Total Pageviews

Thursday, September 18, 2008

اتكلم أرضي يابن بلدي

اتكلم أرضي يابن بلدي
صوتك بقى واضح قوي عندي
ولكن ليس صوتك فقط ، إن صوت كل المصريين ، صوت الجماهير ، صوت أم فاروق التي تشاركني كل مكالماتي الهاتفية وفيما يبدو أن متعتها الوحيدة هي مراقبة هاتفي ليل نهار ، فمن الوارد جدا أن أكون في حديث مع صديق لي أقول له :
ــ والله يا أخي الشغل بقى صعب قوي والواحد مخنوق يا مان .
ــ يابني هو حد لاقي شغل اليومين دول ؟
ــ مال يابني صوتك متغير كده ليه ؟
ــ لأ يا خويا ده انا أم فاروق ، قوللي بقى مين صاحبك ده ؟
ــ يا ولية إطلعي من الخط حرام عليكي عيب كده بكلم واحد صاحبي
ــ مين دي يا عم أشرف ؟
ــ يا عم اسكت انت كمان لحد ما أشوف حكاية الولية دي إيه .
وفي إحدى المرات رفعت سماعة الهاتف فوجدت اتنين حبيبة أو ماشيين في الحرام ، اتنين حبيبة في تليفون بيتي ، اتنين حبيبة يا عالم في شقتي ، هو يقول :
ــ خلاص يا قمر ، حخلص العيادة وأجيلك على الشقة
فترد عليه بخلاعة :
ــ ماشي يا روحي مستنياك ، هي هي هييييييييي
لذا ، كان من الحتمي أن أتدخل قائلا : -
ــ يا دكتور عيب كده ، أنا عارف مراتك على فكرة وحقول لها ها ها ها "" طبعا أنا لا أعرفه ولا أعرف مراته ""
ــ ايه ده يا مروة ؟ حد داخل معانا في الخط ؟
ــ طب أقفل دلوقتي وانا حكلمك بعدين .
ــ أيوة يا دكتور اقفل انت وسيبني أنا مع مروة شوية عقبال ما تروح لها الشقة بعد ما تخلّص العيادة
.
ليس هذا فقط ، بل الأروع من ذلك أنه وبعد انقطاع الحرارة الذي دام لثلاثة أيام ، صحوت اليوم على خبر عودة الحرارة سالمة فهممت بالدخول على الانترنت فورا لمتابعة أعمالي المتأخرة لأكتشف غياب خاصية الزيرو ، وحينما كنا نجرب خاصية إظهار الرقم عن طريق الاتصال برقم هاتفنا الأرضي من هاتف زوجتي المحمول وجدنا سيدة ترد !!!
ــ يا ستي ده رقم تليفوني ، انتي مين ؟
ــ إنت اللي مين يا خويا ؟
وفهمت المصيبة ، لقد حدث تبادل للخطوط ، هي لديها رقم هاتفي وخواصي وانا لدي خط هاتفها في المقابل وبدون أي خواص ، هذا يعني أنني سأدفع مكالماتها وهي ستدفع مكالماتي طوال فترة العطل التي يبدو أنها ستدوم لأكثر من أسبوع كما أخبروني في خدمة الأعطال بشركة المصيّة للاتصالات .
ــ يعني ايه أسبوع ؟ يعني انا حدفع مكالمات الناس لمدة أسبوع ؟ يعني ممكن تكون الناس اللي واخدة الخط بتاعي قاعدين ليل نهار يتكلموا على حسابي ؟
ــ معلش يا فندم ، لو لقيت فاتورة التليفون عالية ابقى اشتكي
ــ أدفع الأول يعني وبعدين أشتكي مش كده ؟
ــ مظبوط يا فندم ، ممكن أحول حضرتك بقى على الاستفتاء الخاص بخدمة الرد على استفسارات العملاء ؟
ــ قوي قوي .. أنا فديكي الساعة ؟
وفي الاستفتاء قمت بإدخال الرقم واحد الدال على سوء الخدمة في جميع الأسئلة المطروحة ، يعني أنا شايط ومولع ومش طايق نفسي وقاعد أدفع في مكالمات ناس تانية ومش عارف أدخل على النت وهي تقول لي استفتساء ؟ الله يحرقكوا بجاز وسخ .
طبعا لا داعي لأن أخبركم بانني عاجز أيضا عن إدخال خدمة دي إس إل للاتصال بالانترنت حيث أخبرتني شركة تي إي داتا أنهم أوقفوا التعامل مع سنترال المريوطية نظرا لسوء الخدمة ، يعني شركة الانترنت مقاطعة السنترال نفسه ، أمال انا المفروض أعمل إيه ؟ أفجر نفسي بحزام ناسف في السنترال ؟ أعمل لهم عمل وأرشه قدام باب السنترال ؟
هل تعلمون ما معني تبادل الخطوط هذا ؟ هذا يعني ببساطة أنني سرقت خط شخص آخر وهو سرق خطي ، يعني سارقين خطوط بأمر من الحكومة ، وفي رمضان كمان .
يا رب ، بحق صيامي النهاردة وبحق حرقة دمي كل يوم من ساعة ما ركبت التليفون وبحق فلوسي المنهوبة وبحق قوت عيالي اللي بيروح في الأرض أشوف شركة اتصالات أرضية تانية يا رب زي شركة اتصالات كده اللي ورت فودافون وموبينيل العين الحمرا ، شركة اتصالات أرضية تانية يا رب عشان المصّية للاتصالات تعرف إن الله حق وإن البلد دي فيها بنى أدمين مش قراطيس ، شركة تانية وتالتة ورابعة يا رب كمان عشان ما ابقاش تحت رحمة الشركة المحتكرة دي ، اللهم آمين يا رب العالمين . إدعوا معايا والنبي وحياة صيامكم في الشهر المفترج ده .
ملحوظة : أعتذر عن نشر أي رد يصلني من الدكتور أحمد نظيف الذي بدأ يعلق على المدونات الآن ، انا عاوز خط تليفون شغال يا ريس زي خط تليفون معاليك الأرضي كده تمام ، مش رد على المدونة أتفشخر بيه قدام صحابي ويتكتب عنه في المصري اليوم .

