Total Pageviews

Sunday, November 30, 2008

الاستبحس ومسألة السكس


تفضلوا هذه الرسالة التي وصلتني على صندوق بريدي الإلكتروني :
مصر بلا مواقع جنسية
السيد رئيس الجمهوريه / محمد حسني مباركالسيد رئيس الوزراء / احمد نظيف
لاننا نثق فى شخصكم الكريم ونثق فى انكم تسعون دوما للافضل خاصة فيما يتعلق بتقنية وتكنولوجيا المعلومات فنحن نتوجه لسيادتك كى تستجيب لرغبة الالاف من الاباء والامهات والشباب والبنات كى تُصدر قرار بحجب المواقع الاباحية على الانترنت وحجب خطرها عن آلاف الشباب الذين يتعرضون له يوميا بل وصل الى الاطفال ايضا الذين قد تصلهم صدفه او من صديق سوءوقد تصلهم فى لحظة ضعف او من باب الفضول وحب التجربة الانترنت متاح للجميع الان وبدون تكاليف تذكر وهذا انجاز يحسب لسيادتكم لكنه للاسف هذا الانجاز الرائع على وشك ان يكون وسلة لتدمير شبابنا واطفالنا ليس خافيا على سيادتكم ان حجب المواقع الجنسية قد تم تطبيقة بالفعل فى دول عربية كثيرة ولكن الى الان لم يتم تطبيقة فى اكبر الدول العربية وهى مصرنا الحبيبة فهل يوجد فى مصر سبب منطقى واحد يستدعى عدم حجب تلك المواقع ؟؟ ان كان هناك سبب قوى فنود ان نعرفه وان لم يكن هناك سبب فلما لا يتم غلقها ؟؟؟لو حبينا نتكلم مع حضراتكم بالعامية المصرية فهنقول ان المواقع دى خربت عقول وبيوت واخلاق ناس كثير جدا جدا الدليل واضح لو حضرتك بصيت فى كم قضايا الطلاق فى المحاكم هتلاقى ان السبب الخفى ليها عدم اقتناع الزوج وزوجتة ببعضنتيجة لما يشاهدوة فى تلك الافلام الرخيصة من خرافات مبالغ فيها مما يسبب انهيار زواجهم وبالتالى تفكك الاسرة تفكك الاسرة يعنى اطفال بتضيع وبتتحول اما لحرامية او تجار مخدرات او متعاطين للمخدرات او شاب محبط بسبب عدم قدرتة على الجواز فهيتحول اما لمرتشى او قاتل او او او ولان الشباب هم اهم دعائم المستقبل على الاطلاق والى بانهيارهم هتنهار مصر بل ممكن تختفى اساسافحضرتك ممكن تتخيل كم الخسارة المهولة الى بنتعرض لها بسبب ان المواقع دى مفتوحة فى بلدنا المشكلة الحقيقية ان فيه ناس كانت محترمة جدا والصدفة وحدها قادتهم للمواقع دى واتبدل حالهم للقاع

في البداية : هل هذه صيغة خطاب يوجّه لرئيس الجمهورية ؟ لو حضرت بصيت ، ولو حبينا نتكلم بالعامية ، وخربت عقول وبيوت ، وهتلاقي ، وممكن تتخيل ، ومش ناقص غير كرسيين على قهوة ونقعد نشد شيشة كمان ويمكن نلعب طاولة بالمرّة .

وبهذا الخطاب الكاريكاتوري الساذج والأهطل كان لابد من نشر تدوينة كنت أفكر في كتابتها منذ فترة ، وهي عن مسألة الرقابة .
بإختصار أنت رقيب نفسك ، الامر أبسط مما يتخيله عقل طفل في العاشرة ، ما كل هذا الصراخ الفارغ والنعيق والنحيب سواء على الفضائيات أو الإنترنت أو الصحف وحتى مجلس الشعب الذي ترك كل قضايا الوطن وبدأ يناقش الأفلام والمسلسلات والملصقات ، عضو مجلس الشعب اللي انتخبه الشعب فرضيا يعني سايب مشاكل الشعب وقاعد يتفرج على فيلم سكس طول الليل عشان يصحى الصبح يناقش الفيلم في المجلس ويقول كان فيه كام بوسة وكام حضن اإيه اللي بان إيه اللي مابنش . ايه والنبي ده ؟
محامي آخر لا دور له إلا أن يرفع دعوة قضائية على المطربة أم صدر كبير عشان بتتحرش بيه جنسيا على الشاشة بصدرها ، وانت فتحت التليفزيون على المحطة بتاعتها ليه ؟ ، وهؤلاء المعاتيه يريدون ارسال هذا الخطاب الأهطل لحجب المواقع الجنسية ، لأ وايه مكتوب بالعامية .
نأتي لنفس الإشكالية المملة والسخيفة : هو انت شايف إن التحضر يعني العري
لأ والله ، أنا شايف إن التحضر يعني مقاطعة العري لو كان هذا لا يتفق معك كمواطن لديه أخلاقيات معينة ومباديء معينة ، الأمر بسيط جدا ، لو وجدت أن الفيلم الفلاني يختلف مع معتقادك الدينية أو الأخلاقية أو الانسانية لا تدخله ، وغيرك لن يدخله ممن لهم نفس المعتقدات ، وبالتالي يخسر الفيلم ويسقط بعد أول يوم عرض ويتم رفعه من السينمات ويجلس المنتج زي خيبتها في البيت يقشر بصل . أما الصراخ والعويل وطلبات الإحاطة فهي دعاية مجانية لا يحلم بها المنتج ولم تكن لتخطر له على بال وبالتالي تزداد مكاسبه من الإقبال الجماهيري على الفيلم الذي يطالبون بمنعه ، أما أدخل أشوف عاوزين يمنعوه ليه ، أو على غرار : ده شكله فيلم سكس جامد مادام عاوزين يمنعوه كده ، وتدخل الفيلم فلا تجد به قصة ولا مناظر حتى .
الأفلام في الخارج تخضع لتصنيف عمري شديد الصرامة ، مثلا أنظروا لهذا الفيلم
american pie
ماذا تقراون في التصنيف ؟
R for strong sexuality, crude sexual dialogue, language and drinking, all involving teens.

وماذا عن التصنيف نفسه ومعناه وتفاصيله ؟ أنظروا هذه الوصلة

لماذا أتحدث عن التحضر هنا ؟ لأن هذه الشعوب اختارت لنفسها الحرية ، حرية الرفض وحرية القبول بإعتبار أن أفراد الشعب ناضجين فكريا وثقافيا ، وليسوا مراهقين يحتاجون ماما الحكومة في إرشادهم أو حجب ما يضرهم وتقديم ما ينفعهم في ببرونة ، ومن لا يستطع السيطرة على أطفاله وأبنائه المراهقين فهي مشكلته ، لو أنا إبني متربي كويس مش حيشوف حاجة من دي من غير ما أعمل عليه رقيب بعد سن معين ، لو مش متربي كويس بقى والله لو حبسته في قفص حيشوف وحيتفرج وحيعمل كمان .
دخول السينمات بالبطاقة الشخصية ، ايه المانع ؟
هل هذه دعوة للعري ولنشر ثقافة الأفلام الإباحية ؟ إطلاقا
مين قال ؟ ما قيمة دينك وأخلاقك طالما أنك مسلوب الإرادة تجاه الحرام أو العيب . وما قيمة أن أمنع كل ما هو حرام وعيب بما يتفق مع كل وجهات النظر المختلفة حول تعريف الحرام والعيب ؟ أي منع كل شيء تقريبا بالمناسبة ، ما قيمتي كإنسان له حق الرفض والمقاطعة طالما ان كل حرام وعيب مش موجود أساسا عشان أرفضه وأبعد عنه ؟
ليه ربنا ما قطعش الشجرة المحرمة ؟ مش كان أسهل ؟ أعتقد والله أعلم أن القيمة هنا في تعليم الإنسان مبدأ الإرادة ، هذه الشجرة محرمة ، ولو أكلت منها فستضر نفسك ، سيدنا آدم لم يقطع الشجرة ويريح باله ، ولكنه خاض هذا الصراع الذي صنع منه انسايته حتى بعد أن اخطأ وأكل منها . ونحن جميعا نحاول كبشر ان نتعلم من الخطأ وان نجتنب الشجرة المحرمة .

