Total Pageviews

Monday, February 11, 2008

الفالنتاين وبئس المصير


ومن تولهم منكم فإنه منهم

عيد يبغضه الله

تتوالى الأعياد الشركية والبدعية خلال العام، وبتنا لا نرى لها من مستنكر أو معارض من مسؤول أو ذي سلطان، بل نرى من مظاهر هذه الأعياد ما لا نرى في عيدينا، فأما المؤمن فكيس فطن يبعد عن ذلك و ينكره، وأما الواهم بالغرب اللاهث وراءه فتراه يسابقهم لولوج جحورهم.

عيد ما يسمى بالفالنتاين يطل علينا خلال أيام قلائل، ونرى فيه ما يكمد الفؤاد ويدمي القلب من أفعال أبناء المسلمين والمسلمات،لذا وجب تنبيه العباد بما فيه من مخالفات تغضب رب الأرض والسماوات، فافطن أخي لما يحاك بنا ووعي نفسك وغيرك... :


وصلتني هذه الرسالة اليوم ، ولم أقم بمحوها كالعادة بل فضلت الرد عليها ، لقد سئمت هذه الرسائل حتى صارت أسوأ ألف مرة من الجانك ميل .
كان ردي هو :

يا راجل حرام عليك
كيس قطن ايه وبتاع ايه بس ؟
يا راجل سيبنا نحب بعض يوم واحد في السنة :) يوم واحد
وبقيت السنة نشتم وندبح في بعض براحتنا
خلاص ؟
هو اليوم ده اللي حيودينا جهنم وبئس المصير ؟؟؟

ثم انتوا كده دايما
فاكرين إن أبناء المسلمين والمسلمات مستنيين اليوم ده لممارسة الرزيلة مثلا
فاكرينه عيد الجنس والفجور والمجون وأبي لهب

ربنا يشفيكوا كلكم


وكان رد المرسل :
السلام عليكم ورحمة الله وبركاته
أحب أشكرك أولا على الأسلوب المتميز في كتابة الرسائل
والذي يعبر فعلا عن الأسلوب الذي تتمتع به في أدب الحوار
أخي الفاضل
علماء المسلمين هم طوق نجاة المسلمين في هذا الوقت بعد كتاب الله وسنة رسوله محمد ـ صلى الله عليه وسلم ـ
والرسول نهى عن تقليد الكفار في أعيادهم والدليل على ذلك
بأن الرسول كان ينهى العرب الذين أسلموا عن الأحتفال بالأعياد التي كانوا يحتفلون بها في الجاهلية المظلمة وقال لهم لقد أبدلكم الله بعيدين هما عيد الفطر وعيد الأضحى
الحب في الإسلام مشروع ولكن بضوابط وحدود فلا بأس من حبك لزوجتك وأمك وخالتك وجميع أخواتك المسلمات
ولكن إذا بحثت ـــ وأنت مثقف ـــ عن مصدر هذا العيد ستجد كل الشر فيه من التشبه بأهل الكفر وغيره
لا تحكم على الناس بالغباء والتشدد وحكم دينك وعقلك قبل الهجوم على الآخرين

جزاكم الله خيرا

فكان ردي


يا راجل
اتقي الله الذي تتكلم باسمه وباسم نبيه :)
كفار ايه بس اللي بتتكلم عنهم ؟ ماهي دي المصيبة
أولا : انت الذي لا تعرف قصة الفالنتاين ، لا أعلم أي قصة حكوها لك ولكن ابحث عن الحقيقة لتجد أنها قصة رائعة ولا اعتقد انها تخالف تعاليم الاسلام
ثانيا : تكفيرك للآخرين هو أسلوب متطرف لا شك في هذا ، على أي اساس قمت بتكفير كل من يحتفل بالعيد ، انك حتى لم تحدد من هم الكفار :) تقصد الغرب ؟ تقصد دول شرق أسيا ، تقصد أمريكا ؟ تقصد كل من يحتفل بالعيد ؟
ثالثا: عيد الفالنتاين ليس عيد ديني ، ده حاجة كده زي عيد العمال عندنا أو عيد الأم ، قول عليهم بدعة بقى دول كمان
رابعا : انت من تتهمني بالهجوم على الآخرين ؟ يا راجل ده انت من خمس دقائق كفرت ثلثي كوكب الأرض حرام عليك :)))

أنا بقول نأخذ من كل رجل قبيلة ونطلع نموت الكفار الأشرار الوحشين اللي عاوزين يكفرونا معاهم بعيدهم اللي بيعبروا فيه عن حبهم لبعض
لما ييجي الفالنتاين أنصحك وبشدة بإهداء وردة لوالدتك أو لزوجتك أو لأختك كما سأفعل أنا
ولا ده حرام ؟

فكان رده :
أنا لم أقصد من يحتفل بالعيد كافر
أقرأ ردي مرة أخرى وستعرف أن المقصود بذلك تقليد النصارى وغيرهم ممن لا ينتسبون للإسلام
ماهذا الأسلوب الذي تتحدث به بالله عليك ؟؟؟
تكفيرك للآخرين أسلوب متطرف ... كفرت ثلثي سكان الأرض
يا أخي الحبيب أتقي الله
للأسف الشديد أنت متسرع في ردودك
أنا لا أريد الأنتصار لرأي بل أريد تبين الحق
إذا لم تقتنع بكلامي فأسأل علماء المسلمين
وسأرسل لك الأدلة بعد قليل وقصة الفالنتين عبر الإيميل
نرجو أن تكون لغة الحوار بيننا بدون حرب وبهدوء أنا لا أحب إلا الخير لك ولي ولغيرنا ولكن بالأحترام وعدم الأتهام بالتكفير كما فعلت أنت
أقرأ وتدبر وتفكر بهدوووووووووووووووووووووووووووء

