Total Pageviews

Tuesday, November 25, 2008

عن الرعب نتحدث

التدوينة هذه المرة غريبة بعض الشيء ، هي ليست تاج بالمعنى المتعارف عليه ولكنها واحدة من التدوينات التي تكتبوها معي .
ماهي هي أكثر الأفكار إرعابا لكم ؟ لا أقصد ماهي الأشياء المرعبة ولكن الأفكار المرعبة ، ربما أشياء حدثت أو تحدث بالفعل من حين لآخر أو تخشون أن تحدث مستقبلا أو تتوقعون حدوثها وتستعدون لذلك ، لا أدرى السبب في اختيار هذا الموضوع الغريب ولكنها ستكون مادة جيدة لمن يريد كتابة قصص الرعب من خلال التعرّف على مكامن الرعب عند الآخرين ، أذكر أن دكتور أحمد خالد توفيق قال لي بأن أكثر فكرة إرعابا له شخصيا هي فكرة وجود كاميرا تسجّل ما يحدث في منزله أثناء غيابه ، ترى ماذا سيرى عندما يعود ويعرض الشريط ؟ وقد استخدم هذه الفكرة في العدد العاشر من ما وراء الطبيعة بعنوان حلقة الرعب . عموما دعوني أبدأ وستفهمون ما أقصد :

أكثر عشرة أفكار مرعبة بالنسبة لي

أن أمر على شقتي المطلة على الشارع الرئيسي وأنظر إلى شرفتي فأجد شخصا ما واقفا بها مع العلم بأنني لم أترك بها كائنا حيا سوى صرصار الليل الذي في المطبخ ، وقد أغلقت الباب جيدا ورائي ، الأمر الأكثر إرعابا أن أرى نفسي واقفا في الشرفة ! أو أن أتصل بمنزلي من الخارج ويرد علي من له مثل صوتي قائلا : انا أشرف حمدي مين معايا ؟! حدث لي هذا الأمر بالفعل على برنامج المحادثة ميسنجر وكان صديق لي يتقمص شخصيتي بمهارة ويحادثني باعتباره أنا مستخدما صورتي وأسلوبي في الحديث ومعلومات شخصية كنت أظن أنني الوحيد الذي يعرفها ، كدت أموت بالسكتة القلبية وقتها ( مثلوفوبيا )

أثناء استحمامي ، ويدخل الصابون بعيني فيحرقها ، فأعجز عن الرؤية للحظات ، هكذا أصبح بلبوصا أعمى ، فكرة قاسية جدا ، تشعرني بالعجز التام لو دخل البيت لصا وكنت أنا بهذه الحالة ، وعلى هذا القدر المخجل من الضعف ، فضلا عن إحتمالية أن أسقط على جدور رقبتي متزحلقا في الصابونة فأموت على هذا الوضع المسخرة. (بلبوصوفوبيا)

بعد أن أكون قد أنتهيت من قضاء حاجتي جالسا على المرحاض وأكتشف أن المياه مقطوعة ولايوجد ورق تواليت ( متعاصوفوبيا)

حينما أتقلّب على الفراش ليلا ويلعب الظلام لعبته مع المروحة التوشيبا العمودية لتبدو كشخص واقف خاصة وأنها تنظر إلي اليمين وإلى اليسار طوال الوقت (توشيبافوبيا)

أن أستيقظ ليلا أثناء إنقطاع التيار الكهربي وأظن أنني قد أصبت بالعمى ، دائما أصرخ : مش شاااااايف ، أنا إتعمييييييييت ، إلحقوناااااااااي (عينوفوبيا)

أن يتحقق الكابوس الذي رأيته أثناء نومي في ليلة صيف حارة حينما كان إبني في الشهر السادس تقريبا ونطق قائلا : أنا مش عمرو يا عم إنت ، أنا اسمي عبمتجلّي وعاوز أرّوح لمراتي وعيالي ، أنا لا أؤمن مطلقا بتناسخ الأرواح ولكنه كان كابوسا لن أنساه (عبمتجللي فوبيا)

الرسوب في الإمتحان ، كل يوم أحلم بأنني في ليلة امتحان ولا أعرف أي شيء عن المادة ، يراودني الحلم دائما خاصة طوال فترة الصيف ، وحتى بعد تخرجي بثلاثة أعوام كاملة (إمتحانوفوبيا)

سقوط أسناني ، وهو من أبشع الأفكار المرعبة التي تسيطر علي من حين لآخر (سنانوفوبيا)

أن يحكم مصر مجموعة من الوهابيين أو السلفيين أو الإرهابيين أيا كان نوعهم أو تصنيفهم وأجد نفسي مجبرا على ارتداء الجلباب وعدم سماع الموسيقى والتوقف عن ممارسة الرسم باعتباره شركا بالله ومن ثم أجلد في ميدان عام بتهمة ممارسة الفن (إرهابوفوبيا)

أن أموت قبل أن أحقق أيا من أحلامي البسيطة (إبقى قابلني فوبيا)

الآن حان دوركم في البوح بالأفكار الأكثر إرعابا لكم من خلال التعليقات ، ليس بالضرورة أن تكون عشرة أفكار بالطبع ، تكفي فكرة واحدة أو أكثر .

44 comments:

untitled said...

بوست جامدة وظريفة


انا بالنسبالي اكتر فكرة مرعبة - بامانة يا دكتور - اني ادخل ماشي او مصراوي والاقيك قررت تتوقف عن رسوم الكاريكاتير

ههههههههههههههه

Bipolar-Girl said...

