Total Pageviews

Tuesday, November 11, 2008

أسود بسيط


يقال ــ وهذا على مسئولية الراوي ـ أن آخر ما قاله سعد زغلول قبل وفاته : غطيني يا صفية ، مافيش فايدة
منذ عدة أشهر وانا أقاوم شيطاني الرجيم الذي يوسوس لي أن أشتري خرطوشة حبر أسود للطابعة اتش بي نافثة الحبر، الخرطوشة القديمة أهملتها فجف الحبر داخلها وتلفت تماما ، أحتاج الطابعة لطباعة بروفة صفحات مشروع كتابي الأول كما أنها تنقذني عند الضرورة حينما أحتاج إلى تصوير بعض المستندات أو طباعة السيرة الذاتية أو أوراق خاصة بالعمل وغيرها، ذهبت لشارع العريش حيث أقرب منفذ بيع أحبار من منزلي وقررت شراء خرطوشة أصلية ، وفي المنزل اكتشفت أنها فارغة، آه والله ، فرغت الخرطوشة بعد أول مستند طبعته وكانت طباعته سيئة أيضا ، هرعت لأخرب بيت صاحب المحل وأخذت معي الصفحات شبه البيضاء التي طبعتها في اتهام صريح له بالنصب ، فقام بتجريب الخرطوشة وتأكد من صحة إتهامي ولكنه رفض فكرة أنها غير أصلية ، أقنعته أنها مزيفة بدليل العلامة المائية الرديئة التي تبدو ملفقة للغاية كما أن الطابعة لم تتعرف على الخرطوشة بإعتبارها أصلية بل أظهرت لي رسالة تؤكد غير ذلك ، المهم أعطاني خرطوشة مختلفة مكتوب عليها
HP 21b Simple Black
يا عم ايه حرف البي ده اللي بعد رقم واحد وعشرين ؟

بي يعني بلاك ، اسود يعني ؟
يا راجل ؟ ماهو ممكن بي يعني باد ، زفت يعني ، أو بي يعني بولز ، بيض يعني ، أو بي يعني بتستهبل ، بتستعبط يعني
لالالالا ، دي أصلي وعلى ضمانتي
طيب العلبة شكلها متغيّر ليه ؟
عادي يعني ، زي علب الزبادي كل يوم بيغيروا شكلها
طيب يعني اسود أسود بسيط دي ؟ هو الأسود فيه بسيط ومعقد ؟
جربها بس وحتدعيلي ، انت عارف انا مايهمنيش غير العميل ، والمفروض ما أرجعش الخرطوشة بس برضه مش مهم انا أخسر ، المهم العميل يكون مبسوط .

لم يكن هناك سوى ان أقبل هذه العبوة العجيبة ، والمكتوب عليها بالعربي : للبيع في مصر والمغرب ونيجيريا فقط
فإما أن ألبس الخازوق كاملا وأعود إلي بيتي بالخرطوشة الفارغة المزيفة ، وإما أن أقبل هذا العرض .
وحينما عدت أكتشفت انني لبست نصف خازوق ، حيث ان الأسود البسيط هو إصدار من خراطيش حبر اتش بي الإقتصادية المصنوعة من مواد معاد تصنيعها وتستخدم لأغراض اقتصادية بحتة ، وهي المرة الأولي في حياتي التي أرى فيها اللون الأسود البسيط وهو لون برازي رخيص مقرف ، أسود باهت إلى الرمادي أقرب وطباعة هي الأسوأ في عمر طابعتي مقارنة بأرخص أحبار الملء التي تحقن بها الخراطيش القديمة .
اتصلت به على الهاتف لأتأكد من سعر الأسود البسيط هذا ، وأكدت له أنني وجدتها على الإنترنت مقترنة بعبارة دعائية شهيرة : تباع بنصف ثمن الخرطوشة الأصلية ، وخلاصة المكالمة انني أكدت له لبسي للخازوق ليس أكثر وأعتقد أنه سعيد الان بذلك
.
قبل أن أذهب لشراء الخرطوشة بساعة واحدة كنت قد طلبت نصف كيلو كباب مشكل بأربعين جنيه ، مبلغ فادح وقاسي للغاية ولكني لاحظت الأنيميا التي أصبحت عليها انا وزوجتي فقررت في خطوة عنترية أن أساهم في معالجتها بهذه الطريقة .
كانت من المرات النادرة التي أتأكد فيها أنني أتناول لحم حمير ولم أجرؤ على مصارحة زوجتي بهذا ، فأنا لن أرمي أربعين جنيه في الزبالة لمجرد أكتشافي أن الكباب حميري ، وحتى إن لم يكن حميري فهو معفن على أقل تقدير ، ورائحته مقرفة ويبدو أنه قد تم شيّه منذ أسبوع على الأقل ، وتأكد لي هذا بعد إصابتي بالإسهال في الساعات الاولى من صباح اليوم التالي.
خلاصة ما حدث لي في هذا اليوم ، خسرت مائة وثلاثون جنيه مقابل لا شيء بسبب الغش .
خسرت وقتي وصحتي وأعصابي ودفعت مقابل ذلك مبلغا فادحا بكل المقاييس
من يحميني من الغش ؟ إن كنت لا أستطع أن أبلع اللقمة في أمان فضلا عن شرائي منتج أصلي باهظ الثمن .
تجاربي في هذا المجال كثيرة جدا ، القراء المخضرمون للمدونة يعرفون حكايتي مع محل الأدوات الكهربائية الشهير وموضوع الكاميرا الرقمية المضروبة والتي كلفتني حوالي ألفين جنيه بالإضافة إلى ثلاثة أشهر كاملة في التحقيق والنيابة وفي النهاية كنت على وشك دخول السجن بتهمة السب والقذف والتشهير ودفع غرامة كبيرة أيضا ، أنا من يسجن ؟!!! أنا من يدفع للبائع الغشاش تعويض مادي عقابا لفضحي غشه ؟؟؟ لم يكن امامي سوى التنازل عن البلاغ ومحو التدوينة أمام كل الأوراق المضروبة التي استطاع صاحب المحل تلفيقها بجدارة ليضعني أنا خلف القضبان .
كرهت البلد واللي في البلد واللي لسة بيحب البلد ، أبو البلد على أم البلد على الكباب على الحبر على الأسود البسيط .
الأسود الوحيد الذي أراه هو أسود ثقيل مزفّت يغرق كل شيء من حولي .
مافيش فايدة

