Total Pageviews

Thursday, December 25, 2008

جاموسة المصرية للاتصالات


العمدة يجلس على الدكة في الغيط ويمد يده إلى الموبايل الموضوع أمامه ، فيزوم شيخ الغفر : هممممم ، ويستنكر : تؤتؤتؤ ، فيبعد العمدة يده عن الموبايل النجس الفاسق المارق الذي هو بالتأكيد إريكسون من عمل الشيطان ،ويمسك بسماعة الهاتف الأرضي العذراء الطاهرة فيرضى عنه شيخ الغفر ويسامحه ويرقص حوله وهو يتحدث في الهاتف ، ولو عندك خط أرضي ماتسيبوش ، إتصل منه وماترحموش ، دي دقيقة الأرضي بتلت قروش ، ثم يظهر العمدة في مشهد آخر وهو يمد يده مرة أخرى ــ شوفوا العمدة ابن الكلب القذر ــ إلى ذات نفس ذلك الموبايل السابق ذكره فتزوم الجاموسة : هممممممممممممم .
إحنا قلنا اييييييييييه ؟؟؟

إتكلم أرضي يابن بلدي ، صوتك بقى واضح قوي عندي
طب أنا بقولها أهوه والله على ما أقوله شهيد .
المصرية للاتصالات شركة ******* ضع مكان النقط تعبيرا مناسبا ، وسنترال المريوطية تحديدا ******* أكثر من الـ ******* السابقة .
السنترال الملعون الذي تمت مقاطعته من قبل جميع شركات تقديم خدمة الإنترنت السريع دي إس إل ، تتصل بشركة تي اي داتا : والله متأسفين يا فندم احنا مش بنتعامل مع السنترال ده ، لينك دوت نت : لا والله يا فندم كله إلا سنترال المريوطية ده ، شركة نص كم : هع هع هع مريوطية مين يا فندم ، تصدق ضحكتني ؟ أما شركة فودافون التي كنت أظن أنها من الشركات المحترمة التي يمكن الإعتماد عليها ، لديها نوع مما يمكن أن نطلق عليه مهزلة معلوماتية ، فحينما اتصلت بهم للاستفسار عن خدمة الإنترنت السلكي الجديدة التي بدأت الشركة في تقديمها منذ فترة قصيرة تحت شعار : انترنت في البيت ، أخبروني بأنهم يتعاملون مع سنترال المريوطية ، فأكدت لهم أن هناك مشاكل كثيرة في السنترال وأنه لا يصلح لتقديم الخدمة ، وطلبت التأكد مما يقولونه ، فطلبوا مني رقم الهاتف الأرضي ، وبعد ربع ساعة من الإنتظار وسماع إعلاناتهم السمجة عادوا يؤكدون لي بأن المشاكل إنتهت ويمكنني الاشتراك بخدمة الإنترنت من الآن ، وقد قامت أختي ــ والتي تتبع لنفس السنترال ــ بالإتصال مرة أخرى للتأكيد فأخبروها بنفس الشيء ، فقامت بإلغاء خدمة الدايل أب وخدمة تقسيم الخط آي إس دي إن على أمل الإشتراك بإنترنت فودافون ، وبعد شراء الخط والخوض في الإجراءات أخبروها في آخر لحظة أنهم أوقفوا التعامل مع سنترال المريوطية !!! شوف إزااااي
هل يمكن التقديم على خط تليفون تابع لسنترال آخر مثل سنترال الهرم ؟ : لا ، لا يمكنك ذلك فأنت تخضع لسنترال المريوطية وفقا لموقع سكنك . وهذا قضاء الله وقدره وليس من حقك الإعتراض على المكتوب لك .
هل يمكنني في المستقبل القريب ــ بإذن الله جل علاه ــ الاشتراك بخدمة الإنترنت السريع ؟ : هذا في علم الغيب ، وحرام تسأل في الغيب دي حاجة بتاعة رابّونا .
ثم تنقطع الحرارة ، ليس انقطاعا عاديا ؟ لا يا بابا لا ، بل تنقطع أربعة أيام ثم يتم تبديل خطك مع خط شخص آخر في اليوم الخامس وتعود لك الحرارة بخط جديد ، فتدفع أنت مكالماته ويدفع هو مكالماتك ، تستقبل أنت اتصالاته ويستقبل هو اتصالاتك طوال فترة العك والهطل والمهزلة والمسخرة والتي دامت لثلاثة أيام كاملة ثم عاد وانقطعت الحرارة نهائيا لأسبوع . وقد تحدثت عن ذلك في تدوينة سابقة .
ثم من هو عبده ربيع ؟ أمووووت وأعرف مين عبده ربيع ، يارب ما تحرمني من معرفة كنه هذا المدعو عبده ربيع قبل أن أموت مشلولا ، تأتيني عشرات الإتصالات يوميا يسألون عن عبده ربيع ، يا جدعان أنا مش عبده ربيع ، والله لا عرف عبده ربيع ولا سمعت عنه ، ولكنهم مصرون ، ويقولون أن هذا هو الرقم المدون لديهم عن عبده ربيع ، وعلى موقع المصرية للإتصالات بحثت عن رقمي في دليل التليفون ووجدت أنه لعبده ربيع ، رغم أن الفاتورة تصدر بإسمي أنا ، يعني أشتغل سيكرتير لعبده ربيع ؟ طب ما يدفع هو الفاتورة بقى ، الله يحرق عبده على ربيع على اليوم اللي ركبت فيه التليفون
.
أرفع سماعة التليفون فأجد اتنين حبيبة بيتكلموا ، بيحبوا على خط تليفوني ، بيحبوا بعض في بيتي وفي سماعة تليفوني ، أجيب لهم عصير ليمون طيب ولا أعمل ايه الله يخرب بيتكوا ؟
