Total Pageviews

Friday, November 21, 2008

عادة أو عبادة .. مافيش فايدة


النقاب عادة وليس عبادة
هذا هو اسم الكتاب الذي سيتم توزيعه قريبا على المساجد وفقا لما صرّح به محمد حمدي زقزوق وزير الأوقاف المصري ، وكما جاء في تصريحه أنه لن يسمح مطلقا بنشر ثقافة النقاب بين السيدات في مصر .
لست بصدد التعليق على هذا التصريح وإنما على ردود الأفعال ، فمن خلال متابعتي التعليقات الخاصة بالخبر على موقع مصراوي على سبيل المثال أكتشفت أمرا في غاية الخطورة ، للوهلة الأولى ظننت أنني أخطأت الموقع وقد قادني محرك البحث جوجل اللعين إلى صفحة من موقع أفغاني مثلا .
ما هذا ؟ كل هذا الكم من الشتائم والاتهامات والسخف والغباء والجهل والهطل والتخلّف ؟! من قام بتكفير الوزير ومن اتهمه بالترويج للانحلال والفجور ومن سخر من اسمه وأطلق عليه زقازيكو وزقزق وزقزوقة المزقزقة ، ومن دعى عليه بالشواء في نار جهنّم ، وو و و ، المصيبة أن جميع التعليقات تدور حول نفس الفكرة الغبيّة ، وحتى الآن لم اجد تعليقا واحدا يقول رأيا مخالفا .
مهزلة ومسخرة بكل المقاييس ولكها تؤكد أمرا واحدا ، لقد وصلنا إلى مرحلة من التخلّف لم يعد بالإمكان مواجهتها بالنقاش في الصحف والبرامج التليفزيونية والكتب والمدونات الخ ، حتى هذه التدوينة التي أكتبها الآن لا قيمة لها أصلا سوى أن أعلن رأيي غير آمل في تغيير أي شيء او إقناع أي شخص .
رحم الله مصر التي لم تكن بها بنت أو سيدة واحدة محجبة او منقبة وكنا في قمّة التحضر والرقي ، كان الناس لا يزال لديهم بعض الذوق والإحترام والأخلاق والأدب .
والآن بعدما أصبحت السفالة سمة سائدة في كل جوانب حياتنا في الشارع وفي العمل وخلف الأبواب المغلقة نتكلم عن النقاب باعتباره رمز العفّة والطهارة كما جاء على لسان أحد المعلقين على الخبر ، عفّتك وطهارتك يا مصر أصبحت مجرد إيشارب أوخيمة سوداء تحوى بداخلها أفكارا أكثر سوادا وتخلّفا .
أفتح نافذة غرفتك وأنظر منها ، وقل لي ماذا ترى وماذا تسمع ؟ هذا هو الفسق والفجور الحقيقي وليس خلع النقاب هو الفجور ، بل أن أفجر الفجور أن ترتدي عاهرة ساقطة لا تساوي في نظري أو في نظر المجتمع تلاتة شلن هذا المدعو نقاب لتتستر على أفعالها ، هذا هو أفجر الفجور .
أفجر الفجور ان أعلق على هذا الخبر بالشتيمة والأباحة وقلة الأدب على أمل أن اكون بذلك حامي حمى الاسلام والفضيلة وأنا بي كل العبر .
هذا المجتمع أصبح يتحدث كثيرا عن الدين ، كثيرا جدا أكثر من أي فترة مضت ، وفي ذات الوقت وياللعجب يفعل عكس ما يقوله بالحرف ، يشتم من يقول أن النقاب عادة وليس عبادة ويتحرّش في ذات الوقت بالفتيات في الشارع بدعوى أنهن غير منتقبات ، يشتم كل من يحاول أن يخطو خطوة نحو التحضّر ويتهمه بالكفر والفسق والمجون بينما سيجارة الحشيش تتدلى من فمه ، يدعو للنقاب ونحن نعاني من مأساة أخلاقية في الأساس ، الأخلاق يا بشر التي هي قبل الدين ، وقد جاء النبي ليتمم مكارم الاخلاق التي كانت موجودة أصلا ! لو لم تكن هناك أخلاق لعبدة الأصنام لما كانت هناك أية جدوى من دين الإسلام ، لو كان الله غاضب على عبّاد الأصنام لنسفهم كما فعل مع قوم لوط ولكن يبدو انهم كانوا يتمتعون ببعض الأخلاق التي تسمح بنمو بذرة الدين ، كان لسة فيهم الرمق والأمل إن ربنا يهديهم.
نحن الآن أبشع من قوم لوط ، ونتحدّث عن الدين طوال الوقت دون أن نفكر مجرد التفكير في إماطة الأذى عن الطريق ولو بوضع طوبة بجانب الحائط ،هدمنا الحائط وألقينا بالطوبة على قطار لتكسر الزجاج وتقتل السائق ــ حادثة حقيقية بالمناسبة وتتكرر كثيرا ــ ثم جعلنا من النقاب أحد أهم مظاهر الاسلام إن لم يكن أهمها على الإطلاق ! يا سلام على التديّن يا سلام
أعجبني عمرو خالد حينما بدأ يتناول موضوعات مثل الإدمان ، هكذا أصبح آكثر واقعية ، وأصبحت دعوته ذات قيمة ، أما لو تحدّث عن الحجاب من الآن وحتى يوم الدين فالحال سيظل كما هو ، ما الفرق بين العاهرة المحجبة وغير المحجبة ؟ هل شعر العاهرة يصنع فارقا في المجتمع ؟ أن تصون فرجها أولا فهذا هو المراد . ولو استطاع رجال الدين ضمان أن يصون ولو تسعون بالمائة من شباب مصر رجالا ونساء فروجهم لكان هذا إنجازا كبيرا، بدلا من الحديث عن النقاب والحجاب .
الآن ... معظم البنات محجبات ، ما النتيجة ؟ هل شعر أحدكم بطفرة أخلاقية ؟
ربنا يحرمك يا مصر

56 comments:

حواء said...

السلام عليكم ورحمة الله وبركاته
انا واحده من الناس ( منتقبه والحمد الله ) واعتز بنقابي جدا وانه بالنسبه لي ليس عاده وانه عباده لله الواحد القهار
ولكن في ببعض الاحيان بغلط وكتير بغلط وده لاني بشر
ومش كل اللي لبس نقاب او حجاب بقي خلاص معصوم من الخطأ
العصمه انتهت عند موت الرسول صلي الله
عليه وسلم
ولو مقتنعناش اننا بشر ومش معصومين يبقي اي غلط هيطلع من اي شخص مسلم يبقي ميصليش مهو ربنا قال الصلاه تنهي عن الفحشاء والمنكر وده مش بيحصل وبنغلط
وبلاش نمسك لبعض علي الغلطه ونقول شوف المحجبه والمنقبه
احنا بشرررررررررررر احنا بشررررررر ومش معصومين
ومهما قالوا عن النقاب والحجاب مفيش واحده هتقلع النقاب ولا هتقلع الحجاب علشان بوست زي ده ولا كلام لواحد زي الشيخ المحترم وزير الاوقاف ولا كلام الشيخ المحترم شيخ الازهر
دلوقتي ادخل اي شارع في مصر هتلاقي اكتر من 5 سيدات علي الاقل يرتدون النقاب عن اقتناع
ولو كل اب وكل ام ساب لبنته حريه لبس النقاب من عدمه لكن عدد المنتقبات تضاعف بكثير
وانا بكل ادب واخلاق وحب اقووووووووووووول
اكتبوا في كل مكان اكتبوا علي جدران الشوارع والمساجد والمدارس
لن تستطيعوا اقناع احد
وبكل فخر
نقابي هو عفتي
نقابي هو عفتي

adel said...

مفيش كلام يتقال انت قلت كل الكلام و البنات كلهم اتحجبوا بس تعالي مثلا شوف البنات دي في جامعة عين شمس معظمهم بيعنل ايه

احنا فاهمين الدين غالط و كمان لما بنعترض علي حاجة بنقا ادبنا و اهل حاجة دلوقتي انك تقول علي حد كافر

عادل
http://elbald-dy.blogspot.com/

Anonymous said...