مش ممكن يا أشرف
البوست المفروض عن الرعب لكن موتني من الضحك لدرجة اني قريته بصوت عالي لكل اللي في البيت

بس عايز الجد....لو دي اكتر حجات بتخوفك تبقه محظوظ



تحياتي

Unknown said...

وااااااااااااااااو انت بجد تحفة يا عم انت والله ضحكتنى موووووت خصوصا عبمتجلى فوبيا دى هلكتنى من الضحك والله...انت شنيع يا اشروف والله اقول بقى اكثر افكارى ارعابا؟؟؟
اممممممم انى معرفش اشتغل فى مجال العلاج النفسى وبعد ما اتخرج اقعد فى البيت
قعادفى البتو فوبيا
انى اتجوز غصب عنى او انطس فى نظرى وابقى فاكرة انى موافقة والفاس تقع فى الراس وكساتوفوبيا
ان الحلم الشنيع اللى بحلم بيه كل فترة يتحقق وماصحاش منه مفزوعة هلوساتوفوبيا
انى ارجع من برة واولع النور بتاع الصالة الاقى ايد فوق ايدى فى الضلمة عفاريتوفوبيا
انى ابقى ماشية فى بيتنا فى الضلمة وحد ييجى يحط ايده على كتفى من ورايا نفس العفاريتوفوبيا
اكتر حاجة بتخوفنى بقى انى افتح الجرنال مرة واقرا خبر موت وفاة حد بحبه قوى قوى ودى مالهاش اسم عشان مينفعش اهزر فيها.........سلام يا اشروف

Anonymous said...

سقوط أسناني ، وهو من أبشع الأفكار المرعبة التي تسيطر علي من حين لآخر (سنانوفوبيا)

ههههههههههههههه
الله يحظك يا اشرف

اعتقد ان دي فوبيا مشتركة عند اطباء الاسنان

adel said...

مش عارف انا اول تعليق ولا لا بس مش مشكلة
البوست مسخرة موت و عاجبني الفكرة قوي

خد عندك :
1-لما احلم حلم مرعب و حد يقتاني في الحلم و انا احس ده بجد ...و ده مش هزار لان ده حصلي فعلا ...حلمت ان حد قطع ايدي بسيف و قمت مقتنع ان ايدي مقطوعة و عمال اصرخ (حلم مرعب فوبيا)ههههههه

2-لما احلم اني اتخرجت ....بعد الشر فوبيا

3-لما اتخيل اني اتجوزت......مصيبة فوبيا

4-اكيد لما اتخيل بع التخيل اللي فات اني خلفت.....مصيبة فوبيا 2

5-لما يطلع واحد وزير و صلحه و يقوللك هنبيع الشركات الخسرانة....جنان رسمي فوبيا

6-لما الاقي الجنية بعد الشر بقي ب 5 دولار .....انا اتجننت فوبيا

كفاية كده عشان متخافش مني

عادل
http://elbald-dy.blogspot.com/

AHMED SAMIR said...

المرض
وهل هناك رعب في الحياة اكثر من المرض
المرض
المرض

Anonymous said...

خوفي الاكبر ان الاقي نفسي بعد 20 سنه مجرد زوجه انا

أشرف حمدي said...

صباح الفل :)
ايه الحلاوة دي

mido Mazinger
ربنا يخليك يا باشا وحعتبرها مجاملة جميلة قوي ، بس انا متأكد إن مش ده أكتر حاجة مرعبة بالنسبالك ، دي تبقى مرعبة بالنسبالي انا ههههههههه
شكرا يا بشا على تعليقاتك هنا وفي ماشي ربنا يخليك
--------------
Bipolar-Girl
يا خبر ده شرف ليا إن البوست يتقري كده على الملأ ، ميرسي جدا
بس كنت تقوليلي الحاجات المرعبة بالنسبالك عشان تنضم لقائمة الرعب
تحياتي وميرسي قوي قوي على التعليق الجميل
--------------
enjy
ربنا يخليكي يارب ومايحرمنيش من تعليقاتك الرائعة
سبحان الله انا عندي نفس الرعب من توليع النور وألاقي إيد على إيدي !!! دي حاجة في الوجدان الجمعي بقى ولا ايه ؟ انا بجد مندهش إننا نكون مشتركين في فكرة رعب واحدة وممكن ناس تانية تكون خايفة من كده ، ياترى شفناها في فيلم قديم مثلا ؟ ولا هي غريزة ولا ايه ؟
تحياتي
--------------
Tiger Eye
وفكرة مرعبة تانية مشتركة
انت طبيب أسنان ؟ يمكن لو سألنا كل أطباء وطلبة أسنان يطلع عندهم نفس الرعب !
--------------
adel
ههههههههههه يبقى كده انا حققت أربع أفكار رعب من اللي انت قلت عليهم
فكرة القتل بالسكين أو الجرح بآلة حاجة في الحلم فكرة مرعبة جدا بالنسبالي وفعلا بتكون حقيقية جدا لدرجة إني بصحى من النوم أشوف فيه دم على ايدي ولا لأ
وكمان انا متجوز ومخلف ومتخرّج :) هههههههه
تحياتي
--------------
A.Samir
فعلا عندك حق طبعا ، فكرة المرض مرعبة وكمان فكرة فقدان الانسان لجزء من جسمه وفكرة التشوّه والحرق و و و
يمكن عشان كده مدخلتش طب بشري
خلينا في الأسنان أرحم :)
--------------
anonymous
لا تعليق ، جملة مختصرة وملخصة جدا ومباشرة ، أحييكي عليها
أشكرك

حواء said...

