Total Pageviews

Friday, December 15, 2006

قسم أم قراط



تشهد كلية طب الفم والأسنان جامعة القاهرة بأن السيد \ أشرف حمدي محمد وجنسيته مصري والمولود في الجيزة بتاريخ 20\10\1982
قد حصل علي درجة البكالوريوس في طب وجراحة الفم والأسنان سنة 2005 وذلك بتقدير عام جيد
وقد تحررت هذه الشهادة بناء علي طلبه لتقديمها لمن يهمه الأمر .

يا تري فيه حد يهمه الأمر فعلا ؟
***
السبت
16\12\2006
موعد قسم أبو قراط الساعة الثانية عشرة ظهرا .
أشعر بغصة في حلقي .
لن أذهب ... لا يمكنني أن أقسم علي شيء لن التزم به .
عفوا يا أبو قراط .. انت أكبر مغفل سمعت عنه في حياتي .
***
لم أكن أعرف ان أحلامي أيضا ربما تكون كوميدية . حلمت بالأمس أنني في دار الحكمة ممسكا بطبلة , قول ورايا يابني : اقسم بالله العظيم ... أحكم وضع الطبلة علي ساقي اليسري وأغني : أحلف بسماها وبترابها ... أحلف بدروبها وأبوابها ... أحلف بشهادتي اللي واخدها ... أحلف ببلادي اللي فاقدها ... أحلف بالفقر وبالسرقة ... أحلف بالآه اللي بحرقة ... أحلف بالعلم اللي ذاكرته ... أحلف بالسم اللي شربته ... أحلف بالجوزة وبالشيشة ... أحلف بدين أم العيشة
إني عمري ما حشتغل في الطب .

17 comments:

Shadi said...

مبروك الشهادة
عقبالي يارب
على فكرة أنا بقالي 7 سنين في صيدلة
ولو اتخرجت مش حشتغل صيدلي برده


إدعيلي أتخرج
كله يدعيلي خلاص زهقت تعليم كفاية كده

ياسر حسين - فنان كاريكاتير said...

عزيزي الفنان أشرف
فقد طب الاسنان طبيب اسنان مجتهد... وفاز فن الكاريكاتير بفنان كاريكاتير متميز ... هما اللى خسرانين
بس مافيش داعي تزعل من أبو قراط ده راجل طيب مكنش عارف الوضع اللى هيوصل له شباب خريجي طب الاسنان
أحمد ربنا أنه أكرمك بالموهبة الفنية اللى ان شاء الله هتكون لك سند أحسن من علاج اسنان البني آدمين...بالحق .. هو أبو قراط كان شغال أيه؟؟؟؟

وينكى said...

بجد انا مش عارفه أقولك ايه
حاسه انك فى حالة احباط جامد
بس اكيد دا مش دكتور أشرف اللى عرفته
ايه يعنى
روح واقسم وطون طبيب واثبت نفسك
كمل المسيره للآخر
ماحدش عارف ايه اللى هايحصل كمان دقيقه

AHMAD said...

قولنا بلاش حشيش مع الشيشه

مساء الورد يا اشرف

أشرف حمدي said...

ماحدش محتاجني كطبيب للأسف
طب الأسنان خلاص انهار ولأول مرة في تاريخ الطب يبقى فيه بطالة أطباء أسنان بالتحديد
حتى الكاريكاتير مش جايب همه
ولا الصحافة
ولا أي حاجة في البلد دي
انا لو كنت في أمريكا أو حتى اي دولة عربية لكنت من علية القوم

سناء جمال said...

موضوعك فعلا حلو اوى
انا معجبة اوى بكاريكاتير الفنان ياسر حسين فعلا كووووووول
وعندى أقتراح تعملوا دويتو انت تكتب وهو يرسم هيبقى حاجة جميلة جدا

ياسر حسين - فنان كاريكاتير said...

عزيزي أشرف
صدقني ..مجال الكاريكاتير زي اي مجال محتاج صبر .. أنا شخصياً أشتغلت سنين من غير ما أقبض ولا حتى ربع جنيه .. بس حقيقي بعد الصبر ربنا بيفرجها وأكتر مماكنت أتخيل ... حاول يكون نفسك أطول من كده .. بس واضح أن الشيشة بتقطع النفس فعلا ... أنت فنان موهوب والموهبة الحقيقية بتطلع زي الصاروخ
تحياتي..