هي دعوة للنضج ، أن يصبح لديك إرادة ، أن يكون الموقع الجنسي أمامك ولا يحتاج سوى لنقرة بالماوس وترفض دخوله ، أن يكون الفيلم الخليع أمامك وترفض مشاهدته ، من يجبرك على دفع عشرين جنيه لتشاهد فيلم منحط غير أخلاقي ؟ غرائزك التي لا تستطيع السيطرة عليها ؟ مراهقتك وأنت في سن الثلاثين مثلا؟

الدعوة إلى حجب المواقع الجنسية في مصر لا علاقة لها بمسألة البورنو ، الموضوع أخطر من ذلك بكثير ، هذا الفعل يشير إلى طريقة تفكير المجتمع المتردية ، يشتير إلى عدم نضج كامل ، يشير إلى غباء جسيم في أن أطلب من الحكومة المنع والحجب أكثر مما هو ممنوع ومحجوب أصلا إقتداء بدول قمعية متخلفة تعاني من الكبت والشذوذ الجنسي ، أن أفتح الباب لحجب المدونات فيما بعد وحجب الفيس بوك وحجب المواقع الإخبارية المعارضة بحجة انها غير أخلاقية ، اليوم حجب السكس وغدا حجب كل شيء بدعوى أنه مفسدة للمجتمع الفاسد أساسا .
هل نسميه استبحس ؟ أم أن لديه اسما آخر أكثر جدية ؟ إزدواجية ممكن ؟ تناقض ؟ جهل ؟ أم خليط من كل هذا؟

طب أقولكم ، تعالوا نلعب لعبة ظريفة ، جميع من يدخل مدونتي من الراشدين ، هذا على حد علمي ، الوصلة التالية بها صورة جنسية فاضحة ومثيرة
، لا ، لن أضعها في صدر المدونة ، لديكم الحرية الكاملة والإرادة الكاملة في الدخول لمشاهدة الصورة أو عدم الدخول ، يا ترى كام واحد حيدخل ويشتمني ؟ ها ؟؟؟ طب دخلت ليه وانا بقولك إنها فاضحة وعارية وفاسقة وهذا لا يتفق مع أخلاقك ودينك ؟
اللي يدخل يقوللي بس ياريت ما يوصفش الصورة عشان أعرف انشر التعليق أمام الرافضين للصورة .
اتفقنا ؟

59 comments:

... amr said...

انا مش داخل اشوفها ..... انا صايم
عايز تفسد اخلاقي اكتر مانا فسدان لوحدي

:P

adel said...

هههههههههههههههه

كلامك كله صح يا اشروف
و بعدين ما في واحد طلع قالك عاوزين نحجب الفليس بوك و المدونات بجد

وكمان مفيش حاجة اسمها منع و الدليل
في برامج ممكن تنزلها من علي النت عشان تقفل المواقع الاباحية في بيتك و مع ذلك ممكن برضة تفتحها بحتة صياعة مش هاقولها
و خد عندك ميكروسوفت بجلالة قدرها عملت حوار صايع عشان كل العالم يشتري سي دي الويندوز الاصلي
فعملت برنامج اسمه
genuine
ده لما تعمل ابديت للويندز ينزلك و يقعد يطلع عينك و يقفلك برامج و يوقع الويندوز و لما تيجي تسطب السي دي اللي عندك ممكن ميشتغلش تاني
كل ده حلو قوي و دي ميكروسوفت
طلع شاب مصري ظريف لقي 200 حل للحوار ده
و انا عن نفسي لسه حاصل معايا و مفيش دقيقة البتاع ده طار من علي الجهاز و بقيت نسخة الويندوز عندي اصل
لو بيل جيتس نفسه قعد علي الجهاز هيقولك السي دي ده من مكتبي وسش :):):):):)
و معني كلامي مش ان الواحد رقيب نفسه بس لا اللي عاوز يعمل حاجة هيعملها ... مفيش حاجة اسمها رقابة

و بعدين هتقفل النت في الموبيلات اللي بقيت مليانة افلام اباحية مصرية و عربية و خليجية ...ولا ايه

عادل
http://elbald-dy.blogspot.com/

أشرف حمدي said...

amr
هههههه شفت انت قلت ايه ؟ رغم انك قلت مش داخل ، بس قلت : عايز تفسد أخلاقي ؟
احنا دايما بنفكر كده بشكل تلقائي ، لأ مش عاوز أفسد اخلاقك طبعا وليس لدي سلطة عليك
أنت اللي ماسك الماوس مش انا !!!
ده اللي بقوله
تحياتي يا باشا وبلاش تدعي عليا على الفطار :)
صوم مقبول بجد

Anonymous said...

أشرف حمدي. مقالاتك دائما قوية وفي عمق الموضوع. أردت شكرك على أخلاقياتك العالية ورغبتك الصادقة في صلاح المجتمع

أشرف حمدي said...

adel
سعيد إن الفكرة وصلت ، وياريت الناس بس تفهم غني مش بدعو للإنحلال ، نفسي كده أسمع خبر سقوط فيلم فيه مشاهد إباحية ، سقط ليه ؟ عشان ماحدش دخل
ساعتها ححس بجد إن الشعب بقى عنده أخلاق بجد مش قاعد ليل ونهار يتكلم في الدين ويعمل عكس اللي بيقوله بالليل

بالحق ما ذكرتش انت شفت الصورة ولا لأ ؟
وياريت أي حد مختلف مع كلامي يقول في بداية التعليق : انا ما شفتش الصورة عشان هي بتتعارض مع اخلاقي
تحياتي

أشرف حمدي said...

تست
شكرا على التعليق وعلى مرورك

mohamed hassan said...

مقال رائع كالعادة انا ليا تجربة لما سافرت اوروبا قلت بس دي عالم سهلة
بقى و كل الجنس من عندهم بس الحقيقة لقتهم ناس عاديين زيينا و فيهم
الكويس و الوحش و المؤدب و السافل و لقيت ان كلنا بشر و كلنا غلابة
بنجري على عيشنا
و على فكرة قليل جدا لما اجنبي يتفرج على جنس
احنا اللي زبالة على فكرة و كل تفكيرنا في الجنس

abderrahman said...

زي الرسايل اللي كان بيبعتها أحمد حلمي في فيلم آسف على الإزعاج

أشرف حمدي said...

mohammed hassan
فعلا احنا عندنا حالة غريبة جدا تجاه الجنس ، قاعدين نتكلم عن الاخلاق والدين ليل نهار وعندنا هوس بالجنس مش عارف ليه بجد
وكل شيء في حياتنا داخل فيه الجنس بشكل أو بآخر
حتى البرامج الدينية لا حديث لها إلا عن الجنس
لدرجة إن واحد على الهوا متصل يسأل يا ترى لو مارست مع إمرأة من الخلف وانا متزوج أبقى زاني ؟
طب ده سؤال ده ؟
تحياتي
---------------
عبده باشا
للأسف ما شفتش الفيلم ونفسي بجد أشوفه

... amr said...

يا باشا انا فاهم قصدك و فعلا احنا عندنا الحتة دي :)) حتة التلقائية في التفكير دي .... بس ممكن تتاخد بوجهة نظر تانية ... انا اقوللك على حاجة او على الاقل فكرت ازاي .. انا عارف انك كاتب ساخر و بتعرض المشاكل بسكل في سخريةو خفة دم .. فبالتالي مختش وقت و رديت عليك عفويا :))) .. اعتقد انك ممكن تكون - مثلا - قاعد مع اصحابك و ضحك و سخرية و كدة .. وواحد يطلع بسؤال كدة ملتوي حبة .. مش مباشر يعني عشان متفهمنيش غلط ... كتير هتلاقي ردود ساخرة بتلقائية :)) ممكن .. و كمان يا عم انا هدعي عليك برضة ... اخص عليك .. توعيني و تقولي متدخلشي و ادعي عليك :))))) دة انا ابقى وحش اوي و مستاهيلش اجي هنا تاني
ربنا يكرمك يا معلم و توعينا كمان و كمان .... تحياتي

أشرف حمدي said...

amr
هههههههه انا فاهم يا باشا والله ومش بلومك خالص :) أنا بس هدفي نفكر ونأمل في طريقة تفكيرنا مش أكتر
ربنا يخليك يا باشا ومايحرمنيش من تعليقاتك

adel said...

ههههههه
عيب يا اشروف مش انا اللي اتفرج علي صور علي النت

انا عملتلها
save
عندي علي الجهاز عشان اتفرج عليها براحتي

هههههههههههه

حواء said...

