Total Pageviews

Friday, September 18, 2009

العلمانية Secularism

المعاقين فكريا ممن يتهمونني بالعلمانية
يذكروني بمشهد مهم من فيلم البداية ــ أحد أروع ما قدمته السينما المصرية ــ حينما أراد نبيه بيه الذي يريد الإستيلاء على حكم الواحة بالضحك على عقول أحد البسطاء فقال له عن بطل الفيلم احمد ذكي : ده .. ده ديموقراطي
فرد الرجل : أستغفر الله العظيم من كل ذنب عظيم ، ديموقراطي ؟؟؟
وهذا ليس مجرد مشهد كوميدي فقط ، بالفعل كانت كلمة ديموقراطي في فترة من الفترات هي المرادف الشعبي لدى الجهلاء لكلمة ملحد أو كافر
والآن نفس الشيء مع كلمة علماني
وكان من الطريف جدا ان يرسل لي أحدهم تعليق يقول فيه : أدينا كشفناك على حقيقتك يا علماني ، أنا مش حتناقش مع واحد علماني زيك
وكان ناقص يقوللي : ياللا يا علماني يابن العلمانيييييييين
هههههههههههههههه
في الواقع أنا لا أحب تصنيف نفسي لأنني اعتبر ذلك نوعا من الموضة والاستعراض الفارغ
لست من طبقة المثقفين أو مدعي الثقافة ممن يجلسون على مقهى بوسط البلد ويقولون أنهم راديكاليين علمانيين شيوعيين يساريين ليبراليين علمانيين ويتحدثون عن نيتشه وزراديشت
لن أدعي أني علماني وإلا سأكون عبيطا ، لندع المسميات جانبا إذا أردنا أن نتحدث بالمنطق
ولكن إذا كانت المسميات تهمكم إلى هذا الحد ــ خاصة حينما تصبح مادة طريفة للشتيمة ــ فيمكن ببساطة شديدة تعريف العلمانية
وفقا لموسوعة ويكيبيديا فإن العلمانية هي : فصل الدين والمعتقدات الدينية عن السياسة والحياة العامة، وعدم إجبار الكل على اعتناق وتبني معتقد أو دين أو تقليد معين لأسباب ذاتية غير موضوعية. ينطبق نفس المفهوم على الكون والأجرام السماوية عندما يُفسّر بصورة مادية عِلمية بحتة بعيداً عن تدخل الدين في محاولة لإيجاد تفسير للكون ومكوناته.
لو كان في ذلك جريمة ما فأنا أعترف بإرتكابها :)
أما عن باقي التعريف ، ربما يؤخذ على العلمانية فصل الحياة الدينية عن الحياة السياسة بالكامل أي أن دور الدين ينتهي بمجرد الخروج من المسجد أو الكنيسة وفي ذلك مخالفة ــ تبدو للوهلة الأولى مخالفة ــ للدين الذي يعتبر منهج حياة بالكامل لا فقط داخل الكنيسة أو المسجد ، ولكن ما الذي يمنعك من بر الوالدين ومساعدة المحتاج والتصدق والزكاة ورحمة كبار السن ومساعدة كل من تستطيع مساعدته ولو بعبور الطريق ؟ لا أعتقد أن مفهوم العلمانية يمنعك من ذلك ،
كما أنها لن تمنعك من صلاتك أو قول بسم الله الرحمن الرحيم قبل الأكل ، كما لن تمنعك الصوم في رمضان
وللعلمانية أنواع كثيرة جدا ، ولها مفاهيم كثيرة ، وليست ثابتة بل تختلف من مجتمع إلى آخر
العلمانية العربية ليست كالعلمانية الغربية
ولكن لا علاقة لها بالإلحاد على حد علمي المتواضع وهذه هي النقطة
لهذا من الأسهل أن يشرح الإنسان وجهة نظره كما أفعل هنا في مدونتي خير له من أن يطلق على نفسه اصطلاح علماني
ومن الأسهل ان تشتمني بأبي وأمي بدلا من أن تنعتني بالعلماني ، لأننا سندخل في جدال إلى الأبد وأولا وأخيرا أنت تريد الشتيمة لا أكثر ، كما انك ستفضح جهلك أيضا بما تقول :) فلماذا تصعب الأمر على نفسك ؟
لنتناول الموضوع بالعكس إذن
نريد عدالة إجتماعية ومساواة وحرية عقيدة وقضاء عادل لا يفرق بين مواطن وآخر على أساس ديني أو فكري
تفعلها بالإشتراكية بالشيوعية بالدولة الإسلامية بالليبرالية بالباذنجانية المخللة ، أفعلها كما تشاء وأطلق عليها من المسميات ما تحب :)
ولكن إحذر
حينما تبدأ فئة ما في تمييز نفسها بالنقاب مثلا ، لا كمجرد عبادة ــ وهو أمر محل خلاف وجدال ديني أساسا ــ ولكن كنوع من التمييز والعنصرية ، فهذا يعطي الحق للآخر أن يرتدي البيكيني في الشارع أو يسير عاريا تماما ، على أي أساس وافقت على النقاب ورفضت البيكيني ؟
إذن لابد وان يكون هناك قانون يسري على الجميع وأن يكون قانونا معتدلا غير مستمد من ديانة بعينها ويناسب جميع طوائف الشعب بحيث لا يتعدى على حريته الدينية قدر الإمكان
الخوف من تأتي اللحظة وترتدي فيها كل بنات المسلمين الحجاب ثم يصبح قانونا مستمد من الدين الإسلامي وفقا للمادة الثانية من الدستور التي تنص على أن الدين الاسلامي مصدر التشريع ، ماذا سنفعل بالأخوة المسيحيين ؟ نحجبهم ؟؟؟ أم نسجنهم ؟؟؟ أم نطردهم خارج البلاد ؟؟؟ أم ننزع عنهم جنسيتهم المصرية ؟؟؟
إلى حد ما أنا أقرب إلى فصل الدين عن الدولة بما يحقق عدالة إجتماعية للجميع
الإلحاد حق أي إنسان وفقا للدين الإسلامي أيضا
ولكن أن تفرض إلحادك مثلا هذا هو ما أقف ضده

51 comments:

Unknown said...

أوافقك الرأي تماما

فكرتني بمسلمي المهجر، لما حد يدوسلهم علي طرف هناك يصرخوا مطالبين بالحرية الشخصية وحرية الاعتقاد الخ الخ، وعلي الجانب الآخر يقعدوا يسبوا ويلعنوا في نفس الحرية دي لما تكون مش في صالحهم.

أتوقع الردود علي الموضوع من جمهور المدونات أكثر تسامحا وأقل حدة، التدوينة دي لو كنت كتبتها عندك علي الفيسبوك كان زمانهم أقاموا عليك الحد :)

فنان مسلم said...

سلام عليكم يا أشرف
دعني أوضح لك نقطة
عندما أنزل الله دياناته السماوية , فرض فيها عبادات و (بعض) التشريعات المناسبة لمن أنزل عليها هذه الرسالة
أنا أتفهم وجود علماني مسيحي
وأتفهم وجود علماني يهودي
ولكن لا أتفهم أبداً وجود علماني مسلم
لماذا
لأن المسيحية واليهودية ليست بهما شريعة (بمهفوم الشريعة الواسع ) بل مجرد عبادات وتشريعات بسيطة أنزلت لقوم معينين بشكل مؤقت حتى تأتي الشريعة التالية لها
والأمر يختلف تماماً مع الاسلام ,الذي هو أخر الديانات , والذي أنزل فيه الله شريعة يلتزم بها البشر الى يوم يلاقونه
شريعة تسع المسلم وغير المسلم في المجتمع الاسلامي
اذا راجعت مصادر هذه الشريعة (القران والسنة ) ستجد أن بها قوانين تنظم حياة المسلم وغير المسلم ممن هو تحت مظلة المسلمين , بقوانين غاية في العدل والانصاف
لا يمكن أبداً أن يكون الانسان مسلماً موحداً يؤمن برسالة الرسول صلى الله عليه وسلم - يرفض ما أنزل عليه من شريعة

دعني أضرب لك مثلاً بسيطاً على أن فصل دين الاسلام عن الدنيا ليس كفصل المسيحية مثلاً عن الدنيا
هل تعرف شيئاً عن الاقتصاد الاسلامي ؟
مذهب ضخم في الاقتصاد يقوم على تشريعات اقتصادية من القرأن والسنة , بني عليه فيما بعد قوانين وتشريعات وأحكام , تطور تعقيدها مع تطور تفاصيل الاقتصاد عبر الزمن , إلا أنها تلتزم اتجاهاً محدداً وخطوط ثابته , تتعارض في كثير من الأحيان مع الاقتصاد (العلماني).ـ
ان هذا الاقتصاد ,منظوم بشكل متقن ومحكم وبديع , لو تم الالتزام بقوانينه لأدى الى تطور المجتمع كله
وها هم علمانيو الغرب ينتبهون له الان بعد فوات الاوان .
شاهد الرابط التالي :
http://www.youtube.com/watch?v=-GsdxJJ3mo8

فهل يوجدمثلاً ما يسمى بالاقصاد المسيحي ؟ أو الاقتصاد البوذي ؟

ان فصل الدين عن الدولة يتضمن مثلاً عدم الالتزام بهذه القوانين التي هي في الاصل قائمة على تشريعات دينية
وبالتالي فان الايمان بدين الاسلام لا يتفق أصلاً مع عدم العمل به
لأنه ليس مجرد عبادات , كما ترى .

