Total Pageviews

Tuesday, October 21, 2008

كتابي الأول


لم أكن أنوي الحديث عن هذا الموضوع على المدونة ، ربما كان هذا الكلام سابق لأوانه ولكنه لم يعد كذلك الآن ، فلم أعد أحتمل التفكير وحدي وأتمنى أن تشاركوني باقتراحاتكم .
كل ما يمكنني الإعلان عنه الان هو أنني أجهز لكتابي الاول ، أعتقد أنها فكرة جديدة لم تقدم من قبل أو على الأقل تم تقديمها بشكل مختلف إلى حد كبير عما أنوي عمله وفي نطاق محدود للغاية ، من المفترض أنه كتاب ثوري وأتمنى له أن يغير من مفهوم الكتاب التقليدي الذي لم يتغير منذ وقت طويل ، المهم ودون الخوض في تفاصيل المشروع ، قررت أن أجرّب دور النشر المتاحة حاليا وأواجه صعوبات كبيرة لم يكن أكثرها قسوة هو التكلفة وإنما أكتشفت أن الموضوع أكبر من قدراتي على التعامل معه ، كل ما أعرفه هو أنني أقوم بتجهيز الكتاب ، ولا شان لي بتفاصيل أخرى أعتبرها مهدرة للوقت والجهد مثل اختيار دار النشر المناسبة والتحمسة للأفكار الجديدة والوصول معها إلى إتفاق ثم الدخول في دوامات العقد المبرم مع الدار والتجهيز ونوع الورق ونوع الطباعة والقطع والغلاف والهوامش والتفنيش ومشاكل بعد ذلك في التوزيع وحساب الأرباح ، ماليش دعوة انا بالليلة دي كلها، وجدت نفسي معطلا في النهاية ولا أقدر على استكمال الكتاب لسبب بسيط ، هو أن فكرة الكتاب تحتاج إلى الإتفاق مع دار النشر أولا للوصول إلى حلول واقعية بخصوص كل ما ذكرته وخاصة مسألة الطباعة ومدى إمكانية تحقيق الفكرة عمليا ، كما أن هناك نقطة أخرى لا أفهمها في الواقع ، ما اعرفه هو أنني حينما أقوم بعمل كتاب فإن الناشر يدفع لي مالا مقابل حصوله على حق نشره ! لا العكس ، وما يحدث في مصر أنك تدفع لتنشر كتابك ، ثم تاتي دور نشر تخبرك بأنها على استعداد لنشر الكتاب دون أن تتحمل أنت أي نفقات ، صلاة النبي أحسن ، إيه الكرم ده كلّه يا جدعان ؟ ولكنني على استعداد للتعايش مع الواقع المرير في أن أتحمل نفقات الطباعة والنشر ، ولكن هناك مشاكل أخرى ، التوزيع مثلا ، جودة الطباعة الغير مضمونة خاصة وأنه لم يطبع كتب كثيرة من هذا النوع ، سرقة الكتاب ونشره إلكترونيا فور صدوره ، كتاب باهظ الثمن مثل ألبوم الطبيخ مع أسامة أطيب ثمنه بالمكتبات مائة وثلاثون جنيه ، يمكنك تحميله مجانا من عشرات المنتديات ، شيء محبط بالفعل .
سؤالي لكم هو : ما رأيكم في نشر الكتاب إلكترونيا ؟ أخذا بالمثال القائل بيدي لا بيد عمرو ؟
أنا لا يهمني الأرباح ولا أن أضع في سيرتي الذاتية أنه قد صدر لي الكتاب الفلاني رغم أنه شيء جيد ولا انكر روعته ، كل ما أريده هو الاستمتاع بالتجربة ، أن تستمتعوا انتم أيضا بما أقدمه ، تماما مثل هذه المدونة .
الرأي الآخر وهو رأي له احترامه ويستوجب على التفكير به بأن هذه خسارة فادحة ، الكتاب الورقي له رونقه وفخامته وأهميته بالنسبة لي ، وسيكون النشر إلكترونيا إهدارا لمجهودي ولن يحدث التأثير المطلوب حتى وإن تم توزيعه على نطاق واسع على الانترنت .
الرأي لكم ، ولكن أرجوكم حاولي النظر إلى مصلحتي ، لأن هناك من قال لي : هيييييه هييييييه انشره عشان نقراه مجانا وبدون ما نروح ندوّر عليه في المكتبات !
في انتظار تعلقاتكم
مع خالص حبي واحترامي

32 comments:

Mohamed Emad Hegab said...

