Total Pageviews

Thursday, October 16, 2008

على بلد المحظور ودّيني



حينما نتحدث عن مصر مؤخرا ، نجد أنها من الدول التي استطاعت الوصول إلى مراكز متميزة في العديد من الأمور ، منذ فترة على سبيل المثال كان مطلوبا مني كاريكاتير بمناسبة حصول مصر على المركز الاول في استيراد القمح ، كان هذا منذ عدة سنوات ولا أعرف ما وصلنا إليه الآن لانني لم اعد مهتم ، أولى دول العالم استيرادا للقمح بعد أن كنا نصدره إلى كل دول أوروبا في عهد محمد علي باشا ، بالإضافة إلى صفر المونديال الشهير والذي أصبحنا بفضله الدولة الوحيدة التي لم تحصل على صوت واحد يوحّد ربنا ، طب نخسر آه بس ناخد صوت ، صوتين ، بوسة طيب ، أي حاجة ، هذا مع المركز المتميز في قمع حرية الصحافة ، وغيرها الكثير من المراكز المتقدمة ، والآن نجد أن مصر هي واحدة من ثلاثة دول فقط تحظر استخدام الهواتف المحمولة المزودة بخاصية تحديد المواقع ! مصر وسوريا وكوريا الشمالية من بين كل دول العالم على سطح كوكب الأرض تحظر استخدام هذه التكنولوجيا لسبب أمني مجهول تماما ، في الواقع وبالرغم من عملي ككاتب تقني بمجلة كمبيوتر وأكتب كثيرا عن التقنيات الحديثة ، إلا انني لا اعرف مدى توافر الهواتف المحمولة مثل الآي فون وهواتف نوكيا الحديثة وغيرها في مصر ، وما هو الضرر الأمني من استخدام هواتف من هذا النوع ؟، وهل قرار الحظر قد أحدث أي نتيجة غير أنه أعطى الفرصة لدخول هذه الهواتف بشكل غير شرعي وبالتالي بأسعار فلكية ؟
نفس المشكلة مع حظر استخدام طابعات الليزر الملونة إلا بتصريح أمني ، بالرغم من أن النقود الحالية مستحيلة التزوير وأنا أشهد لها بذلك ، العملة المصرية الورقية أحد أصعب العملات في التزوير ، علامة مائية وألوان ذهبية وفضية وشريط رفيع لا اعرف كيف أدخلوه بالورق نفسه مكتوبا عليه فئة العملة ، ومناطق بارزة وأخرى محفورة و و و ، هذا شبه مستحيل تقريبا ، ولم يولد بمصر هذا العبقري الذي يجيد تزوير كل هذا ، فلماذا الحظر ؟ وفي ظل كل هذا القدر من حوادث التحرش سواء في الأعياد أو غيرها نجد أنه قد تم حظر استخدام وسائل الدفاع عن النفس مثل البخاخ والصاعق ، ماهو لاموآخذه مافيش مجرم حيستخدم بخاخ أو صاعق في أي عمل إجرامي وإلا يبقى فضيحة بين زمايه المجرمين ، دي حاجة بناتي قوي يعني ، المجرم مطوته في جيبه وموسه تحت لسانه ، البخاخ ده على رأي أحمد حلمي بيستخدمه الشباب كمزيل عرق تحت باطاتهم ، أشياء كثيرة تخنقني في الواقع ، مثل عبارة ممنوع الاقتراب والتصوير ، يا سلام ؟ ماهو جوجل إيرث أهوه فاضح مصر كلها من فوقها لتحتيها لأي عيّل قاعد على القصرية وفاتح النت ، ايه النباهة دي والنبي ؟ يذكرني هذا أيضا بحظر المواقع الإباحية في بعض الدول العربية ، على اعتبار إن كده خلاص الشعب مش حيشوف ولا حيتفرّج ، وهناك ملايين الطرق للتحايل على ذلك ، التفكير في حظر الفيس بوك في مصر منذ فترة ، خيابة منقطعة النظير .
أنا لست ضد أي قرار أمني في مصلحة الوطن ، ولكن يجب مع صدور أي قرار أن يكون ملحقا بأسباب مقنعة تجعلني أنا وأنت وغيرنا متحمسا ومدافعا عن قرار الحظر ، لا أن نتعامل معه بسخرية واستهانة . هذا إذا كانت الحكومة جادة في مسألة أن نتعاون جميعا من أجل مصلحة الوطن .
عموما هي فرصة للنقاش حول ما هو محظور وأسباب حظره ، وأثناء ذلك ربما نفاجأ بان مصر هي الدولة الوحيدة في العالم التي تحظر مش عارف إيه .
تحياتي

18 comments:

طالب ثانوى said...