أرجو أن أكون قد أوصلت فكرتي

adel said...

,الله يا اشرف
عندك حق في كل كلامك

ولو انت كده علماني
انا من العلمانيين انا كمان

ورد علي احمد
للاسف جمهور المدونين هنا اشد من الفيش بوك
لان الفيش بوك ممكن تعمل بلوك و ديلبيت

هنا للاسف ممكن يعمل اكونت و يشتمك مخصوص

للاسف افكار الناس بقيت في الضياع

مواطن مصري said...

المشكلة ان الاسلامين شتامين لا يعترفو ب الاخر


اساسا

الميكروباص said...

ماذا لو لم تكن أوربا في العصر الحالي متقدمه على المسلمين هل كنت ستوافق على فصل الدين عن الدوله أم لا؟
بمعنى
لو انك الآن تعيش في ازهى عصور الاسلام التي كان مقابلها العصور المظلمه في أوربا
هل وقتها كنت ستطالب بما تنادي به حاليا؟
هي دي المشكله يا اشرف
انه لا يوجد مبدأ - انت تسير مع الهوجه
وهذه الأيام التقدم مع من يفصلون الدين عن الدوله ولهذا انت تؤيدهم
ولكن اعلم تماما ان من يبتغي العزه في غير الاسلام يذله الله
بدلا من هذه الدعوه عليك بدعوة الناس إلى التمسك بقوانين الاسلام التي عندما انحرف عنها الناس تعرضوا بالفعل للذل
هل نحن نطبق الاسلام حاليا؟
انا اسألك- هل مشكلتنا اننا نطبق الاسلام ولهذا نحن متخلفون؟
بالعكس- نحن لا نطبق الاسلام في امورنا ولهذا السبب نحن في تأخر مستمر
عندما نتمسك بديننا سنتسيد الأرض
ولكن الله عز وجل جعل امرنا بأيدينا- فجعل تأخرنا سببه المباشر هو البعد عن الدين الذي هو الطريق المستقيم
ولقد لفت نظري في آخر كام سطر انت تكتبهم قلت ماذا نفعل في النصارى عندما نطبق الشريعه؟
الموضوع بإختصار شوف كيف عامل النبي الذي تحمل دينه غير المسلمين في زمنه
وكيف عامل عمر بن الخطاب وباقي الخلفاء الراشدين غير المسلمين وانت تعلم جيدا ماذا تفعل فيهم
المشكله الكبرى التي أراها اننا لا نعرف تاريخنا - بل ننتقد الاوضاع التي نحن عليها ونقارن بما يفعله غير المسلمون في تصرفاتهم وفي نفس الوقت لا نعرف ما هي الاحكام الموجوده في ديننا في هذه الامور التي نؤيد فيها غير المسلمين!!!
فعلا شيء غريب
بدلا من ان تذهب وترى ماذا فعل غيرنا عليك بقراءة تاريخ واحكام دينك وانت تعلم ما هو الصواب
ولا يوجد شيء اسمه اننا نحتاج لقانون جديد ينسق العلاقه بين الطوائف والملل المختلفه وكل واحد يفعل ما يشاء وقتها
وتذكر جيدا قوله تعالى
( ومن لم يحكم بما أنزل الله فأولئك هم الفاسقون )
وأيضا تذكر الآيه التي تعتبر معجزه بكل المقاييس
{ألم تر إلى الذين يزعمون أنهم آمنوا بما أُنزل إليك وما أُنزل من قبلك يُريدون أن يتحاكموا إلى الطاغوت وقد أُمروا أن يكفروا به ويريد الشيطان أن يضلّهم ضلالاً بعيداً . وإذا قيل لهم تعالوا إلى ما أنزل الله وإلى الرسول رأيت المنافقين يصدُّون عنك صدوداً }.
صدق الله العظيم
.............................

كل سنه وانت
طيب يا برنس
انا دخلت اصلا اهنئك بالعيد
اما عن الميكروباص اللي كنت سايب لك فيه فانوس فده البلوج بتاعي
كنت سايب فيه فانوس لكل الناس اللي بزورهم- لكن شيلته بأه لأن رمضان خلص
وانت يا وحش مجتش اخدت الفانوس بتاعك

أشرف حمدي said...

أنا حجيب سيكرتير يرد على المدونة بدالي بقى هههههههههههههه
كويس إني في أجازة بجد ، عاوز أرد بس المواضيع كتير قوي ونافوخي حيضرب كده

معلش نبدأ على طول بفنان مسلم اللي دايما بنختلف في الرأي بس بجد بحب اناقشه ، لإنه فعلا هاديء وموضوعي إلا نادرا :)))

-------------
فنان مسلم
واحدة واحد يا باشا
انا فاهم فكرتك تماما ، أنا بس شايف إن موضوع التشريع ده والحكم بما أنزل الله كان في فترة من الفترات ناجح جدا وأفرز حضارة اسلامية هناك من يشكك بها ويقول أنها حضارة عربية ولا يجوز الربط بين الدين إسلام وبين حضارة العرب وتقدمهم ونبوغهم وتنويرهم لقارة بأكملها كأوروبا
نتفق أو نختلف في النقطة دي مش مشكلة

لكن دلوقتي لو جيت تحكم بالإسلام ، هات لي دولة واحدة تحكم بالإسلام متقدمة ، واللي رد عليا في النقطة دي لورنس العرب وحرد عليه في التعليق الجاي
لكن أنا بكمّل ، هات دولة اسلامية تطبق الشريعة الإسلامية كنظام سياسي وصلت لأي حاجة في الـ 100 سنة اللي فاتت على الأقل
ماعتقدش فيه
السعودية نفسها مافيش داعي اتكلم عنها عشان ماحدش يزعل واللي انت عايش فيها يا فنان مسلم ، ماذا أفرزت السعودية ؟ انا شايف إرهاب وبلاش أقول حاجات تانية انت عارفها

طيب إنت ليه دلوقتي بتربط حكم الاسلام بالتقدم وكإنك بتقول إن أي دولة بتحكم بأي شريعة تانية غير الاسلام مش حتفلح ، عندك الصين واليابان وأمريكا وكفاية دول ده غير باقي الدول

هل تضمن لي حكم اسلامي عادل ؟ خلاص هات لي سيدنا عمرو بن الخطاب وانا تحت أمرك
دي نقطة
النقطة التانية شائكة شوية

الشرع لا يتغير والمسلمين يرفضون تطويره بما يتناسب مع العصر
حتقول لي الشرع في الاسلام يناسب كل زمان ومكان أقولك لأ

تعالى ناخد نقطة عبيطة قوي
تخيل إنك رايح تدعو إلى الاسلام في قبيلة أفريقية على خط الاستواء وتقول لهم اتحجبوا مثلا أو إلبسوا النقاب
أولا الناس هناك ماشية بلابيص اساسا ، يعني الراجل شايف أمه وأخته ومرات أبوه وخالته وعمته وكل الستات بلابيص تقريبا ، انت جاي تستر ايه مادام مافيش أساسا أي نوع من الإثارة في المنظر ده ؟
ثانيا : ينفع تلبس الناس دي هدوم بالشكل ده في الظروف المناخية دي ؟
وماتقوليش شبه الجزيرة العربية عشان الوضع مختلف

اصتدام الدين مع المجتمع بظروفه بمعتقداته حيكون عنيف جدا ، محتاج ييجي خمسوميت سنة عقبال ما تعلم القبيلة دي العربي وتشرح لها حاجات مش عندهم أساسا ، واحد بيتجوز خمسين تيجي تقول له اتجوز أربعة ماتركبش ، طبعا حتشيل من دماغهم كل أنواع الطقوس والسحر ومراسم الزفاف ومراسم الصيد والإحتفالات و و و و

ولكن مهما كان لو قدرت تخلي الناس دي مسلمة وماشية على الشريعة أهو تقدم بالنسبة ليهم

على العكس بقى
اصتدام الدين مع التطور وعرقلته لا لعيب في الدين ولكن في رجال الدين أو من يسمون أنفسهم رجال الدين
تيجي تقول تليفزيون يقولك حرام
تيجي تقول هندسة وراثية يقولك عبث
نقل أعضاء يقعدوا كام سنة يضربوا في بعض عشان تطلع فتوى إنه حلال بعد ما شوف كام واحد مات في المعركة دي وكان من الممكن إنقاذ حياته
نقول أمريكا طلعت القمر يقولك أكذوبة وإفتراء على الله
ده اللي انا لا أطيقه
أن يكون الدين والذي من المفترض أنه نور للبشرية يتحول إلى ظلام تام والسبب أنه لا يوجد مفكرين دينيين يمكنهم فهم فلسفة الدين الاسلامي وتطبيقها بشكل عصري يخدم المجتمع لا أن يرجه به إلى 1400 سنة مضت

أنهي أسهل دلوقتي
تخوض معارك دينية للتطوير وتلاقي مليون شيخ يقولك انتوا عاوزين تزيفوا الدين وتحرفوه ؟ ولا نفصل الدين عن الدولة وكل واحد يمارس معتقداته ودينه براحته دون أن يمس حرية الآخرين ؟

يتبع

ايوشة said...