ثم تداخل الخطوط ، بسم الله ما شاء الله ، أبقى بتكلم في أمان الله والاقي ست الحاجة داخلة في النص معانا ، ماهي واحدة فاضية بقى ، وتلاقي ولادها مش سألين فيها ، شوفتوا جحود الأبناء ؟ يا ست الحاجة إنت ايه اللي دخلك معانا في الخط ؟ تقول : جرى ايه يابني ، ما تتكلم براحتك هو حد حايشك ؟ يعني أنا بالنسبالها مسلسل الساعة الثامنة .
وأعود مرة أخرى لمشكلة تبادل الخطوط ، هل تعلمون ما معنى تبديل الخطوط ؟ وكم من الجرائم يشتمل عليها هذا الفعل ؟
أولا : سرقة علني وبفعل الشركة ، فبمجرد أن يتم تبدل الخطوط بين شخصين كلاهما يصبح لصا مجبرا على اللصوصية ، كلانا سرق خط الآخر بمعرفة الشركة ومن حقه استخدام الخط أربع وعشرين ساعة يوميا يتصل بمسابقات زيرو تسعومية ويحل حلقات المفتش أبو جلمبو ويسمع ويرسل أجمل النغمات والرنّات على موبايله من التليفون الأرضي وكله على قفايا .
ثانيا : يمكن للشخص الذي تم تبدل الخط معه ارتكاب ما لذ وطاب من جرائم الاتصالات ، يمكنه أن يعاكس بنات بحرية كاملة ، يمكنه أن يتصل بدجاج كنتاكي ويطلب ممارسة الجنس مع العاملات هناك بكل جرأة هكذا : دجاج كنتاكي مع حضرتك ، تطلب ايه يا فندم ؟ أطلب انام معاكي يا قمر هأع هأع هأع ، كده عادي جدا وطوال ثلاثة أيام كاملة ، يمكنه أن يتصل بالعاشرة مساء ويسب رئيس الجمهورية على الهواء مباشرة وحصريا على قناة دريم ، يمكنه أن يتصل برئاسة الجمهورية أو بأي جهة حساسة ويشتمهم بالاسم واحد واحد وبشجاعة لم تتوافر لمخلوق على وجه الأرض ، كل شيء ممكن ، هو كان خط أبوه ؟ ها؟ الخط بنمرتي أنا ، لأ وايه ؟ أنا اللي دافع كل المعاكسات والجرائم دي من جيبي مكالمات ، ولو كان عندي خط دولي كمان كان اتخرب بيت اللي جابوني ، لأ وكمان ألاقي نفسي مطلوب في ألف قضية سب وقذف وابتزاز ومعاكسات وغيرها .
هل تم مراعاة ذلك في الفاتورة ؟ الإجابة : لم يحدث ، ودفعت فعليا مكالمات الشخص الآخر الذي تم تبديل الخط معه .
هل كان من الممكن في حالة إرتكاب أية جرائم بخط تليفوني المبدّل أن يتم مراعاة ذلك جنائيا ؟ الإجابة : إطلاقا ، لو راجل إثبت ، لو دكر وشارب من التتة بتاع الماما إثبت إن الخط ساعتها كان عند واحد تاني ، هأأأأأو ، النمرة نمرتك يا حلو والخط خطك وباسمك وبرقم بطاقتك ومحل إقامتك، مين يصدق كلام المجانين بتاعك ؟ وعندهم حق ساعتها لإن ده عمره ما حصل ولا حيحصل في أي دولة بالعالم .
منذ أربعة أيام إنقطعت الحرارة ، اتصلنا بالأعطال فعادت الحرارة بعد يومين ، ثم إنقطعت مرة أخرى في خلال أربع وعشرين ساعة .
دلوقتي مافيش حرارة ، مافيش نت ، ولو الحرارة رجعت مافيش قدامي غير الدايل أب اللي خارب بيت أمي عشان مافيش دي إس إل .
أفتح التليفزيون يمكن أنسى شوية الوكسة اللي أنا فيها ، أشوف الجاموسة بتزوم في وشي وكأنها بتقول لي : إياك تتكلم ع الموبايل يابن الكلب .
يبقى من حقي أتجنن ولا لأ ؟ ها ؟
اتكلم أرضي يابن بلدي ، وعلى الجانب الآخر مافيش حرارة
إياك ووصلات الإنترنت عشان حرام وعشان مش قانونية ، وعلى الجانب الآخر المهبب : مافيش خدمة دي إس إل أساسا عندنا ، اللي لحق يركب الخدمة ركبها من زمان وبيوزع الوصلات بأسعار فلكية ، ابتزاز بقى ، ولو مش عاجبك روح ياخويا قدّم على الإنترنت وآدي دقني لو جالك طول مانت في المريوطية
عيب معاكسات التليفون ، وعيب تتصل ببرنامج على الهوا وتشتم ، وعلى الجانب الآخر الأسود : الخط بتاعي أساسا فضل ثلاثة أيام تحت يد شخص آخر مجهول .
أخبار صحفية عن تجديدات وإصلاحات في سنترال المريوطية تحديدا ، وعلى الجانب الآخر إبن ستين في سبعين : النتيجة أهي قدام حضراتكم ، من أسوأ إلى أسوأ ، يبقى فلوس الإصلاحات والتجديدات دي بتروح فيييييييين ؟
قول إنت باقاااااااااا
أرسم كاريكاتير عن الموضوع ، أهو الواحد يفش غله شوية ، يتحجب الكاريكاتير ويتقال لي بالحرف : ممنوع تتكلم عن الشركة دي بالذات ، دي بتاعة الحاكوميه ( طب من النهاردة مافيش حاكوميه ، أنا الحاكوميه)
أتصل بالأعطال وانا في قمة العصبية وبطلع دخان من دواني ، يتقال لي : المكالمة مراقبة ، يعني لو شخطت في الراجل اللي بيرد عليّا أو زعلته مني ، أو قلت له مثلا : انتوا شركة وحشة خاليس ومش كاميلا ، أو إنتوا شركة نوتي نوتي كده زي بتاعة هيفاء وهبي ، يتم معاقبتي .
طب اعمل ايه ؟
عارفين اعمل ايه ؟

