Total Pageviews

Monday, February 12, 2007

قولة آه


أنا اللي بلادي منهوبة
ومنكوبة .. ومركوبة
ولو قالت لابد أعيش
تعيش العمر مصلوبة
***
وأقول برضه أنا مالي
أنا عايش كده ف حالي
أنا واطي .. وجنب الحيط
ولا أتمنيت أكون عالي
***
أنا قلبي بيتحسّر
ومن حلمي بيتأثّر
لأن الحلم لو يفضل
سجين القلب يتكسّر
***
ومن حلمي أنا خايف
أقول أعمى وأنا شايف
وقلمي لما يتكلم
يقول برضه كلام هايف
***
كتمت الآها لو تظهر
لقيت نفسي مانيش حقدر
وقلت الآه بدون مقصد
لقيت الأمن والعسكر
***
وقلت أنشك في لساني
وف عنيّا وفي وداني
أنا راضي أعيش أخرس
ولا شوف العذاب تاني

14 comments:

Dr. Tantawy said...

de bta3tak ya za3em ? enta elly katebha ?? gamda awy ya ashraf :) el she3r a7la mn el rasm kaman :))

Go on .. w ekteb tany .. i am waiting for it ..

Anonymous said...

منذ أن بدأت فى قراءة المدونات و انا متابع شغوف لمدونتك ، و كل يوم يزداد إعجابى بمحتواها الثرى.
أرجد لك المزيد من التوفيق و أسجل إعجابى الشديد بالقصيدة التى عبرت بصدق عن الكثير مما بداخلنا
و نرجو ان تستمر فى إبداعاتك المتنوعة.

ابراهيم - الاسكندرية
من قلب مصر المحروسة (المخروسة)

أشرف حمدي said...

دكتور طنطاوي
أيوة يا مان , انا اللي كاتبها علي مقهاي المفضل :)
مش عارف افرح ولا أزعل من حكاية أني بكتب شعر أحسن من الكاريكاتير لأني بحاول أكون رسام أحسن
همممممم
يبقى الحل ممكن يكون أني أكتب أوحش :)
ههههههههه
ألف شكر علي رأيك وتشريفك المدونة

ابراهيم
شرفت المدونة وأهلا بيك
وأشكرك بشدة علي رأيك
أعجبتني جدا كلمة مصر المخروسة هذه
تحياتي

مراقب مصري said...

أنا متابع مدونتك من زمان بس باقرا وما بعلقش بس المرة دي مقدرتش أمسك نفسي لأن الرباعيات دي تحفة وإحساسها عالي جدا لدرجة إن جسمي قشعر وأنا بقرا الرباعية اللي بتقول
كتمت الآها لو تظهر
لقيت نفسي مانيش حقدر
وقلت الآه بدون مقصد
لقيت الأمن والعسكر

إشطة جدا ومستوى بجد مميز وإن كان أجمل ما فيه التلقائية والسلاسة

مراقب مصري said...

عاوز بس أرد على ردك على طنطاوي
الرسمة تحفة وأسلوبك في الكاريكاتير مش موجود في مصر خالص والاستايل بتاعك في الرسم ممكن يكون بينتج لنا مش بس كاريكاتير مميز لكن كارتون مذهل سواء كوميكس أو رسوم متحركة

معرفش إنت بتلعب كوميكس والا لأ وفكرت في الرسوم المتحركة ولا لأ

بس إشطة يا مان الله ينور
شعر جميل ورسم تحفة وكمان بتغني (طبعا أغنية البنات كانت مسخرة) ههههههه إيه دا يا اخواتي... صلاح جاهين يتجسد من جديد؟

:D

حــمــيدو said...

ايه المواهب المدفوسه دي يا اشروف

بجد رائع يا برنس

فينك من زمان

مبتظهرش علي المازنجر يعني

تحياتي

ابن مرّ said...

مش عارف أقول ايه؟ يا ترى هي المدونة هي اللي عملت كده ولا الحب؟ بس كل مرة بزورك فيها بحس انك بتتطور!!!أشرف صديقي العزيز وحبيبي بشوف فيه الانسان اللي في أعماقه هوا اللي بيسيطر وبيبقى من بره الانسان اللي بيقترب من حد التخلص من معظم أخطاؤه الكبيرة وعقده تعرف أنا عارف ايه السبب!!!ابس الأهم من كل ده اني مبسوط قوي قوي قوي ليك وأكتر من كده حاسس باني أنا اللي بتطور والأهم من كل ده اني بحس بالأمل وبحس ان في ناس كتير ماشية ضد التيار العام ناحية الأحسن !عموما يا أشرف أنا بحبك زي ما كنت وزي ماعمال تبقى أحسن في كل حاجة

"القصيدة دي أحسن من قصايد قديمة ليك وفيها نفس الحس الثوري الجميل والوزن اللي بيوصل للقلب"

مسرح الغلابا said...

lazeeez

احمد عطالله said...

خالى العزيز اشرف بيه حمدى
قبلت مصر امبارح بالصدفه
وبالصدفه سألتنى عليك
قولتلها ان ربنا كرمك والحمد لله وشغال ف الدستور والكاريكاتيييييييييييييير
والطب
والشعر
والشيشه
والصحافه
والاغانى ع البلوجات
..................
بس هى زعلانه منك
بتقولك خف ياحبيبى ياأشرف
فيه ناس جنبك عايزه تاكل عيش
اخوك الصغير احمد عطاالله يعيش ازاى دلوقتى
ياخد شنطته ويروح بلدهم
عشان مابيعرفش يرسم .............
............عموما
انا فرحان بيك انت والحاج عبدالله وعبداللله والابن الضال مخلوف
ومزيد من النجاحات
المسمره المتوهجه


عطاالله

احمد عطالله said...

اشرف باشا حمدى
ترسم قولنا ماشى
تكتب صحافه..قولنا خليه ياكل عيش
تغنى..قولنا هى جت عليك
تدرس طب..قولنا يمكن تنفعنا
انما ياأشرف تكتب شعر
نروح احنا يعنى ولا ايه
لا ياحبيبى
لا
لا
ربنا يزيدك كمان وكمان

تلميزك النونو عطاالله

Anonymous said...

أيييييييييي
وجعتنييييييييي
جامده يا مان..
انت خايف يتقال عليك شاعر اكتر من رسام؟؟؟
ياسيدى ارسم واكتب وخد راحتك عالاخر... المهم انك تعمل
وكله لازم يطلع

أشرف حمدي said...

عطالله حبيب قلبي
ميرسي جدا تشريفك مدونتي , واحشني جدا جدا جدا بجد يا مان
بس زعلان منك عشان غلاف كتابك الأخير مش ولابد وانت عارف اني عمري ما كنت حتأخر عليك في الغلاف. مبروك الأشعار والدواوين والكتب .

ابن مر
حبيب قلبي واحشني , نفسي نرجع نذاكر مع بعض تاني انت وأمير بس خلاص الكلية خلصت للأسف 

وينكي
أيوة كده خليكي منورة المدونة علي طول 
تحياتي

Amira said...

جميله قوي

بقالي وقت ضايفاك في ال
favorites

بس كل شويه انسى اقرا تاني

قريت البوست اللي فات المره اللي فاتت و عجبني

المهم حتصفح في مدونتك و اشوف حكايتك
:)
بالمناسبه
انت دكتور أسنان؟

تحياتي ليك
و شكرا انك عرفتني على مدونتك

Anonymous said...

كل سنه وانتوا طيبين جميعا
انا عامله حفله على البلوج عندى
تعالوا وهاتوا معاكو الفاكهه والحاجه الساقعه

Counter