السلام عليكم
فعلا عندك حق في موضوع الصوره
لكن انا هقولك حاجه صغيره
هو ممكن ام لطفل عنده 7سنين مثلا تقوله ياحبيبي العلبه ديه فيها ميه نار اوعي تحط ايدك فيها او تيجي جنبها لحسن تحرقك وتعورك والولد عمره مشافها لكن سمع اسمها كتير وميعرفش اضررها
تفتكر يجيلها قلب تسيب العلبه وتقول انا قولتله علي خطرها وهو عايز يكتشف بقي براحته
يجرب
مهو ممكن يحط ايده ويوقل الله مهي مايه عاديه
أو يشربها
او لو هو اكبر برده هيفتحها بس هيجربها علي حاجه تانيه
أو لو هو بقي كبير وشافها وجربها قبل كده مش هيجي جنبها تاني خالص
هي ديه القصه
ناس بتسمع عن حاجه اسمها افلام مشفتهاش عايزه تعرفها
ولما تشوفها
ليكون الشخص صغير تأثر فيه وتخليه يعمل حاجه في نفسه تغضب ربنا ( مفهوم طبعا من غير توضيح ) أو تخليه يعمل حاجه مع غيره برده تغضب ربنا برده مفهومه من غير توضيح
ولما يكبر ده ممكن ياثر علي حياته الزوجيه
او لو هو كبير شويه يقول لا انا مش هتفرج لاني جربت وشوفت وعرفت هي بتعمل ايه في الواحد وممكن توصله الي ايه
فاحنا هنيجي من الاول ونرفع العلبه عن الطفل اللي ممكن يحرق نفسه ونرحم نفسنا من انتظار رد الطفل اللي عايز يستكشف ماية النار
يارب اكون اقدرت اوصل وجهة نظري تحياتي
اما موضوع الصوره الجنسيه شيلها احسنلك او حط صوره تانيه واضحك بيها علي الناس علشان الذنوب
كل اللي بيتفرج عليها انت هتاخد ذنوب وما اكثرهم

أشرف حمدي said...

زوجة
بالظاااااابط ، حاخد من كلامك وأرد على حضرتك

"فاحنا هنيجي من الاول ونرفع العلبه عن الطفل اللي ممكن يحرق نفسه ونرحم نفسنا من انتظار رد الطفل اللي عايز يستكشف ماية النار"

ده اللي هو مين ؟ الطفل ؟ صح ؟
طب كل المجتمع أطفال ، دي بقى النقطة اللي بتكلم فيها
المجتمع كله مش أطفال
واعتبار المجتمع كله أطفال ده الامر المرفوض تماما من وجهة نظري

أنا طبعا مع المنع والحظر تجاه الأطفال والمراهقين
طبعا دي مافيهاش كلام سواء هنا أو برّة في المجتمعات الغربية ، لازم المنع لحد سن معين بعد كده هو حر ولو انا مربيه صح عمره ما حيتفرّج على حاجة أنا مربيه على إنها غلط ولازم تتم في إطار الزواج
صح ؟

مش سداح مداح أبدا
لكن مش عشان الأهل مش عارفين يتحكموا في أطفالهم يبقى نمنع كل حاجة باعتبار غن المجتمع كله أطفال

أما بالنسبة للصورة فمعلش انا مش حشيلها ومصر عليها ، أنا لا أتحمل ذنب أي شخص نااااضج وأنا موضح له إن الصورة دي فيها كذا وكذا
لو جه بعد كده ضغط اللينك أنا مالي ؟ هو أنا اللي مسكت ايده وأجبرته على فتحها ؟
برجع وأقول مش انا اللي في إيدي الماوس
كل واحد ناضج وراشد عارف ايه الصح ليه وايه الغلط
واللي عاوز يشوف صور حيشوف سواء عندي أو في أي موقع تاني

تحياتي وشكرا على التعليق

فنان مسلم said...

أنا مش هتكلم عن موضوع حجب المواقع تحديداً , هتكلم عن موضوع الرقابة -اللي انت رافضه- بشكل عام

تقدر تقولي الاشارات الحمراء والخضراء موضوعة في الشارع ليه ؟
ليه مبتعبرهاش أداة تحجب حريتك في المرور ؟
محطوطة عشان النظــــــــــــام
عشان وانت ماشي بعربيتك بسرعة ومعتقد انك حر وطليق , ومعندكش فكرة التقاطع اللي قدامك فيه ايه , متحصلش كارثة ليك ولغيرك

القواعد والاخلاق معروفة من زمان , المشكلة مش في تحديد ما هية هذه القواعد والاخلاق , المشكلة في تطبيقاها , واجتهاد وسائل وأدوات لتطبيقها

انا ذكرت موضوع الاشارة تحديداً لانه شبيه جداً بحالتنا دي

الغرب مقتنع ان الحرية ,وعدم الرقابة ,هي الحل
ومعندوش فكرة ايه اللي موجود في التقاطع
فماذا كانت النتيجة ؟
40 مليون طفل مجهض بسبب علاقة غير شرعية - في أمريكا وحدها, يعني بالعربي كده 40 مليون جريمة قتل.
امرأة مغتصبة من ضمن كل 6 سيدات أمريكيات , حسب الاحصاءات
ظهور رهيـــب للشواذ ونشاطاتهم وحركاتهم
ظهور رهيــــب لأمراض نفسية وانحرافات غريبة لم يعرفها العالم من قبل , بسبب الانفلات الجنسي
ياريت بلاش نتكلم عن الكبت الجنسي ونقارن نفسنا بيهم , عشان احنا حالنا (على الرغم من سوءه) مايجيش نقطة في بحرهم.

الرقابة دي أداة من أدوات التنظيم الاجتماعي للاخلاق , وهي اليد الثانية التي ستشترك مع يد "الرقابة الذاتية" في التصفيق .

أشرف حمدي said...

تشبيهك خاطيء يا فنان مسلم وأقولك ليه
أيوة فيه إشارات مرور عشان هي مش سداح مداح
أيوة عملوا الإشارات انما ما قفلوش الطريق :)))
إشارة المرور دي بالظبط بالظبط عاملة زي التصنيف العمري بتاع الأفلام
لو الإشارة حمرا يبقى انت تحت السن المناسب للفيلم
لما بتكبر وتبقى ناضج الإشارة بتبقى خضرا
ماحدش منع المرور منع تام إنما حصل ايه ؟ حصل تنظيم للمرور

وده اللي أنا قصدي عليه
حاجة تانية مهمة ، لو فتحنا باب المنع طب حتمنع على أي أساس ؟
ايه هي المعايير اللي حنمنع عليها ؟ يعني نمنع الأفلام اللي فيها بوس مثلا ؟ ولا اللي فيها عري فقط ؟ ولا اللي فيها البطل بيقول كلمة بحبك لواحدة مش مراته ؟ ولا نمنع الأفلام من الأساااس باعتبارها حرام
مش دي كلها آراء ووجهات نظر ؟

حاجة تانية
انا ملاحظ انك بتتكلم كتير بالأرقام عن عدد أطفال الشوارع برّة والشواذ والجرائم الجنسية
هل ده على اعتبار إن مافيش أي جرائم من النوع ده في العالم العربي :) كل ما في الموضوع إن الناس برّة واضحة وصريحة مع نفسها ولا تخجل من الغعتراف بالعدد الحقيقي وضع تحت كلمة الحقيقي دي عشر خطوط للجرائم دي ، لو جيت هنا تحسب العدد الحقيقي للشواذ في بلد زي السعودية بس حتلاقيها كارثة
لو جيت تعد عدد أطفال الشوارع في مصر ، العدد الحقيقي ، حتلاقي مصيبة سودا

ده يعني ذنبهم إن كل بنت بيتحرش بيها لاااازم تروح وتبلّغ ؟
وهل أفهم من كده إن دي دعوة لدفن الرؤوس في الرمال هنا واللي يتحرش بيها ما تتصلش ولا تبلغ عشان العدد بتاعنا يبقى أقل ونبقى أحنا الحلوين وهما اللي وحشين

تحياتي يا باشا وشكرا على تعليقك
وأنا سعيد بيه جدا

أشرف حمدي said...

ده السبب في إن المجتمعات اللي بتمنع بيزادا فيها الكبت ، وأول لما الواحد من دول ييجي مصر اتفرج عليه بيعمل ايه في شارع الهرم
لا ماتمنعش
إنما ربّي المجتمع تربية سليمة
وخللي المجتمع عنده إرادة

حقولك انا حاجة وبكررها
في نيويورك ممكن الواحدة تمشي توب ليس ، يعني من غير هدوم خالص من فوق
شفت كام واحدة في نيويورك ماشية في الشارع توبليس رغم إن ده مباح ؟؟؟؟
أعتقد هي الواحدة اللي نشرت انا صورتها في تدوينة قبل كده
ههههه
طب ليه الستات كلهم ما قلعوش ومشيوا توبليس ؟ ماهو مباح بقى ؟
عشان الناس اتفقت إن ده منظر مش تمام ، الناس لوحدها بينها وبين نفسها
لا حد منع ولا حد رفع كرباج
نفسي يكون عندنا الإرادة دي ونتفق على حاجة واحدة ، على الأقل ثلثين المجتمع كفاية قوي

وحقولك على حاجة حاصلة فعلا في مصر
فيه محلات خمور كتير قوي
ده حقيقي ، لكن هل شايف إن عليها طوابير ؟؟؟؟
أنا ممكن اتكسف أعدي بس من قدامها
أهي حاجة مباحة ومن حقك تشتري خمرة بس قليلين جدا اللي بيشتروا
ياريت بقى نطبق ده على كل حاجة

فنان مسلم said...

التنظيم مطلوب , والمنع مطلوب

حاجة زي المواقع الجنسية مثلاً , كلنا متفقين على ضررها , ليه منمنعهاش تماما ؟

محتاجين نقعد مع نفسنا , ونراجع أسسنا , وننظم ايه اللي يتمنع وايه اللي يتقنن
ونحط نظام نمشي عليه

أشرف حمدي said...