18 comments:

ana ga3an said...

في اسود بسيط
واخضر لطيف
واصفر ظريف
واحمر من كدة مفيش

يا ابني سافر
قبل ما يبقي في كباب بسيط
علبة دخان شواية

لولا said...

أعتقد ده الوقت المناسب انك تندم بجد على فرص السفر إللى ضيعتها

وده برضو الوقت المناسب إنك تشيل الإستفتاء إللى عامله

الإجابه واضحه وصريحه

أروح أي بلد تانيه

أعيش بنى أدم

وما يجليش إسهال

وملعون أبو أبو أبو البلد دي

ولو مصر أم ادنيا

عادي ياعنى ما هي دنيا بنت كلب

لورنس العرب said...

لعلمك
سعد زغلول كان رجل ذو نظره ثاقبه
قال الحكمه دي وكانت فعلا احدى معجزاته
وايه اللي وداك للمطابع يا استاذ
انا تعاملت مع المطابع عشسان كنت بطبع ستيكرات
والحقيقه لقيتهم كلهم حراميه
واحد فيهم نصب عليا
أخد مني الماستر وراح يطبعهم في العتبه عشان يطلع بحسنته ويضحك عليا
وقد كان

قصر الكلام
اللي يطول يهبش منك حاجه هايهبشها ويجري

أم كوكي said...

واضح من البوست ده وبوست علبة السلامون انك قربت تسلم بالسفر وزهقت من ام البلد باللي فيها.

فنان مسلم said...

لولا دي بتقول كلام جامد :D

adel said...

هههههههههههه

مصائب قوم عند قوم فوائد

تصدق ضحكتيني.....كده اتاكدت اني مش الوحيد اللي بيضحك عليا

عادل
http://elbald-dy.blogspot.com/

زهرة الياسمين said...

ايه يا عم أشرف السواد ده
هو انت موعود دايما كده بالغشاشين
المشكلة مش فى البلد يا اشرف
المشكلة فى ناسها اللى بقى شعارهم الفهلوة و الضحك على الدقون
اللى باعلك الكباب الحميرى واحد مصرى زيك زيه
و اللى باعلك الحبر الإسود البسيط برضه واحد مصرى زيك زيه
المشكلة بقيت فينا للأسف

Oss said...

والله انا مع جعان
سافر
واحنا هنسافر وراك
وهنسيبلهم البلد يعيشوا فيها مع نفسهم
وعلى رأى عادل إمام هيصحوا الصبح مش هيلاقوا حد يحكموه فهيشتغلوا فى السعوديه

طالما انت ممتاز فى مجالك
وهما بره محتاجينك ماحدش هيقدر يقول تلت التلاته كام

والله أنا والدى برا وانا نفسى اروح اعيش معاه
مهما كان هناك بنتعامل معاملة بنى آدمين
مش لا مؤاخذه ولا مؤاخذتين

أنا بقيت خايف على نفسى من الأكل والتعليم ومن الشرب
الحاجه الوحيده اللى الواحد بيعملها وهو متطمن
وهو لا مؤاخذه بيعمل زى الناس
(ده بمناسبة التدوينه اللى فاتت)
بنا يصبرنا

مواطن مصرى نايم said...

اه يا اشروف فعلا فى علب بتبقى فاضية
انا فالشغل مره
لما كنت ماسك فرع شركة الكمبيوتر اللى بشتغل فيها
بعت علبة كده
و رجع لى اللى اشراها قال لى انها فاضية
بس لعلمك البياع ميعرفش انها فاضية

بس انا بقى قلت له مليش دعوة
لأنى مكنتش مصدقة
لكن دلوقتى اكتشفت انه كان صادق

عموما
من اسود بسيط لكباب حمير يا قلبى لا تحزن


و سعد زعلول قال مفيش فايدة على مرضة
بس هو فعلا مفيش فايدة

سافر يا اشروف
بجد كام سنة و حتبقى مرتاح ماديا جداا
ان شاء الله
بس سافر

ربنا يكون فعونك يا ابو عمرو
و يكون فعون الشعب كله

لان سليمان الحلبى مش لوحدة اللى لبس الخازوق
دا طلع الخازوق ده وراثة

وينكى said...