وإليكم هذا الرد
حسنا
تريدها محادثة هادئة
بالرغم من انني لم انفعل ان كنت لاحظت ذلك

لمعرفة قصة الفالنتاين يمكنك الدخول علي
الوصلة التالية لموسوعة ويكيبيديا

وكما تعلم فإن اسم يوم الفالنتاين (وهو ليس بعيد بل هو يوم ) نسبة لرجل دين كاثولوكي عاش في عصر الامبراطور جلاديوس الثاني الذي أصدر قرارا بمنع الزواج فعارضه فالنتاين وقام بتزويج الشباب سرا حتى انكشف أمره وإعدم
الأساس كان الزواج كمان تعلم ولم يكن أي شيء آخر ربما خطر ببالك

لازلت لم تخبرني بمن هم الكفار
ثم كلمة تقليد النصاري لا تريحني في الواقع وبها نوع من الازدراء
لا نريد أن ندخل في مواضيع من نوع : ومالهم النصارى طيب ؟

لا شأن لي بعلماء المسلمين ، حينما يتفقوا علي أمر واحد ثابت تجاه أية قضية يمكنني عندها الاستماع لهم

كل ما أعرفه أن يوم الفانتاين (وهو في الواقع لا يعنيني في شيء) هو يوم اتفق العالم كله على الاحتفال فيه بالحب من خلال ورود وبطاقات معايدة وكلمات رقيقة
وهذا من وجهة نظري أمر لا يدخل في نطاق الكفر أو خرق القيم الأخلاقية
أما فكرة (( التشبه بالنصارى )) فهي فكرة قديمة قدم الدهر ولا مجال لمناقشتها
قل لي انت أخي الحبيب ، حينما ترتدي الجينز والحذاء والقميص وتستخدم الموبايل وفرشة الأسنان وتركب السيارة وتشرب من الكوب ، ألا يعتبر هذا تشبه بغير المسلمين ؟ :)
هل نأكل بأيدينا لأن الشوكة والسكين اختراع غربي غرضه محاربة عقيدتنا ؟
فكرة ((التشبّه)) في الأساس مرفوضة اليوم ولا مجال لها
إلا إذا كنت تقصد أنني أعشق ارتداء الصليب مثلا أو دق وشما له على معصمي

أسلوبي الذي ربما لا يروق لك هو نتاج مناقشات عقيمة مع شخوص لهم نفس المنهج في التفكير وبالتالي فأنا أوفر عليك (وعلي أنا ايضا) خوض هذه المناقشات مرة أخرى ، تسرعي في الرد نابع من كوني قد خضت من قبل مناقشات من النوع الهاديء الذي تريده وكانت النتيجة

الموسيقى حرام
الرسم حرام
الفن حرام
يوم الفانتاين تشبه بالكفار
عدم ارتداء الحجاب هو سبب كل البلاوي التي نعيش بها
اللحية هي الحل

وأنا ببساطة رسام كاريكاتير وأعشق الموسيقى والفن بكل أنواعه ، ممارسة وتلقي
وتعلمت أن الفن هو أحد أهم وسائل التقرب إلى الله ، وأن نشوة الاستماع إلى مقطوعة موسيقية ساحرة تجعلت أكثر انسانية وأكثر نقاء وصفاء وتقرب إلى الله الذي خلق كل هذا الجمال وجعلك تشعر به
الله موجود في الموسيقى
وموجود في لوحات سلفادور دالي
وموجود في الخط العربي
وموجود في الوردة التي ترفض ان تعطيها لحبيبتك يوم الفالنتاين

بالطبع هي أفكار لن تروق لك
ولكنها تروق لي وبشدة
تحياتي


بعد هذا أرسل ليسأل أسئلة على غرار هل أنت مؤمن بالله وبنبيه ؟
دعكم من هذا
فقط هذا الحوار وجدت به تدوينة مناسبة لتوضيح وجهة نظري التي ربما لم أصرح بها من قبل في هذا الموضوع ، تحياتي
ولا تنسوا اهداء الورود وبطاقات المعايدة لمن تحبونهم في يوم الفالنتاين

37 comments:

See You said...

لا أملك ما أقوله لك غير تحياتي على إحتفاظك بأفكارك الخاصة كما أفعل انا ايضاً , تحياتي :) .. !

Unknown said...

والله يا دكتور كانك اخدت الكلام منى
بجد الموضوع ده محير جدا
يعنى ايه المانع لما نتبادل كلمات الحب بين الازواج والاهل ومش لازم حبيبين وحاجه تغضب ربنا
وفي نفس الوقت نجدد مشاعرنا ونحاول نحافظ عليها حلوه ومش شرط تكون اليوم ده بس وبقيت الايام لا
ده كان رايى بعد الحيره الشديده فى الموضوع ده ونفس الكلام اللى وصلك
وقيس عليه اعياد الميلاد وعيد الام كما ذكرت

قليل من التفكير said...


انا بصراحة مع عدم الاحتفال بالاعياد ديه والاهتمام بالاعياد بتاعتنا

وأقصد بأعيادنا سواء دينية أو أجتماعية أو تاريخية

بطوط حبوب said...

تعرف يا فنان المشكله فين
الراجل ده عنده عنده فكره وقضيه ومقتنع تماما بيها
مقتنع انك لازم قبل ما تعمل اى حاجه تعرف موقف الشرع منها
وحكايه النهى عن التشبه بغير المسلمين دى برضه تمثل قناعاته وعنده الموضوع منتهى تماما والاحاديث فيه واضحه جداااااا

الراجل ده يحمد له غيرته على قناعاته ونقله الف شكر سواء كنا متفقين معاه او لأ
ونيجى بقا على قناعاتنا احنا ونشوف هل هى صح فعلا ولا لأ؟
انا مثلا مقتنع ان عيد الحب ده كلام فارغ - مش مسأله حلال وحرام- على قد مهى اقتناع على انها كلام فارغ
الموضوع كبير بس فى حاجه حلوه اوى هو قالها متروح تسأل شيخ بتثق فى رايه ومش بتعتبره متشدد
؟؟؟؟؟؟؟؟

Saker said...