أنا حسمّ الجاموسة ، ايوة هي الجاموسة السبب ، جاموسة المصرية للاتصالات هي السبب .
دلوقتي بقى عندي شوية أسئلة محشورة في زوري إذا سمحتم
هل تنقطع الحرارة عن تليفون السيد معالي المسئول الكبير قوي جدا خالص ؟ أم أنه لا يوجد من يجرؤ على الزوووم في وجهه لو حاول سيادته الإتصال من خلال هاتفه المحمول بدلا من الأرضي ؟
هل سبب مشاكل سنترال المريوطية أنه لا يوجد مسئول كبير يسكن في شارع فيصل ؟
لماذا لا توجد شركة اتصالات أرضية أخرى غير المصّية للإتصالات ؟ أم أنه احتكار علني ؟
هل من حقي بعد كل هذا السخف أن أرفض دفع فاتورة أول يناير ؟ هأو ، دي أنا حجاوب عليها ، ماتدفعش يا خويا حنسحب الخط منك ، هأو أو أو ، إسحبووووه ، هو كان شغال أساسا ؟؟؟؟؟؟ ( مسرحية شاهد ما شفش حاجة : خفت لا يشيلوا العدة بصراحة ، بس أنا ماعنديش تليفوووووون )
إذا عرفتوا الإجابة ، اتصلوا بيّا على زيرو تسعومية تسع تسعات تسعة وحرد عليكم بنفسي ، بس لما الحرارة ترجع إن شاء الله .
لمزيد من الفضائح حول سنترال المريوطية إليكم هذا المقال
لصوص كبار وضحايا صغار
كما يمكنكم التأكد من حالة الجنان التي أصابونا بها نحن سكان فيصل من خلال هذه الوصلة لمنتدى
فودافون وسنترال المريوطية