هعلق على كلمة فى التعليقات عند حضرتك وبعدين ارد على البوست مواطن مصرى بيقول الاسلاميين مش عارفة ليه بقينا بنعشق المسيات الغريبة
يعنى المفروض اللى بينصح فى الدين بقى اسلامى والباقى واللى بيحاول يعرض فكره بطريقة مختلفة عنا ما تعودنا يبقى علمانى واللى مش عارفة ايه يبقى ايه معلش بقى انت لا تفرق اى شئ عن الاسلاميين اللى بتكلم عليهم علشان زيك زيهم بتنتقد وبس من غير اى دليل معاك اللى عايز يتكلم يتكلم بدليل وباحترام واحنا هنسمعه ده لمواطن مصرى

انما ردى على بوستك انا لما قريت البوست اللى فات قولت انا ممكن اكون متفقة معاك بس اسلوبك هيخلينى اقولك لا مش هو ده الاسلوب اللى تتناقش بيه وتعبر بيه عن فكرك ورايك وكويس انك قالوا عليك علمانى مش حاجة تانية :)
اما موضوع ان النقاب بيلبسوه كتمييز لالالا انت ليه بتنظر لجانب واحد بس من الوضع او فى نظرك كل اللى لبس النقاب او اطلق لحية يبقى بيعمل تمييز ويبقى رجعى يبقى نفس الحكاية ممكن اقولك على كل من طول شعره ولبس سلسلة وسقط البنطلون ولا لبست مايوه بكينى انهم عصاه مذنبين وانهم فساديين كمان
لكن هى لا تحسب كده بالمرة الدين واضح وصريح واحنا اللى عايزين للاسف نقلبه ونفلسفه بمزاجنا ماسكين فى المظره وناسين الجوهر النقاب حرية شخصية زى ما اما اى واحدة عايزة مش ترتدى حجاب هى حرة برضو محدش ضربها على ايديها وعلى هنعلقها فى المروحة
انما تقارن نقاب بمايوه معلش بصرف النظر عن راى الدين مع ان الدين منهج حياة العادات والتقاليد بتاعتنا تسمح بان الست تتطلع من بيتها مش لبسه هدومها لو انت شايف ان ده شئ طبيعى وحرية شخصية يبقى دافع عن فكرتك لاخر نفس اذا كان الستات لبسين هدوم لا تستر ولا تتدراى والتحرش وقضايا الاغتصاب والبلاوى السودا فى البلد ماشاء الله كل يوم فى ازدياد
يبقى الفكرة نسيب اللى هى بتعمل فضل او فرض فى الدين سواء شئت او ابيت ده شرع مينفعش انت تتدخل فيه العلماء ليهم اراء وانت ليك مطلق الحرية تختار الراى اللى يناسبك لكن مش تقول لا انا ليا تانى خالص مش من حقك تنتقد النقاب ولا اللحية زى ما هما مش ليهم الحق ينتقدوا اللى مش منتقبات ولا الغير ملتحين
اما انك عايز تفصل الدين عن الدول يبقى انت برضو غلطان احنا تقريبا فى دول مش بتتبع التشريع الاسلامى حتى فى اغلب القوانين من الاساس وموضوع ان بينا مسيحيين والله الدين الاسلامى لو اتنفذ صح 100 ال 100 هتلاقى انه مدى كل الحقوق للديانات الاخرى وحرية الاعتقاد وممارسة شعار دينهم بحرية الدين لازم يبقى منهج حياة فى كل لحظة
وتصور ان الفساد اللى فى البلد بالطول والعرض سببه ايه غياب الضمير عند اغلب الناس وانعدام الاخلاق والاخلاق دى بنتعلمها منين بنتولد عندنا اخلاق ونمشى فى الدنيا مفيش حاجة بتاثر فينا لا طبعا ده لو كان ملاك مولد بعد شوية سنين على الارض هيتحول شيطان يبقى دور الدين يهذب الاخلاق ويقيم المجتمع
الدين مسبش اى شئ فى الدنيا الا لما وضع ليه حدود وقواعد حتى نظام اجتماعى اقتصادى سياسى كله

ايوشة said...

وعيب الدول اللى بتحكم بالاسلام انها مش متقدمة لانها مش متبعة الدين صح لكن لو الدين اتبع صح هتلاقى التقدم فى كل مكان

أشرف حمدي said...

بص يا فنان
مافيش حاجة اسمها بنوك اسلامية ده كلام فارغ
ومافيش حاجة اسمها اقتصاد اسلامي وغنما اقتصاد عالمي وأنت جزء منه ومافيش مفر من كده
يعني بنك اسلامي ما بيديش فوايد ولا بياخد فوايد ، طيب ماهو يا عم الحاج جزء من دورة المال في العالم اللي شغال بفوايد !!!
ماهو يا كل البنوك تبقى اسلامية يا كلها ربوية زي ما بيقولوا عليها ربوية
بنوك يعني نظام عالمي موحد وثابت وإلا حنضيع
انت ممكن تفلس بلد بحالها لو قررت تخلي كل البنوك اسلامية وفي نفس الوقت تتعامل مع بنوك أخرى عالمية ربوية
أكيد واحد فاهم في الإقتصاد يفهم أكتر من في النقطة دي وممكن يشرحها أحسن مني

بالنسبة لموضوع المسيحيين
في طل الحكم الاسلامي قديما كان يطلق على المسيحي في مصر عظمة زرقا ، والتسمية جاءت من قصة الحاكم الذي أمر بان يرتدي المسيحي صليبا عملاقا معلقا برقبته فكان من ثقل الصليب يتحول لونها للأزرق
كان نوع من التعذيب وكان تحت حكم اسلامي
أنظر الآن
محمد حسان ومحمد حسين يعقوب وغيرهم من شيوخ الرصيف ينبذون المسيحية ، يحرضون الناس على إزدراء المسيحيين والمسيحية ، لا تقرأهم السلام ولا تكلمه ولا تتعامل معه ولا تبيعه شيئا ولا ولا ولا
حرام حرام حرام
أبغض في الله أعداء الله
ده في الدين الاسلامي اللي بتتكلم عنه يا عم الشيخ ؟
انت بتقول الشرع عمل قواعد وضوابط للتعايش مع المسيحيين
مين بيطبقها قوللي ؟ وكيف سيتم تطبيقها ؟
هل ستفرض على المسيحي جزية وهو يحارب معك ؟ إذن إعفيه من الحرب ، طب دلوقتي مافيش حروب ناخد فلوس الجزية نعمل بيها ايه ؟ إحنا في حالة فتوحات ؟ هل مصر في حالة حرب دائمة ؟
آخر حرب كانت من 30 سنة ولا اتوقع حرب أخرى قبل 50 سنة مثلا
إحنا لاقيين ناكل لما نحارب
يبقى الجزية هنا لازم تسقط
زمان كانت البلاد في حالة حرب وفتوحات مستمرة والممالك مالهاش حدود سياسية ، الحدود تتسع وتضيق كل يوم
طب ودلوقتي ؟

لما تقول شرع لاااازم تفكر في زمان ودلوقتي
عارف لو مشينا في الشرع ؟؟؟ العبودية ترجع بحجة إنها في القرآن ، وما ملكت أيمانكم ، وفقه الرقيق ، طب بالزمة ده كلام ؟
ما العبودية اتلغت وانا عندي تشريع ليها ، نعمل ايه في التشريع ده ؟

بص حقولك حاجة واتمنى ماتكونش صادمة
القرآن نفسه اتغير واتطور على مدار نزوله أساسا ، يعني في العشرين سنة اللي نزل فيهم كان الخمر حلال

ولا تقربوا الصلاة وانتم سكارى

وبعدين الخمر فيه إثم ومنافع للناس
وبعدين الخمر حرام

ركز معايا إن التطور ده حصل في حاجة وعشرين سنة والقرآن اساسا لسة ماكملش
تخيل بقى 1400 سنة ايه اللي حصل فيهم من تطورات

الموسيقى حرام
والرسم حرام
طب ما انت بترسم يا فنان يا مسلم وبتعمل كليبات أنيميشن فيها موسيقى
جبت منين إنها مش حرام ؟

اكيد الوضع اختلف دلوقتي عن زمان والحكم سقط
لإن الموسيقى كانت للهو واللعب والنسوان فقط ولم نسمع عن موسيقى أو أغاني محترمة في الجاهلية

والرسم والنحت دي كانت عشان الأصنام والناس يادوب لسة طالعة من حكاية الأصنام حنقول لها انحتوا وارسموا ؟ كانوا عملوا تمثال للنبي وعبدوه وكإنك يابو زيد ما غزيت

هي مجرد وجهة نظر
بالنسبة لي لا أرى أي حرمانية في الرسم والنحت والموسيقى إلا لو كان منها ما يشجع على الرزيلة

فين بقى الشرع اللي حتطبقه ؟
شرع زمان زي ما هو بحذافيره ؟

أشرف حمدي said...