السلام عليكم
بوست حلو
وخصوصا اني لسه كنت هكتب يوست كامل عندي بسبب حلم مرعب بالنسبالي
هو ده اكتر حاجه ترعبني
اني بحلم دايما اني بروح مدينه ساحليه وغالبا الاسكندريه واروح هناك القي البحر عالي والامواج عاليه لدرجه ان الامواج مرتفعه الي السماء وبتنزل واحده واحده
زي تسونامي
وانا اقول اللي معايا انا قولتلكم بلاش نيجي هنا
بعد مكان البحر هو مصدر حبي في الدنيا دلوقتي بقي مصدر رعبي
ومستحيل اروح هناك تاني بعد الحلم المتكرر ده معايا كل محد يجيب قدامي سيره اسكندريه او الساحل الشمالي أو اي بحر
هو ده رعبي الحقيقي دلوقتي

الميكروباص said...

طيب تصدق انا بترعب من منظر الصرصار؟
طبعا هتقعد تضحك للصبح
لكن دي الحقيقه
بالنسبة لداخل المنزل انا لا يقلقني سوى الصرصار وخاصة لو كان من الحجم الكبير - وغالبا مش بطلع مصايف بسببه لأن كل لما اطلع مصيف الائي الشقه فيها صراصير
....
بترعب بردو في الشغل
قلبي بيقف باستمرار لأن صاحب الشركه ينتظر أي غلطه باستمرار
والواحد قلبه مش ناقص
لدرجه ان صديقي -مدير المخازن- راح يجلل اول امبارح لقى عنده السكر من كتر ضغط العمل والخوف من التعرض للمسئوليه اللي كل ساعه ممكن يلبسوك تهمه وخلاص


ده اللي في دماغي دلوقت- هاروح وارجعلك

Anonymous said...

ههههههههههه
مسميات مسخرةفوبيا

بالنسبة لي أكتر حاجة بترعبني اني اموت واسيب ابني لوحده ومبقاش عارفة عايش ازاي ولا مين اللي بيراعيه و مصيره هيكون ايه؟؟
دي اكتر حاجة بتموتني من الرعب وبدعي ربنا يديني العمر لحد ما اطمن عليه
معلش هي فكرة نكدية اكتر ما هي مرعبة

أشرف حمدي said...

زوجة
عندي حاجة زي كده بس متعلقة بالرعب من العمالقة
يعني في أحلام كتير بترعب من حاجة عملاقة ظهرت في السما ، زي الموجة دي تمام
أو كائن عملاق
أو مبنى عملاق ممكن ينهار عليا وهكذا
برضه ممكن تكون حاجة في غريزة الانسان
تحياتي
-------------
لورنس العرب
ما بلاش انا تقوللي الكلام ده :( حترعبني ليه اكتر ما انا مرعوب
انا مش طايق الشغل أساسا
الله يرعبك :) هههههههههه بهزر

فنان مسلم said...

امبارح في منتصف الليل , اتوفى صديق ليا (الله يرحمه ويسكنه فسيح جناته ) وهو قاعد على جهاز الكمبيوتر بتاعه في شغله
توفي بسكتة قلبية , ومكنش بيشتكي من أمراض


أكتر حاجة بترعبني اني اموت وانا سايب عالنت حاجة أندم عليها قدام ربنا سبحانه وتعالى وانا بتحاسب

أو اقعد أتعذب بيها في قبري بعد ما أموت

ربنا يرحمنا جميعاً برحمته

أشرف حمدي said...

أم كوكي
أييييييي ، طب خلينا في الرعب والنبي انا مش ناقص اكتئاب :(
تحياتي
------------
فنان مسلم
إلاما ترمي أيها الوغد الخبيث ؟
لا يا سيدي إطمئن انا مش ندمان على حاجة كتبتها على النت
وعموما قبل ما أموت حديك الباس وورد تمسح المدونة كلها لو عايز ههههههههه
حبيييييث انت انا عارفك
ك;)

أشرف حمدي said...

خلينا في الرعب شوية يا جدعان والنبي
الرعب بتاع الرعب مش بتاع الحكومة ، انا تعبت من الاكتئاب الحكومي الدولي الاقتصادي وقلت أفرفش شوية بتدوينة خفيفة لقيت المشاكل ورايا ورايا ههههههههه

الأفكار المرعبة
يعني ممكن أضيف فكرة تانية
فكرة انك تقابل واحد مثلا وتقعد تشحك وتهزر معاه وبعد ما يمشي تكتشف إنه مات من شهر مثلا
دي لو حصلت ممكن انا أحصله من الرعب

فنان مسلم said...

انا بتكلم عن نفسي والله :)

أشرف حمدي said...

ههههههههههه
ماشي يا عم اللئيم برضه :)
هههههههههههههههههههه

... amr said...