اشرف باشا ..طبعا انا حاموت و أعرف فكرة الكتاب بس مش دي القضية حاليا
الفكرة انك تدور الأول على دار نشر متحمسة للفكرة أو للأفكار المطرقعة ..أيه رأيك تشوف دايموند بووك و مهندس سند راشد صاحبها , الجماعة الكوايتة دول شغلهم كويس و نضيف و مش حايدفعوك مليم فيه ..خلي النشر الإلكتروني أخر حاجة لأنه مهما كان مش حايبقى زي الورق..يعني معلش لو الإنترنت ده وقع ولا إنتهى في يوم بعد الحرب النووية كتابك حايندثر..هي هي
نتكلم جد ..طب مانا بقول جد النشر الإلكتروني زي ما قال دكتور أحمد خالد توفيق ..القراء حايكونوا كتير بالنسبة للإنترنت لكن مش كتير بالنسبة للورق.. أملك الوحيد أنك تنشر كتابك بالإنجليزي بالتالي الأجانب يخشوا اللعبة و ممكن تعمل زي ستيفن كينج و تقول أدفع دولار واحد لو عجبك الكتاب ..ممكن وقتها تلاقي نفسك ملياردير

ام كوكي said...

فكرة الكتاب هايلة جدا
ويا سلام بقى لما تبقى المواضيع مصحوبة برسوماتك الجامدة اللي بتعبر عنها..

بس موضوع انك تنشر الكتاب على النت دي هتبقى بتضيع مجهودك وتعبك من غير ما تستفيد حاجة بالذات ان في نوعية من الناس ممكن تقتبس اجزاء من المواضيع اللي في الكتاب وتنشره في المنتديات وتنسبه لنفسها زي ما بنشوف كتير

انا بقترح عليك تخلص الكتاب الاول وبعدين تعرضه على اكتر من دار وشوف ساعتها الحياه هتمشي ازاي

صدقني لو لقيت دار نشر كويسة اتعامل معاها وليك عليا اول ما الكتاب ينزل هبعت الواد كوكي يجيبلي كام نسخة وهعملك دعاية تمام وسط الناس اللي بيثقوا في ذوقي

يلا ياعم اي خدمة

Anonymous said...

طبعا انشر الكتاب..هتواجه صعوبات وهتقدر تحلها ان شاء الله.
نشر الكتاب احسن بكتير ليك وللقراء.
وان حد نشره على النت؟؟ايه المشكلة الكل هيكون عارف انه الكاتب الفالاني هو الي كتبه..وحد غبي اوي اللي هيقول انا الي كاتبه والكتاب مالي المكتبات وعليه اسم الكاتب.

ارجوك اسمع نصيحتي وانشره.
وصلي صلاة استخارة كمان.

كتاب اسامة الطيب سهل ان الناس تدخل على النت وتقرا طريقة عمل اكلة وخلاص على كدة...لكن اللي مهتم بتعليم الطبيخ اكيد اشتراه..لكن في حالة كتابك الموضوع مختلف لانه كتاب على بعضه مش طبخات ممكن حد يقعد على النت ربع ساعة يعرف هيعمل ايه على الغدا النهاردة.

لااااازم الواحد يشتريه ويقعد على الكنبة ويفرد رجليه وجنبه كباية الشاي..فهمت انا عايزة اقول ايه؟

وربنا يوفقك.

في الاول انت هتدفع فلوس عشان تتنشرلك كتب..لكن بعد كدة دور النشر هتدفعلك مقابل انها تنشر كتبك لما تشتهر وكتبك تتعرف انها كويسة لان محدش هيغامر وينشر كتاب لكاتب بيكتب لاول مرة..كئنك استاجرت دار النشر منهم لحد ما تخلص نشر الكتاب يبقى اكيد هتدفع..

