Total Pageviews

Friday, November 14, 2008

مشاغبات كاريكاتورية

حينما سألني المذيع اللامع والمثقف شريف عبد الرحمن في برنامج مساءك سكر زيادة عما إذا كان قد حجب لي كاريكاتير أو تمت مصادرته من قبل ــ قالها وهو يغمز لي بالمناسبة ــ أجبت بأن ذلك لم يحدث !
لا انكر أنه في بعض الأحيان تحجب بعض الأعمال الكاريكاتورية ، ولكن في أي منها لم أشعر مطلقا بما يمكن أن نطلق عليه تحجيم حرية التعبير أو سقف الديموقراطية المنخفض أو أن جهة ما تريد قصقصة ريشي أو أنه قد تم حجب الكاريكاتير أو منعه أو مصادرته أو غير ذلك من تعبيرات ، والسبب أنني مؤمن تماما بأن لكل مكان خطوط حمراء لا يمكن تخطيها ، وهي أمور لا يجوز لأحد التدخل فيها بل يجب قبولها باحترام تام ، ولكن وفقا لمبدأ الأستاذ عمرو سليم ــ والذي أعمل به بمجال الكاريكاتير ــ فإنه يستوجب عليّ محاولة كسر هذا السقف وتعدى الخطوط الحمراء من حين لآخر كي تتسع مساحة الحرية وكي أظل مشتعلا طوال الوقت فلا يخبو لهب الأفكار ولكي يبقى سن قلمي حادا طوال الوقت ، هذه المرة حاولت تجاوز الخطوط الحمراء في كاريكاتير كان لابد من رسمه بغض النظر عن إمكانية نشره من عدمها ، لو لم أرسمه لأصبت بنوع من الاحتباس الكاريكاتوري وكان من الممكن أن يتسبب في مضاعفة ما أشعر به في الأساس من إحباطات عديدة .
هذا هو الكاريكاتير



في البداية فكرت أن أضع تعليقا على لسان الطبيب يقول : أحدٌ أحد
ميزة هذه الفكرة أنني أسطعت ان أعبّر بأقل عدد مكن من الكلمات عن فكرتي ، هذه العبارة كما تعلمون قالها بلال مؤذن الرسول أثناء تعذيبه على أيدي كفار قريش ، طبعا المعنى واضح !!!
عيب هذه الفكرة أنها ستواجه انتقادات كثيرة جدا نتيجة للفهم الخاطيء ، سيقال انني أسخر من أحد أهم رموز الاسلام وهذا غير صحيح بالطبع ، فالسخرية هنا من الجلاد .
فكرت في تغيير التعليق ليصبح كالتالي على لسان الطبيب أيضا : آدي جزاتنا أننا علمناكم العدّ والحساب
الفكرة هنا مقبولة ، وتتوافق مع قيام الجلاد بعد الجلدات كما في الرسم ، كما أنها حقيقة أيضا ، ولا أعتقد أن الأخوة السعوديين يمكنهم أن ينكروا فضل العلوم المصرية عليهم بدليل المليون وربع مصري العاملين بالسعودين ليس لجمال سواد عيونهم ولكن لان لديهم علم وخبرة وكفاءة غير موجودة هناك .
عيب الفكرة أنها تتعدى الخطوط الحمراء الخاصة بالناشر ، وهو شيء يجب إحترامه كما قلت ولا مجال للجدال فيه .
إذن ، فلأترك التعليق للقراء أنفسهم ، وهذا ما فعلته ، هكذا يمكنني أن أترك للقاريء مشكلة حرية التعبير ليحلها بنفسه ، وأخرج انا بكل خباثة من اللعبة بالكامل .
ولكن تم حذف الكاريكاتير أيضا
لم تكن دهشتي كبيرة ، فأنا أعلم أنني أتجاوز ، وأعلم أنني تعمدّت كسر القواعد ، واللوم عليّ بالطبع وليس للناشر .
ها أنا أنشر الكاريكاتير بمدونتي على مسئوليتي الخاصة تاركا لكم حرية التعليق .
تحياتي

30 comments:

Unknown said...

