Total Pageviews

Thursday, November 30, 2006

تدوينة علي المقهى


انقطعت عن مقهاي المفضل منذ يومين
كنت قد أشتكوت من نوعية معسل التفاح التي بدأ المقهى في تقديمها مؤخرا وعدت اليوم علي أمل أن يكون مخزون المعسل السابق قد نفذ ولكنني وجدته أسوأ مما كان , فأخبرني المعلم حسن أن
:
ــ التفاح ده بحريني يا بيه
ــ بحريني ايه ؟ ده ولا موزمبيقي يا راجل
ــ أنا عارف إنه مالوش طعم بس تعمل ايه بقى , منه لله اللي باعهولنا .
ــ ياريت جت ع الطعم وبس , أنا أول مرة أشوف معسل لايت
راقت له الدعابة فراح يضحك في وحشية حتى بانت أسنانه النخرة .

كان من الواضح أن صنف المعسل مغشوش بدليل أنني بدأت أفكر في حال البلد .
البيضة المصابة بأنفلونزا الطيور والتي يرفض قطى الصغير التهامها ويلعب بها ظنا منه انها كرة بينج بونج , تلك البيضة المسكينة وصل سعرها الي خمسة وسبعين قرشا وأحيانا جنيه .
أما كيلو البصل المضروب فوصل سعر الكيلو الي خمسة جنيهات , يعني الواحد يخرّط تفاح علي السلطة أحسن
البطاطس أصبحت غير صالحة للقلي وتتحول الي اللون الأسود فور ان تشم الزيت
المياه ملوثة وتصيب المئات بالتسمم
البطيخ مسمم
والخضراوات مسرطنة
كمان المعسل مغشوش ؟ أنا أشد وصاحب القهوة يتسطل ؟
أهو ده اللي مش ممكن أسكت عليه أبدا

22 comments:

Anonymous said...

يعنى من كتر أهمية المدونة فى حياتك بتعملها على القهوة كمان .. أمال انت بتشتغل امتى يا عم الحج ؟

حــمــيدو said...

عزيزي اشروف

2

لايت


لو


سمحت

ALiaa said...

مابشربش شيشة .... بس بجد ماعدتش أعرف أعمل أونيون رينجز و فرينش فرايز..... أمري لله بقي... هبقي أشتري من هارديز.... أوه لا لا سيت أمبوسيبل
:D

Anonymous said...

وعدتك ياأشرف أني أعمل لنك لمدونتك من موقعي ...لو رحت موقعي دلوقت هتشوف بنفسك..بس لو بطلت شد أنفاس ساعتها هحبك أكتر عشان الفنان لازم يبقى قدوة ويحافظ على صحته ولا أيه يا دكتور؟؟؟؟

أشرف حمدي said...

aliaa
ايه اللي انتي بتقوليه ده ؟ دي ادوية دي ولا ايه ؟
واحد ابن حلال قاللي انك تقصدي حلقات البصل والبطاطس المقلية
فعلا .. انا محروم منهم بقالي ييجي شهر
زمان كان يقولك الفقير يجيب رغيف عيش ويدش فحل بصل وياكل
هييييه دونيا

الفنان ياسر حسين
أشكر لك اهتمامك وميرسي علي اللينك
بس هو فين ؟

أشرف حمدي said...

الفنان ياسر حسين
آه خلاص .. اللينك ظهر عندي بس أخد شوية وقت .. ميرسي جدا
تحياتي

Anonymous said...

ولا يهمك يافنان
وإلى مزيد من التقدم وربنا يوفقك
بس عشان خاطري سيبك من المعسل وإن كان ولابد ابقى قزقز لك شوية لب سوبر ولا حتقولي ده كمان غلي وبقي زي البيض
عموما أقول لك ....صوم أحسن
على فكرة ...أنا منتظر الحلقة القادمة من إجرام ...دي شخصية كارتونية لطيفة تصلح لمواقف كتير

Anonymous said...

اشرف باشا ، ليا مدة معدتش من هنا
عموما نشوفك بس و ليك عندي علبة معسل خصوصي يختلف كلية عن معسل القهاوي إياه

Dananeer said...

جيت على الجرح انا بكره البطاطس دى

dandana said...

اياك تسكت....

انا هاساندك كمان...

يالا خلينا نحتج على حاجة واحدة من نفسنا...

أشرف حمدي said...

dandana
تعرفي يا دندنا ؟ انا والدي كان في أسبانيا أيام الشقاوة زمان . ماشي في أمان الله فلقى مظاهرة كبيرة قوي . سأل ايه يا جدعان اللي بيحصل ده ؟ قالوله : أصل الويسكي غلي !
مظاهرة عشان غلّوا الويسكي في أسبانيا في السبعينات .
لا تعليق !

