Total Pageviews

Monday, July 14, 2008

أين ذهب الأدباء ؟


بدأت القراءة منذ الصف الخامس الابتدائي تقريبا.
وأقصد بالقراءة هنا أي شيء لا علاقة له بمناهج الوزارة العقيمة والغبية ، وأقصد بالعقيمة والغبية كلا من المناهج والوزارة معا .
كانت البداية بالطبع المغامرون الخمسة ككل أبناء جيلي ، ثم تطور الأمر إلى سلسلة عين في اتنين لنبيل فاروق ثم ملف المستقبل حيث انني لم أكن أحب قصص الجاسوسية رجل المستحيل وكنت أميل إلى الخيال العلمي ، ثم تعرفت على كتابات العبقري أحمد خالد توفيق وكان أول شيء أقرأه له هو العدد السادس من ما وراء الطبيعة أسطورة ميدوسا وسرعان ما استطعت الحصول على الأعداد الخمسة التي فاتتني وبالطبع أصبحت مدمنا لكل حرف يكتبه فيما بعد سواء أكان مقال أو ترجمة أو قصة أو رواية ، ومع بداية المرحلة الثانوية وقع في يدي كتاب أينشتين والنسبية للدكتور مصطفى محمود فإنضم على الفور إلى قائمة الكتاب الذين أقرأ لهم مع عبد الحميد جودة السحار ويوسف ادريس وتوفيق الحكيم ومحمد عبد الحليم عبد الله وذلك العفريت العبقري المبهر الساخر الماكر محمد عفيفي مع بعض من كتابات يوسف السباعي وربما رواية واحد لإحسان عبد القدوس ، الوحيد الذي فشلت تماما في الاندماج معه هو نجيب محفوظ "سبحان الله" الحائز على جائزة نوبل ، لم أستطع أبدا أن أكمل له رواية واحدة ، خاصة تلك التي تحمل اسم ثرثرة فوق النيل ولا داعي لإخباركم بالاسم الذي أطلقته عليها حتى لا يهاجمني عشاق الأديب الذي شهد العالم كله بعبقريته إلا انا .
المهم كنت منسجما تماما مع قائمة كتابي ، بل يمكن القول بأنني قد تربيت على كتاباتهم ومعظم أفكاري بالإضافة إلى جزء كبير جدا من شخصيتي هو من نتاج قراءة أعمالهم .
ومع نهاية المرحلة الجامعية ظهرت البوادر الأولى للمشكلة التي اعاني منها الآن .
لقد قرأت كل شيء تقريبا ولابد من إعادة كتابة قائمة أخرى لأدباء جدد .
المصيبة الحقيقية هو أنني لم أجد .
وظل دكتور أحمد خالد توفيق هو الوحيد الباقي من قائمتي القديمة ليصبح وعن جدارة الأديب المصاحب لي في كل مراحل عمري ( طفولة \ بلوغ \ مراهقة \ شباب \ نضج ) أمد الله في عمره ليكمل معي ما تبقى من حياتي .
وقد كان تشريفه لي يوم فرحي بمثابة جميل لن أنساه وسأظل احكيه لأبنائي وأحفادي لأنه بالفعل انسان أكثر من رائع.
ولكن نعود إلى المشكلة ، إين ذهب الأدباء ؟
كانت هناك ام كلثوم ، ثم عبد الحليم حافظ ، ثم عمرو دياب الآن . أليس كذلك ؟
وبالمثل كان هناك يوسف ادريس وتوفيق الحكيم والسحار والسباعي ونجيب محفوظ و و و ، ثم ....... ؟ من يكتب لي الآن؟
حاولت قراءة رواية التلصص لصنع الله ابراهيم ، بصراحة شديدة لم أحتمل وتوقفت عند منتصف الكتاب وربما بعد منتصفه بقليل ومن المستحيل أن اعاود القراءة مرة أخرى .
قرات بالطبع للدكتور علاء الأسواني وكنت قد قابلته شخصيا لمرتين أو ثلاث مرات على مقهى بوسط البلد ووجدت فيه كاتبي العصري الجديد ، ولكنه لم يكتب حتى الآن سوى روايتين أفضلهما من وجهة نظري عمارة يعقوبيان .
قرأت أن تكون عباس العبد لأحمد العايدي وانبهرت كثيرا وتحمست له جدا لأنه من جيلي ، ولكنه أختفى فجأة ولم أسمع أن أية اعمال له بعد ذلك .
قرات كتاب تاكسي وهو من أفضل الأعمال التي ظهرت الفترة الماضية .
قرأت جميع أعمال دكتور ميشيل حنا بللوشي بإعتبارنا أصدقاء وباعتباري أصمم أغلفة كتبه ليلقى بها عرض الحائط ويأتي بمصممين آخرين في آخر لحظة !
للأسف فاتتني كتابات باسم شرف وطارق إمام ومحمد هشام عبيه .
ولكن ، بالرغم من ذلك تظل الاعمال قليلة للغاية ، ويظل عدد الكتاب قليل للغاية ، ويظل الاهتمام بهم محدود للغاية ، وتظل منافذ البيع في تحول دائم ومستمر إلى محلات بلاي ستيشن .
آه والله مش بهزر ، هناك مكتبة بالقرب من مقر عملي كنت أمر عليها يوميا لمتابعة كل ماهو جديد بعالم الأدب ، فجأة وجدت أنهم أقاموا بدلا منها محل لبيع البلاي ستيشن واسطوانات الألعاب ومشغلات إم بي ثري .
أعتقد أن الطبقة المتوسطة تنهار ، وفي ظل هذه الكارثة الاقتصادية التي حلت علينا أصبح رغيف العيش أهم ألف مرة من الكتاب ، كما اصبحت مهنة الكتابة مساوية تماما لكلمة عاطل ، ولولا أن دكتور علاء الأسواني يعمل بمجال طب الأسنان ــ وهو من أشهر الأطباء في مصر ــ لكان الآن معدما تماما .
ومعنى أنه لا يوجد كتاب فلن يكون هناك قراء يخرج منهم كتابا فيما بعد .
بمعنى آخر لقد انتهى عصر الأدب في مصر .