انا موافقه على أحد احد
بجد يا اشرف كاركاتيرك بيضحكني من القلب رغم العذاب الي فيه
اكتب الي يطلع منك الاول
لان ده الي هيوصل الاول
ولو اتحجب في مكان
مش تحرمنا منه انك تنشره على مدونتك هنا

Anonymous said...

اهلا دكتور اشرف
الصراحه كاريكاتير حلو اوي ومعبر
سلامز ياريس

أكون أو لا أكون said...

اللوحه معبره... وآنا مع انها بحاجه الى بعض الكلمات او الرموز حتى تضيف لها معنىً معنوي
"اذا" كان هناك فكره معينه ... مكمله للوحه.


بالنسبه للآرقام... و للعد في الصوره والتي ترمز للعدد المهول للجلدات ...ثم الارقام واصلها ...
محاوله الربط بين الفكرتين" ذكي جدا
"
يمكنك استخدام الشكل الاصلي للارقام" الشكل القديم"...في اللوحه ... عوضاً عن الارقام الهنديه الاصل الحاليه... التي نقوم باستخدامها... وبذلك تكون اوصلت رساله "اصل الرقم"... بشكل فني ...

أكون أو لا أكون said...

الارقام الهيروغليفية وطريقه الحساب المصريه القديمه لعد الجلدات... فكره...! ههههه تـذكر باصل علم الرقم.

أشرف حمدي said...

لماضة
أخيرا لقيت حد اقتنع بالفكرة وماقلش عليا كافر :) الحمد لله
وميرسي جدا على تعليقك ووعد مني أنشر هنا كل الكاريكاتير المرفوض بإذن الله
-----------------
anonymous
طب مش تعرفنا باسمك ؟ أشكرك بجد على التعليق ويارب دايما الكاريكاتير يعجبك
-----------------
أكون أو لا أكون
ايه الكلام الكبير ده كلّه ؟ يا خبر
من النادر جدا إن يكون حد فاهم قوي قوي في اللعبة كده ، أنا بأعاني من قراء مش قليلين بيفهموا الكاريكاتير العادي بصعوبة ، إنما كده الواحد يثق في القاريء أكتر ويتشجّع أكتر إنه يعبر ويرسم كاريكاتير يحمل أبعاد أعمق من الظاهر
بجد بجد أحييك جدااااا وشكرا على التعليق القيّم للغاية
تحياتي البالغة

adel said...

هههههههه
بجد تحفة يا اشرف زغم ان الموقف صعب بس جامد برضة

اما التعليق فالاتنين اجمد من بعض

عادل
http://elbald-dy.blogspot.com/

Bipolar-Girl said...

ياريت ياأشرف اي حاجة ميرضوش ينشروحا لانها بتتعدا الخطوط الحمرا تنشرهالنا احنا هنا

دي مدونتك وانت اللي تحط الخطوط بنفسك وربما لاول مرة
هيس ياسيدي

الكاريكاتور ده علي قد ماهو مسخرة علي قد مبيوجع

ومنهم لله

Anonymous said...

anonymous
طب مش تعرفنا باسمك ؟ أشكرك بجد على التعليق ويارب دايما الكاريكاتير يعجبك

اسمي جورج ياريس
انا دايما اقراء البلوج بتاعك بس دي اول مره اعلق فيها

فنان مسلم said...

حبيب قلبي أشرف

اسمحلي ادخل ببعض الملاحظات بخصوص الموضوع اللي عامل جدل كبير اليومين دول ده

وهبدأ بنظرة بسيطة على الاحصائيات
عدد المصريين العاملين في السعودية حوالي 2 مليون , وعدد المقبوض عليهم منهم لا يتعدى المائة فرد
والعدد ده لا يتجاوز نسبة واحد الى عشرة من المصريين المقبوض عليهم والمعتقلين في مصر بدون أي تهمة أو دليل , وأهلهم فقدوا الأمل في رجوعهم
الخلاصة : مالناش كرامة جوة عشان دور عليها بره
ثانياً , بتثيرني جداً العبارات اللي على شاكلة "علمناكم الحساب " والعبارات التعميمية اللي بتثير النعرات العنصرية البغيضة , اللي بنتميز بيها كمصريين وبتجري في دمنا , ومخليانا حاسين اننا "كريم العنصرين" على رأي بيرم التونسي , عنصرية لا تفرق اي شيء عن عنصرية الامريكان الاوائل مع الزنوج والهنود الحمر
وبتنسينا ان قبل ما يبقى فيه حدود جغرافية مرسومة بتقسمنا لمصري وسعودي , فيه دين واحد بندين بيه لربنا ورابطته أقوى من رابطة الدم لدرجة كانت بتخلي الابن يرفع السيف على أبوه أيام الرسول صلى الله عليه وسلم , ولغة واحدة بتجمعنا , وعروبة بننتمي اليها .عنصرية بترجعنا لأيام الجاهلية والكفار اللي بتتكلم عليهم , كل واحد مغرور بقبيلته وبيشن الحروب بالعشرين سنة في سبيل قبيلته.

