Total Pageviews

Thursday, October 02, 2008


هناك من الأفكار ما تجعلني غير متحمس لمناقشتها ، خاصة مع عقليات أقل ما توصف به أنها متخلفية وغبية ، ومن هذه الأفكار التي لاقت رواجا خلال السنوات الأخيرة موضوع تحريم الغناء استنادا إلى الفكر السلفي الأحمق ، ومن وجهة نظري أن الغناء كالسكين ، يمكنك أن تقشر به البرتقال أو تقتل به جارك المسن ، وبالحديث عن الحلال والحرام ، فإنه من البديهي أن نضع السكين جانبا ونتحدث عن حكم تقشير البرتقال والقتل ، لا أن نحلل ونحرّم السكاكين التي هي مجرد أدوات يمكن بها فعل الحلال والحرام ، فالعبرة بما تفعل ، والعبرة بالنيات ، وبالنتيجة النهائية التي وصلت لها من خلال استخدامك أداة ما ، وكذلك الحال مع الغناء ، هناك من يتغنّي بحب الله ورسوله ، لمشاعر الحب والنبل والإخلاص والتضحية ، لطوابير العيش ومشكلة البطالة والأجور المتدنية ، وهناك أيضا من يتغنى للأثداء النافرة والمؤخرات الممتلئة المترجرجة ، العبرة بما يقوله الغناء وما يدعو له ، والعبرة بالنتيجة أكانت ترتقي بالمشاعر الانسانية أم تمجد الفجور وتدعو له وتشجع عليه .
على أية حال هذا ليس موضوعنا ، فكما قلت ، هذه النوعية من الأفكار لا تستحق مناقشتها من الأساس ، الموضوع هذه المرة هو لعبة أتمنى أن تشاركوني فيها من خلال تعليقاتكم ، ولعبتنا هي الأغاني المرتبطة شرطيا بأحداث خاصة في حياة كل منا ، والتي تجعلك ما إن تسمع الأغنية حتى تستحضر الحدث كاملا أمام عينيك بكامل تفاصيله كما لو كان بالأمس ، دعوني أبدأ على الفور وسوف تفهمون ما أقصد ، فقط أسمحو لي أن أبحث داخل مجلد الأغاني على القرص الصلب وأبدأ في تشغيل الميديا بلاير ، حسنا ، كل شيء جاهز ، فلنبدأ
.
عيناي تغمض وحده ، أحتاج إلى قهوتي ، في أسرع وقت ممكن ، لعل الحب مرّ ولم أراه .
أحب قهوتي مرّة ، تذكرني بحياتي ، حياتي باتت نكرة ، يبدو أن الحب لن أراه
إلى متى سأبقى تائها ، إلى متى سأبقى تافها ، يبدو أن الحب لن أراه

يوري مرقدي \ قهوة
أستحضر طعم قهوتي المرة أثناء المذاكرة ، أشعر بالرعب والفزع من كل كلمة أقرأها ، هل أنا قادر فعلا على حشر كل هذا الكم من المعلومات قبل الامتحان ؟ لو لم أنجح فلن يمكنني التقدم لخطبة حبيبتي هند ، يمكنني أن أتحمل لقب ساقط أو فاشل ، ولكن أن تضيع مني حبيبتي بسبب هذه المواد الغبية ، فهذا لن أسمح به أبدا .
خايف من بكرة لما تيجي وأقابلك ، حهرب من جمال روحك ولا جمال قلبك
خايف من بكرة لما تشوفك عنيا ، وأعرف إن الملاك ده خلاص مابقاش ليا

