دي على مصراوي
http://www.masrawy.com/News/Arts/Reuters/2009/September/15/977242Update.aspx

المقالة بتقول ان الشيخ محمد عبدة بيقول ان النقاب مش من الاسلام اقرى التعليقات وعيش كان محمد عبدة ده صرماتي لا مؤاخذه مش متخصص وعالم وقبل كدة وزير الاوقاف برضة تعرض لنفس الهجوم لما اتكلم عن النقاب واتهموه بانه عميل للحكومة وخاين. طبعا الراجل لو اشترى دماغة وقال انه فرض كانوا عملوة بطل ومناضل ...شعارهم :من حقك تتكلم بس أوعى تختلف

أشرف حمدي said...

cypher
انت مختار مقالين مهمين لاتنين من أساتذتي
صديقي دكتور احمد خالد توفيق
والدكتور علاء الأسطواني الذي تشرفت بحضور ندواته على مقهى بوسط البلد سابقا
اتنين معتدلين تماما وعقلهم يوزن قارة بحالها مش بلد ، وماحدش فيهم طلع قال انا ملحد أو أنا علماني أو أنا شيخ
اتنين عاديين في الحياة كأشخاص سوية متزنة جدا ، اتنين بسطاء ــ من الناحية الشخصية ــ زيي وزيك ونفسي أشوف كل المصريين زيهم بجد
تحياتي البالغة

D00D said...

بوست رائع يا دكتور أشرف وردود حضرتك وردود الجميع رائعة حتى الناس اللى اختلفت مع حضرتك بتتكلم بلباقه وأسلوب محترم جداً يجب تحيتها عليه.

انا بس عندى استفسار صغير، ليه حضرتك كاتب "ديوس" و "دايوس"؟؟

انا اعرف كويس انها "ديّوث" ومطلّعها من المعجم الوجيز ص240 ومكتوب فيه "الديوث من الرجال: من لا يغار على أهل بيته"

أرجو مراجعة الموضوع ده وتصويبه لو كان خطأ غير مقصود.

شكراً

أشرف حمدي said...

D00D
فعلا عندك حق ، للأسف انا واخدها من بق محمد حسين يعقوب اللي نساني اللغة العربية الفصحى
فعلا هي بالثاء طبعا
وسأقوم بتصحيحها في البوست
أشكرك بشدة

Ahmed said...

السلام عليكم جميعا
انا احمد عفت اللى سيبت اول كومينت للدكتور أشرف
وده لانى كنت عايش معاه الموضوع عالفيس بوك من اوله

انا كنت قاصد ماردش على كلامك الموجه ليا انى ارد عليه لحد دلوقتى لانى بصراحة كنت مستنى اشوف الناس حترد عليك وتقول ايه
عالاقل عشان اعرف نوعية العقول اللى بتتلقى كلام الواحد حتكون شكلها ايه؟؟
ياترى كلها نفس عقليتك (من غير زعل) ؟
ياترى فيهم ناس فاهمه ؟

على العموم الحمد لله اللى توقعته لقيته..
لسه فى ناس تحفظ للعلماء قدرهم
ووالله الناس دى ماسابوليش حاجة اقولها غير انى اقول لهم جزاكم الله خيرا

الكلام واضح وصريح ومحدد
بس لسه يا أشرف - وماتزعلش منى - فى عقليات زيك وزى غيرك مابتقدرش تفهم الكلام غير من زاويتهم بس
(والدليل اصرارك على موضوع ارضاع الكبير ده)

انا بس عاوز اخصصهم عشان تبقى انت عارف المخزى بتاعى من كلامهم:
الشعب لابد له من حكومه تشكمه
مسدس صغير
لورنس العرب

اقرأ تعليقاتهم معلش كلها على بعضها وشوف انت استوعبت حاجة وللا لأ

واحب بردو اوضحلك حاجة - توضيح على توضيح لورنس العرب - انا اه مربى دقنى تدينا وامتثالا لسنة النبى

بس انا لازلت بشر
وبمَوت النبى صلى الله عليه وسلم ماتت العصمة

انا اه باحاول اكون قدوة (زى مانت بتقول) بدينى وعلمى وسلوكى ومعاملاتى زى مادينى بيعلمنى
(i'm ana Art director by the way, يعنى مش متخلف ولا جاهل ولا ارهابى بالمرّه)
بس ده مايمنعش انى لازلت بشر
ولو شفت اخويا بيعمل حاجة غلط حاقوله لأ يا حبيبى كده غلط
مش اشوفه واسكت

طب خد عندك دى
انا واحد من الناس عندى نفس الخمس اطراف اللى عندك
ومش عارف اتخلص من الطرف الخامس ( خرطوم الشيشة)
بس لو شفت اخويا الصغير او صاحبى بيبتدى يدخل فى نفس الطريق
لازم اوقفه
حتقولى روح لم نفسك الاول قبل ماتخنق على الناس
حاقولك معلش
انا يهمنى مصلحتهم بردو
يعنى ماينفعش اشوفهم بيضروا نفسهم واسكت حتى لو انا باعمل نفس الغلط
بس المهم ابقى عارف ايه الصح وايه الغلط
والمرحلة التانية انى ايتدى اعمل الصح وابعد عن الغلط

وهوه ده الدين (دين للتطبيق فى الدنيا, مش دين آخره وبس)

ولو غلطت مايبقاش ردك عليا ان ده تعليم الشيوخ اللى باسمعلهم.
الغلط بيكون نتيجة لقصور شخصى فى الواحد
وهمه لو حيشيلو الغلط ده عنى..
كنت اقولك فى الحالة دى تحملهم همه ذنب الغلط ده

بس ربنا بيقول "ولا تزر وازرة وزر اخرى"

وبردو مش حاتكلم فى تفاصيل المقال لان الردود اللى وصلتك كافية ووافية
واللى لسه مش عارف الصح من الغلط
فاعتقد انه ينطبق عليه قول الله
"فإنها لا تعمى الأبصار ولكن تعمى القلوب التي في الصدور"

ربنا يهدينا جميعا

D00D said...

عزيزى د. أشرف

انا قلت اكتب رأيى المره دى، انا فى المره اللى فاتت اكتفيت بالتعليق على الخطأ اللى كان مكتوب ومكتبتش رأيى فى الموضوع نفسه لأنى فى الأول قلت بلاش أعلق أحسن لأنى مسيحى والمفروض إن الكلام لا يخصنى فى شىء، لكن فى الحقيقة بعد ما فكرت قلت لأ الموضوع يخصنى وبشدة، خصوصاً إنى افتكرت موقف كان حصل لى من أكثر من سنة مع أحد شرائط الشيخ محمد حسان وقلت أحكيه، بس بعد إذنك هقول مقدمة مملة لابد منها فى الأول عشان حضرتك تعرف انا مهتم ليه.

انا شاب جامعى مسيحى ارثوذكسى، وعندى "هوس" إسمه فهم الآخر :D :D
، دايماً عايز أفهم اللى قدامى عمل كده ليه وايه اسبابه ودوافعه إلخ...

وبالتالى جزء طبيعى من اهتمامى بفهم اللى قدامى انى اقرأ فى الأديان الأخرى ومن مصادرها الأصلية، حتى البهائيين أول ما سمعت عنهم فى التلفزيون ساعة المشاكل الأخيرة عملت سيرش على جوجل ووصلت لصفحتهم الخاصة بهم وقعدت اقرا هما ظهروا ازاى وامتى وبيؤمنوا بإيه وكده، لا لشىء سوى إنى عايز أفهم الآخر اللى مختلف عنى ده بيفكر إزاى.