انا بدعيلك واتمنى اشوف كتابك منور واجهات المكتبات قريب.
اسفة رغيت وطولت عليك

أشرف حمدي said...

mohamed emad
اما بتفق مع دار نشر فعليا دلوقتي وربنا يسهل وانا مستبشر خير ، مش حقول اسمها إلا لو الكتاب طلع بالشكل اللي بتمناه عشان ما أظلمش حد ، الفكرة فعلا صعبة ومش عايز أظلم دار النشر معايا لو الكتاب طلع مش زي ما انا عاوز

عندك حق في موضوع النشر الإكتروني طبعا ، هي فعلا مشكلة ، بس دع كتاب مصري مليون في المية مايساويش بصلة لو اتعمل انجليزي ههههههههههه
انا مش ستيفن كنج يا عم ، يا بخته زمانه لم ملايين الدولارات من الحكاية دي
----------------

أم كوكي
شكرا بجد على النصيحة ، ده تاني صوت ينادي بالطباعة الورقية ، عندك حق طبعا
خاصة موضوع السرقة حد يكتب اسمه عليه ، ساعتها حنتحر بجد
عموما زي ما قلت انا مع دار نشر وبتحسس خطايا معاها وربنا يكرم إن شاء الله ، حنعمل بروفات ونشوف نسبة الأخطاء اللي ممكن تحصل مع طباعة كتاب مهبب زي ده هههههههههه
مش كنت عملت رواية وخلصت ؟ أخرتها ملف وورد وأبعته بالميل للناشر وخلصت
هههههههههههههههه تحياتي

أشرف حمدي said...

anonymous
وآدي كمان الصوت التالت اللي بينصحني بالنشر الورقي ككتاب من لحم ودم

انا بدأت اقتنع فعلا ـ ما تتصوروش قد ايه انا سعيد بالتعليقات لإني فعلا كنت محتار بين الإختيارين وماكنتش ميّال أكتر لأي رأي فيهم

انا معاكي جدااااا في حكاية الكتاب الورقي والكنبة وكوباية الشاي ، يالهوي ، طعم تاني خاااالص
انا بجد نفسي أشوفه ورقي خاصة وإن الفكرة ألذ بكتيييير لو اتعملت كتاب
بجد شكرا على التعليق
ألف شكر ،

أشرف حمدي said...

نقطة أنا قلتها في التدوينة وأحب أأكد عليها
للأسف لن استطيع الإنتهاء من الكتاب أولا ، لابد أن يكون ذلك بالتوازي مع دار النشر التي لابد وأن أرجع لها في كل مرحلة من مراحل الكتاب
لم أرى شيئا مطبوعا مثل ذلك إلا نادرا ولو انتهيت من الكتاب أولا يمكن أن يقول لي الناشر : لا والله الشغل ده صعب قوي في طباعته أو الطباعة مش حتطلع زي اللي انت عملته أو عاوزه
ساعتها حموت بالسكتة القلبية
:)

Dexter! said...

قلتلك علي الفيس

و هقولك هنا

بالرعم اننا عاوزينه الكتروني علشان ما نشتريش و نغرم و بتاع :)


بس لازم يبقي ورقي


و دور أكيد هتلاقي

وربنا يوفقك يارب

أشرف حمدي said...

dexter
حتى انت يا دكستار ؟ ههههههه
ده انت كنت الصوت الوحيد اللي بينصحني اعمله الكتروني ، انا متفق معاك وربنا يسهل إن شاء الله وشكرا بجد على اهتمامك بالموضوع
تحياتي البالغة

طالب ثانوى said...

اشرف طبعا لازم تتفق مع دار نشر محترمة

بص من الاخر نفس رد محمد عماد حجاب

TAFATEFO said...

أنا عندي رأي مختلف بقى لو تسمحلي أكلم حضرتك وأقولهولك

FemTo said...

دكتور اشروف

اول حاجة مليون مبروك على الكتاب وان شاء الله يكون شى رائع ويتكرر كتير وتعمل مجموعة كبيرة اووى ان شاء الله

انا على مفهمت انه حيكون كتاب تفاعلى .. الفكرة لو بقت اون لاين حتفقد قيمتها ولو حتة اتعمل اون لاين انا لو كاتب بحبه نزل كتاب وانا قريته على النت بشتريه برضه عشان يستمر ويفضل ينزل... وكمان انك تمسك الكتاب فى ايدك بطبعة فاخرة وورق نضيف .. تقدر تاخده معاك , توريه لصحابك تضمه لمكتبتك .. انا بجد شايف انك تطبعه وحكاية النسخة الالكترونية مش بشجعها ... ولو وصلت انك تطبعه بره يادكتور لو الفكرة متميزة اووى ومحتاجة طباعة معينة عشان تتنفذ روح برة وكلفه صدقنى حتلاقى الصدى ان شاء الله

أشرف حمدي said...