فنان مسلم
مش كلنا متفقين على ضررها :) مين قال
أنا رأيي مثلا إنها ضارة
واحد تاني شايف إنها ممتعة
سيب لكل واحد حرية الإختيار
ودورنا هو التوعية بالضرر
عشان كل واحد يكون عنده إرادة ، ده حتى يحس بالفخر إن الحاجة قدامه وهو بيراعي ربنا ومش بيقربلها

فنان مسلم said...

زي المخدرات بالضبط
أنا وانت مقتنعين انها ضارة
و(بعض) الناس مقتنعة انها ممتعة


والنتيجة .... معروفة

فنان مسلم said...

المشكلة اننا مصرين نجتهد من نفسنا ونعيد تقييم ايه اللي ينفع وايه اللي مينفعش

مع ان ربنا حددهالنا من زماااااااااااااان

Anonymous said...

انا اتفق معاك في نقط ولكن فعلا دلوقتي اغلب رواد المواقع الجنسيه من الاطفال والمراهقين .. طب مثلا دلوقتي لو طفل مراهق وبيشرب حشيش وانا عندي الفرصه اني امنع عنه الحشيش ده لانه مش بيصون نفسه ولا يعرف خطر اللي يشربه فهل اترك المجرم اللي بيبيعه عشان الحريه وان الطفل هو اللي معاه الفلوس اللي هيشتري بيها ..ثم ان في حاجه اسمها ثقافه جنسيه اسلاميه ودي مش حرام وتغنينا عن كل ده زي مثلا دكتوره هبه قطب وغيرها كتير وفي برضه كتب زي تحفه العروس وفي غيره كتير ... انا شايف ان غلق المواقع ده افضل بكتير لان عدم غلقها مش هيجلب منفعه تذكر

أشرف حمدي said...

فنان مسلم
المخدرات ممنوعة في بلاد ومباحة في بلاد تانية
هولندا ممكن تشرب فيها حشيش في الشارع وممكن تشتريه من السوبر ماركت
هل ده معناه إن الشعب الهولندي مسطول ؟؟؟

أشرف حمدي said...

anonymous
اغلب رواد المواقع الجنسية من مراهقين وأطفال عشان اهلهم مربوهومش
بالمواقع أو من غيرها مش متربيين اساسا وحصل إهمال جسيم في تربيتهم
ساعتها هما مش محتاجين مواقع عشان يعملوا حاجة غلط ، بيها ومن غيرها حيعملوا الغلط
الرك على التربية
ثم إزاي نعلّق خيبتنا في تربية أولادنا على شماعة المواقع الإباحية ؟؟؟
يعني نسيب أطفالنا يترفجوا ونقول اقفلوا المواقع ؟
طب البلوتوث ؟ أهو ده انتاج محلي بقى :) يعني تصوير بنات مصريات عاريات ونشرها على الموبايلات ميننا فينا
نمنعها إزاااي دي بقى ؟
آه ، نعمل بوليس يقوم بتفتيش موبايلات الشباب في الشارع ويشوف عليه سكس ولا لأ ؟
نرجه بقى لموضوع الهيئة بتاعة الأمر بالمعروف والنهي عن المنكر :) نقلبها سعودية بقى

وليه وجع القلب ؟
ما نربي أولادنا ؟؟؟ صعبة دي ؟
لو صعبة يبقى الغلط علينا مش على المواقع

mohamed hassan said...

خلق الله الانسان كامل الحرية و اعطاه العقل ليرى ان كان سيعود طائعا او يرجع عن الطريق القويم.
و في ذلك حكمة الدنيا كلها انك لديك كامل الاختيار الى حين.
و لو اراد الله منعا لمنع.
و لكن اعطانا مطلق الحرية ليرى ايكم احسن
عملا.
و قياسا على ذلك رفعت اهم عبادتين الى اعلى عليين و هي الارادة او النية و عليها كاساس يحاسب المرء.
ثم جاءت عبادة الصيام لتجدك بارادتك تمتنع عن الطعام لترجع الى امر رب العالمين.
و يخطئ الناس في زمانننا بوضع قيود امام عقول اخوتهم و ابنائهم ربما بدافع الحب و الغيرة او حفاظا على عادات وقيم يرون انها قد تضار بفتح الابواب.
و لكن من قال انك بغلق الابواب منعت الناس من ولوج البحار
و من قال ان مجتمعات بها منعا صلح حالها.
حق الناس الحرية كما خلقوا و كفى.

أشرف حمدي said...

بالظبط كده
مافيش كلام بعد اللي قلته

Dr. Ahmed Wagih said...

الله ينور عليك! المتخلفين اللي عايزين يمنعوا ميعرفوش ان الدول اللي منعت معرفتش تسيطر بعد المنع، وكل المواقع مفتوحة بأستخدام برامج بروكسي مجانية.
اللي عايز يحافظ على اولاده في البيت ممكن يشتري برامج فيلتر ودي موجودة على الأنترنت ولكن كون ان يدخل الحكومة تحجب دي مسألة خطيرة وممكن يبقى لها تبعات اخطر لأن انهاردة مواقع البورن، وبكره المواقع اللي مش ماشية مع مزاج الرقيب، وبعدين تبقى زي السينما والصحافة ولازم رقيب علشان يصرح بيها...

أشرف حمدي said...

الله ينور علييييييييييك
ده اللي بقوله
وعلى الجانب الآخر بأطالب بنشر ثقافة برامج الفلترة في كل بيت فيه أطفال ومراهقين
مش بس كده ، لازم الأب أو الأم تكون موجودة من حين لآخر تطمئن على طبيعة المادة والمواقع اللي المراهق أو الطفل بيدخلها
مش بس خطر المواقع
ده خطر الشات اللي ممكن يضر جدا وممكن عن طريقة ترتكب جرائم جنسية مع اطفال ومراهقين

Hala Adel said...

فعلا يا أشرف المجتمع كله مش أطفال .. احنا نمنع الاباحيه في بيوتنا عن أولادنا و نربيهم و نعرفهم الحلال من الحرام و الصح من الغلط .. أما الكبار بقى عقلهم في راسهم و هم حرين .. أهم حاجه التربيه أنا مش همشي ورا ابني ولا بنتي في الجامعه لكن اللي هيحكمهم أخلاقهم مش الحكومه اللي هتقفل المواقع ..
ربنا خلقنا على الأرض و خلق الحلال و الحرام و خلقلنا عقلنا نفكر بيه
ماتمسحش الصوره يا أشرف و كل واحد عقله في راسه و ماحدش بيشيل ذنب حد

Shimaa Gamal said...

أنا معاك يا أشرف فى إن المنع عمره ما كان حل . بل على العكس الممنوع مرغوب
و خصوصًا مع المراهقين ،الفترة دى من حياة الأشخاص الدافع فيها بيكون الفضول يبقى الحل مش إنى أزوده بالمنع . الحل إنى أرضى الفضول ده بمعلومات مفيدة و حقيقية
و أما غير المراهقين فطبعًا هما أحرار ، لإن المنع سيؤدى إلى خلق سوق سوداء لبيع المواد المحظورة . و بدل ما نقضى على حاجة إحنا شايفنها مشكلة بنخلق لنفسنا مشكلة أكبر .

إسمحلى أستغل الفرصة للتنويه إن فكرة منع الفكر و حتى و إن كان فى نظر البعض فاسد فكرة مستوردة ، من دولة صدرت لينا أفكار تانية كثير بتعذب المجتمع المصرى .
فا اللى عايز يستورد منهم حاجة يجيبلنا منهم بلح مش أفكار عقيمة

حروف said...

انت عندك حق بس انا مشفتش الصورة بس اول مدخلت اتفؤجت ولمحت حاجات انت ممكن تراعي اساس البعض وتتصرف بانك تعملها لينك واللي عايز يفتحة يفتحة وبلاش تكون محطوطة ودام الكل

Anonymous said...

من تجربة طويلة(طوال فترة الدراسة) في دولة تمارس الحجب, الحجب كان بيضر الناس المحافظة, فيه مواقع عادية جداً او ذات اتجاه سياسي او بتقدم خدمة ما ومحجوبة..
اما الناس اللي كانت من رواد المواقع دي فعلاً, الحجب مش بيمثلهم مشكلة, بيستخدمو
Proxy Servers
Web Proxy Services
Search Engines Image Search Services
ده غير تبادل لستة بالمواقع اللي متقفلتش لسه..
بالإضافة لأطفـال (كمثال, بعض اخوات اصحابي) بيتبادلو قدامي الافلام على الموبايل...

ايام ما كان بيحصل تفتيش على الموبايلات وقت فترة الدوام..
80% من الموبايلات فيها افلام وصور مخفية ضمن ملفات السيستم..او مش مخفية خالص..

