Total Pageviews

Saturday, September 06, 2008

مطلوب مصمم جرافيك


لدى هواية غريبة بعض الشيء ، وهي تصفح جريدة الوسيط وأهرام الجمعة ومواقع التوظيف للتعرف على المجالات المطلوبة بكثرة في سوق العمل المصري ، وبعيدا عن الصيادلة المطلوبين بكثيرة ، والخادمات اللاتي تبدأ مرتباتهن من ألفي جنيه وانت طالع ، ومندوبي المبيعات الذين يبدو وكأنهم يمثلون نصف العمالة المصرية ، تسوقفني إعلانات طلب مصممي الجرافيك ، ومن كثيرة إطلاعي على هذه النوعية من الإعلانات تحديدا ، وجدت أنها لا تخرج عن عدة نماذج محدودة قلما تتغير ، وجميعها تدعو للسخرية في الواقع ، لذا وجدت أن استعراض هذه النماذج والتعليق عليها مناسبا للمدونة ، حيث أنها تنتمي إلى السخرية المريرة في أوضح صورة لها ، ياللا بينا :
مطلوب مصممات جرافيك
صلاة النبي أحسن ( تخيلوا أداء توفيق الدقن وهو ينطق هذه الجملة ) طب اشمعنى ؟ اموت وأعرف بقى .من المعروف أن مصمم الجرافيك (الدكر لا موآخذة) عادة ما يكون أكثر جرأة ومهارة وخبرة أيضا ، فكما هو الحال مع فن الكاريكاتير ، تصميم الجرافيك يحتاج إلى شخص صايع ودماغه لاسعة ولديه قدرة كبيرة على الابتكار وخلق الأفكار الغير تقليدية ، هذا لا يمنع بالطبع من وجود مصممات محترفات وماهرات ولكن على الأقل مصمم الجرافيك (الدكر) غير مقيد بقوانين المجتمع التي تجبر الفتاة على العودة مبكرا إلى بيت أبيها أو زوجها ، لذا يمكنه السهر وربما البيات في العمل مع كثير من السجائر وربما لفافة حشيش من أجل تفجير قدراته الابداعية ( طبعا بهزر ، بس بجد مصممين كتير بيشربوا حشيش مش عارف ليه ) ، حينما أقرأ عن طلب طبيبات مثلا فهذا أمر مفهوم ، ربما كانت عيادة نسائية روادها من الملتزمات ، التمريض أيضا مهنة نسائية ، من الشائع أيضا عمل المرأة بمجال التسويق أو العلاقات العامة أو الاستعلامات ، كل هذا مفهوم ، أما طلب مصممات جرافيك فإنه يثير بداخلي العديد من التساؤلات الغير بريئة ، اللهم إني صائم .
مطلوب مصمم جرافيك يجيد العمل على ثري دي ماكس ، ومايا ، وفوتوشوب ، وكوريل درو ، وفلاش ، وفري هاند و ...
وياترى مطلوب كمان يكون حاصل على الدكتوراه في الكيمياء النووية ؟ هذا النمط من الإعلانات يعطيني إنطباعا بالهطل ، على سبيل المثال لا يجوز الجمع بين ماكس ومايا في التصميم ثلاثي الأبعاد ، يمكنك الجمع بين أربع زوجات إن شئت ، اما ماكس ومايا سويا ؟ طب اشمعنى ؟ الماكس وحده يمكنك أن تقضي حياتك كلها في دراسته ولن تصل إلى حد الكمال مهما حاولت ، الماكس به تخصصات عديدة مثل البناء والتحريك والتصيير وغيرها وكل مجال من هذه المجالات مصيبة سوداء وبلوة مسيّحة ، ماكس ومايا ؟ لا حول ولا قوة إلا بالله ، وكمان فوتوشوب وكوريل درو ؟ . بالمناسبة ، إقرأ وسيط اليوم الجمعة ، مطلوب مبرمج يجيد كل أنواع البرمجة ، آه والله مكتوبة كده ، كل أنواع البرمجة ، يعني بيل جيتس نفسه لو راح إتقدم للوظيفة دي مش حينفع .
مطلوب مصمم جرافيك حديث التخرج
وهذه لا تحتاج إلى شرح ، حديث التخرج معناها أن المرتب مجرد ملاليم ، هو حد لاقي يا عم الحديث ؟
مطلوب مصمم جرافيك خبرة عشر سنوات
والله لو أنا خبرة عشر سنوات بمجال الجرافيك بشكل عملي في السوق فأنا لن أحتاج إلى وظائف الوسيط أو أهرام الجمعة ، حسافر على أمريكا عدل .
مطلوب مصمم جرافيك خريج كلية فنون تطبيقية
لا يا شيخ ؟ ، يعني لو كان خريج هندسة ولا طب ولا آداب قسم علم نفس ما ينفعش ؟ ولو خريج فنون تطبيقية مدبلر عشر سنين وطالع بمادتين في الآخر ينفع ؟ لا علاقة بين الدراسة والفن ، الدراسة مفيدة جدا بالطبع إن كنت موهوبا ، ولكن غير ذلك فلا قيمة لما تقول ، معظم إن لم يكن أغلب مصممي الجرافيك لم يدرسوا بالفنون التطبيقية أو الجميلة ، ولكن لا يمكن أبدا التشكيك في موهبتهم ، بالمناسبة ، اعرف خريجي فنون جميلة لا يجيدون الرسم من الأساس ، لا أعرف كيف دخلوها ولا خيف تخرجوا فيها .
الان اترك المجال لكم للتعليق . تحياتي