طب انا اقوللك على حاجة .. بس و النبي ما تضحك عليا ... انا لغاية سنة 2000 كدة كنت في الكويت .. عشت هناك و درست لغاية ما جيت على الجامعة كنا ساكنين في شقة في عمارة .. طبيعي يعني ... وانا صغير و عشان احنا ساكنين في بيت بتاعنا احنا و قاعدين فية مفيش غيرنا ... كنت لما انزل بقى اقفل الباب .. الباب الكبير بتاع البيت دة ... اقفل يا عم بالقفل و اطلع جررررررررررررررررررررررري
عشان اللي مدخل المسدس و هيضربني بية دة ... ايوة يا عم .. كنت بخاف من كدة ومتقوليش جالك منين الهاجس دة .. ولد صغير و يعرف يعني اية هاجس !! مش منطق يعني
حاجة كمان ... الكلاب ... يا لهوووووووووي .. انا فضلت لغاية قبل سنة 2000 كدة .. بعد ما استقريت في مصر يعني .. كل ما اشوف كلب .. الف من الشارع التاني :((( اصحابي يقولو لي مش مكسوف من نفسك !!! دي كلاب مش بتعمل حاجة يعني .. انا برضة مش مستوعب اوي .. مكنش في في الكويت كلاب ياجدعااااااان ... بس دلوقتي الحمد لله
مبقاش فية خوف من الكلاب ... ربنا مايحرمنا من الفيران
:))))))

مواطن مصرى نايم said...

ايه يا اشروف الجمال ده
هو واخد شكل التاج
و انا بقى عندى
(تاجوفوبيا)
هههههههههههه
==============
1-
انى اكون فمكان فيه فار و اعرف بكده
ممكن منامش خالص
(فاروفوبيا)
--------------
2-
انى اتعارك فيوم مع حد و يقدر عليا
و اخد علقة ما اخدهاش حمار فمطلع
مع انى لحد دلوقتى متعاركتش غير حوالى مرتين فحياتى كلها
(حماروفوبيا)
هههههههههه
--------------
3-
انى معرفش اقول الشهادتين لحظة وفاتى بجد
بعمل كل جهدى انى اقدر اقولهم ان شاء الله
لأنى مش عاوز ادخل النار يا عم
(ناروفوبيا)
--------------
4-
انى اعمل حادثة و اموت و يتسرق الموبايل بتاعى
ساعتها حزعل عليه اوى و انا ميت اصلى بحبه اوى
مش مشكلة اموت بس موبايلى ميتسرقش
اللى يتسرق موبايله ممكن يتسرق منه الساعة بتاعتة
ههههههههههههه
(ساعةفوبيا)
مع انى عاوز اقول حاجة غير الساعة
هههههههههههههههههه
----------------
كفاية كده يا اشروف
اصلى عندى كتير
(كتيروفوبيا)
ههههههههه

بوست زى العسل يا اشروف
كالعادة يا كبير

مواطن مصرى نايم said...

تعليق كمان بقى
===============
بعيد عنك يا اشروف
انا مش بخاف من حاجة بجد و الله
و لا حتى توليع النور و الكلام ده
و طول عمرى نفسى يطلع لى عفريت
دا انا حلعب لعب بيه
و كمان ممكن اخليه يبوس ايدى عشان اسيبة يروح
و العفريت ساعتها حيبقى عنده فوبيا بأسمى
(مواطنوفوبيا)
ههههههههههههههههههههه
===================
لدرجة ان فى عمارة فأسكندرية
مشهورة جدا
مسكونة مارد
فمنطقة رشدى فأسكندرية
لحد دلوقتى مفيش حد بيدخلها الا و بيطلع يجرى
حتى الشيوخ
لدرجة انهم قفلوا مدخل العمارة
بنوا حيطه قدامة
انا بقى بفكر ادخل و الله
و لسه مكلم والدى فالموضوع ده

و الله ساعتها العفاريت هى اللى تطلع تجرى
اصلهم كل حركاتهم انهم بينزلوا دم من الحنفية
و بيرموا العفش فالشارع
انا بقى حدخل كده لوحدى من غير عفش
و كمان بالنسبة لللدم فا انا بموت فيه
يا رب المارد يكون بيقرا التدوينة دى
و ياخد عيالة و يمشى من العمارة خايف منى


طولت عليك يا كبير
بس حكاية العمارة دى حقيقى

Bipolar-Girl said...

خد عندك ياسيدي

انك تصحة الصبح تلاقي أمك وأبوك ومراتك وولادك وكل الناس في الشارع والشغل مش عارفينك
انت عارفهم واحد واحد وهما كأنهم أول مرة يشفوك
لا ويخافوا هما منك انت عرفت المعلومات دي عنهم ازاي وهما عمرهم مقبلوك!!!!!! ده رعب بجد

Anonymous said...

بوست يفطس من الضحك :D :D :D :D

انا اكتر خوف عندى من وانا صغير كان من المرايات، انا عارف ان الموضوع ده دكتور احمد خالد توفيق كتب عنة، وانه اتعمل عنه فيلم كمان، بس صدقنى انا الموضوع دة عندى من قبل كل الحاجات دى،اسوأ كوابيسى انى ابقى باصص فى المراية وألاقى صورتى بتعمل حاجة غير اللى بعملها.

بس بجد بوست ملوش حل، خلانى قعدت اضحك زى العبيط قدام الشاشة :D

Anonymous said...

بداية سورى على التعليق الاول المختصر بس كنت بعلق من الموبايل النت من الموبايل كارثة محدش يصدق كلام الدعايه الفارغ كل الحروف المسموحة لى للتعليق
يدوبك52
حرف تقولى ليه مستنتيش لما ترجعى من السفر اقولك ان الموضوع استهوانى بشدة ومقدرتش اقاوم التعليق ............. الموضوع يجنن علأقل محدش حيجى يقولك الرعب حرام.............. من ناحية المخاوف انا عندى كتير اهمها بالاضافة للاول انى بخاف يكون حد عايش معاى فى بيتى ومش شيفاه دة بيرعبنى وجود مخلوقات تانية عايشة معانا واحنا مش شايفنها زى فى قصة عدو الشمس لدكتور احمد خالد توفيق

الدولاب فيه ايه سعات بقلق فلى نص اليل على صوت جى من الدولاب عارفة ان ده اكيد صدى اصوات من بره بس لا اجرؤ انى اقوم وافتح الدولاب

بخاف انى اصحى الصبح ملقيش الشمس متعرفش ليه كل قصص د احمد اصبحت مخاوف بالنسبة لى

انت كنت بتكلم عن الوجدان الجماعى فى فوبيا ان حد يحط ايده على ايدك وانت بتشغل النور ده مش وجدان جماعى ده تأثير قراءه
ما وراء الطبيعة لاكتر من عشر سنين
بس لما اشوفك يا د احمد

Anonymous said...

