Total Pageviews

Monday, September 01, 2008

تخاريف رمضانية


أشهر رجل في مصر ، بالتأكيد رأيت صورته سواء اكنت مدخنا أم لا ، الرجل ذو القناع الذي أصبحت صورته على كل علبة سجائر فيكي يا مصر ، قرار وزارة الصحة للحد من ظاهرة التدخين بطريقة : لو شربت سجاير تاني حتبقى عامل زي عمّو كده . عم بيومي الذي ظهر على الفضائيات ميت فل وعشرة بسم الله ما شاء الله ، يتظلّم لرفع صورته من على علب السجاير بالرغم من موافقته على أداء هذه التمثيلية المبتذلة أول الأمر ، على أية حال ظهورة في الفضائيات يحقق مزيد من الشهرة له بالطبع ، ولا أستبعد ظهوره في إعلانات الساجير عما قريب على غرار الكاو بوي الأمريكي اللي راكب ع الحصان . طب ما نيجي نهيّس عليه شوية ؟
أعتقد أنه لن يحتاج إلى حمل بطاقة شخصية ، يكفيه إخراج علبة السجائر من جيبه لأي أمين شرطة ، كما لن يقع في الموقف المعتاد بالمصالح الحكومية حينما يكتشف أنه لم يجلب معه صورا شخصية كافية لتخليص أوراقه ، ممكن يلم ست علب سجاير ويقص صورته من عليهم ، ولكن السؤال الذي يحيرني ، هل يجرؤ هذا الرجل على السير بالشارع ؟ أكيد لو حد شافه حيرقع بالصوت : الراجل الفقري اللي قارفنا بصورته أهوه ، هجوووووم . كما أتسائل عن شعوره وهو يرى صورته تدوسها الأقدام في كل مكان وتحتل جزء لا بأس به من صناديق القمامة ، علاوة على شعوره بأنه خلقة لا يريد أحد رؤيتها خاصة على الصبح ، يعني أصطبح بوش الراجل اللي على علبة السجاير مثلا ، طب ده اللي يشوفه يكح مثلا ولا يعمل ايه ؟ طب سؤال كمان ، ليه مافيش صورة على الجنب التاني من علبة السجاير فيها واحدة ست مدخنة ؟ مش الست نص المجتمع ؟ يعني مثلا الراجل يبقى على الوجه الامامي ومراته الناحية التانية وعلى الجنبين صور صغيرة لعياله المدخنين مع تحيات عائلة إبّو
.
محمد شومان الذي صنعوا منه بطلا قوميا بعد إشاعة خبر رفضه تعاقدا جديدا لاستكمال سلسلة أعلانات الضرائب المبتذلة ، شاهدت له اليوم إعلانا جديدا يهدد فيه الأطباء بالضرب طرقا بالشاكوش على أم رؤوسهم مالم يقدموا فواتير ضريبية لمرضاهم ، طب والله كويس إن البلد لسة فيها دكاترة ماسفروش السعودية ، ولسة كمان عندهم إمكانية فتح عيادة
.
العيادة ، سيت كوم جديد على قناة أو تي في أنصح الأطباء بمشاهدته ، ليت الواقع مرحا هكذا ، يذكرني الأمر بمسلسل أوقات حرجة المأخوذ عن مسلسل (إي آر) الشهير ، أجواء طبية نظيفة ، مرحة ، مفعمة بالحماس والأمل، لدرجة انني في وقت ما كان حلمي هو ان اعمل طبيبا في مسلسل ، لو منتج عاوز يعمل مسلسل طب أسنان أنا دفعتي كلها تحت أمره ، اهو على الأقل نلاقي كرسي نشتغل عليه ، ونمارس شوية طب الأسنان اللي اتعلمناهم قبل ما ننساهم
.
طوفان المسلسلات هذا العام يشعرني بالغيظ ، لا لأن الأفكار قديمة ومكررة ومبتذلة وسخيفة إلى أبعد الحدود ، بل لأنني أرى ملايين الجنيهات المهدرة ، والتي لو بنوا لنا بها مستشفى أو مدرسة أو حتى إكشاك سجاير لكان وضع الشباب مختلفا تماما
.
لماذا لا يدرس الطلاب في المدارس أشعار صلاح جاهين ؟ لماذا لا تقرر رواية يوتوبيا على طلاب المرحلة الثانوية؟ لماذا تكون الأشعار والنصوص المقررة دائما سخيفة ورخمة ومقرفة ، لماذا لا نرى سؤالا في امتحان اللغة العربية يطلب ذكر مظاهر الجمال في الأبيات التالية :
عدى النهار .. والمغربية جاية .. تتخفى ورا ضهر الشجر
وعشان نتوه في السكة .. شالت من ليالينا القمر .

لسبب ما ، تلح على هذه الأغنية منذ أكثر من أسبوع ، لم أسمع ماهو أصدق وأعمق منها .
بس خلاص

17 comments:

TAFATEFO said...

كل عام وحضرتك بخير يا دكتورنا

وعدى النهار من الحاجات اللي ملازماني علطول .. ومش هتلاقي معاني أصدق مما يكتبه الأبنودي

Dina said...