طالب ثانوي
تمام يا باشا :) انت كده بقيت الصوت الكام ، نسيت
ألف شكر
-----------------
تفاتيفو
وصلتني نمرتك يا باشا بس المشكلة إني لو اتصلت بيك حقولهم ايه ؟ إدوني تفاتيفو ؟ هههههههههههه
حتشم وتتقفل السماعة في وشي

للأسف انا في الشغل دلوقتي ، ححاول اتصل بيك بعد ما أروح وربنا يسهل
شكرا بجد على اهتمامك

TAFATEFO said...

دي إهانه؟!
:D:D

عموماً رقم موبايلي كمان مع حضرتك .. واسمي مصطفى أحمد
:D

أشرف حمدي said...

تفاتيفو
ههههههههههه والله ما قصدي :) معلش بجد هي القافية حكمت
الموبايل ما وصلش بس عموما ححاول اتصل بيك إن شاء الله ع البيت أول ما أرجع ، ده إذا ما اتقتلتش من التعب كالعادة
تحياتي

أشرف حمدي said...

femto
ألله يبارك فيك يا حبي ، لأ هو مش كتاب تفاعلي ، دكتور احمد خالد عمل الفكرة دي على الانترنت ، وكنت خايف من إني أجيب سيرة الكتاب بدون ما أقول تفاصيل الناس تضع في خيالها حاجات خرافية مبهرة عبقرية فظيعة ويطلع رأيهم في الآخر إنه كتاب متوسط
أنا مش غرضي التشويق خالص والله انا بس مش عاوز أقول الفكرة تتحرق
!
سيبنا من الكتاب دلوقتي
بس بجد شاكر ليك اهتمامك ورأيك ، انا متفق معاك
الموضوع مش محتاج طباعة عبقرية ولا حاجة ، بس هي طباعة غير شائعة الاستخدام ، مجرد طباعة دقيقة وتفنيش محكم جدا مش أكتر ، الزنكات تفي بالغرض على ما اتصور وربنا يسهل

زهرة الياسمين said...

دكتور اشرف
انا عندى رأى ممكن يكون بيجمع بين الرأيين
يعنى انك تعمل الكتاب ورقى و فى نفس الوقت تعمل منه نسخة الكترونية بس مش للتحميل المجانى لإنك كده تبقى بتضيع مجهودك
لكن تعمله تتفق مع موقع متخصص فى بيع الكتب الإلكترونية و يبقى التحميل مدفوع
تانى حاجة الكتاب الورقى هيكون صدوره قبل الإلكترونى مش متزامن معاه و ده عشان تحفظ حقوقك من السرقات الإلكترونية
هى مجرد فكرة
و الرأى الأول و الأخير لك
و ربنا يوفقك

أشرف حمدي said...

زهرة الياسمين
شكرا ليكي على التعليق والاهتمام ، بس هو ماينفعش أنشر الرواية إلكترونيا حتى ولو بمقايل مع نشرها ورقيا ، العقد بتاع دار النشر بيمنع ده ، أتسجن فيها لو عملت كده
ههههههههههه
عموما ميرسى على اهتمامك

Abo Hamza said...

أشرف
ممكن تشوف التدوينة دي للرائع رؤوف شبايك؟
http://www.shabayek.com/blog/?p=300
لعل وعسى انها تكون مفيدة
بالمناسبة
رؤوف وعدد من المؤلفين بيستخدموا موقع اسمه لولو في النشر
دي خطوات النشر عليه
http://www.shabayek.com/blog/?p=112

وبالتوفيق

زوج مخنوق said...

كام واحد عمل كتاب الكتروني و الناس فاكراه؟؟
و كام واحد واحد عمل كتاب ورقي و الناس نسيته؟؟
توكل على الله يا دكتور استخير ربنا و كمل مع دار النشر طبعا
فعلا الواحد قد ايه بيبقى مبسوط لما يشوف ميلاد كتاب جديد لحد يعرفه
ربنا يوفقك

Anonymous said...