محمود العسيلي \ خايف من بكرة
من أكثر الأغاني إيلاما لي ، ياااااااااااااه ، صوت العسيلي يعتصر قلبي بقسوة لا حدود لها ، أستحضر ليلتي قبل ميعاد حبيبتي غدا بمقهى فابيني بنهاية كوبري الجامعة ، في كل مرة أشعر بخوف شديد من أن تكون هي المرة الأخيرة ( فيه احساس في قلبي ورعشة في ايديا ، ليه يا حبيبي مش حاسس بيا ) أخشي أن تكون هي النهاية وأخسر أجمل شيء في حياتي ( والقلب إزاي أراضيه ، حب زي ده إزاي ألاقيه ) ، حيث أن ظروفي كانت صعبة للغاية ( انتي عارفة قد ايه صعبة الحياة ) ، وحتى هذه اللحظة وبعد أن تزوجت حبيبتي وأصبح لي منها إبنا رائع الجمال لازلت (خايف من بكرة) ألا أستطع توفير لقمة العيش في ظل هذه الظروف ( إنتي عارفة قد ايه صعبة الحياة) .
النور مكانه في القلوب ، احضن خيوط شمس الغروب ، يا تكون قد الحياة ، يا تعيش وحيد وسط الدروب
اليأس ضعف وخوف جبان ، لكن الأمل يفتح ببان ، يا تكون قد الحياة ، يا تعيش وحيد وسط الدروب
مدحت صالح \ طيور الظلام
أخبروني بأن جريدة إضحك للدنيا قد أغلقت ، لم أصدق ، ظننتها كذبة إبريل ، لو أكتشفت أنها كذبة فسوف تكون أسخف مقلب في حياتي ولسوف أقتلع عينا من فعلها ، سأعلقه على باب الجريدة وأتسلي بجلده بالسياط ، ولكن المهم الآن أن تكون مجرد كذبة سحيفة فلسوف ألهو كثيرا فيما بعد ، جلست على مكتبي وكتبت كلمات الأغنية مع رسم لرجل بائس "ينقش قلوبا على الحجر" وظهره مرشوق بالسهام لتنشر في صفحة كاملة بالعدد الأخير ، وأتذكر هذا الجزء تحديدا من الأغنية :
حلّي مرار الأيام ، لسة الحياة قدام ، قوم لون الأحلام ، وأوعى ما تضحكشي
.. وإياك ما تحلمشي

بكيث كثيرا وقتها ، كنت أرى نفسي واحدا ممن يرسمون البسمة على شفاه التعساء وما أكثرهم بهذا الوطن ، كنت أريد أن ألون الأحلام ، وأضحك ، وأحلم
مستنى ايه إمشي ، الحلم مانفعشي ، فوق من خيالك فوق ، أنسى بقى وإمشي
أقفل على قلبك كفاية تجرّحه ، وتعلّقه بحبال أمناي تطوحه ، من النهاردة الحلم مش حيفرّحه ، أرجوك ... ما تحلمشي

مدحت صالح \ ماتحلمشي
علمت أن أمر إغلاق الجريدة جدّي ، اعتصمت مع باقي زملائي ورفضت الخروج من مقر الجريدة ، وتذكرت هذه الأغنية التي تعبر بصدق شديد القسوة عن هذه الحالة ، وفي النهاية فقت من خيالي ، ومشيت ، وكففت عن الحلم
.
أكتفي بهذا القدر لأنني بالفعل لم اعد أحتمل سماع المزيد من هذه الأغاني ، ولكنها ستظل علامات ذات أهمية قصوى في حياتي ، والآن حان دوركم ، في انتظار أغانيكم وتعليقاتكم
تحياتي


25 comments:

TAFATEFO said...

أنا بيتهيألي اني أكتر واحد في الدنيا ملوش حكايات .. مع اني عايش بقالي 24 سنه .. بس مفيش حاجه بتفرق معايا أوي .. مفيش زي ما بيقولوا لحظات مؤثرة في حياتي

آه في أغاني بفتكر بيها ناس .. بس علشان هما اللي ادوهالي أو سمعوهالي أول مره .. انما طول عمري الثانيه بتعدي أول ما العقرب يتحرك من عليها .. يمكن مفيش أغنيه كده حتى غير أغنية
Wrapped Gloria Estefan
حلوه أوي أوي يعني الأغنيه دي .. وفاكر مين سمعهالي أول مره
و3 أغاني تانيين
I still
You're too good to be true
After all this time
وهما دول بالإضافه لأغاني دين مارتان هما كل الأغاني الأجنبي اللي أعرفها

:D:D

تفتكر يا دكتور في أمل؟؟!! أنا عارف اني هوبليس كيس .. متتعبش نفسك لو معندكش علاج

كل سنه وانت طيب يا دكتور أشرف وربنا يديم عليك السعاده

Unknown said...