25 comments:

~*§¦§ Appy §¦§*~ said...

]ا عينى يا ابنى دا انا القاولون اشتغل عندى من بس انى قريت بوست الجاموسه ده ااااااف ريحتها قرف
الله يكون فى عونك
بص يا اشرف انا فضلت سنتين ادفع مقابل خدمه مش عندى واكتشفت بالصدفه والله ولما اتصلت فى التليفون جابوا ليه شلل قولت مبدهاش روحت السنترال وعملت لهم مجنونه وبالفعل اتخصموا بامانه من الفواتير التانيه
المهم يعنى نصيحه سيب المريوطيه دى وهشه اوى وبتخنقنى
اسكن فى مكان تانى يا ابنى وريح دماغك او روح واعمل مجنون فى السنترال بقى
او لو عرفت صاحب الرقم اللى بيتبدل معاك روح اترجاه ميستخدمش تليفونك ولو حتى اضطريت تديله الجاموسه هديه هههههههههه

أشرف حمدي said...

شكرا يا إبي على مواساتك ليا
بس يعني بعد ما طلعت عيني ولقيت شقة أسكن فيها أعزل منها عشان السنترال
كل ما أقول لحد الحكاية يقوللي عزّل :(((
الخط المتبدل رجع تاني ، بس لما رجع الحرارة قطعت
انتي كنتي مريوطية ؟؟؟ صح ؟؟؟
حاسة بيا مش كده ؟؟؟

عارفة بقى آخر الأخبار ؟
دلوقتي حالا اتصلت بالأعطال وعرفت إن العطل ده حيستمر لحد ما بعد الكريسماس
يعني خراب بيوت علني ، لا فيه تدوين بقى ولا كاريكاتير أيام الأجازة جمعة وسبت لحد ما المشكلة دي تتحل

ومافيش انترنت كافيه واحد راضي يخليني استخدم الفلاشة بتاعتي
بيقولك فااايروصااات
خايفين من "الفايروصااات"
ارحمني يااااااااارب

~*§¦§ Appy §¦§*~ said...