بوست جامد جدا ياشرف لاوطلع كمان ان مصر تربتها لاتصلح لزرع القمح اة والله بيقولوا كدة

الا صحيح انا سمعت زمان انكوا لما تيجوا تعاكسوا بنتين تقولو احلى اللى فى النص

او احسن واحدة ام جزمة حمرا وكدة طرق لذيذة اوى

وكانت البنت لما تتضايق تقول ياسم مش روح ياروح امك

ودى اقل حاجة بتتقال كل حاجة بتتغير للاسوا

طالب ثانوى said...

هيييييييييية طلعت اول وتانى تعليق

TAFATEFO said...

قرار أمني في مصلحة الوطن

----

ولكن يجب مع صدور أي قرار أن يكون ملحقا بأسباب مقنعة تجعلني أنا وأنت وغيرنا متحمسا ومدافعا عن قرار الحظر

-----

هذا إذا كانت الحكومة جادة في مسألة أن نتعاون جميعا من أجل مصلحة الوطن

----

د/ أشرف يا حبيبي .. انت عارف ان أنا بحبك ولا لا؟ عارف ولا لا؟ جاوب على قد السؤال

عدينالك امبارح موضوع ظابط الشرطه وقولنا الرجل ده بتاعنا ومحسوب علينا وميصحش نضايقه .. انما كده بقى لا .. ستوب .. وقف عندك وخليك حلو

انت نمت امتى امبارح؟ وصحيت امتى؟

أنصحك متنامش أقل من 8 ساعات يومياً علشان صحتك ابتدت تتأثر

TAFATEFO said...

نسيت صحيح

كل الجمل البولد دي يا أشرف بك .. في كتاب جليل ودمنه .. في كتاب الأتاري لأبي فرج الدالي

ميصحش تكتبها هنا .. عيب .. عييييب

قرار أمني ايه ومبررات ايه ومصلحة وطن ايه

هما دول بيفهموا علشان يفكروا في دوافع أو مبرررات .. أو حتى المصلحه المترتبه عن قرار السماح والمنع؟ ومصلحة وطن ايه يا حبيبي اللي هيفكروا فيها دي؟

أقولك ايه .. تصبح على خير

أشرف حمدي said...

تفاتيفو
يا راجل ماتسبني استهبل شوية طيب
:)
شوية من نفسي طيب يا عام الحاج
يمكن حد من الشرطة يرد عليا ، ماحبتش أهاجم قوي يعني عشان أسيب فرصة لحد يرد
ههههههههه حرام عليك اللي بتعمله فيا ده

انت عاوز تحبسني أنا عارف
مش حتهمد قبل ما تشوفني متعلق في العروسة

أشرف حمدي said...

هما دول بيفهموا علشان يفكروا في دوافع أو مبرررات .. أو حتى المصلحه المترتبه عن قرار السماح والمنع؟ ومصلحة وطن ايه يا حبيبي اللي هيفكروا فيها دي؟
------------
ده كلام تفاتيفو يا حضرتك الظابط والله مش أنا ، انا ماليش دعوة
ده هوّه والله

Anonymous said...

علشان كده العيال عندنا ايام مشروع التخرج فى الكلية كانوا شغالين GIS
واستغربت اوى لما ما كملوش المشروع وعملوا برنامج GPS
بما انهم عملوا الخرايط خلاص وظبطتوها
طب ما يلغوا المواد دى من مصر ليه بنتعلمها مادام مش هنستخدمها

مهندس مصرى

زهرة الياسمين said...

يحافظوا على مصلحة الوطن
يا سلام على الوطنية
خلاص هى كل الدنيا بقيت تمام و الأمن مستتب و مش فاضل غير التليفونات المحموله

ahmed said...

د/أشرف
انا متفق معاك فى كل البوست ما عدا جزئية حظر المواقع الإباحية
انا عارف إن الحظر مش حيمنع تداول أفلام البورنو لكن اللى نقدر عليه نعمله و أظن حضرتك عارف زمان قبل الإنترنت كانت مشاهدة فيلم فيديو ثقافى صعبة أد إيه
ده نقطة إختلافى الوحيدة
تحياتى
:)

أشرف حمدي said...

معلش حرد سريعا على أبو حميد
أيوة يا باشا :) ويمكن ده السر في إن أفلام البورنو زمان كان ليها طعم تاني خالص
هههههههههههههه
بص حنبقى نتكلم في هدوء وموضوعية في الموضوع ده ، وكويس إنك أثرته
( مالهاش علاقة بالإثارة إياها والله )
انا ليا رأي في الموضوع ده ولما تسمعه يمكن تفهمني أكتر
تحياتي

اجندا حمرا +Heart Beat said...