ده غير تبادل الميموري كاردز والسيديهات والهاردات..

ده غير برامج ال p2p
اللي مفيش اي ISP
تقدر تفرض اي حجب عليها إلا بعمل بلوك للبروتوكولز المستخدمة نفسها وده غير وارد
ومننساش خدمات الفايل الشيرنج واليوتيوب والقائمة تطول..

الخلاصة, الحجب تخلف, وملوش اي لزمة, وبالعكس بيدفع الفكرة في دماغ الواحد مع كل رسالة منع اثناء تصفح طبيعي جدا..

لو من مبدا ان اي سكة ممكن تؤدي لحاجة البعض شايف انها غلط لازم تتقيد..مكنش بقى فيه حاجة اسمها حرام وحلال وربنا مكنش خلق اي حاجة في الدنيا دي الا وكانت حلال..
واللي مش بيتفرج مش بيتفرج حتى لو واحد قاعد جمبه ومشغل فيلم على الموبايل وبيدعوه للفرجة من باب الهزار..

بالنسبة للآباء اللي خايفين على عيالهم, وشايفين ان البرامج اي كلام وملهاش لزمة..
ممكن يستخدمو خدمة OpenDNS K-12
http://www.opendns.com/k12/solutions

ويظبطو إعدادات ال DNS Servers IPs
من الراوتر, وتكون كنترول بانل الراوتر محمية بباسورد..
وانتهينا! كل واحد متعاقد مع شركة نت ودافع فلوس في اشتراك, ليه حق في استخدام الخدمة الخاصة بيه اللي داخلة على بيته براحته..وبس على كدة يخليه في نفسه والناس اللي مسؤول عنهم..

وبخصوص الصورة, مش بقول اني ملاك, بس مش هستنى لما د/أشرف حمدي مثلا ينزل لنك ل صورة عشان اتفرج, لو بتفرج, فيه مليون سكة, لو مش بتفرج, لو مليت البلوج لينكات ولا هتفرق معايا..

Unknown said...

بجد مش قادر معلقش مش ممكن لسه في بشر كده
ويا سيدي يقو سالك بألمعيه يعني انت عايز تشوف سكس ؟
ايوه انا عايز اشوف سكس وانت مالك هو انت ربنا حتحاسبنا انت مش بلغت وقولت السكس حرام خلاص متشكرين منك اشوف ولا مشوفش حاجه ترجعلي وما عليك الا البلاغ
التدوينه دي جت علي الجرح الواحد لسه متفلتر قريب خلاص علي اخر الزمن اتفلترنا دي بقت موضه صاحب اي شبكه نت بيفلتر المشتركين الايمان نزل عليه رغم ان فكره شبكه النت غير قانوني اصلا يا جماعه بطلو وصايه علي البشر الرحمه من فارضي الوصايه علي البشر
معذره بس في لفظ واقف في زوري مش قادر لازم اقوله (احه) معذره علي الاطاله

Unknown said...

طيب انا مش هدوس على الصورة
بس برضه عاوزه اعرف فيها ايه

الفضووووووووول
هو ده
فضولنا هو اللى بيوجهنا قبل رغباتنا

Anonymous said...

بص يا عمنا انا شايف ان المنع عمرة ما كان حل بالعكس وانت عارف نظرية الممنوع مرغوب . هي مسألة تفكير في ناس شايفة انها يتتفرج عادي وفي ناس لأ شايفين ان الموضوع دة عيب وحرام اوكي دة رأيهم انما يقولك الحجب ده مستحيل يكفي اننا مصريين يعني لو حجبوا مفيش يومين وهتلاقي طرق فك الحجب مكتوبة على جدران الحمامات العامة دة غير البلوتوث والسيديهات والدش هيعملوا فية اية هيمنعوة ولا هيولعوا في الاوروبي اذا كان دلوقتي المجلات السكس بتتباع على الارصفة .اللي ادي الى انتشار الموضوع أوي هو الفجوة التكنولوجية بين الاهل والابن يعني دلوقتي اي عيل بتاع 8 سنين بيفهم في الكمبيوتر والنت وابوة مبيعرفش يفتح الكمبيوتر حتي فالعملية بتبقي ميغة.وفي حاجة غريبة دلوقتي يا أشرف انت لو قلت لواحد انك مبتتفرجش مش هيصدقك لأن العادي بقي الفرجة وفي اي مكان ده لسة من كام يوم كان فية واحدة بتتفرج على الموبايل في المدرج.وبالنسبة للصورة يا أشرف فالصورة جامدة وانت عداك العيب كدة لما حذرت وحتي المواقع السكس بتكتب تحذير في اول الصفحة لانهم عارفين ان اللي ماسك الماوس بني ادم وعندة عقل ويقدر يعرف مصلحتة واللي يفيدة من اللي يضرة

Unknown said...

دة مبداى والله يا استاذ اشرف دايما اقول الواحد رقيب نفسه وبعدين مفيش حد يقدر يمنع حد تانى عن انه يعمل اى حاجة ايا كانت مهما عمل وحاول اكيد فى طرق للتحايل ولو مفيش نت يبقى المجلات موجودة ولو مفيش مجلات يبقى الدش موجود ولو مفيش دش يبقى الافلام موجودة ولو مفيش فيديو يبقى السيديهات موجودة يعنى اللى عايز يعمل كدة مش هيعطل ابدا....مش عارفة ليييييييييييييييه عندى احساس شرير انك حاطط الصورة مقلب من مقالبك وهتطلع كاريكاتير مثلا او اى حاجة مش فاضحة والنبى البوست الجاى ابقى قول الصورة مقلب وللا مش مقلب...سلام يا اشروف

daktara said...

مش عارف اتفق معاك ولا اختلف الموضوع فعلا محير
كل واحد هو ضمير نفسه ورقيب نفسه
ولكن النفس امارة بالسوء
طبعــــــــا

اما عن الصورة انا دخلت شوفتها رغم كل ما بها من سكس
سكس بيفكرني بالنادي الاهلي مباشرة
تحياتي

انظر حولك
د. خالد عزب

Anonymous said...

انا هقولك حاجة وباقولها بقلب كدا لانى عارفة انك بتقرا وبتعبر الناس اللى بترد عندك
اولا انا مقدرش اقول انى معجبة
ومقدرش اقول انى مش معجبة
بس كلامك بيشدنى وبيحفز افكارى وبيخلينى بجد اشغل دماغى
اتنرفزت منك فى موضوعات بس اكتشفت ان نرفزتى دى مجرد تعصب للى اتربيت عليه
انا هحكيلك عنى وانا مجهول كدا لانى مقدرش احكى دا باسمى
انا بلوجر بالمناسبة ومقتنعة جدا باراء كتير تحررية
بس باجى عند موضوع الحجاب والجنس واقفل
معرفش ليه
عايزة اقولك انى فضلت لحد سن ال18 معرفش اى حاجة عن اى حاجة
الموضوع مكانش عندى مجرد تربية شديدة دا كان جهل وعدم وعى بالف باء طبيعة بشرية
اهلى ربونى بشكل متدين لدرجة انى انا اللى مارست دور الرقيب على نفسى ومش بس نفسى على مجرد التفكير
لحد ما دخلت الكلية وبدأت احس انى جاية المكان دا غلط وانى مكانى فى روضة الاطفال
وانا طفلة حصلتلى حادثة تحرش مرة وانا فى المدرسة كنت طالعة الباص وفضلت افكر هو الرجل دا لمسنى كدا ليه ومقدرتش افهم
ولما كبرت شوية وماما قالتلى مش تخلى حد يقرب منك افتكرت الرجل دا (اللى لسة فاكرة شكله بالمناسبة )واتخنقت وحسيت انى بنت مش محترمة عشان حد قرب منى واترعبت من ان ماما تعرف دا وكنت بحلم بكوابيس مجملها كلها ان ماما عرفت ودبحتنى !!!!
انت عارف انا بارغى كل دا ليه
لانى مثال للعيان عن الجهل الجنسى فى مصر بدعوى الاحترام
انا اللى الاخ او الاخت اللى كتبوا الجواب الاهبل اللى انت اوردته دا كانوا بيتكلموا عنهم انهم عايزين يحموهم
يا سيدى فكرة انى اقول لاء انا هحجب عنك كل حاجة واى حاجة واما تكبر يا حبيبى هابقى اقولك دا مش بيعمل غير شخصيات غير سوية شايفة الحياة سؤال كبير بتمنع نفسها فى مجرد انها تفكر فى اجابته وشايفة الناس مجرد خيالات تعتليها علامات استفهام
الاخت زوجة اللى بتجيبلى شلل بردودها دايما وبتحسسنى انى محتاجة دوا ضغط رغم ان سنى ميسمحش حاليا انى اخد عقاقير ضغط الدم قالت ان مينفعش نقرب للاطفال مية النار ونقولهم مش تيجوا جنبها
الحقيقة انا باستغرب على الوهابيين اللى صدروا باكدج الدعوة للكبت ومصدروش معاه نتيجته عندهم
ارتفاع معدلات زنى المحارم والشذوذ والاغتصاب وحاجات لما بتحصل هنا فى مصر بنكتبها فى اخبار الحوادث فى حين ان المجتمع المنحل دا بيدارى عليه وبيتغاضى عنه وبيعمل شرطة تضرب الناس فى الشوارع عشان تروح تصلى
يا سبحان الله ما الاولى ليهم انهم يعملوا العكس ويبقوا بكدا طبقوا شرع ربنا
بيفكرونى بواحد بيصلى السنة وسايب الفرض خالص
وانا رأيى اننا نقوله بص يا حبيبى دى مية نار وفلان دا لما مسكها اتحرق واهه عندك
صحبيتى اخوها كان بيحب ينط من الشباك وكانوا بيمنعوه يجى ناحية الشباك لو كانوا رفعوه ووروله الارتفاع قد ايه عالى كان خاف ومفضلش يتخيل ان الشباك دا اللى بيمنعوه عنه هو كل حاجة حلوة فى الدنيا وخلاهم مش واخدين بالهم واتشعلق ووقع واتكسر

