Total Pageviews

Sunday, October 05, 2008

هجوم النمل

معلش الصورة مش واضحة قوي ، وكمان شكلي هرست النملة قبل ما أصورها

ترددت كثيرا قبل أن أنوي نشر هذه التدوينة ، فليس من اللائق أن يشكو أحدا هجوم النمل على منزله ، أشياء كهذه تدخل في نطاق أسرار البيوت على ما يبدو ولكن بعد أن بدأت في السؤال كنوع من جس النبض وجدت أن الأمر خطير بالفعل ومنتشر بدرجة رهيبة
هل رأيتهم هذا النمل غريب الشكل سريع الحركة يجري في كل مكان ؟ أماكن لا علاقة لها بالنمل من قريب أو بعيد مثل الحمام مثلا أو أرضية الصالة ، لا يحب السكر ولكنه يقوم بجمع أشياء غريبة ويكدسها في مكان ما ، حبوب رز وعدس وجثث حشرات ، سريع جدا وصغير الحجم ويسير في طوابير طويلة للغاية وحينما تتبعه تجد أنه قادم إليك من أول الشارع وحتى غرفة نومك في خط يبلغ طوله عشرات أو مئات الأمتار ، كل من سألته عن هذا النمل أجاب بأنه يعاني من نفس المشكلة ، والجميع إتفق على أنه نمل جديد غير معهود بدأ ظهوره من العام الماضي ويبدو أن هذا موسمه
وللأسف لا تجدي معه المبيدات ،أعني انها تقتله بالفعل ولكن وبعد أقل من نصف ساعة يظهر نمل جديد ، مهما نظفت بيتك ومهما استخدمت من مبيدات ومهما قتلت منه جيوشا يظهر غيرها على الفور .
عموما أحب أعرف إذا كنتم شفتوا النمل ده ولا لأ ، وبعد كده نشوف إيه الحل ، ماهو إحنا مش حنسكت لحد ما يبدأ ياكلنا إحنا كمان زي أفلام الرعب ، وكمان إزاي الحكومة سايبة الوباء النملي ده منتشر كده ؟
وكفاية بقى كلام عن النمل عشان أنا جسمي قشعر

30 comments:

Anonymous said...

بعد ما تمسح الارض ، ترش شوية جاز ، و بالموب - الممسحة يعني - تلحوس الارض ..
سيختفي النمل من حياتك تماما
مع تحيات قسما و الشحرويشي

أشرف حمدي said...

ماكنش حد غلب
شوية ويطلع غيره وغيره وغيره
مافيش فايدة ده وباء
المهم عاوزين نعرف إذا كان حد تاني شاف النمل ده غيري وغير اللي سألتهم

شق القمر said...

النمل مش يؤذيك فى حاجة غير ان الرمل اللى تحت البلاط او السيراميك هتلاقيه بقى فوقه :))

عموما دا طبيعى لانه هيعمل بيات شتوى
فبيجرى على رزقه

وأهم حاجة انك تبعد النمل
اولا النضافه .. الكنس كل يوم يعنى
ثانيا بقى تدور على الثغرات اللى النمل بيخرج منها وتقفلها

وبعدين انا فى الفلاحين مبشفش النمله الجامدة دى اللى كل منين لفين

والصراحة مبيبقاش جيوش كده

عامة خيييييير

خللوا بالكم من عيالكم
ومتنساش حضرتك

النمل مبيعضش
بيقرص ويورم من الارتيكاريا وبس :))

اهو ده عيبه said...

كل سنة وانت طيب
انا برضه لاحظت الحكاية دى والظاهر ده نمل صيامى لان مالوش فى الاكل خالص
وكل تركيزه على حاجات تانية
ومهما استخدمت مبيدات مفيش فايده الظاهر محجب
ربنا يحفظنا منه جميعا
سلام

أشرف حمدي said...

شق القمر
كل يوم كنيس ؟ احنا بنكنس كل ساعة بسبب النمل ده ومافيش فايدة
عاوز له أجازة لوحده والواحد يقعد ببنطلون البيجامة كده يتتبع الخنادق ويسدها ويسمها
دي أفلام كارتون بجد :)
شكرا على التعليق
-----------------------
أهو ده عيبه
مش كده برضه ؟
احنا بقى نعمل خريطة ونشوف إيه المناطق الموبوءة ، أفلام خيال علمي

Anonymous said...

د/أشرف بعد التحية
عن تجربة....في طباشير اسمه ماجيك كيللر يباع في المتاطق الشعبية زي بزلاق امباب...الخ تسطر به على الاركان و اماكن الفتحات و عتبات الحمام و المطبخ هو بلا رائحة و مفعولة فعال خاصة على حرامي الحله او كما هو معروف بالنمل الفارسي...بالمناسبة في سبيسي جديد نمل بالاجنحة و رجله طويله !!!يظهر غزو الحشرات اللي ياما شوفناه في افلام الخيال العلمي بدأ فعلا....مع تحياتي و ابقى طمني
حنان

عـلا - من غـزة said...