أخلع لك القبعة يا د.أشرف على هذا المقال , منذ أسابيع و انا افكر في نقاش نفس الفكرة , حقيقة بغض النظر عن توجهك الفكري أو علاقتك مع الله فإن سمو رسالتك رائع بالتأكيد , أستمر في رسالتك و دعك من أي أحمق يحاول تشتيتك بنقاشك في شخصك , الرسالة التي تحاول أن توصلها هى أكبر من شخصك نفسه .

و يستمر الغلاء حتى تتحجب النساء :) . .

شق القمر said...

من أجمل التدوينات التى قرأتها لك أ. أشرف
وبرده خلينى أقول انها من التدوينات التى قلّت فيها السخرية وبعض الكلمات التى كنت تستخدمها
:)

عن هذا الموضوع فحدّث ولا حرج
من أعلاهم ثقافة لأدناهم ثقافة

كل عام تقريبا يحدث جدال بينى وبين احدى الفتيات معى فى كلية الطب أو خارجها عن أن النقاب ليس فرضا وليس سنة

وفى النهاية

أتمنى لو أنى لم أفتح فمى

وهذكر مثال تعجبت لآراء الناس والزملاء الأعزاء ذوى الثقافة له

عندنا طبيبة فى استاف الجامعه
سنها من سن يكبر عمر والدتى بفارق ليس بسيط على ما أظن

انسانة أحترم نظرتها للتعامل مع النقاب الذى تلبسه

فهى أول ما تدخل القسم الخاص بدراستها
وأمام زملائها ومرضاها وطلابها تخلع النقاب

ينتفض الزملاء والزميلات .. كيف لا تتعامل مع النقاب كنقاب

لبسته يبقى تلتزم

________

اااااه

تعرف حضرتك المشكلة ايه ؟؟

ان فى شباب لا يؤيد فكرة النقاب
بس بيشكل عدم التأييد بنظرة عجيبة

اما متلبسيش النقاب واما تلتزمى بيه
فاهمين ان الالتزام بالنقاب معناه تبقى قمقم
متكلمش حد
متسلمش على حد
الجوانتى
مترفعهوش الا للمحارم وبس

مسألة عند ؟؟ ... ربما
مسألة غباء؟؟ ... مش هقول لا
مسألة جهل؟؟ ..... أكييييييد


النقاب كما قال لى شيخنا
أنه مكرُمَة
لا هو فرض ولا هو سنة
يمكنها أن تخلعه متى شاءت أينما شاءت أمام من تشاء
ثم أن ارتداءه لا يكون موفقا فى مثل وطننا وظروفنا
نظرا لما فيه من شوائب وقضايا من سرقة وتحرش و و و

انا بجد سعيدة للموضوع دا
بس فى الاخر هيقولوك الاوقاف تبع الحكومة
ويقولولك احنا مش بنثق فى الازهر
ويقولولك مفتى السعودية قال

وربنا يستر عالقادم

Anonymous said...

مصر الان عبارة عن فقر وفساد وجنون وهوس وهابي..نجح الوهابيون في احتلال مصر حتي الثمالة.

أشرف حمدي said...

زوجة
نقابي هو عفتي :) هذه هي المصيبة
عقلك هو عفتك اختي الكريمة وليس النقاب
أخلاقك هي عفتك
للأسف تشاركين في سعودة مصر بهذا الزي كما وصفته انا في مدونتي بالتخلّف
أتحدث عن الزي لا عنك انت
يبدو أنني ساترك لكم البلد قريبا تمارسون فيها ما يحلو لكم فلا مكان لي بهذا المجتمع
عندها سنري النتيجة
تحياتي

Ahmad atef said...

بصراحة ورغم أ،ي زيك مبرتاحش قوي للنقاب وإن كنت أحترمه وأحترم حرية من تختاره عن اقتناع إلا أني مصدوم في مدي سطحية هذا البوست ياااااااااااه هو لسه فيه حد مازهقش من الألفاظ المكررة بتاعة المد الوهابي والسعودة والحاجات العبيطة دي ويخلط بين النقاب اللي هو في أغلب الأراء مكرمة لا أكثر والحجاب الشرعي وتغطية الرأس التي هي فرضضضضضضضضضضضضضض طبعا ولومش مصدقني سمي الله كده واقرا سورة النور بس من المصحف مش من أي حتة وهابية بدوية متخلفة وشوف سعادتك هتفهم ايه يا عم التنوير أنا مادخلتش أقرا التعليقات لكن بصراحة زقزوق وطنطاوي منافقين ووعاظ سلاطين ويستاهلوا أكتر من أي كلام اتكتب عنهم ولا عشان جاروك في السطحية والهجوم علي ثوابت الدين بقوا حلوين

ولاء النعماني said...

والله العظيم يا أخ أشرف انى بكيت

والله العظيم أنى حابسه الدموع بالعافيه

عشان ما تقلقش أنت معاك حق ف كل حرف كتبته

وان شاء الله ليا رد طوييييييييييل بس الاقي وقت

حواء said...

لاحول ولا قوة إلا بالله
بقي الحجاب سواء نقاب او غيره تخلف
بجد في مسلم في الدنيا يوافق علي ان كلمه في القرأن ذكرت صريحه لكل نساء المؤمنين تخلف
انا اسفه جدا مش هدخل في نقاش معاك لانك من اول ما بديت ابتديت بشتيمه اعتبرها موجهه ليه شخصيا ولكل المحجبات والمنتقبات
وياريت ياجماعه كل واحد مننا يحترم راي التاني وفكره ومعتقادته بدون اي غلط فيه او في معتقاداته
وياريت يبقي في حريه في لبس النقاب زي ما دايما تقولوا علي بنت ماشيه مش لبسه او نسيت تكمل لبسها ديه حريه
وكمان الحجاب بصفه عامه برده حريه
بلاش الكيل بمكيالين
سعوده بقي مش سعوده ملناش دعوه احنا مصر هتفضل مصر وعمرنا مهنبقي السعوديه
وبعدين عاجبكوا اوي دلوقتي التحرش اللي مالي البلد واول محد يتكلم يقولك لبس البنات
عاجبوا اوي كده
حسبنا الله ونعم الوكيل
وياريت اللي يعرف الدكتوره اللي بتخلع النقاب اللي قالت عليها الاستاذه شق القمر
يبلغها كلمه واحده مني
اتقي الله في نفسك وفي دينك
ومن يتقي الله يجعل له مخرجا
سلام عليكم

الميكروباص said...

عزيزي اشرف
من ترتكب المحرمات تلبس الحجاب والنقاب حتى تتخفى في زي الناس المحترمين
فإن ارتكبت المحرمات وهي في زيها العادي فلن يعلق أحدا عليها
شوف يا اشرف
الحرامي لما بيتخفى بيلبس شراب في وشه
هل قمنا بتحريم الشرابات
الناس لازم تعرف ان اللي بيلبسوا الحاجات دي بشر وبني آدمين وليسوا انبياء
الآخرين هم من وضعوهم في صفة الانبياء والملائكه
ولهذا إن صدر أي خطأ منهم وجدت التعليق عليهم كثير وكبير

لك تحياتي

Yasser Hussein said...

الكتاب اسمه النقاب عادة وليس عبادة
ليس كما كتبت في موضوعك
الحجاب عادة وليس عبادة

يوجد خلط كبير عند الناس في فهم الآيات
بين الجلباب والنقاب
وبين الخمار وهو غطاء الرأس وبين النقاب

المشكلة ليست في تغطية الوجه أو الرأس
المشكلة في تسريب بعد الثقافات التي قد تتعارض مع طبيعة المجتمع المصري
واللي أنا متأكد إن المجتمع هيلفظها

أنا شخصيا أؤيد الحجاب كما جاء ذكره في الآيات الكريمة
الجلباب الذي يستر الجسم وغطاء الرأس الذي يغطي الصدر

والأهم قبل الحجاب الظاهري .. الحجاب الداخلي والأخلاق والخوف من الله سبحانه وتعالى فكم من موظف ملتحي مرتشي
وكم من موظفة مختمرة مرتشية
ولا أقول ذلك من فراغ بل من خلال تجارب شخصية لا مجال لسردها هنا

خالص تحياتي

ياسمين نعمان said...