كلنا بنحاول ندور على الشباك
بنات كتير اهلهم قفلوا عليهم ووصلوا لمرحلة من الانحطاط بشعة فعلا
وبنات كتير اهلهم سابولهم الحبل على الغارب ووصلوا لنفس المصير
انا وغير اهلى ربوا فينا الخوف من ربنا والورع حتى ولو من مجرد التفكير فى حاجة ممنوع
اينعم دا كان مبالغ فيه بس لو اتعمل صح يبقى اعتقد اننا مش محتاجين حاجة تانية
احنا فى الوطن العربى اكتر حاجة بندور عليها الجنس لاننا ببساطة مانعينا نشوف الشباك من واحان صغيرين
فاول ما بنشوفه بناتخد على خوانة وبننط ومبنعرفش نرجع
فكرة حظر التفكير شبه حظر التجوال
الاتنين هيدوروا على الباب الورانى
خليك يا اشرف بدماغك زى ما انت لانك ببساطة وان اختلفت معاك
رجل حر
وان عارف
اغلبهم راح فى 73
^_^

Anonymous said...

يا سلام
عامل رقيب علينا حضرتك وبتقرا قبل ما تنشر
دا تناقض؟

Anonymous said...

اولا موضوع تصنيف الافلام ده في مصر اصبح مهزلة ولازم يتم وضع حد لها
ولو طُبق النظام ده بإحترافية صدقني هنحل ازمات كتير اهمها ان في ناس كتير اووي هتبطل سينما نتيجة انها هتفلس و مش هتلاقي ايرادات

حكاية للكبار و للصغار فقط دي بطلت من زمن فات
و حتى لما كانت موجودة كانت بتطبق في سينمات العاصمة و السينمات الكبرى في المحافظات بس

مهزلة
يعني لما تدخل سينما في فيلم زي حين ميسرة و تلاقي اكتر من 80% من المتفرجين شباب ثانوية عامة و اقل و عيال كلهم كتاكيت تبقى مسخرة ومدعرة مش ميسرة

وفي الحالة دي مش هنقدر نقول الحرية و
Free willing الـ
اركانها متوفرة لاننا بنتلكم عن طفل او حد مراهق لسة مش فاهم اووي


=====

موضوع حجب الموقع الاباحية انا محتار فيه شويه
هل ياترى لو في طريقة فعالة فعلا للحجب نطبقها ولا لأ
فعلا حجب المواقع دي مش هيضر حد
لكن ممكن يفيد حد

المشكلة انها كلها طرق حجب فاشلة و في مليون الف طريقة للتحايل عليها و اثبتت عدم فعاليتها

بصراحة انا متفق معاك يا فنان في نقطة و مختلف معاك في نقطة تانيه

انا رافض موضوع الحجب( متفقين)و
و لكن رافضة لاسباب تقنية بحته و صعوبات ممكن تواجة ناس كتير لان في مواقع قد يتم حجبها و هي اصلا مش اباحية



لكن فكرة ال
free willing
انا مش مقتنع بيها
والا كانت الدولة عملت ترخيص مثلا لبيوت الدعارة و اهي نفس الفكرة

free willing
ارادة حرة
رغبة حرة و اللي عاوز يدخلها يدخلها و اللي مش عاوز ميدخلش و كل واحد حر نفسة و رقيب نفسه



زي ما قلت انا رافض الحجب لاسباب تقنية بحته تماما

ولو في طريقة فعالة بنسبة 100 %

بكرة هتكون 50 بعده 20

بعدة هيظهر لها مشاكل


نخلي الموضوع كده احسن

لان مفيش حلول فعالة ولا اعتقد في وجود حلول فعالة وجدية لمشاكل زي دي خصوصاً و العالم بيزيد انفتاحاً اكثر و اكثر
و الدش اصبح في كل بيت



بس بصراحة صورة هيفا وهبي اللي انت حاططها دي مستفزة جدا و مش محترمة
ياريت تشيلها


(ششش ... دعاية دعاية متقلش لحد )

Anonymous said...

المشكلة اللي ممكن تكون فعلاً اكبر من كدا بكتير

ان الدولة توافق على موضوع الحجب و نستغله استغلال بوهيمي ابلة حقير ابن ستين في سبعين في اربعة و تمانين كلب

و تحجب مواقع المعارضة مثلا و البلوجز و الفيس بوك و بعض المنتديات و الخ الخ الخ

ولاء النعماني said...

ههههههههههههههههههههههههه
هههههههههههههههههههههههههه
هاهاهاهاهههههههههههههاهاهاها


الأميل يموت من الضحك

لا والله يا أخي سيبهم يبعتوه
كده بوظت علينا الفيلم الضوحكي جدا ده !!!


صحيح يا أخوانا ممكن حد فتح اللينك يوصف لينا ينوبه فينا ذنب .. اصل أحنا مش ناقصيت ذنوب


بس على فكرة أنا مع حجب المواقع

ما تزعلش يا أخ أشرف

أنا عندي عيل عايزاه يكبر يتربى ف نضافه وأنت عارف المراهئه وسنينها


صحيح

أسفه أنى ما قرتش كل التعليقات أنا غرقانه ف الشغل

أشرف حمدي said...

لولا
مش فاهماني برضه يا لولا ، هو انا اللي مش متجوز وماعنديش عيال ؟ ما انا طفل أهوه مسيره يكبر ويقعد على النت ، طب انا فين دوري ؟
هو انا المواقع الإباحية فشلي في الرقابة ومتابعة إبني ؟ فكرتيني أكتب رسالة لعمرو يمكن لما يكبر يقراها :) بص يا عممورة : مافيش نت يا حبيبي قبل دخول الجامعة بدون ما أكون قاعد جنبك أغتت عليك ، لما تدخل الجامعة بقى هبب اللي تهببه من المفترض إني ربيتك كويس وإنت أدرى وقتها بمصلحتك ! ثم انت حتشوف ايه ينيّلك يعني اللي شافوا استفادوا ايه بلا وكسة إنت وجيلك الفاقد ده كله جتكم داهية مليتوا البلد :)
بس خلاص
-------------

ketchup
في البداية بس عاوز أقول إن الصورة الجنسية مش لهيفاء وهبي ، عيب يا راجل هيفاء لا يمكن تقلع للدرجادي يعني وكمان لا يمكن تعمل كده مع حد قدام الكاميرا على الأقل ، هي يمكن شبهها شوية ، وكفاية بقى وصف في الصورة الإباحية عشان فيه ناس بتضايق