امممممممممم عندى انا كمان اغانى كتير بس الدنيا عيد مش طالبة نكد بعدين بقى...كل سنة وانت طيب وناجح وعبقرى وجميل يا اشروف

د/ رامي شهاب الدين said...

موضوع رائع وجميل جدا
أنا شخصيا فيه أغانى بحس إنها بتعبر عنى وبتعبر عنى بكلام أنا نفسى ما أقدرشى أقوله ، يمكن أكتر أغنية منهم للمطرب مصطفى كامل فى أغنيتة الشجية دقت الساعات ,خصوصا لما بيقول :كل يوم شجرة حبايب عمرى بتنزف شوية، لا مليش احضان تهون قسوة الايام عليا ، لا مليش غير ماضى باكى وبكرة غايب من عنيا ، دى صعبة الحياة ..اوى

كذلك برده أغنية واحد من الناس للؤى إلى غناها فى فيلم يحمل الإسم نفسه

دمتم بكل خير
تحياتى

yas said...

مش لازم الاغانى تكون معبرة عن موقف علشان نحبها
انا مش لاقية اغنية بتفكرنى بموقف انا بحب الاغانى لان كلامها بيعبر عن حالة حلوة مش لازم تكون عليا
بس افتكرت اغنية
بس من غير ضحك
اغنية هم النمبتاعة الاطفال
مرة سألت الاستاذ ارنب ليه مانتش لابس نظارة
قال طول عمرى ظريف ومؤدب واكل منغير مااعمل غارة
علشان باكل اقدر العب واجرى اسرع من الطيارة
وزمان قالوا الجزر حلو بيقوى النظر
رحت انا واكل هم النم
بفتكر نفسي وانا متنحة قدام التليفزيون وبتفرج على الاغنية وانا قدامى اكبر طبق جزر ممكن تشوفه وفى الاخر نظرى ضعيف ولابسه اكبر نظارة بردو ممكن تشوفها
ههههههههههههههههه

Unknown said...

أحسستها ذاكرة اذن

أحلي اغنيه بجد فيهم بتاعة مدحت صالح النور مكانه ف القلوب

بجد الاغنيه دي راااائعه

أحسنت و أجدت التعبير

فعلا الغناء أداه

مثل الكوب فيه ماء .. أو لبن .. و ليس معني أن عندما يملؤه الخمر .. نمتنع عن استخدام الأكواب

تحياتي للتدوينه الرائعه و للاختيارات القيمه

ياسمين

Anonymous said...

عزيزي أشرف

بخصوص النصف الأول من موضوعك و تحريم الغناء عند السلفيين شوف مش بس الغناء اللي محرمينه هما مخهم كده و للأسف فيه ناس كتير بتسمع كلامهم و بتمشي وراه
زي ماقلت انا متفقه معاك في المقارنه اللي عقدتها بين الغناء و السكينه
تعتمد في المقام الأول علي طريقه تعامل كل بني ادم مع الوسيله المتاحه قدامه

نيجي بقه للنصف التاني من موضوعك و ارتباط بعض الأغاني ببعض المناسبات شوف انا دايما لما بكون في حاله حب بتلاقي اغنيه مثلا معلقه معايا او مجموعه اغاني لكن لما بتفضل قصه الحب لأي سبب تلاقيني مابطقشاسمع مجموعه الاغاني دي لأنها بتفكرني بالذي مضي
عشان كده بتلاقي دايما البلاي ليست عندي متغيره
كل سنه و انت طيب و عيد سعيد ياجميل

هرطقة said...

لما الشتا يدق البيبان
لما تنادينى الذكريات
لما المطر يغسل شوارعنا القديمة والحارات
ألقاني جايلك فوق شفايفي بسمتي
كل الدروب التايهة تنده خطوتي

أن تحنو الى قصة قديمة انتهت منذ سنوات
لكنك تعرف يقينا أنك لن تحب أبدا مثلما أحببت فيها
ربما تتزوج وتنجب وتبنى عالما كاملا لك بدونها
لكن بداخلك احتياج لم يمتلئ أبدا
لأنك لم ترغب يوما سواها

مش جاي ألومك عاللي فات
ولا جاي أصحي الذكريات
لكني بأحتجلك ساعات
لما الشتا يدق البيبان

حقا تعرف أنكما لا تتفقان ولن تكتمل تلك القصة أبدا
لكنك لا تملك إلا أن تشتاق إلى ذلك الذى لن يتكرر

هرطقة said...