ههههههههههه لا يا اشرف انا عمرى ما حبيت فيصل ولا الهرم ولا الجيزة بحالها طول عمرى مدينه نصر ومصر الجديده واخيرا فى القاهرده الجديده التجمع
التالت يعنى سنترال القطاميه قدمت على التليفون عادى وبعدها بيومين بالظبط جالى ههههههههههههه
ربنا يجعل كلامى خفيف عليهم
بس طنط عايشه فى حدايق الاهرام فى فيلا هناك وبتعانى الامرين من الموضوع ده انا مش عارفه هى تبع سنترال ايه بس كمان معندهاش تليفون ارضى بتاعها هوائى وعلشان بناتها امريكان دبلوم وبيحتاجوا النت جابت من فودافون وتخيل التكلفه الخزعبليه عليها بجد بتشد فى شعرها لان عندها بنتين وبيستخدموه كده
بص انت برضه مفيش حل عزل يا ابنى وخلص دى حتى مكان زحمه لما بروح من الدائر لغايه الحدايق دى بكون فطست من الوصله بتاعتها
ربنا معاك
ولما حد يقولك تانى فيروصات قوله انا مطعمها متخافش ههههههههههه

أشرف حمدي said...

ههههههههههه
انا بقى ساكن آخر فيصل ، مش بعيد عن حدايق الأهرام واعتقد أنها تابعة لسنترال المريوطية الملعون

يعني كمان مشروع فودافون ده طلع خراب بيوت هممممممم

أنا قلت ، هو حزام ناسف وأفجر نفسي في السنترال ، حتى يمكن يتسمى على اسمي
سنترال الشهيد أشرف حمدي :)

... amr said...

ممممممممم .... دة على كدة بقى اكتوبر نعمة :))))
ولا شبرا ... يا سلالالالالالالالالالالالام بالنسبة للي بتقولوا يبقى لووز لووز

مش عارف لية متخيل الاعلان بعد كدة هيكون اتكلم عربي يابن بلدي
ماااااااااااااااااااااااع
:S

فنان مسلم said...

ههههههههههههههههههههههه
ههههههههههههههههههههههههههههههههه
ههههههههههههههههههههه

كالعادة مبتخيبش ظني , وبتنتزع الضحكات مني عالريق كده بتدويناتك :D

لو عايز رأيي الشخصي , اسكن في مدينتي

أشرف حمدي said...

AMR
والنبي ما تخليني أحقد عليك يا شيخ ، قوللي بس أعمل ايه أرجوك
لو عندك اقتراح أظرفني اقتراح
اللي مجنني إن المنطقة اللي ساكن فيها تعتبر راقية إلى حد ما ، منطقة سياحية وبتطل على الهرم وورانا فندق كبير ، ده كنتاكي فتح في فيصل يا راجل
وشعبان عبد الرحيم ساكن جنبي
أمال لو كنت عايش في قرية نائية كان حصل ايه ؟ آه أقولك أنا
كنت قعدت جنب الجاموسة أزوم معايا كل ما اشوف حد ماسك موبايل
---------
فنان مسلم
إضحك يا خويا
إضحك ، مانت عايش في السعودية يا عم وانا اللي هنا بكح تراب
تلاقي عندوا النت مجانا
:))) ماشي يا عم
اللي مجنني إني مش حقدر أنشر كاريكاتير لا بكره ولا بعده بسبب المصيبة دي
اتخرب بيتي
حاكل طوب عقبال ما السنتوال ده يغور في داهية

أشرف حمدي said...

والنبي أبوس ايديكم ماحدش يقوللي اسكن هنا ولا هناك
هو أنا أضرب الأرض تطلع شقق ؟ :)
حغير شقتي زي ما بغير شرابي كده عادي ؟
لو بعت الشقة ممكن ألحق لي أوضة فوق السطوح بتمنها

... amr said...

اعمل اعتصام .... وكقفة احتجاجية بالجلابية ضد سنترال المريوطية
ممممممم ... اه ... هددهم انك اا...
ولا بلاش دي
ممكن اللي فاتوا يجيبوا نتيجة

kochia said...