الغضب اللي بيثيره الاعمال اللي زي الكاريكاتير بتاعك ده يا أشرف مبيعلش حاجة غير المزيد من الحقد في الصدور ومزيد من الاستاع في الفجوة بين الشعبين و مزيد من الاحتقان السياسي والاجتماعي بين البلدين
وكل ده بسبب سلبية القنصلية والخارجية المصرية في التعامل مع المشكلة وتحويلها لقضية رأي عام وتركها للناس اللي عطشانة لمثل هذه الصراعات العنصرية.

انا بكتبلك الكلام ده وانت عارف اني أعمل بالسعودية , ويشهد الله اني مالقيتش في البلد ده غير كل خير وترحيب , وعايش حياة كريمة ومستقرة والحمد لله

اللي عايز يعيش باحترام هيعيش باحترام , وكل الناس هتحترمه غصب عن عينهم , واللي عايز يعيش بالفهلوة واللف والدوران و اللت والعجن هو ده اللي بيقع تحت وطئة القوانين الصارمة

Anonymous said...

صباح الفل يا أشروف
قبل اى حاجه انا عجبنى جدا رأي فنان مسلم
بس انا شايفه ان الحادثة اللى حصلت دى لازم يترد عليها
السبب مش فى الخارجية المصرية او القنصلية بس
انا كمان كنت عايشه فى السعودية وكنت باتعامل على انى من طبقة ادنى
واتقالتلى فى وشي انتوا يالمصريين جايين تخدمونا وتاخدوا فلوسنا
انا مش باعمم
بس دلوقتى فيه موقف مؤلم مش قادرين نسكت عليه
انا شايفه ان أحد أحد أكتر كلمة مناسبة
ودى حرية راي وماحدش يقدر يفتح بقه

أحمــــــــدبــــــــــلال said...

حلو الكاريكاتير جداً
مع انى شايف ان تعليق أحدُ أحد كان هايكون جامد و معبر بأن اللى بيحصل ده غير انسانى فى عصرنا الحالى
أحنا لو طبقنا قواعد الاسلام صح اللى بتقطع يد السارق
يبقى البلد كلها هاتمشى من غير أيدين

Anonymous said...

يا دكتور أشرف ما بلاش الكاريكاتير دا لأحسن مدونتك تتحجب من المملكة و أنا بتابعك بإنتظام من هناك , يعني يرضيك كدا ؟

إنما فكرة الكاريكاتير مع التعليق الثاني الخاص بالعد ممتااااااازة

Anonymous said...

إسمحلي يا دكتور أشرف أرد علي الفنان المسلم

يا أستاذنا أنا ايضا أعمل بالسعودية و لي عدة ملاحظات علي تعليقك أهمها :
1- فعلا نحن كمصريين لنا الدور الأكبر في تنمية المملكة و دا فضل لا ينكرة أحد ’ و الله سبحانة و تعالي يقول (لاتبخسوا الناس أشيائهم )