أنا لازلت مع حكياة التصنيف والإرادة وعدم الحجب ، بالنسبة لبيوت الدعارة حقولك حاجة ونفسي ماحدش يفهمني غلط
بيوت الدعارة كانت مرخصة فعلا في مصر قبل الثورة وكان بيتم إجراء كشف طبي دوري على المشتغلات في الدعارة ، على الأقل الحكومة كانت خايفة من موضوع انتشار الأمراض الجنسية ، لكن فيه نقطة ، هل بعد إلغاء تراخيص الدعارة في مصر الدعارة انتهت ؟ انا شايف إنها زادت ، اهو على الأقل كان حي واحد في منطقة واحدة وخلاص ، دلوقتي الدعارة في كل شارع تقريبا مش بس شارع الهرم ، هل نفهم من كلامي ده إني بدعو لتراخيص الدعارة زي إيناس الدغيدي ؟ لأ طبعا ، مش ده قصدي ، قصدي إن الناس تبطّل دعارة اللي اتفق العالم كله حتى في أوروبا وأمريكا اللي عاملة تراخيص على إنها شيء غير آدمي بالمرّة ودي مش مجرد وجهة نظر ، ياريت إحنا نبطّل دعارة ونسمو بأخلاقنا وبمشاعرنا وسواء فيه بيوت مرخصة ولا مش مرخصة ساعتها مش حتفرق ، هو إحنا محتاجين التراخيص في ايه ؟ سواء اللي بيروح بيوت الدعارة واللي ما بيروحش تفرق معاه في ايه ؟ فاهمني ؟ اللي عاوز حاجة بيعملها سواء مباحة أو ممنوعة وبرجع أذكر محلات بيع الخمور المباحة في مصر ، هل لقيت فيه طوابير قدامها زي طوابير العيش كده ؟ انا حاسس انها محلات خسرانة وأصحابها قاعدين بينشّوا ماحدش بيشرب أساسا ، قليلين جدا ، وعلى رأي عادل إمام في عمارة يعقوبيان : شعوب أوروبا تعز الخمرة وإحنا شعب بيحب الحشيش
تحياتي
-------------
anonymous
ههههههههه فين التناقض ؟ دي مدونة مفتوحة للجميع ، مفتوحة لناس محترمة وناس مش محترمة ، وأنا مش كاتب عليها تحذير بقول : احترس المدونة تحوى مواد إباحية ، فيه ناس محترمة بتدخل وفيه ناس مش محترمة بتسيب تعليقات وقصص جنسية كاملة وناس بتسيب اعلانات ، الحرية مش يعني سداح مداح ، الحرية ليها ضوابط ، وانا بنشر كل التعليقات حتى المعارضة والمستخفة واللي فيها هجوم على شخصي أنا طالما إن مافيش ألفاظ خارجة
-------------
anonymous
سعيد جدا بتعليقك ، وأحب أقولك إن مش انتي بس ده معظم بنات مصر كده ، انا متفق معاكي في كل اللي بتقوليه ، الجنس لا عيب ولا حرام ، العيب والحرام في طريقة عرضه وتقديمه ، ممكن أقدم الجنس في فيلم بورنو رخيص وممكن أقدمه في برنامج أو منهج علمي للتوعية ، تدريس الجنس في المدارس مش عيب ، العيب هي أفلام الجنس اللي على موبايلات تلاميذ المدارس ، موضوع الشباك ده مثال رائع بجد أحييكي عليه ، انا فكرت لما إبني يكبر شوية ويبدأ فضوله يلح عليه بخصوص موضوع الشباك إني أجيب لعبة صغيرة من اللعب وأرميها قدامه من الشباك ، وأنزل أجيبهاله ويشوف حصل لها ايه وأفهمه من التجربة دي إن اللي بيقع من الشباك بيتكسر ويبوط زي ما البنى آدم ممكن يتكسر ويموت ، وبالمناسبة انا اعرف بنات كتير من اللي اتقفل عليهم ووصل بيهم الحال للإنحراف الكامل اللي ما فيش بعده انحراف تاني . بدل القفل فيه بدائل مهمة ، التوعية ، تناول الموضوعات الجنسية ببساطة بدل ما تبقى تابو ممنوع الاقتراب منه ، المهم نقترب منه إزاي وفقا للمراحل العمرية المختلفة . تحياتي وأشكرك بشدة على التعليق الرائع
-------------
daktara
أحيي شجاعتك في الإعتراف بمشاهدة الصورة ، انت أكيد ناضح وعارف ، المهم تكون دخلت وانت عاوز تدخل ، مش ماتكونش عاوز ونفسك الأمارة بالسوء تغلبك ، لازم نعود نفسنا كأشخاص ناضجين اننا نتغلب على الرغبات المتعارضة مع أفكارنا ، نشغل عقلنا أكتر ما نشغل أعضائنا التناسلية ، اللي عاوز يشوف وهو فعلا عاوز ومتفق مع الصورة يشوف واللي غير متفق مع الفكرة ما يشوفش .
-------------
enjy
هههههههههه لا مقلب ولا حاجة ، مقلب ايه بس ؟ زي ما بقول وبحذر هي صورة عارية تماما وفاضحة جدا ، عموما في الدوينة الجاية حتكون فيه مناقشة بإذن الله .
وانا سعيد برأيك ، وهو ده اللي بقول عليه ، المنع يبقى من جوانا مش من برّانا . تحياتي البالغة
-------------
AAA
بالظااااابط كده ، حتمنع حنفك ، حتتولد لدينا الرغبة في كسر الممنوع ، أما لو كان مكسور أساسا حيفقد قيمته وحيفقد ما به من مغامرة وحيفقد ما له من فضول ، بالنسبة للصورة ماكنتش عاوز تقول رأيك فيها (جامدة) عشان اللي بيقاوم نفسه ما يستسلمش ويفتحها ، في البوست الجاي حنتكلم عن الموضوع ده
تحياتي البالغة
-------------
لماضة
ميعادنا في البوست الجاي وحنتكلم عن موضوع الفضول بالتفصيل
-------------
Sham3on
لم يكن هناك داعي للفظ ، أنا أكيد فاهم قصدك من غير ما تقول بس مش مشكلة ، أنا متفق معاك طبعا في رأيك
انت مش عايز تشوف مثلا طب ما فيه غيرك ناضج وعايز ، والله هو حر دي حاجة بينه وبين نفسه وضميره وربنا ، مش من حقنا إننا ندي لنفسنا حق في حاجة ربنا نفسه ما عملهاش ، واخد بالك ؟ ربنا مديك كتاب والله تمشي عليه انت حر ما تمشيش براحتك ونتحاسب في الآخر ، دي عظمة الدين وروعته ، إنما ايه القيمة إني أقولك ده صح ولازم تمشي عليه والغلط كله انت ممنوع عنه ، عشان يبقى فيه صح لازم يبقى فيه غلط وانت تختار .
تحياتي

ولاء النعماني said...

أخص عليك "" مين أخص ده ؟؟؟""

كده تقول للواد أبنى جتك وكسه!!!!وكمان تغلط ف أسمه ؟؟؟

الواد أسمه عمر باشا مش عمر

ومامته حتربيه على الحرية الشخصيه وأحترام حريات الأخرين

وأهم حاجه حربيه يحترم الستات مش زي المخلوقات الغريبه الموجوده دلوقتى إللى أسمهم رجالة

بـــــــــــــس

مش حدخل بيتى خمرة وأقوله ما تشربش

مش حروح بيه كباريه وأقوله ما تبحلقش" الأولى ليك بص بسرعه من غير بحلقه:))"

مش حدخل أفلام بورنو البيت وأقوله أختبر قدرة تحملك

أه أكيد حيدخل النت

ولو عايز يجيب ويتفرج مش حيغلب

بس مش لازم يبقى مباح ومجانى

مش لازم يبقى الإختبار صعب قوي كده

زي ما بشفر قناوات الدش عشان الشيطان يتبط ويبعد خالص

حقفل برضو مواقع النت

وأتمنى لو تتحذف خالص

فهمتنى يا أبو حلموووس

أشرف حمدي said...

عمرو ده إبني انا يا لولا
عمرو أشرف حمدي :)
معاكي في اللي بتقوليه ، بس المنع الحكومي لأ
أنا اللي أمنع مش يبقى ممنوع عليا
تحياتي :)

حاجــ عيال ــات said...

السلام عليكم
اولا بحييك بجد على فكرة البوست...وطريقة تناوله ..عاوزة اعترفلك في الاول اني كنت خايفة اقرأ البوست لما قريت بعض الكلمات فيه على الماشي
لكن الحمد لله ربنا سترها معايا وكملته
أما بالنسبة للصورة لا يا عم انا ناضجة كفاية .. ومثقفة كفاية ..ومش هقولك متدينة كفاية لكن ملتزمة باللي أبويا زرعوا فيا
ومش هشوف الصورة
ويارب أشوف البوست اللي جاي ..وتكون بخير
تحياتي وتقديري
جهاد مشالي

Anonymous said...

You went to all that trouble of promoting freedom of expression and of the individual's rights in accordance to what Hollywood has to offer?

I'm sorry, but given the choice of censorship or Hollywood's trash, I eagerly choose censorship.

What's to fight for concerning these mind-numbing - not to mention moral-numbing movies that are destructive and oppressive themselves?

Y'all think Hollywood's great, huh? Think again buddy, and prioritize your life, in terms of who you allow to brainwash it.

As for porno, get a life.

غلبان ... وليا لسان .... DeXTeR! said...

أصل لو حجبت موقع فيه زليار موقع غيره

و في بروكسي كمان

ولو منعت الافلام .. هنرجع تاني للعصر اللي كتر فيه بنات الليل " وصف مهذب خالتو قاعده ورايا :) "

انا شايف ان كل واحد حر زي ما قولت

و بالنصبه للصوره السيكو سيكو ... لما خالتي تنزل بأه علشان الرقابه

هههههههههههههههه

صبرني يارب said...