لورنس العرب

"اذا لو لم تكن أوربا في العصر الحالي متقدمه على المسلمين هل كنت ستوافق على فصل الدين عن الدوله أم لا؟"

بسم الله الرحمن الرحيم
الإجابة هي : لا

:)

وأرد عليك بسؤال من سؤالك ، هل ترى اننا نعيش أزهى عصور الإسلام كي نتحدث عن التقدم الاسلامي ؟ هل ما ندين به الآن اسلام أساسا ؟
قرآن لم يحرف منه حرف واحد ولكن بعشرات التفسيرات المختلفة وبالتالي عشرات الأديان التي لا علاقة لها بالإسلام من قريب أو بعيد

هل ستحكم بالشيعية أم السنية أم السلفية أم غيرها ؟
حتحكم بالسنية الشيعة مش حترضي ، حتحكم بالشيعية حيقولك ده شرك بالله أساسا
حتوحد الناس على مذهب واحد ؟
ده الآذان يا راجل مختلف من الشيعة للسنة
مش بس كده
السنة نفسهم مقطعين بعض اساسا ، كل واحد فاكر انه صح والتاني غلط
السلفيين مش طايقين الاخوان ولا الإخوان طايقينهم
حتحكم بأنهي فكر وأنهي تشريع وأنهى رأي ؟
مش لما الناس دي تتفق الأول يا عم الحاج على حاجة ؟
واحد يقولك رضاعة الكبير والتاني يقولك البنت تتجوز وعندها 9 سنين والثالث يقولك المسيحيين مشركين يجب نبذهم واحتقارهم

"بدلا من هذه الدعوه عليك بدعوة الناس إلى التمسك بقوانين الاسلام التي عندما انحرف عنها الناس تعرضوا بالفعل للذل"

ده افتراء حرام عليك
قول كلام معقول موزون

مانتم قاعدين تنشروا في الدين اهوه شفنا ايه ؟ حجاب ونقاب وجلباب وقبقاب ومن سيء إلى أسوأ
لما كان في كل بيت في مصر بار والناس لابسة ميني جيب ماشفناش اللي بنشوفه دلوقتي

مايجيش حاكم مستبد يحكم دولة ويخربها وتقوللي ده ابتلاء من الله
يا سلام ؟ انت حترمي أخطاء البشر وسلبية المجتمعات على ربنا ؟؟؟

يا جدعااااااااااااان
العبارة غرقت قالوا قضاء وقدر
القطر اتحرق قالوا قضاء وقدر وعشان بعدنا عن ربنا
البورصة وقعت قالك انتقام الله
الزلزال هد البيوت قالك غضب ربنا

دي قمة السلبية
لما تبقى بتعمل اللي عليك الأول ومأدي واجبك تماما تمام وتحصل مصيبة قول قضاء الله

لكن تدافع عن واحد نصاب أو مهمل او مرتشي وترمي المسئولية على ربنا ده قمة الإلحاد يا جدع

انا شايف إن الدين الآن بحاله الآن بمشاكله الآن لا يصلح للتشريع أبدا
لما يبقى فيه شيوخ بجد وحق وحقيق ولما تبقى فيه أخلاق الجاهلية اللي هي أحسن من أخلاقنا دلوقتي إبقى احكم بالدين

ياعم صلي ع النبي
البلد كلها مرتشين ونصابين وحرامية والفساد استفحل وجاي تقوللي أحكم بالدين ؟ عشان يمكسها رجل دين فاسد وتتطين فوق دماغنا ؟

هات لو واحد يمسك البلد طيب :) عندك أقتراحات ؟

أشرف حمدي said...

ايوشة
الله عليكي
بس خلاص ، هو ده الكلام
لما واحدة تمشي بالبيكيني في الشارع ماحدش ليه الحق في انتقادها ولا حتى نصحها ولا رفع قضية حسبة عليها
ماهو نختار بقى
يا حرية يا مش حرية
الحرية مش من وجهة نظر المسلمين بس
ده فيه مسلمين ومسيحيين وبهائيين ويهود وملحدين
كل واحد شايف التاني غلط
ليه بنفكر بمنظور احادي على غننا الوحيدين الصح ؟؟؟

لما نبقى دولة اسلامية يبقى كلامك مظبوط لكن إحنا دولة مدنية

انا تعبت من المناقشة في الموضوع ده
يا جدعااااااااان انا لا مع العري ولا مع النقاب
انا المنطق
في نيويورك ممكن تمشي من غير النص الفقاني خالص توبليس وماحدش يكلمك نص كلمة
هناك طبيعي هنا مش طبيعي
المهم هو القانون الواحد والثابت اللي يمشي على الكل ويحقق مبدأ المساواة

لما يبقى فيه نقاب في دولة مدنيييييية يا بشر يبقى لازم يكون فيه بيكيني في الشارع
وحدوها طيب
يا دولة مدنية يا دولة اسلامية يا دولة علمانية بحتة
إحنا دولة مهلبية

دولة اسلامية يبقى اللي يسرق تتقطع ايده
مش واحد غلبان يسرق رغيف عيش وواحد نصاب يسرق مليارات تتقطع له تذكرة درجة أولى على أول طيارة رايحة سويسرا

شايفة إن لو عملوا دولة اسلامية حتتحل كل مشاكل مصر ؟؟؟
طب يا ريت والنبي
انشالله تعملوا دولة شيطانية حتى بس نعيش

ماحدش يضحك على نفسه أرجوكم
الحل مش في الدولة الاسلامية
ولا حتى في العلمانية ايه رأيكم بقى ؟
ماهوا ممكن يمسكها علماني متطرف برضه فاهم العلمانية غلط أساسا

الحل في مبدأ العدل ، الديموقراطية ، المساواة
نجيبهم منين دوووول ؟؟؟

صدقوني والله العظيم تلاتة
لو حكمنا اسلاميين المسيحيين في مصر حيتدبحوا واحد واحد
اللي مش محجبة حتتجلد
الدين مطاط في هذا الزمان الأغبر
والكذب في الدين عادي
والإفتراء على الله عادي

المشكلة الحقيقية والفرق الجوهري بين العلمانية والاسلامية انا العلمانية تقبل النقض
لو النظام ما عجبكش من حقك تنقضه للصبح لحد ما يناسب المجتمع
غنما الدين متحجر للأسف
والإعتراض على الحكم الاسلامي بمثابة الإعتراض على الله نفسه

يعني ممكن نشوف أيام مهببة في البلد دي وماحدش حيقدر يفتح بقه والا حيتدبح باسم الدين كذبا وافتراء

انا مش بشتم في الدييييييييييين
انا بهاجم العك اللي حصل في الدين
انا بهاجم استغلال الدين
انا بهاجم الرجعية والتخلف حتى وإن جاءت تحت عباءة الدين

الرجعية اتنكرت في زي ديني ، تهاجم الرجعية يتقال عليك بتهاجم الدين
أي منطق ده ؟؟؟

أشرف حمدي said...

ايوشة تاني
يووووه
انا من حقي انتقض أي حاجة في الدنياااااا
ولكن """ليس من حقي فرضها"""

يا عالم افهموا ، انا ممكن اقعد انتقد وأهرتل في أي كلام فاضي انتوا خايفين من ايه ؟،
يا سلام ؟
دي مش جريمة
الجريمة اللي بجد إني أفرض كلامي على الناس بالجبر
الجريمة إني امارس معاهم الإرهاب يا تقتنع بكلامي يا أقتلك
حد شافني ماسك سيف ونازل تدبيح في المدونة ؟؟؟

ما اللي بينتقد أي حد ينتقد ده لا حيزود ولا حينقص من قدر الشخص المنتقد
إلا لو شتم دي حاجة تانية
عندك حاجة "بدليل" اعرضها يا عم ونشوف كلامك ده ايه
سمعنا يا سيدي
قول يا عمنا

واحد شاف شيخ بيقول تف في وش المسيحي
أنا قلت عليه إرهابي
عاوز حد يغلطني بقى

واللي يسمع يسمع واللي يصدق يصدق واللي يرد يرد


مصيبة "المتأسلمين" هي فكرتهم إنهم بس اللي صح والباقي كله حيولع بجاز كده من غير كلام
هو كده
لا تناقش اساسا انت كافر من الاخر

أشرف حمدي said...

بالمناسبة يا جماعة
أكيد سمعتوا عن سيد القمني بعد موضوع جائزة الدولة التقديرية والحرب اللي اعلنوها عليه
انا ماقريتش ولا كتاب لسيد القمني
وناوي أقرأ كتبه عشان أكون رأي عن كلام الراجل ده
جايز نصاب زي ما بيقولوا
جايز كلامه منطقي
جايز ملحد يدعو إلى الغحاد
جايز مسلم يدعو إلى الإسلام بمفهوم عصري
اللي مجنني بقى إني مش لاقي ولا كتاب ليه ع النت
اللينكات كلها تم حذفها بفعل فاعلين ملاعين

يا جدعان احنا خايفين ليه من القراية ؟؟؟ حد يقوللي
وكإن الراجل سيد القمني ده ساحر بمجرد ما الواحد يقراله يتلحس

فيه فرق بين خطيب ديني زي محمد حسين يعقوب كلامه موجه اساسا للبسطاء وأنصاف المتعلمين وبالتالي يمثل خطر عليهم لأنه من السهل جدا السيطرة على عقل واحد جاهل لم يكن له أي ذنب في جهله وعلى راسي من فوق انا مش بقلل من شأن الاميين

وبين واحد مثقف بيكتب لناس مثقفة مش أنصاف متعلمين
وبالتالي لا خوف عليهم وكل واحد أدرى بمصلحته

يحذفوا الكتب بتاعته ليه ؟
ما نقرا ونشوف ونحكم بنفسنا
ولا لازم يأتينا فاسق بنبأ ؟؟؟؟

عموما حتى المثقفين والكثير من الملحدين ضد أفكار سيد القمني
ولكن يهمني أنا أن أقرأه لا أن آخذ انطباعات وأحكم سماعي

Here i'm said...

