Total Pageviews

Monday, December 18, 2006

سامحوني



تجربة جديدة كان من المحتم خوضها رغما عما أعانيه من ضغوط نفسية وصحية بسببها .
ومهما كانت طبيعة الصعوبات التي أواجهها الآن , لا أعتقد أن قراري كان متسرعا , ولا أعتقد أيضا أنني بقادر علي الرجوع فيه علي الأقل في الوقت الحالي .

أكتب لكم هذه التدوينة من مقر عملي الجديد بإحدى مجلات الكمبيوتر المتخصصة والتي أعمل بها كمحرر بوقت كامل مما تتيح لي القيام بأعمال إضافية بمجال القصص المصورة والرسوم ثلاثية الأبعاد , لا أدري , يبدو أنني اصبحت أكتب التدوينة بلغة صحفية مختلفة وكأنني أعمل في تقرير عن آخر اصدارات شركة مايكروسوفت .
يبعد مقر العمل مسافة ساعتين كاملتين بالأوتوبيس المكيف الذي لا يأتي أبدا في موعد عودتي وأضطر إلي التنقل عبر وسائل مواصلات متنوعة من شعبطة في أوتوبيس هيئة النقل العام إلى الجري وراء مايكروباس مزدحم والمشي لمسافات تقصر أو تطول حسب الظروف .
عمل يلتهم 12 ساعة من يومي , أعود بعدها جثة هامدة ولا أستيقظ إلا في صباح اليوم التالي لألحق بيوم جديد شاق .
أصبحت لا أجد البال الرائق لرسم الكاريكاتير عشقي الأول والأخير , ربما أجلس بمكتبي في نهاية اليوم شاعرا بمطارق هائلة تهشم رأسي لأرسم لوحة أو اثنتين قبل أن يسقط القلم مني ولا أقوى علي الامساك به ثانية .
كأي فنان من الصعب توظيفه وإجباره علي مواعيد حضور وانصراف حتى وإن كان يعمل بنفس مجاله الفني , عمل الفنان لا يأتي وفقا لمواعيد ثابته ومحددة , أنه يأتي في أي وقت , ربما يأتي الوحي أثناء النوم , ربما فور الاستيقاظ , ربما وهو يجلس علي المرحاض أو وهو يقضي واجب العزاء في شخص عزيز . ولكنه للأسف لا يأتي أبدا أثناء أوقات العمل الرسمية !
لازلت أجد صعوبة في الذهاب لمجلة صباح الخير كل ثلاثاء ولكنني أحاول , ولا أعتقد أن قسوة الظروف مهما اشتدت بإمكانها أن تبعدني عن هذه العادة المحببة لي في العمل بصباح .
أصبحت لا أجد الوقت الكافي حتى لمجرد الحديث مع خطيبتي هاتفيا فضلا عن رؤيتها .
يجب أن أعتاد الباتيه بالزيتون من المخبز المجاور وطعم شاي المقهى الرخيص الذي أجلس عليه في فترة الراحة اليومية والجلوس طوال ثمانية ساعات أمام شاشة الكمبيوتر .