حلم مرعب بحلم فيه على فترات ...وهو :
أنى لسه فى سنه تانية فى الكليه,وقررت انى الكليه اللى أنا فيها دى عبثيه وأنى لازم اول حاجه اعملها اول ماصحى من النوم انى اسحب ورقى واقدمه فى كليه تانيه, وبصحى من النوم فعلا وأنا مقررة كده., طيب أيه المرعب فى كده؟؟
أن مش فى سنه تانيه , وعندى 30 سنه و معايا دكتوراه وبشتغل فى الكليه اللى عاوزه اسحب ورقى منها
:-((

Oss said...

ههههههههههههههههههه
جامده حتة متعاصوفوبيا دى
بس الأجمد عبمتجللي فوبيا
سورى يا دكتور بس عبمتجللى دى لو بجد تبقى أفوره
مش للدرجه دى
:)
سامحنى بس ما قدرتش اسكت

بص معايا
1-(اسهالوفوبيا):اصل معدتى بايظه بقالها فتره وبيجيلى اسهال كتير
فتخيل نفسك فى المدرسه وفى وسط حصه وأن أن أن
تيجى تنزل يقوللك ممنوع فى نص الحصه
تستنى لآخر الحصه وتنزل تلاقى واحد مرجع فى الحمام القذر أصلاً فتطلع تاخد الشنطه وتلف على أمة لا إله إلا الله علشان تاخد إذن وتكدب وتقول انك تعبان(اصله مش هتقوله أروح أخش الحمام)فى حين انك اصلاً تكون هتعملها على نفسك
ده اسهال
(بعدها باقيت بازوغ بسبب وبدون سبب)

2-(بلبوصوفوبيا):زيك
بس انا باختلف عنك انى دايماً فجأه مش عليا هدوم وباخد ركن فى الشارع واتكوع عللشان أدارى عوراتى والناس رايحه جايه بتبص عليا

3-(درساتوفوبيا):نفس الإمتحانوفوبيا بتاعتك بس أنا متخصص فى الدرسات

4-(عنكبوتو فوبيا):باقرف وباشمئز وبخاف من العناكب

5-(بقية الحشراتوفوبيا)

6-(بنجوفوبيا):أن ادخل البنج واهلس واقول كل أسرارى
ربك يستر

7-(ماورايا فى الحماموفوبيا):
دايماً فى الحمام بتلفت
مش عارف مين ابن******** زرع فى دماغى وانا صغير ان الحمام مسكن الجن
حتى وانا صغير كنت باخاف من السخان وباعتبره العش بتاع الجن (على اساس ان الجن عنده ريش)

8-(أنافوبيا):أهم واحده
بخاف من نفسى
:)

تحياتى يا دوك

adel said...

يا معلم اشروف
تعليق تاني بس المرة دي استئذان اني اخد رسمتك بتاعت وقفة مصرية احطها عندي في البلوج...عشان عاوزها في البوست الجديد عقبال عندك
:):):):)

عادل
http://elbald-dy.blogspot.com/

maha zein said...

ن يتحقق الكابوس الذي رأيته أثناء نومي في ليلة صيف حارة حينما كان إبني في الشهر السادس تقريبا ونطق قائلا : أنا مش عمرو يا عم إنت ، أنا اسمي عبمتجلّي وعاوز أرّوح لمراتي وعيالي ، أنا لا أؤمن مطلقا بتناسخ الأرواح ولكنه كان كابوسا لن أنساه (عبمتجللي فوبيا)
هههههههههههههههههههه
حلمت انه بيقولك يا عم انت
والله العظيم
حكاية

هرطقة said...

عندى رعب من انى اتسبب فى مصيبة
أموت حد بالغلط
أتسبب فى حادثة يتشل فيها حد أعرفه
وده أحيانا بيجيبلى أفكار غريبة
زى انى لما أكون ماسك عصاية مثلا بيجيلى هاجس ان حد ماشى من جمبى هيقع عليا والعصاية هتبقى متنشنة تخزق عينيه
كده يعنى

Anonymous said...

موضوع قوي يا عم اشرف كالعادة ..و علي فكرة ..الفترة الأخيرة دي من فترات التألق في الكارير بتاعك كرسام كاريكاتير ..لسه من يومين كنت قاعد بضحك انا و مراتي علي كام كاريكاتير من بتوعك
ندخل في المخاوف
خايف أصحي ملاقيش مصر ..
يعني الاقي الحكومة وقعت لسبب ما و الفوضي انتشرت
و البنزينات ولعت و الأحياء العشوائية زحفت و هاتك يا تحرش و المحلات اتنهبت و الشوارع كلها واقفة ..الاخوان و السلفيين و المسيحيين و كفايةو طوائف اخري ( مش خايف من اي حد منهم لواحده أكتر منا خايف من اللي حينتج) طلعوا كل واحد ليه غرض فاكر انه صح..و الحرس القديم كمان .
خايف في اليوم ده تكون مراتي برة أو ابني في المدرسة
المستشفي مليانة ناس ..طيب حبطل شغل و لا أكمل ببلاش ..ده برضه واجبي.
فوبيا سيناريو النهاية ..في لحظات و انا مزنوق في المرور بحس انه ممكن يحصل دلوقتي ..يا رب استر علي مصر

الفكرة التانية انو مراتي تبقي راكبة مع تاكسي سواقه ابن حرام و يدوس بنزين و يختفي بيها ..(مرة كانت حتحصل و قصاد عيني تقريبا ) بجد حسيت اني حدخل في اضطراب بطيني من اللي بنعالج منه الناس ...اول مرة في حياتي أحس أني قلقان كده.