يمكن دى أول مرة أرد فيها هنا .. و طبعا بعد أذنك :)

زى ما عرفت العلمانية .. كان أحرى بيك أنك تقول أسباب وجود العلمانية .. و أسباب تحول المجتمع الأوربى من مجتمع دينى متطرف إلى مجتمع علمانى متطرف ..

الأسباب بتتلخص فى الكهنوت . و أحنا فى الأسلام معندناش كهنوت .. يبقى ليه أستخدم لمبة و انا أساسا معنديش ضلمة

فى تعريف الراحل عبد الوهاب المسيرى للعلمانية قال أن العلمانية نوعين نوع علمانى كامل زى علمانية الدول الأوربية و تونس و نوع علمانية جزئية زى مصر كده ..

و قال الشيخ القرضاوى .. أن مصر دولة علمانية حميدة .. بمعنى أنها مش دولة علمانية متطرفة .. يعنى مثلا ينص الدستور على ان الشريعة الأسلامية هى المصدر الرئيسى للتشريع .. مع أن كل القوانين وضعية و مستمدة من القانون الفرنسى و أقلها هوا اللى مستمد من الشريعة .. زى الورث مثلا

بالتالى .. لو بصينا من فوق على مصر .. حتلاقى انها عملت ميكس غريب مش موجود ممكن يطلعلنا نوع جديد بدل العلمانية و الأسلامية .. أسمه المصرية .. لا هيا علمانية فرنسية ألمانية ولا هى أسلامية سعودية أفغانية ..

بالنسبالى أنا أوافق على كونها علمانية على ان تكون أسلامية من نوعية أسلام الأخوان و السلف .. مع أختلافى على أستيراد فكرة العلمانية فى الأساس :)

سعدت بالنقاش معاك :)

عبدالرحمن نجم الدين said...

بخصوص سيد القمنى يا أشرف
أنا باقولك ان الراجل دا كداب ونصاب ومالوش أى علاقة بالعلم أو البحث العلمى
ولو عندك وقت، ممكن تقرأ المقال دا

http://awad.phpnet.us/Articles/Qmni.htm

ح تعرف حقيقته.. لإن للأسف فيه ناس كتير انخدت فيه لإنه بيعرف يروج لنفسه على انه راجل بيحاول يحل مشاكل الإسلام والمسلمين
وهو فى الحقيقة راجل مالوش دين ولا ملة، عاوز يشككنا فى ديننا، مش ديننا بس، تاريخنا كله ويدمر ثقتنا بنفسنا
والمقال اللى ح تقراه كتبه راجل عالم بجد، وعلى ضمانتى المقال دا ح يعرفك القمنى دا أصله إيه

Anonymous said...

للى حيتغير بعد كل الكلام ده حتبقى مكروه وتطلع عليك اشاعات بس ..انتا بتنادى فى عيادة أذن

فنان مسلم said...

عزيزي أشرف
المواضيع اللي اتفتحت كترت أو , يصعب مناقشتها بالشكل ده :)
عامةً , هتكلم بشكل سريع
وياريت منفتحش كل المواضيع ونخلطها ببعض , لأن كل موضوع منها محتاج مناقشة منفصلة

أولاً , كونك متعرفش حاجة عن الاقتصاد الاسلامي فده مش ذنبي :)
ده حاجة بتتعمل فيها رسائل ماجيستير ودكتوراه في كل العالم ومتألف فيه مئات الكتب
والموضوع أكبر بكتير من مجرد البنوك الاسلامية والبنوك الغير اسلامية
ولو سمعت خبراء الاقتصاد هتعرف ان الكارثة المالية اللي حصلت أثرت تأثير ضعيف في الدول اللي بتتطبق (جزئياً) مبادئ الاقتصاد الاسلامي.

ثانياً ,برضو كونك متعرفش حاجة عن الاسلام كنظام مجتمع فده مش ذنبي
وأقصد بذلك الوسطية , بدون افراط وتفريط
الاجماع اللذي يمثل صلب الاسلام ,بعيداً عن شطحات المتشددين
انت دايماً بتحط الاسلام وعلماء الدين في موضع اتهام بسبب أقوال(بعض)علماء الدين
وده غير موضوعي بالمرة , محدش له الحق يمثل الاسلام بشخصه
ولكن الاسلام يمثل بالاجماع , وبوسطه , وبصلبه
ساعتها نقدر نقعد نتناقش
شريعة واحكام الاسلام ليست كلها واسعة ومطاطة كما يهيئلك ويعتقد الكثير
بل لها ثوابتها , ولها تفاصيلها التي تتغير بتغير الظروف والمكان

وعدم وجود دولة تطبق الاسلام 100% ليس عيباً في الشريعة , بل عيباً في الناس
ولكن يمكننا أن نقول ان هناك دولة تطبقه أكثر من دولة , ولا أريد ذكر نماذج

مثال صغير .. موضوع الجزية اللي انت بتقول عليه ده
هل تعلم ان مقدار الجزية لغير المسلم أقل بكتيييييييييييير من مقدار الزكاة اللي بيدفعها المسلم ؟
يعني الغير مسلم هيدفع فلوس أقل من المسلم على الرغم من الاتنين لهم نفس الحقوق و الواجبات
معتقدش انك تعرف المعلومة دي

ربنا أتاحلي الفرصة اني اسمع واشوف وأحتك شخصياً بناس كتير غيرت دينها للاسلام بعد رحلات شخصية من البحث عن الحقيقة
كان نفسي تسمع الناس دي بتقول ايه عننا .. وبتبصلنا باحتقار ازاي لما بيلاقونا بنحاول ننسلخ من تطبيق الاسلام في حياتنا العملية
بيحتقرونا جددددددددددداً لما بيلاقونا بنبصلهم كمثل أعلى , وسايبين اللي في ايدينا
بيقولوا ياريتنا كنا نعرف اللي عندكم ده

فيه نقطة تانية استفزني معلش وحابب أرد عليها :
"لما تقول شرع لاااازم تفكر في زمان ودلوقتي
عارف لو مشينا في الشرع ؟؟؟ العبودية ترجع بحجة إنها في القرآن ، وما ملكت أيمانكم ، وفقه الرقيق ، طب بالزمة ده كلام ؟
ما العبودية اتلغت وانا عندي تشريع ليها ، نعمل ايه في التشريع ده ؟"
معلش يا أشرف كلامك ده بيدل على جهل شديـــد بالموضوع اللي انت بتتكلم عنه
العبودية والرقيق موجودة من ساعة ما البشر نزلوا الارض , ولم تختفي الا بعد أن ظهر الاسلام
يعني الاسلام مش هو اللي اخترعها زي ما الكثير من الجهلة متصورين
بل هي اتلغت بسبب القوانين اللي نظمها الاسلام لتضييق الخناق عليها وجعلها تختفي تدريجياً , وهو ما حدث بالفعل

الا اذا كنت تعرف دولة مسلمة فيها سوق عبيد :)

Unknown said...

كل سنة و حضرتك طيب
و عيد فطر مبارك
:-)
----
بالمناسبة لو قريت مقالات بلال فضل
عن القمنى
حتعرف انه هجاص و مش وش علماء و لا باحثين
لو مش لاقيها
اضغط على بروفيلى
حتلاقى مدونة بلال فضل فى القائمة و هناك موجودة المقالات

و تحياتى ليك

أشرف حمدي said...

بدراوي
وانت بالصحة والسلامة يا باشا وعيد سعيد

معلش يا باشا أنا أفضل أقرأ بنفسي للقمني مع احترامي لصديقي العزيز بلال فضل
ماحبش اسمع من حد وأنزل شتيمة :)
لو كل الخلق قالت على القمني هجاص مش حقول إلا لما أقرأ وأحكم بنفسي
عموما انا طلع عيني لحد ما لقيت شوية كتب ليه على النت

أشرف حمدي said...

فنان مسلم لما بيقفش في الكلام ويتهمني بالجهل كأول حاجة تخطر على باله

أنا قلت إن الإسلام هو اللي إخترع العبودية يا عم ؟؟؟
حد قالك كده ؟؟؟
انا بقولك فيه حاجة اسمها فقه الرقيق سمعت عنه يا سيدنا ؟ عارف إن العبد من حقه يتجوز اتنين بس مش أربعة ؟
يا عم الشريعة الإسلامية فيها تشريعات للعبيد ، القرآن نفسه فيه كلام عن حقوقك مع ما ملكت أيمانك
تعمل ايه في الكلام ده ؟
يعني ربنا ماكنش عارف إن حييجي وقت والعبودية تتلغي ؟
يا حبيبي السعودية اللي إنت فيها لغت العبيد من سنة 1960
دي مهزلة
ودولة اسلامية تانية لغته من سنة 1980
دي مصيبة
تفتكر ايه السبب ؟؟؟؟؟؟؟؟؟
انا مش حرد وحسيبك تفكر
:))))
برضه بالنسبة للبنوك والإقتصاد
انت مش حتنفصل عن الإقتصاد العالمي ، لو قدرت يبقى جزاك الله خيرا
الدولة بحالها لما بتقترض بتدفع فوايد
أمال هي ديون مصر جت منين ؟

طبق على العالم كله لو تقدر
مش حبقى انا شغال نظام والعالم كله بنظام تاني يبقى انفصل عن العالم

أشرف حمدي said...