شوف
انا ما قريتش الموضوع بتاعك كلمه كلمه بصراحه

اولا لانى مستعجله دلوقتي وثانيا لان الخط صعب اوي وانت عارف السن بقى يا اخويا

المهم

انا عرفت مضمون الموضوع

واتفق معاك فى كون ولا ميت رقابه علىالنت ولا غيره تقدر تمنع حد يعمل غلط

على فكره انا كنت عايشه فى الامارات
مهما عملوا كانت بتفضل مواقع مفتوحه برضه

وكسر البروكسي ولااااااا اسهل

واغلب الدول العربيه عاملاه مش عشان الجنس والله

عشان يقفلوا المواقع السياسيه والمنهاضه للحكم

لان ببساطه مافيش قمع للراي وكتم للنفس الى عندنا احنا العرب

ولان اغلب العرب عد غنماتك يا جحا غنمه قايمه وغنمه نايمه

انما احنا ما ينفعش عندنا كده احنا اكبر واعمق من كون السيطره على كل شيء عندنا
مش عشان هما سايبين لناالحريه

المهم خروجا عن الموضوع الكلام ده

اما بالنسبه للنضوج الفكري

تعالى مثلا برنامج بتاع هبه قطب اسمع كل البتنجان بيتقال حوله وان مش المفروض نتكلم على المواضيع قليلة الادب دي على التلفزيون كده عشان العيال والبنات

واخدلي بالك انت ؟؟
البنات الى هي المفروض تفضل حماره لحد ما تتجوز وبالتالي لما تتجوز هاتفضل حماره برضه

المهم لو انا مثلا قلت انا شايفه ان فيلم سهر الليالي ده فيلم حلو اوي
او فيلم النعامه والطاوس

الاقي حد بيبصلي بعين ونص

ايه ؟؟؟
يعنى كون انى ملتزمه اخلاقيا الحمد لله

ايه يا جدعان فى ايه هو انا هافرج عليه ولادي ايه القرف ده

المهم احنا فعلا شعب عايز يتسك على دماغه وبس

مش عايزين نكبر ونتعلم ونفهم ابدااااااااا

وبالنسبه للصوره بتاعتك بكل صراااااااحه

انا ما فتحهاش خالص اصلا ولا شوفت فيها ايه ولا كان عندي نيه افتحها

وقلت يا اما مافيهاش حاجه اصلا وانت بتشتغلنا هههههههههههههه

يا اما فيها وبرضه يبقى بتشتغلنا

وفى الحالتين مش هافتحها مش عايزين مناظر مقرفه على المسا

بس كده يا باشا

باشكرك على موضوعك الحلو اوي الطويل اوي ابو خط رفيع اوي

كبر الخط عشان بكره اجي اقراه كلمه كلمه من فضلك
يمكن يكون ليه عندي رغي تاني اقوله

أشرف حمدي said...

تم حذف تعليق للأخت "زوجة" ، ليس لأنه ليس على هواي كما تتهم مقدما
ولكن لأن إختلاف الرأي ليس معناه أن تتحول المدونة إلى مشتمة بين المعلقين
وحيث أنها لا يشرفها دخول مدونتي على حد قولها فقد انتهى الأمر
وردا على عبارتها الأخيرة بالسلام أقول لها

وعليكم السلام ورحمة الله يا أختاه

تحياتي

mido said...

انا موافق على كل كلمة كتبتها فى البوست ده

ولكن

انت استفزتنى أوى أوى

بالصورة اللى انت حاططها فى رأس التدوينة

Erotic literature.

مرفوض مرفوض مرفوض

mido said...

حلوة الكوفية اللى انت لففها على رقبتك دى
:)

Anonymous said...

انا مش مع ثقافة المنع اطلاقاً

بس انا مع تطبيق حلول تقنيه لحجب المواقع الإباحيه عن الأطفال , و ده ممكن عن طريق بعض البرامج الموجوده دلوقتي , و كمان شركات الإنترنت عندها القدرة على كده حسب الطلب . .

لكن مسألة اننا نكون اوصياء على الناس دي مسألة أثبتت فشلها الكامل .

عجبني تشبيهك بتاع الشجرة المحرمة . .

معلش تعليقي جه متأخر عشان مش فاضي خالص , الكلية واكلة حياتي كلها :D !

أشرف حمدي said...

mido
إتفضل الكوفية يا مان ماتغلاش عليك
:)
بس حابب أوضح حاجة بخصوص الصورة المنشورة برأس التدوينة
أعتقد مالهاش علاقة مطلقا بالـ
Erotic literature.
على الأقل وفقا لتعريف موسوعة ويكيبيديا
http://en.wikipedia.org/wiki/Erotic_literature

دي لوحة فنية اسمها
Forbidden fruit
أو الفاكهة المحرمة للفنان العبقري مايكل أنجلو وترجع إلى سنة
1509 م
فيه فرق كبير بين الفن والبورنو ، حتى وإن كان العري مشترك
عموما ده موضوع شائك جدا ومش أوان مناقشته دلوقتي :)
بس ممكن أتكلم عنه قريبا
تحياتي وشكرا على التعليق

أشرف حمدي said...

أحمد
ولا يهمك يابوحميد ، وشكرا على التعليق
فعلا الحظر لازم يكون مسئولية الأب والأم داخل الأسرة ، الحجب على مستوى دولة بيرجعنا أميال إلى الخلف
تحياتي

moustapha achraf said...

معاك الى عايز حاجة يعملهلا بش دة ميمنعش ان بردوا لو الواحد يفقل الباب الى تجيلوا منة الريح
عايزك تبص بصة عنى علشان انا بخترم دماغك و قولى اية رايك
merci :)

حـنــّا السكران said...

كلامك صحيح تماما يا أستاذ أشرف ..

من لا يستطيع فرض الرقابة الذاتية على نفسه ..و التي تتماشى مع قناعاته و مبادئه ..و التي هو من يرسم حدودها .لا يمكن لأي جهة أخرى أن تفعل له ذلك .. و الذين ينادون و يصرخون بهذه الطريقة الساذجة ..يضحكون على أنفسهم و على الناس .. طيب أنا حالياً موجود في السعودية بحكم العمل .. و هنا لا يمكن الوصول إلى أي موقع إباحي على الشبكة ..و لا حتى على موقع طبي يتحدث عن الجنس بطريقة علمية مثلاً ..و حتى المواقع اللي فيها باب صغير مكتوب فيه شيء عن الجنس أو صورة أو هيك شي .. ممكن تنحجب .. يعني احتمال مدونتك تنحجب لأنه ورد فيها كلمة سكس ..التي هي رجس من عمل الشيطان. و مع كل هذا ..أنا ما فتحت الصورة اللي انت حاططها .. بس بتعرف ليش ؟
لأني قبل ما ادخل عندك ,,اتفشكلت بفيلم سكس على إحدى القنوات و شفت منه شوية .. لدرجة الإشباع يعني فا خلاص ما كان إلي نفس أفتح صور ههههه ..منشان هيك .. يا ريت ما تشيل الصورة ..عشان يمكن أرجع تاني .. و لو ما لقيتها رح اكتب لك تعليق شتيمة ...
ـ تحية كبيرة يا أستاذ أشرف

ولاء النعماني said...

أستاذ أشرف

أنا فتحت الصورة على الرغم من أنها بتتعارض مع أفكاري ومبادئي:(

بس بتتماشى جدا مع فضولي

كل ما أفتح المدونه أشوفك كتبت حاجه جديده ولا لاء

أشوف الينك

وأفضل أقول معقول حاتط صورة بجد؟؟

طيب جيشيل ذنب الناس؟؟

طيب ليه ولا حد فتح اللينك؟؟

وأهو أنا فتحته

ما لقيتش غير ... وتشمها !!!!شكراً


شوفت بقى .. مش الحجب أحسن؟؟

Yasmine said...

اول زيارة ليا فى مدونتك و حقيقى سعيدة بطريقة تفكيرك
هقول الجملة اللى بقولها دايما..الفضيلة مش فى انى اقطع عن نفسي مية و نور و اقول انا انسانة فاضلة..الفضيلة فى انى لو اضطريت اعيش فى كباريه اعرف اتمسك باللى انا شايفاه صح

ابسط حاجة السجاير..كل الاهالى بيمنعوا ولادهم منها و تبقى ليلته سودة الولد اللى ابوه يقفشه و فى دولابه علبة سجاير..و لو بنت تبقى مصيبة اكبر طبعا مع انها نفس السجارة :)
و اغلب الاهالى دول بيمنعوا ببقهم و هم ماسكين السجاير فى ايديهم..تخيل لو الاب قال لابنه اشرب زى مانت عايز بس ما تلومنيش لو صحتك اتدمرت عشان انت اللى اخترت..بيتهيألى استحالة الولد يفكر انه يدخن فى الحالة دى

المنع وسيلة الضعيف عشان يقنع ضميره انه ماشى صح..القوى اللى عند مبدا ثابت مش مهزوز شوية مع دول و شوية مع دول عمره ما هيسيب نفسه لاى مؤثرات خارجية مهما كانت مغرية

اسفة على الاطالة بس الموضوع حقيقى مهم

Counter