بستغرب أويييييي لما ألاقي حد طول الوقت بيتكلم عن تطلعه و حبه للحرية .. ثم أجد منه هجوما قويا على حرية الآخرين ..
واحدة ارتضت انهاترتدي النقاب .. احنا مالنا .. هيضرنا ده في ايه ولا هينفعنا ؟؟
مش دي برده تدخل في نطاق الحرية الشخصية؟؟
و لا بس عايزين الحريه اللي على مزاجنا؟؟
انا بجد مصدومة .. كنت فاكرة ان آراء حضرتك أكثر إتزانا و توسطا ..
أنا مبدئيا مش منتقبة .. و عايزة أقول لحضرتك إن لو فيه منتقبات تصرفاتهم مش صح فدة يعيبهم و لا يعيب نقابهم ..
زي ما فيه غير محجبات تصرفاتهم سيئة .. فده لعيب فيهن و ليس فيهما يرتدونه ..
زي ما أنا مقدرش أقول المش محجبات مش كويسين عشان شفت واحدة مش محجبة بتعمل كذا .. مقدرش أقول كدة على المحجبات و لا على المنتقبات ..
أنا معاك في إن الألفاظ اللي استخدمت للرد على المقال اللي حضرتك قريته مش كويسة .. و تدل على سوء خلق .. بس برده ده مش مقياس
أنا اسفة اني أقول لحضرتك كده بس أنا حاسة في كلام حضرتك تعصب شديد .. و كمان في رد حضرتك على زوجة .. يا سيدي هي حرة في اختيار ما يحلو لها من أفكار لتعتنقها و لها الحق أن ترى عفتها فيما تريد .. مش دي حرية شخصية و لا إيه
عن تجربتي الشخصية مع المنتقبات ..
أولا معلمتي في المسجد منتقبة ..و إليها أدين بكل الفضل فيما تعلمت من علم و سلوكيات .. لم تأمرنا أبدا بارتداء النقاب و عندما جاءت اليها واحدة لتشكو لها رفض والدتها أن تسمح لها بارتداء النقاب قالت لها النقاب مش فرض بس بر أمك فرض و هو الأولى أن تفعليه ..
و دائما ما تشجعني على النجاح في عملي كمهندسة و عمرها ماقالتلي أقعد في البيت .. و حاجات كتير اتعلمتها ..
و تعاملت مع منتقبات كثر و الحمد لله ماشفتش منهن حاجة وحشة .. حتى من كانت منهن متعصبة لرأيها كنا بنتعامل عادي و نتقبل أن كل منا لها قناعاتها ..
مش عارفة حضرتك ليه شايف الصورة من زاوية ان الناس هبل و بيقلدوا السعوديين .. ما كل واحد له عقله و ربنا بيقول "و هديناه النجدين"
ويقدر يفكر ويختار يتبع مين .. ليه نحجر على اختيارات الناس و نرسم لهم الطرق التي نريدهم ان يمشون فيها على مزاجنا ؟؟
ياريت حضرتك تشوف الموضوع بهدوء شوية و بدون تعصب .. و هتلاقي الموضوع أبسط من كدة

أشرف حمدي said...

دلوقتي أنا اللي بقيت سطحي وفارغ ولا أؤمن بالحرية ومتعصّب
هههههههههههه

طيب
بالنسبة للسطحية والله اللي بيدعوا للنقاب أكيد هو اللي سطحي مش اللي بيدعوا للأخلاق

وبالنسبة للتعصب
يا سلام ؟؟؟ انا اللي متعصب ؟؟؟
أمال السلفيين والوهابيين دول يبقوا ايه لما انا ابقى متعصب ؟
واللي قاعدة في عربة مترو السيدات تخطب في الناس بلهجة جهادية إرهابية تبقى ايه لو انا متعصب ؟
واللي حاول قتل نجيب محفوظ يبققى ايه لما أنا اللي متعصب ؟
وإرهاب التسعينات واللي لسة شغال الله ينور لحد دلوقتي يبقى ايه لما أنا اللي متعصّب ؟
ماهي دي الازدواجية اللي بقول عليها

أما بالنسبة لحرية الرأي فتمام قوي
زعلانين ليه بقى من زقزوق لما قال النقاب عادة
حرية رأي برضه مش كده ؟
زعلتوا ليه من وزير الثقافة لما هاجم الحجاب ؟
حرية رأي برضه

وعجبي

أشرف حمدي said...

اللي انا بتكلّم فيه ونابح صوتي فيه وماحدش عاوز يسمع ولا يفهم هو موضوع واحد
الأخلاق ، الأدب ، الذوق ، الاحساس
فين ده من الدين دلوقتي ؟؟؟
أنا مش شايف غير شوية منتقبات ومحجبات وكلام كتييييير قوي قوي في الدين
اللي هو فين ده ؟؟؟
فين الدين في المعاملة ؟؟؟
أكتر عصر فيه سرقة وفساد ورشاوي وسفالة وقلة أدب وقلة ذوق وتحرش واغتصاب وقتل وكذب ونفاق

فرّجوني طيب عظمة النقاب ودوره في تطوير المجتمع أخلاقيا
فرجوني إن تحريم الأغاني هو الحل
أكبسوني كده وافحموني وقولوا إن من ساعة الحجاب ما انتشر والناس بقت اخلاقها أحسن

لما ييجي اليوم ويبدأ المتحرشين يقلّعوا المنتقبات في الشارع ملط حتعرفوا انا كنت بتكلّم في ايه

على فكرة بقى
نصف حوادث التحرش على الأقل كانت ضحاياها محجبات محترمات جدا

حصلت قدام عيني مرّة
وحصلت في الشارع اللي انا ساكن فيه مرّة
يعني ده لا كلام جرايد ولا كلام فاضي

يبقى الحل في الحجاب ؟؟؟
أو النقاب ؟؟؟
ولا الحل غننا نتعلم إزاي نكون ناس محترمة وعندها ضمير واخلاق قبل ما نمسك في حتة قماش قاعدين نتكلم عنها بقالنا عشرين سنة وكل يوم بنتنيل أكتر من اللي قبله

مش بقولكم إزدواجية ؟

Anonymous said...

شايف يادكتور التعليقات
خلاص مافيش فايده
فعلا فعلا .. مافيش فايدة,فمتحرقش دمك وخليك مع المتفرجين احسن,لحد مايمكن الزوبعه دى تخلص

فنان مسلم said...

أنا لست مع النقاب , ومن وجهة نظري الخاصة لا عتقد أنه فرض
ولكني في نفس الوقت لا أرفض النقاب , ولا أرفض من ترتديه
وأرفض بشدة من أسميهم بـ"التكفيريين الجدد" ,وهم ليسوا كما تظن من يكفّرون المجتمع والناس لأنهم يعصون الله , لا .. انا أقصد بالتكفيريين الجدد هؤلاء الناس اللذين لديهم "اكزيما" من الاسلام , وتصيبهم" حكة" فكرية شديدة كلما رأوا مظهر من مظاهر التدين أو محاولة التقرب اللى الله والالتزام بشعائره ,ويستغلون طاقاتهم الاعلامية والفكرية القصوي في مهاجمة من يقومون بهذه الافعال , بطرق أبعد ما تكون عن الموضوعية , وقمة في التعسف وتصيد الاخطاء و الكيل بمكيالين والتعصب

هذه الفئة - والتي أعتبرك يا صديقي أشرف (للاسف ) أحد المنتمين اليها - لا يقلون تطرفاً وعنصرية عن من يكفرون الناس ويستبيحون دمهم لأنهم لم يقتنعوا بفكرهم أو مذهبهم

Anonymous said...