الخوف الأكبر أني أفقد القدرة ( علي أي حاجة ) مشي , تفكير , تعلم ..الخ )

اني انام ما أقومش و انا مش جاهز للعملية دي خالص

انا مش بخاف من الضلمة و لا من المجهول ..يمكن بحس اني عاوز انط جواه عشان اواجهه ..انما بخاف من الحاجات اللي قلتها دي.

مرة حد عزيز عليا جدا سألني مين اكتر حيوان بتخاف منه ..قلتله أكتر حيوان بخاف منه هوا انا ..بخاف لا الحيوان اللي جوايا يطلع بأي شكل من الأشكال ..وقتها حيبقي صعب اواجهه أو أخد لعضته تطعيم

.
د.حسام

أكون أو لا أكون said...

من اكتر الاشياء اللي بترعبني:
الجن... هههه اه والله مستحيل اطلع لحديقة البيت بالليل لوحدي... ولو حد معاي... بتلاقيني بتلفت ورايه كل شويه... هههه
فوبياجن

تاني حاجه المنشار الكهربائي... بترعب منه... يعني تجي في بالي افكار... ان المنشار بيفلت من ايد اللي ماسكه... يقوم قاطع له ايده ولا رجله... او تخيل المنشار يلف يلف يروح مشرح الناس اللي حواليه... يماااااااامي....ههههههههه
فوبيامنشار

انا عندي عقده من الصراصير.... عارف ليه...؟؟؟ فكر كده...
















مره بالليل كنت نايمه في امان الله... حسيت حاجه بتجري بشعري... فزيت من النوم....










لقيت الباشا معشش براسي عاوز يكون اسره وبيت على حسابي...هههههه قعدت اللي في البيت كلهم على صرااااااااااااخ....
فوبيا صرصار....


الشبنت...! اه الشبنت اللي بياكله بباي ويطلع عظلات...
انا طلع لي قزازه في الاكل... وخلاص الشبنت صار احد مسببات الرعب ليه...
فوبياشبنت

كفايه كده يادكتور اشرف...؟؟؟
:)

أشرف حمدي said...

أكون أو لا اكون

هههههههههه أنا بقى صحيت مرة وصرصار كان ماشي على بقى
تخيلي بقى

وبعدين باباي بياكل سبانخ ، ايه الشبنت ده بجد ؟؟؟
تحياتي وميرسي على التعليق الظريف ده

أشرف حمدي said...

دكتور حسام
تعليق أكثر من عبقري ، قريته خمس مرات
لا تعليق على تعليقك
وألف شكر على رأيك في كاريكاتير الفترة الأخيرة
خالص حبي واحترامي

أحمــــــــدبــــــــــلال said...

تخيل نشر اهم و ابشع اسرارك الدفينة و التى تخفيها عن الجميع
فضيحةفوبيا
لكن مش هاقولك الضلمة و النور و الحاجات دى أنا بحب الضلمة أكتر من النور البسيط الضعيف
بحب الوحدة أكتر من اللمة و الزحمة

Anonymous said...

بوست جامد جامد ياأشرف

بخصوص أكتر حاجه مرعبه بالنسبه ليا ان يطلعلي فار انا بخاف موت منهم و اما بشوفه في التليفزيون ماتشوفنيش ممكن تلاقيني نطيت لفوق من رعبي

برضه حكايه العمي دي بخاف منها فجأه الاقي كله سواد قدامي فكره مرعبه جدا بالنسبه ليا

مرسي يااشرف علي البوست الجامد ده و عجبتني كل نقطه قلتلها فيه
تحياتي ليك

M!DO said...

أكتر فكرة مرعبة بتراودني إني و أنا نايم و مروحة السقف شغالة تقوم تقع و هيا بتدور بسرعة و تشرحني!! لدرجة إني غيرت مكان سريري من تحت المروحة لحتة تانية و مبقتش بشغل المروحة على سرعات أصلاً " مروحاتوفوبيا"
برضه بخاف لما حد يمشي ورايا في الشارع قريب مني بحس إنه هيغزني بحاجة من ورا " غزاتوفوبيا"
عندي خوف برضه إني لو إتخانقت في يوم من الأيام حد يضربني بموس في وشي " موسوفوبيا"

Anonymous said...

اكتر حاجه بترعبنى مش بتخوفنى انى كل ما فى يوم اجى ارسم اكتشف انى فقد القدره على حتى انى ارسم خط صغيير


انى اصحى الصبح الاقى حد من اللى بحبه مش موجود


واكتر حاجه بتخوفنى بجد الشمعه
مش عارفه ليه متخيله دائما انها هتعمل حريقه بنجرد ما تولع مع انى اقتنى عدد كبير من الشمع بجميع الاشكال بس مطفى


سمسم لعنه الفن

Anonymous said...