وبالتالى كان من البديهى والأولى إنى أحاول فهم إخواتى من المسلمين، لأنى بقضى معاهم معظم وقتى فى الكلية، ولى صديق مسلم قريب منى جداً هو أول واحد بيقف جنبى فى أى مشكلة، وزميلة مسلمة ومحجبة بعتبرها فعلاً و بدون أدنى مبالغة أختى التانية من أب وأم مختلفين.

أظن من الطبيعى إنى لما صديقى المسلم ده –اللى بقضى معاه وقت كبير فى الكلية- ألاقيه مثلاً لما بيصلّى بيطوّل فى صلوات وصلوات تانيه بتخلص بسرعه...إنى أحاول أفهم ايه السبب، وبالتالى طبيعى جداً إنك تلاقينى رحت عامل سيرش على النت وقرأت عن طريقة الصلاة فى الصلوات الخمسة وعدد الركعات وكده، مش صديقى ده برضه ولازم أبقى فاهمه وفاهم هو بيعمل إيه وليه؟

وطبعاً زى ما قلت انا متعود أجيب المعلومات من مصدرها الأصلى، عشان كده لما بحاول أعرف حاجة فى الإسلام بدخل على موقع إسلامى موثوق منه، مش على موقع متطرف من اللى بيهاجموا الإسلام.

عشان كده تلاقينى دايماً عايز أفهم اللى قدامى، بس الموضوع لا يقف طبعاً عند إخواتى الأعزاء اللى حكيت لحضرتك عنهم دول...ليه؟

لأنى كان لازم برضه أفهم ليه أحد زملائى -اللى كان بيجرى وياخدنى بالحضن أول ما يشوفنى من بعيد- بعد ما أطلق لحيته معاملته لى اتغيرت تماماً وبقى بيسلم عليا وعلى وجهه إمتعاض وقرف شديدين؟؟

و ليه إحدى زميلاتى –المحجبات أيضاً- واللى كانت من الشخصيات المحترمه جداً والمحبوبة جداً قررت فجأه الإتشاح بالسواد ومقاطعة التعامل مع الصبيان تماماً وتقضية باقى سنوات الكلية مع زميلاتها من الفتيات فقط؟؟

و ليه زميلة أخرى برضه كنا بنتبادل اكتشافاتنا فى الموسيقى والأغانى فى مره من حوالى شهرين كنت بحاول أبعت لها ملف لقيتها فجأه بتقول لى "متبعتليش اغانى تانى عشان انا بطلت اسمع اغانى" ولما سألت بكل بساطة "ليه يعنى اشمعنى" فوجئت إنها اتخذت رد فعل دفاعى بدون مناسبة -من النوع اللى الشخص بيتخذه لما يكون مش واثق من اللى بيعمله- وقالتلى " ده دينى اللى بيقول كده وانا مش محتاجه أبرر لك اللى بعمله"!!

كان لازم أفهم كل ده طبعاً، عشان كده برضه زى ما كنت بقرأ فى مواقع معتدله بتتكلم عن الصلاة والقرآن والأحاديث، كان لازم أتفرج على فيديوهات للحوينى وحسّان ويعقوب والمصرى.

هتسألنى عرفتهم إزاى دول؟؟ عرفتهم –على سبيل المثال لا الحصر- لما فوجئت بوابل من فيديوهات الشيوخ دول ينطلق من بروفايل زميلتى بتاعة الأغانى دى مثلاً على فيسبووك...ساعتها بس فهمت...ساعتها بس ارتحت وهدأت لأنى عرفت السبب فى اللى حصل لها...وانا حالياً متوقع إنها هتمسحنى وتمسح كل زملائها من الصبيان من البروفايل فى أقرب فرصة، لأن أكيد المرحلة الجاية هتقتنع فيها إن وجودى وغيرى من الرجال على البروفايل حرام لأنها تعتبر خلوة غير شرعية أو شىء من هذا القبيل، ناهيك طبعاً عن إنى نصرانى كافر مؤمن بثلاثة آلهه وأتغذى على لحم الخنزير ليل نهار، و "ببلّع" لحم الخنزير اللى باكله بأنواع الخمور المختلفة...إلى آخره من الهراء الذى يروجون له.

انا آسف انى طولت على حضرتك فى المقدمة بس أظن انها كانت لابد منها، نيجى بقى لموضوعى مع شرائط الشيخ محمد حسّان.

القصة انى كنت راجع من سفر وأخدت تاكسى من الموقف للبيت، المسافة كانت صغيرة مش كبيرة، لكن وانا فى التاكسى اخترق أذنى الشريط اللى كان السواق مشغله، كان الشيخ محمد حسّان –مكنتش لسه عرفت إسمه- وكان بيتكلم عن فيلم آلام المسيح...

D00D said...

الجزء الصغير اللى لحقت أسمعه من المحاضرة ساعتها مكانش اللى فيه الإهانات، كان فى الجزء ده بيتكلم فيه عن الإسلام بيقول ايه فى موضوع صلب المسيح، إلى هنا انا معنديش أى اعتراض لأن الإختلاف موجود طبعاً فى النقطة دى وكل واحد حر تماماً فى اللى هو مؤمن بيه، وانا مش بيفرق معايا الاختلاف ده فى التعامل نهائى مع أى شخص زى ما وضحت سابقاً.

لكن لما روحت البيت كنت برضة عايز أعرف مين ده وايه اللى خلاه يتكلم عن النقطة دى ويا ترى باقى المحاضرة قال فيها ايه؟؟

هنا كان اكتشافى للشيخ محمد حسّان بعد بحث صغير على جوجل، اللى فوجئت إنه عامل 5 محاضرات كاملة بيتكلم فيها عن المسيحية وبيهاجمها هجوم شرس، إلى درجة إنى فاكر إنه قال فى أحد المحاضرات ما معناه إن الإنجيل ملىء بالفقرات الجنسية لدرجة انها تسبب القىء، وإنه يحتوى على كلام أخطر من أى كتاب جنسى آخر، ودى لينكات ال5 محاضرات بس معرفش هما دول نفس النسخ اللى كنت سمعتهم وقتها ولا لأ ومعنديش وقت ولا أعصاب الصراحة انى اقعد أسمعهم تانى.

تحريف ا لإنجيل
http://www.islamway.com/?iw_s=Lesson&iw_a=view&lesson_id=33362

قواعد الدين عند النصارى
http://www.islamway.com/?iw_s=Lesson&iw_a=view&lesson_id=11730

قصة الصليب
http://www.islamway.com/?iw_s=Lesson&iw_a=view&lesson_id=4084

نحن أولى بعيسى منهم
http://www.islamway.com/?iw_s=Lesson&iw_a=view&lesson_id=3962

كلام المسيح فى المهد
http://www.islamway.com/?iw_s=Lesson&iw_a=view&lesson_id=4504

ودى بتاعة الرد على فيلم آلام المسيح
http://www.islamway.com/?iw_s=Lesson&iw_a=view&lesson_id=29420

وده نص بلاغ للنائب العام قدمه أحد المحاميين ضد الشيخ حسّان يتهمه فيه بإزدراء الدين المسيحى والتحريض على الفتنه الطائفية
http://top-egypt.maktoobblog.com/383434/%D8%A8%D9%84%D8%A7%D8%BA-%D9%84%D9%84%D9%86%D8%A7%D8%A6%D8%A8-%D8%A7%D9%84%D8%B9%D8%A7%D9%85-%D8%B6%D8%AF-%D9%85%D8%AD%D9%85%D8%AF-%D8%AD%D8%B3%D8%A7%D9%86/

خبر كان نشر فى جريدة الفجر عن الموضوع ده
http://coptreal.com/Admin/UploadedImages/fag31011.JPG

الموضوع ده بيفكرنى بالنقطة اللى الأخت " الشعب لابد له من حكومه تشكمه " قالتها لما قالت لك هما عمرهم ما قالوا اقتلوا ولا فجروا نفسكم، ماهو طبعاً مش هيقول ده بشكل مباشر، بس متوقعه ايه من شخص بسيط غير متعلّم أقنعه شيخه اللى هو واثق فيه إن كتاب المسيحيين اللى مؤمنين به هو كتاب جنسى، وإنهم كفرة ومؤمنين بثلاث آلهه، إلى آخره من الأكاذيب المماثلة.