18 comments:

خالد كامل said...

صباح الخير يا استاذ اشرف
و الله ضحكتنى على الصبح
انا الحمد لله مش بستخدم التليفون الارضى خالص
ولا الموبايل وحياتك
:D
يا راجل بلا قلبة دماغ
يللا تصبح على خير
:D
سلام

أحمد (زوج مخنوق ). said...

و الله صعبان عليا جدا يا اشرف
فنان زي حالاتك و يتعمل فيه كده
وأم فاروق
و الدكتور اللى بيضبط
و حاجة ما يعلم بيها الا ربنا
ربنا يعينك ع المصية للاتصالات اللى مص دمنا كلنا

تصدق عندي كل شوية الحرارة تقط و لما اشتكي يقولولى ان شاء الله في خطة اننا هنغير كل الأسلاك علشان الاعطال

و طبعا موت يا حمار
لا حاجة بتتغير و لا الخطوط اللى داخلة على بعضها بتخلص

تحياتي

Oss said...

طب تصدق
انا صدقت ان الخدمه اتظبطت من كتر إعلاناتهم
"ودقيقة المحلى ب3 قرووووووش"

انت عارف
احنا مره قبل مانجيب كمبيوتر
جالنا نص جنيه استخدام انترنت

عايز ايه اكتر من كده؟
ربنا عالظالم والمفترى

Anonymous said...

ياعم دة الموبايل بقى أوفر دلوقتى :D

سيبك من الأرضى، انت حالياً يمكن مشكلتك الوحيدة هى موضوع ال
DSL
انت عايش من غيرة أزاى؟؟
:D :D

TAFATEFO said...

:D:D:D

أقولك على حل حلو .. عارف موديول الـيو اس بي اللي بتنزله اتصالات للدخول للانترنت .. بـ 150 جنيه في الشهر .. يعني أرخص من اشتراك الدي اس ال .. وبتدخل بسرعة عالية لغاية 6 جيجا .. وبعدين يحولك لـ 64 ك ب ب س بس مش بتدفع حاجه زياده

لو عندك تغطية اتصالات كويسة هاتوا وريح نفسك

فاروق عادل said...

ازيك يادكتور اشرف انا بلاك جوست اللى كان بيعلق عند حضرتك بس عملت مدونة جديدة اتمنى منك انك تخش وتشوفها

بالنسبة للموضوع هههههههههههههههههههههههههه
على فاكرة ام فاروق دى ست محترمة جدا اوعى تغلط فيها هو مشمعنى مختارين ام فاروق كدة على طول مالست قاعدة جوة ولا بيها ولا عليها

Unknown said...

هههههههههه
بتحصل والله
وساعات بسمع اذاعة الشرق الاوسط كمان في الانتظار
الحمد لله على نعمة الموبايل

Anonymous said...

ya3ny youm ma 2arod 3ala blog post leek tekon 3ala el masreya lel etisalat lool

hatlak dsl men vodafone ... gamed gedan !!

Plus 2ana 3ayez 2as2alak so2al :D howa enta leeh dayman ye7sal ma3ak 7agat 3'areba keda :D

rabena ma3ak ... !!

Anonymous said...