الأخ بهدوء اللي انا حذفت تعليقه عشان مستفز
لو انت بتقرا وبتعرف تقرا يا حبيبي حتلاقي مكتوب في التدوينة بتاعة فتوى الكراسي إن انا مش متأكد من المصدر وشايف إنها لعبة وياريت حد يجاوبني
وفي التعليقات لو بتقراها كمان
حتلاقي إن واحد مصحح المعلومة وانا شكرته
وجاي تقوللي أنا اللي ملفقها وتشتم ؟
ولا هي عاركة في خمارة ؟؟؟
نشتم وبس ؟؟؟
حتى الناس في الشتيمة مش عايزة تفكر بعقلها

أشرف حمدي said...

عبد الرحمن
سؤال
انت قريت لسيد القمني ؟؟؟

لو قريت عنه مقالات أنا مش حقرا معاك ومش معاك خالص
لو قريت كتبه سيبني انا كمان أقراها ونقرر

عارفين ؟؟؟
دي مصيبة العالم العربي كله
وده التخلف اللي بتكلم عنه
شعوبنا بتسمع وبسسسسسسسس
ثقافتها سمعية وبسسسسسسسس

شفت بيقولك أشرف حمدي طلع كافر
يا راجل ؟؟؟ همممم طب ما نيجي نقتله
هههههههه

شفت البت مش عارف مين طلعت عاهرة
يا راااجل ؟
طب ما تيجي ....... ههههه

ماتحكمش بالي اتكتب عنه
اقرا انت واحكم واعمل تدوينة وهاجمه براحتك خالص
امسك كتاب كتاب ونقطة نقطة وقول إنت ليه مش مقتنع

ده اللي بحاول انا اعمله

أشرف حمدي said...

here i'm
انا معاك تماما
انا برضه قايل في التدوينة إني مش مع التصنيف
ماينفعش نجيب قالب جاهز إسمه العلمانية أو الإسلامية أو أي حاجة نركبه زي ما هو كده على مصر , ونبقى فرحانين بالاسم وخلاص ؟

كل دولة ليها اللي يناسبها واللي يناسب ظروفها

Cypher said...

ليه دائما بنتناقش من منظور ديني واحنا كعرب بندعي اننا سادة المنطق وبيتهيألي ان الدين مش بعيد عن المنطق .الدولة المدنيه هي الحل ... تساوي بين الناس في الحقوق والواجبات. في ناس فاكرة اننا كمسلمين احسن من غيرنا وواجبنا معاملة الاخرين بشكل اقل زي الشيخ بتاع تف في وش المسيحي .الدولة المدنية عمرها ما هتسئ لحد وانت قلت الحل ايه الديمقراطية والمساواة طب ما دول اي دين بيدعوا ليهم اساسا لكن الحلاف ان الدين بقى مطاط .زي اللي بيقول ان الديمقراطية في الاسلام هي نظام الخلافة يعني نعمل خليفة ولما يموت نمسك ابنه.مع ان الاسلام قائم على الشورى مش الوراثة ... الدولة المدنية مش هتختلف كتير عن مبادئ الاسلام الاصلي مش اسلام اليومين دول ..... وبالنسبة لسيد القمني اذا كان هو غلط واساء للعقيدة ليه بيحذفوا كتبة اذا كان جاهل وكافر سيبونا نحكم ولا لازم نردد وراهم امين

أشرف حمدي said...

cyber
بالظبط ده الي انا قصدي عليه

انا لقيت كتب القمني في حتة كده بس محتاجة اشتراك على موقع فور شيرد ، هو الاشتراك مجاني وسريع الصراحة

ده كتاب الحزب الهاشمي
http://www.4shared.com/file/45481309/ef4fcb67/_____.html?dirPwdVerified=e58bbdb3

Cypher said...

الف شكر على الكتاب يا اشروف وعلى فكرة باقي الكتب اهي على الفورشيرد
http://search.4shared.com/network/search.jsp?searchName=%D8%B3%D9%8A%D8%AF+%D8%A7%D9%84%D9%82%D9%85%D9%86%D9%8A&searchExtention=&submitButton=Rechercher&searchmode=2

Unknown said...

دكتور اشرف
فى تعليق ليك على لورنس العرب
قولت

لما كان في كل بيت في مصر بار والناس لابسة ميني جيب ماشفناش اللي بنشوفه دلوقتي

بلاش الفكرة ديه عشان لو حنحلل اسباب اللى احنا فيه حنلاقيها حاجات كثير
السبب مش عودتنا للدين وبس

السبب اشياء كثيييير

طريقة تطبيقنا للدين من اسباب اللى احنا فيه من تدهور على كل المستويات
لكن مش معنى كدة اننا كنا كويسين لما كان بيحصل كذا

و مش الحل اننا نفكنا من الدين و نضربها بوظة

انا عارف ان مش ده قصدك من الكلام
بس حبيت اوضحلك

أشرف حمدي said...

بدراوي
طبعا ، انا معاك طبعا
معلش لو كلامي اتفهم غلط
انت أكيد عارف انا قصدي ايه

لو حنتكلم بالتفصيل حقول إن الوكسة بتاعتنا هي هالة الهوس الديني الظاهري
ده ليه خطر ؟؟؟
لإنك لو تمعنت قوي في النقطة دي حتلاقي إن سبب الهوس بالتدين ــ الظااااهري ــ هو محاولة للضحك على أنفسنا وإراحة ضمائرنا لإنني بجد مش ملتمين دينيا أبدا
نسبة قليلة جدااااا هي اللي متدينة بجد

انا بجد مندهش من فكرة ربي دقنك تربيك
أو البسي الحجاب الأول وحتلاقي نفسك ملتزمة تلقائيا

عشان كده بقول لا والله الناس زمان كانت بتشرب خمرة وماشية بميني جيب بس كانوا أحسن من بتوع دلوقتي
من بره حجاب ومن جوه قبقاب

ماسمعناش زمان عن حوادث تحرش جنسي جماعي مثلا
اللي أعرفه من كل جيل والدي إن زمان البنت لما كانت لابسة ميني جيب ماكنش حد بيقرب لها ، ولو واحد عاكس الشارع كان يمسح بيه الأرض قبل ما يحاول يلمس حتة من جسمها

دلوقتي أنا اتعرضت لموقف زبالة لواحدة زميلتي في الاوتوبيس المكيف قاعدة جنبي وواحد تحرش بيها وانا وهي بسسسس اللي بنتخانق ونزعق ونضرب :))) أوتوبيس بحاله يا عالم واقف يتفرج والناس تقوللي اقعد حصل خير ماجراش حاجة تصور ؟

ماشفتش واحد بدقن في الاوتوبيس او واحدة بنقاب استنجدت بيهم وقفوا جنبي كان زمان الحيوان ده محبوس دلوقتي وبياخد جزاءه

مش بقول نفكنا من الدين
لكن بقول وبصرخ : نفكنا من المظاهر الفارغة ــ أيووووة الفارغة ــ دلوقتي

احنا سيبنا الدين كله وماسكين في الحجاب والنقاب ؟

نفسي الشيوخ دول بدل ما يقعدوا يكرهونا في بعض يعملوا التالي : ولو انا غلطان صححولي عشان انا لا بفرض رأيي ولا عاوز اللي على مزاجي يمشي

أولا : نفسي اسمع شريط ــ سامع يا فنان مسلم ؟ ـ اسمه أخوك المسيحي بيتكلم عن علاقة المسلم بالمسيحي أو بأي صاحب دين آخر في الإسلام
إزاي تخللي اللي مش من دينك يحترمك ويحترم دينك
مش بالعنف ولا بالسيف ولكن لما يشوف دينك عمل فيك وفي أخلاقك ايه
لما تروح تخبط على جارك المسيحي وتسأل عليه وهو عيان ومعاك كيس جوافة باتنين جنيه والله ما حتكون فيه فتنة طائفية من الأصل

ثانيا : شريط عن الإيتيكيت الاسلامي
حلو الاسم ده ولا حرام ؟
أيوة الايتيكيت الاسلامي
لما تقف لواحدة حامل في اوتوبيس
لما تشوف واحدة ماشية في الشارع شايلة خضار وتساعدها وتوصل لها الطلبات لحد باب العمارة
لما تشوف واحد عجوز مش عارف يعدي الشارع
لما تشوف طفل رابط كلب من رقبته بحبل وبيشنقه في الشارع

ولا إحنا مش فالحين غير في إننا نقبض على اللي فاطرين في نهار رمضان ؟ بالزمة ده اسمه كلام ؟
ما الفاطر يولع بجاز في نار جهنم انت مالك ؟

ماحدش شاف واحد بيدافع عن واحدة في معركة تحرش أو إغتصاب ولما واحد يشوفني مطور شعري مثلا يقعد ينصحني ؟

ده اللي انا بتكلم عنه بالظبط
وشكرا بجد على تعليقك

محمد ناصر الدين الهلالى said...