طب لو فرضنا جدلاً إنه فعلاً ظهرت ديانه جديدة فى مصر، و كتابها اللى أتباعها مؤمنين به هو عبارة عن كتاب جنسى فاضح، وإن أتباع الديانة الجديدة دى مؤمنين بثلاث آلهه، بذمتك إنتى هتتعاملى معاهم ازاى لو قابلتى حد منهم؟؟ وجايه تقولى عمرهم ما نادوا بمهاجمة حد؟

انا معنديش أى ضغينة ضد الناس دول وربنا يهديهم ويسامحهم، لكن يفرّقوا بينى وبين أصدقائى المسلمين اللى بحبهم جداً، وينشروا الحقد والكراهية بيننا؟؟ ويهاجموا دينى بالأكاذيب والأباطيل وبدون سبب؟؟ لأ طبعاً انا أرفض كل ذلك وبشدة.

انا آسف جداً لضخامة الرد، لكن كله كان كلام لازم أقوله...

شكراً

أشرف حمدي said...

أحمد عفت
كلامك جميل
ها ؟ ما قلتليش يا مان ، أرضع ولا ما أرضعش ؟؟؟
بجد مش بهزر
انا عاوز جنس مخلوق بني آدم واحد يجاوب على سؤالي بشكل واضح وصريح
أرضع ولا ما أرضعش ؟؟؟
:)

أشرف حمدي said...

D00D
ما تتصورش قد ايه انا سعيد بتعليقك
وسعيد أكتر بعقليتك المتفتحة

أين باقي القصة ؟
يبدو أنها كانت طويلة جدا وتم قصها تلقائيا من خدمة بلوجر
في انتظار باقي القصة ولا تنسى ان تقسمها على مجموعة تعليقات متوسطة الطول
خالص حبي واحترامي

Cypher said...

D00D
والله انت جبتها من الاخر فعلا الناس دي مبتعملش حاجة غير انها بتفرق بين الناس وتكرههم في بعض وخلاص باسم الدين وفعلا ربنا يهديهم واذا كان الكلام ده بيحصل في دولة مدنية المفروض انها بتكفل حرية العقيدة امال الاخوان لو مسكوها هيعملوا فينا ايه ربنا يستر.


قصة كدة عن استغلال الدين برضة جوز بنت عمتي مدرس عربي ليه زميلة مدرس فرنساوي فجأة ساب المدرسة واتجة للدجل وعلاج الناس بالقرأن لما جوز بنت عمتي سأله ليه عمل كدة وهو المفروض راجل مثقف قاله انت لو تعرف الناس اللي بتجيلي قد ايه ولا بكسب كام هتسيب شغلك وتيجي تشتغل معايا ... الدين اتحول لتجارة وبيزنس .. شئ مقزز بجد .. وبالنسبة لموضوع الرضاعة يا ريت نعرف هنعمل ايه عشان راجعين الجامعة ولو كدة نجهز كشف بالاسم وعدد الرضعات عشان النظام

D00D said...

ما هى دى القصة يا دكتور أشرف مش مقطوعة ولا حاجة...القصة ان سواق التاكسى كان مشغل الشريط وكان متكيّف منه جداااااا وكان بيهزّ رأسه من آن لآخر تارة بالموافقة وتارة بالتعجب من هؤلاء النصارى الأوغاد، وهو ده اللى رعبنى من كم الناس اللى بتسمع للناس دى
!!

آه افتكرت موقف كمان...انا قعدت سنتين بسافر باتوبيس غرب الدلتا بسبب ظروف الكلية فطبعاً تكرر انى كنت بركب مع نفس السواق اكتر من مرة.

بدون مبالغة ولا افتراء...انا سمعت الشريط بتاع "كلمات تخالف العقيدة" -اللى عرفت بعد كده انه بتاع شيخ إسمه مسعد أنور- تقريباً أكثر من 5 مرات فى شهر واحد مع نفس السواق
!!!!

الشريط مفيهوش حاجة تخصنى او تهيننى انا بالذات، وبصراحة كمان كان فيه كام نقطه عنده حق فيها، بس على آخر الشريط كرهنى فى نصف الكلام اللى المصريين بيستخدموه وجزء من تراثهم، وكرّهنى فى حياتى كلها
!!!!!

والدليل على تأثير واحد زى ده موقف آخر مع زميلتى التانية اللى بطلت تسمع أغانى دى، حصل عندها حالة وفاة فى أحد أقاربها، إتصلت بها وقلت أعزيها، وقلت لها الكلمة الشهيرة "البقية فى حياتك" اللى مصر كلها بتعزّى بيها من وانا عيّل صغيّر، مقلتش حاجة كفر يعنى، لقيتها بتقولى بأسلوب استفزنى جداً "إسمها البقاء لله"، طبعاً فى كل احراج قلتلها "طبعاً البقاء لله وربنا يعزيكى"، ولما لاحظت على صوتى انى اتضايقت حست بالذنب وقالت لى فى آخر المكالمة "أصلى مش عارفه الرد بتاعها ايه" قلت لها "ولا يهمك" ورحت قافل المكالمة وانا فى قمة الإحراج والغيظ فى نفس الوقت.

طب يا ستى ولنفرض يعنى إنها فعلاً كلمة غلط، بالراحة يعنى، ده انا متصل بعمل الواجب وزعلان على زعلك تقومى تتعاملى معايا بالشكل السىء ده؟ هو ده اللى اتعلمتيه من الناس اللى بتسمعيهم؟

انا تعبت من كتر الكلام، لأن الحل إن الناس تتعلم تقرأ بنفسها وتبقى مثقفه عشان ميتضحكش عليها، وده مستحيل فى الظروف الحالية مع الناس البسيطة دى، ومش فى ايدى للأسف، طب الناس اللى زيى وزى زملائى فى الجامعة اهو ممكن بالمحبة وحسن المعاملة والحوار...يعنى...احتمااااال...تجيب معاهم نتايج، لكن الناس الساذجة البسيطة طيب؟؟

لكن انا بحاول وهفضل أحاول أعمل كل ما فى وسعى إنى لما يتفتح قدامى باب للمناقشة على فيسبوك أو منتدى محترم أو حتى بينى وبين أحد الزملاء إنى أؤكد عليهم موضوع إن الشخص لازم يقرا ينقد كل ما يسمعه ويراه وإنه يتعلم يميز الكويس من الردىء، وأعتقد إن ده لو استمر بين الناس كلها المشكلة هتتحل، فاكر فيلم فوزية البرجوازية؟؟ مش عارف ليه افتكرته على سيرة الناس البسيطة اللى بيتضحك عليها، يمكن محتاجين نعمل ندوات توعية فى المناطق الشعبية للناس دى بقى :D :D :D :D :D :D :D :D :D

شكراً

Ahmed said...