Anonymous said...

ممممم.....اسسسسس.....ممممم.....معلش اصلى اتسطلت من ريحه المعسل بتاعك انت وصاحب القهوة.....بس الى انا فكره ....انهم زمااان كانوا بيقولوا .....بصله المحب خروف .....افتكر دلوقتى بقت.......خروف المحب بصله.....ككككرررر

Anonymous said...

مش مهم المظاهره دى ليه؟؟
المهم انها احتجاج على الحال المايل اللى خلانا ندور على اللقمه فى صفايح الزباله
معلش انا منفعله شويه لانى شفت المنظر دا بعينى كذا مره

Anonymous said...

معلش اسمحولى اخرج عن الموضوع

هذا فيديو مضحك جدا عن عسكرى امن مركزى بيسألوه سؤال المفروض أة طفل فى مصر يعرف اجابته

وعد شرف انكم حتقعوا من طولكم من الضحك

هاهاهاها

http://www.youtube.com/watch?v=t_3l95tYfD4

فرى

smraa alnil said...

ههههههههههههههههههههههه
صح اهو اللي قلته في الاول دة كوم وحكاية المعسل دة كوم تاني
اومال هنمخمخ بايه
اي نعم انا مش ليا فيه
بس بصراحة بحب ريحة التفاح
حتي اللي هنشمه كمان مغشوش
حسبي الله ونعم الوكيل
اياك تسكت لازم تتكلم
انا بقي حزينة عشان البطاطس دة انا بحبها مووووت
صحيح هو ليه محدش مننا اتكلم علي موضوع ان البض غلي
ولا احنا سكتنا اسوة بغلي الماء لما بنعمل شاي
انا كمان القط بتاعي مش بقي ياكل بيض
مع اني بجيبه ليه هو مخصوص
حس بيا وقال خلاص كفاية عليها تاكلني بسارة

Anonymous said...

مش ملاحظ ان كل حاجه بتغلى الا الانسان بيرخص!!!!!!!!!!!

Anonymous said...

هاهاهاههههههاهاهاههه
عسكري الأمن المركزي ده بيثبت النكتة اللي كنا بنسمعها زمان انه بيتم اختيارهم كالتالي : بيقولوا لهم اللي بيعرفوا يقروا يجيجوا يمين واللي مبيعرفوش يجوا شمال ...اللي بيفضلوا واقفين في النص هما دول اللي بياخدوهم في الأمن المركزي وأهو الفيديو ده أكبر إثبات و شكراً للي ضحكنا على المأساة دي

Anonymous said...

هو المعسل دلوقت ده معسل ...المعسل كان زمان كنت تحب تعدي جنب القهوة عشان تشمو حتى ولو مكنتش مدخن ...كانت ريحته زي البخور

أشرف حمدي said...

m4m
رأيك في وشوشة انا احترمه طبعا ولكن أرجو أن تعذرني لأنني لم استطع نشر تعليقك لما به من ألفاظ لا تليق
انا لا ألعب دور الرقيب ولكن أختي وخطيبتي وصديقاتي يدخلون هنا وليس من الائق ترك تعليقك
عذرا

Unknown said...

د.أشرف...من الأفضل لأختك وخطيبتك وصديقاتك اذن ألا يقرأوا المجلة التى تعمل بها والتى نشرت الكلام الذى استشهدت به عندك.. وأظن اذا أردت أن تعلق على كلامى فمن الصواب أن تنشر ه حتى يفهم من يقرأ ولا يصل اليه انطباع من كلامك أن كلامى لا يليق...صح يادكتور ولا غلط؟

أشرف حمدي said...

أحترم وجهة نظرك
وشكرا علي رأيك
بس انت متضايق جدا من وشوشة لدرجة بها الكثير من العصبية . لا تقرأها يا مان ان كانت لا تعجبك الي هذه الدرجة
الأمر بسيط كما ترى ولا يستدعى كل هذا الهجوم الغير مبرر
تحياتي

Anonymous said...

أنا كان عندى واحد صاحبى كان بيعمل المعسل التفاح فى بيته .. كان بيبشر التفاح و يضع عليه عسل اسود و مهبب .. و يضعه فى بطرمان و يحفظه فى الثلاجة فترة .. بس مش فاكر ان كان بيحط عليه مواد اخرى

و هذه هدية محبة من العبد لله


التسهيل في عالم التعسيل

http://www.blue-22.net/ib/index.php?showtopic=2274

فرى

Counter