دايما ستي -جدتي يعني- كانت تقول ان لما تلاقي نمل في مكان تعرف ان فيه حد سوف يرحل
يسافر ,, يعزل ,, كدة يعني
ودايما كانت الحكاية دي بتطلع صح

Anonymous said...

دا فظيع تحس انه ليه أهداف أخرى حقيقى مش قصة ياكل وبس
وكمان بيتزاوج مع حشرات تانبة ولا ايه دا فى نمل بيطير
والله العظيم نكل وبيطييييييير.
عموما انا فاكرة فى احد حلقات كرتون الوالدان السحريان أو فيرلو أود بيرانتس مرّة خلو تيمى يسمع الصراصير بتقول ايه لقوها بتقول السيطرة على العااااااااااالم بجد واضح ان النمل بيقول كدة أكتر

طالب ثانوى said...

على فكرة احنا عندنا نفس المشكلة وغلبنا معاة وعارف كمان لازق فىبراد الشاى الكهربائى لدرجة مفزعة متخافش احنا مش معفنين بس والله النمل معذبنا وبنصفى المياة وهى نازلة من البراد

شكرا لاضافتك ليا على الفيش بوك انا اللى ضيفتة باسم فاروق

اصل لسة فيس بوكى جديد

Sarah Daw said...

يع قوووووووووووى

مقززه

بس ده بيهدم بيوت فعلآ فى الأرياف

لأنه بياكل الأثات آللى أصلآ مش موجود

kochia said...

اه فعلا هو ظاهرة
والنمل بطل ياكل السكر زي زمان
دلوقتي بشوفه ياكل فراخ وياكل البريل بتاع المواعين وبياكل حاجات غريبة جدا
واخيرا كانت السنة اللي فاتت شوفت له اجنحه ومش الامهات بس لا دي القبيلة كلها

ربنا يستر

Bo2Loz said...

howa f3ln mwdoo3 3`areeb..mama hatetganen meno felbeet w 7`sosn eno maloosh 3elaka be nadafet elbeet...betna andaf mn elotna...grabet elgaz ( wlamoa7`za ) hhhh ..howa yoom w eltani w tla2eeh yd7`ol..w elsanadi 3adado akbar bekteer mn elsana eli fatet..lw 7d 3ndo 7al a7sn a7eb astafeed ma3ako..w araya7 ommi

أشرف حمدي said...

؟؟؟؟؟
ايه ده ؟ مش بقولكم !!! واضح فعلا إنها ظاهرة
بس أحب أوضح إنه مش حرامي الحلة ، لأ أنا قصدي النمل الصغير السريع وفعلا زي ما حدقال إنه بيمشي مع حشرات تانية ، أو يمكن هو هو بس بشكل تاني
يعني تلاقي الطابور كده نمل صغير وفي وسطهم حاجة مكعبرة كده كبيرة ماشية معاه برضه
وفعلا زي ما الناس قالت هو مالهوش علاقة بالنضافة ، وبياكل حاجات غريبة جدا ومالهوش علاقة بالسكر

بالنسبة للنمل أبو أجنحة فعلا كان موجود من سنتين تلاتة كده وكانت حاجة مرعبة فعلا ، نمل بيطير ، تخيّلوا بقى

طب كده إحنا عاوزين حد خبير في موضوع النمل ده ، عاوزين نعرف نوعه وبيجي منين وإيه سبب انتشاره بالشكل ده
السنادي فعلا أكتر بكتير من السنة اللي فاتت
ومن حوالي 3 سنين ماكنش ليه وجود أساسا
شكرا على التعليقات

اجندا حمرا said...

زي الصراصير ياأشرف
بقت جميع الأحجام و الاشكال و ماعدش نافع معاها لا بخ و لا عجينه و لا أي حاجه

أشرف حمدي said...

والله انا خايف يا أجندا ليطلع مسئول اين ستين في سبعين زيقول زي ما قال عن الجراد
إن أكل النمل مفيد جدا للصحة ويستشهد بدولة بتنجانستان اللي فيها بياكلوا النمل في أفخم المطاعم كوجبة فاخرة

¨¨¨°~*§¦§ Appyplanet §¦§*~°¨¨¨ said...

هههههههههه انا بعاني منه فى الشقه وخالتى فى الفيلا بس انا فرحانه فيها والله هههههههههه
انا بعمل كمين بحط حبه سكر وبعدين لما يتجمع ارش عليه ميه ده عامل زي الحكومه مفيش حاجه بتهشه

سبهللة said...

انا النمل جابلى جنان
وياريت اللى يلاقى حل يقولنا عليه غير بودرة النمل لان عندى اطفال ضغار وعندهم حساسية على الصدر
وموضوع الرش والبودرة غير مجدى معايا
بس فى طريقة انا مجرباها
وهى انك توصل لمنبع النمل ولو كان فى الشقة تسده بصابونة طرية شوية
وتسيبها تنشف على مدخل جحر النم وان شاء الله مش ممكن يطلع من الخرم دة تانى
بس ممكن يلاقى حل ويخرم حتى تانيةودة مش سهل

bos bos said...