ماترضعش يا أشرف
عارف ليه

معلش دوس على نفسك واصبر واتفرج على الـ 35 دقيقة دول واصبر للاخر بس وافهم الكلام بشويش
ولو مافهمتش حاجة رجعها واعلمل سيرش لحد ماتفهمها كويس وانت تعرف انك المفروض ماترضعش ليه

وركز شوية فى الجزء الثالث والرابع
همه لوحدهم كفيلين
بس الافضل تشوفهم كلهم عشان تفهم الموضوع من اوله لاخره

http://www.youtube.com/watch?v=wSejqxTZ_ds

http://www.youtube.com/watch?v=6TgDJLEn66o&feature=related

http://www.youtube.com/watch?v=xDq5nrN1QLQ&feature=related

http://www.youtube.com/watch?v=t7T9k6F6Qo8&feature=related

ومعلش عشان الفيديوهات للشيخ أبو اسحاق الحوينى
بس سامحنى مالقيتش غيره فى علمه عشان يتناول جوانب الموضوع بالفصاحة والوضوح ده
انا باعتذر هزار طبعا (لحسن عارفك حتقول ان مستمعى الشيخ بيتنكروا منه)
:D
يرجى ملاحظة استخدام الأدلة فى جميع المواضع


ملحوظة: الشيخ ابو اسحاق بيرد ويوضح موضوع ارضاع الكبير مش هوه ولا من على شاكلته اللذين اثاروه


ربنا يهدينا جميعا
ارجو نشر التعليق عشان كلنا نعلم ونتعلم

أشرف حمدي said...

يعني يا راجل ماتلاقيش غير فيديوهات للحويني وتبعتهالي ترد بيها عليا ؟؟؟
هههههههههه
ماهو ده اللامنطقية اللي بتكلم عنها
واحد رافض الحويني ومحمد حسان ومحمد حسين يعقوب ، فلما ترد عليا تجيب لي حد معتدل مثلا ، إنما ترد عليا بكلامهم اللي أنا رافضه فده مش منطق

حاضر حشوف الفيديوهات ، من عنيا
بس انت كده بتقوللي ما ترضعش صح ؟
يعني كلام الشيخ الجليل المفتي اللي قال رضاعة الكبير غلط ومش بس ده ، ده شيوخ تانية كتير غلط
يعني انت بتقوللي إرفض كلام واحد دارس فقه وشريعة وسنة

رغم إنك وغيرك بيقولولي لا تجادل ولحوم العلماء مسمومة والكلام اللي يقوله المتخصصصصصصصص لازم تسمعه وماتعترضش إلا لو كان لك مثل علمه

انت دلوقتي باعت لي شيخ تاني بيقوللي ماترضعش
وانا عندي شيخ بيقوللي إرضع
صح ؟

يبقى أختار بقى بمزاجي ، ماهو يا أرضعش يا ما أرضعش مالهاش إحتمال تالت

وانا قررت أرضع الصراحة :)
ألغي عقلي بقى وأرضع

كلامك يا أحمد متضارب
انا بتكلم في نقطة محددة جدا دلوقتي
هل الشيوخ قابلين للنقض ؟ هل مطلوب مني أن أسمع كلامهم ولا أعترض ؟ ولا هما قابلين لتحكيم عدة أمور منها العقل ومنها البحث وراء كلام كل شيخ ومنها قراءة إخترفات أخرى لشيوخ زي ما انت باعتلي

دي النقطة
وعلى فكرة
اللي انت بعتهولي ده معناه إنك بتحكم عقلك برضه
لغنك ماسمعتش لشيخ ورحت تسمع من شيخ تاني
صح ؟؟؟
يبقى ليه بتحاربوا العقل ؟

أشرف حمدي said...

DooD
الله ينور عليك يا شيخ :)))
لا فض فوك كما يقولون

طيب حقولك حاجة قالها عمرو خالد ، كان بيتكلم عن حاجة أغلب المسلمين بيعمولها بعد الصلاة في الجامع
المصلي بيمد ايده للي جنبه ويسلم عليه ويقول له حرما
فالتاني يرد وقول له جمعا
قالولك بدعة
وواحد قال لعمرو خالد أنا لما حد بيمد ايده مابسلمش عشان ده مش في الإسلام
فعمرو خالد قال له : يعني هو قلة الذوق من الاسلام ؟؟؟

ده تعليقي على موقف زميلتك مع احترامي ليها

انا متفق معاك مليووووووووون في المية في موضوع القراءة
ده أساس كل اللي بقوله فعلا
ماتقرى يا سيدي ، ماتشوف ، اسمع ، فكر ، قارن ، استفتي قلبك كمان
ماتقفلش على دماغك بقفل حديد وتقول حرام حرام حرام
انا مرة ظبطوني بقرا في إنجيل واحدة زميلتي في الشغل كانوا حيموتوني
يا جدعان هو فيه ايه ؟
مانا عرضت عليها أديها مصحف تقرا فيه عشان هي مثقفة ووافقت ،
حييجي واحد يقوللي لا يمسه إلا المطهرون
أرد عليه أقوله ايه ساعتها ؟
خلاص بلاش تقرا
وبلاش انا أقرا
ولما تقولي صباح الخير حستغفر ربنا حاضر
حلو كده ؟

هو ده اللي عاوزه مشايخ الفتنة الطائفية دول

على فكرة ، أنا كنت من محبي المناظرات الدينية وخاصة بتاعة الشيخ احمد ديدات
المناظرات دي محتاجة بجد أجواء متحضرة جدا عشان تنجح
لو حصلت مناظرات من دي في مصر حتتميز بحاجتين

الاولى : أنه بدلا من التفكر والاستفادة وتقريب وجهات النظر ستتحول إلى مباراة بين الأهلى والزمالك وربما بعض من مناظرات ديدات قد تحوي اجزاء تتميز بهذا الطابع

الثاني : حتقلب بعاركة في خمّارة وكرسي في الكلوب ودم للركب

تحياتي

المعلم برعى صاحب القهوة said...

ارضع ياباشا ارضع حد لاقى فى الزمن ده لبن مش مغشوش :((
اولا زى ماقلت قبل كده لا تسلم عقلك لاى شيخ مهما كان مهما كان وكل الشيوخ المعتدل منهم والمتشدد لابد ان توزن كلامهم بعقلك قبل تطبيقه لانك انت اللى هيشيل الليلة فى الاخرة مش اسم النبى حارسهم شيوخ ووعاظ الفضائيات
ثانيا وايه العيب فانك تقرا الانجيل او التوراة ده فيهم اسفار تقطر حكمة بااالغة وتعبيرات ادبية بليغة جدا ثم اننا دائما اولى بمن سبقنا اه هو صحيح قد يكون فيه بعض المأخذ على الكتابين دول الا انها ماخذ تؤخذ على البشر اللى نقلوه ، لانهم لازالوا باجماع كل المسلمين من كتب الله المنزلة
وبعدين احنا مختلفين ليييه على السيد الحوينى ولا اسحق ولا حسان دول مهما كان مجرد وعاظ فى الفضائيات ناس عادية زى وزيك بس قرولهم كام كتاب وطلعوا يحكوا اللى فيهم على الناس يعنى مش منتجى علم ولا احد يجرؤ على ان يقارن بينهم وبين البخارى او بن القيم او الغزالى او حتى محمد عبده !!
وبينى وبينك اللى عايز يسمع فتوى ودروس لحد عليه وعلى جمال البنا راجل زى العسل اباح القبلات بين الصبيان والبنات احل المنكرات وحرم الطيبات ابوه السقا مات وفتوى القبلات دى لذيذة جدا ونفسى تطبق ونعيش

أشرف حمدي said...