ا اشرف موضوع هايل وافتكر انك عبرت عن رأيك فقط لا غير وانت حر اما الاخوة الاعزاء ممن
يتهموك بالتعصب فلهم الله
كمان يعنى مبيعرفوش يقروا
تقولون ان النقاب حرية شخصية ويجب احترام حريتهم حسنا ولما لاتحترمون حرية عدم ارتداؤه 99%من المنقبات يمارسون ضغط واحيانا ارهاب دينى على غيرهم لارتداؤه وكلامى ده عن تجربة شخصية و99%من
اصدقائى تعرضوا لذلك ومجرد قولى بعدم فرض النقاب تتم مهاجمتى بشراسة فاين حرية التعبير

أكون أو لا أكون said...

انا لست منقبه... ولكني اعتبر النقاب حريه شخصيه... وكل انسان يختار طريقة حياته كما يشاء...
تلبس حجاب... تلبس نقاب... تلبس تنوره قصيره... تحلق شعرها على الصفر... كل هذه الامور بين العبد وربه... فلماذا اقحم نفسي بما لايعنيني...

أكون أو لا أكون said...

وبكل الاحوال المظهر لا يعبر عن لب الشخصيه...
اياً كان المظهر...!!!

أشرف حمدي said...

اتهام جديد بالتعصب وأكزيما الاسلام والحكة والبري بري وربما الملاريا
ما علاقة النقاب بالإسلام ؟؟؟؟؟؟؟؟؟
هل النقاب إلى الإسلام أقرب أم إلى التطرف ؟؟؟؟
من حقي ان أقول ما شئت ومن حق أي أحد ان يرتدي ما يحلو له ولكن ليس من حق أحد أن يتحكّم في رأي شخصي انشره على مدونتي
النقاب بالنسبة لي أحد مظاهر المد الوهابي وسعودة مصر وأكبر مؤشر على نجاح التيار السلفي والمتطرف
وكلما انتشر النقاب من غير وعي ومن غير إدراك لخطورة هذا المظهر كلما بات هذا مؤشرا على قوة التطرّف في مصر

لن أنتظر حتى ياتي اليوم الذي يتم فيه منعي من الرسم باعتباره حرام شرعا ، ده الواحد ينتحر أحسن ساعتها

أو أن نرى هيئة الأمر بالمعروف في الشارع تلطش في خلق الله اللي مش لابسين على مزاجهم الشخصي برضه

أنا لا في إيدي سيف
ولا تحت مني فرس

على رأي صلاح جاهين

ياللا بقى كفّروه هو كمان

أشرف حمدي said...

يا فنان يا مسلم
سيأتي اليوم الذي ستصبح فيه عاطلا أو إرهابيا لأن الفن حرام بكل صوره
وإسال أي منقبة تقول لك رأيها في الموسيقى وفي الرسم وفي التمثيل وفي كل الفنون مجتمعة
ستجد نفسك مجبرا على العيش في خيمة تشرب لبن الإبل
صدقني هذه ليست صورة كاريكاتورية
هي صورة وشيكة جدا ومن حقي أن أتعصّب ــ إذا كان يحلو لك تسميته تعصبا ــ إلى كوني مصري
ومصر أبدا لم ولن تكون كذلك
تحياتي

فنان مسلم said...

لم أدافع عن التطرف أو الغلو في الدين

وانما عممت مفهوم التطرف ليشمل أيضاً من يحجرون على حرية الاخرين في ارتداء النقاب أو الحجاب أو عمل أي مظهر من مظاهر اتباع تعاليم الدين
ويهاجمون هذه المظاهر بضراوة.

Anonymous said...

عندك حق ااشرف واسمحلى ازعجك بعدة فتاوى قرأتها حديثا

فتوى الشيخ ابن عثيمين في تحريم تعلم اللغة الإنجليزية!
فتوى الشيخ ناصر بن حمد الفهد بتحريم العطورات ،!
شيخ الإسلام ابن تيمية يحرم علم الكيمياء ويصفه بالسحر، !
فتوى الشيخ ابن باز في تحريم القول بدوران الكرة الأرضية ، !
فتوى الشيخ عبدالله بن جبرين في تحريم عيد الحب ،!
فتوى الشيخ ناصر بن حمد الفهد في تحريم التصفيق، !
فتوى هيئة كبار العلماء في السعودية بتحريم لعبة البوكيمون ؛
فتوى الشيخ عبدالله النجدي في تحريم لعب كرة القدم ،!
فتوى الداعية أم أنس في تحريم الكراسي والمقاعد وماأشببها من آرائك ونحوها، !
فتوى الشيخ عبدالله بن جبرين في الجهاد ضد الشيعة ووجوب البصق في وجوههم ،!
سلسة مباركة من تكفيرات الشيخ محمد بن عبدالوهاب للبدو وأهل المدن و غيرهم من المارقين ، !
ثلاث فتاوي سلفية مباركة في تحريم ربطة العنق وتحريم الملابس الرياضية وتحريم لعبة البلياردو،!
فتوى الشيخ حمود بن عقلا الشعيبي في إهدار دم المغني الكويتي عبدالله الرويشد ، !
فتوى الشيخ سليمان الخراشي في جواز نهب أموال العلمانيين وانتهاك حرماتهم ،!
فتوى الشيخ صـالح الفـوزان في تحريم السيـاحة أو السفر إلى خـارج السعودية تحريماً قطعياً ،!
فتوى الشيـخ نـاصر الفهد في تحريـم أداء التحية العسكرية وارتداء اللباس العسكري ، !
فتوى الشيخ عائض سعد الدوسري في جواز الدسيسة ضد الشيعة وأصحاب الأفكار المنحرفة لإبعادهم عن التأثير على المسلمين فتوى الشيخ ابن حميد في تحريم تدريس الرياضيات والجغرافيا ، !
فتوى الشيخ عبدالعزيز آل الشيخ في جواز اختراق المواقع وتخريبها والتجسس على الإيميلات ومحتوياتها وذلك لنصرة منهج السلف الصالح، !
فتوى الشيخين عثمان الخميس وسعد الغامدي في تحريم الانترنت على المرأة بسبب خبث طويتها ولايجوز لها فتحه إلا بحضور محرم مدرك لعهر المرأة ومكرها.نقلا ععن موقع سلفى يدعى موقع الداعية ام انس
بقت حاجة تقرف كمان يحللو ويحرمو على مزاجهم

Anonymous said...

بص يا د.أشرف انا مش داخل اجاملك أو أطلعك معاك حق عشان انت رأيك زي رأيي ولا حاجه , بس متتعبش نفسك , انا ياما اتكلمت و ياما شوفت ردود أفعال , و الله هتنبح صوتك و احتمال تتعب نفسياً و عصبياً على الفاضي . .

هديك مثال بسيط

ان في مره اتكلمت عن يوم شم النسيم و عن اد ايه هو يوم خاص بالمصريين و لازم نحترمه و نقدسه و نتبسط فيه ,
لقيتلك واحد بيقولي انه مش هيسمع كلامي و لن يغضب الله و يتبع الذين كانوا يعبدون الأصنام ,
ساعتها بقى حسيت ان المجتمع بالفعل بقى مريض , لازم يبقى في حل , بس كل مدى كنت بكتشف ان الموضوع اصعب مما نتخيل ,

على فكره الموضوع و التعليق ده موجودين على مدونتي لو تحب تتفرج عليهم !

دلوقتي الأبناء بيتزرع فيهم الحاجات دي من و هم صغيرين من آباءهم , و الحاجات دي ملهاش حل غير بتغيير فكر جيل بأكمله عشان يطلع بعد كده نسل قادر على استيعاب موقعنا الحضاري و يحاول يصحح الوضع ,

انا عندي 20 سنه , و لما بحاول اقول رأيي بلاقي المعارضه مش من الكبار , ده انا بلاقيها من اللي في سني ! , طب انت يا اللي عندك 19 ولا 20 سنه و بتدافع اوي كده عن النقاب انت مال أهلك ؟ هو انت تعرف ايه عن النقاب اصلاً ؟ . .