2- يا راجل حرااام عليك بقي إحنا المصريين الي لنا نعرات عنصرية عحيبة تجري في دمنا , أحنا الي بيوصفونا بكرم الضيافة و إن مصر بوتقة بتنصهر فيها الجنسيات , مصر الي دخولها اسهل من دخول الحمام لكل دول العالم . بقي المصري بقي عنصري , المصري الي فتج بابة و مدينة 6 أكتوبر للأخوة العراقيين الهاربين من العراق ؟ عجبي المصري الي أكاد أجزم و أبصم بالعشرة إنه ينتصر للغريب في بلدة حتي لو علي مصري زيه , يا ريت تراجع نفسك في الجزء الأخير دا
طيب لما إحنا نكون عنصريين و احنا مصريين إحكيلي بقي عن التمييز الي في المملكة ضد الإجانب ممنوعين من التملك ليه ؟ طيب هلي احنا في مصر حرمنا العرب و السعوديين من تملك الشقق و الأراضي و الإستثمار كمان ؟ طيب ليه لو واحد اجنبي في السعودية كسر إشارة مرور العين بتكون عليه أكثر من السعودي ؟
يا ريت لو تقنعني ؟

3- حضرتك بتقول انك عايش احلي عيشة و ما شفتش من الناس دول غير كل خير إنما أنا لي ملاحظة مهمة جدا بتفوت علي ناس كثير من المقيمين الاجانب بالمملكة إنك عشان تقدر تحكم علي أهل بلد ما لازم تخرج من نطاق عملك المكتبي , بمعني آخر أنا اعرف ناس هنا احتكاكهم محدود جدا بالسعوديين نظرا لطبيعة عملة كأن يشتغل مراقب موقع نت مثلا علي عكس من يعمل طبيب أو صيدلي مثلي , هنا أنا بحتك بكل شرائح المجتمع و بعرف بلااااااوي كثير أقسم لك بالله ما شفت مقدار ذرة من خردل مثلها بمصر ؟
فمش معني ان طبيعة عملك أراحتك من الإحتكاك بنوعيات وسخة وسخة وسخة من السعوديين و أنا شفتها مثال في الغلظة و التعالي و الإستخفاف يبقي دا العيب في نظاق شغلك

4- حضرتك اكيد قريت اي صحيفة سعودية طبعا الجزيرة الرياض عكاظ , إفتح كدا صفحة الحوادث , و ابقي قابلني لو لقيتهم اقروا ان في جريمة قام بها سعودي هتلاقيهم كاتبين مقيم من الجنسية كذا اغتصب طفل او مقيم يزور الريالات او مقيم يختطف فتاة و الشعب السعودي كلللللللله امين و سليم و رفيع المستوي يا راجل عيب

Anonymous said...

معلش يا أشرف تعليق أخير علي الفنان

"اللي عايز يعيش باحترام هيعيش باحترام , وكل الناس هتحترمه غصب عن عينهم , واللي عايز يعيش بالفهلوة واللف والدوران و اللت والعجن هو ده اللي بيقع تحت وطئة القوانين الصارمةط

يا راااااااااااجل

د/ رامي شهاب الدين said...

أفكارك ممتازة ياعم أشرف

أنا عندى فكرة شبيهة بفكرتك التانية لكن مع شئ من التغيير

بص يابرنس..إنت هتخلى الراجل يعد ويغلط فى العدد ..يقوم الطبيب المصرى مصحح له..بس

دمت بكل خير .. تحياتى

Anonymous said...

انا معجبة جدا باسلوبك
أحد أحد اجمل تعبير يليق بلاهانة وعدم ادراك الدين الحنيف اللى هما مش فاهمين منه اى شى غير اخلاقيات الصحراء والبدو لو يعرفوا دين ربنا بجد ؟
ربنا من اسماءه الرحيم والعفو
من لايرحم لا يرحم

ملاك

فنان مسلم said...

وينكي

الخطأ في الاحكام القضائية وارد وموجود في كل زمان ومكان من قديم الأزل ,
التهمة المنسوبة للطبيب المصري ده لو كانت فعلاً صحيحة فهو يستاهل الحكم و أكتر , و لو هو كان مظلوم أو فيه خطأ في اجراءات التحقيق كان المفروض القنصلية والخارجية المصرية تاخد اجراء قوي فوري وتتدخل تدخل فعال . قبل ماتتحول حادثة فردية زي دي لقضية عامة زي كده .
وبالنسبة للناس اللي بتقول "انتم جايين تخدمونا" فهؤلاء بالفعل موجودون , زي بالضبط ماعندنا ناس مقتنعة ان الخليجيين كلهم جهلة ومبيفهموش ومعاهم فلوس وخلاص .
محدش احسن من حد في الموضوع ده.
وفيه الناس المحترمة اللي مبتاخدش بالتعميمات البغيضة دي , وبتعامل كل شخص على حسب شخصيته وسلوكياته هو