ازيك يا فنان

عاوز اقول حاجات كتير
نبتدي من الاول خالص من زمان اووي

و انا طفل كان عندي حالة سيطرت عليا عرفت بعد كدا انها حالة نفسية قريت عنها او سمعت عنها مش فاكر بس اعتقد ان اسمها الوسواس القهري

و تمثلت في ان كل ما ادخل الحمام لازم اعمل حاجة اول ما ادخل
وهي اني ارمي نظرة خاطفة ورا الباب
وفي الثواني اللي قبل ما ابص ورا الباب بكون في غاية الرعب
من ايه مش عارف

بس لازم ابص

و استمرت معايا الحكاية دي نقول لاخر اعدادي يعني 13 سنة


دايما بحلم حلم غريب جدا
بحلم اني في حياتي كلها حالياً متوقفة على اني ادخل امتحان ثانوية عامة بكرة الصبح بتوقيتنا ده
يعني بعد 7 سنين من امتحان الثانوية بتاعي
و المفروض اني لازم اجيب نفس مجموعي و الا حياتي كلها هتتدمر

حكيت الحلم ده لواحد صحبي فضحك عليا
المشكله انها فكره مرعبة جدا

انك تدخل امتحان في حاجه متوقفه عليها حياتك و انت مش فاكر اي حاجه في الشيء اللي هتمتحن فيه عموما
مش مجرد ثانوية عامة و خلاص


عندي ضلما فوبيا
بخاف من الضلمة بس لما تيجي فجأة و اكون لوحدي

انا ممكن اقعد في الضلمة ساعات عادي جدا
بس اكون انا اللي اخترتها
يعني اطفي النور و اقعد فيها
انما لما ابقى قدام التليفزيون او الكمبيوتر و النور يقطع و الدنيا تبقى ضلمة دا شيء بكرهه جدا


بحب الموسيقى جدا
فاكر البوست بتاع ساوند تراك لعبة ماكس بيان

المهم انا عندي فوبيا اني اطرش فجأة
مش لمجرد حبي للموسيقى
و لكن الصمت بيقتلني


اوقات بحلم اني ماشي عريان في الشارع فجأة كدا من غير مقدمات

على قد ما الفكرة مضحكة بس بكرهها جدا


في حاجات كتير جدا غير كدا
المرض اكيد
الموت
بخاف من ربنا

R.R said...

هههههههههههفوبيا
بجد ضحكتنى جدا وسريعا هقولك على حاجات بتخوفنى ولو افتكرت تانى هرجعلك
دى احلام دايما بتجيلى

1-امتحانتوفوبيا
2-سنانو فوبيا بيجلى الحلم ده كتير بتاع سنانى بتقع بصحى اعدهم وانام وانا شاكره ربنا جدا اول مره اعرف ان فى ناس بتشاركنى الحلم ده احمدك يارب لسه متجننتش
2- جوازوفوبيا دايما بحلم انى اتجوزت او هتجوز واحد مش عارفاه او كنت عارفاه بس اكتشفت انى واخداه كده وخلاص متتصورش الحلم ده بيرعبنى اد ايه يارب ما يتحقق
4- جاموسافوبيا حلم بيجيلى على فترات ان فى جاموسه بتنطحنى او بتجرى ورايا عشان تنطحنى وكمان احيانا ببقى قاعده فى البيت والقيها اخترقت الحيطه عشان تنطحنى اهىء اهىء اهىء نظام دا جايلى انا بقى
ههههههههههههه
بس فعلا ضحكتنى جدا ربنا بوست تحفه

وينكى said...

يانهار ابيض عليك يا اشروف
صورتك لوحدها دى رعبتنى .. يالهوى
بص بالنسبالى انا باشوف نفسي اقل انسانه ممكن تخوفها
بمعنى انى باتريق على اللى يخاف من صرصار او قطه او عفريت او مش عارف ايه من الحاجات اللى البنات بتخاف منها دى
بس بينى وبين نفسي فيه حاجات بقلق منها شوية كده
1. وانا طالعه او نازله من على سلم بخاف جدا اتكعبل او اتزحلق واقع على وشي( خصوصا سنانى).. سلالمو فوبيا
2. اكون باغسل وشي قدام المرايه والمح صورتي بتتصرف غيري او انى الاقى حد تانى بيبص عليا.. مراياتوفوبيا
3.يبقى طالع عيني فى شغل او كتابه حاجه طويله على الكمبيوتر وكله يضيع فى لحظة.. فقدوفوبيا
4. احلم حلم ابقى حاسه ان ليه معنى وابقى مطالبه انى اعرف تفسير.. بخاف جدا من كتاب تفسير الاحلام.. مش عارف ايه فوبيا
5.الناس بتقول عليا ايه من ورا ظهري.. خصوصا احب الناس ليا.. هما شايفينى ازاى وانا بالنسبالهم ايه
6. العين والحسد جدااااااااااااا
7. اموت وانا باعمل حاجه غلط
8. امن الدوله يجرجرني لأسباب غير معلومه
9. ابقى ماشيه فى الشارع وحد يخطف منى شنطة او موبايل او يتحرش بياواعجز انى ادافع عن نفسي
10.اكون بحب حد قوي ويكون بيضحك عليا او عنده حسابات تانيه فى دماغه

أشرف حمدي said...

بصراحة مش عارف أرد إزاي :) جميع التعليقات راااائعة
بجد ماكنتش متخيل التفاعل ده
التعليقات تفوقت على التدوينة أساسا وبقت مادة غنية جدا
سامحوني إني مش قادر اعلق على كل واحد بس بجد أسعدتوني جداااااا
تحياااتي :*****

وينكى said...