>< .. حالة ...حالة
حالة منتشرة بشراسة فى الشارع المصرى .. خصوصا الناس البسيطة ,... سطوه التدين الشكلى منتشره فى مصر بصورة غريبة .. الشكل ده مبيعبرش أبداً عن مصر التلاتينات ولا مصر الاربيعنات اللى كان يشوف مصر فى الأيام دى ميقولش ان مصر ممكن ترجع للوضع ده تانى ... بس بعد اختلاط الطبقات و اختلاط المفاهيم على الناس و فكروا ان المتدين هو اللى يعتامل مع غيره على أساس دينه ** , .. الكلام يكتر فى الموضوع ده .. بس أقول ...دينا فى نفسنا و عقلك هو مفتاح نفسك .. وده اللى احنا مش فاهمينه لغاية دلوقتى >< ...

Unknown said...

أزيك يا اشرف عامل ايه مبروك المولود السعيد سلمتلى على هند و لا

بص انا شايفة الراجل كان ذوق كنت حاول فهمه براحة عشان حتى ما يقولش شوف الى بيكلموا باسم حرية الراى لا يتقبلوا الراى الاخر ازاى

بس اكتر حاجة ضحكتنى فى الموضوع ده كله انك قلت بين قوسين هذا اليوم الذى هو فى الواقع لا يعنينى :D

ليه بس كده يا فنان :)))

Anonymous said...

سبحان الله

النصارى كفار شئت ام ابيت
كل من قال ان الله ثالث ثلاثة هو كافر
كل من نسب لله الولد فهو كافر

وعيد حب ايه بس اين هويتك الاسلامية
اين الولاء و البراء

على العموم الظاهر انك من اصحاب الفكر الليبرالي

والظاهر ايضا انك من الشخصيات الممسوخة فكريا والمهزومة نفسيا و فكريا بل وللاسف و عقديا ايضا

ولا حول ولا قوة الا بالله العظيم

فنان مسلم said...

سلام عليكم يا صديقي الفنان :)

انا بس عندي تعليق صغنون

الفالنتاين حالياً في ثلثي العالم اللي بتتكلم عليه هو -فعلياً- عيد الجنس والفجور , بدليل المبيعات الفلكية الخزعبلية الوهمية للواقيات الذكرية والخمور اللي بتوصل في الفترة دي من السنة لأكتر معدلاتها , وانا بتعامل مع الدعاية والاعلان , وشايف ان 90% من اعلانات أي حاجة تتعلق بالفالنتاين بتركز عالجنس كنقطة قوة للتسويق لمنتجاتها

وبما اننا شعوب المؤخرة , اللي بنقلد الغرب في كل حاجة وحشة -فقط- , فأقعتد ان من حق الاخ اللي بعتلك الرسالة دي ,ومن حق أي عالم اسلامي , أو أي بني ادم عنده غير على ابناء أمته انه يخاف عليهم
لأننا -فعلياً- مسبناش حاجة وحشة الغرب بيعملها الا وقلدناهم فيها
وانا من خلال احتكاكي بالشباب شايف ان الموضوع تعدى بكتير حكاية الوردة اللي هتديها لوالدتك أو خالتك أو حبيبتك :)

Wael said...

السلام عليكم
احييك اولا على رايك الجدير بالاحترام
وبالرغم مع انى متفق مع راى " بطوط حبوب " فى ان الرجل صاحب قضيه اسمها " عدم التشبه بالكفار " ودى قضيه اسلاميه غير قابلة للنقاش من حيث مبدأها . لكن الرجل ربما لم يفهمها جيدا وهذا حال كل المتعصبين دينيا .
اعرف ان رسائلك له كانت من لسان تعب من كثرة المناقشات فى مثل هذا الامر , لكن النتيجة كما ترى انه لم يقتنع لان رسائلك له كانت اقرب الى التهكم ولو تستوف الرد الكامل المقنع .

خالص حبى , بمناسبة عيد الحب

Abdullrhman Hassona said...

مع احترامي لما في رأسك الا انى لا ارى في قرآءاتك ما يدل على تنورك خاصه في موضوع متل هذا فكلامك متناقض ومتهرب
لو انك اعطيت لنفسك مهله ان تقرأ المزيد من الاراء الجاده في هذا الموضوع قبل ان ترد على الرساله او تكتب ها هنا كنت صدقت اللي مكتوب في البروفيل من انك قارئ
لكنى خليني اقلك انك قارئ عادي بيقرأ حاجات بيحبها ويسيب حاجات والدليل الشيشه :D
اسف انا بقول رايي بصراحه
اعتقد مش هتزعل من اخوك الصغير

Abdullrhman Hassona said...

لو انك صبرت على رد الرساله او حتا كتابت رايك هنا
او اطلعت ولو بالقليل بقراءاتك " كما في البروفيل ما يعني انك قارئ جيد" كنت فهمت ومستعجلتش
لكن اعتقد ان ليس كل من يقرأ ما يحب يعد قارئ مميز
ولكنه قارئ عادي

فنان مسلم كمان قال اللي كنت عايز اقوله واللي كان ممكن يوصلك لو انك اطلعت اكثر

بس انا لما شفت الشيشه في البروفيل قلت لا يمكن يبقى هقول اللي فعلا مقتنع بيه ..

اخوك الصغنون

aya said...