_____________________
Anonymous

معاك حق طبعا في اننا كمصريين كرماء جداً مع ضيوفنا وبنعاملهم أحسن مابنعامل بعض , بس ده لايمنع ان جوانا الايمان الراسخ باننا شعب الله المختار وأننا اللي صنعنا الحضارة والتاريخ و والعلم والايمان وكل حاجة حلوة في الدنيا , واننا أحسن شعوب الارض وان غيرنا مايسواش حاجة مقارنةً بينا ,...الخ الخ
وهو ده اللي بتكلم عليه

ثانياً مين قالك اني عايش في برطمان زجاجي ومبحتكش بالمجتمع وطبقاته المختلفة ؟
الواحد غصب عنه بيحتك بكل الفئات طالما انت شغال وعايش في المجتمع
وأكيد طبعاً هتقابل الامراض الاجتماعية الموجودة في المجتمع ده
اللي في (رأيي الشخصي ) أرحم بكتير من الموجودة عندنا في مصر . ربنا يصلح أحوالنا جميعاً

ثالثاً , بخصوص عدم السماح للاجانب بالتملك , فدي قوانين بتحطها كل بلد عشان تحافظ على اقتصادها ,وبرضو شايفها نقطة ايجابية ,عشان ماتبقاش ميـــــغة زي ماهي ميغة عندنا في مصر كده , تلات ارباع البلد متباعة
واحنا مش خبراء اقتصاد عشان ننقاش الموضوع ده ونعرف ايجابياته وسلبياته , لكن طالما الموضوع راجع بفايدة على المواطنين فإشطة جداً

رابعاً
"و ابقي قابلني لو لقيتهم اقروا ان في جريمة قام بها سعودي هتلاقيهم كاتبين مقيم من الجنسية كذا اغتصب طفل او مقيم يزور الريالات او مقيم يختطف فتاة"
انا اسف , لكن كلامك ده مش مظبوط على الاطلاق
الجرايد فيها كل يوم اخبار الحوداث اللي بيعملها سعوديين ولو عايز ممكن ابعتلك أمثلة كتير .

غلبان ... وليا لسان .... DeXTeR! said...

اولا الفكره جامده

ولو اني بقول التعليقين يتعملوا

علي اساس انهم دكتورين

يعني ممكن ترسم اتنين بيتجلدو و كل واحد بيقول جمله

Unknown said...

تعليقى انك فنان......يكفى صح؟؟؟

مدونة المنال said...

اخي الفاضل ازعجني هذا الكاركتير وخاصة اني سعودية كان ممكن يكون التعبير افضل لو انك لم تنال من شخصية رجال الدين .

من يدافع عن طبيب أخل بشرف المهنة و نقض قسم بقراط فهو لايستحق الاعتبار لان الطب مهنة انسانية وشريفة وموجهه الى الانسان اولا فمن ينقض شرف هذه المهنة الانسانية فهل يستحق الانسانية ؟؟

الطب مهنة انسانية ميدانها الانسان في أصعب وأضعف مواقفه فكيف يخون الطبيب انسانيته وشرف مهنته ثم نجد من يدافع عنه ؟

ولاء النعماني said...

أنت ليه شيلت البوست بتاع كريم كراميل ؟؟؟؟

أشرف حمدي said...

تركت الفرصة لفنان مسلم أن يقول رأية بحرية تامة ، ولم أرد التعليق وفضّلت أن تعلقوا انتم عليه
وقد كان :)
تحياتي لفنان مسلم وهو أحد أهم الفنانين بالنسبة لي وأكن له كل احترام وتقدير ولكن هذا لا يمنع ان اختلف معه في الرأي تماما

أشكر كل من أثنى على الكاريكاتير المتواضح ولا اجد ما أرد به سوي أنني لا شيء بدون اهتمامكم وتعليقاتكم