18 comments:

TAFATEFO said...

صعبان علي

دكتور سنان أد الدنيا .. وكاريكاتوري متميز .. ومؤلف بارع .. وفنان (مش مصمم) جرافيكس

7 صنايع و ..... بس ولا يهمك .. كل العباقره مأخدوش التكريم اللائق بهم في حياتهم

ألا صحيح ليه كتير من دكاترة الأسنان مبيمارسوش المهنه .. أنا دخلت الكليه وخرجت منها ومن ساعة ما خلصت سنه رابعه عمري ما حطيت ايدي في بق بني آدم .. ولا حتى في امتياز

ايه السر .. مش عارف

أكون أو لا أكون said...

ههههههههههههههه ايه الطلبات التعجيزيه ده...
اسلوب تطفيش... وتكسير...
على العموم... العمل في الشركات الحكوميه الروتينيه يكون مقيّد... لانهم يتبعون منهج واحد لا يمكن الحياد عنه...
يعني المصمم لن يضيف او يبدع شئ من عندنه... سيطبق افكار غيره فقط...
غير مأسوف على هذه الوظائف التعجيزيه...
تحياتي...

أشرف حمدي said...

tafatefo
والنبي ما تقلب عليا المواجع يا شيخ :) وميرسي على الكلمتين الحلوين دول ربنا يخليك
والله يا باشا مش عارف ايه حكاية طب الأسنان دي ، الظاهر إن فيه عمل معمول ومدفون تحت عتبة الكلية
المهم انت عامل ايه في الحياة بعد التخرج ؟
-------------
أكون أو لا اكون
لا أبدا دي مش شركات حكومية ، ده قطاع خاص
ربنا يتوب علينا من الاتنين

غلبان ... وليا لسان .... DeXTeR! said...

ههههههههه

افتح محل بقاله

و الله أكرملك بدل الشحطهه في شكرات اللي يسوي و اللي ما يسواش

ال مصممه ال

أكيد هتبقي مصممه جدا :)

TAFATEFO said...

عمال آخد في شهادات

أخدت دبلومة انفكشن كونترول من الجامعة الأمريكية

وبكره امتحان آخر سيمستر في دبلومة ال توتال كواليتي مانيجمنت ان شاء الله

وبعدين ماشي في سكه كده لو أسعدني الحظ واتكلمت مع حضرتك كره هبقى أحكيلك عليها .. علشان هتكتب منها بوستات كتير

:D

Yasser Hussein said...