عموما ، أترك لكم المجال لتخبرونني عن الكتب ــ وخاصة الأدبي منها ــ والتي قرأتموها ووجدتوا انها بالفعل تعبر عن العصر الحالي الذي نعيشة بحيث يمكن أن نطلق عليها " الأدب بتاعنا "، من هو نجيب محفوظ بتاع دلوقتي ؟ ما هي الكتب التي تنصحوني بقراءتها ؟ وايه رأيكم في حكاية انتهاء العصر الأدبي دي ؟
عيشوا حياتكم في التعليقات



33 comments:

TAFATEFO said...

اسمحلي ابدأ بالكتب أو الكتاب الذين أنتصحك بالقراءه لهم .. قبل أي حاجه بصفتي واحد من عشاق نجيب محفوظ .. بتحداك .. اقرا قشتمر أو صباح الورد .. وهتلاقي نفسك عرفت تكملها وهتلاقي نفسك حبيتها .. وبعدين لو نجحت التجربه هرتبلك كتابات نجيب محفوظ علشان تقراها وهتستمتع جدا فتره طويله .. أرجو انك تحاول تنفذ التجربه دي وتقولي ايه الأخبار.

يا د/أشرف انت وقع منك كتاب كتير .. يعني مقريتش في كلامك انك قريت لطه حسين .. ولا لعباس العقاد ولا حتى ساره .. ولا احسان عبدالقدوس .. أحمد أمين .. خالد محمد خالد .. أحمد بهاء الدين .. المنفلوطي .. الغزالي .. هيكل .. جمال الغيطاني .. جمال بدوي .. أنيس منصور (الخنيق) ..
يا د أشرف انت وقعت ناس كتير أوي

عموما .. عجبني كتاب خالد الخميسي تاكسي .. غير كده علاء الأسواني عمارة يعقوبيان .. انما شيكاغو وكتابات صنع الله إبراهيم .. إع بصراحه .. آه أسلوب جميل .. لكن مضمون يشل.

عموما بدعوك لعقد مصالحه مع نجيب محفوظ ومع الناس اللي أغفلتهم .. وخصوصا نجيب محفوظ وطه حسين والمنفلوطي وخالد محمد خالد وأحمد أمين

أشرف حمدي said...

شكرا بجد على التعليق
ححاول أجرب قشتمر لنجيب محفوظ
أنا كنت قريت ليه قصص قصيرة مش فاكر منها غير مجموعة خمّارة القط الأسود
انما اللي بجد معرفتش أكمله رواية الطريق وثرثرة فوق النيل

طه حسين قريت ليه "أديب" بس مكملتهاش الصراحة
ممل جدا ، واللي يعيده يزيده واللي يزيده يعيده

اللي بجد منبهر بيه لدرجة الجنون هو يوسف إدريس
الراجل ده أخترع لغة جديدة بجد ، تراكيب الجمل بتاعته مش طبيعية
ده غير إنه ممكن يكتب عن لحظة زمنها الحقيقي نص ثانية في عشرين صفحة مثلا بدون ما تمل
الراجل ده كان بيشرّح اللحظات بمعنى الكلمة

ححاول أقرأ للأسماء اللي قلت عليهم بس ياريت اسم كتاب لكل واحد كده في السريع :) أخاف أنا من الإنطباعات الأولى اللي ممكن تخليني مأكملّش للكاتب تاني اساسا
تحياتي الباااالغة

mohamed hassan said...