ربنا يوفقك
انت قبل ما تنشرة عالنت انصحك انك تروح تسجلة بالشهر العقاري باسمك لان ممكن بعد ما ينزل عالنت ينجح ويتسرق ويبقي ياحلو خدت الصابونة بكدة تضمن حقك ان انت صاحب الكتاب علشان بعد كدة لو دار نشر حبت تطبعة ترجعلك انت وهتاخد فلوس وقتها

أكون أو لا أكون said...

الدكتور أشرف ...
لانستطيع أن ننصح بما أننا لانعرف هل الكتاب فني؟فكري؟ ادبي؟ علمي؟ تاريخي؟ديني.
يعني رأينا سيختلف مع أختلاف الماده المطروحه بالكتاب... لو كان فني لا بد أن يكون على الورق... يعني حرام يكون كتاب الكتروني... خصوصا لو في بالك أنواع خاصه من الورق... أو عمل طباعه ثري دايمنشن من الورق... أو استخدام قاطعه الليزر لقص بعض التصاميم... أو أستخدام أنواع من الحبر ذات اللمعه...
مستنيه أعرف الموضوع عن إيه...

بنت القمر said...

هو لو نشرت اليكتروني كنت ها تقول يا ريتني نشرت ورقي ضيعت الفرصه علي روحي
لكن لو نشررت ورقي وتعبت حبه واتسرق بعدها... وده مش اكيد
ها تقول اديني عملت اللي عليا
اما ينزل بس نوه عنه هنا عشان احمله اليكتروني
ممكن تنضم لدور النشر علي الفيس بوك وتعرف شروطهم وتوفر مشاوير تتصل بالادارة علي طول
هاهاها
بالتوفيق

enjy said...

اشرف .......... انا شخصيا مش بحب اقرا الكتب من على شاشة الكمبيوتر الكتاب دة حاجة لها قدسيتها كدة ولازم يبقى مطبوع وتعرف تمسكه فى ايدك يعنى انا لو لقيت كتاب منشور على النت هفضل اشتريه طبعا.... بالنسبة للى انت قلته اكيد طبعا هيحصل وساعتها انت هتخسر خصوصا لو كان سعر الكتاب فى الاصل غالى بس جرب والله يمكن تصيب معاك وبعدين اعتقد محبى القراءة واللى عارفين اشرف حمدى هيصعب عليهم مجهودك وهيحسوا انهم بيخونوك لو حملوه من على النت........جرب وان شاء الله هتبقى تجربة حلوة قوى واحنا قبلك هنستمتع بيها

Shams Elkharif said...

كتاب ورقى طبعا

مهما كان الكتاب الورقى ليه طعم و شكل تانى غير الالكترونى ، و خاصة لما يكون الالكترونى ده مجانى ، بيبقى كتاب تانى على الجهاز يتقرا لو الواحد فضى

و ان شاء الله ربنا يكرمك و ينزل زى مانت عايز و ينجح

soreal said...

i was about to say do both, until i read ur last comment :(

electronically, it will reach more ppl that way. specially those who cant buy the book due to geographical reasons.

in the west its very common among artists, musicians and writers to allow their stuff to be available on the web for free, with a note..
something like:

if you like it, pay for it.
or
if you like it , pay as much as you like for it
or
if you like it donate
or
if u like it, buy a hard copy
or
a better copy

those who do this dont want big corporations to take ownership of their own intellectual properties... and find a lot of their fans to support such views


i know its different in the west ... but you asked for opinions... so there :P


all the best.

أشرف حمدي said...