رقمك كام يا اشروف
عشان اكلم السنترال حالا
و انا كمان حدفع لك الفاتورة
و حتابع الموضوع ده بنفسى
بس لما الحرارة تيجى برقمك القديم ابقى ادينى رنه
;)

مواطن مصرى نايم said...

لا يا اشروف مش احمد نظيف اللى فات دا انا فى رداء الوزارة
كنت بجرب لما ابقى رئيس وزارة
حتكلم ازاى
لقيت انى طبيعى برضوا
ههههههههههههههههه

عموما اكشف راسك و ادعى عليهم و انت صايم
ههههههههههههههه
محدش بيعرف يجيب حقه من الشركة دى ابدا
انسى

و يا رب تنزل شركة تانية و تالتة و رابعة

عشان نشوفهم مزلولين زى الكلاب

تحياتى يا باشا

Anonymous said...

يابني قالولك على احمد نضيف إيه؟
عفريت المصباح؟
الراجل آخره يرد عالمدونات!
هو ده دوره في الحياة!
اطلب منه حاجة معقولة!
قول رد طويل شوية، ردين..رد مفصل..
انما خط تلفووووون؟..وأرضي؟

قلم جاف said...

يصدق في الاحتكار الحكومي قول قديم قرأته لأحد الصحفيين: من أسباب نحسه.. إنه بينافس نفسه..

اسكندراني اوي said...

معلش يا اشرف كلنا فدى المصريه للاعتذارات

أشرف حمدي said...

tafatefo
انا مش فاهم أي حاجة من اللي بتقوله :)
معلش حتعبك معايا ، اشرح لي ايه البتاع ده
------------
طالب ثانوي
معلش يا مان ، أكيد حزورك قريب جدا بس انت عارف ضغط الشغل بقى
شكرا على المتابعة
------------
معلش يا جماعة ، شكلي وحش قوي وانا مش عارف أرد على كل الناس
منه لله الشغل في رمضان والتهييس
شوية كده وأرد علي الناس كلها
كل سنة وانتوا طيبين

TAFATEFO said...

بص يا سيدي .. دلوقتي فودافون واتصالات عندهم انترنت فائق السرعه .. اللي بتستخدمه مع الـ 3 جي بتاع الموبايلات

فيه طريقة استخدام مع الكمبيوتر .. بتشتري يو اس بي مودم .. وتوصله بالكمبيوتر أو اللابتوب .. وبيدولك معاه شريحه تركبها فيه .. وبيخليك تدخل على الانترنت بسرعة 7.2 ميجا/ثانيه من أي مكان طبعا فيه تغطية اتصالات

اتصالات أرخص من فوداغون .. وفيه طريقة اشتراك في اتصالات .. تديلك استخدام غير محدود .. بس 6 جيجا بس بسرعة 7.2 ميحا/ثانيه .. وبعد كده تتحول سرعتك لـ 64 كيلوبت/ثانيه

دي بـ 149 جنيه في الشهر

ولا محتاج خط تليفون ولا سنترال بقى ولا أي حاجه من ده كله

شوف اللنكين دول .. ولو في أي حاجه ابعتلي على الميل وتحت أمر حضرتك في أي وقت

إتصالات - انترنت فائق السرعة

اتصالات يو اس بي مودم

أشرف حمدي said...

تفاتيفو بيه
شكرا يا باشا بجد على اهتمامك
بس انا لقيت ان خدمة الانترنت اللي سرعته سبعة جيجا دي تكلفتها حوالي 300 جنيه شهري
المية وخمسين جنيه دول بوع سرعة
380 كيلوبايت
عموما ألف شكر يا باشا وربنا يسهل والاسعار تنزل والواحد يلاقي صرفة في النت
ما تجيب وصلة :)

Anonymous said...

طب يا بختك ياعم الشركه هي اللي بتلاعبك
اما عندي في الشقه حاجه تانيه خالص
الراجل اللي بيوصل التليفونات اللي المفروض انه ده شغله اللي بياخد عليه مرتبه هو اللي بيخلع السلك من الصناديق عشان تتصل تقول الحقوني فالبيه ييجي ويوصل وياخد المعلوم ولما عرفنا الحوار كل واحد عرف مكان الروزته بتاعته في الصندوق عشان لما يتقطع الخط ينزل يركبها بنفسه فالراجل دور علي حل تاني بقا يشبك الفردتين سلك مع بعض فيعمل قفله بس علي مين عرفناها دي برضه اموت واعرف الناس دي بتستحل الفلوس دي ازاي اززززززززززززززززززاييييييييييييييي

Hendkh8 said...

Hey just ana 3yza as2al so2al, fen kesm fawater el telephonat la2ny msh la2ya?
la2 sama7to rodo besor3a.

Counter