سيت محمود السعدني
و لو ما عندكش مشاكل مع حقوق الطبع
دي بعض مواقع لتنزيل ما تريد
http://liilas.com/vb3/forumdisplay.php?f=202&order=desc

http://www.dvd4arab.com/forumdisplay.php?f=136

http://abooks.tipsclub.com/index.php

http://www.al-mostafa.info/books/htm/

TAFATEFO said...

نجيب محفوظ كتير .. بس في حاجات تشد جدا .. زي قشتمر ومجموعة صباح الورد

طه حسين طبعا اللي مقراش الأيام يبقى فاته كتير أوي أوي

عباس العقاد ساره طبعا جميله جدا جدا

أحمد أمين : حياتي .. ومجموعة فجر وضحى و ظهر الإسلام .. بس حياتي جميل جدا

إحسان عبدالقدوس اللي مقرالوش طبعا شاف أفلام ومسلسلات كتير عن كتبه .

خالد محمد خالد : رجال حول الرسول ده يخلي أي حد يلتصق بخالد محمد خالد

المنفلوطي : النظرات (1،2،3) والعبرات وماجدولين

وكل اللي تأمر بيه يوصلك يا د/ أشرف

TAFATEFO said...

يوسف إدريس .. ده لا بعده ولا قبله ولا بينهم .. يوسف إدريس هو ملك الوصف بلا منازع .. الوحيد الل يقدر يعيشك جوه الشخصيه .. ويخليك وانت بتقرا شخصيه هو كاتبها غصب عنك تقلدها في حركاتها في الروايه طول ما انت بتقراها.

في قصة (صح) اللي كتبها يوسف ‘دريس واللي بيحكي فيها عن العيل الصغير .. رهييييييييييييبه .. أنا قعدت أحاول أقلد الصوت اللي الولد كان بيطلعه.

أنا أحييك .. لأني فعلا عاشق ليوسف إدريس

فنان مسلم said...

أقرأ كتاب الوجه
الـ facebook

:D لا بهزر

كلام جميل يا أشرف
وانا بحسدك ان د.احمد خالد حضر فرحك

انا نفسي أقابله جداً

AD sabry said...

about me my fav. auther to me Dr.nabil farouk
u can try " Arzaa' " the great novel he wrote
the best novel i read this year is wahet el khoroub
for bahaa taher, u have to read it
but i dont think lit. is going down now
actually its very good an there is better coming

Leonardo said...

فيه محمود حامد صاحب روايتى أحلام محرمه و الصفر الحادى والعشرون
فيه جمال الغيطانى وأرشح لك الزينى بركات ورسالة البصائر فى المصائر
ورسالة فى الصبابة والوجد
فيه كمان حجاج حسن أدول فى ثنائية الكشر كان رائع
طبعا مش محتاج أتكلم كمان على فتحى غانم وبالذات روايته الرائعة زينب والعرش
ومش محتاج كمان أرشح أى حاجه وكل حاجه لمحمد المنسى قنديل ولو إنك مش هتلاقى له غير روايتين أو تلاته منهم قمر على سمرقند ومنهم -بس فى دار الهلال- انكسار الروح وكتابه الرائع تفاصيل الشجن فى وقائع الزمن
وفيه كمان محمد المخزنجى بلغته الرقراقه العذبة
وفيه إبراهيم عبدالمجيد لاأحد ينام فى الاسكندرية
ثلاثية غرناطه لرضوى عاشور من أجمل الروايات اللى قرأتها مؤخرا
وناس تانيه كتيييييييييييييير قوى بس إنت اسرق لك بنك على معرض الكتاب الجاى و عيش حياتك :)

وبالمناسبة أنا مع طفاطيفو 100% بخصوص نجيب محفوظ
وأرشح لك روايتين أنا واثق إنهم هيعجبوك جدا وهتعشق نجيب محفوظ بعدهم
الحرافيش و ليالى ألف ليلة
وأنا مستعد إذا اشتريتهم وماحبيتهمش بجنون أشتريهم منك وأرجع لك فلوسك :)
ولطه حسين أرشح لك دعاء الكروان
رواية ممتازه جدا جدا
........

ميشيل حنا said...