عاوز الحق
البلد دي بتمشي بالصوت العالي
علي صوتك مرة واتنين وتلاتة واربعة
حقك هيرجع بس هتاخد وقت
بس هيرجع

واعمل ثورة صغنونة علي السنترال ده

جرب
هي خربانة خربانة

Oussama achraf said...

يا سيدى انا مستغرب جدا انت محموق على اية مش تحمد ربنا ان لما حد بيسئللك ويقوللك بتقلة اة وان انتا عندك شنترال تابع لية وبعدين انت زعلان لية انت فى مصر انت فى مصر انت فى مصر اصححححححححححى بقى منا اهو الحمد للة بقالى 5 شهور مقدم على adsl و لسة مدخليش علشان سنترال سيدى جابر فية اصلاحات وبردة موضوع الخطوط النتداخلة دة بيتيح للشعب انة يتعرف اكتر على بعض وبعدين يا مواطن مش من حقك تقول لأ

أشرف حمدي said...

amr
عملوا اعتصام قبل كده ومافيش فايدة
------------
kochia
انا بعت المدام تتخانق بدالي ، للأسف انا في الشغل ، ماهو يا أتخانق يا أشتغل
ياربي انا ليه مطلعتش ظابط ولا حتى أمين شرطة
كان زماني موريهم العين الحمرا والزرقا وكل الألواااااان
------------
اسامة
انا اعرف ناس مقدمة عندنا من قبل ما يخترعوا النت اساسا ولسة ماجاش

أشرف حمدي said...

حد يعرف يا جدعان موضوع إنترنت اتصالات اللاسلكي ده ايه ؟ وإذا كانت فيه عروض تانية رخيصة شوية ؟

TAFATEFO said...

يا دطترنا منا قولتلك الحل من زمان في الـ ثري جي .. انت هتقعد تستنى سنترال يصلح من نفسه

150 جنيه في الشهر .. وهتستخدم سرعه معقوله 384 ك.ب.ث. وفي 6جيجا في الأول بسرعه عاليه

أحسن وأوفر ميت مره من الدايل أب وتقعد تحت رحمة السنترال

أشرف حمدي said...

ماهو يا باشا الـ 6 جيجا دول يخلصوا في يومين ، وبعدين أقعد بقيت الشهر بسرعة قد بتاعة المودم العادي ، يبقى كده التكلفة تعتبر عالية فعلا
ماتعرفش إيه حكاية الاشتراك السنوي أبو 1788 جنيه ده ؟
بيقولوا الراوتر مجانا ، لكن هل التحميل منه مفتوح ولا برضه كل شهر 6 جيجا بس ؟
شكرا يا مان

enjy said...

اشروف....بص مبدئيا ممكن متبصش لاقتراحى اصلا لانى بصمجية فى المواضيع دى بس انا شفت اوعلان كدة لاب توب ومودم اتصالات وبتاع وحبشتكانات يعنى انت اى نعم هتصرف مبلغ وقدره بس احتمال تتحل للابد بالطريقة دى....يللا يا اشرف تعب ساعة ولا كل ساعة بس على فكرة النت كافيهات عندكوا متشددين اوى يا عم ايه دة

soreal said...

honestly.. u need to organize a public action


fe auroba wa eldowal el 3'arbya.... el nas betwasat be floos-hom
ma3 el nas de... mafeesh 7agah betwga3 ad elfolos :P

i mean why u pay if someone else is using ur line... dont pay.. and let the line go dead... they ll run after u to get "their money" from u

Anonymous said...

أنا مت من الضحك والله، انا ساكن في فيصل في الطوابق و التليفون شغال. انا جبت اتصالات مودم. تدفع 1250 مقدم و النت سرعته 3.5mps ليك اربعة جيجا. لو خلصوا السرعة تنزل لي 512. و كل شهر طبعا 150. ارجو اني اكون ساعدتك. و مبيقطعش. و لو عندك لاب توب هيفيدك. حاجة زي الفلاشة كده تشغل بيها النت في اي حتة. اربعة جيجا في الشهر. والاشتراك لمدة سنة. و المودم يشتغل ريدر.

david santos said...