بص , الخلاصه يا د.أشرف ان دلوقتي المجتمع مشبع بنظام معين و مصمم بحيث انه يدافع عن هذا النظام حتى آخر قطره بدون التفكير في أساس هذا النظام ,

الأب لما بيخلف ابنه دلوقتي أول حاجه بيعلمهاله ازاي يدافع عن هذا النظام الديني اللي اتزرع في مصر و كمان بيربيه بحيث ميحاولش يفكر في أي حاجه , يتعامل مع الدين على انه علبة زبادي و لازم ياكلها كلها عشان حرام نرمي حاجه في الزباله و ربنا هيوديه النار . .

افقد الأمل يا دكتور عشان تريح نفسك , بجد لازم تفقد الأمل , خلاص اللي حصل حصل و مصر مش هتتغير غير بمعجزه . .

سلامي لك

Anonymous said...

و هديك مثال بسيط , انا مش عايز اتقل عليك . .

ابقى القي نظره على كومينتات التوبيك ده :
http://ahmed-ym.com/cu/?p=350

Anonymous said...

يا سيدي الفاضل انا نفسي افهم حاجه انت دلوقتى بتدعو للاخلاق جميل اوى وكمان بتقول الرسول صلي الله عليه وسلم جاء ليتمم مكارم الاخلاق هايل جدا بس ايه علاقه الكلام الممتاذ ده بمهاجمه سيادتك للحجاب والنقاب بص يا سيدي انا مش مع خالص الناس اللى بتشتم مؤلفين الكتاب انا عن نفسي اللى اعرفه ان مفيش حد صح ع طول الخط وحد غلط ع طول الخط يعني انا اقرا الكتاب والله المؤلفين جابو ادله صحيحه يبقي تمام لقيت الكتاب مش بيتكلم بموضوعيه يبقي اوت دى وجهه نظرى الموضوع مش مستاهل خالص تبادل شتايم يعني هو كده كده الحوار فيه اختلاف بين الفقهاء من زمان ومعليش طولت عليك بس انت بتقول رحم الله مصر التي لم تكن بها بنت أو سيدة واحدة محجبة او منقبة وكنا في قمّة التحضر والرقي ، كان الناس لا يزال لديهم بعض الذوق والإحترام والأخلاق والأدب يا سيدي كلامك جميل اوى الناس كان عندها اخلاق وممتاذه بس كان ناقصه الحجاب يبقي المفروض كلام حضرتك تقول يا جماعه احنا دلوقتى عايزين نكمل حاجه مهمه اوى مع الحجاب وهى الاخلاق لانها من اساسيات الدين بس تانى احب اقولك ان دعوتك للاخلاق يا ريت ميكونش معاها دعوه لخلع الحجاب اتمنى يكون كلامى وصل واعتقد ان يكون صح وشكرا لكل المحترمين

الميكروباص said...

مش مقياس يا اشرف
أمريكا أكبر بلد في العالم بها الحريات
وعلى الرغم من كه هي الأعلى في حوادث الاغتصاب والتي تحدث كل ثواني
يعني مش عدم الحجاب أو النقاب هو اللي قلل التحرش أو يزيده
بمعنى
انه بالاضافه الى لباس الحجاب يجب أن نتعلم باقي مكارم الاخلاق
ولا نأخذ طرف واحد من الدين ونترك الاخر
وكما قال صلى الله عليه وسلم
بني الاسلام على خمس - وانت تعلم باقي الحديث
أي أن الاسلام تم بناءه على هذه الاركان الخمسه
وبعدها يجب العمل أيضا- فلم يقول ان الاسلام هو الاركان الخمسه- ولكنه قاء ان البناء على هذه الاركان الخمسه
وعلى هذا الاساس فالحجاب شيء هام للمسلمين
فبعد أن تتحجب عليها بإكمال باقي مكارم الاخلاق حتى تصبح انسانا سويا
لأن المشكله الكبيره اننا نأخذ من الدين شيء ونترك الآخر
وكله مكمل لبعضه
بدءا من الحجاب وانتهاءا بمكارم الاخلاق
لا يوجد منهم من ينفع بدون الآخر

أشرف حمدي said...

برضه حيقولك دعوة لخلع الحجاب
انا حشق هدومي قريب
وأعتقد إني استكفيت كده بالرد واللي عاوز يقول أي حاجة حنشرهاله بس مش حعلّق عليها

آخر كلمة هي كالتالي :
الدكتور بيلبس بلطو أبيض
والدكتور لازم يكون عنده ضمير في شغله
أنهي أهم دلوقتي لو افترضنا إن الأطباء تفشّى فيهم مرض موت الضمير ؟
المهم اننا ندعو الأطباء إن يكون عندهم ضمير أولا وأخيرا
وبكرر
أولا وأخيرا

يلبس بقى بلطو أبيض يلبس بلطو أحمر يلبس بلطو مشجّر كروهات بمبة مسخسخ هو حر
لما يبقى الدكاترة عندهم ضمير ونحل الأزمة دي حيكون عندنا من الترف ومن روقان البال إننا نتكلم عن بالطو الطبيب ياترى يكون أبيض ولا أخضر

وماحدش يقول لي الباطو الأبيض من أساسيات مهنة الطب عشان ماتجيليش نقطة

آه يا بشر
ربنا يرحمنا جميعا برحمته

Gohan said...

السلام عليكم ورحمة الله وبركاته

انا شايف كله بقى يفتي في الدين وكأنه يعني الموضوع عادي يعني والمسألة خلاص لكل من هاص ولاص
مسألة النقاب هو الراجح من أقوال العلماء وجوب تغطية المرأة وجهها ومن العلماء يقول انه فضل اي انه من الفضل ارتدائه دة راي العلماء مش رأي واحد قاعد في قهاوي
والي عايز مصادر اجيبها له من العلماء مش يجي يقعد يفلسف وياخد كلامه بعصبية ويعمل ترهيب افكار ويقول ايه التخلف دة إلخ المفترض الشخص له مطلق الحرية يفعل ما يريد مش دة منطق الليبرالية التي تدعون لها؟!
ومسألة اتهام المنقبات و وضعهم في شبهة انهم يخقون الجرم اهو دة الي بسميه تخلف بجد وجد انت مين انت علشان تحكم على كل شخص قدامك ؟! كأن كل واحد تحس انه محترم وطاهر وقلبه ابيض ومعندوش غير انه يقعد يفتري في خلق الله طيب تيجي ازاي دي؟!
وللاخت زوجة الله يثبتك يا اختي قد تكون لك ذلك محنة لك وقد لا احد يقتنع لما تقوليه بدعوى التنويرية ومحاربة التخلف حيث منهم قد يرى الشواذ جنسيا من حقهم العيش وممارسة ما يحبون ولكن المنقبات؟ قد يكون ذلك بالنسبة لهم تخلف وعودة للوراء وهجمة من السعودية الخ
استاذ اشرف انا لم ارد الا يعني اقول المفترض لا احد يكون ضد ما يقتنع به وليس من العدل يعني اتهام الشخص الذي مقتنع بما يعتقد به بالتخلف او متأثر من التيار "الوهابي" ايا ما كان يسمى فهذا لا اظنه من الايجابي حيث بهذا الشكل سوف نكون كأننا في فرقتين او تفرق لا داعي له من مصري وغيره وهذا لن يفيد احد في النهاية

الميكروباص said...

قصر الكلام في الموضوع ده يا اشرف

لا يصح أن نطلق على البنت انها ملتزمه بالحجاب فقط
كما أنه لا يصح أن نطلق على فتاه أنها ملتزمه بدون حجاب

Anonymous said...

يا دكتور انتى دلوقتى بتقول انك مدعيتش لخلع الحجاب بس صدقنى البوست بتاعك كده مش واضح يا ريت بقي تغيره وكلمنا كلام نفهمه وبالراحه ومتنساش انك بتكلم مختلف العقليات وشكرا

Anonymous said...