يقال ان لكل قاعدة شواذ

مؤخرا اصبح لكل شواذ قاعدة


انا بس اللى مش فاهماه
احنا ليه دايما بنعمم

ليه كل حاجة بناخدها من فوق الوش وش بقينا بنفكر

ايه علاقة النصارى والكفر والجنس والمجون والكفر بيوم الحب

داحنا حتى الترجمة مش عارفين نترجمها

الغرب اللى بتتكلموا عنهم مجبوش سيرة انه عيد خالص

مقالوش انه حاجة مقدسة

ده بس مجرد يوم
يوم
زى عيد العمال

واللى مفروض برضه يبقى اسمه يوم العمال

ده يوم واحد يا مسلمين كل الى مقصود بيه انه احنا نفتكر الحب بمعانيه السامية

واسفة جدا جدا للكلام اللى هاقوله
لكن يعنى الكفرة والفجرة اللى بيمارسوا الجنس والفجور فى اليوم ده

يا ترى يقتصر ممارستهم لتلك الرزائل فى بوم الحب وباقيت السنة معتكفين؟

اللى بيعمل الرزيلة بيعملها فى اى وقت
ومش مستنى يوم معين فى السنة

ياخونا الاسلام مش معناه انه نقيم الحد ونحرم كل حاجة فى الحياة

ومش بقول نتشبه بالغرب ولا الشرق
والحب مش حرام

لما يجيى يوم واحد فى السنة
المفروض منه انك تعبر عن مشاعرك لكل من تحبهم
مش لازم يجيى فى دماغنا الحبيبة
والصديقة والعشيقة

ما ممكن تعبر عن حبك لوالدتك
لوالدك
لاخواتك
لنفسك حتى

بلاش يا جماعة الاسلوب الهجومى

فكروا
واقروا
وحكموا عقلكم

بلاش الاحكام المطلقة ديه

اسفة للاطالة يا دكتور

وكل يوم حب وحضرتك بخير

وياريت الناس تقدر تحب بعضها ولو ليوم واحد

حتى لو مكنش فى فى يوم الحب
بس مجرد انهم يحاولوا يحبوا بعض

والسلام ختام
وربنا يعفو عنا جميعا

Unknown said...

معلش بعد أذنك يا أشرف أنا بعترض على الناس الى داخلة هنا تقول ان الشباب بيفجروا فى اليوم ده

لا ده مش صحيح ما انا بحتك بقطاع لا باس به من الشباب متدين و عارف ربنا و لا بيشرب خمرة و لا بيفجر فى اليوم ده و مش حتة يوم هو الى حيسلخنا من مبادانا و تربيتنا

الحب باه عملة نادرة فيها ايه يعنى لما نتلم مع بعض في يوم بعيد عن ضغوط الحياة و مشاغلها

Anonymous said...

بجد أحييك إنت ردودك عليه جميلة جدا

أشرف حمدي said...

مع احترامي لجميع الردود هنا
إلا أنني أود التعليق على
SAMT
الذي حرص علي ارسال أكثر من تعليق ــ نشرت واحدا منه ــ ليؤكد فكرة أنني غير مثقف

أعتقد أنه لا شأن لأحد بمقدار ثقافتي أو عدد الكتب التي أقرأها أو نوعيتها
كما أنه لا علاقة بين الشيشة ورأيي الذي طرحته هنا

آه نسيت
أصل الشيشة حرام

للأسف لم تخبرني رأيك في فكرة الفالنتاين موضوع هذه التدوينة ، ولكن أشكرك علي رأيك بي وإن لم أطلبه
أخوك الكبير
أشرف حمدي

Zika said...

معندكش حل للرسايل دي يحسن انا بجد تعبت جدا
وبصراحه بقت امسحها من قبلا ما اقراها
وفي ملحوظه تانيه احب اقولهالك
اذا خاطبني الجاهل غلبني
من كتر ما رديت علي الناس دي واتخنقت جدا قررت اني ابطل اتناقش معاهم
ياريت انت كمان تبطل يحسن هتتعب اوي وصدقني عالفاضي
لو فيه نتيجه انا كنت اول واحد جريت ورا الناس دي واحد واحد ورديت عليهم

مصطفى فتحي said...

ماشي يا عم اشرف
انت عندك حق وانا متفق معاك تماما
ردودك عليه رائعة
تسلم ايدك

Anonymous said...

عارف يا دكتور أشرف،انا برضة كنت زمان باتحمس قوى لأى مناقشة من المناقشات دى كأنه واجبى الوطنى، أو واجبى الدينى كمان لو كانت المناقشة فى النقطة اللى اتكلم عليها الشيء اللى مكتبش اسمه ده
Anonymous
وهو اساساً مش فاهم أى حاجة عن العقيدة.

لكن فعلاً على رأى
zika
اذا خاطبني الجاهل غلبني

الناس دى اللى فى دماغها تقدر تقول كدة بلغة الكمبيوتر
Hard Coded
يعنى غير قابل للتعديل إلا بمعجزة ما، وانت بصراحة جبت من الآخر لما قلتله انك خضت المناقشات دى قبل كده وعارف نتايجها وعشان كدة مستعجل فى الرد :D

مره من سنتين تلاته كده كنت راكب الترام هنا فى اسكندرية انا واتنين صحابى وكان واحد منهم بيحكيلى فيلم أو حاجة كدة، لقيتلك واحد من اخواننا دول دخل فى الحوار وقعد يقولنا انا هاحكيلكوا فيلم جميل، انت عارف انبوبة الاكسجين فى المستشفى بكام؟ دى بكذا، طب تخيل انت الانسان بيتنفس مش عارف قد ايه اكسجين ببلاش ربنا بيدهوله وقعد يلف من موضوع لموضوع لموضوع وانا ساكت لمجرد انى مش عايز احرجة، لغاية ما لقيته خرف فى الدين برضة رحت قايلة انا غلطان انى سبتك تتكلم كل ده اساساً.

المهم انه كان اتشغل فى الكلام وفوت المحطه بتاعته لقيته بص من الشباك فجأه واتخض ونزل يجرى.
:D :D :D

معلش طولت بس افتكرت الموقف ده فجأه لأنه كان آخر مره ادخل فى مناقشة مع شخص من النوع ده. من ساعتها وانا أى حد من دول بيحاول يتكلم كدة باقفل معاه وأقوله ريح نفسك وريحنى.