يا راجل حرام عليك!
بانا بارمي تصميماتك برضه؟
ما انت عامل لي غلاف برسيم دوت كوم
هي سابقة واحدة بس اللي عملت لي فيها غلاف ومااستخدمتوش
ما اعرفش انك شايلهالي من ساعتها :)
عموما فيه ملايين الكتب الجديدة الجميلة اللي ممكن تقراها
جرب د. جلال أمين
الراجل ده خرافي ومش واخد حقه أبدا
هتقرا له مرة هتدمنه
جرب ماذا حدث للمصريين وعصر الجماهير الغفيرة
بالنسبة لمحفوظ أنا زيك ابتديت بثرثرة فوق النيل لأني توقعت انها كويسة علشان عليها صورة بنت عريانة! وبرضه ما قدرتش أكملها!
اقرا لنجيب محفوظ رحلة ابن فطومة وليالي ألف ليلة وأولاد حارتنا والحرافيش وادعي لي!
بالنسبة لصنع الله اقرا ذات وشرف
اقرا رز باللبن لشخصين لرحاب بسام
اقرا نظر للباد
اقرا روجرز أحمد ناجي
اقرا قصص محمد المخزنجي القصيرة المذهلة
فيه حاجات كثير قوي.

ميشيل حنا said...

جرب كمان حمدي البطران
عندك يوميات ضابط في الأرياف وخريف الجنرال
من أروع ما يمكن

M@RV3L said...

الكتاب اللي حسه بيعبر عنا فعلا دلوقتي هو رواية يوتوبيا بتاعت احمد خالد توفيق.. كل ماشوف حاجة قدامي افتكر حاجة شبها حصلت في الرواية...شكله الكتاب عملي هسهس في دماغي


ممكن نعتبر جلال امين احد اهم كتاب العصر الحالي...فبالرغم من ثقافته و مجاله العلمي الجاف.. الا ان كتبه مكتوبة بلغة سهلة ودارجة بعيدة عن التعقيد وفي نفس الوقت مهمة جدا و فيها فكر مختلف

في مين تاني!؟... ممكن عمر طاهر و كتبه..خفيفة و مسلية جدا وعصرية اخر حاجة

Oss said...

قبل أى حاجه
انا باحسد ابن حضرتك لأنه من قبل حتى مايقرا اسمه اتكتب فى باب رسائل القراء فى اسطورة الطوطم اللى لسه نازله لدكتور أحمد خالد
:)
ماشاء الله عليه وربنا يكرمه ويخليهولك
-----------------------------------
بالنسبه لإسم ثرثره فوق النيل تقريباً أنا جبته
بس ماشى مع قافية ثرثره
:)
على العموم برغم كراهيتى لتطاوله فى اولاد حارتنا ولكن اسلوب نجيب محفوظ جامد جداً فيها وفى قشتمر
-----------------------------------
انا اول حاجه قريتها كانت ميكى ثم تدرجت لماجد وفى سن صغيره قريت مجلة الشباب وتدرجت ووصلت لرجل المستحيل (اللى بامقتها حالياً برغم احترامى وحبى لدكتور نبيل) ووصلت من سنتين لدكتور أحمد وبعانى معاناه وحشه علشان اجيب القديم
برغم انى شحت الكتب القديمه بتاعته وقريتها كلها بس عايز اجيييييبهااا
-----------------------------------
بما انى اصغر منك بكتيير فالمفروض انك تنصحنى
بس ممكن تقرا الحاجات دى
1-شئ من هذا القبيل لصنع الله ابراهيم
(مقالات عنه بس بجد ليها سحر خاص)
2-قشتمر
3-ارنى الله لتوفيق الحكيم (مجموعه قصصيه)
4-كلام فارغ لأحمد رجب
5-أكيد قريت يوتوبيا :)

دول اللى فى دماغى
-----------------------------------
حتة انتهاء العصر الأدبى دى فلأ
مهما كان هنلاقى صرفه فى القرايه
حتى لو قفلوا كل محلات الكتب
فى حمله اسمها اقرأ تكون
انا مش مشارك فيها بس هى حمله رائعه
http://read2be.co.nr/
-----------------------------------
برغم كتابته (اللى فيها حاجات المفروض انى ماقراهاش فى سنى ده حسب تعليمات الوالد والوالده) بس نجيب محفوظ دلوقتى هو علاء الاسوانى
مافيهاش كلام
وأحسن كاتب فى وجهة نظرى هو دكتور أجمد
وألذ كاتب واللى هيكون أحمد رجب بلا شك عمر طاهر

تحياتى

Oss said...