abo hamza
أشكرك على النصيحة ، وصلات مفيدة فعلا ، وعموما حتفيدني لو لا قدر الله واجهتني صعوبات في النشر الورقي
تحياتي
-------------------
زوج مخنوق
ألف شكر على التشجيع بجد ربنا يخليك ، وربنا يعمل اللي فيه الخير
-------------------
anonymous
طبعا ده شيء مهم في حالة النشر الإلكتروني ، شكرا على النصيحة
-------------------
أكون أو لا أكون
؟؟؟؟؟ هو فيه كده ؟؟؟؟؟
والنبي بلاش تقوللي كده أحسن أشبط زي العيال الصغيرة ، أنا معرفش إن فيه طباعة زي كده في مصر ؟ ليزر وطباعة بارزة وأحبار لامعة ؟؟؟
تصدق بقى أن كل اللي طالبه في حياتي مجرد مكنة بتقطع بعقل :) أكتشفت إن أكبر هامش ممكن أسيبه فاضي في الصفحة بعرض اتنين سنتيمتر ، وده ممكن يعتبر قليل لإن لسه حيتقطع منه ولسة اللزق حياكل شوية ولسة كمان الصفحة إحتمال تتصغر أو تتقطع عشان غالبا المقاس الحقيقي بيكون أقل من المقاس القياسي
standard
يعني
أنا شغال على نص ايه فور
والمقاس الحقيقي اللي شفته كان أقل من كده بشوية فمش عارف حيحصل قطع ولا تصغير
بالنسبة لنوعية الكتاب فتقدر تقول فني ، طبعا فيه رسومات
أنا برضه شايف إنه يكون ورقي بس مرعوب من الطباعة
أنا اخترت طباعة زنكات ومش عارف إمكانياتها الحقيقية في طباعة الصور
ألف شكر على النصيحة
-------------------
بنت القمر
هههههههههه ماشي ماشي
أنوّه انا عليه عشان تحمليه مجانا من ع النت
انا بقول برضه حيتخرب بيتي انا عارف ودار النشر حتقفل وتقعد تشحت جنبي ع الرصيف
هههههههههههه
-------------------
enjy
أنا معاكي تماما وخلاص اقتنعت من بعد أول خمس تعليقات
انا عندي كتب الكترونية كتييييير جدا فوق الخمسة جيجا بايت بس تقريبا مش عارف أقرا ولا كتاب منهم رغم إن فيه مكتب مهمة جدا
القراءة من شاشة الكمبيوتر غلسة قوي واعتقد انها تناسب فقط القراءة من المواقع الاخبارية أو الايميلات أو أي حاجة سريعة
ربنا يسهل إن شاء الله
-------------------
shams
نفس الرد السابق :) انا بجد بقيت مرعوب أكتر من الاول إني معرفش أطبعه ورقي
والله العظيم يا جماعة انا بتكلم في كلام فاضي ، انا مش عامل في الكتاب حاجات فظيعة مستوحاة من سكان كوكب أورانوس ، المشكلة مش في اللي عملته ، المشكلة في المطابع اللي في مصر ، الكلام ده ما يمشيش معاها وسهل قوي قوي تحصل أخطاء قاتلة ، فيه حاجات انا حاسبها بالمللي ، منها مثلا حجم الفونت ، إتصغر او أتكبر جه يمين جه شمال باظت الليلة كلها
نفسي بس في مطبعة تكون نسبة الخطأ فيها واحد سنتي بس مش أكتر من كده
أكتر من واحد سنتي باظ الكتاب
-------------------
soreal
يارييييييييييت الكلام ده في مصر
يااااااه ، دي حاجة محترمة جدا
عملها فعلا ستيفن كنج مع كتبه ونجحت جدا
انما هنا انشالله لو عملت ايه
حتتسرق حتتسرق وماحدش حيدفع ملليم أحمر
الناس هنا ماعندهاش قلب في الحاجات دي لإنها من الأساس مش حاسة أبدا إن ده غلط
لو بيل جيتس جه مصر وعرف إن نسخة الفيستا بتتباع على الرصيف بستة جنيه أمام مسجد الاستقامة في الجيزة حيقعد يشحت قدام باب المسجد زي المجاذيب
تحياتي وشكرا على التعليق

د/ رامي شهاب الدين said...

بسم الله

عجبت لحال الكتاب والمبدعين فى بلدنا ..فى الخارج الكتابة بتأكل عيش يعنى بتكون مهنة بتعيش صاحبها فى مستوى معيشة محترم ، أما فى مصر فلازم يكون لك عمل إضافى عشان تصرف بيه على الكتابة

فى البداية .. أنا أرى إنك تحاول تدور على دار نشر محترمة تطبع لك كتابك بالمواصفات إللى إنت عايزها ، ولو مالقتشى يابرنس يبقى تتوكل على المولى وتنشره إلكترونيا وإن شاء الله هيكون إنتشارة جيد ده فى حالة كون فكرة الكتاب جيدة إن شاء الله

أتمنى لك التوفيق ، وياريت بس تطلعنا على مستجدات هذا الموضوع

دمت بكل خير .. تحياتى

Oss said...