فقط أرد التعليق سريعا على الاخت السعودية صاحبة مدونة المنال

أختي الكريم أرجو ان تجيبي على هذا السؤال
هل لو كان الطبيب الذي ارتكب خطأ طبي ــ هذا إذا كان قد أرتكب أي شيء من الأساس فرضا يعني ــ هل لو كان طبيب أمريكي لحكم عليه بهذا الحكم البربري ؟
وأقول بربري لأنه بالفعل حكم همجي
هل كان سيجلد ألف وخمسمائة جلدة ويسجن عشرين عام ؟

سؤالي الثاني
هل يوجد في الإسلام حكم بالجلد أكثر من مائة جلدة ؟؟؟

السؤال الثالث
لو كان هذا الطبيب هو والدك ، هل كنتي ستكتبين نفس التعليق هذا ؟

تحياتي
وفي انتظار الإجابات
-------------
لولا

لأ ماشلتوش يا لولا
ماهو موجود اهوه
هو مش ظاهر عندك ؟؟؟؟؟ قوليلي احسن يكونوا حجبوه في بلاد معينة او في شركات انترنت معينة
انتي من مصر ؟

http://caricatooz.blogspot.com/2008/11/blog-post_09.html

شوفي كده وقوليلي
وشكرا على اهتمامك

ولاء النعماني said...

أخ أشرف

البوست موجود

بس الصبح ما كنش ظاهر وغالباً المشكله من الأنترنت عندي أنا

أنا مصريه ف قطر " للعلم فقط"

والف شكر على أهتمامك أنت

Anonymous said...

سلام عليكم فنان مسلم , شكرا علي إهتمامك بالرد و دعني أبوح لك بشئ للآسف لم اقتنع بما أوردتة هاهنا !

دعني أرد علي كلامك :
1- كلامك له العجب فكيف تصدق علي أننا فعلا كرماء و شعب مضياف في أول كلامك ثم تنفي ذلك في نهاية الكلام لما قلت إننا فعلا شعب كريم مضياف لكن دا لا يمنع اننا جوانا الخ ! مين قال اننا قلنا اننا شعب الله المختار ؟ مع تحفظي إن من يعتقد ذلك هم قوم إسرائيل و لا ايه , ثم ليه تنفي عننا شئ من صفات وصفنا بها النبي ص لما قال "خير جنود الأرض بمصر " او كما قال مع تقنين الكلمة بدون تعميم و إتخاذي لها كمثال ليس أكثر

جانب آخر مهم و هو هل نحن فعلا من أهل التميز بالشرق الأوسط أم لأ , هو فعلا أمر حقيقي لا جدال فيه ثم لو أردت التحدث عن التعالي إسألهم هم أي السعوديين عن التعالي و التعامل بفوقية مع الجميع

2- و عن التملك قلت أن دي قوانين منظمة تضعها البلد عشان ما تبقاش ميغة , حلو قوي طيب يا راجل انت في أول كلامك في مساهمتك الأولي إهتميت قوي بالقومية و العروبة و لغة واحدة تجمعنا و دين واحد يوحدنا علي كلمة الله و لا ايه طيب ما هي دي تفرقة اهي يا عمي , و لا هو في نهي عن الميغة , هي ايه الميغة الأول إنت بتكلمني كأنك واحد من آل سعود بتحمي الديار من الميغة ميغة ايه يا فنان ؟ أنا مالي بالإقتصاد و العمران أنا بحاول بس أنعش أفكارك الخاصة بوحدة الدين و العروبة و ليس التمييز في خير لم يكن هم أنفسهم لهم فضل في وجودة علي أرضهم ! لأنك بتقلي هيعود بالنفع علي المواطنين و قشطة جدا

3- يا ريت تبعتلي أمثلة

عُـــقـــد لُــــــــولِــــى said...

موضوع احد احد

دى فكرة بس دخلت دماغى مش من ناحية السخريه من بلال
بالعكس

ساعتها هيقولوا انك كفرت السعوديه كلها

وده معنى تانى للتعليق
بالغم بقى من ان الموضوع كله حرك شعورنا ويمكن وحد الكتير خاصة مع تضامن البعض هناك من الاطباء المصريين من خلال الاستقاله

الا ان اللى فى القلب هيفضل فى القلب

احييك على انك سبت لنا حرية اختيار التعليق
لاننا هنعلق بحاجات كتير مكنتش هتاخدها صفحة الكاريكاتير


سعدت بزيارتى الاولى لمدونتك

الميكروباص said...