ملحوظه نسيت اقولها
الأدباء مش هيخلصوا
يكفى انك تقرا معاناة دكتور أحمد خالد
لما يلاقى كاتب صغير مقابله بيسلم عليه وتحت باطه ظرف اصفر فى اعماله
المشكله ان كل المعجبين كده

ابقى ادينى رقم تليفونه علشان كاتب قصتين رعب وعايز اوديهم ليه
:)

ياسمين حميد said...

وأين ذهب القراء؟
المسألة أشبه بقصة البيضة والدجاجة، أيهما أتى أولاً. فصحيح أنه بدون أدباء لا يوجد قراء، لكن العكس صحيح أيضاً. الأديب يجب أن يستطيع العيش من عمله (أو على الأقل يكون له مصدر عمل آخر)، وإلا لا يستطيع الاستمرار. ولكي يتم ذلك يجب أن تباع كتبه بشكل كاف، الأمر الذي لا يتم بدون وجود قراء لأعماله. والمشكلة هنا من شقين: الجهل والفقر، فالجاهل الذي لا يكاد يفك الخط لن يقرأ، وكذلك لن يفعل من يضطر للاختيار بين الخبز والكتاب. كما أن مناهج التعليم لا تشجع مطلقاً على القراءة بل تنفر الطلاب منها...ه

لماذا لا تجرب الأدباء العرب من غير المصريين؟ غادة السمان مثلاً، وأحلام مستغانمي، والكاتب الليبي إبراهيم الكوني، وغيرهم كثيرون
أو جرب كتباً بالإنجليزية (كطبيب أسنان أتوقع أن تكون إنجليزيتك قوية بما فيه الكفاية). لكن لا أنصحك كثيراً بالكتب المترجمة، فكثير من الترجمات إلى العربية ضعيفة المستوى للأسف الشديد، إلا إذا نصحك أحد بكتاب مترجم بشكل جيد.ه

جرب ستيفن كنج مثلاً، أتوقع أن يعجبك مادمت من قراء ما وراء الطبيعة
وجرب جورج أورويل، خصوصاً كتابه 1984، مدهش كم ستجد من أشياء في هذا الكتاب تشابه واقعنا الحالي أو في طريقها إلى التحقق (كتب أورويل هذا الكتاب في الأربعينات متصوراً العالم عام 84 في خيال علمي متشائم).ه

تحياتي

ياسمين حميد said...

بالنسبة لنجيب محفوظ، جرب أيضاً الثلاثية (بين القصرين، قصر الشوق، السكرية). أنا شخصياً أعجبتني رغم أن المسلسل والفيلم لم يعجباني كثيراً.

Sosso said...

اقرأ خيري شلبي أنا أدمنته قراءته من يوم ما اكتشفت كتبه وكالة عطيّة حاجة رائعة، رحلات الطرشجي الحلوجي جامد، أحلام عمّ أحمد السّمّاك، و الثلاثيّة بتاعتو. غير زهرة الخشخاش و نسف الأدمغة و... مش حتندم على دول. صنع الله إبراهيم برده عنده كتب حلوة ذات، شرف، اللجنة. في كمان مجيد طوبيا تغريبة بني حتحوت يعني في كتير يستهلوا الوحد يقراهم.

أشرف حمدي said...

احم
بصراحة يا جماعة انا بجد مش عارف أشكركم إزاي :)
مكنتش اتوقع وأعذروني في ذلك أن أكتشف هذا القدر الهائل من المثقفين حتى بدأت أشك أنني جاهل تماما
بالغ شكري لكل من نصحني بكتاب معين أو كاتب معين ، سأجهز ميزانية قريبا لشراء الكتب التي حدثتوني عنها
في الواقع هذا من أكثر التدوينات التي كتبتها والتي كانت ردودها أكثر من رائعة وأكثر من مفيدة

سأحاول الرد على بعض النقاط سريعا حتى لا تملّوا من القراءة

Oss
ربما يكون قد فهم شيئا آخر عما كنت اعنيه بالاسم الذي اطلقته على ثرثرة فوق النيل
هههههههههههه
ليست ما أتوقع انك فهمته ولكنني كنت اسميها صرصرة فوق النيل لأن شخصيات الرواية كانت محششة أو تتعاطى حبوب الصراصير المهلوسة

سأنشر شكر خاص لدكتور احمد خالد مع صورة إبني التي علّق عليها فر بريد القراء بالعدد الأخير من ما وراء الطبيعة
المشكلة أنني لم أستطع الحصول عليه حتى الآن ، يبدو أن هناك مشكلة ما في التوزيع بالمناطق القريبة مني
أنا ساكن في آخر فيصل / اللي يعرف مكتبة محترمة ممكن أجيب منها العدد يقول لي والنبي
الراجل بتاع الجيزة اللي قدام بنك الاسكندرية لقيته نايم جنت النصبة بتاعته امبارح وكنت حتشل
جيت أصحيه كان حينط في كرشي