ههههههههههه
هو امثالك لسه موجودين فى البلد
متهيألى انتوا خلاص هاتختفوا قريب جدا
بالشفا ياعم المثأف ياتنويرى

ولاء النعماني said...

زي ما توقعت
الدنيا ولعت هنا


يا أهل الخييييير

ما تسيبوا الناس في حالها

دي الخلاصه

سيبوا إللى عايزه تلبس تلبس وإللى عايزه تقلع تقلع وإللى عايزه تقف ع السلالم ف الوسط تقف

عايزين تدعوا لله أدعوا بهدوء وانتوا ف حالكوا


حاجه كمان

ممكن نبطل نحط نفسنا حكام على الناس

مالنا أحنا ومال أطلاق أسامي زي " فتاه ملتزمه" مين نصبنا عشان نصنف

والحجاب وحده غير كافي للتصنيف !!طيب مين حيحط باقي المعايير وعلى أساس إيه وحيقيسها إزاي؟؟؟

يبقى نسيب الناس في حالها بقى ونبطل نصدر أحكام ونتلهي باللى أحنا فيه أحسن



أخر حاجه الأخ ( أنا) صاحب التعليق

ياااالهوي

أحمد (زوج مخنوق ). said...

انت بتسال ايه الازدواجية اللى انت بتقول عليها؟؟
الازدواجية انك طول عمرك بتتكلم عن الحرية و ان البنت حقها تقلع ملط و محدش يتحرش بيها دي حرية انما لما واحدة شايفة و مقتنعة انها تستر نفسها و أخدت برأي علماء أعلم منك مليون مرة بأمور دينهم و بتفسير الاحاديث الصحيحة و قالوا ان النقاب عبادة ( بغض النظر عن انه فرض او لأ ) انما هو على الاقل فضيلة او تقرب الى الله فانت قلت انها سطحية
هي دي الازدواجية في المعايير
انت بتتكلم عن الاخلاق؟؟
كويس قوي الكلام ده
ايه علاقة الاخلاق بالنقاب
في منتقبات بنت ستين كلب عاهرات
وفي منتقبات ربنا يكرمكهم و يتقبل منهم تقربهم ليه
زي بالضبط ما في دكتور سنان ابن ستين كلب كان بيزني بالستات اللى بيتعالجوا معاه
و في دكاترة سنان محترمين جدا
و زي ما في رسامين كاريكاتير متخصصين في رسم البورنو الكاريكاتوري
في برضه رسامين كاريكاتير محترمين و بيحاولوا يعالجوا قضية
يبقى العيب مش في طب الاسنان
و لا العيب في رسم الكاريكاتير
زي برضه العيب مش في النقاب
مينفعش انسان مسلم بيفكر يحترم دينه يهاجم النقاب و يقول لاى واحدة واخدة النقاب انه تقرب الى الله -و هو كده فعلا على فكرة سواء شئت او ابيت - يقولها اقلعيه ده حاجة مرفوضه
النقاب فعلا لو الست بتلبسه تقرب الى الله فهو فعلا بيعلي اخلاقها جدا و فعلا النقاب هو الي بيربيها
زي ما برضه رسام الكاركاتير رسمه بيقربه من جمهوره و بيقرب فكره منهم لانه هو كان هدفه الجمهور
برضه الست اللى بتلبس النقاب مبتغية وجه ربنا برضه ربنا بيقربها منه جامد جدا
فعلا بيعلي اخلاقها
بيخليها تخاف لتشوه صورة النقاب و صورة الملتزمين
و ده فعلا عن تجارب فعلية مع ناس كتير
استاذ اشرف
حضرتك بتتكلم عن المد الوهابي
طب هل حضرتك تعرف بجد و بأمانة و من غير ما تبدأ تدور بعد سؤالي ده يعني ايه الفكر الوهابي ده؟؟؟؟
عموما الشيخ محمد بن عبدالوهاب ليه كتاب مشهور جدا اسمه العقيدة الصحيحة اقراه و احكم عليه انت
بس لو لقيته مفيهوش و لا كلمة مش مستساغة حتى على تفكيرك ابقى بطل تستعمل الكلمة دي بدون معرفة معناها

أحمد (زوج مخنوق ). said...

نقطة تانية بسرعة
انت بتحلم انه يحصل سعودة في مصر؟؟؟؟؟
يا حبيبي السعودية عندها نهضة لو مصر في عشرها ما كنتش انت فكرت تسافر لبلد في الغالب برضه هيكون معظم مواطنيها ستاتهم بيلبسوا نقاب

فنان مسلم said...

رداً على الجزء الخاص بدور الحجاب في تطورنا ومش عارف ايه

لو قارننا نفسنا ببلد زي أمريكا (بلد الحريات) هنلاقي ان أمريكا فيها سيدة مغتصبة من كل 6 سيدات , أو تعرضت , للاغتصاب . على حسب احصائيات ادارة مكافحة الجريمة ووزارة العدل الامريكية
والاحصائيات بتقول كمان ان 16% بس من السيدات بيبلغوا عن الاغتصاب.

(ارجع للرابط ده عشان تشوف بقية الارقام كاملة:
http://www.ojp.usdoj.gov/bjs/abstract/cvusst.htm )

تخيل كده لما يبقى واحدة من كل 6 بنات أو سيدات تعرفهم , تم اغتصابها

ياترى الحريات ايه اخبارها ؟

فنان مسلم said...

لاحظ اني بتكلم عن اغتصاب كامل
مش تحرش

ياسمين نعمان said...

استاذ أشرف .. بالنسبة للمثال بتاع البالطو اللي حضرتك قلته ..
أنا مش شايفة إن فيه تشابه بينه و بين فكرة الحجاب و النقاب ..
أولا .. لأن الحجاب فرض و مش حاجة من الكماليات و المظاهر الخارجية فقط ..
ثانيا .. أنا مش عارفة إيه مشكلة حضرتك في إن إصلاح الأخلاق و إصلاح مظاهرنا بما يرضي الله يمشو مع بعض على التوازي ..
بص يا أستاذ أشرف أنا عايزة أقول لحضرتك حاجة بعيدة شوية عن الموضوع .. بقولها لما استشعرته في كلام حضرتك من ضيق و فقدان للأمل ..
حضرتك بتطرح مواضيع خلافية جدا فبالتالي هتلاقي ناس كتير إما هتتفق أو تختلف معاك فلازم حضرتك تتقبل إن فيه إختلاف و هو ده حال الدنيا و متدايقش كدة لما حد يختلف معاك .. حاول تتقبله بسعة صدر..
و لو فيه حد اسلوبه مش كويس شوية .. فده طبيعي لإن الناس مش ملايكة ..
و في الآخر كل له كامل الحرية في آراءه
و حقه إن الآخرين يحترموه و يحترمو حريته و لا يسخروا منه و من قناعاته

ولاء النعماني said...

يالهوي

يالهويييييييييييي تاااااانى
هو ليه الناس كلها فاكرة أن معنى الكلام أن البنات ما تلبسهوش


مـــا حـــدش يـــقـــدر يـــمـــنــــع الـمـــرأة مــن لـــبـــس الــنــقـــاب


والله العظيم لا حد يقدر يمنعها ولا حتى حد عايز يمنعها



الكلام على أن الموضوع حرية شخصيه

بعد ما تفشى في المجتمع أفكار زي أنه واجب وأنه فرض أو على الأقل فضل يرقى للفرض
وبعد أنتشار نظرة الدونية والإختقار والقرف من غير المحجبات

حد الحث على التحرش بيهم

يا أهل الخير

يااااااااااارب كل البنات يلبسوا نقاب

وياااااارب أكون أنا أولهم

والله العظيم أنى بشتغل على جويا قد ما أقدر

أنضف وأطهر وأحجب جوة أنشاء الله
وبعد كده ممكن جدا جدا جدا أنتقب


بس

ألبس نقاب عشان أراضي الناس؟؟؟؟

وربنا أخر أهتماماتي؟؟؟


ابص لغير المنتقبات أو المختمرات بقرف

هو أنا ربنا عشان أحكم ؟؟؟


أهو .. أهو أنتوا قولتوا لاء

يبقى سيبوا الناس ف حالها بقى

جنابي ورمت يا سااااااااااااااااتر

Anonymous said...