مش عارفه ليه يا دوك انت اللى بتحصلك الخوازيق دى كلها
انت الوحيد اللى باسمع منك حاجات ماحدش تانى بيتعرضلها
فاكر البطيخة والتليفون والحريقة وكله كله؟؟؟؟
انت كاتب كم تدوينات مؤلمه تك تك تك ورا بعضه حاجه وجعتنى قوى
ادتنى احساس انها لشخص اكتئابي بيرصد كل العيوب عشان يسيبها كرسالة انتحار
بعد الشر عنك طبعا
بس برضه ماتشتمش البلد
اشتم اللى بيغشوا
البلد مظلومه زينا واكتر

enjy said...

التدوينة دى مناسبة افكارى بشدة...........اخر جملتين بقى كانك بتقول اللى جوة دماغى وخايفة اقوله فى المراية.....الله يخرب بيت القرف انا تعبت

عاقلة علي ارض الجنون said...

آآآآآآآآآآآآه
ده مش الغش بس
الجهل كمان
التدليس
سافر و الله لو منك لاسافر

اه يانا

يا امة ضحكت من جهلها الامم

أكون أو لا أكون said...

الدكتور اشرف...
معلش روق شويه... لو كان السفر هو الحل مثل ماذكر في اغلب التعليقات... خلاص سافر...!!!
بس المهم تسافر الى اين؟؟؟
انت فنان... لازم تنقذ فنك... روح دوله اوروبيه... لان الدول العربيه كلها زي بعض... والفنان فرصه قليله...

أشرف حمدي said...

مساء الفل على الجميع
عذرا للتعليق على التعليقات جملة واحدة ، مش تناكة والله العظيم أنا بس مخنوق كالعادة
مش عارف ليه يا جماعة رسامي الكاريكاتير أكتر الناس بيجيلها اكتئاب
الله يرحمه صلاح جاهين قعد يتعالج من الاكتئاب لحد ما توفى ويقال إنه أخد جرعة زائدة من دوا في شبهة انتهار لكن الشيء المؤكد إنه انكسر بعد النكسة
احنا في وسكة ألعن من النكسة والله
واخرتها حيبيعوا البلد وكل واحد نصيبه منها ألفين جنيه
هههههههههههههه
في فيلم عاوز حقي كان نصيب المواطن مليون ونص دولار والحكومة تقولك ألفين جنيه
آآآآآآه يا دماغي وبلاش أقول آآآآه يا حاجة تاني عشان عيب

فعلا أنا لو حسافر لازم أوروبا أو كندا
بفكر أقدم على هجرة والله
ناس صحابي في مجال الصحافة سافروا لندن عشان يقعدوا سنة ولا أتنين بقالهم خمس سنين هناك وماحدش عاوز يرجع

بحلم حلم عبيييييط إني أشتغل في بكسار أو ديزني هههههههههه
حلم لذيذ والله وبشرح قلبي لما أسرح فيه

شكرا على التعليقات والتشجيع وربما ما يحرمنيش منكم قااادر يا كريم
تحياتي البالغة

Mohamed ElGohary said...

Never buy unless from the official retail so you can fuck them at the mother company if they cheated, the official retailer is at Marwa St Dokky, MAS company, don't remember the number of the place exactly. Good luck!

Andrew George said...

ما تقدم على الهجرة طيب ما التقديم اليومين دول، حاول مش هتخسر حاجة!

rasha said...

و الله يا دكتور انا كنت بواجه نفس المشكلة مع نفس عبوة الحبر المجنونة رقم 21
اللي فاضية و اللي بتطبع شرط و اللي بتطبع كلمة و تسيبت كلمة
فاشتريت دماغي و اتعلمت املا الحبارة بنفسي
مضروبة مضروبة على الاقل انا اللي ضربتها بنفسي
لا و الغريب بقا انها بتطبع زي الاصلي

متهاجرش
و انا على استعداد اعلمك تملى الكاريتريدج lol
شكرا على زيارة مدونتي و تعليقك

nermeen nermo said...

و الله يا دكتور انا كنت بواجه نفس المشكلة مع نفس عبوة الحبر المجنونة رقم 21
اللي فاضية و اللي بتطبع شرط و اللي بتطبع كلمة و تسيبت كلمة
فاشتريت دماغي و اتعلمت املا الحبارة بنفسي
مضروبة مضروبة على الاقل انا اللي ضربتها بنفسي
لا و الغريب بقا انها بتطبع زي الاصلي

متهاجرش
و انا على استعداد اعلمك تملى الكاريتريدج lol
شكرا على زيارة مدونتي و تعليقك

Counter