موضوعك ياأشرف جمع حاجات كتيره مهمه اوي و فعلا جوه كل واحد فينا بتدور التساؤلات دي

وقت النوكيا ال95 اما ظهر قعدوا يقولوا ان فيه تكنولوجيا الجي بي اس و اتمنع بيعه في مصر و سمعت انه خلاص بقي بيتباع مش عارفه بقي شالوا منه الحكايه دي و لا ايه
المشكله عندنا يااشرف انهم بيمنعوا الحاجه و بيفتحوا الباب الخلفي ليها يعني مش منع و خلاص
تمام زي المواقع الاباحيه اللي عملوا عليها حمله ال يعني الناس حتغلب و انت فاكر وقت اما كنت بتناقش معاكم في كده عندي

بتستفزني فعلا اليافطه بتاعت ممنوع الاقتراب او التصوير
طب و عملوا ايه بقي في جوجل اللي بين كل حاجه هنا؟
انا معاك ان لازم اما يكونوا عايزين يمنعوا حاجه يقولولنا اسباب مقنعه للمنع مش منع لمجرد المنع

تحياتي علي موضوعك المميز

ام كوكي said...

ايه النشاظ ده ؟ ايوا كده.. متغيبش كتير علينا

انا عايزة اعرف والنبي دلوقتي مع كل الحوادث والبلاوي السودا اللي بنسمعها دي الواحدة لو اتعرضت لأي مضايقة او موقف رخم ممكن تدافع عن نفسها ازاي؟؟؟؟؟ ولا نشوفلنا حد من الحلوين اياهم يدينا عصاية كهربائية من بتوع الشرطة نخوف بيها الناس؟؟
طب دا انا كنت عايزة اشتري من الحجات دي من برا مصر .. فكرك ممكن يمسكوني بيها في المطار علي انها سلاح بدون ترخيص؟؟!!!
او يفتكروني جاسوسة بالموبايل اياه!!

حسبي الله ونعم الوكيل

~*§¦§ Appy §¦§*~ said...

هههههههه امسكوه انت عاوز تعمل انكلاب يا اشرف بيه ولا ايه
بص بقى بما ان رنصهم بطيخ تكنولوجيا فلو سالت حد فيهم مش هيعرف يجاوبك
بص يا حج اولا يعنى هما بيخافوا من اى حاجه مجهوله ومش عارفينها
اقسم لك بالله ان نصهم ميعرفش اصلا كمبيوتر بيشتغل ازاى وبيجيبوا موبيلات ولا بيفهموا فيها الا كله كليليه هههههههههههههههههههههههههه
خدوه على البوكس بقى

Zika said...

فعلا احنا في بلد
الممنوعات
فاكر قصيدة احمد فؤاد نجم
( وكل يوم في حبك تزيد الممنوعات وكل يوم بحبك اكتر من اللي فات )

عادي
الباشا قال ممنوع
يبقي ممنوع
ممنوع ممنوع ممنوع
وبعدين كل حاجه في البلد ماشيه بالعكس
بعد كده هتلاقي الناس ماشيه علي ايديها
او يا اما تلاقيهم ماشيين بضهرهم
تحياتي

TAFATEFO said...

كل عام وحضرتك بخير وصحه وسعاده يا دكتور

وبالتوفيق دائماً إن شاء الله

Anonymous said...

اكتر حاجه بتخنقني انا بقى
الفاميه بتاع العربيه
بيمنعوه ليه مش فاهم !!

fashkool said...

تحياتى
خد سا سيدى عندك .. ممنوع على الموظف العام الادلاء باى تصريحات لوسائل الاعلام المقرؤه والمسموعه والمرئيه الا باذن خاص من الجهات المختصه .. ممنوع التصوير .. ممنوع الدخول لغير العاملين .. كتير من الممنوعات وانا حافكر لك فى حاجات كتير بس استنى على شويه لحد ما افتكر قائمد الممنوعات.!

Anonymous said...

انا متفقة معاك في كل الكلام الي قلته ماعدا حظر المواقع الاباحية..
ده هو الي المفروض يحصل المواقع دي اصلا المفروض تدمر لانها بتفسد الاخلاق وبتقلل الحياء وهي السبب في التحرشات الي بتحصل
اكيد مش هنقدر نمنع الناس انها تتفرج على افلام اباحية لكن على الاقل نعمل الي علينا وده هيقلل ويصعب عليهم بدل ما كل واحد قاعد في بيته يقدر ينزل اي فيلم وهو قاعد ويتفرج كدة بكل بساطة

Counter