SaSo said...

الف الف مبروك يادوك
طب الاسنان هيخسر كتير

Mohamed A. Ghaffar said...

طب ليه تعبت نفسك فى دراسه انت شايف لا انت ولا المجتمع هيستفادوا بيها

Dananeer said...

مبروووووووك و معاك حق مفيش حاجه نافعه
بس ساعات بتكون مضطر

ابن مرّ said...

كويس انك ما جتش المهزلة والا كنت اتشليت لأنهم للمرة التسعين كرموا أولاد الأساتذة"الأوائل يعني" وكالمعتاد في المكروفون تدوي عبارة سلملي على بابا يا مورة
أهو نجيب سرور ما متش من شوية

سلامات يا طب

ياسر حسين - فنان كاريكاتير said...

بعد اذنك يا دكتور اشرف
ليا تعقيب على تعليق الأخت سناء جمال
أولا أنا بأشكرها على تعليقها على رسوماتي ... ثانيا أنا شايف أن الفنان أشرف حمدي رسومه وأفكاره معبرة جداً مش محتاج يعمل مع حد دويتو وخصوصا أن فنانين الكاريكاتير زي الفاكهة لكل واحد طعم مختلف من حيث التوجه أو الافكار أو الخطوط
تحياتي

أشرف حمدي said...

للأسف فقدت خمسة تعليقات دفعة واحدة نتيجة للإرهاق وعدم التركيز .
ضغطت
refuse
بدلا من
publish
أرجو من أصحاب التعليقات أن يعذروني
تحياتي

هيثم ابوعقرب said...

لحظه قد مرت علي بدون ادني شعور
لحظه عرفت قيمتها بس لما الناس حواليا ابتدت تقولي يا استاذ لكن مش بالشهاده
اشرف انا بقولك يا دكتور ودي احسن من مليون شهاده

Rasha said...

الدكتور اشرف وفناننا الموهوب بكل حاجه طب الاسنان هو بحد ذاته فن لمن يقول لك لماذا درست طب اسنان اعلم اننا احيانا تكون طموحتنا كبيرة ولكن بعد التخرج ننصدم بالواقع بس الاستسلام لهذا الواقع ليس الحل يا صديقي الجميل اشرف.. واثقة بانك ستكون متفوق في طب الاسنان ايضا ..طب الاسنان الان اصبح متقدم جدا اكمل مشوارك تجميل الاسنان ايضا مطلوب كثيرا لربما المشوار صعب في مصر ولكن جميعنا نبدأمن الصفر ونكبر ..اعلم انك واعٍ لكل هذا الكلام ولا تحتاج ان تسمعه لاني اثق في ذكادك كثيرا

رغم كل شيء تستطيع ان تغير شىد من واقع الحياة صدقني

وانا واثقة بانك ستختار ما تحب وما ترغب وفي كل الاحوال اعلم بانك ستلمع

تحياتي

The Eagles said...

الكلام بتاعك جااااااااامد
واجمد حاجة انك تحلم انك ماسك طبلة وبتلحن القسم
وكمان بحلف بالجوزة والشيشة ودين ام العيشة
انى مش هشتغل فى الطب
شيد حيلك فى الشغل وشغل دماغك واسنانك بحكم قسم الاسنان اللى انت اتخرجت منه ومش عايز تشتغل فيه ان شاء الله ستجد ما تريده بس بجد لا تضع فى ذهنك انك لن تشتغل فى مجال دراستك لانك بذلك سوف تفعل مثل الباقين ممن يعمل بغير مجاله ويضيع كل هذه العمر الذى قضاه فى هذه الدراسة وهذا بعيدا عن ان مجال العمل اصبح غاية فى السوء داخل بلدنا مص المهروسة وايضا اصبح كالفريسة التى تتناحر عليها النسور كى يلتهموها
وفقك الله ووفقنا جميعاااااااااا
والسلام..........

RR said...

تعرف ان الاغنيه وكمان اسم القسم كده اوقع ... ياريت يوصلك صوت سقفتى

Counter