بالمناسبة يا
D00D
عارف ايه هي أول كلمة نزلت في القرآن ؟
كانت إقرأ
!!!
ونحن الآن أمة لا تقرأ
تصرخ فقط

بدراوى said...

دكتور اشرف
شوف المقال ده لدكتور عمرو الشوبكى بكره فى المصرى اليوم

http://www.almasryonline.com/portal/page/portal/MasryPortal/ARTICLE_AR?itId=UG119744&pId=UG14&channelId=OP&pType=1
------
ممكن لينك حوارك مع الرسام الدنماركى اللى انت اشرت ليه فى التحديث
؟!

Moe S said...

هو مين الشخص اللي نقدر نطلق عليه لفظ عالم؟
و مين الشخص اللي يقدر يوصل للناس الدين بأمانة؟

رغم وجود الاف المؤمنين و عشرات الصحابة وقت لما ابو بكر الصديق -رضي الله عنه- امر بجمع القرأن، إلا انه اختار مجموعة موثوق فيها من الصحابة الموثوق في علمهم و صحة حفظهم للقرأن للمهمة دي

و حتى الاحاديث النبوية الشريفة..ناس قليلين زي البخاري و مسلم هم اللي موثوق في صحة معظم الاحاديث اللي ورت عنهم..و لما بيكون في حديث ضعيف او غير صحيح..بيتم التشكيك في انه نسب اليهم مش التشكيك في صحة كلامهم

مسيلمة الكذاب إدعي النبوة ايام الرسول -عليه الصلاة و السلام- و كان بيفتي في الدين و احل الخمر لاتباعه و كان بيغلف ادعاءاته بانه يقر و يعترف بنبوة سيدنا محمد عليه الصلاة و السلام

و ده معناه ان العلم له ناسه..و مش اى شخص عاصر الرسول -عليه أفضل الصلاة و السلام- يقدر يكون من العلماء اللي بينقلوا للناس الدين

معروف إن إختلاف العلماء رحمة..و الإختلاف بيكون في حاجات تقبل الإختلاف و النقاش و البحث و الإجتهاد من اجل الوصول لرأى صائب

لكن لما نوصل لمرحلة ان الإختلاف بقي في الجوهر و المضمون و اسلوب الخطاب الديني و نوعية المعلومات اللي بيتم توجيهها للمتلقيين
فدي اخطر حاجة تضر الامة

في شيخ احل التدخين في نهار رمضان..و شيخ احل إرضاع الكبير..و شيخ إخترع الزواج فريند..و شيخ حرم القبلات بين الازواج..و شيخ حرم رؤية الزوج لزوجته بدون ملابس

-يتبع-

Moe S said...

في شيوخ بيتعاملوا مع الدين علي اساس انه حصالة..إعمل كذا + إعمل دي + إلبس كده..هتاخد 1500 حسنة
و لو عملت كذا و كذا..هتخسر 7000 حسنة و هتتشوي في النار

و شيوخ بيتعاملوا مع الناس علي اساس انهم بيخاطبوا كفار قريش و انهم افضل منهم و كل اللي مش بيعمل زيهم اكيد من الكافرين..و بيحرصوا علي إستخدام لفظ الكافرين..في الجامع وسط المصلين
يعني شيخ بيقول لانسان مسلم في خطبة..انت كافر

انا شفت فيديو مصطفي حسني اللي بتتكلم عنه..و احترمت جدآ فكرته اللي مبنية علي اساس ديني سليم و بسيط..مش محتاج لفتوي شيخ ولا لتباحث علماء
الراجل اتكلم عن السخرية و ادب الحديث و ذكر ايه..و لم يفتي فتوي

مصطفي حسني من الدعاة العاقلين..بيرفض انه يصدر اى فتوي حتى لو كانت حاجة بسيطة هو يعلمها..و بيعلن ده و بيقول انه غير مؤهل للإفتاء و عمره ها هيفتي

الراجل بيتعامل مع الدين علي اساس انه علاقة حب بيننا و بين ربنا
اننا نبقي فاهمين..مش حافظين

و بالنسبة لشيوخ الرصيف اللي بتتكلم عنهم..فدول عمرهم ما هيختفوا من حياتنا
و إلا مسيلمة الكذاب مكنش ظهر ايام ظهور الإسلام

في حوالي 15 قناة دينية علي النايلسات..يا تري قد ايه منهم بيجيبوا شيوخ مؤهلين للفتوى؟

Ahmed said...

طب ماتقرأ انت يا أشرف
لما تسمع من واحد ماتجريش اول ماتسمع كلمتين وتقول
تعالوووووو الحقوووووو شوفوا الشيخ بيقول ايه
اااااادى ياعم الشيوخ
ومختلفين
طب انا اخد دينى من مييييييين
دول ارهابييييييييييين

لأ يا حبيبى اهدى شوية على نفسك كده واركز
ولما تسمع حاجة شوف الكلام اللى بيتقال ده جه منين .. اكيد من كتاب (لان مافيش شيخ محترم بيتكلم من غير دليل) هات يا سيدى الكتاب واقرا وافهم وفهمنا معاك
بس ماتجيش تقولى حرية الفكر والتعبير وانت اول واحد بتهاجمها
ماتجيش تقولى انفتح على الاخر وانت اكتر واحد مش عاوز تدوّر وتشوف الاخر ده كلامه معناه ايه

بص يا أشرف
انا عملت اللى عليا وزيادة حبتين معاك انت والناس المثقفة اللى شاركت فى موضوعك الحيادى جدا ده
اللهم بلغت اللهم فاشهد
اللى عاوز يعمل حاجة يعملها
واللى عاوز يمشى فى طريق مادام مقتنع ان هوه خلاص صح يمشى فيه

بس نصيحتى ليك كمسلم ومصرى والمفروض انك واجهة لما تنتمى له
"ياريت تفكر تانى بحيادية وتشوف انهى اسلم الطرق اللى تمشى فيها عشان تنجو فى الدنيا والاخرة" وعيش بأه بعد كده زى مانت عاوز

على فكرة مافيش اى حد فى الدنيا يقول انه مش من حقك انك تعترض على كلام شيخ معين او شخصه حتى
بس اللى مافيش عقل يقبله انك تجاهر باعتراضك ده وتبالغ فيه وبطريقة غير لائقة
لان اعتراضك ده الله اعلم ايه سببه ممكن يكون لاسباب شخصية او سوء فهم
وبالتالى حتكون مجاهرتك دى دعوة للاعتراض مش اعتراض شخصى
وده ممكن يبعد ناس كتيييييييييير اوى عن طريق الشيخ ده لاقتناعهم بكلامك
مش عن طريق الشيخ بس ولكا عن طريق الاتجاه اللى الشيخ ماشى فيه ككل (وده غالبا اللى بيحصل)
تخيل بأه يا حلو لو كلامك ده مش مبنى على أساس علمى او حقيقى
مين اللى حيلبس ذنب الناس كلها دى ساعتها؟؟؟؟