نسيت حاجه
عندى برضه فوبيا انى لما ادخل الحمام الاقى حد حط ايده ( ايد هيكل عظمي ) على ايديى لما اجى اولع النور
وانا صغيره مسكت مجله بتتكلم عن الكوابيس فيها صورة ايد مخترقة الحيطة
من ساعتها وانا بحس ان فيه ايد هاتمسكنى من ورايا وتشدنى
مره خرجت من الحمام وقفلت الباب ورايا كويس واتخيلت ان الايد خلاص محبوسة
وانا رايحه اوضتى لقيت باب اوضه ماما وبابا مفتوح والدنيا كحل
رحت جاريه على سريري وانا باعيط وبترعش
بس الفوبيا دى خلصت خلاص
عندى برضه فوبيا انى ادخل اعمل عمليه واصحى الاقى حاجه ناقصه مني.. كلية.. دراع.. قلب.. رئة.. حاجه مني اتسرقت وانا فى اقصى حالات الضعف
انى اكون فى حاله تحت تأثير مخدر مش قادره اتحرك لكن انا واعيه جدا وتحصل حاجه ماقدرش انى اتحرك ساعتها او اتصرف
انا بحب النار جدا وباموت فى الشمع بس بخاف اصحى م النوم الاقى حريقه كبيره تشل تفكيري
او زلزال او بركان
واكتر حاجه قالقانى هو ايه اهم الحاجات اللى المفروض اخدها معاياوايه اللى ممكن اسيبه يولع
بخاف لحسن حد من اخواتي او ماما او بابا يموتوا
انا رغيت كتير.. كفايه كده

Hala Adel said...

البوست تحفه يا أشرف..
على فكره موضوع الأسنان اللي بتقع ده حلم مشترك بين دكاترة الأسنان كتير بحلمه و أقوم أطمن على أسناني
أكتر حاجه بترعبني و تخوفني اني أموت قبل ما مرتب الدكاتره يعدي ال 300 جنيه

Anonymous said...

لو عن الفوبيا يا دكتور اشرف هنتكلم يبقى خد عندك :
1 - عندى خوف رهيب من المصاعد ابقى راكب واحد ويقفل وميرضاش يفتح حصلتلى كذا مرة لما اتعقدت (اسانسيورفوبيا)
2 - بكره شئ اسمه العناكب ، كنت قاعد ايام الثانوية العامة قبل الامتحان بفترة وجيزة بذاكر القصة بتاعة الانجليزى فاكرها بتاعة ايمن والعناكب لو كنت درستها ، المهم لقتلك واحد طلعلى من القصة ، اه والله اصله كان جاى جرى من ورا السرير ، لا وايه عنكبوت اصلى من بتوع الجيزة والاحياء الشعبية متغذى تمام ورجليه رجل جمل طار من الكتاب لايدى لحد ما وصل لوشى بعيد عنك كنت باصوت بالحييانى (ابوشبت فوبيا)
3 - عندى فوبيا من النت لما تكون قاعد وبتعمل حاجه وهوبه تقطع عليك (دوانلودوفوبيا(
4 - بخاف من نفس العفريت اللى بيخاف منه الشعب كله ، اللى يكون مستنيك تحت السرير بالليل اول اما تتعرى تتعرى وتبان رجليك يقرمها (بطانية فوبيا) فكرت مرة انى ادبس البطانية فى السرير
ولحد هنا كفاية خوف بقى

Rising Force said...

السلام عليكم

معلش هو االتعليق متأخر شوية بس أنا لسة قاري البوست ده النهاردة
أولا أحب أهنيك على البوست الرائع ده و تعليقات القراء الأكثر من رائعة و اللي أضافت فعلا للبوست نفسه .
ثانيا بالنسبة لأكتر حاجات مرعبة بالنسبة لي :
- الخوف من الغرق : انك تلاقى نفسك على عمق كبير تحت المية لا يسمح لك بأنك تنقذ نفسك حتى لو بتعرف تعوم(أنا مابعرفش أعوم بالمناسبة)، وممكن توسيعها خارج نطاق المية بأنك ماتلاقيش تحت رجلك أرض بصفة عامة يعني في الهوا أو تحت المية ، الفكرة دي مرعبة جدا بالنسبة لي.
-الخوف من شخص أو شئ انتا مش متوقع منه شر أو متوقع منه الأمان أو المساعدة : و طبعا أشهر مثال القصة بتاعت الشخص اللي لقى نفسه في مكان كل الناس اللي فيه من غير وجوه فاجري بره المكان ده و لقى واحد واقف مديله ضهره فاجري عليه علشان يطلب منه النجدة لاقاه هوا كمان من غير وجه، الفكرة دي فيه عليها تنوعيات كتير في أفلام رعب و روايات يعني اتقتلت من الآخر بس برضه لسة مرعبة جدا بالنسبة لى.
- برضه موضوع اليد اللي تتمد عليك في الضلمة و انت لوحدك برضه مرعب بالنسبة لي بس بنفس الدرجة بتاعت الأتنين اللي فوق.

أخيرا أحب أقول لحضرتك إني معجب جدا بالبلوج بتاعك و باحس انك بتتكلم بلساني فى أوقات كتير، و احنا في الآخر جيران برضه أنا ساكن في فيصل أنا كمان بس في الطالبية مش بعيد عنك يعني ده هى فردة كعب :)

تحياتي
نادر

Counter