معلش يا دكتور على التأخير فى الرد
بس بجد أنا رأيى إنك تحاول تنشره فى دار نشر
لأن فى إحتماليه إن الكتب يتنقش ويتعمل بإسم واحد تانى بعد لما انت تنزله
وتلاقيه نازل فى نص المنتديات باسم واحد تانى
لا ياعم
تعب ساعه ولاتعب كل ساعه
هتفضل زعلان على مجهودك
فحاول تنشره ورقياً

تحياتى
وربنا يوفقك

asma alamin said...

اشرووووووف الجميل
تهانينا القلبية خبر جميل بجد انك هتعمل كتاب ولو عايز رأيى يبقى لازم يكون ورقى طبعا لان الكتاب الورقى زى مانت عارف ليه رونقه وقيمته ودليل ملموس على فكر وفلسفة صاحبه .. بس اوعى تنسى اول نسخة ليا
:)

أشرف حمدي said...

د\ رامي
طبعا يا دكتور حقول الاخبار أولا باول ، وشكرا جدا على الرسالة وإن كانت مؤلمة ، الواحد في مصر بيشتغل 500 حاجة عشان يلاقي ياكل وكان نفسي اتفرغ لحاجة واحدة مش حقول اتغني منها بس آكل منها عيش
عموما انا كاتب عن الموضوع ده في الكتاب برضه :) تحياتي
-----------------------
oss
انا خلاص فعلا اقتنعت بكده وأعتقد إني وصلت لحل مع الناشر وإن شاء الله في خلال شهر حكون مضيت العقد
تحياتي
-----------------------
أسماااااا
طبعا يا باشا :) نسختين تلاتة كمان إن شاء الله
شكرا على التهنئة وماتنسيش تصيّتيلي الكتاب بقى لما ينزل :) تحياتي البالغة

اجندا حمرا +Heart Beat said...

شوف ياأشرف اولا مبروك علي الكتاب و عقبال ماتنزله
انا من من محبي الكتاب اللي امسكه في ايدي مش من هواه قراءه الكتب الكترونيا متعب للعين و الأعصاب الصراحه
فأتكل علي الله و انشره و ربنا يوفقك و يجازيك خير انشاء الله

المعتز بدين الله said...

أخ أشرف انت عارف الانسة غادة بتاعة مدونة بيت العرايس والعرسان (بتاعة عايزة اتجوز)اطبعلها كتاب ساخر وجميل - فيما يبدو لانى مشترتوش - بس عن طريق تليفون لدار الشروق وماظنش ان انها اتكلفت مليم لكن فى الواقع ممكن تاخذ نسبة قد لاتزيد عن 30 % مثلا من الارباح عن اول كتاب لها كمثال لا اكثر وكنصيحة من الافضل لك مليار مرة انك تطبع الكتاب ورقيا لانه هيحقق التأثير المطلوب حتى لو اتسرق واتعمل منه مليون كوبى على النت فى كل المنتديات متخفش ياعم محدش برده هيقراه زى مانت قولت عندك 5 جيجا كتب الكترونى ومقرتهاش بس ده هيحققلك ساعتها مكسب اخر انك تتعرف يبقى جت فى صالحك ولا لآ الحاجة التانية النشر الورقى مفيد فى موضوع السيرة الذاتية واظنه افضل انك ترص فى سيرتك الذاتية لائحة بالكتب والروايات المؤلفة والمطبوعة ورقيا عن انك تكتب انا كتبت كتاب الكترونى انسى الكترونى دى خالص دلوقت انت بس اعمله ورق ومتقلقش بتوع الديفيدى فور اراب هيحولهولك الكترونى ! والفضيحة اصدى الدعاية هتكون بجلاجل ياعم .. ولما يطبع ابقى عرفنى عملت ايه لانى نفسى اطبع انا كمان كده كام كتاب من تأليف العبدلله ، ولو كتابك هيكون زى كتاب رمسيس يا كاريكاتير يا بتاع هيئة الكتاب يبقى ايه لازمة الصداع والطرق الخاصة فى الطبع اللى هتعجز دور النشر العجزة اساسا .. مع تحياتى

Counter