Total Pageviews

Sunday, May 20, 2007

ملكة عبط مصر


ملكة جمال مصر مش مصرية
هذا هو انطباعي الأول عنها بمجرد أن رأيت صورتها ثم تأكد لي ذلك حينما علمت أن والدتها أمريكية
للمرة الأولى لن ألتزم بالموضوعية هنا وسأكتب مسترسلا كيفما اتفق
يعني ايه ملكة جمال مصر ؟
بلا خيبة .. بلا قرف .. في ظل حاجتنا الملحة لرغيف عيش وشربة ماء نظيفة وكوب لبن حقيقي مش سيراميك تقام احتفالات النخاسة هذه .. ولصالح من ؟ للحيتان الكبار طبعا
أب طلع يزعق ويصوت : الحقوا كانت فيه حاجات غير أخلاقية في المسابقة .
مشكلته الوحيدة أن صور ابنته بالبيكيني تم نشرها في الصحف والمجلات
يعني تقلع آه إنما صورتها تتنشر أهو هو ده اللي لأ لأ لأ يا قللات الأدب
الراجل صارف علي بنته ثلاثين ألف جنيه في أقل من أربعة أشهر لزوم الوجاهة وايجار السيارة و و و .. يا راجل روح علم بنتك ولا دخلها جامعة نضيفة أو حتها جهزها بالفلوس دي بدل المسخرة والقرف
هو ايه اللي حصل في المجتمع ؟
كان جمال عبد الناصر متابعا جيدا للصحافة وقد فوجيء يوما بمسابقة في احدى المجلات عن أجمل تسبيلة عين , وتم نشر عشرات الصور لشباب مسهتنين كل واحد فيهم عامل فيها روميو فأمر بجمعهم وحلق رأسهم زيرو وارسالهم الي الجبهة فورا
طبعا خيالي المريض يصور لي ما حدث لهم في الجبهة من فحول الجنود المصريين المكبوتين
علي رأي حسن حسني في فيلم سقوط بغداد
هي البلد ناقصة محن ؟

20 comments:

Anonymous said...

يااشرف يعني هي جت علي ملكه جمال مصر
ماهم عملوا ميستر ايجبت دلوقتي بقم بيعملوا مسابقه لكل حاجه
انا بس اللي استوقفني ان ازاي يتوجوا بنت امها و ابوها الاتنين مش مصريين من قله البنات اللي ابوهم و امهم مصريين يعني
هي البنت مش بطاله و تقاطيعها لطيفه بس فكره انها تتوج ملكه جمال مصر و هي مش عارفه تتكلم عربي فكره غريبه صح؟

أشرف حمدي said...

عندك حق طبعا يا أجندا
حاجة مستفزة جدا
حتى لو انا مش مؤيد للمسابقات اللي من النوع ده فعلى الأقل يعني اللي تفوز تبقى مصرية
وياريت كمان مصرية بسيطة من حى شعبي
بنت بلد أصيلة مش واحدة مالهاش أصل

ملكة جمال مصر مش بتتكلم عربي ؟
يالسخرية القدر
دي مصيبة

semsem said...

يا حماعه مش كده اكيد هتتعلم عربى بما انه اصبح ملكه جمال مصر
اما يخلو اللغه الرسميه للبلد الانجليزى على شان خاطرى عيون الاموره
بلا قله ادب
دى حاجه تفقع المرارة

Bella said...

بالعكس بقى

انا شايفة ان ده التطور الطبيعي للحاجة الساقعة اللى احنا عايشين فيها

واعتراف صريح ورمسي بأننا الولاية مااعرفش كام من الولايات الامريكية
وبعدين كونها لاتتكلم عربي ايه المشكلة فيه !!!

هو يعني المذيعات اللى قارفينا بطلعتهم البهية في التليفزيون الحكومي والقنوات الفضائية المصرية بيعرفوا يتكلموا عربي اصلا ولا حتى بينطقوا عامية مصرية بطريقة كويسة

هي جت على دي

كفاية علينا مسابقة مستر ايجيبت اسم الله عليه

مايحدث في مصر الآن من نكد الدنيا علينا
الشعوب تستحق حكامها فعلا

SomeOne said...