Happy New Year....

وينكى said...

انا قريت كلمة جاموسة من هنا والمكتب اتلم من هنا على صوت ضحكى
كنت متوقعه والله انه حاجه على تليفونك
مش عارفه اقولك ايه
مكسوفه عشان باضحك من بلوتك بس مش قادره امسك نفسك
انت روح عزل ارحم
هاتوفر اكتر من المشاكل دى كلها

أنا المستقبل والأمل said...

ياشعب مصر لقد تأخر عصر الحياة الكريمة طويلاً وإن لم نبدأ في المطالبة بتطبيق وثيقة المستقبل والأمل من الآن فإن هذا النظام الديكتاتوري الحالي أو إمتداده سوف يتمادى في غيه وظلمه وفي هذه الحالة لا نلوم أحد سوى أنفسنا ولذلك يجب أن نوحد كل الجهود والأهداف وعدم الإنصات إلى الأحزاب الوهمية التي تتصيد المواقف. ياشعب مصر لقد بدأنا فكرة الإعتصام المدني بكم فلنجعلها تستمر مرة أخرى وبكم فالرجاء عدم الإلتفات إلى الأمور الجانبية والهامشية وإلى كل من يريد أن ينسب لنفسه فكرة الإعتصام المدني لأنها ببساطة فكرتنا وليست فكرة إسراء أو جماعة ٦ أبريل أو مجموعة الفيس بوك (راجع مدونة وائل عباس الوعي المصري وتحديدا في بوست صور قتيل جزاري الشرطة الطفل يوم ١٥ أغسطس عام ٢٠٠٧)

ياشعب مصر لابد وأن نبدأ إعتصام مدني آخر ولابد وأن يستمر إلى أجل غير مسمى وأن نتكاتف جميعاً حتى يتم تحقيق المبادئ الأساسية من وثيقة المستقبل والأمل والتي
نلخصها في النقاط الخمس الآتية
١) الإفراج فوراً عن كل المعتقلين السياسيين وخصوصاً من أمرت النيابة بالإفراج عنهم ولازالت وزارة الداخلية تتخذ منهم رهائن ومحاسبة كل المسئوليين الذين خالفوا أحكام القانون والدستور وفوراً

٢) إنهاء كل القوانين الإستثنائية والعسكرية من تطبيقها على المدنيين والحد من سلطات العسكريين وأجهزة الشرطة في الحياة المدنية

٣) البدأ فوراً في تكوين لجنة عليا من أساتذة القانون أوالقضاة أو منهما معاً لإعادة أو بداية كتابة وصياغة دستورالدولة ولا يكون أحدهم يعمل أو سبق له العمل في أي حزب من الأحزاب القائمة أو السابقة وذلك لوضع ضوابط ومواصفات وشروط ترشيح أو إقالة رئيس الدولة ونائبه وضوابط الهيئة البرلمانية والهيئة القضائية العليا وتحديد سلطات وإختصاصات كل هيئة بما فيها رئيس الدولة وعلى ألا تزيد فترة الرئاسة عن فترتين بحد أقصى ولا يجوز أن تجدد أو تمد بأي حال من الأحوال

٤) تكون هذه اللجنة هي النواة للجهة القضائية العليا
(Supreme Court)
وتكون ذات عدد فردي (خمسة أو سبعة مثلا) حتى لا تتعادل الأصوات عند التصويت على أمر ما

٥) لابد وأن يكون هناك إشراف دولي عن طريق الأمم المتحدة أو إحدى منظماتها للمراقبة والإشراف على سائرالعمليات الإنتخابية نظراً لإنهيار الثقة في أي نظام داخلي محايد