وجدت نفسي مضطرا إلي الابتعاد قليلا عن أحبائي في وشوشة .
إذا كانوا يقرؤون هذا الكلام فأحب أن أخبرهم بأنني لست سعيدا بما أعانيه الآن , لست سعيدا وأنا حتى غير قادر علي رؤيتهم بغض النظر عن مجرد عملي معهم . لست سعيدا وأنا بعيد عن مكتبي الذي وضعت عليه عبارة مازحة ( أشرف حمدي رئيس قسم الكاريكاتير بالجريدة اللي مافيهاش كاريكاتير ! )
صدقوني أنا محبط للغاية , في أشد حالات إحباطي عنفا وقسوة , أشعر بانني لست أشرف حمدي الذي أعرفه والذي أرتاح بالانفراد به علي مقهاي المفضل لأبحث عن فكرة جديدة للجريدة .
أشعر بإفلاس شنيع , لم يعد لدي ما أقدمه ويناسب طبيعة وشوشة الفنية , أنا لا أكتب عن نجوم المجتمع ولا عن المشاهير ولا عن المترفين من طبقة الصفوة . أنا اكتب وأرسم عمن أنتمي إليهم من بسطاء ومقهورين ومطحونين وهي أمور لا تناسب إلا صفحة ناسنا وأهالينا بالجريدة والتي تلتهم الترويسة ثلثها الأيمن .
لم يعد لدي مصادر لأخرج منها بخبر صغير لصفحة الأخبار .
لم أترك شخصية هامة أعرفها إلا وأجريت معها حوارا .
كنت أتمنى أن أبقى معكم حتى كمسئول عن جزء الكمبيوتر بصفحتي الشباب ولكن هناك من يتولى تحريره بالفعل في وشوشة .
لست أعتقد أنني مفيدا , ومن الشرف أن أنسحب قبل أن أعلن إفلاسي بشكل عملي في موضوع ضعيف أو تقرير لا قيمة له .
أرجو أن تسامحونني بحق العيش والملح وعشرة إضحك للدنيا .
إغلاق اضحك حطمني نفسيا تماما والتهم كل مدخراتي خلال الفترة التي قضيتها بلا عمل , حتى أنني اشتريت كاميرا رقمية من أجل عملي الجديد كصحفي بآخر ما تبقى لي من نقود تجهيز شقتي .
من حقي أن أبحث عن وظيفة بدخل معقول خاصة وأنني مقبل علي الزواج قريبا .

ولا أعتقد أنكم ستغلقون الباب في وجهي لو قررت العودة مرة أخرى علي الأقل كصديق .
سامحوني

12 comments:

Shadi said...

مش عارف اقولك ايه
........
كل الي اقدر اقوله ربنا يوفقك في اي مكان
انت رغم قصر فترة معرفتي بك
ولكنك لديك قدرة هائلة على اضحاك الناس والتهوين عليهم
وانا ارك تتكلم بنبرات حزينة فلا يسعني الا ان اقول لك
موتي يا اجرام نيهاهاهاهاهاها

Mohamed A. Ghaffar said...

اهلاً بيك فى القطاع الخاص شرفت الطاحونه يا باشا
اللى انت بتقوله ده وصف تفصيلى لحياه شاب بيحاول يعيش عيشه فقط كريمه ويوفر للى مسئولين منه ابسط الأشياء

خايف القطاع ياخدك منا ، انا بجاهد عشان احط كلمتين فى مدونتى الخايبه مبالك بواحد فنان زييك

ربنا يعينك وميحرمناش منك ومن فنك ويرزقك ويسعدك ويجوزك وربنا يستر

sherehan84 said...

معنديش غير اني أدعيلك ان ربنا يوفقك ويلهمك بالصح

m4m said...

ربنا معاك ويقدرك تحافظ على موهبتك

أحمــــــــدبــــــــــلال said...

ربنا معاك ياعم
بس أدعيلك برضه ربنا يرجعك لينا
مش معقول يعنى تتوقف كده
بس هستناك

و لا أجيبلك أليسا تغنيهالك بستناك

ياسر حسين - فنان كاريكاتير said...

عزيزي أشرف
زمان وفي بداية الطريق أبويا كان بيقول لي أنت بطل يابني عشان بتقدر تعمل فن في يوم مليان زحمة مواصلات وتسلطات مدير في ديوان عمل حكومي عتيق أو قطاع خاص يمص وقتك ودمك
عش يا صديقي وتذوق طعم البطولة
ولاتعتبر ما أنت فيه الآن عذرا لكي تتوقف عن الفن والابداع
صدقني يا فنان بكره بإذن الله أحسن من النهاردة بس شوية صبر
تحياتي

Khalil said...