ازيك يا أشرف
كل سنة وأنت طيب
الموضوع بمنتهى البساطة بيكون صاحب العمل عنده بالفعل مصممين قدامى
فبينزل اعلان علشان يوترهم وميطلبوش زيادة في الأجر
فلو حصل واتقدم له ناس بالفعل
بيحتفظ بالسي فيهات بتاعتهم ولما يمشي مصمم من عنده بيتصل يجيب 10 غيره وبأجر اقل منه
نوع كده من النفسنة
:))))

خالص تحياتي

Unknown said...

ههههههههههههههههه

لا بقجد عينيا دمعت من كتر الضحك

كوريل درو و فوتوشوب ؟؟؟

ده من انهي ناحيه بجد

و إلا بتاع كل لغات البرمجه دول أصلا يعدوا الألف و روبعوميت لغة برمجه حيه بتستخدم ..

و يجيد كمان ؟؟

ده كفايه عليه يحفظ أساميهم

و إلا بتاع مصممات ده .. بجد بجد عنيا دمعت من الضحك

و بعدين اللي طالبين مصممي جرافيك هو ليه الشغل يبقي فيه فن و خلاص و يبقي بجوده عاليه يعني و لا يهم شهاده و ميبقاش استهبال هو عاوزه يبقي دارس حاجات الواحد لو درس واحد علي عشره منها يسافر يشتغل بره و يرجع يفتح شركة تصميم جرافيكس ..

لا بجد انا عماله بضحك .. لحد ما عيطت

و حسبي الله و نعم الوكيل

تحياتي

أشرف حمدي said...

مش كده برضه يا جدعان
انا سعيد بجد إني مش لوحدي ، كنت الفاكر إن الموضوع مش حيهم غير فئة محدودة من الزوار بس تمام قوي
شكرا على المشاركة الوجدانية :) ربنا يخليكم ولا يرمي في ايديكم إعلان مبوب خاصة قبل الفطار عشان بيفطّر

Anonymous said...

ههههههههههههههههههه
متهيالى اللى بيحط الاعلانات اصلا مش فاهم هو عايز ايه
هو بيقعد مع اصحابه على القهوه وحجرين شيشه ويقولهم تفتكروا لو طلبنا كذا نعمل ايه
يقوم كل واحد ربنا فتح عليه بفيلم كارتون عرف منه معلومه جديده يقوله المفروض يكون المتقدم بيعرف كذا وكذا
يروح لامم البيض كله فى سله وينزل اعلان حلزونى زى ده
متهيألى لو انا شخصيا رحت هايقبلونى لأنهم مش عارفين اساسا اللى هما عاوزينه ده شكله ايه
طبعا معلوماتى عن الجرافيكس تساوى بالضبط معلوماتك عن نظرية ماكسويل

sabsoob said...

تسدق إني علطول بقرأ الإعلانات دي حيث إني فنون تطبيقية..و المفروض إني بفهم يعني..و عمري ما فكرت في الإعلان من وجهة النظر دي :D
لأ بالعكس..بكتأب :D
إني مثلاً معرفش
Maya
و معرفش
Corel draw :D
فبتضايق أوي و أقعد أقول لأ أنا كدة مش مواكبة سوق العمل
أنا كدة بهرج :D
طلعوا هما اللي مش مواكبنني
:D
ألف شكر يا أشرف
طلعت كويسة و أنا معرفش :D

ojg said...