بالنسبة لرواية يوتوبيا بالطبع قرأتها ثلاث مرات وجاري قراءتها للمرة الرابعة
ليس فقط لأنها رواية رائعة وقد بدأت أحداثها تحقق بالفعل
ولكنني أحلم بتحقيق مشروع كتاب قريبا بالاشتراك مع بعض الكتاب وبموافقة دكتور أحمد خالد
لن أحرق لكم الفكرة ولكن أتمنى بشدة أن أجد الوقت الكافي لبدء المشروع
الكتابة تعتبر شبه مستحيلة مع العمل ، لابد من إجازة طويلة وصومعة صغيرة وكيلو من البن وأشياء أخري

بالغ تحياتي للجميع

ana ga3an said...

ما هو يا دكتور القراية اذواق
فما اجدة رائعا
قد لا يستسيغة الاخرون
وخط الدكتور احمد خالد توفيق معروف في الكتابة
وربما هو الكتب الوحيد من جيلنا تقريبا واستمر واستطاع يحقق شهرة
نظرا لطبيعة كتاباتة
فالقرائة لا يجب ان تكون بالضرورة لكاتب محدد
يمكنك ان تاخذ من كل بستان زهرة وانصحك بالتوجة للروايات الاجنبية والاوروبية والروسية
ومن اي ثقافة اخري
هاك بعض مما اعجبني ارجو ان يجد قبول لديك

أيام لها تاريخ - أحمد بهاء الدين
الرحيق المختوم - المباركفوري
جان بول سارتر - لويس عوض
لعبة الأمم - مايلز كوبلاند -
انجليزي

السلام الضائع - محمد إبراهيم كامل

فلسطين بين الوعد الحق والوعد المفترى - سفر الحوالي

مزرعة الحيوانات - أرويل - انجليزي

الإنسان والإنسان الخارق (man and superman) - برنارد شو - انجليزي

الكون الذكي - هويل - بالإنجليزية

مخطوط أرمجدون - بيتر لو ميزوريه - بالإنجليزية
رواية الكيميائي أو The Alchemist للبرازيلي باولو كويلو
ابحث عن كتب السورية غادة السمان
واخيرا بلال فضل لة روايات رائعة
اعيب علية فقط اتجاهة للتاليف السينمائي وان كنت اعذرة
ما هو لازم ياكل عيش
وكتابة المقالات في الجرايد مبقتش تجيب همها

تحياتي يا فنان

ناجي العلي 2000 said...

انا اوافقك الرآي (بكل اسف) في ان الادب العربي (مش المصري بس) قد انتهي عهده
السؤال الي انت سئلته دة انا سئلتة لنفي الاف المرات و بصيغ مختلفة
اين الادب العربي
اين الفن العربي
اين الابداع العربي
اين الهوية العربية
اين اللغة العربية
اين.........
اين.........
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وللاسف الشديد .. وجدت ضالتي في مسرح ويليم شيكسبير وروايات تشارلز ديكنز

في كتاب بقرآة اليومين دول اسمة الفن في القرن العشرين ... بتاع الدكتور محمد البسيوني
هو قديم .... بس قيم جدا جدا جدا

:)

TAFATEFO said...

اسمحلي بقى أستغل الصحبه الحلوه دي وعايز أسأل بس عن كام كتاب كده

مذكرات أو سيرة أو تاريخ حياة مصطفى النحاس - مكرم عبيد - النقراشي - علي ماهر - أحمد ماهر - محمد محمود والمجموعة اللي تداولت على رئاسة وزراء مصر .. ويا ريت لو حد من القدامى كمان يكن - بطرس غالي باشا - إسماعيل صدقي عبدالخالق ثروت
وناس من المتأخرين وخصوصا عزيز صدقي مثلا

يا ريت اللي قرا أي من الكتب دي أو يعرف عنها حاجه يقول اسم الكتاب ودار النشر أو يتجاب منين

مشكورين مقدما

Khalil said...

مساهمتى المتواضعة فى الموضوع الثرى ده
يا ريتك تجرب تقرأ لبهاء طاهر
رواية حب فى المنفى
و برضه رواية ساحر الصحراء لباولو كويلهو هى ترجمة بهاء طاهر برضة من الحاجات اللى عملت معايا دماغ
بجد حيعجبوك جداً

Anonymous said...

فيرتيجو لأحمد مراد
معتوق الخير لحجاج ادول
خوند حمرا حجاج ادول

اضمن لك انك تقضي معاهم سهرات لذيذة فكريا طبعا

أشرف حمدي said...