يا عم اشرف انت بتغنى لنفسك مفيش فايدة تصدق ان ناس كتير اعرفها بتشترى السجاير و تغطى الصورة بورقة بيضحكوا على نفسهم
و منكرش انى احيان كتيرة بيعجبنى خفة دم محمود شومان يعنى الناس بتدفع ضرايبها و هى بتضحك بذمتك مش تطور
و الاهم بقاانا زيك من كتر م بتفرج على المسلسلان الاجنبى الخاصة بمجال الطب اتمنيت اشتغل دكتورة فى مسلسل جريس اناتومى اهو على الاقل هلاقى مز حلو ونحب بعض و المستشفى نضيفة و ملايكة الرحمى بيضحكوا و كل حاجة متوفرة حاجة كدة تخليك دكتور حتى لو كنت ادبى مش علمى اما بمناسبة شوية الطب اللى اتعلمتهم و هيطيروا من مخك ف سنانى تحت امرك
كل سنة و انت طيب و رمضان كريم

أشرف حمدي said...

Tafatefo
وانت بالصحة والسلامة يا دكتور :) بس بصراحة بحب أكتر أحمد فؤاد نجم ، عدى النهار هي من أروع ما كتب الأبنودي رغم إني بحب عم نجم أكتر

Diana
انا فعلا نسيت أكتب على حكاية إخفاء الصورة دي بورق مفضض :) وفيه كمان العلب المعدنية الصينية اللي انتشرت
انا تعودت خلاص على شكل عم بيومي وتقريبا بقينا صحاب ومتعايشين مع بعضينا :)
كل ما أشرب سيجارة لازم أمسي عله في الصورة وأقوله : اتفضل معايا يا عم بيومي
سعيد انك انضميتي لنادي أطباء المسلسلات
يارب نلاقي مسلسل يجمعنا كلنا يا رب
تحياتي وكل سنة وانتي طيبة

فاروق عادل said...

كل سنة وحضرتك بخير يا دكتور ورمضان كريم.انت حضرتك عارف انهم هيغيروا الصورة كل 6شهور علشان الناس متتعودش عليها.وان فى منطقتنا كرتوة السجائر بتتباع بالصورة 50جنية,ومن غيرها ب75جنيةواللة ناس متخلفة اللى بيدفعوا25 جنية زبادة علشان الصورة والمصيبة انهم عارفين اضرار التدخين اساسا

مواطن مصرى نايم said...

انا اللى بس خلاص

خلاص و الله ما فيش كلام
رغم جو الكوميديا و الهزار الذى يملئ التدوينة
فبكل هذا الالم و الحزن على حالنا و ما وصل ايه مجتمعنا لا اجد ما اعبر به من كلمات
لسه كنت بتكلم عن فلوس المسلسلات اللى بالهبل دى
و بنقول الفلوس دى تجوز كام شاب
و على فكرة بدوى واخد فلوس بالهبل
عشان الموضوع ده
سمعت انها عشرة ملايين
بس طبعا شاكك فالرقم
بالنسبة لاغنية عدى النهار
كويس انك فكرتنى بيها
عشان هى اكتر حاجة تنفع تتسمع فالايام دى
تحياتى يا اشروووووف
بوست معبر

اسلام

مواطن مصرى نايم said...

كل سنة و انت طيب يا اشروف و السنة الجاية يبقى الحال غير الحال
و اللى راكب فوق يبقى تحت
و الدنيا تتعدل
و الدكاترة اللى فالسعودية ترجع
و اللى هنا يفتحوا عيادات
و انا اتجوز بقى
ان شاء الله

Unknown said...

ههههههه
الراجل ده بجد مظلوم .. كان فاكر انه هياخدله قرشين من ورا التسويره دي
بس طبعا طبعا أخد حقه و زياده و نتيجة لطمعه في الحكومه طالب بحقه

ناس تاكب و تنكر صحيح

------------------

مش عارفه عندي إحساس بالغباء لو دخلت عند دكتور و قولتله يديني فاتوره بالكشف
ممممممممم
طب لو قلنا عند دكتور السنان و خلعلي ضرس مين فينا اللي ياخده بقي ؟
و هيبقي بكام ؟
و يا تري الضرايب علي الضرس غير السنه غير ضرس العقل ؟ و لا كله واحد ؟
يا ريت برضه يا أستاذ أشرف بما إنك طبيب أسنان تسالنا عن الموضوع ده
!!!!