انا شايف انك كان المفروض تقول اللى قلتهوله فى الآخر ده من بدرى.

سلااااااااام

أشرف حمدي said...

أنا معاك يا أندرو ومع كل اللي بيقولوا ماكنش المفروض أجادله
بس انا عملت كده عشان يبقى فيه تدوينة مش أكتر :) منها أقول رأيي ومنها اناقش طريقة الناس دي في التفكير
تحياتي

ِِAdem El-Mahdy said...

سلام عليكم

أحب ان اقول كلمة رشيد رضا " نتعاون فيما اتفقنا عليه و يعزر بعضنا بعضا فيما اختلفنا فيه "

اللى عاوز يحب يحب
لكن حد فاضى يحب فى الايام الزحما دى

Anonymous said...

يا سلام عليك يا دكتور يا فنان. سيادتك بتقول "يا راجل ده انت من خمس دقائق كفرت ثلثي كوكب الأرض حرام عليك"
تصدق الراجل غلطان.بس مش عارف هل انت بتغلطه عشان الكفار أكتر من كده شويه و لا عشان الكل مسلمين. مش لازم تجاوب عشان انت صح و الراجل غلطان. أى حاجة تقولها انت صح. الراجل اتكلم معاك بكل أدب لكن هو اللى غلطان و انت اللى صح. الراجل بيتكلم بكل أدب و يدعو إلى سبيل ربه بالحكمة و الموعظة الحسنة لكنك تتهكم . انت اللى صح برضه على فكرة.
و لأنك انت اللى صح أحب أدعيلك بمثل دعوتك التهكمية " ربنا يشفيك" يا بنى.
هدانى الله و إياك يا أخى.
لعلك تسأل عن الأدلة و كلام أهل العلم قبل أن تحكم بنفسك بعقلك الضيق.
و شكرا على النشر مسبقا.

فنان مسلم said...

أشرف بيه
اسمحلي اكتب لحضرتك بعض الاحاديث والايات , وأرجو انك تدقق فيهم شوية

(( ومن يبتغ غير الإسلام ديناً فلن يقبل منه وهو في الآخرة من الخاسرين )) سورة آل عمران الآية : 85

قول الرسول (صلى الله عليه وسلم):"والذي نفسي بيده، لا يسمع بي يهودي ولا نصراني من هذه الأمة- أي أمة الدعوة- ثم لا يتبع ما جئت به، أو قال لا يؤمن بما جئت به إلا كان من أصحاب النار"

"لَقَدْ كَفَرَ الَّذِينَ قَالُواْ إِنَّ اللّهَ هُوَ الْمَسِيحُ ابْنُ مَرْيَمَ وَقَالَ الْمَسِيحُ يَا بَنِي إِسْرَائِيلَ اعْبُدُواْ اللّهَ رَبِّي وَرَبَّكُمْ إِنَّهُ مَن يُشْرِكْ بِاللّهِ فَقَدْ حَرَّمَ اللّهُ عَلَيهِ الْجَنَّةَ وَمَأْوَاهُ النَّارُ وَمَا لِلظَّالِمِينَ مِنْ أَنصَارٍ

لَّقَدْ كَفَرَ الَّذِينَ قَالُواْ إِنَّ اللّهَ ثَالِثُ ثَلاَثَةٍ وَمَا مِنْ إِلَـهٍ إِلاَّ إِلَـهٌ وَاحِدٌ وَإِن لَّمْ يَنتَهُواْ عَمَّا يَقُولُونَ لَيَمَسَّنَّ الَّذِينَ كَفَرُواْ مِنْهُمْ عَذَابٌ أَلِيمٌ

أَفَلاَ يَتُوبُونَ إِلَى اللّهِ وَيَسْتَغْفِرُونَهُ وَاللّهُ غَفُورٌ رَّحِيمٌ " سورة المائدة

"لتتبعن سنن من كان قبلكم حذو القذة بالقذة حتى لو دخلوا جحر ضب لدخلتموه قالوا: اليهود والنصارى؟ , قال: فمن؟ "

أشرف حمدي said...

الفنان المسلم
شاهدت أعمال الفنان إدي على مدونتك
همممممم
الآن أنت تفكر بمنطق أن المسيحيين كفار مشركين
أليس "إدي" واحدا منهم ؟

وبنفس المنطق
أليس الرسم حرام ؟ هناك أحاديث بذلك إن كنت لا تذكر ، التماثيل أيضا محرمة
والمعازف (الموسيقى)

يمكنني أن أجد من السنة والقرآن ما يتيح لي قتلك وإهدار دمك

هل يعني هذا أنني غير مسلم ؟
هناك فرق بين الإسلام وما يدعون أنه إسلام
هناك فرق كبير بين كلام الله وتعاليم رسوله وما يدعون بأنه تفسير لذلك
لو كان تفسيرك أنت لكلام الله بأن النصارى "كفار" لكان النبي محمد (ص)أول من قطع رقابهم أجمعين ، ولكن ذلك لم يحدث
هل سألت نفسك لماذا ؟؟؟
لماذا حارب الرسول المشركين ولم يقتل النصارى ولم يدعوا لإبادتهم ؟؟؟
لأنهم مؤمنون

لا داعي للخوض في هذا الأمر
ولكن لا تفسر كلام الله على هواك ، لتأخذ ما تريد وتترك مالا يعجبك

هل تريدها فتنة طائفية هنا ؟
فنان مسلم يقول أنكم كفار أيها المسيحيين
أليس هذا ما تريده ؟

فنان مسلم said...

