اتكلم أرضي يابن بلدي

اتكلم أرضي يابن بلدي
صوتك بقى واضح قوي عندي
ولكن ليس صوتك فقط ، إن صوت كل المصريين ، صوت الجماهير ، صوت أم فاروق التي تشاركني كل مكالماتي الهاتفية وفيما يبدو أن متعتها الوحيدة هي مراقبة هاتفي ليل نهار ، فمن الوارد جدا أن أكون في حديث مع صديق لي أقول له :
ــ والله يا أخي الشغل بقى صعب قوي والواحد مخنوق يا مان .
ــ يابني هو حد لاقي شغل اليومين دول ؟
ــ مال يابني صوتك متغير كده ليه ؟
ــ لأ يا خويا ده انا أم فاروق ، قوللي بقى مين صاحبك ده ؟
ــ يا ولية إطلعي من الخط حرام عليكي عيب كده بكلم واحد صاحبي
ــ مين دي يا عم أشرف ؟
ــ يا عم اسكت انت كمان لحد ما أشوف حكاية الولية دي إيه .
وفي إحدى المرات رفعت سماعة الهاتف فوجدت اتنين حبيبة أو ماشيين في الحرام ، اتنين حبيبة في تليفون بيتي ، اتنين حبيبة يا عالم في شقتي ، هو يقول :
ــ خلاص يا قمر ، حخلص العيادة وأجيلك على الشقة
فترد عليه بخلاعة :
ــ ماشي يا روحي مستنياك ، هي هي هييييييييي
لذا ، كان من الحتمي أن أتدخل قائلا : -
ــ يا دكتور عيب كده ، أنا عارف مراتك على فكرة وحقول لها ها ها ها "" طبعا أنا لا أعرفه ولا أعرف مراته ""
ــ ايه ده يا مروة ؟ حد داخل معانا في الخط ؟
ــ طب أقفل دلوقتي وانا حكلمك بعدين .
ــ أيوة يا دكتور اقفل انت وسيبني أنا مع مروة شوية عقبال ما تروح لها الشقة بعد ما تخلّص العيادة .
ليس هذا فقط ، بل الأروع من ذلك أنه وبعد انقطاع الحرارة الذي دام لثلاثة أيام ، صحوت اليوم على خبر عودة الحرارة سالمة فهممت بالدخول على الانترنت فورا لمتابعة أعمالي المتأخرة لأكتشف غياب خاصية الزيرو ، وحينما كنا نجرب خاصية إظهار الرقم عن طريق الاتصال برقم هاتفنا الأرضي من هاتف زوجتي المحمول وجدنا سيدة ترد !!!
ــ يا ستي ده رقم تليفوني ، انتي مين ؟
ــ إنت اللي مين يا خويا ؟
وفهمت المصيبة ، لقد حدث تبادل للخطوط ، هي لديها رقم هاتفي وخواصي وانا لدي خط هاتفها في المقابل وبدون أي خواص ، هذا يعني أنني سأدفع مكالماتها وهي ستدفع مكالماتي طوال فترة العطل التي يبدو أنها ستدوم لأكثر من أسبوع كما أخبروني في خدمة الأعطال بشركة المصيّة للاتصالات .
ــ يعني ايه أسبوع ؟ يعني انا حدفع مكالمات الناس لمدة أسبوع ؟ يعني ممكن تكون الناس اللي واخدة الخط بتاعي قاعدين ليل نهار يتكلموا على حسابي ؟
ــ معلش يا فندم ، لو لقيت فاتورة التليفون عالية ابقى اشتكي
ــ أدفع الأول يعني وبعدين أشتكي مش كده ؟
ــ مظبوط يا فندم ، ممكن أحول حضرتك بقى على الاستفتاء الخاص بخدمة الرد على استفسارات العملاء ؟
ــ قوي قوي .. أنا فديكي الساعة ؟
وفي الاستفتاء قمت بإدخال الرقم واحد الدال على سوء الخدمة في جميع الأسئلة المطروحة ، يعني أنا شايط ومولع ومش طايق نفسي وقاعد أدفع في مكالمات ناس تانية ومش عارف أدخل على النت وهي تقول لي استفتساء ؟ الله يحرقكوا بجاز وسخ .
طبعا لا داعي لأن أخبركم بانني عاجز أيضا عن إدخال خدمة دي إس إل للاتصال بالانترنت حيث أخبرتني شركة تي إي داتا أنهم أوقفوا التعامل مع سنترال المريوطية نظرا لسوء الخدمة ، يعني شركة الانترنت مقاطعة السنترال نفسه ، أمال انا المفروض أعمل إيه ؟ أفجر نفسي بحزام ناسف في السنترال ؟ أعمل لهم عمل وأرشه قدام باب السنترال ؟
هل تعلمون ما معني تبادل الخطوط هذا ؟ هذا يعني ببساطة أنني سرقت خط شخص آخر وهو سرق خطي ، يعني سارقين خطوط بأمر من الحكومة ، وفي رمضان كمان .
يا رب ، بحق صيامي النهاردة وبحق حرقة دمي كل يوم من ساعة ما ركبت التليفون وبحق فلوسي المنهوبة وبحق قوت عيالي اللي بيروح في الأرض أشوف شركة اتصالات أرضية تانية يا رب زي شركة اتصالات كده اللي ورت فودافون وموبينيل العين الحمرا ، شركة اتصالات أرضية تانية يا رب عشان المصّية للاتصالات تعرف إن الله حق وإن البلد دي فيها بنى أدمين مش قراطيس ، شركة تانية وتالتة ورابعة يا رب كمان عشان ما ابقاش تحت رحمة الشركة المحتكرة دي ، اللهم آمين يا رب العالمين . إدعوا معايا والنبي وحياة صيامكم في الشهر المفترج ده .
ملحوظة : أعتذر عن نشر أي رد يصلني من الدكتور أحمد نظيف الذي بدأ يعلق على المدونات الآن ، انا عاوز خط تليفون شغال يا ريس زي خط تليفون معاليك الأرضي كده تمام ، مش رد على المدونة أتفشخر بيه قدام صحابي ويتكتب عنه في المصري اليوم .