جمبلة الفكرة يا أشرف
والصورة تحفة
i'm a fan of the yin-yang
and music
برافو يا فنان

Fantasia said...

فكرة رائعة واختيارات موفقة ومناسبة جدا للموضوع

معلش ملحوظة صغيرة.. اغنية مدحت صالح هي من فيلم أمير الظلام وليس طيور الظلام. وهي بالفعل أغنية جميلة ومؤثرة مثل كل اختياراتك

إياك ان تكف عن الحلم مهما اشتدت قسوة الحياة أو حاربت أحلامك أي ظروف

اغنياتي المفضلة كلها لمحمد منير.. لا أعلم ان كان هذا من سبيل الصدفة أو من تعلقي بصوت منير منذ الصغر

الكون كله بيدور.. واحنا وياه بندور
والليل بحر نعديه للي احنا بنحلم بيه
........

لو بطلنا نحلم نموت.. لو عاندنا نقدر نفوت
لو عدينا مرة خلاص.. لو بصينا ضاع الخلاص
حبة صبر، حبة حماس.. نلقى الحلم صورة وصوت
لو بطلنا نحلم نموت.. لو بطلنا نحلم نموت
..........

ولو في يوم راح تنجرح.. لازم تقوم واقف كما النخل باصص للسما، للسما
ولا انهزام، ولا انكسار.. ولا خوف ولا، ولاحلم نابت في الخلا، في الخلا
علي صوتك، علي صوتك بالغنا.. لسة الأغاني ممكنة، ممكنة

واحد من البلد دى said...

السلام عليكم

مع انى زعلان منك

لكن برضه ح اسألك عن احوالك و احوال عمرو..

كل عام و انت بخير

انا عن نفسى يا اشرف مش عارف ليه ما بتعجبنيش الأغانى بتاعة دلوقتى ..
أو تقدر تقول 90%منها..
يمكن علشان انا باكتب شعر ..

مش اى حاجة تأثر فيا..

لكن عموما انا بحب جدا أغانى النوبة و الصعيد و التراث عموما..

جراح الجسم يداويها المداوى
جراح الروح و يداويها مين؟
يا قلبى يا اللى صابر ع البلاوى
حضنت ف جرحك الناس اجمعين
وليلك يا بلادى طال علينا
وشمس الحق غابت من سنين


محمد منير



انا فى انتظارك...
حنيت..

تحياتى لك

ceasar said...

أتفق معاك يافنان في الكلام الجميل دة و انا برضة بتخنق جدا من الفكر السلفي دة و أحب اقول جملة واحدة بس دين الابداع مينفعش يمنع و يحرم الابداع وعلى رائى الاستاذ عمرو حالد لية ميطلعش من عندنا أحسن مهندس و دكتور و مغنى و فنان
وشكرا يا حبيبي يا أشرف حمدى

Unknown said...

موضوع تحريم الغنا ده قديم
رغم ان فيه شيوخ و علماء اختلفوا عليه و فيه من حلله لكن بشروط و فيه الى حرمه خالص بس المتشددين مصرين يحرموه مهما كانت معانى الاغنية جميلة

----------

كل سنة و انت طيب يا اشروف و لونها متأخرة أفتقدناك انت و هند يوم الفطار

كنت فوت يا اخى حكاية الخدمة دى عشان خاطر نعد مع بعض ده يوم فى السنة و احنا ما بنشوفش بعض كل يوم

:)

Anonymous said...