مش حلوة
انا شايفها مش حلوة
بجد نفسي أعرف معايير الاختيار
نفسي حد يقولي معايير الاختيار هي
1
2
3

:)

أحمــــــــدبــــــــــلال said...

احلى حاجة زى ماقلت ان الراجل زعلان ان بنته اتصورت بالبكينى

هو فى حد فى مصر مايعرفش أن جزء من المسابقة اللبس البكينى

بصراحة حاجة استهبال و اللى فهمته من البرامج اللى ناقشت الموضوع ده
أن الاعتراض مش علشان البنت نص مصرية
و لكن لأن الهدايا اللى كانوا هايخدوها البنات من الشركات الراعية ماتوزعتش و مطلعوش بحاجة من المولد ده

و الاجمل مسابقة سيد مصر ميستر أيجيبت
أهم جزء فيها هو عرض العيال عريانين بالشورتات
ضحكت جداً فى العرض ده و عيونهم بتحمل أكثر نظرة غبية و بلا هدف شفتها فى حياتى

و اللى أعترضوا من الاهالى ماحدش فيهم كان هايتكلم لو بناتهم هم اللى كسبوا و لا أخدوا قرشين


يلا خلى اللى تقلع تقلع مش أحنا المهم اللى هانتفرج فى الاخر و لا أيه ؟

البتاع said...

عارف؟
انا اول مرة اشوفها
رغم اللى اتقال عن مشاكل وبتاع بس مهتمتش اشوفها

سيبك انت من موضوع ان دى رفاهية الرفاهية
وان البلد لازم تبقى حلوة اصلا عشان تحط مكياج
متحطوش على الارف اللى فيها
يعنى فقر وديون وتعليم زبالة واكل زبالة
وميس ايجيبت
متلقش خالص....دول حتى يطلعو عندهم امراض الدنيا :-)
!!!!!!!!!

بس انا بحس زى ماقلت قبل
كده
ان ميس ايجيبت
المفروض يبقى اسمها
miss sluts
لا مؤاخذة يعنى
لان كلهم ياإما خارجين من بيوت دعارة ياداخلينها جديد
..............
وعلى رأى عم احمد رجب

هو ليه مسابقة ميس ايجيبت -
مفيهاش بنات حلوين؟؟

لان البنات الحلوين مبيقدموش-
فيها
..................
عنده حق والله
كفاية نفيسة دى بتاعت السنة اللى فاتت

تحياتى
وميرسى على انى شفت المذة اللى رافعة.....علم مصر ;-)

أشرف حمدي said...

أحمد بلال
سمعت آخر نكتة من تأليفي ؟
بيقولك ملكة جمال مصر السنادي كانت جاية مع المعونة

البتاع
أشكرك علي رأيك الجريء .. عندك حق طبعا
تحياتي

Dalia said...

معاك حق يا اشرف
يلا سخريه القدر
مش مصريه

انا برضه سمعت فى التليفزيون فى برنامج الحقيقه على دريم ام واحده من المتسابقات بتشتكى من الى كان بيحصل حاجه قله ادب

طيب ليه وديت بنتها من الاول

ولا الاب اللى بيشتكى عشان صور بنته طلعت فى الجرايد .. تقلع اه تتنشر صورها فى الجرايد لا

بجد بجد حاجه تنرفز
:@:@

3aziz 3eni said...

يعنى ايه ملكة جمال مصر؟

هو يعنى خلاص جمعوا كل بنات مصر علشان يعرفوا انها اجمل واحدة
ولا الجمال عبارة عن وش جميل وخلاص؟
ما انا ممكن اعمل عملية تجميل وابقى اجمل من اى انسان ومن جوايا مليان قرف
يا اخى الناس مايعرفوش غير المظاهر اما الجوهر كله زباله ونتانة

Yasser Hussein said...