حبيت بس اسجل اعجابى بتعليقاتك المرة دى كلها كانت جيدة جدا فى تقييمى (فرى انفورماتيف)
واستطعت انك توصل لى فكرة معينة انى لازم اقرا كتير من كل الاطراف قبل محكم على فئة معينة وخصوصا مجال الاقتصاد وتطبيق الشرع ده مجال خطير جدا ، بس واضح ان قعدتك فى روز اليوسف اثرت عليك شوية بتتكلم زيهم تقريبا ، ونصيحة ابعد عن قهوة البورصة لو بتعقد عليها !! بتعيى الواحد!

Unknown said...

انا معاك فى كل كلامك يا دكتور
المشكلة فى حالة من التدين الظاهرى المغشوش
زى مقال دكتور عمرو الشوبكى اللى اديتك لينكه فى البوست اللى فات

مشكلتنا زى ما قال عمرو خالد
متدينين بلا اخلاق
و اخلاقيين بلا تدين

يعنى واحده فكه من الدين وواحد فكه من الأخلاق

احنا عايزين ناس متدينة و بأخلاق
و للأسف مفيش اخلاق خالص
بشوفها

الرسول بيقول بعثت لأتمم مكارم الأخلاق

و للأسف دلوقتى مفيش اى نوع من الأخلاق على اى مستوى

حسبى الله و نعم الوكيل

أشرف حمدي said...

المعلم برعي
شكرا يا باشا ربنا يخليك
هههههههههههههههههههههه
بصراحة انا مابقعدش على البورصة ولا بقعد في روزا ، يادوب أبعت الحاجة بالميل وأروح آخر الشهر أقبض الكام مليم
بقعد على اللي جنبيها الناحية التانية جنب محل الكبدة بجوار مدخل مبنى المطابع :)

أشرف حمدي said...

بدراوي
سعيد إن فكرتي واضحة وإن فيه حد فاهمني
ده نفس كلامي اللي بقوله
لأتمم مكارم الأخلاق
يعني الجاهليين كان عندهم اخلاص اساسا والرسول جه يتممها :)
شفت اللي إحنا فيه بقى ؟

Ahmed Fathy said...

ييييييييييييه
هو ليه اخواننا الاسلاميين معتقدين ان العلمانيين لا يعرفون تاريخ العلمانية؟
كل واحد يبدأ القصة من الأول و مقارنة بين تاريخ الكنيسة و تاريخ الاسلام
ارحمونا بقى .. مش فاهم ليه متخيلين ان الناس كلهم جهلة لا يعقلون شيئا؟
كل واحد منهم حافظ كام كلمة ييجي يدلقهم و خلاص و نصر الله به الاسلام

المهم .. اللي مش عايزين يفهموه اننا مجتمع علماني جدا بس الناس عاملة عبيطة .. يعني لحيته لحد ركبته و لكنه لا يتورع ان ياكل مال النبي .. اليست هذه علمانية؟
تروح مصنع (اسرائيلي ) في مصر هنا لانتاج الملابس الجاهزة كل من يعملون فيه منتقبات و مرتديات للاسدال.. أليست هذه علمانية؟
ألم تقم بفصل القيم الدينية التي تؤمن بها هي أو هو عن عملها و مصدر رزقها؟
ساعتعا تكون هناك حجج جاهزة بقى .. الشيخ فلان قال و فلان أباح و فلان مش عارف ايه .. و هم مش واخدين بالهم ان دي علمانية و لكن بصورة قبيحة

طبعا لا داعي للكلام عن تاريخ الخلافة او بالادق الدول المتتالية من امويين و عباسيين و عثمانيين الذين تلطخت ايديهم بدماء بعضهم البعض .. و بعد كده يقولك الدولة الاسلامية
اسلامية ف عينكم .. الاسلام بريء من هذه الأشكال الضالة

الأخ الي قال انه ينفع يكون هناك علماني مسيحي و علماني يهودي لكن ما ينفعش يكون في علماني مسلم .. هو حضرتك قريت في الاديان دي كويس؟
ألا تعلم ان الدين اليهودي كان دينا تشريعيا و به قوانين و حدود و معاملات و غيره؟
و تبع له في ذلك الدين المسيحي؟
أمال الكنيسة سيطرت على اوضاع اوروبا في عصور الظلام ازاي؟
ألم تكن هناك نصوص تدعم رؤيتها؟

و بعدين احنا معندناش كهنوت .. مين قال كده يا مولانا؟
نحن نظريا لا يوجد لدينا كهنوت ..صح
و لكن عمليا .. السلفيين مقتنعين انه لا يجب ان تاخذ بالفتوى الا من الثقات من العلماء .. تسأل مين الثقات يقولك يكون فيه كذا و كذا و كذا .. طيب لو مافيهوش الكلام ده ..يبقى خلاص احلق له؟
مش عايز ادخل في موضوع انه حيثما وجدت مصلحة الناس فثمة شرع الله بس اخواننا الاسلاميين سواء كانوا وهابيين سلفيين او اخوان مسلمين فاكرين تطبيق الشريعة هم الكام حد الموجودين في القرآن .. غلابة و الله العظيم
عمري ما شفت واحد منهم بيتكلم عن أي موضوع مهم او له علاقة بمعايش الناس و خصوصا الوهابيين

أحلى حاجة كمان انهم غلابة جدا .. يعني ممكن الحكومة المصرية (و هي علمانية نظريا) تلهيهم في مادة من مواد الدستور أو تطبق عقوبة ضد المفطرين في نهار رمضان من أجل ذر الرماد في العيون .. و هم طبعا يهللوا و يطبلوا

على العموم .. موضوع رائع و بالتوفيق

مواطن مصري said...

انا شايف ان نفس ظروف اوربا و تحررها من سلطة الكنيسة هي نفس الظروف الي بتعيشها في مصر
و قريبا سوف تطبق العلمانية و يتم فصل السلطات

الدينية عن الدولة

كل سنة و انت طيب

سقراط said...

السلام عليكم ورحمة الله
استاذ اشرف
اولا كل سنة وانت طيبة
وعيد سعيد عليك
اما فيما يخص التدوينة
فانا متفق معاك فى رأيك الى حد كبير
وشايف ان الموضوع أكبر شوية من دايرة العلمانية
يعني انا فى اعتقادي ان دي الطريقة اللى احنا بنبني بيها رأينا بشكل عام
بناخد بالظاهر
او بأول لينك يطلع لنا من جوجل
علشان كده فى الغالب بيكون رأينا ده فى غاية السطحية
نفس الوصف ده ((علماني)) كنت بسمعه على الدكتور عبد الوهاب المسيري الله يرحمه
وسعات كتير كان بيتم تعريف الدكتور المسيري على انه متخصص فى الاسرائيليات
مع العلم انه دكتور أدب انجليزي
كل ده لمجرد اقتران اسمه بمشروعه البحثي الكبير عن اليهود واليهودية والصهيونية
فى ناس بتهوي البحث عن قشور المعلومات
وبتكون رأيها على أساس من القشور دي
علشان كده بيبقي غاية فى الضعف
حاجة كده زي التراب
مصيره فى الاخر بين خصل مكنسة
..
..
كل سنة وانت طيب كمان مرة
دمت بكل سعادة

عبدالرحمن نجم الدين said...

أشرف، وحياتك ما تاخدش الموضوع قفش.. مبدئيًا القمنى دا انا مذاكره كويس من سنين طويلة أيام ما كان بيكتب فى روزا
وبعدين انت تعبت نفسك الأول وحاولت تقرا المقال اللى انا ارسلتهولك
؟؟
وبارجع اقولك تانى: أنا قريتله مقالات كتيرة جدًا ومذاكره كويس
يعنى ثقافتى مش سمعية زى مانت بتتهمنى
لو سمحت اقرا المقال بتاع الدكتور ابراهيم عوض وعلى الأقل ح تعرف حاجات كتير عن سأسأ القمنى ما كنتش تعرفها، وح تفيدك قبل ما تقراله
وبارجع اقولك الدكتور ابراهيم عوض دا عالم بجد، وعارف كويس هو بيقول ايه وبانصك تقراله على ضمانتى

عبدالرحمن نجم الدين said...

معلش يا أشروف.. ما بصيتش على تعليقك اللى تحت.. والنبى وحياة والدك اقرا كتاب الحزب الهاشمى الأول، وبعد كده اقرا الرد عليه فى المقال اللى انا بعتهولك
وبارجع اقولك على حاجة مهمة جدًا: أنا كنت من مؤيدى القمنى وبعدين عرفت أصله وكرهته.. لإنى ببساطة انخدعت فيه

عبدالرحمن نجم الدين said...