اخر حاجة ... اه يا سيدى انا بقوللك ماترضعش لانى سمعت وشفت وقرأت أدلة كل واحد اتكلم فى الموضوع ده تقريبا
واه انا مختلف مع المفتى وبعض علماء الازهر اللى وافقوا على الموضوع ده
ومواضيع تانية كمان (اصله عادى انك تعترض على شيخ او على فتوى واحدة او اتنين او حتى 10 او 100 من كلام الشيخ بس ده مايمنعش انه بردو شيخ جليل وعلمة عزير ومش انا ولا انت اللى ينفع ننتقص من قدره لان ده مش تخصصنا) المهم
اقرأ يا أشرف واسمع وشوف وحكم عقلك لان العقل هوه الحكم
بس لو كان الحكم ظالم اكيد بيظلم نفسه اولا غير ظلمه للى حواليه

المهم انى خلصت كده كل اوراقى معاك
ومش حاشترك تانى لان بصراحة الاتجاه العام للحوار مايشجعش ان الواحد يدخل فى حوار مفتوح
لانكم بصراحة واضح انكم قفلتو الباب على نفسكم وبس

السلام عليكم

أشرف حمدي said...

بدراوي

الحوار تجده متدرجا على ثلاثة بوستات

الأول
http://caricatooz.blogspot.com/2007/09/blog-post_25.html

الثاني
http://caricatooz.blogspot.com/2007/09/freedom-of-expression.html

الثالث
http://caricatooz.blogspot.com/2007/10/holocaust-and-freedom.html

أشرف حمدي said...

بدراوي
شكرا على الوصلة
المقال يلخص تماما ما أقصده
تحياتي

أشرف حمدي said...

Ahmed
أنا لا يهمني دخول الجنة أو النار ، الذي يهمني هو أن أعرف : ليه دخلت الجنة أو ليه دخلت النار
:)
المهم هو العدالة ، وأنا راضي بعدالة النار لو كنت سأدخلها

المهم الآن بغض النظر عن مصيري الأبدي الذي لا يهم أحدا سواي هو محاولة إنقاظ ما يمكن إنقاذه من هذه الدولة التي شارفت على الإنهيار علي يد مشايخ الفتّة

وبالمناسبة فكلامك متناقض أيضا
أرضع ولا ما أرضعش ؟
برضه بسأل تاني :)))

ماهو يا أحكم عقلي يا ألغيه
مالهاش وسط دي
يا عقلي يشتغل يا مايشتغلش

انت كلامك كإنك بتقول شغل عقلك نص ونص :)

أحمد مختار عاشور said...

يا لهوي يا أشرف

إنت لسة بتناقش؟؟؟؟

بتتناقش مع مين أصلا؟؟؟

وكمان لا تزال رصيناً مهذباً في النقاش

بجد الله يكون في عونك ..


.....
معلش بقى القافية حكمت

إحنا كنا أمة اِقرأ
فأصبحنا أمة اِرضع

:)

.....

يا راجل كفاية إن كل شيوخ السَلف مقتنعين بإن ابن الزنا لا يُنسب .. وإنه يجوز للفرد أن يتزوج ابنته من الزنا لأنها شرعاً ليست ابنته .. لأن القاعدة الفقهية تقول أن ماء الزنى لا يُعمَل به

يعني دول ناس أصلاً مسحوا عقولهم بأستيكة
استيكة صنعت في الصين الكافرة طبعاً على أيدي عبدة الأبقار


والمحموقين لهولاء الشيوخ يقولولك لازم تكون في علمهم أو أعلم منهم عشان تنتقدهم

علم ايه يا ابو علم

م انتوا لغيتوا العلم خالص

اللي يقول إن الأرض بتدور حوالين الشمس يبقى كفر

وبعد كدة جاي تكلمهم بالعقل؟؟؟


أطرف فتوى هتسمعها في حياتك؟؟؟

الشيخ بن عثيمين بيقول إن كلمة "رمضان كريم" حرام

http://www.nsaayat.com/showthread.php?t=20896


ده من كبار شيوخ السلف ...


اسأل عنه كل شيوخ السلفية اللي بيطلعوا على الناس والرحمة الخ

هيقولولك ده مُعلم عظيم


رغم ان بالنسبالي راجل جاهل وكل اللي اتعلم منه يبقى جاهل أكيد

فرق ايه ده عن الملحدين؟؟؟؟

..............
أنا الصراحة النقاش مع عبدة الأوثان تعبني جداً
......

..لذلك
..قررت إني
هرضع
!


ورمضان كريم

أشرف حمدي said...

ههههههههههه
شمرا يا عاشور على تعليقك
انا بصراحة حذفت آخر تعليقين لأحمد عشان خلاص بجد مش عاوز أرد تاني
بيقول الباشا إني علماني
أولا العلمانية مش تهمة ولا سبة ولا كفر
ثانيا أنا مش علماني للأسف لإن ده كمان يتوقف على مفهومك لكلمة علماني
لو شايف إن العلمانية هي فصل الدين عن الدولة أبقى علماني
لو تقصد العلمانية رفض الدين والإلحاد أبقى مش علماني
لما يروح يعّرف لي العلمانية الأول أبقى أقول

لأ وبيقول مش لازم تعترف بعلمانيتك عشان كفاية بوست واحد يفضحك ؟
هههههههههههههههههه
ياراجل حرام عليك جننتني هههههههههههههههههه
العلمانية بقت فضيحة دلوقتي والفتاوي اللي انا وعاشوري وغيري جايبينها مش فضيحة ؟
ولينك درس واحد بس لمحمد حسين يعقوب مش فضيحة
وتعليقاتك كلها هنا ع البوست ده مش فضيحة ؟

---------
أرجع لصديقي عاشور
انا كنت اعرف فعلا موضوع رمضان كريم ده ، بيقولك عشان كريم ده اسم من أسماء الله الحسني ههههههههه
انا بقول نعمل حملة لتدبيح كل اللي اسمهم كريم
أعرف واحد صاحبي اسمه كريم رمضان كمان ههههههههههههههههههه
ربنا يستر عليه

بدراوى said...

دكتور اشرف
اقرى المقال ده لحلمى النمنم فى المصرى اليوم
(على كل منا إذا التقى بيهودى أن يطعنه طعنات تودى بحياته، لأنهم أعداء الله وأعداء الإسلام، بدليل قتلهم الأطفال والشيوخ والنساء بفلسطين).. هذا النداء موجه من خطيب مسجد بكفر الشيخ، ألقاه فى خطبة الجمعة الماضية، وقد نشرته جريدة «الدستور»، عدد الأحد ١٣ من سبتمبر.

http://www.almasry-alyoum.com/article2.aspx?ArticleID=226152&IssueID=1531
---
و بالمرة شوف محمد الدسوقى مكمل الملف

هل يمكن أن نتجاهل شيوخا بحجم الدكتور يوسف القرضاوى وخالد الجندى وسالم عبدالجليل ودعاة بذكاء وعلم معز مسعود وعمرو خالد لصالح هؤلاء الذين ينقلون لنا فتاوى التشدد فقط؟

http://www.youm7.com/News.asp?NewsID=137365

Ahmed said...