اشروووووووووف الجميل
كل سنة وانت طيب
جميل قوى موضوع الاغانى ده حرك فى قلبى مشاعر وفكرنى باغانى كتير بحبها وبتلمس وتر حساس فى قلبى ومعظمها اذا ماكانش كلها للكينج محمد منير
:)

وبمناسبة موضوع التيار السلفى ده طبعا انت عارف رائي الناس دى حرموا علينا الهوا اللى بنتنفسه حقيقى لما بفكر فيهم وفى كلامهم بحس انى بتخنق الرسم حرام .. الصور حرام .. الغنا حرام
حرموا علينا العيشة والى عايشينها منهم لله .. سيبك انت

كل سنة وانت بالف خير

zahra said...

(بطمنك يا حبيبى من أولها سكتنا لو عاندتنا هنكملها دنيتنا لو تعبتنا من عمايلها بالصبر انا و انت هنستحملها)
بطمنك لشيرين
اغنية تشغرنى بالكثير من الراحة و الإطمئنان أتذكر كم طمأنت بها حبيبى و كم ذكرنى بها كلما اشتدت علينا الأيام
(خلصت فيك كل الكلام يا معلم القلب القلب الغرام ) عمرو دياب
ربما ليست على علاقه وثيقة بالموقف الذى تذكرنى به و لكنها تذكرنى بحفلة تكريمى لنجاحى فى الشهادة الإبتدائية حيث ظلت هذه الأغنية تعمل طوال الحفل
(بكلمة منك تنسينى اللى عدا قوام تخلينى احس بقيمة الأيام تطمنى لسنين قدام) شيرين
دوما ما اشعر بها كلما ربتت كلماته على كتفى و انتشلتنى من قمة أحزانى إلى قمة ارتياحى
أشكرك على الذكريات الجميلة التى استعدتها مع لعبة أغانيك

tamer.sala7 said...

انا بقي مش حقولك كل الاغاني علشان متضحكش عليا

بص يا دكتور

اغنية الناجح يرفع ايده
بتفكرني بأسؤ ايام في تاريخي الدراسي
يوم رسوبي في الثانوية العامة

عايز اقولك اني كل ما اسمع الاغنية دي افتكر اليوم الكئيب ده واللي حصلي فيه لدرجة اني كرهت عبد الحليم حافظ

Unknown said...

"الفكر السلفي الأحمق"l

حسبي الله ونعم الوكيل

مفيش داعي نقطع في بعض , احنا بقينا ضعيفين جداً بين الأمم , ومفيش داعي نزود ضعفنا وتشتتنا

كل واحد بيحاول انه يبين الصواب , والي بيقتنع بكلامه بيعمل زيه

فيه الي حرم الغناء ومعاه الأدلة , يعني مش من دماغه
وفيه الي حللها بشروط, وبرضه معاه أدلة , يعني مش بمزاجه

المهم ان مش عشان انت مش مقتنع بكلام علماء - أيوه الي أفتوا علماء لهم وزنهم مش مجرد أفراد عشوائيين - تشتمهم وتتريق عليهم .

انت عندك قناعاتك , ومن مصلحتك ومصلحة الجميع , انهم يسمعوا وجهات نظر تانية , لأنه احتمال تلاقي ان انت كنت غلط وتصلح نفسك .

انما لو كل الي اختلفت معاهم خرستهم , ايه الي يضمنك ان انت صح ؟

انا بزور مدونتك أستمتع بموهبتك في الكاريكاتير , لكن بجد زعلت ان انت أهنتني كده بكل سهولة, مع اني بحترمك .

في أمان الله

أشرف حمدي said...

أبو عصر
بتحسبن عليا ؟؟؟ ههههههههه
شوف يا باشا ، من كلامك برد عليك
كل واحد من حقه إنه يقول رأيه ، وفيه نقطة مهمة كمان ، علماء الدين مش أنبياء ، من حقي أسخر منهم ومن حقي ما اعتبرهمش علماء أساسا
أم كلثوم كمان مش مقدسة
نجيب محفوظ مش مقدس
من حقي اختلف مع أي حد طالما إنه مش نبي
للأسف يا شيخ الاسلام جميل جدا ودين عظيم جدا وفيه ""علمااااء"" كتير شوهوه وبهدلوه وخللوه قدام العالم كله دين التخلف والإرهاب
لما انا اقف ضد دول فأنا بقف بجانب الدين مش ضده

انا لما لارس فيلكس رسم النبي ناقشته بالعقل وفهمته واكتشفت من خلال مناقشتي معاه إنه حمار حصاوي ولا يفهم حاجة عن الاسلام غير قنابل بن لادن والعلماء اللي بتتكلم عليهم
والعيب مش عليه العيب علينا إحنا

" طلع البدر علينا "
مش دي أغنية ؟؟؟ النبي إعترض ؟؟؟ زجر أهل المدينة وقالهم الغناء حرام ونزل فيهم دبح ؟؟؟

Anonymous said...