يا جماعة أنا مش عارف أودي جمايلكم دي كلها فين :) ربنا يخليكوا
بالنسبة لموضوع أين ذهب الإبداع بشكل عام دي حكاية كبيرة قوي
ويمكن اتكلّم فيها قريب إن شاء الله
تحياتي :*

مواطن مصرى نايم said...

يا اشروف موجودين

بس فين الناس اللى ممكن تنشر لكاتب جديد لمجرد انه لم ينشر شئ من قبل يتم رفض مادتة الادبية التى يقدما
دون النظر لمحتوى ما قدم

و لمجرد ان يقوم احد الاشخاص الذين لا يمتون للكتابة بشئ
بكتابة اى كلام و نشرة على حسابة
و تكون الماده الادبية مبتذلة
و لكن الدعاية هى صاحبة نصيب الاسد فى جذب القارئ لشراء الكتاب
و تتهافت بعد ذلك دور النشر لنشر اعمال هذا الشخص

و لكن مازال لدينا كتاب عظام
و لن اقترح كتاب معين عليك
و لن اجيب على من يحل محل نجيب محفوظ
لانهم كثيرون

بوست جامد يا اشروف
انا بدأت اقرى من و انا فى رابعة ابتدائى يعنى نفس مرحلة بداياتك فى القرائه يا فنان
اعذرنى فى تأخيرى عليك
تحياتى يا باشا

اسلام

لولا said...

جرب "" ســعــيــد نــوح"" الراجل دة قريتله روايتين هما

دائماً ما أدعو الموتي

وكلما رأيت بنت حلوة أقول يا سعاد


رااااااااااااااااائع


وياريت لو حد يعرف عنه أي أي أي معل،مات يدلنا عليها

آنا سمعت أنه أخد جايزه السنه إللي فاتت بس مش فاكرة جايزة إيه ولا على إيه

المهم

جرب تجيب الروايتين

وقولي رأيك


آنا متأكده أنهم " إن شاء الله " حيعجبوك

لأني بقرا لنفس الناس إلي بتقرالهم وتقريباً بنفس الترتيب

منتظرة ردك

لولا said...

http://liilas.com/vb3/showthread.php?p=1550846#post1550846


لينك لرواية ""سعيد نوح "" كلما رأيت بنت حلوة

Lasto-adri *Blue* said...

وإزاى تنسى بهاء طاهر
الرجل دا إكتشفته من أول خالتى صفية والدير.. ولحاااااد واحة الغروب

أنا متأكدة إن واحة الغروب ح تعجبك جدا جدا.. لإن ذوقك زى ذوقى بالمللى
أنا كمان مابطقشى نجيب محفوظ.. بحس إن فيه شئ متركب غلط فى كتابته
مش بحسه بيعرف يكتب قصة قوى.. إنما بيوصف حلو قوى
يوسف إدريس طبعا هو اللى كان فيهم

وأحمد خالد توفيق لا جدال عليه.. ولو إنى أعتب عليه "يوتوبيا" للاسف.. كان المفروض يسبها تستوى حبة كمان قبل النشر

مم... فى كمان أحلام المستغنمى فى روايتين... ذاكرة الجسد وفوضى الحواس... شئ روعة!.. بس ماقدرتش أكمل الجزء التالت.. عابر سرير لإنى حسيته مستهلك

فى إبراهيم عبد المجيد وحسين عبد العليم.. بيتقال إنهم رائعين.. وإن شاء الله ناوية أشترى "رائحة النعناع" و "فصول من سيرة التراب والنمل" بس بعد حبة كدة

همم... بص.. هو فيه نسبة من الكتب الجديدة لكتاب واعدين.. بس نسبة فقط.. مش الكل يعنى
ودا يدى حبة تفاؤول

هو الشئ الوحيد اللى ملاحظ.. إننا بندور على قصص إجتماعية زى فترة الستينيات... إحسان عبد القدوس، ويوسف إدريس ويحي حقى.. حتى توفيق الحكيم
إنما العصر دا نوع كتابته إتغير.. بقى مفكك شوية.. وغير متناسق شوية.. وسريع شويتين
وذاتوى متجعلص تلات شويات
إنما يمشى.. وجايز نتأقلم.. أو نفرض رأينا ع الذوق العام
مين يعرف!

The Alien said...

مفيش لغاية دلوقتي ف رأيي أديب ليه أكتر من عمل
ودا ممكن تلاحظه من كل الترشيحات اللي جاتلك
مش هتلاقي كتابين لنفس الكاتب

لازم تقرا تغريدة البجعة بتاعت مكاوي سعيد
تحياتي

عاقلة علي ارض الجنون said...

