Total Pageviews

Thursday, May 03, 2007

التاج التاج التاج


مررت لي وينكي هذا التاج العجيب
عموما لا بأس , علي الأقل هذا يسمح لي بتدبيس آخرين وهي فرصة لن أتركها تفلت من يدي أبدا !


هل كنت طالب شاطر في المدرسة ؟
طبعا ! كنت دائما الأول علي مدرستي وكانت تتم محاسبتي قياسا بالدرجة النهائية , يعني لو ناقص لي درجة على النهائية يبقى لوم وعتاب , درجتين يبقى توبيخ , تلاتة يبقى عقاب وهكذا ! استمر هذا طوال المرحلتين الإبتدائية والإعدادية وبعدها كانت صدمة الثانوي فقد التحقت بمدرسة متفوقين ( تقبل من 95 % خارج مربعها السكني ) فلم يظهر تفوقي وسطهم لأنهم كانوا مستفزين للغاية ( دحيحة دحيحة يعني ) , حصلت علي مجموع 94 % ودخلت بيها أسنان بمعجزة ( نفس مجموع أسنان بالنص درجة ) , عموما أنا لم أعرف الدروس الخصوصية في حياتي ! صدقوا بقى ولا متصدقوش بس هي الحقيقة والله العظيم !

أحب مادة \ أكره مادة ؟
كنت أحب العلوم والرياضيات وطبعا قبل كل حاجة الرسم ( لو اعتبرناها مادة ) , وكنت أكره الدين للأسف لأن المدرسين كانوا خريجي المعهد العالي لفنون التعذيب ( ضرب وتلطيش وأقلام وكله كله ) وأكره اللغة العربية لأنها كانت من أسخف الأشياء التي رأيتها في حياتي , مواطن الجمال مثلا هي مجرد أذواق ولا يمكن وضع قواعد محددة للبلاغة ومواطن الجمال لأنها شيء يحس ولا يصنع , بالله عليكم ما هو موطن الجمال في ( مكر مفر مقبل مدبر معا .. كجلمود صخر حطه السيل من عل ) ؟ أو ( تفشحط الفشحاط في غثق الدجى ) ؟ طبعا كنت أقرأ الأدب بنهم شنيع وقتها وأهمل دروس اللغة العربية , قرأت كل روايات السحار ويوسف إدريس ومصطفى محمود وبعض أعمال محمد عبد الحليم عبد الله وطبعا دكتور أحمد خالد توفيق وأنا في المرحلة الثانوية !

كنت عاوز تطلع إيه وأنت صغير ؟
عندي تسجيل نادر لي وأنا صغير جدا ( ثلاث سنوات أو أربعة ) وسألوني نفسك تطلع إيه لما تكبر ؟
قلت لهم : غواص ؟
يمكن عشان كنت شفت فيلم الفك المفترس ودخلت دماغي قوي حكاية الزعانف اللي بيلبسها الغواصين في رجليهم ! فكنت بلبس شراب طويل وأدلدله من قدام ! آه والله.
أمرر التاج إلي كل اللي عندي في اللستة برده زي وينكي ! مافيش حد أغلس من حد بقى !

10 comments:

نهى منير said...

ماهو طبيعى انك تكون متفوق
امال دخلت طب اسنان ازاى؟؟
اجاباتك كانت متوقعة

بـاى

Anonymous said...

اخص عليك يا أشرف؟؟؟
هو انا غلسه يعنى؟؟؟
ماشي ياعم
انا مت من الضحك بجد على موضوع الغواص اللى انت كان نفسك تكونه
ودلدلة الشراب
ماشي ياعم

yamen said...

هاهاهاهاهاهاهاها

كان بيلبس شراب ويدلده من قدام..

هاهاهاهاهاها
.....
.....
.....
.....

زيي بالظبط..

:)

بس انا بقه كنت بانام علي بطني علي الارض ..

وابلبط يا معلم

تحياتي

أشرف حمدي said...

وينكي
لا طبعا ما اقصدش :) أنا بهزر
ماتزعليش
هههههههه

دكتور يامن
شفت يا عم , أهو في الآخر ضحكوا علينا ودخلنا احنا الاتنين أسنان وضاع حلم الغوص إلى الأبد
عموما أحنا كنا في الكلية بنغوض في الكتب والملازم لحد ما غرقنا
هههههههه
تحياتي

Yasser Hussein said...

عزيزى أشرف
حلوة حكاية الغواص دي
أنا كمان كنت باللعب نفس اللعبة
بس مكنتش بالبس شراب وادلدله
كنت باللبس الشبشب بالعكس
هاهاهاههه

خالص تحياتي

أشرف حمدي said...

الفنان ياسر حسين
المبدع طول عمره مبدع طبعا
هههههههه
الظاهر الناس كلها كانت عاوزة تبقى غواصين وأنا ماعرفش

الصقر الجريح said...

انا بقى كان نفسى اطلع طيار بس دخلت حاجه ملهاش علاقه خالص بس لسه عندى امل ان انا ابقى كده

البتاع said...

انا بقى كان نفسى ابقى مدرسة عشان امسك اهم سلاحين فى تصورى
العصاية ...والقلم الاحمر
امضى شخبطة
واضرب العيال
واوقف حد عليهم يجيب لى اسم اللى يتنفس

جو سادى جمييييل كنت بحبه
رغم انى لما جربته على مصغر لما كبرت لقيته انه قطعة من العذااااب

Jaqueline Sales said...

I do not understand what he postou here for account of the differences of languages that in separate them, therefore I am Brazilian and you he is Egyptian. But if we will be made use to try entendero that we speak, certainly we will be able to discover interesting things on our countries, customs and traditions, ale'm of that we could be friends. I wait its visit!



Je ne comprends pas ce qui a posté ici pour le compte des différences d'idiomes qui dans les séparent, donc suis brésilien et tu c'est égyptien. Mais nous nous soyons disposés à d'essayer entendero que faire faillite, certainement pourrons découvrir des choses intéressantes sur nos pays, habitudes et traditions, ale'm dont nous pourrons être des amis. J'attends sa visite !

أُكتب بالرصاص said...

الحاج اشرف

عندي سؤال

غواص؟؟
اشمعني.؟

انا كنت عايز اطلع
دكتور امراض نسا
مش عارف ليه؟


بس بيني وبينك


انا استمتعت بحوارك قوي

Counter