قبل ما اتخرج من الكليه كنت دايما اجيب الوسيط واقعد احفظه مش بس اقراه
عشان اعرف الناس عايزة ايه
وكنت بجد بحس اني عمري ما هشتغل
يعني الاقي واحد عايز مبرمج سنيور خبرة اكتر من 10 سنوات وبعدها كاتب لستة فيها كل انواع البرمجه اللي في الدنيا
وانا اقول بس
انا هفضل قاعده جنب الست والدتي لغايه ما يخترعوا حباية الواحد ياخدها يفهم لغة برمجه جديده
الى ان لقيت في يوم واحد طالب خريج حاسبات ومعلومات او طالب ولا يشترط الخبرة
قلت ايه ده
هو الاخ ده عارفني ولا تلاقيه عارف الحاج الله يرحمه مثلا
هي الواسطة تعمل ده كله
المهم اتصلت بيه
وقمت خدت اختي ورحت
لقيته عمل لي انترفيو
ولقاني كويسة
وقالي انه قدامي 3 اختيارت
1- اني ادفعله فلوس عشان هيديني خبرة مش هلاقيها
2- اني مش ادفعله ولا هو يديني وكده نبقى خالصين
3- وعشان هو راجل طيب هيديني هو فلوس بس هتبقى حاجه رمزيه يعني نقول 150 جنيه
:((((
بجد اتقهرت
وقررت اني اخري اتفرج في الوسيط علي الصور الملونة
وماقراش حاجه
سيبك من الوسيط انت كمان
عايزينك بعقلك
:)

Anonymous said...

تحية طيبة اخ اشرف
انا شفت المدونة تبعك على النت
رسومك جميلة جدا
انا اضفتك عندي للمحادثة
اتمنى لك التوفيق و النجاح
رسام الكاريكاتير
اكرم رسلان

أشرف حمدي said...

أكرم رسلان
انا شاكر لحضرتك التعليق ، وفرصة سعيدة جدا بمعرفتك
تحياتي البالغة

zahra said...

بجد فعلا إعلانات تفرس
من فترة كده شوفت اعلان كان هيخلينى اشد فى شعرى
و كان مطلوب طبيب اسنان لإدارة معمل
يا خبر ابيض
يعنى انا درست خمس سنين فى الكلية و طلع عينى و عين اهلى عشان فى الآخر ادير معمل اسنان و يكون كل وظيفتى انى اسلم الطقم للدكتور الفلانى او تركيبة للدكتور العلانى
طيب ليه دكتور اسنان يعنى اللى لازم يديره
يعنى لو واحد فنى اسنان و لا حتى واحد بدبلوم او بإعداديه مش هيعرف يديره
حاجة تفقع المراره اللى اصلا مفقوعه

Anonymous said...

عجبني الموضوع جدا فحبيت اعلق عليه - انا مصمم جرافيك وكل جمعة بفتح الوسيط عشان الموضوع ده وفعلا الإعلان الي ذكرها صاحب الموضوع نسخة طبق الأصل من الكلام الي قاله مطلوب كل حاجة وتروح تلاقيها شقة دور خامس مثلا وصاحب الشركة لسه بيقول يا هادي ومعاه 2 موظفيين ولو راحله واحد عايزة هيقوله انا بدي 1500 جنية كأنه بيقولك انا بديك 150000 جنية ويبقى مستكترهم عليك واللهي وان شاء الله في زايادات وحاوفز وكلام اهبل من الي انا شفته على مدار 5 سنوات من التنقلات بين الشركات وكل شركة وشركة ليها قصة وحكاية
تحياتي لصاحب الموضوع

eslam said...

والله يا اشرف اسلوبك جامد بالمناسبة انا مصمم فوتوشوب برضو
و العجيب يا أخى ان الاعلانات دى مش على قد الجرايد بس ده كمان عالنت نفس الصيغة دى و كأن صاحب الاعلان فاكر ان التصميم ده حاجه سهلة كده فوتوشوب و اليستريتور و ان ديزاين و ايمج ريدى و ثرى دى ماكس و خلافه

Anonymous said...

صحيح عندك حق أوي في كل كلامك

Anonymous said...

اشرف باشا الفن اصبح هم بس يكون افضل طبعا لو بقى هم المم-زميلة رحلة كفاح كان نفسى ابداها فعلا مروه عويس

Counter