مممممممممم ..

لا أعتقد أني قد وجدت من أقرأ له غير هؤلاء إضافة إلي الأدب الانجليزي ..

أما ما تسميه الأدب بتاعنا .. فللعلم موجود .. و لكن لا يجد الفرصه للاسف ..

فمن يقرأ الآن ؟؟

و من ينشر الآن أو من تنشر أعماله ؟؟

و لا عزاء علي الأدب ..

ياسمين

Shams Elkharif said...

للاسف انت ابتديت مع صنع الله ابراهيم باكتر رواية مملة ليه

ممكن تجرب لصنع الله ابراهيم :"ذات" او "بيروت بيروت
و لام لازم تقرا ل د/جلال امين ، لان بجد كتاباته ماتتفوتش ، و خاصة "ماذا حدث للمصريين"

و لو انت فى حالة من الهدوء و الروقان مكن تقرا لا براهيم عبد المجيد : " لا أحد ينام فى الاسكندرية"

سنتيمتر من الحنان said...

العزيز جدا:
السؤال استفزني لأكتب، وإجابات الأصدقاء . واضح أن ذوقك تربى تربية أصيلة وسليمة، وربما جاء سؤالك الاستنكاري لغيرتك على الأدب المصري. الأدب بخير لكن كل شيء نفيس يحتاج إلى تنقيب منك:
ترشيحات الأصدقاء ممتازة، وأضيف لها:
بهاء طاهر الأعمال كاملة
محمد البساطي مختارات القصة القصيرة
أعمال د. محمد إبراهيم طه في القصة والرواية
جديد جمال الغيطاني
الفاعل لحمدي أبو جليل
حمدي الجزار: سحر أسود ولذات سرية
محمد المخزنجي أوتار الماء وحيوانات أيامنا
البشموري سلوى بكر
يوسف إدريس يصلح لكل مكان وزمان
يحي الطاهر عبدالله الأعمال الكاملة
نصيحة مني:
اتبع حدسك وذوقك. افحص عينة عشوائية من الكتاب قبل شرائه، أو اقرأعنه دراسة نقدية جادة
لا تعتمد على قوائم البست سيللر فهي مضللة في أحايين كثيرة
أسماء شهاب الدين
كاتبة مصرية

القاسم بامر الله said...

السلام عليكم يا دوك
انا من عشاق القراءة مثلك وبلغات عدة وبداياتى كانت عند نفس الراجل بتاع ميدان الجيزة امام بنك اسكندرية بقصص خالد الصفتى فلاش وسماش - لانى من سكان المنيب - والتى قفزت منها مباشرة الى الدراسات والكتب المطولة !!
اما عن ترشيحاتى :
1 - عباس العقاد لابد ان تقرأ له شيئا فهو علم من اعلام الثقافة العربية ولا يجوز ابدا تخطيه لما هو ادنى منه ، وهنا ارشح لك كتاب انيس منصور "فى صالون العقاد كانت لنا ايام" اقراه بعنايه لتتفتح على ازهار هذا الرجل وتعرف معدنه الاصيل
2 - انا لست من عشاق نجيب محفوظ و لا من مريدى طه حسين وان كنت اعشق كتابات الحكيم بشدة هذا الرجل لم اكتشفة الا بعد ان قرأت زهرة العمر فى مكتبة مبارك العامة بالجيزة ومن يومها وانا اقتنى معظم كتبه الكترونيا
3 - كل الكتاب الذين رشحهم الزوار هنا جيدين ولكن لكى تتشكل لديك ثقافة عربية راسخة عليك بالعودة الى الجذور وقراءة كتب واشعار تراثية قديمة ستحيلك الى اجواء مغايرة ولا داعى هنا لسرد قائمة بالمائة كاتب او كتاب التى يببغى ان تقراهم فقط ابحث عن ذوقك فيهم
ملحوظة اخيرة لاتنسى سلامة موسى

memiy said...

فيه كتب كتير انصحك بيها زى خوند حمرا لحجاج ادول رائعه عزازيل وعموما انا بنصحك كمان بالمترجمات وخاصه ترجمات صالح علمانى زى ايزابيل الليندى انيس حبيبه روحى جابرييل جارسيا ماركيز مائه عام من العزله-قصة موت معلن-خريف البطريرك-فى ذكرى عاهراتى الحزانى-الحب فى زمن الكوليرا-عشت لاروى-الجنرال فى متاهه ارجو انك تقراهم وتستمتع دى روايات غايه فى الروعه والسحر

Counter