والله العظيم محدش قال اقلعوا النقاب او الحجاب اى حد بيعرف يقرى يلاحظ ان استاذ اشرف بيقول اشتغلوا على الاخلاق شويه يعنى بلاش ازدواجية مش نقاب وحجاب من بره ومن جوه يعلم الله
وبعدين النقاب مش فرض باجماع علماء السنه وبفتوى صادرة من الازهر الشريف والكلام ده من
سنين
اعلنات النقاب والحجاب مليه الدنيا ومفيش اعلان واحد بيقولك اخلاقك احترم الناس الى ماشيه فى الشارع غض البصر

R.R said...

انت طرحت موضوع مهم جدا وحيوى جدا احييك عليه الف مره
بس انت طرحته باسلوب لازم يثير الجدل
لناس كتيره

متفقه معاك ان المظهر لا يجب ان يكون او ان يعبر عما فى الجوهر

وايضا مع من يقول ان لكل حرية شخصيه فى التصرف واللبس وكده وايضا اعتقد انك توافقهم وتوافقنى فى الراى الخاص بالحريه

وان ما قصدته انت انه ليس ضروريا ان نجعل من الرداء رمز للتدين الحقيقى والذى لا يعلمه الا الله

وهذه ايضا ليست دعوة للتبرج بل لاحكام العقل فى الحكم على من حولنا وعدم الانخداع بالمظهر
ده اللى فهمته من موضوعك
تحياتى

Anonymous said...

اقروا دة

http://www.submission.org/a_dress.htm

وبعدين اللى عندة رد علمى منطقى على الكلام اللى فية يرد، اللى معندوش يبطل تكفير فى الناس على الفاضية والمليانة.

أحمد (زوج مخنوق ). said...

معلش رد بسيط على الاخ واحد بني ادم و اللينك اللى هو سايبه
يا اخ بني ادم
اللينك اللى حضرتك تفضلت و سبته و بتطلب من الناس انها ما تتكلمش الا بعد ما تقراه
حضرتك مش ملاحظ ان الاستاذ اللي كاتب المقال ده من جماعة القرانيين اللى الازهر نفسه جرم فعلهم و كفرهم
يا سيدي الفاضل
ربنا قال في القران
وانزلنا اليك الكتاب و الحكمة
الكتاب طبعا معروف و الحكمة هي السنة
انا مش عايز ادخل من موضوع البوست لموضوع ان القرانيين دول صح و لا غلط
بس لازم حضرتك تعرف ان الكلام اللى مكتوب ده يفتقر لاقل القليل من اساسيات البحث الديني السني
الاخ عقلة اللى كاتبه بينكر السنة
انا طبعا مش باتهم حضرتك انك تتبع لهذه الفرقة او لا
انا باقول لحضرتك احنا بنتناقش في خلال المنهج السني
فمينفعش تستشهد حضرتك بكلام مخالف للاصول اللي بنتكلم عليها
نقض الكلام ده ابسط من البسيط بس هيجرنا لمناقشة صحة منهج القرانيين او خطأه
و ده مش موضوعنا

تحياتي

Anonymous said...

بص حضرتك ناس كتير اوي نفسها في الحريه وانا كتير بقرا لصحفيين بيهاجموا المنقبات وانهم خساره للفن او بيهاجموا شعار السينما النظيفه انا عاوز اعرف انت او انا هنخسر ايه لو واحده لبست النقاب حتي لو مكنش عباده زي مناس بتقول ...يا سيدي دي حريتها وحقها في انها تلبس اللي هييا عاوزه تلبسه ...مبات كتير بتلبس لبس اخر قله ادب حد اتكلم عنهم زي مدول حقهم يمثلوا دول حقهم يعتزلوا ..زي ما دول حقهم يلبسوا كده برضه دول حقهم يلبسوا كده ...وبعدين مش كل من ربي دقنه بقي شيخ او كل من صلي بقي تقي ..يعني لو واحد بيصلي وسرق نبطل نصلي عشان في مثال سي ...وبعدين ما المنقبه دي انسانه وبتغلط وربنا يسامحها في غلطها ...سايبين كل حاجه وخلاص مش طايقين نشوفواحده منقبه عندها ومفيش حريه بقي في قرف وافغان وسلف ووهابيين وكده ...انا بجد مستغرب جدا للتناقش اللي عايشين فيه ..عشان واحده منقبه مثلا او حتي مليون وحشيين يبقي النقاب ده قرف واستعباط..اقسملك بالله ان امن جامعه مصريه جاب ولد مسجل خطر ولبسه النقاب وعيشه في المدينه لمجرد انه يشي للنقاب مصلحتهم ايه هنا مش عارف ... ثم مين اصلا زقزوق ده عشان ندافع عنه مش ده الجاهل اللي الزم الخطباء في المساجد انهم يلتزموا بكلام معين في خطبهم وان اللي مش هيروح عشان الانتخابات فهو اثم .. يفهم ايه في فقه دينه عشان نسمح ليه انه يتكلم عن النقاب بالسفه ده ..يا عم هو سفه وهي راضيه تلبسه زعلان انت ليه

Anonymous said...

الاخت زوجه ربنا يبارك فيكي اصرارك علي راي ويسعد اوقاتك بكل خير

Bipolar-Girl said...

أنا مش فاهمة الراجل غلط في إيه؟؟
وليه الهجود ده كله؟ وخلاص بقه كافر علشان بيهاجم الخيم السوداء القادمة من ارض الصحراء؟؟

مالو حجاب المصريات اللي زي ما القران قال؟
إشارب طويل شويه وملابس شيك مبهجة محتشمه؟

كفايه بقة دي مجرد ملابس
المهم نتعلم خلق القران والسنه

والله اشرف صعبان عليا وحاسة ان ضغطة علي

Bipolar-Girl said...

فنان مسلم

السعوديه عندها نهضة؟؟؟؟؟؟؟؟
ما تعريفك للنهضة وإيه المقايس الللي بتقيس بيها نهضة شعب؟

اللحاليح ولا براميل البترول؟
ولا الستات اللي محبوسة ولا الهيئة؟

Bipolar-Girl said...

سوري
أقصد زوج مخنوق
:)

Anonymous said...

والله العظيم انتوا عالم متناقضة
كل واحدة عندوا عقد نفسية جاى يطلعها علينا
يعنى انت كده ياصاحب المدونة بقيت كده مثقف ومتقدم؟
الناس اللى بتككلم عن اخلاق المنقبات ناس عجيبة جدا
وكأن لو فيه منقبه اخلاقها مش كويسه يبقى النقاب السبب
ياناس الدين هو الحاكم على البشر مش العكس

يعنى لو لقيت حرامى بيسرق ولابس لبس ظابط يبقى نحرق الظباط
بطلو تناقض وتماحيك فارغة

وبالنسبة للدكتور زقزوق اللى بيقلك رأى شيخ الازهر فى الكتاب :
ادى رأى شيخ الازهر من كتابه
............................
قال فى كتابه (( التفسير الوسيط للقرآن الكريم طبعة دار المعارف جـ 11 ص 245 ))
تفسيره لقول الله تعالى : { يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ وَكَانَ اللَّهُ غَفُوراً رَحِيماً } (الأحزاب:59) يقول : (( والجلابيب جمع جلباب ، وهو ثوب يستر جميع البدن ، تلبسه المرأة فوق ثيابها . والمعنى : يا أيها النبي قل لأزواجك اللائي في عصمتك ، وقل لبناتك اللائي هن من نَسْلك ، وقل لنساء المؤمنين كافة ، قل لهن : إذا ما خرجن لقضاء حاجتهن ، فعليهن أن يَسدلن الجلاليب عليهن ، حتى يسترن أجسامهن سترًا تامًّا من رؤوسهن إلى أقدامهن ؛ زيادة في التستر والاحتشام ، وبعدًا عن مكان التهمة والريبة . قالت أم سلمة رضي الله عنها : لما نزلت هذه الآية خرج نساء الأنصار كأن على رؤوسهن الغربان من السكينة وعليهن أكسية سُود يلبسنها ))
..............................
اظهر تعليقى ياصاحب المدونة

Ahmad atef said...