انا فعلا شفت النمل اللى بيطير ده مرة وانا فى اسكندرية وكان مزعج جدا لانه كان فى كل حته حتى على السرير ومهما تموت فيه او تبعده بيرجع تانى

فيه طريقة سمعتها علشان نتخلص من النمل
وهيا الخل تشوف النمل جاى منين بالظبط يعنى فين الشق بتاعه وتحط شوية خل وهو هيطرده ويارب الطريقة تنفع

asma alamin said...

هههههههههههههههه
واضح ان الحكومة غلبت معانا فسلطت علينا النمل ده يجيب اجلنا
انا مش عارف ايه ده حاجة غريبة حكاية النمل ده ماما غلبت معاه وبيروح فى اماكن غريبة زى الحمام والحكاية مابقتش اكل وبس فعلا هو له اغرض اخرى غريبة عجيبة عند جيراننا وصل لاود النوم والانتريه
هههههههههههههههه
مش بقولكم الحكومة لها يد فى الموضوع ولازم لنا واقفة قومية لمواجهة جحافل النمل فالى الجهاااااااااااااد
واااااااااااااه نملتاه

علم الهسس said...

النمل عندى وصل جوا الأنتريه
ومعرفش ايه اللى عاجبوا فى الأنتريه

وخد عندك الحمام
والمطبخ
..
..
الخ

ومع الكنس والتنديف
يرجع تانى

بس نصيحة
انا قعدت ما يقرب من اسبوعين
مقاومة للنمل اللى فى الحمام
والحمد لله جابت نتيجة
ساب الحمام وراح الأنتريه
وانا دلوقتى
بقالى شهر بقاوم فيه
ولسه المعركة ما اتحسمتش

ارجوا لك التوفيق فى المقاومة

تحياتى

عاشــــــ النقاب ـقــــة"نونو" said...

السلام عليكم
هكسب فيكم ثواب واقولكم حاجة طبيعيةجدا
الاول تسدوا كل الفتحات اللي بيطلع منها
وتتبعها وتحط عليها قشر خيار
ايوة قشر خيار ما تتعجبش


المبيدات بقى
بودرة وترش كل يومين تقريبا
يعني ترش النهاردة وبعد ومين تتكنس ويترش غيرها
وخلي بالكم على الاطفال
فعلا ظاهرة وحاجة ترعب
ربنا يستر
كل عام وانتم بخير

أشرف حمدي said...

مش حنسايس ، مش حنميل
مش حنوافق ع التنميل

عاشــــــ النقاب ـقــــة"نونو" said...

؟؟؟؟؟؟؟؟؟؟؟؟؟؟؟؟؟؟؟

SaSo said...

دى نمله دى؟
؟؟
اللى انت مصورهالنا دى نمله
!
امال الصورصار عندكو هيبقا ازاى


عموما اه احنا عندنا نمل برضك كبير كده وبيمشى بسرعه وبيقولو اسرائيل اللى مسلطاه علينا


والله اعلم

أشرف حمدي said...

ههههههههه
أيوة نملة والله ، بس مصورها ماكرو
دي صغيرة جدا على فكرة ، حوالي 1 مم بس
بس انا الكاميرا بتاعتي شديدة شوية :)

TigerEye said...

ههههههه
ازيك يا اشرف
من وصفك للنمل افتكرت النمل بتاع توم وجيري

الطابور الطويل الذي ينتهي ويحمل كل ما يجده في طريقه

Zika said...

اشرف بيه اكيد بيبقي فيه اخرام عندك في الشقه
ممكن في الحمام او في المطبخ او في بره باب الشقه
سدها وادعيلي
بس بعد يومين هيكسروا الاخرام تاني ويخرجولك
مش هيستحملوا الوحده من غيرك
صدقني انا مجرب

واحد من البلد دى said...

يا عم أشرف..

النمل حر فى بيتك..

طالما إنه ماعملش ..إستيطان

وطالما ما قامش ب...غارات أرضية

وطالما إنه بيقعد معاك على....سفرة المفاوضات

وطالما إنه سايبك أصلا تعيش فى البيت..

يبقى نصيحتى الوحيدة لك..
لازم..حازم..جازم..

تعمل معاه ......تطبيع

و إدينى سلام..

يا مطنشينا و بقالكو زمان ما زورتونا

قلنا نزوركم اوام أحسن ما تنسونا

هههههههههه

Anonymous said...

انا شفته بس مش في بيتي الحمد لله تقريبا لسة ما وصلش حلوان.
لكن في الشغل وفي كل حتة في المكتب والحمام..الست تيجي تنضف وتمسح وبعدما تمشي بخمس دقايق بيجي تاني.

وكمان في جامعة القاهرة في منه كتير...اه والله كتير اوي:)

noWay said...

احنا كمان في السعوديه في المنطقه الشرقيه في الخبر عندنا نفس المشكله بتاعت النمل الانتحاري الي بيملي اي حاجه فيها ميه
او نقول النمل العطشان
ولا يمكن عنه جفاف ولا نجبله محلول معلجت الجفاف

Counter