السلام عليكم
مبروك يا أشرف و انا متأكد انه قرار سليم
دخولك للقطاع الخاص حيوفرلك خبرة كبيرة رغم انه مرهق بشكل قاتل .. و انا قلت لك كدة من زمان
و على العموم يا أشرف ... أنا مش عاوزك تتعامل باليأس دة .. فى ناس غيرك معندهمش موهبتك الفنية و الصحفية و لا كان عندهم بعد نظر زيى لما درست البرمجة من و انا فى الكلية..
الناس دى دلوقتى فرصها أقل كتير من فرصتى و فرصتك
كان فى واحد الله يمسيه بالخير كان بيشوفنى لما كنت باشتغل 12 ساعة على الأقل يومياً و كان اخر كل يوم يقوللى .. تعبت يا محمد؟
ارد و اقوله ده انا هلكت مش تعبت
يرد و يقوللى ..
ما هو ده وقت التعب .. أمال عاوز تتعب امتى لما يبقى عندك 60 سنة؟؟
و والله من يومها و كل لما اتعب و تضيق بى الدنيا كنت بفتكر الكلام دة .. و كنت باعرف ان دى سنة الحياة و انى لو متعبتش دلوقتى اوى .. عمرى ما حرتاح ابداً .. و ان ربنا اكيد حيعوض تعبى دة
و انت تعبت يا اشرف كتير .. و انشاءالله ربنا حيعوضك خير بس تصبر و تكمل ..
حفكرك بحاجة ممكن كون ناسيها .. فاكر زمان و احنا فى ثانوى لما قلتلك ان أنا مؤمن بيك و بموهبتك .. و بالتأكيد فى ناس تانية حتكون مؤمنة بيك و بموهبتك ..
بص لنفسك النهاردة و للى انت وصلتله فى الكاريكاتير و الجرافيك و بص لمدونتك اللى كل زوارها مؤمنين بيك و بموهبتك
كلامى أتحقق بعد 8 سنين بحالهم..
و انا بقولك دلوقتى حاجة ممكن افكرك بيها بعد كام سنة كمان
أصبر يا اشرف و انا متأكد أنك انشاء الله حتوصل .. محدش بيكبر مرة واحدة .. انت أخدت 8 سنين عشان تبقى أشرف حمدى بتاع النهاردة .. أصبر و توكل على الله

لا تحسبن المجد تمراً انت آكله
لن تبلغ المجد حتى تلعق الصبر

أخوك دائماً
محمد احمد خليل

إياكش تولع said...

الفنان الجميل أشرف حمدى

ربنا يوفقك... بس ابقى اعزمنا فى الفرح
:)

Rasha said...

تمر بلحظات وظروف صعبة لا تستسلم سوف تفعل الذي تنتمي له فالفن في دمك ربما هي فترة صعبة ولكنها ستمر وسوف تعود

اتمنالك التوفيق في حياتك لانك تستحق كل الخير والسعادة

ربنا يوفقك ويحميك

أشرف حمدي said...

بجد انا مش عارف أقولكم ايه
بجد والله انا سعيد جدا بكلامكم وتشجيعكم .. والله العظيم انتوا اللي مصبرينني
أنا لا يمكن أبطل تدوين ولا يمكن أبطل رسم ودول الحاجتين اللي فاضلين لي دلوقتي
ربنا يخليكوا ليا كلكم
بحبكم قوي

Shadi said...

عاوز/ة كل الناس تعرف مدونتك
اشترك في مشروع الغريب لارشيف المدونات
http://elgharep.blogspot.com/2006/12/blog-post_15.html
............
المدونات العربية
http://arabblogs.blogspot.com/
........
بدل لما تحط لستة طويلة باسماء المدونات
عندك في مدونتك
حط اسم مدونة واحدة تحتوي على اسماء كل المدونات
........
عاوز اسمك يضاف الى قائمة المدونات
ارسل لنا اسم مدونتك وعنوانها و اسمك
على
za_shady@yahoo.com
...........
لو عجبك المشروع أخبر به كل اصدقائك لكي ينجح


امضاء
أعضاء مشروع الغريب لارشيف المدونات

وينكى said...

متأخره كالعاده
ماباجيش إلا بعد ما المولد ينفض
بس لازم أكون موجوده دلوقتى عشان أقولك.. سيرى يا نورماندى على بركة الله
كلنا معاك( معنويا .. ودا أضعف الإيمان) , وكلنا مؤمنين بيك
ضاقت فلما استحكمت حلقاتها فرجت
وكنت أظنها لا تفرج
دا أكتر شىء أنا مؤمنه بيه
أصبر وبكره تفرج..
ولو انت خايف لحسن خطيبتك تزعل ولا حاجه .. لا ما تخافش
لازم هى كمان تقدر تعبك وبعدك المؤقت عنها
ومبروك مقدما

Counter