العزيز و القريب من القلب أشروف,

اولا أنا دكتور حسام ..كنا اتبادلنا بعض الايميلات أيام شرائك الكاميرا السوني لو كنت فاكرني.
أنت عارف يا أشرف انا مغرم بموهبتك قد ايه ..بالعكس..فخور انو فيه حد زيك أصلا رغم اني بختلف معاك في حاجات من وقت للتاني ..و لو تفتكر اني قلتلك اني في ليلة واحدة اكتشفت فيها مدونتك ماعرفتش انام غير لما خلصتها كلها .
نفس تعليق أبو عصر..بس من غير حسبنه :)لأني شفتك هنا من جواك ميت مرة و عارف انتا عامل ازاي.

لا من ادب الرأي و لا الحوار السخرية من شخص أو شتمه و وصفه بالحمق خاصة لو كان عالم له وزنه( مش كل العلماء اللي أفتوا بتحريم الغناء ارهابيين)و حتي الارهابيين لا أعتقد انو السخرية منهم وشتيمتهم حتكون مفيدة باي شكل.

حتي القرأن نهانا عن سب ألهة من يسب ألهتنا حتي لا تتحول القضية الي وصلة من السب و تتوه المعاني الحقيقية العميقة في الوسط ..و لكن أدب الحوار و التهذيب -الذي تملكهم انت أكثر من كثير من المدونين - و التمسك بالحقائق و صد الحجة بالحجة غالبا ما يجذب الشخص العادي المتعادل الي قضيتك.

و انما زي ما انت قلت ..بالحوار ..فإذا رغبت عن الحوار فبإبداء رأي مخالف و بكده تبقي طرحت وجهة نظر جديدة من غير ما تشتم حد.

عموما انا رأيي من رأيك .. و أنا مش سلفي علي فكرة لكن بالتأكيد أحترم من ينادي بالتوحيد و لو كان له عيوبه و محبكها شوية أكتر من ماريا كاري مثلا حتي لو غنت أغنية زي Hero أو براين ادمز لو غني Here I AM أو On a day like today ..

ده رأي متواضع مني لانسان أنا عارف انو أكيد فيه تقدير عميق متبادل بيننا و أخشي عليه ان يقع في خطا زي ده.

من ناحية الرد علي موضوعك الأساسي فأنا عاشق لما أسميه بموسيقي و اغاني المجد ..و هي التي تجعلني أري نفسي بداخلها في اجمل صوري قادرا علي تحقيق أحلامي ..

بالتوفيق يا أبو أشرف

أخوك : حسام

أشرف حمدي said...

عزيزي دكتور حسام
شكرا على تعليقك وأهلا بيك بعد الغيبة الطويلة دي
انا معاك في اللي بتقوله
بس يمكن أنا خلاص ماعدش عندي خلق لمناقشة موضوعات من النوع ده ، أنا بقول رأيي وخلاص فيها كمجرد غعلان عن رأي مش للنقاش
أصلي مجرب مناقشات كتير من النوع ده وكل اللي بيحصل إننا بندور حوالين بعض في دواير مالهاش نهاية
مين صح بقى مين غلط مش مهم بالنسبة للموضوعات دي
انا بقول رأيي وخلاص :)
لإن المناقشة ماممنهاش فايدة سواء عندي أو عند الطرف الآخر
خلينا نتناقش في أمور أبسط من كده زي حكاية النمل دي في التدوينة اللي بعد دي :)))
تحياتي وشكرا على مرورك وميرسي جدا على الكلمتين الحلوين دول

Unknown said...