أنا متفق اتفاق شبه كامل معاك يا أشرف ف اللي قلته لكن عايز أنبهك لحاجة
الردود اللي طلعتلك دي وطلعت للدسوقي رشدي كانت هتطلعلكم برده لو انتقدتوا عمرو دياب أو حتى تامر حسني أو يمكن شيرين
هيطلعلك برده عفاريت من تحت الأرض عاملين جروب اسمه عمرو دياب لوفرز أو ايًا كان يعني ويشتموك ويتهموك بالعمالة للطرف الأخر ويسألوك انت بتقبض كام
المسألة مش في الشيوخ قد ما هي ف ثقافة مجتمع هبطت عليه آلة اعلامية جبارة بتغير مفاهيمه وحياته كلها
الشيوخ دول نجوم زيهم زي أي نجوم جدد، الآلة الإعلامية الجبارة بتلمعهم والناس " المنمطين" بياخدوا كلامهم على انه ثقة لمجرد انهم طالعين في التليفزيون آلة الاستعباد الجبارة
وزي ما قولتلك احنا ف عصر النجوم وأنا نادرًا ما شفت موبايل عليه صورة الشيخ محمد حسان ومن بعدها متكونش صورة اليسا أو هيفا أو نانسي
وسلملي ع المترو:D
وتحياتي ع البوست الجامد

Ahmed said...

يا أشرف بأه معلش سامحنى بس كلمتين اخيرتين بينى وبينك وحارقيننى اوى ولازم اقولهملك

انت مابتفهمش وجاهل وعلمانى زى ماتفهمها بأه
وبتكابر وبتستهبل عالناس وبتشتغل نفسك وبتشتغلهم وفى رغبة جواك والله ماعراف ايه سببها ياترى الكراهية الشديدة او الجهل الشديد انك تحارب كل ماهو متدين

ربنا يهدينا جميعا
بس والله بجد لازم تخللى بالك من الطريق اللى انت ماشى فيه ده عشان الطريق ده (من غير احتمالات) بينك وبين اللى خلقك غلط تماما

اتق الله واسأله الهداية
اسف على الالفاظ بس مالقيتش حاجة معبرة عن رأيى فيك بوضوح ومن غير لف ولا دوران غير الالفاظ دى

والله كنت باحاول اجيبهالك باسلوب اخف شوية من خلال كل تعليقاتى
وطبعا انت مافهمتش كالعادة المعانى المقصودة كلها
معانى النصح بجانب ابداء الرأى
وطبعا كنت بتفضل انك تتريأ عليها

سلام يا مفكر
هههههههههههههه
مفكر اه
ماشاء الله


اه بالمناسبة "الكريم" هيه اللى حرام تطلق على حد غير الله
انما "كريم" مافيش جنس مخلوق خلقه ربنا حرّمها
واظن واضح الفرق بين الاتنين اوى

أشرف حمدي said...

Ahmed
شكرا بجد على التعليق ، بجد ميرسي قوي

إتفضلوا يا جماعة شوفوا أتباع شيوخ الإرهاب ، شتيمة وقلة أدب

حلوة قوي استخدامك لكلمة علماني كشتيمة
ههههههههههههههههههههههههههههههههههههه
وبتقول عليا أنا جاهل ؟
يعني ايه علماني طيب ؟

على فكرة
ماحددتش الكلمتين اللي كانوا حارقينك كانوا حارقينك فين ؟
عموما لما تحرقك تاني ابقى اشتم تاني وانا حنشر من عنيا الاتنين عشان تتفضح أكتر يا أخي الملتزم أيها المدافع عن شيوخ وعلماء الفتّة

كل ما تحرقك أشتم
ماتخليهاش تحرقك أبدا
ماتهونش عليا تحرقك

آمنة said...

الاستاذ الكبير أشرف حمدي. اشكرك على البوست الجميل. قريته من فترة وراويت أختي. انبسطت حقيقة من كتاباتك اتمنى ان تستمر ولا تحط بال للي يتجاوزوا في الرد عليك.

لا أعرف اسم الرجل الي يظهر في احد القنوات. لا أتابعه لكن في اعلان لبرنامجه يصرخ يقول::: أختااااه احذري! أختاااااااه انتبهي!! أختاااااااااااااااه الرجال ذئاب بشرية.
يقهرني يا أشرف يقهرني . أحس انه واحد من اللي في الصورتين في موضوعك. يمكن لأ، بس هو على شاكلتهم. الله يسامحهم ويهديهم.

شكرا لك مرة ثانية .

Anonymous said...

لو عايز اراسلك اراسلك إزاي يا أستاذ اشرف

shimaa said...

السلام عليكم يا جماعة
دكتور اشرف
اتفق معاك فى معظم ما كتبته
واحى فيك استخدام العقل
وللاسف ان معظم الناس اللى بترد
على تلك الفتاوى
تعتمد على العاطفة فى الرد ده اولا
وثانيا تعتمد على فكره او ثقافة الالهة التى لا تخطئ
وانا شخصيا ضد ده تماما
انا مش ضد الشيوخ الافاضل ولا ضد اى حد يقول رايه
وبخترم كل صاحب رايي حتى لو بختلف معاه
الحقيقة لست من مريديهم اطلاقا
لان مبدا التسفيه من المراة
مسيطر وسائد عند كتير منهم
ولا اراه من الدين فى شئ
سمعت مرة بودنى وقدرا لانى اصلا
لا ارتاح فى السماع للشيخ يعقوب
ان كل زوج لازم يعلق سوط اللى هو الكرباج فى بيته
لتخويف زوجته وعشان متغلطش
ولا اصور لك مدى الاحساس بالاهانة وحرقة الدم
وفيديو تانى للشيخ الحوينى
شايف ان لا يجوز فى بعض الفضائيات طلوع المراة منتقبة تدى دروس
لانها ليست مؤهلة لذلك ولانها مهما تعلمت فهى مقلدة
وحصل انى شيرته عالفيس بوك عندى
ولقيت هجوم ضارى عليا
اتهمنى احدهم بمحاربة اهل العلم
ورموز الامة
حاولت اتناقش ومن كان له نفس رايي
بالادب وبالمنطق وبالادلة من السيرة وقصص الصالحين
وقابلنا اساءتهم الينا بادب
لكن
نعتنا احدهم باننا رعاع جهلة نتبع كل ناعق
وبدل ما يرد علينا هاجم الاستاذ عمورة الضال المضل على حد قوله والجفرى ومنهم من اسف على معرفتى وقام بمسحى من قايمة الاصدقاء
ومنهم من دافع عن الشيخ واقر انه لم يسمع له سابقا
لمجرد انه ما دام عنده علم يبقى اكيد حد كويس وميصحش ننقده
حاولنا نوصل ان مفيش حد معصوم من الخطا
وان الفاروق عمر قال اخطا عمر واصابت امراة
الموضوع كان فيه ثلاث نقاط رئيسية
الاولى ان لا احد غير الانبياءمن البشر فوق النقد وان كان داعية
الثانية ان له الحق ان يفتى وينعت النساء بالجهل والزامهم بالبيوت
وان الرجل اللى يقبل ان زوجته تعلم الرجال وتختلى بيهم يبقى ديوث
بالرغم من ان السيدة عائشة روت عن الرسول الالاف الاحاديث وتتلمذ على يديها كبار العلماء
والسيدة خديجة كانت سيدة اعمال ناجحة
والامثلة كثيرة
النقطة التالتة والاخيرة
من له حق الفتوى
لابد ان يكون عالم درس العلم وفى نفس الوقت فقيه درس المنطق