"إنت عظيم يا أشرف بجد
أنا مش عارفة أقول إيه غير إني موهومة بالتدوينة دي، وكل الأفكار اللي بتدور في دماغي إنت قلتها خلاص".
عثل عثل عثللللللللل
كفاية بصراحة التعليق ده عشان نقدر نعرف العقليات والفكر اللي ممكن يوافق ع الكلام الفارغ اللي في البوست ده

أحمد (زوج مخنوق ). said...

Bipolar-Girl
عايزة تعرفي النهضة اللى في السعودية؟؟
الحكومة الالكترونية اللى متطبقة هناك بشكل فشلنا اننا نحقق عشر معشاره
النهضة العمرانية اللى بتتم هناك
النهضة في المواصلات
النهضة في مجالات الصحة و العلاج ( حتى لو كانت على ايدي مصريين ) انما على فشلنا نحن كحكومة في تنفيذها
النهضة في جميع مجالات الحياة
النهضة في مجال الاستثمارات الصناعية و الغذائية
النهضة في مجالات الاعلان و الاعلام
اخت نانسي
بالقائي نظرة على مدونتك أحسست من اسلوبك و كلامك استخدامك لبعض المصطلحات الخليجية
يخيل الي انك تري نهضة الخليج التي لا نحلم في مصر بعشر معشارها
و اتمنى اللى بينطق كلمة وهابي يبقى فاهم معناها
مش ترديد اجوف و خلاص

koukawy said...

من رأي انه ليس من حق وزير او غفير انه يحل او يمنع نقاب او حجاب
الموضوع موضوع شخصي بحت
اللي عايزه تتحجب تتحجب و اللي عايزه تتنقب تتنقب
محدش ليه دخل
زي بالظبط اللي بتقلع و تتعري محدش بيقولها انتي بتقلعي ليه
في النهايه ربنا اللي هيحاسب كل الناس بس بلاش نهاجم حد
العيب ليس في حجاب او نقاب العيب في البنات و اللي بعملوه

spark said...

سلام عليكم
اول رد ليا في مدونتك العالية جدا
واللي مليانة بالبهاريز

اولا انا مؤمن ان كل انسان حر في اختياراته ومسئول عنها

فأللي عاوز يتنقب يتنقب واللي مش عاوز مش مشكلة

لكن انت مش شايف ان لما حد يحط صورة زي بتاعت النقاب الممنوع دي
يبقي بيعمل بالظبط زي اللي بيقول ان النقاب فرض وغيره حرام
يعني انا شايف ان الواحد ميتشددش يمين
ولا شمال

Hala Adel said...

كلامك كله صح يادكتور أشرف ..
مين قال ان العفه في النقاب و مين قال ان غير المحجبه مش محترمه ؟؟؟ ده اسمه تخلف .. عفتك في نقابك !!!!!! يعني أعمل اللي أنا عايزاه و ألبس النقاب و كده أبقى الخضرا الشريفه يعني؟؟
مش معنى كلامي ان كل المنتقبات مداريين تحته بلاوي ..
و مش كل من لبست النقاب معصومه من الخطأ ؟؟ أعتقد ان اللي مش هتقدر تحترم الزي اللي لابساه تقلعه أحسن.. اشمعنا لما تكوني منقبه انتي بشر و مش معصومه من الخطأ و مانمسكلكيش على الواحده؟.. لكن اللي مش منتقبه أو مش محجبه تستاهل التحرش؟؟
الأخلاق مش في المظهر و الدين مش في المظهر
و فعلا عمر ما واحده هتقلع النقاب علشان بوست زي ده لأن للأسف اللي لبسته من الأول عقلها تحجر .. بس يا ريت بقى
و اللي نقابها هو عفتها يا ريت بقى تحترمي نقابك و تقعدي في بيتكو علشان يبقى عفتك فعلا .. يعني مثلا أظن من حقي لما أروح مستشفى و دكتوره أو ممرضه تكون في خدمتي أعرف على الأقل شكلها علشان لما تعملي مصيبه أعرف مين كانت بتعالجني .. و لما تكون سايقه و تعمل حادثه أو تخبطلي عربيتي بسبب الغمامه اللي حاطاها على عينها أعرف اذا كانت واحده ولا واحد عامل مصيبه و سارق العربيه .. يا ترى بقى في حاله زي دي الضابط من حقه يشوف رخصك و صورتك و ووجهك الكريم ولا هتقيمو عليه الحد..
؟؟!!
و في النهاية أقول
عقلي هو عفتي
أخلاقي هي عفتي

Anonymous said...

...سيدى الفاضل انتوا بتتدعوا الحرية وانكم متقدمينمع انكم اكثر الناس استهلاكا بتقدموا ايه للمجتمع غير شوية كلام يوحى بانكم مثقفين وياريتكم بتفكروا فيه انتم بتنقلوا اللى بيقوله تبعة الشيطان فكر كده ودور عالكلام اللى بتردده بينك وبين نفسك هتلاقيه نفس الكلام اللى كلكم بتقولوه انتم اتغسل مخكم عالاخر لو تعرف ان الصهاينة هما اللى بداوا الحوار دا وهما اللى نشروا الحجاب اليهودى فى بلادنا عشان بعد كده تيجوا تقولوا اتفرج يا عم عالمحجبات ...
حط نفسك فى مكان المحجبة ودور من الناحية دى وشوف هما ليه عاوزين يخلوها تخلعه انت تحب تشوف واحدة محترمة تفكرك بربنا ولا تشوف واحدة متبرجة ومتقدرش تغض بصرك وتنتهى مع الشيطان
ربنا يهديك

Anonymous said...

بما انى لسه قارى الكلام دا دلوقتى
اقلك حاجة السبب فى معارضة الحجاب او النقاب كلها مرتبطة بالرجل وهما اكثر المدافعين عن الفكر دا وان المرأة لازم تبقى متحررة .. عشان دى اكبر متعة ليه فى الدنيا ما هو مينفعش يعيش طول الوقت من غير ما يتأمل فى النساء وازاى مينفعش يسلم على زميلته وميبقاش له صحبات هى دى الفكرة انا ايه اللى هيدايقنى غير كده لو فكرت زيهم لو واحدة اتحجبت غير انى مش هلاقى متعتى ..السبب الاكبر من دا انهم بيدايقوا اوى لو شافوا محجبة لانها ببساطة بتفكرهم بربنا ودى حاجة مش بيحبوها عشان يعرفوا يتعايشوا ما هو مش كل حاجة بقى تقلهم ربنا بيقول كذا وكذا كده مش واخدين حريتهم
...وبعدين الراهبات مش بيظهروا غير وجههم محدش فيكم بيقول ان دا تخلف ليه اولا ميقدروش يفكروا انهم يفكروا فى الموضوع دا انما السهل انه يخوض فى المسلمات ويقلك انه بيفكر ومثقف وتنويرى مع ان الكلمة دى مرتبطة بالشيطان,وبعدين زى ما بتدوا حرية للاخريات انهم يلبسوا بحرية دى كمان ليها حريتها واى حد دلوقتى يحاول يطبق سنة الحبيب المصطفى عليه افضل الصلاة واتم التسليم يقولوا عليها وهابى مع ان الشيخ محمد بن عبد الوهاب كان رجل صالح ملوش ذنب انهم تطاولوا عليه واذا زوجته لبست الحجاب بقى مسلم صحراوى

Counter