دكتور أشرف , بعد التحية

جميل جداً ان انت وضحت في ردك انك مش عايز مناقشة , وانها مجرد ابدا رأي
انا كان عندي عدة ملاحظات على كلامك , وبالأخص في مسألة تحليل السخرية مع من تختلف معهم ,ونشيد طلع البدر ,
ولكني فضلت ان انا أحترم رغبتك , ومطولش النقاش اكتر من كده .

وأنا سعيد ان السبب وراء كلامك هو غيرتك على دينك , وانك بتدافع عنه , وده يدل على اننا متمسكين بديننا الحمدلله , وموصلناش للي الغرب وصله في ان الشباب هناك بينتقد دينه وفي الآخر بيسيبه ويبقى ملحد .
ولكن أيضاً مننساش قول الله تعالى :(ولن ترضى عنك اليهود ولا النصارى حتى تتبع ملتهم)

وأدعو لي ولك وللجميع ان ربنا يرينا الحق حقاً ويرزقنا اتباعه , والباطل باطلاً ويرزقنا اجتنابه .
في أمان الله

أشرف حمدي said...

أبو عصر
انا سعيد جدا بردك وتعليقك ، بالطبع أنا غيور على ديني والحمد لله ويحزنني بل يؤلمني بشدة صورة الإسلام في الخارج خاصة في الفترة الأخيرة ، شيء مستفز خاصة حينما تكون مقتنعا بدينك تمام الاقتناع ولكن لا تعرف كيف تغيّر هذه الصورة المشوهة المفززة التي غلفوا بيها الاسلام كدين إرهاب وتخلف
حاجة تفرس ، إزاي تخلف وإرهاب في حين إن العلماء العرب هم أصحاب الفضل الأول في كل العلوم الغربية
أعجبتني رواية للدكتور أحمد خالد اسمها "بحّاران" وهي العدد الأخير من سلسلة فانتازيا ، تتحدث عن نفس الموضوع
لك مني كل إحترام وحب وتقدير

Anonymous said...

احببت ان اشاركك فى بعض الاغنيات التى دائما ما تؤثر فى على الرغم من كثرة ما استمعت لها وهى
1- اغنية (ساعات .. ساعات ) للفنانة الجميلة صباح فهى تخلق فى نفسى حالة وجدانية لا اعرف لها وصفا وتمس فى نفسى وترا عميقا ياخذنى بعيدا
2 - اغنية (خايف اوعدك مااوفيش ) والحقيقة معرفش اسمها للرائع محمد منير كما اعشق له (على صةتك بالغنى ) من فيلم المصير فيها امل وحياة ورغبة فى كسر اليأس والاحباط ولنا بقية ..

Anonymous said...

اغنية مدحت صالح فعلا جميلة ولحنها حلو

من فيلم أمير الظلام
وليس طيور الظلام

3ali said...

hello there
I like your blog so much
and your work is STUNNING
:)

we bel nesba lel a3'ani howa mafeesh 3arabi kteer ya3ni , momken 7agat le moneer

ايدايا فى جيوبى و قلبى طرب
سارح فى غربة .. بس مش مغترب
وحدى لكن ونسان و ماشى كده
ببتعد .. معرفش أو بقترب

ايديا فى جيوبى - منير
بتوصف حيرتى و المود بتاعى أوى

و

ولا بيوصل ولا بيتوه .. ولا بيرجع ولا بيغيب
و لسة بيجرى و يعافر .. و لسة عيونو بتسافر ..
و لسة قلبه لم يتعب .. من المشاوير

النيل - منير
نفس الكلام اللى فات
:)

in english songs , most of the work of evanessence & linkin park really inspires me ..

and alot more .. it depends ..


my first visit , and won't be the last to your blog my friend ..

regards

adel said...

انا مش هاقولك غير تعلق صغير
مش لوحدك عيطت يوم ما قفلوا اضحك للدنيا
مش انت لوحدك اللي شفت الدنيا سودة
كل القراء عملوا اكتر منك
و اظن ان دي الجريدة الوحيدة اللي اتعملها مظاهرة في محاولة يائسة لانقاذ المنفذ الوحيد لينا

عادل
http://elbald-dy.blogspot.com/

Counter