طيب نمسكها نقطة نقطة يا أشرف :)

أولاً , كون اني مختلف مع بني أدم في العقيدة مش معناه اني محترمش فنه أو أدميته أو اي انجاز قدمه
دي نقطة ودي نقطة تانية خالص
أنا مؤمن بعقيدتي وأكفر بعقيدته , وبقول ان هو كافر بعقيدتي , والكفر دي في حد ذاتها مش شتيمة
أنا كافر بعقيدته - معناها اني مش مؤمن بيها , وده ليس له علاقة باحترامي ليه أو لانجازه
ربنا سبحانه وتعالى (مش اني) اللي قال ان اللي بيقول المسيح ابن الله , أو الله ثالث ثلاثة يبقى كافر , الموضوع مفيهوش تأويل ولا تفسير ولا الفاظ مستخبية ولا أي مجال للهروب

ثانياً موضوع الرسم , الموضوع ده موضوع كبير وممكن اتكلم معاك فيه باستفاضة
الخلاصة , ان الموضوع ده من المواضيع الخلافية (مش معنى خلافية اني أختلف فيها مع العلماء) لا معناها انه خلاف بين العلماء نفسهم
والراجح والله أعلم ان الرسم ده مش حرام , وده مش رأيي ده رأي علماء أجلاء كبار جداً
ودي الفتوى اللي انا شخصياً مقتنع بيها
يعني مش مخترع حاجة من دماغي وماشي مع هواها , انا بتصرف بناء على اجماع من مجموعة كبيرة من علماء ليهم مكانه مرموقة
وبالنسبة للمجموعة اللي بتخالف الرأي ده , اتحداك تجيب زي مابتقول أي دليل يبيح قتلي أو اهدار دمي
هو اللي بيعمل ذنب في الاسلام عندنا جزاءه القتل ؟؟ اتقي الله يا أشرف , فيه ناس مش مسلمة بتقرأ كلامك

"
أنا استفزني جداً بصراحة قولك "لما علماء المسلمين يبقوا يتفقوا هبقى اسمع كلامهم" , طيب تقدر تقولي ايه معنى ان ربنا يأمرنا :"اسألوا أهل الذكر ان كنتم لا تعلمون"
هل معقول ربنا يأمرنا بحاجة مش منطقية ؟؟ أو حاجة مينفعش تتعمل ؟؟
اذا كان الخلاف بين العلماء موجود من أول ايام الاسلام
لكن الخلاف ده مش معناه اننا نرمي كل اللي هما بيقولوه وكل واحد يمشي مع دماغه ويقول اهو خلاف بخلاف
هما عندهم من العلم مايؤهل لهم انهم يفتوا ,واحنا نتبع الاجماع اللي بيتفقوا عليه , واللي يستريحله ضميرنا

ثالثا
لو كان تفسيرك أنت لكلام الله بأن النصارى "كفار" لكان النبي محمد (ص)أول من قطع رقابهم أجمعين ، ولكن ذلك لم يحدث
هل سألت نفسك لماذا ؟؟؟
لماذا حارب الرسول المشركين ولم يقتل النصارى ولم يدعوا لإبادتهم ؟؟؟"
هل أفهم من كلامك ان احنا مأمورين نقتل كل الكفار اللي في الدنيا ؟ لو انت شايف كده الله يكرمك قولي , لأني ممريتش عالكلام ده في كل اللي درسته من فقه وتفسير وعقيدة

رابعاً
"
لا داعي للخوض في هذا الأمر
ولكن لا تفسر كلام الله على هواك ، لتأخذ ما تريد وتترك مالا يعجبك"
ياريت حضرتك تقولي بالضبط ايه بالضبط اللي تركته

خامساً
"هل تريدها فتنة طائفية هنا ؟
فنان مسلم يقول أنكم كفار أيها المسيحيين
أليس هذا ما تريده ؟"
أيوة انا بقول انهم كفار باللي بأؤمن بيه .. وانا بقول اني كـــــــــــــــــــــــــــــــــــــافر باللي بيؤمنوا بيه , ودي بقولها لأعز أصدقائي المسيحيين ,
ومعتقدش دي فيها أي اهانة واللي عايز يعمل فتنة طائفية حسابه على الله وربنا ينتقم منه

أشرف حمدي said...

لو مسكنا نقطة نقطة مش حنخلص :)
بس أقولك

تحريم الرسم لقول النبي صلى الله عليه وسلم في الحديث الصحيح" كل مصور في النار " وقوله صلى الله عليه وسلم " أشد الناس عذابا يوم القيامة المصورون الذين يضاهئون بخلق الله " ولقوله صلى الله عليه وسلم" إن أصحاب هذه الصور يعذبون يوم القيامة ويقال لهم أحيوا ما خلقتم " ولأنه صلى الله عليه وسلم " لعن آكل الربا وموكله، ولعن المصور"،

تقوللي طب مانت بترسم ، أقولك آه ، لإن الرسم والنحت والتصوير بكل اشكاله في الجاهلية وفي العصر اللي ظهر فيه الدين الاسلامي كان لازم يتحرم ، لأن صناعة التماثيل والصور كان مرتبط بعبادة الأصنام والشرك بالله زي ما كانت الموسيقى مرتبطة بالجنس والفجور والمجون والخمر
ماكنش فيه فن زمان ، كان فيه أصنام وفجور ، دلوقتي فيه فن مستقل بذاته لا علاقه له بممارسات أو عبادات

أي حاجة نتكلم عنها من حيث كونها حرام أو حلال لازم نذكر نقطتين مهمين جدا
إمتى وفين ؟؟؟

القتل
هل القتل حلال ولا حرام ؟ تعرف تجاوب ؟ طبعا لأ
لازم نقول القتل امتى وفين
القتل إمتى ؟ لما نقيم الحد على قاتل ومن قتل يقتل
القتل فين ؟ في أرض المعركة ، في الحرب