بالرغم اني واخد على خاطري
لأنك معلقتش عندي في المدونة من يوم ما عملتها غير مرة واحدة
وبصراحة مكنتش ناوي أعلق عندك خالص
بس فعلاً جمال الموضوعين دول أجبرني على التعليق
إختيار موفق حقيقي للموضوعات
ومعالجة جميلة
أنا شخصياً لا اشجع مسابقات ملكات الجمال في مصر
لأن بلدنا فيها حاجات كتير محتاجة للانتباه إليها والصرف عليها
أكثر من الاحتفاليات المستوردة دي
كان ابوها بدل ما يصرف المبلغ ده على الكلام الفارغ ده
كان اتبرع بيهم لمسنشفى السرطان
ولا هو عايز يضرب مثال حي
للتعاون المصري الامريكي المشترك في انتاج ملكات الجمال

خالص تحياتي

أحمد said...

هو انى لى تعليق بسيط على الموقف بتاع عبد الناصر
الذي قرأته في اكثر من مكان والكل يحكية بفخر شديد

هو ليه الناس شايفه ان دى حاجة كويسة ؟؟

يعنى لما اخد شاب واحلق له زيرو وبعدين ابعته للجبهة .. دى المفروض انها حاجة كويسة
قانونية مثلا

أشرف حمدي said...

أحمد
أوة طبعا ده تصرف عبقري
لما البلد تبقى في حالة حرب .. وبتحاول تقوم وتصلب طولها وييجي شوية عيال سهتانين بيتسابقوا مين فيهم تسبيلته عسولة أكتر من التاني
يبقى لازم يتعمل فيهم كده
أنا لو مكان عبد الناصر كنت اعدمتهم
تحياتي

Michel Hanna said...

أنا مع إبليس طبعا في موضوع عبد الناصر ده
أولا ده تصرف ديكتاتوري
المفروض اننا دولة تحكمنا قوانين، مادام ما فيش نص في القانون يجرم اللي عمله الشباب دول يبقى ما فيش أي سبب بدعو رئيس الدولة انه يسيب مسئوليانه ويعمل عملة زي دي.

أحمد said...

متخلينش افقد اعصابي
والنبي يا عم اشرف

وهو شوية العيال السهتانة هى اللى خربت البلد وخلتها تخسر الحرب
ولا العساكر الجامدة اللى مارسوا القهر والظلم و في الاخر خربوها وقعدوا على تلها في 67

بدل ما عبد الناصر كان عمال يفلي الجرايد يدور على سور العيال السهتانة
كان الاحسن يروح يتنيل على عينه وعلى عين اللى جابوه يشوف الحرامية اللى حواليه، ويعمل نظام ديموقراطى حقيقي
او على الاقل نظام يكفل العدالة لمواطنيه

أشرف حمدي said...

أحمد باشا
لا تفقد أعصابك ولا حاجة .. شاكلك ناوي تضربني ع المدونة
هههههههه
يمكن يكون جمال عبد الناصر فعلا أخطأ كتير بس ما تنكرش انه كان بيحب مصر أكتر من غيره
عموما هذا ليس موضوعنا
تحياتي لك

Anonymous said...

لا تعليق
حاجه تنرفز بجد
انا باكره المسابقات دى من كل قلبى
لأنها اكبر دليل على امتهان المرأه
وانها بتعامل معاملة الجوارى
كمان هما شافوا كل بنات مصر عشان يقولوا ان البتاعه دى احلى واحده فيهم
وياترى اشمعنى دى بالذات
ولا ماما امريكا وراها؟؟؟
وعجبى

Doba said...

انت هايل حقيقى
تحياتى ليك ولاسلوبك السردى الفظيع

سلامى........هبة

مشربية said...

و اية اللي مصري في البلد
و زي ما قال خالد النبوي في فيلم عمر 2000 "عايز اطلع فوق الهرم و اقول ان دة الحاجة الوحيدة اللي مصري"
الف شكر يا عبقري علي الموضوع

koukawy said...

اه انا لما عرفت الموضوع ده مفهمتش
زي برضو لما اتصدمت ان ملكات الجمال كمان بيعملوا عمليات تجميل
هو مش المروض يبقي جمال طبيعي و لا ايه ؟؟
انا اصلا شايفا الموضوع ده مهانه للست
اللي تتقيم علي رجل و سدر و دراع ده هبل

Counter