--------------

مش بس المسلسلات ده كمان الأفلام اللي في السينما و الفلوس اللي بتتصرف علي كل الكلام اللي مبيعملش حاجه في الناس الا حاجه من اتنين يا بيزود غباءهم أو بيغمي عيونهم .. يا بيزود حنقهم و غضبهم بما ان المسلسلات تصور مصر و كأنها مجموعة شركات و منتجعات و البطل أو البطلة لما تعوز تسافر تعمل شوبينج بتبقي التذاكر محجوزه و البودي جاردز في خدمة سعادتها
أو حتي غير كده اللي يصوروا ان الحياه وردي و ممكن تعمل ملايين بل و مليارات في أقل من سنه
و حوارات لا تسألني عن المليون الأولي و غيرها

--------------------
بالرغم ان أشعار صلاح جاهين مليانه بالواقعيه و بجد من الحاجات اللي إتربيت عليها و بمعني أخر ربت عند اللي قروها نظره واقعية إنسانيه مختلفة .. لكن للأسف المناهج زي ما هي و مهما نعمل .. لا تحاول

علي رأي سعد زغلول مفيش فايده
:
:
تحياتي للتدوينه المتميزه
و آسفه للإطاله

Anonymous said...

صباح الفل
كل سنه و انت طيب يا أشرف

هو على فكرة ماسموش عم بيومى .. أسمه حمدى بلالا
و دلوقتى ليه كذا جروب على الفيس بوك

http://www.new.facebook.com/group.php?gid=70754095483&refurl=http%3A%2F%2Fwww.new.facebook.com%2Fs.php%3Fref%3Dsearch%26init%3Dq%26q%3Dhamdy%2Bbalala

و الجروب دى بقى بتدعو لإنتخابه كوزير للصحة

http://www.new.facebook.com/pages/Hamdy-Balala/29130096113?ref=s&refurl=http%3A%2F%2Fwww.new.facebook.com%2Fs.php%3Fref%3Dsearch%26init%3Dq%26q%3Dhamdy%2Bbalala

!!!!!!!!!!!!!!!!!!!!!!

Unknown said...

هههههههههههههه

حمدي بلالا :]

ووزير للصحة :]

هههههههههههه

هم يبكي و هم يضحك
و شر البلية ما يضحك

Oss said...

البوست جامد
بس معلش
عمو التعبان ده ارحم من صور الرئه
انا كل ما اشوف واحد بيشرب سجاير الاقى نازل شتيمه على اللى عملها
حتى انا اعرف واحد كان بيلزق ورقه سوداء على مكان الصوره

ومحمد شومان انا سمعت الخبر بتاعه على العاشره مساء
بس فى ساعتها حسيت انها افتكاسه
حد هيهرب من الحكومه؟

اهم نقطه فى البوست كله نقطة التعليم دى
انا والله كنت عامل قايمه صفحتين فلوسكاب بأخطاء المواد اللى درستها فى اعدادى بس
ده غير الملل اللى بندرسه
يعنى انا عملت ايه لما درست قصة شجرة الدر السنه اللى فاتت
طاب وليه فى القصه دى مش كملوا لغاية لما شجرة الدر ماتت بالقباقيب
وقصة كفاح شعب مصر بتاعة 2 اعدادى
قصة تاريخ ماكانش ليها لازمه فى العربى
طاب وليه اصلاً يسألنى فى الإمتحان فى القصه؟يعنى انا لو حفظتها هبقى شاطر؟؟

والله انا كنت عايز اعمل بوست كامل على الحته دى
بس مش عارف انا جالى زهايمر مبكر ولا إيه

رمضان كريم يا فنان

ياسمين حميد said...

رمضان كريم

أشرف حمدي said...

هو يا جماعة اسمه حمدي بيومي :) ما رحناش بعيد
كل سنة وانتوا طيبين :) عاملين ايه في التهييس الرمضاني ؟

Anonymous said...

على فكرة
انا عرفت ايه اللى مخلى أغنية عدى النهار بتلح على عقلك اليومين دول

الأغنية دى مع صوت عبد الحليم .. أصبحت هى المعادل الموضوعى للنكسة فى وجدان المصريين الجمعى

و بيتهيألى أن مفيش نكسة أكبر من اللى احنا فيها الأيام دى

و طبعاً لو جيت تدور على أغنية من بتوع اليومين دولتفضفض بيها مش حتلاقى
لأن اليومين دول مفيش غير الأغانى اللى زى مشربتش من نيلها و الكلام ده

يعيش بطيخ الرئيس

Unknown said...

مش لدرجه يوتوبيا
النكته بقي انها مترشحه للبوكر العربي

Anonymous said...

السلام عليكم
والله يا دكتر أنا فطسان غلى نفسي من الضحك بالذات من كلامك على الراجل بتاع السجاير ، ده اتبهدل خالص :)

كل سنة وحضرتك طيب
ودعوة متواضعة لزيارة مدونتي
مشرط وقلم
http://mezoderm.blogspot.com

شكرا

احمد فؤاد افكار نقاشات برامج فلسفة افلام said...

سلاموا عليكم واللهى فكرة الصورة حلوة لانى بدخن مع الاسف وعارف اضرار التدخين ولكن ياريد يحسنوا شوية ظروف الشباب على الاقل يوقفوا الافلام والمسلسلات اللى كلها هجس ومسخرة وفشخرة علشان ميعقدوناش.؟؟؟؟

فشكووول said...

السلام عليكم
انا زائر جديد : ابدأ زيارتى لك يوم وقفه عيد الفطى : كل عام وانتم بخير,

Counter