قس على ذلك الرسم والموسيقى والفالنتاين والتمثيل وكل حاجة

قال رسول الله : تكاثروا تناسلوا فإني مباهي بكم الأمم يوم القيامة
تعالى طبق ده دلوقتي "امتى" وفي مصر "فين"
حتبقى كارثة ومصيبة سودة والبلد حتخرب أكتر ماهي خربانة

ممكن أهدر دمك لو مش بتصلي والإرهاب لما جه مصر كان بيلعب على النقطة دي وكفر الشعب كله ونزل فيهم دبح باسم الدين
وكلام ربنا اللي بالنص وبالحرف الواحد مذكور في القرآن
المصيبة ماحدش بيسأل الكلام ده نزل فين وامتي وفي أي مناسبة

"ولا تقربوا الصلاة"
"ويل للمصلين"
طب مش تكمل بقيت الجملة يا حاج ؟ :)

واسئلوا اهل الذكر ان كنتم لا تعلمون

ده لما يبقى فيه أهل ذكر أساسا مش موظفين حكومة لديهم حس كاريكاتوري عالي عشان واحد من أهل الذكر يقولك رضاعة الكبير والتاني يقولك شرب البول والتالت عاوز الست تشتغل مأذونة

شوف انت كم التعليقات اللي وصلت علي التدوينة دي واقراها كويس حتلاقينا في حالة تخبط شنيعة ولا حد عارف اي حاجة
شوف كده
حتلاقي اللي معايا قوي
واللي ضدي جدا
واللي نص نص
واللي معايا في حاجات وحاجات لأ
واللي عكسه تماما

التخبط اللي خللى حنان ترك تلبس حجاب وتعمل كافيه للمحجبات ومصرة علي التمثيل
طب ماهو يا تمثل يا تتحجب
دي مناخوليا والله العظيم
لا يجوز اخضاع الفن للدين ، الفن فن والدين دين
انما البس حجاب وأمثل دي المسخرة ، دي تعمل ايه لو عاوزة تعمل مشهد ليها لوحدها في الشقة بتتفرج علي التليفزيون مثلا
حتعمل المشهد بالحجاب ؟ حد بيلبس الحجاب في الشقة وهو لوحده ؟

مش ربنا ادانا مخ طيب ؟
عقل الواحد يفكر فيه ويقدر يميز الحرام من الحلال ؟
يا سيدي ماله الفالنتاين ؟ تشبه بالكفار ؟ طيب ماشي
ولما انا ابقى تبع مدرسة الكاريكاتير الأمريكية في الرسم ولابس جينز وبستخدم الموبايل والشوكة والسكينة وكلها من اختراع الغرب الكفار أبقى انا متشبه بيهم ؟
مش بقولك مش حنخلص

سيبك انت
المهم انت فنان جامد وانا سعيد بمعرفتك :)

فنان مسلم said...

الله يكرمك يا أشرف , كلك ذوق

بس واضح انك مفمهتش انا عايز أقول ايه

العلماء الأجلاء الموثوقين اللي لا يخافون في الله لومة لائم موجودين لحد يوم , القيامة
وحالياً فيه نماذج لاتحصى ليهم
وهما مصدرنا الوحيد للتحليل والتحريم , لان فيه فرق بين الدليل والحكم
استخراج الحكم من الدليل محتاج علم واسع

انا مقلتش حاجة من دماغي , انا نقلتلك كلامهم , لكن انت للاسف بتتكلم من دماغك ورأيك الشخصي

احنا ممكن نفتي ونعك في أي حاجة ,في الفن أو الأدب أو الاجتماع , أو أي حاجة تجريبية
لكن لما نيجي نقول حرام وحلال , أو نفتي في الدين ,يبقى لازم نرجع لرأي العلماء اللي بيفنوا حياتهم كلها في دراسة الحاجات دي

ملاحظة بسيطة
احنا مطلوب مننا نتشبه بالكفار في كل حاجة مفيدة بيعملوها
لكن المشكلة اننا بنتصدر في الهايفة بس
ومبناخدش منهم غير كل حاجة وحشة

عروسة ننوسة said...

اتمنى منك المزيد جزاك الله كل خير

عروسة ننوسة said...

اشكرك على الموضوع

Saker said...

اهدوا بس كده يارجاله واستهدوا بالله ... الفكرة فى التكفير ؟؟؟ ... انا مع فنان مسلم فى موضوع ان التكفير مش شتيمة ... انك تتعامل مع الناس بناءاً على دينهم "على أساس انهم كفار" .ده اللى يستحق الكلام فيه ... لكن أنا اللى حاسوا من الكلام ان فنان مسلم بيتكلم فى جهة و الدكتور أشرف بيتكلم فى جهة تانية خالص ... بس عاوز أسأل فنان مسمل سؤال .. انت قلت اننا لازم ناخد الحاجات المفيدة من "الكفار" ..وهو انك تفتكر أى حد تحبه بورده ولا بأى هدية جميلة فى يوم حصلت فيه قصة بغض النظر إذا كانت القصة لنصارى ولا مسلمين .. المشاعر مفهاش دين ...

صحفية روشة said...

دكتور اشرف
فى بداية البوست كنت هقفل الصفحة ولا يمكن كنت هدخل مدونتك تانى لكن لما شوفت ان الكلام دة مش صادر منك وانت بترد علية كمان فهمت انه مش كلامك
عيد الحب مش حرااااام
واسمه يوم الحب
احنا عندنا عيدين فعلا الفطر والاضحى ومفيش غيرهم ودة كلام صح
لكن هما اللى ماسكين فى كلمة عيد ومش عاوزين يفهمو انه اسمة بكل اللغات يوم الحب زى يوم الام ويوم العمال دى كلها مش اعياد دى ايام وربنا مش هيزعل منى لما احب جوزى او مراتى
عجبتنى ردودك
افحمته
الناس دى عاوزة تحرم كل حاجة لحد ما نحس بكبت ونغلط الغلطات الكبيرة اللى بجد زى ما بنشوف دول الخليج اللى الاسلام وتعاليمة اصبحت مفروضه عليهم لما بيجو مصر بيدورو على الكابريه طريقة منين
وانا بعتبر انى احسن منهم فى دى انا مصريه وبكامل حريتى وارادتى ولا ادخل كابريهات وزيي رجاله كتير
هما عاوزين يوصلونا لكدة
وزعلانة منك عشان مكررتش زيارتك
تعالى شوف الفالنتين عندى كان شكلو اية وقولى رايك
سلام

شريف طلال said...