ارفض شخصنة القضايا فى شيوخ محددين ومهاجمتهم
انا اعتراضى على فكر وليس اشخاص

كما ارفض اقتصار الدين على العلاقة بين الرجل والمراة والنمص والختان
والحجاب والنقاب واللحية
لا اسفه من تلك الامور لكن ضد ان الدين يبقى كده وبس
ونسيب البلد الخربانة من غير اصلاح
ونتبع الحاكم عشان ميصحش نقوله لا
ونحرم التعامل مع النصارى واصحاب الديانات الاخرى
مع ان القران اباحوا والرسول كان بيعمل ده
ولنا فيه اسوة حسنة

متاسفة عالاطالة لكن بجد انا الموضوع ده شاغلنى اوى اليومين دول والبوست جه عالجرح

ملحوظة صغيرة
فيه اخت فاضلة اسفة انى مش متذكرة اسمها
غالبا البلد دى عاوزة حكومة تلمها
قالت ان اللى قتل السادات هما الاخوان
بس الحقيقة المعلومة خاطئة
اللى قتل السادات هو عبود الزمر وهو من الجماعات الاسلامية اللى كانت بتنتهج العنف فى الوقت ده
واللى نشات نتيجة الاعتقالات والتعذيب فى السجون
ولا صلة للاخوان بالموضوع

Alaa El-din said...

انت عيل أسود بصحيح
الله يقرفك
أي شيخ يقول حاجة ماتمشيش مع هواك يبقي ارهابي
ده سلوك طبيعي منك عشان تحاول تريح ضميرك و تدافع عن قناعتك اللي أنا متأكد ان تلت ارباعها شبهات يختلف عليها علماء المسلمين
و اللي متأكد برضه انك فى اكثرها رجحت الأمر اللي يمشي مع هواك مش اللي يمشي مع فهم الدين
و علي فكرة الكلام اللي بيقوله ده قاله علماء كبار و علماء من الأزهر كمان
ياتري بتحب مين مع مصطفي حسني؟
شيرين عبد الوهاب عمرو دياب عبد الحليم أم كلثوم هيفاء وهبي اليسا؟
ونضيف الشعراوي و مصطفي حسني طبعا بس عشان ضميرك يرتاح و عشان ماشين مع الكولكشن و مع هواك

من أحب قوم حشر معهم

نصيحة
حاول ما تخليش الشيطان يسوق دماغك و يتحكم فى حبك و كرهك للناس

أشرف حمدي said...

علاء الدين
بحب مع مصطفى حسني مايكل جاكسون \ شيرين \ أصالة \ محمد منير \ النقشبندي صوت محمد رفعت في الآذان
ومن الغرب مايكل جاكسون \ كات ستيفنز أو يوسف اسلام كما تحب ان تسميه \ جورج مايكل

شكرا على تعليقك

Alaa El-din said...

بص
احنا لازم نتقابل عشان أنا ارهابي و بحب ارهابيين و بسمعلهم
و عايز انتقم لحقهم و افصل رقبتك عن جسمك
بما أني اختلفت معاك يبقي أكيد أنا ارهابي

أولا ما تزعلش من الكلام لأنك بدأت و كتبت كلام ينرفز

ثانيا فى نقطة
أنا مابقلكش انك تاخد من الناس دي حصرا و ان كلامهم قرآن
أنا بس لاحظت انك واخد العملية فرق أهلي و زمالك

بتحب مصطفي حسني و بتشجعه و بتكره يعقوب

مع ان وارد ان يكون كلام يعقوب أصح من كلام مصطفي حسني أو العكس

البعض يخلط و يشبه فئة من علماء المسلمين بقساوسة مسيحين الغرب فى العصور الوسطي
وفي هذا كل الجهل و الإجحاف و الظلم

و اللي يجن الواحد اكتر ان بعض النصاري بيدخلوا يطبلوا ورا كلامك

أشرف حمدي said...

علاء الدين
هل تتحدث بصفتك مسلم غيور على الدين ؟
دعني أسألك أنا
هل الإسلام علمك قلة الأدب وفصل رقاب الناس عن أجسادهم ؟
ماهو ماتدافعش عن حاجة إنت مش ملتزم بيها
دعني اقول لك إنك مجرد تابع لشخص إرهابي لا تابعا للاسلام وهذه هي المصيبة
ان تشوه صورة الاسلام بإدعاء كونك مسلما وانت مجرد متعصب آخر

"
البعض يخلط و يشبه فئة من علماء المسلمين بقساوسة مسيحين الغرب فى العصور الوسطي
وفي هذا كل الجهل و الإجحاف و الظلم
"

يعني بترد على نفسك
مافيش كهانوت في الاسلام يا حبيب قلبي
ويعقوب والحويني ومحمد حسان وغيرهم مش واخدين الاسلام اكسكلوزيف أو حصري يعني
ومن حقي انتقدهم
انا حر يا أخي
ومن حقي ما احبهمش
يا سلام ؟ كفرت انا ؟ :)))

وبعدين نصارى ايه ؟
احنا اهلي وزمالك هنا ؟ مانت بترد على نفسك
احنا الاهلي والنصارى الزمالك ولازم نطلع قدام الزمالك مية مية وشيوخنا مية مية

انت واثق من دينك ؟
واثق من أفكارك
يبقى انا كلامي لا قيمة له وكلام فارغ

العنترية دي والهيستيريا اللي انت فيها تعني ضعف ايمان وعدم ثقة
ثق في دينك لأنه يستحق أن تثق فيه أكثر من ذلك ولا تخشى كلامي

أشرف حمدي said...

بهدوء

عشان بس تعرف الازدواجية ، اسمك بهدوء وداخل تشتم وتتعصب
مش عايزني امنع تعليقك ؟

اعتذارك مقبول يا سيدي وعلى راسي من فوق
بس بأكد إني مش بكتب كلام من دماغي وكنت شاكك من صحة المصدر وطلبت الناس تتأكد وترد وتبعت وصححت الموضوع في التدوينة ومكتوبة بالأحمر بخط كبير

تحياتي

Alaa El-din said...

هاقول طور هاتقول احلبه
أنا متأكد أنك ممكن تجادلني و أجادلك لأسبوع حتي لو اتفقنا
المدونات الفاشلة دي مش معمولة غير لكدة

معاذ رياض said...

الحل مع شيوخ تحريم ما أحل الله هو أن تسأل الواحد منهم سؤال من الآخر : يا عم الشيخ الحياة حلال يعني ينفع نعيش واللا نروح نولع في نفسنا؟

حايقولك طبعا يا ابني لا يجوز إن الإنسان يعيش لأن الحياة مليئة بالمنكرات ، يجب أنه ينتحر فورا. قوله قشطة يا عم الشيخ، ياريت بقى تكون قدوة لينا وتبدأ بنفسك

وكده نبقى خلصنا منهم

winner said...

سيدي الفاضل
من البداية انت تضع وجهة نظرك الشخصية
و لكن هذا لا يعني بالضررة انها صحيحة
انت تقول ان فلان ارهابي او متخلف
هل هذل بالضرورة صحيح؟؟
قد تكون مخطئا
يمكنك دراسة ما درسوه و التعمق أكثر فيما عرفوه و بعدها يمكنك انتقادهم بشكل اكثر موضوعية
قد لا يعجبك كلامهم او تختلف معهم
لكن هذا بالتأكيد لا يعطيك الحق في سبهم او وصفهم بهذه الأوصاف

Counter