ولله انت عارف
انا كنت عاوز اكتب عن الموضوع ده في المدونه عندي لكن انكسفت الحقيقه
صدقني مش قادر اشتمهم لأن مهما كان دول أهلنا أو مسلمين وعرب زينا ولو انهم مش بيراعوا الأمر ده
وبعدين التعليقات في مختلف المواقع حاجه تحزن
لكن هما عندهم عنصريه غريبه جدا مش عارف جابوها منين
حتى اصحابي اللي اشتغلوا هناك أكدوا الامر ده
ربنا يهديهم ولله

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

Geddo Iskandar said...

شوف يا أشروف - ولا وني طول عمري مبحبش الشماتة لكن المرة دي لساني "نائح" عليا قوي ...

قريت عن ناقلة البترول السعودي اللي شايلة ال 2 مليون برميل اللى الصومالين خطفوها ...

نفسي أشوف دكر لابس عقال يقلى حيعملوا إيه ولا عندهم أصلا حد يعرف يحرر المركب دي سواء بالقوة أو بالطرق الدبلوماسية

المفروض يبعتوا القاضي الشرعي بتاعهم يحكم على الصومال كلها بالجلد المرة دى + قطع اليد طبعا عشان دي سرقة و مش أي سرقة - دي سرقة أموال الأسرة المالكة!!


سبحان اللي لبسهم طرح في يوم وليلة

spark said...

في تعليق عن الموضوع دا لبلال فضل

قال انا مش عارف ليه الناس مستغربة من الحكم دا مع ان المنطقة دي مشهورة من بداية الاسلام انها بتعذب المسلمين

قلم جاف said...

مع احترامي لكل ما سبق..

لماذا لم أر عموداً صحفياً واحداً يتنحرر للمقايضة على أرواح متهمين مصريين بالقتل في ليبيا في متاجرة سافلة بالقرآن الكريم وبتفسير (%$#%) لآية الدية تحديداً؟ يا تدفعوا الدية يا يتنشوا عيارين؟ هل وصل البنتجان إلى درجة عدم التفرقة من جانب السادة الأفاضل في ليبيا بين "القتل العمد" و "قتل الخطأ" التي نزلت فيه الآية الكريمة؟

لماذا لم أر عموداً صحفياً يتناول تسلية حرس الحدود الليبي على سفن الصيد المصرية- بما أن إعلامنا الوغد أعطى الذريعة بإلحاحه المسعور على "الهجرة غير الشرعية" لتحويل كل مركب صيد مصري إلى مركب هجرة غير شرعية يستاهل الطخ بالفرفر في مياه ليست ملكاً لأي دولة؟ .. الصيادون يا سيدي الفاضل هم أفقر المصريين وأقلهم دخلاً.. ومع ذلك كانوا أول من سقط من حساب أدعياء النضال في الصحافة المصرية و"النضال الحقوقي" واليسار محتكر توكيل الفقراء في بلادنا الحزينة..

أين البهوات الذين سمعنا أصواتهم في قضية الطبيبين المصريين من المصريين في العراق ، وسوريا ، والأردن ، ولبنان ، وهي كلها بلاد بها عمالة متفاوتة الحجم من حملة الجنسية المصرية ، مثلي ومثلك؟

أين كانوا من "معركة خيطان" قبل سنوات في الكويت؟

بل وأين كانوا أيضاً من قضايا أخرى في نفس دولة المملكة العربية السعودية؟

هناك مصري بريمو ومصري سبنسة ، ضحايا العبارة الذين ظهر حولهم ألف صحفي يؤيدهم وألف محامي يطالب بتعويضاتهم ، وضحايا قطار الصعيد الذين تآمر الجميع على جعل حرقهم قضية ضد مجهول بما أنهم لا يساوون عند المناضلين شيئاً.. هناك مصريون عليهم تعويضات ومصريون عليهم عفاريت .. هناك مصريون ولاد الست ومصريون ولاد فوزية..

لو سقطت تلك التفرقة الملعونة لتغيرت أشياء بالجملة.. لكن من يتعظ؟

Counter