انت ليه دخلت فى المناقشه العقيمه دى اصلاً
يا جدع الواحد زهق من المتشددين دول الى مش فاهمين حاجه فى الدين
على العموم جزاك الله خيراً
تحياتى

Yasser Hussein said...

لنك تسجيل حلقة الناس وأنا
اللي صورناها سبتمبر 2007 أهوه
http://www.youtube.com/watch?v=EB5vPJMQGeI

تحياتي

عاشــــــ النقاب ـقــــة"نونو" said...

اول تعليق وزيارة لمدونتك
اسمحلي اعبر عن رايي وارجو ان اقدر اوصلك اللي ابتغيه
بالطبع الامة والناس كلها خاصة في هذا الوقت محتاجة انها تحب وتحب بعضها جدا جدا لكن نتفق سويا ان لابد ان يكون ذلك في اطار شرعي يرضي االله ورسوله
الذي ضرب اعظم مثل بحبه ووفاءه للسيدة خديجة حتى بعد موتها
ودينا الاسلامي وصانا بهذا الحب بصوره المختلفة
لكن اولا الا ترى ما اصبح عليه المسمى بعيد الحب الان انا عن نفسي بشوف مهازل بين الشباب خاصة شباب الجامعة
لا مانع انك في هذا اليوم وكل يوم نهدي من نحبهم عيونا مش وردة ولا كلمة فقط لكن في اطار شرعي
هم الغرب اقصد اتخذواهذا اليوم لهم
وجب علينا ان لا نفعل بالذات في هذا اليوم اي احتفالات مثلهم حتى لا تكون نسك لهذا اليوم ولكن لا مانع من كلمة رقيقة او هدية في اي مناسبة وكل مناسبة ومن غير مناسبة للحبيب
والدليل على كلامي
ان الرسول صلى الله عليه وسلم في صيام عاشوراء كان يصوم اليوم التاسع والعاشر ليخالف اليهود الذين يحتفلون باليوم العاشر فالرسول عليه الصلاة والسلام كان يخالفهم في الصيام حتى لا نتشبه بما يفعلوه وهو الصيام بهذا اليوم
او لا ترى اننا في مثل ما يفعلوه في ذلك اليوم اوجب علينا ان نخالفهم في هذا النسك الذي في اغلب صوره معصية
اما الاطار الشرعي لهذا اليوم لاننا نسميه يوم فلا مانع من ان نحب بعضنا البعض هذا اليوم وكل يوم
دة ببساطة رايي المتواضع تقبله او لا بدون زعل وارجو التواصل وعذرا على الاطالة

Anonymous said...

دكتور اشرف
انا بقي اتشليت خلاص
والله واحد قالى الاحتفال بعيد العمال والام حرااااااااام
وقالى ان دي مؤامرة كبري لتدمير المسلمين والعرب من الغرب الوحشين الشريرين
وعجبي

تحياتي
تشي

Mohamed R said...

الأسماء والمسميات

لما يكون الفلانطين ده عيد عشان الشعوب تحب فيه بعض وتوقف الحروب وترحم الاطفال وكبار السن يبقي أكيد حاجه كويسه
إنما لما يكون الفلانطين ده يوم عشان الولاد والبنات يتبادلوا فيه الورد والأحضان والقبل وقد يصل الأمر لأكثر من ذلك مع العلم إنهم مش متزوجين .... يعني علاقه غير محلله
يبقي أكيد العيد ده حاجه مش كويسه

إحنا بقينا بنوصف الأشياء بأسماء مش بتعتها

الحب من أعظم الأشياء اللي ربنا خلقها فينا

ولكن الفلنتين ده المفروض نسميه عيد الزنا
أو عيد الخلاعه
أو عيد الإنحلال

Asmaa mahaba said...

بصراحه انا بحس انه عيد تجارى ليس الا..شكل اخر من اشكال الاستغلال اللى بنتعرض له...انا كمان بتعجب من شيوخنا يطلعوا فى بعض الفضائيات يقولوا الرد على الدنيماركيين يكون بالمثل يعنى فن قصاد فن فيلم قصاد فيلم وبعدها بدقيقه يجيبوهم فى برنامج اخر يقولوا الفن حرام خللوا الواحد يشد فى شعره...
انا متفقه معاك فى اشياء كتير بس خلينى اسير انتباهك لنقطه صغير ربنا ليس موجود ربنا هو الواجد الاعظم
ونقطه اخرى ادعم كلامك عن الفن انه يوجد احد ملوك المغول العظام اللى تبع القبيله الذهبيه قديما كان يرى ان النحات او الرسام مؤمن عن غيره لانه مدرك الكون وجماله وتفاصيله التى لا يستطيع احد غيره ان يدركها او يشعر بيها
http://magnonaa.blogspot.com/
دى مدونتى اكون سعيده لو قرات فيها
تحياتى ليك

farida said...

دخلت في هذا الجدال العقيم قبلا عندما كتبت تدوينه عن عيد الحب

http://hekayat-farida.blogspot.com/2007/02/1.html

الكلام ده كان من سنه
انا مش بقدر أفهم الناس اللي بالعقليه دي

و بعتبر ان الوقوف عندهم
تضييع وقت

اصل في النهايه كل واحد دماغه مريحاه زي ما بيقولوا

معلش يا فنان
و لا يهمك

Counter