معلش يا أشرف ح اقرفك شوية معايا
مش ح تعرف تحكم على كلام القمنى لوحدك.. لازم تقرا للقمنى الأول وبعدين تقرا لحد تانى بيرد عليه.. عارف ليه؟؟ لإن القمنى ببساطة شديدة بيجيب روايات من التراث وبعدين بيحرفها، وروايات تانية ويشيل منها حتت وهكذا.. ودا عرفته من كذا مقال بيرد على كتاباته وفهمنى القمنى شغال ازاى
الناس اللى بترد عليه مش بدقون وجلاليب زى مانت متصور طبعًا.. بيكونوا كتاب عاديين وأساتذة جامعة وما شابه
ومش ح تعرف تحكم عليه لوحدك لإنه لازم يكون معاك ناس متخصصين فى التاريخ الإسلامى عشان يكشفوا أكاذيبه.. أيوة.. لإنك مش متخصص فى التاريخ الإسلامى، فحيث كده المتخصص ح يساعدك فى الفهم.. ما علينا، اقرا يا عم الكتب اللى تعجبك للقمنى بس والنبى اقرا للناس اللى بترد عليه
وعلى فكرة انا زعلان منك.. إنت عرفت منين انى ما قريتش للقمنى وبافتى عليه لمجرد ان حد قاللى: القمنى دا وحش
؟؟

فنان مسلم said...

انا اسف جداً يا أشروف لو اسلوبي كان جاف
مأقصدش أي اهانة والله ,

كل سنة وانت طيب
ربنا يعيد عليكم الايام بكل خير

أشرف حمدي said...

مع الإعتذار لجميع التعليقات ، أنا لا اتجاهل أي تعليق أبدا وأقرأه ربما أكثر من مرة ، فعدم ردي ليس تجاهلا

فقط تذكرت نقطة مهمة أردت إضافتها
حينما أتحدث عن النقاب كتمييز عنصري لفئة معينة فأنا أيضا اتحدث عن الصليب العملاق ووشم الصليب خاصة حينما يكون ظاهرا فوق ظهر اليد مثلا

لماذا التمييز ؟
هناك فرق بين ان أفتخر بديني وبين أن أمشي في الشارع أصرخ لأعلى صوت : اما مسلم أو أنا مسيحي يا ولاد ستين في سبعين
انا اعتبرها هكذا

أنا مع المواطنة
الولاد للوطن مهم جدا ، وهو لا يتعارض أبدا مع الولاء للدين
الأديان كثيرة ولكن الوطن واحد

هناك رغبة استعراض لا أجد لها أي داعي في الحقيقة
من السخف ان تجد مسجد امام كنيسة ، الشيخ يؤذن في الميكروفونات بأعلى صوت ممكن والكنيسة تدق أجراسها بعنف مبالغ فيه وكأنها حرب مين يكسب ومن صوته الأعلى

هناك مدرسة أعرفها في المهندسين امامها كنيسة ، صديقي الساكن هناك يخبرني أنه وقت الصلاة في الكنيسة يوم الأحد تجبر المدرسة تلاميذها على تلاوة القرآن بصوت عالي جدا لتغلوش على من في الكنيسة

هل هذا دين ؟
المشكلة لا في الاسلام ولا في المسيحية وإنما في المصريين أنفسهم

هل هناك تعصب مسيحي ؟
بالتأكيد
كما أن هناك تعصب اسلامي كبير أيضا

ذكريا بطرس بالنسبة لي لا يفرق عن جماعة التكفير والهجرة
نفس التعصب والغباء

Che Ahmad said...

دكتور اشرف
تسلم ايدك
متفق معاك جدا وردي بس لمتابعه باقي الردود علي الايميل

كمان احمد فتحي
رد رائع لغاية فعلا وفي الجول
ومتفق معاك في منطقة الكهنوت في الاسلام
فعلا نظريا لا كهنوت ولكن عمليا فقد اختزلنا ايه " اسألوا اهل الذكر إن كنتم لا تعلمون " لتكون (( اسألوا اهل الذكر دايما ولا تفكرون ))للأسف

تحياتي ومتابع دائما

Anonymous said...

sayed alkemny
:7r00b dawlet alrasool

http://www.answersaboutfaith.com/arabic/islameyat/sayed_al_kemni/7oroub_dawlet_alrasoul/7oroub_dawlet_alrasoul.htm

Unknown said...

http://www.answersaboutfaith.com/arabic/islameyat/sayed_al_kemni/alnaskh_fel_wa7i/alnaskh_fel_wa7i.htm

Unknown said...

sayd alkmny
http://www.answersaboutfaith.com/arabic/islameyat/sayed_al_kemni/hashmi/hashmi.htm

Unknown said...

sayed alkemny:
http://www.answersaboutfaith.com/arabic/islameyat/sayed_al_kemni/shokran_ben_laden/shokran_ben_laden.htm

Unknown said...
This comment has been removed by the author.
Yasmine Madkour said...

الغريب جدا إن الناس بتضيق الدين ..
الدين أرحب و أسمح من إنه يتصنف .. مفيش دين علماني و لا دين غير علماني ..
الرسول صلي الله عليه و سلم قال أنتم أعلم بشؤون دنياكم ..
و بعد ممات الرسول لما كانوا بيختاروا من سيتولي أمور الدوله كانت المناقشات ساخنه و سياسيه من الدرجه الأولي و مكنش حد بيقول نختار فلان عشان كان أقرب للرسول و لا فلان عشان ناسب الرسول ..
يعني العلمانيه شيء مش غلط و لا اتهام .. يعني مش هنستخدم "خير الأمور الوسط" و إحنا بندي جرعة دوا لمريض مثلا !!
الناس مش عايزه تفهم يعني ايه علماني .. بالرغم من ان حكومتنا علمانيه لكن بتتظاهر بتطبيق الدين عشان يقولوا عليها بقت بتاعة ربنا . زي موضوع الفاطرين ف نهار رمضان !!!
فين الدين من ده كله بقي إن شاء الله!!!

بهدوء said...

و انتا ليه منشرتش التعليق يعنى و تفضحنى زى ما فضحت واحد فى تعليقات البوست اللى فات.

عشان تعرف انك مش محايد

كنت نشرت التعليق و خليت الناس هى اللى تحكم مش انتا

انتا دلوقت خليت الناس تاخد فكرة إن بهدوء دخل شتم و بس
قال ايه تانى
محدش عرف .. و محدش حيعرف عشان انتا مش حتنشر التعليق و انا كنت متأكد إنك مش حتنشرة .. دلوقتى بقى مين اللى مستفز و مين اللى بيشتم بردك عليا بتهكم

و بعدين لو على فتوى الكرسى يا اشرف
حقك عليا ,,, ماخدناش بالنا و الله من التعليقات اللى انت قلت عليها

بهدوء said...

ماشاء الله
ما التعليق اتنشر اهو

و منشرتش التعليق اللى قبلة ليه ؟؟

مش بقولك مش حتنشرة

و بعدين فين بقا الشتمية لو فعلا انا شتمتك ..؟؟
انا بقا نفسى تنشر التعليق عشان اعرف انا شتمتك قولتلك ايه ؟؟

Anonymous said...

سلام عليكم يا دكتور أشرف
معجب جدا بالنقاشات البناءة مع تحفظي علي بعض الأراء

بخصوص أمنيتك بوجود شريط اسلامي لتعليم السلوكيات
فللشيخ وجدي غنيم سلسلة ممتازة اسمها سلوك المسلم

و تتناول سلوك المسلم كطالب , كمدرس , كفلاح و غيره

asma ali said...

زى ما تعودت منك يا اشرووووف
بتاخد الكلام من على طرف لساني :)

بوست جميل جداااااااا ورائع وحقيقي مليون المية .. احنا عندنا خلط للامور واغلبية الناس تتكلم عن جهل .. وللاسف ما بقاش فى حد متقبل الاختلاف فى الرأى وبيحملوا الامور اكثر مما تحتمل .. والاكثرية يحملوا الدين فوق ظهورهم يتكلموا عن حريتهم فى ارتداء النقاب ( رغم انه نقطة خلاف بين المشايخ اصلا ولا يصر عليه سوى السلفية )وفى نفس الوقت يرفضوا ان واحدة تلبس بكينى مش حرة دى كمان ؟؟ ولا هى الحرية بقت حسب الدين عشان تكمل
دعوا الخلق للخالق بقى .. بمناسبة موضوع ان الاسلام شريعة واسعة ومنهج للحياة فعلى عينى وراسي بس المجتمعات الاسلامية لم تقدم جديد ممكن كانت ناجحة فيما مضى لكن مع تطورات الحياة فالاصح فصل الدين عن الدولة وعن الحياة اليومية وكمان المجتمعات اللى طبقت الشريعة الاسلامية لم تحقق تقدما يذكر عشان نجرى احنا كمان ويبقى مجتمعنا زيهم .. فالدين شئ خاص جدا بين العبد وربه ماحدش له حق انه يتدخل فيه او يقيم عليه دعوة الحسبة او يقيم عليه الحد لمجرد الاختلاف معه فى الرأى.. ..احنا مجتمع يعانى من عدم التجانس بين مختلف طبقاته الفكرية وعدم احترام الاخر فى الوقت اللى بيطلب فيه احترامك

تعرف يا اشرف انت قلتها كلمة وانا معاك فيها مصر بقى فيها سعاااااااااار دينى :)
وخلى بالك احسن يقيموا عليك الحد
تحياتى

Counter