الرجاء من كل المصريين نساءاً أو رجالاً شباباً كانوا أم شيوخاً في داخل مصر وخارجها نشر البنود السابق ذكرها من وثيقة المستقبل والأمل وإعادة طباعتها وتداولها عن طريق البريد الإلكتروني وأجهزة المحمول وجميع مواقع الإنترنت لتوحيد أهدافنا ومطالبنا ونرجو أن تعلق على البلكونات والجدران طوال أيام الإعتصام المدني مع كتابة عبارة طبقوا وثيقة المستقبل والأمل

حينما يبدأ الإعتصام المدني الرجاء من الجميع الكف عن السلبية والأخذ في الإعتبار الآتي
١) عدم الخروج من البيوت إلا للضرورة القصوى وعدم إتلاف أو تدميرأية مرافق عامة كانت أو خاصة

٢) عدم الإشتباك أو الإحتكاك مع أفراد الشرطة وتجنب العنف والمظاهرات بصفة عامة لأننا نتعامل مع بطش ليس له مثيل

٣) شراء إحتياجات تكفي لفترة طويلة مع التركيز على مستلزمات الأطفال وتخزين كميات كبيرة من المياه والشموع لإحتمال إنقطاع المياه والكهرباء عمداً ولفترات طويلة لإجبارالناس على الخروج من البيوت وتصيدهم في الشوارع

٤) من حق كل مواطن أن يدافع عن نفسه وأهله وبيته في حالة تعرضه في مسكنه لأية إقتحامات أو إنتهاكات غير قانونية

ياشعب مصر إن الدولة في حالة إنهيار شديد فيجب ألا نشتت أنفسنا بأمور جانبية أو ننساق خلف وعود كاذبة ولذلك نريد التكاتف وعرض كل الأفكارالبناءة وشرحها للناس ليعلموا أن حل المشاكل لن يكون بمنحة بأموال مزيفة ولا بإقالة العادلي وأمثاله ولابظهور الخبز فجأة ولفترة قصيرة ولا عن طريق الأحزاب الوهمية وإنما بداية التتغيير تكون بتطبيق وثيقة المستقبل والأمل فياشعب مصر «طبقوا وثيقة المستقبل والأمل»

لابد أن نتحرك وإعلموا أن ساعة العمل قد حانت
والسلام عليكم ورحمة الله وبركاته

ساره said...

نحن مجموعه من المدونين والمدونات نشارك بدعاء واحد الاهل غزه الشرفاء فى الساعه الثالثه فجر الجمعه الموافق الثاني من يناير
صيام الخميس تطوعا الاول من يناير
وصلاه والدعاء لهم فجر الاربعاء 31 من ديسمبر
شاركونا

الداعيان
http://raghy-emraao-gheer-mathona.blogspot.com/
http://yallaqalb.blogspot.com/
جزاهم الله كل خير

Anonymous said...

لو سنترال المرة يو طينية مضايئك ممكن تعزل تبع سنترال ميت أبوجاموسة وإتكلم انضى يا ابن باندى

Anonymous said...

انتى اهبل ولا ايه
الكونيكشن مش بيوصل للاماكن الى الاراضى فيها رطبه وده فى كل العالم مش المريوطيه
لان مواصفات مد الخطوط النى تنقل الخدمة
بيحصل فيها مشاكل
وده كل مهندشين الشبكات والمهندسين عرفينوا من ايام الكليه

Mohamed Beshir said...

تصدق بايه ياكابتن انا مع سنترال المريوطيه ده من قديم الازل هو سنترال تاريخي اصلا.كل يوم اشتكي لتي اي داتا من الخدمه الزباله يقولولي السنترال لحد ما واحد في خدمه العملاء قاللي "انت مش واصلك 40% من الخدمه عايز ايه تاني؟" انا مسكت نفسي ومرضتش ارد عليه بطريقه زباله قلتلو يعني ابقي ادفع 40% بس ولا ايه؟
كل يوم شكاوي في كل حته والمشكله اني مينفعش حتي اروح سنترال تاني الرمايه ولا الهرم مثلا . ايه هنقول ايه بقي!
يحرقهم بجاز

Counter